Trending Now

ವೊಳಿ

ಯ್ಲೆವಾರ್ ಸುಪ್ರೀಂ ಕೋಡ್ತಿಥಾವ್ನ್ ದೋನ್ ಮಹತ್ವಾಚೆ ತೀರ್ಪ್ ಭಾಯ್ರ್ ಆಯ್ಲೆ. ಪಯ್ಲೆಂಚೊ ಶಬರಿಮಲೆ ದಿವ್ಳ್ಯಾಂತ್ ಆನಿ ಮುಖಾರ್ ಸ್ತ್ರೀಯಾಂಕ್ ಪ್ರವೇಶ್ ಆನಿ ದುಸ್ರೊ ಲಗ್ನಾಭಾಯ್ಲೊ ಸಂಬಂದ್ ಅಪ್ರಾಧ್ ನ್ಹಯ್. ಪಯ್ಲೆಂಚೊ ತೀರ್ಪ್ ಸ್ವಾಗತಾಚೊ ತರ್ ದುಸ್ರೊ ಖಂಡನೀಯ್. ಪೂಣ್ ಪಯ್ಲೆಂಚ್ಯಾ ತೀರ್ಪಾಕ್ ಲೋಕಾನ್ ಸ್ವೀಕಾರ್ ಕರಿನಾಸ್ತಾಂ ವಾದ್ ವಿವಾದಾಕ್ ವೊಡ್ಲೊ ಆನಿ ದುಸ್ರ್ಯಾ ತೀರ್ಪಾ ವಿಶ್ಯಾಂತ್ ಮೊನೆಂಪಣ್ ಸಾಂಬಾಳ್ನ್ ಎಕಾ ರಿತಿನ್ ತಾಚೊ ಸ್ವಾಗತ್ ಕೆಲೊ. ಆಜ್‌ಕಾಲ್ ಮನಿಸ್ ಅಪ್ಲ್ಯಾ ಮರ್ಜೆ ಪರ್ಮಾಣೆ ಜಿಯೆಂವ್ಕ್ ಶಿಕ್ಲಾ ಆಸ್ತಾಂ ಬರೆಂ ಆನಿ ವಾಯ್ಟ್ ಕುಶಿಕ್ ದವರ‍್ನ್ ಸುಲಭಾಯೆಚಿ ಆನಿ ಅಧಿಕಾರಾಚಿ ವಿಂಚವ್ಣ್ ಕರಿತ್ತ್ ಆಸಾ. ಹಾಂಗಾಸರ್ ಮನ್ಶ್ಯಾಚ್ಯಾ ನೈತಿಕ್ ಮೊಲಾಂಚೆರ್, ನಿಸ್ಕಳ್ ಜಿಣ್ಯೆಚೆರ್, ದೇವ್-ಧರ್ಮಾ ವಿಷ್ಯಾಂತ್ ಜಾಯ್ತಿಂ ಸವಾಲಾಂ ಉಬಿಂ ಕರ‍್ತಾ. ಹಿಂ ಸವಾಲಾಂ ಧೊಸ್ತಾನಾ ಉದೆಲ್ಲ್ಯೊ ಥೊಡ್ಯೊ ವೊಳಿ ಹಾಂಗಾಸರ್ ಉತ್ರಯ್ಲ್ಯಾತ್.

► ರೋಶು, ಬಜ್ಪೆ

ಜಾತ್ ಕಾತ್ ಪಳಯ್ನಾಸ್ತಾಂ
ಶುದ್ಧ್ ಅಶುದ್ಧ್ ಮ್ಹಣ್ ಲೆಕಿನಾಸ್ತಾಂ
ಫಕತ್ತ್ ಸ್ತ್ರೀ ಮ್ಹಳ್ಳ್ಯಾಫರಾ
ಪಯ್ಶೆ ಉಡೊನ್
ಖಟ್ಲ್ಯಾರ್ ಲೊಳ್ತಾನಾ
ಸಯ್ತಾನಾಕ್ ಪಾಂಗೊರ‍್ನ್
ದೆವಾಕ್‌ಚ್ಚ್ ವಿಸ್ರಾಲ್ಲೊಯ್ ತುಂ
ತ್ಯಾಚ್ಚ್ ದೆವಾಕ್
ಪವಿತ್ರ್‌ಪಣಿ ಸಾಂಬಾಳುಂಕ್ ಮ್ಹಣ್
ಮ್ಹಾಕಾ ಸ್ತ್ರೀ ಮ್ಹಣ್ತಾಯ್?
ಅಶುದ್ಧ್ ಮ್ಹಣ್ತಾಯ್?
ಖೊಟಿ ಮ್ಹಣ್ತಾಯ್?
ವಚ್ ಆನಿ ದಿವ್ಳಾಂತ್ ಪಳೆ
ತುವೆಂ ದಾರಾಂ ಭಿತರ್ ಫಿಚಾರ್ ಕೆಲ್ಲೊ ದೇವ್
ಕೆದ್ನಾಂಗೀ ದಾರಾಂ ಉಗ್ತಿಂ ಕರ‍್ನ್
ಮ್ಹಜ್ಯಾ ಕೊಟೆರಾಂತ್
ವಸ್ತಿ ಕರ‍್ನ್ ಆಸಾ.

⊕ ⊕ ⊕

ಬಾಯೆ
ತುಕಾ ದೆವಾಕ್ ಪಳೆಂವ್ಕ್ ಜಾಯ್ ತರ್
ಹ್ಯಾ ದಿವ್ಳಾಚೆಂ ನ್ಹಯ್
ಕೊಡ್ತಿಚೆಂ ಬಾಗಿಲ್ ಬಡಯ್

⊕ ⊕ ⊕

ಅಖ್ರೇಕ್ ತರೀ ಆಯ್ಲೆ
ದೆವಾಕ್ ಭೆಟ್ಚೆ
ಸ್ತ್ರೀಯಾಂಚೆ ಬರೆ ದೀಸ್
ಪೂಣ್ ಹೆಂ ಕಿತೆಂ
ದೆವಾಚೆ ಭೆಟೆರ್
ಭಕ್ತಿಕ್ ಆಡ್ ರಾವ್ಲ್ಯಾತ್
ಮ್ಹಣೊನ್ ಅತಾಂ
ಆಮ್ಚೆ ಖೊಟೆ ದೀಸ್

⊕ ⊕ ⊕

ಹಿಂಸಾ ಹತ್ತ್ಯಾಕ್ ದೆಂವ್‌ಲ್ಲೊ
ಭಕ್ತಿಕಾಂಚೊ ಪಂಗಡ್
ಆನಿ
ಮೆಟಾ ಮೆಟಾನಿಂ ಚಡ್ಚೊ
ಅನಯ್ತಿಕ್ ಸಂಬಂಧ್
ಆಮ್ಚ್ಯಾ ಗಾಂವಾಂತ್
ಕೋಡ್ತ್ ಆನಿ ದೀವ್ಳ್
ಆಸಾ ಮ್ಹಳ್ಳ್ಯಾಕ್ ಸಾಕ್ಸ್

⊕ ⊕ ⊕

ರಗ್ತಾ ಸ್ತ್ರಾವಾಚ್ಯಾ ಪಿಡೆಂತ್
ಬಾರಾ ವರ್ಸಾಂ ವಳ್ವಳ್ಳಿ ಸ್ತ್ರೀ
ಫಕತ್ತ್ ತುಜಿಂ ಆಂಗ್ ಉಸ್ತುರಾಂ ಅಪಡ್ನ್
ನಿತಳ್ ಜಾಲಿ ತರ್
ಸೊಮ್ಯಾಂ
ಭಕ್ತ್ ಕಶಿ ಅಶುದ್ಧ್ ಜಾಲಿ?

⊕ ⊕ ⊕

ದೆವಾಕ್ ಮೆಳೊಂಕ್
ಸ್ತ್ರೀಯಾಂಕ್ ಆಡಾಂವ್ಚ್ಯಾ ಭಕ್ತಿಕಾನೊಂ
ಆಯ್ಕಾ
ಹಾಂಗಾ ದೇವ್‌ಚ್ಚ್
ಸ್ತ್ರೀಯೆಚ್ಯಾ ಗರ್ಭಾ ಮುಖಾಂತ್ರ್
ಮನ್ಶ್ಯಾಂಕ್ ಮೆಳೊಂಕ್ ಆಯ್ಲಾ.

⊕ ⊕ ⊕

ಶೆಣ್ ಆನಿ ಮೂತ್
ಸಾರೆಂ ಜಾವ್ನ್ ಘೆವ್ನ್
ವಾಡ್‌ಲ್ಲ್ಯಾ ಝಡಾಚೆರ್
ಫುಲ್‌ಲ್ಲ್ಯಾ ಫುಲಾಕ್
ದೆವಾಕ್ ಭೆಟ್ಯೆತ್‌ಗೀ ಮ್ಹಳ್ಳಿ
ಭಿರಾಂತ್ ಉಬ್ಜಾಲ್ಯಾ.

⊕ ⊕ ⊕

ಘೋರ್ ಕಲಿಯುಗ್ ಮ್ಹಳ್ಯಾರ್
ಹೊಚ್ಚ್
ದೆವಾಕ್ ರಾಕೊಂಕ್
ತೊ ಸಯ್ತಾನ್ ಜಾಲಾ

⊕ ⊕ ⊕

ದಿವ್ಳಾಚ್ಯಾ ಪ್ರವೇಶಾಕ್
ನಿರ್ಭಂಧ್ ಘಾಲ್ಲೊ ಬರೆಂ ಜಾಲೆಂ
ಜರ್ ಅಪ್ರಾಧ್‌ಚ್ಚ್ ನಾಂ ತರ್
ದೆವಾಕ್ ಭೆಟೊನ್‌ಯೀ ಕಿತೆಂ ಕರ‍್ಚೆಂ ?

► ರೋಶು, ಬಜ್ಪೆ

Check Also

ಫುಲಾಂಚಿ ಖುಣಾಂ

ಆಜ್ ಆಟಿಚಿ ಅಮಾಸ್. ಕೆದ್ನಾಂಯ್ ಗೋಡ್ ಮುತಾಚಿ ಪಿಡಾ ಮ್ಹಣ್ ಕಷ್ಟೊಂಚ್ಯಾ ವಿಗಾರಾನ್ ಆಜ್ ಸಕಾಳಿಂ ಫುಡೆಂಚ್ ಏಕ್ ಫುಲ್ಲ್ …

2 comments

  1. Florine Roche

    Good one Roshu. Reality explained in beautiful poetry. Keep it up.

  2. Clive D'Souza

    Very nice..

Leave a Reply

Your email address will not be published. Required fields are marked *

Share ...please don\'t COPY !