2018 ಅಕ್ಟೋಬರ 4 – 7 : ವಿಶ್ವ ಕೊಂಕಣಿ ನಾಟಕ ಮಹೋತ್ಸವು

ವಿಶ್ವ ಕೊಂಕಣಿ ಸಂಗೀತ ನಾಟಕ್ ಅಕಾಡೆಮಿ ವತೀನ 2018 ಅಕ್ಟೋಬರ ದಿ. 4 ತಕುನು 7 ಮೆರೆನ ಚಾರಿ ದೀಸಾಂಚೆ ವಿಶ್ವ ಕೊಂಕಣಿ ನಾಟಕ ಮಹೋತ್ಸವು ಮಂಗ್ಳೂರ‍್ಚೆ ಟಿ.ವಿ.ರಮಣ ಪೈ ಸಭಾಗೃಹಾಂತು, ಹರ‍್ಯೇಕ ದೀಸು ಸಾಂಜೆ ಸಾಡಿ ಪಾಂಚ ಘಂಟ್ಯಾಕ ಚಲಚೆ ಆಸ್ಸ. ಕೊಂಕಣಿ ನಾಟಕ ಶೆತಾಂತ್ಲೆ ನಾಂವಾಧಿಕ ಶ್ರೀಮತಿ ಕಮಲಾದೇವಿ ಚಟ್ಟೋಪಾಧ್ಯಾಯ,ಶ್ರೀ ರಮಾನಂದ ಚೂರ್ಯಾ, ಶ್ರೀ ಚಾ.ಫ್ರಾ.ಡಿಕೋಸ್ತಾ ಆನಿ ಶ್ರೀ ಹೊಸಾಡ ಬಾಬುಟಿ ನಾಯಕ್ ಹಾಂಗೆಲೆ ಉಡಗಾಸಾರಿ ಮಂಗಳೂರ‍್ಚೆ ಶಕ್ತಿನಗರಾಂತು ಆಸ್ಚೆ ವಿಶ್ವ ಕೊಂಕಣಿ ಕೇಂದ್ರಾಚೆ ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚಾನ ಕರ್ನಾಟಕ ಸರಕಾರಾಚೆ ಕನ್ನಡ ಆನಿ ಸಂಸ್ಕೃತಿ ಇಲಾಖೇಚೆ ಸಹಕಾರಾನ ನಾಟಕ ಮಹೋತ್ಸವು ಆಯೋಜನ ಕೆಲ್ಲಾ.

ದಿ. 4 – 10 – 2018 ಕ ಕೇರಳ ರಾಜ್ಯಾಚೆ ಎರ್ನಾಕುಲಂ ಚೆ ಕೇರಳಾ ಕಲ್ಚರಲ್ ಫೋರ್ಟ್,ಎಲಮಕ್ಕರ ಹಾನ್ನಿ ಪ್ರಸ್ತುತ ಕೊರ‍್ಚೆ ’ರಾವ್ ಮಾಮ್ಮಾಲೆ ವ್ಹೊರಣ್’ ನಾಟಕಾಚೆ ಮೂಳ ಕಥಾ-ಜಾನ್ ಫೆರ್ನಾಂಡಿಸ್. ನಿರ್ದೇಶನ ಆನಿ ಸಂಭಾಷಣ -ಚಂದ್ರಬಾಬು .ಯು.ಶೆಟ್ಟಿ. ಸಂಗೀತ ಸಂಯೋಜನ-ಸಂದೀಪ್ ನಟರಾಜನ್ ಆನಿ ಸಾನು ಗೋಪಿನಾಥ್. ಆಧುನಿಕ ಜೀಣ್ಯೇಚೆ ಝೂಜಾಂತು ಹೊಡಗುನು ವತ್ತ ಆಸಚೆ ಕೊಂಕಣಿ ಲೋಕವೇದಾಚೆ ಸಂಪತ್ತಿ, ಸಂಪ್ರದಾಯು, ರೀತಿ ರಿವಾಜ,ಪದ-ವ್ಹೋವ್ಯೊ ಪರತ ಉಡಗಾಸ ಕರಯ್ತಚಿ, ಪಾತ್ತಳ ಹಾಸ್ಯಾಚೆ ಲೇಪಾ ಸಾಂಗಾತ ಹ್ಯಾ ಪೂರಾ ರಾಖ್ಖುನು ವ್ಹರಕಾ ಜಾಲ್ಲೆಲೆ ಅನಿವಾರ್ಯತಾಚೆ ಸಂದೇಶೂಯಿ ಹೆಂ ನಾಟಕ ದಿತಾ.

ದಿ.5 -10 – 2018 ಕ ಮಂಗಳೂರ‍್ಚೆ ’ರಂಗ್ ಅಂತರಂಗ್’ ಪಂಗಡಾಚಾನ ಪ್ರಸ್ತುತ ಕೊರಚೆ ’ವರ್ಸಾಕ ಎಕ ಪಾವ್ಟಿ’- ನಾಟಕಾಚೆ ಕಾಣಿ ಆನಿ ನಿರ್ದೇಶನ- ಎಡ್ಡಿ ಸಿಕ್ವೇರಾ. ಸಂಭಾಷಣ -ಚಾ.ಫ್ರಾ. ಡಿಕೋಸ್ತಾ. ಸಂಗೀತ ಸಂಯೋಜನ-ರೇನ್ಸನ್ ಸೆರಾವೊ. ವಾಂಚುನು ಆಸತನಾ ನ್ಹಂಯವೆ ತಾಂಚೆ ಉತರ್ ಪ್ರಾಯೇರಿ ಪಳೋವುನು ಘೇನಾಶಿ ಆವ್ಸು-ಬಾಪ್ಪುಸು ಗತ ಜಾತ್ತರಿ, ವಾರ‍್ತಾ ಪತ್ರಾಂತು ದಿಖಾವೇಚೆ ಉತ್ರಾಚೆ ಸಾಂಗಾತ ತಾಂಗೆಲೆ ಭಾವಚಿತ್ರ ಛಾಪುನು,ಘರಾಂತು ತಾಂಗೆಲೆ ಹೊಡ್ಡ ಹೊಡ್ಡ ಭಾವಚಿತ್ರ ಘಾಲ್ನು, ಫುಲ್ಲಾ ಮಾಳಾ ಘಾಲ್ನು, ಸಿಸಡ್ಯೇಚೆ ದೋಳ್ಯಾ ಉದ್ದಾಕ ಕಾಣು ಕೃತಕ ಮೋಗು ದಾಕ್ಕೊವ್ಚೆ ಆತ್ತಾ ಕಾಳಾಚೆ ಚೆರ್ಡು ಬಾಳಾಂಗೆಲೆ ಡೋಂಗಿ ಣಾಚೆರಿ ಹೇ ನಾಟಕ ವಿಡಂಬನಾತ್ಮಕ ಜಾವ್ನು ಉಜ್ವಾಡ್ ಘಾಲ್ತಾ.

ದಿ. 6 -10 – 2018 ಕ ಗೊಂಯ್ಚೆ ಅಮ್ತ್ರುಜ್ ಲಲಿತಕ್ ಪಂಗಡಾಚಾನ ಪ್ರಸ್ತುತ ಕರಚೆ ’ಪ್ರೇಮ್ ಜಾಗೊರ್’ ನಾಟಕಾಚೆ ರಚನಾ -ಪುಂಡಲೀಕ ನಾರಾಯಣ ನಾಯ್ಕ್. ನಿರ್ದೇಶನ – ಶ್ರೀಧರ ಕಾಮತ್ ,ಬಾಂಬೋಲ್ಕರ್. ಸಂಗೀತ ಸಂಯೋಜನಾ- ಚೇತನ ಬೆಡೇಕರ್. ಗೊಂಯ್ಚೆ ಲೋಕವೇದ ರಂಗಮಾಂಚಿ ಪ್ರಕಾರ ಜಾವ್ನು ಆಸ್ಚೆ ’ ಜಾಗೊರ್’ ದ್ವಾರಿ ಪಂಚ್ವೀಸಾಕಯಿ ಚಡ ಕಲಾವಿದಾಂಗೆಲೆ ಮೇಳಾರಿ ಪರಂಪರಾ ಆನಿ ಆಧುನಿಕಪಣಾಚೆ ಮದ್ದೆಂತ್ಲೆ ಝೂಜ, ಪದ ಆನಿ ನಾಚಾ ಮುಖಾಂತ್ರ ಹೆ ನಾಟಕ ಪ್ರಸ್ತುತ ಕರ‍್ತಾ.

ದಿ. 7 -10 – 2018 ಕ ಮುಂಬೈಚೆ ಕೊಂಕಣಿ ತ್ರಿವೇಣಿ ಕಲಾಸಂಗಮ ಪಂಗಡಾಚಾನ ಪ್ರಸ್ತುತ ಕರಚೆ ’ಹೂನ ಉದ್ಕಾ ಘೋಟು’ ನಾಟಕಾಚೆ ರಚನಾ- ಹೊಸಾಡ ಬಾಬುಟಿ ನಾಯಕ. ನಿರ್ದೇಶನ– ಡಾ.ಚಂದ್ರಶೇಖರ .ಎನ್.ಶೆಣೈ. ಸಂಸಾರಾಂತು ಏಕಮೇಳೀಚೆ ಆನಿ ಮೋಗಾಚೆ ಅನಿವಾರ್ಯತಾ ಹೇ ನಾಟಕಾಚೊ ಸಂದೇಶು.

ಮುಖ್ಯ ಜಾವನ ಕೊಂಕಣಿ ಭಾಸ ಉಲೊವಚೆ ಗೋಂಯ್, ಕರ್ನಾಟಕ, ಮಹಾರಾಷ್ಟ್ರ ಆನಿ ಕೇರಳ ರಾಜ್ಯಾಂಕ ಪ್ರಾತಿನಿಧ್ಯ ಕೊರಚೆ ಹೀ ಚಾರಿ ನಾಟಕ ಪಂಗಡ, ತಾಂಗತಾಂಗೆಲೆ ಪ್ರದೇಶಾಚೆ ನಾಟಕಕಲಾ ಎಕಾಮೆಕಾ ವಾಂಟುನು ಘೇವನು ಸಾದರ ಕೊರಚೆ ಹೆ ವಿಶ್ವ ಕೊಂಕಣಿ ನಾಟಕ ಮಹೋತ್ಸವು ಉಚಿತ ಪ್ರವೇಶಾ ಮುಖಾಂತರ ಜಾವನ ಮಂಗಳೂರ ಆನಿ ಆಸಪಾಸಾಚೆ ಕೊಂಕಣಿ ನಾಟಕ ಕಲಾ ಮೋಗೀಂಕ ಭರಪೂರ ಮನೋರಂಜನಾ ಚಿಂತನಾ ಸಾಂಗಾತ ದಿತ್ತಲೆ ಮ್ಹೋಣ್ಚಾಂತು ಸಂಶಯು ನಾ.

► ಶಕುಂತಲಾ.ಆರ್.ಕಿಣಿ

 

 

Check Also

ಬಾನುಲಿ ಪಯಣವನ್ನು ಸಹ್ಯವಾಗಿಸಿದ ಬಾಳ ಪಯಣಿಗರು

ನನ್ನ ನಿವೃತ್ತಿಯ ದಿನ ಆಕಾಶವಾಣಿಯ ಮನೋರಂಜನಾ ಸಂಘದವರು ಏರ್ಪಡಿಸಿದ ವಿದಾಯ ಸಮಾರಂಭದಲ್ಲಿ ಅದರ ಅಧ್ಯಕ್ಷರೂ ನಿಲಯದ ಅಭಿಯಂತರರೂ ಆದ ಶ್ರೀ …

Leave a Reply

Your email address will not be published. Required fields are marked *

Share ...please don\'t COPY !