ದಿಂಬಿ ಮೊಡ್‌ಲ್ಲೊ ಸಂಸಾರ್…

ದೊತೊರ್ ಯುವಲ್ ನೊವಾ ಹರಾರಿ ಪಾಟ್ಲ್ಯಾ ಕಾಂಯ್ ವರ‍್ಸಾನಿಂ ನಾಮ್ಣೆಚೊ ಬರಯ್ಣಾರ್ ಜಾವ್ನ್ ಉದೇವ್ನ್ ಆಯ್ಲಾ. ಆಪ್ಲೊ ಪಯ್ಲೊ ಬೂಕ್ Sapiens: A Brief History of Humankind (2014, ಹಾಚೆ ಥಾವ್ನ್ ಸಂಸಾರಾರ್ ನಾಂವಾಡ್ಲೆಲ್ಯಾ ತಾಚೆ ಉಪ್ರಾಂತ್ಲೆ ದೋನ್ ಬೂಕ್ Homo Deus: A Brief History of Tomorrow (2016), ಆನಿ 21 Lessons for the 21^st Century (2018), ಪಯ್ಲ್ಯಾ ಬೂಕಾಪರಿಂಚ್ ಲಾಖಾಂನಿ ವಿಕೊನ್ ಗೆಲ್ಯಾತ್ ಆನಿ ಜಾಯ್ತ್ಯಾ ವೆವೆಗ್‌ಳ್ಯಾ ಭಾಸಾಂಕ್ ತರ‍್ಜಣ್ ಜಾಲ್ಯಾತ್.

ಆಮ್ಕಾಂ, ಮ್ಹನ್ಶ್ಯಾಜಾತಿಕ್ ಜೀವಾವಿಗ್ಯಾನಾಂಚೆ ನಾಂವ್ Homo sapiens ತಾಚ್ಯಾ ಹ್ಯಾಚ್ ನಾಂವಾಂಚಾ ಪಯ್ಲ್ಯಾ ಬೂಕಾಂತ್ ದೊತೊರ್ ಹರಾರಿ, ಸುಮಾರ್ ಸತ್ತರ್ ಹಜಾರ್ ವರ‍್ಸಾಂ ಆದಿಂ ಆಮ್ಚೆಬರಿಚ್ ಆಸ್‌ಲ್ಲ್ಯಾ Homo neanderthals ಆನಿ Homo erectus, ಮ್ಹಳ್ಳ್ಯಾ ಆನಿ ದೋನ್ ಮ್ಹನ್ಶ್ಯಾಜಾತಿಂಸಂಗಿ ಸುರು ಜಾಲ್ಲಿ ಆಮ್ಚಿ ಚರಿತ್ರಾ, ಆಮ್ಚಿ ಚಿಂತ್ಪಾಸಕತ್ ವಾಡೊನ್ ಯೆವ್ನ್ ಸ್ವತಾಚಿ ಒಳೊಕ್ ಜಾವ್ನ್, ಎಕ್ವಿಸಾವ್ಯಾ ಶತಾಬ್ದೆಚ್ಯಾ ರಾಜಕೀ ಆನಿ ತಂತ್ರಗ್ಯಾನಾಚಿಚಿ ವಾಡಾವಳೆ ಪರ‍್ಯಾಂತ್ ಧಾಕ್ಲ್ಯಾಂ ಸಮೇತ್ ವಿಸ್ಕಳಾಯ್ತಾ.

ತರ್ ಆಪ್ಲ್ಯಾ ದುಸ್ರ್ಯಾ ಬೂಕಾಂತ್ ತೊ ಹ್ಯಾ ಮ್ಹನ್ಶ್ಯಾಜಾತಿಚ್ಯಾ ಫುಡ್ಲ್ಯಾ ಚರಿತ್ರೆಕ್ ಪಿಂತ್ರಾಯ್ತಾ. ಮೊರ‍್ನ್ ಆನಿ ಪಿಡೆಂಚೆರ್ ಜಯ್ತ್ ವರುನ್ ದೆವಾಸಾಂಗ್ಡ್ಯೊ ಸಕ್ತಿ ಆಪ್ಣಾಂವ್ಚ್ಯಾ ಮ್ಹನ್ಶ್ಯಾಕುಳಾಚಿಂ ಮುಗ್ದಾನಾತ್‌ಲ್ಲಿಂ ಸಪ್ಣಾಂ ಸತ್ ಜಾಂವ್ಚೆವಿಶಿಂ ತೊ ಬರಯ್ತಾ. ಆತಾಂಚಿ ಮ್ಹನ್ಶ್ಯಾಜಾತ್ ಬದ್ಲುನ್ Homo deus ಮ್ಹಳ್ಯಾರ್ ದೆವಾಬರಿಚ್ ತಾಕ್ತೆವಂತ್ ಮ್ಹನ್ಶ್ಯಾಕುಳಾಚೆಂ ಬೊಲ್ಮೆ ಉಚಾರ‍್ತಾ.

ಮ್ಹನ್ಶ್ಯಾಕ್ರತ್ ಬುದ್ವಂತ್ಕಾಯ್ Artificial Intelligence (AI), ಜೀವಾ ತಂತ್ರಗ್ಯಾನ್ (Bio Technology) ಆನಿ ಸೂಕ್ಶಿಮ್ ತಂತ್ರಗ್ಯಾನಾಂಚಾ (Nano Technology) ಶೆತಾಂನಿ ಪಾಟ್ಲ್ಯಾ ವರ‍್ಸಾಂನಿಂ ಜಾಲ್ಲ್ಯಾ ವಾಡಾವಳೆಂಚೊ ಪಾಟ್ಲಾವ್ ಕರ‍್ನ್ ಆಸ್‌ಲ್ಲ್ಯಾಂಕ್ ತಾಣೆಂ ಸಾಂಗ್‌ಲ್ಲ್ಯೊ ಸಂಗ್ತಿ ಕಾಂಯ್ ಘಡ್ಪಾಂ ಮ್ಹಣ್ ಬಿಲ್ಕುಲ್ ಭೊಗ್‌ಲ್ಲೆಂ ನಾಂ.

ಮ್ಹನ್ಶ್ಯಾಕ್ರತ್ ಬುದ್ವಂತ್ಕಾಯೆ ಶೆತಾಂತ್ಲ್ಯಾ ವಿಗ್ಯಾನಿಂನ್ ಆನಿ ಮ್ಹಾಯೆತ್ವಂತಾನಿಂ ಹ್ಯಾ ಶೆತಾಚ್ಯಾ ವಾಡಾವಳೆಕ್ ಮತಿಂತ್ ಧರುನ್ ಕಾಂಯ್ 2040 ವರ‍್ಸಾ ಇತ್ಲ್ಯಾಕ್ ಸಗ್‌ಳ್ಯಾ ಮ್ಹನ್ಶ್ಯಾಕುಳಾಚ್ಯಾ ಒಟ್ಟುಕ್ ಬುದ್ವಂತ್ಕಾಯೆಕ್ ಮಿಕ್ವೊಂಚಿ, ಸ್ವತಾಚಿ ಒಳೊಕ್ (self-awareness) ಆಸ್ಚ್ಯಾ ತಾಕ್ತೆವಂತ್ ಮ್ಹಾಬುದ್ವಂತ್ಕಾಯೆಚೊ (super intelligence) ಉಗಮ್ ಜಾಯ್ತ್ ಮ್ಹಣ್ ಸಾಂಗ್‌ಲ್ಲೆಂ ಆಸಾ.

ಮ್ಹನ್ಶ್ಯಾಕುಳಾಚ್ಯಾ ನಾನಾಂತ್ಯಾ ಜಾಪಿ ನಾತ್‌ಲ್ಲ್ಯಾ ಸವಾಲಾಂನಿಂ, ಸರ‍್ವಾಂಪ್ರಾಸ್ ವರ‍್ತೆಂ ಸವಾಲ್, ಬೋವ್‌ಶ್ಯಾ ಮರಣ್. ಆನ್ಯೇಕ್ ಪಂಚ್ವೀಸ್ ವರ‍್ಸಾಂ ಭಿತರ್ ಮರಣ್ ಏಕ್ ವಿಂಚವ್ಣ್ ಜಾಂವ್ಕ್ ಪುರೊ ಮ್ಹಣ್ ಆಯ್ಚೆ ಜೆನೆಟಿಕ್ ವಿಗ್ಯಾನಿಂ ಸಾಂಗೊನ್ ಆಸಾತ್. ಜೋಸ್ ಲೂಯಿ ಕೊರ‍್ಡೆರೊ ಆನಿ ಡೇವಿಡ್ ವುಡ್ ಹಾಣಿಂ ಪರ‍್ಗಟ್‌ಲ್ಲ್ಯಾ The Death of The Death ಬೂಕಾಂತ್, ತೆ ಸಾಸ್ಣಿಕ್‌ಪಣ್, ಖರೆಂ ಜಾಂವ್ಕ್ ಸಕ್ಚೆಂ ತಸಲೆಂ ಏಕ್ ನೀಜ್ ವಯ್ಗ್ಯಾನಿಕ್ ಚಿಂತಪ್ ಮ್ಹಣ್ ಸಾಂಗ್ತಾತ್. 2045 ಹ್ಯಾ ವರ‍್ಸಾ ಇತ್ಲ್ಯಾಕ್ ಮ್ಹನಿಸ್, ಪ್ರಾಯೆಕ್ ಯಾ ನಯ್ಸರ‍್ಗಿಕ್ ನಿಬಾಂಕ್ ಸೋಡ್ನ್ ಫಕತ್ ಅವ್ಘಡಾಂವರ‍್ವಿಂ ಮಾತ್ ಮರ‍್ತಲೆ ಮ್ಹಣ್ ಹ್ಯಾ ವಿಗ್ಯಾನಿಂನ್ ಸಾಂಗ್‌ಲ್ಲೆಂ ಆಸಾ.

ಭಾಯ್ಲ್ಯಾಂತ್ರಳಾ ವಿಗ್ಯಾನ್ ಆನಿ ತಂತ್ರಗ್ಯಾನಾನ್ ಚಂದ್ರೆಮ್, ಮಂಗಳಾ ಆನಿ ತಾಚ್ಯಾ ಪೆಲ್ಯಾನ್ ಲೆಗುನ್ ಮ್ಹನ್ಶ್ಯಾಕುಳಾನ್ ಕೊಲೊನಿ ಬಾಂಧುನ್ ಜಿಯೆಂವ್ಚ್ಯಾ ವಿಶಿಂ ಯೆವ್ಜಣ್ಯೊ ಘಾಲ್ಲ್ಯೊ ಆಸಾತ್.

ಸಂಸಾರಾಂತ್ಲ್ಯಾ ವೆವೆಗ್‌ಳ್ಯಾ ದೇಶಾಂನಿ ತಾಂತಾಂಚ್ಯಾ ಅನ್ಕುಲಾಯೆನ್ ರಾಜ್ವಟ್ಕಿ ಚಲಂವ್ಚೆ ಬೋವ್ ಸಕ್ತೆವಂತ್ ರಾಜಕೀ ವೆವಸ್ಥಾ ಆಸಾತ್ ಮ್ಹಣ್ ಆಮಿ ಪಾತ್ಯೆಲ್ಲ್ಯಾಂವ್. ಕಮ್ಯುನಿಸ್ತ್, ಪರ‍್ಜೆರಾಜ್, ರಾಯಾಳ್ ಯಾ ದುಸ್ರ್ಯಾ ಥರಾಚ್ಯಾ ಹ್ಯಾ ರಾಜಕೀ ಮಾಂಡಾವಳೆನಿಂ ಆಪಾಪ್ಲ್ಯಾ ದೇಶಾಂಕ್ ಆನಿ ಪರ‍್ಜೆಂಕ್ ಸಾಂಭಾಳುಂಕ್ ತಾಂಚೀಚ್ ಮಾಂಡಾವಳ್ ಸರ‍್ವಾಂಪ್ರಾಸ್ ಬರಿ ಮ್ಹಣ್ ಭಾಸ್‌ಲ್ಲೆಂಯ್ ಆಸಾ. ವಾಡಾವಳೆಂತ್ ಬೊವ್ ಮುಕಾರ್ ಪಾವ್‌ಲ್ಲ್ಯಾ ಬಳಿಶ್ಟ್ ದೇಶಾಂನಿಂ ಕಸಲ್ಯಾಯ್ ಪಿಡೆಶಿಡೆಂಕ್ ಫುಡ್ ಕರುಂಕ್ ಆಯ್ತಿ ಆಸ್ಚಿ ವಯ್ಜಾಕೀ ಸವ್ಲತೆಂವಿಶಿಂ ಹಂಕಾರ್ ಉಚಾರುನ್ ದುಬ್ಳ್ಯಾಂ ದೇಶಾಂಕ್ ಕೆಂಡ್‌ಲ್ಲೆಂಯ್ ಆಮಿ ಆಯ್ಕಾಲಾಂ.

ಆನಿ ಎಕ್ಲ್ಯಾಕ್ ಪಾಟಿಂ ಘಾಲ್ನ್ ಮುಕಾರ್ ಧಾಂವ್ಚ್ಯಾ ಹ್ಯಾ ಧಾಂವ್ಣೆಂತ್ ಆಮ್ಚೆ ದೇವ್ ಆನಿ ಧರ‍್ಮ್ ಕಾಂಯ್ ಪಾಟಿಂ ಉರಾನಾಸ್ತಾಂ ಹರ‍್ಯೆಕ್ ಧರ‍್ಮಾಂತ್ ಮ್ಹನ್ಶ್ಯಾಕುಳಾಕ್ ಧೊಸುನ್ ಆಸ್‌ಲ್ಲ್ಯಾ ಸರ‍್ವ ಸಂಗ್ತಿಕ್, ಆಮ್ಚ್ಯಾ ಅಸ್ಥಿತ್ವಾಚಾ ಆನಿ ಶೆವೊಟಾಚ್ಯಾ ಸವಾಲಾಂಕ್ ಜಾಪಿ ಆಸಾತ್ ಮ್ಹಣ್ ಸಾಂಗೊನ್ ಆಪ್ಲೊಚ್ ಧರ‍್ಮ್ ಸರ‍್ವಾಂಪ್ರಾಸ್ ಉತ್ತೀಮ್ ಮ್ಹಣ್ ಭಾಸುನ್, ರಾಕಾಜೆ ಆನಿ ಸಮಾಧಾನ್ ದೀಜೆ ಆಸ್‌ಲ್ಲ್ಯಾ ದೆಂವಾಂಚ್ಯಾ ನಾಂವಾನ್ ರಗ್ತಾಂಚ್ಯೊ ನ್ಹಂಯೊಂಚ್ ವಾಳಯ್ಲ್ಯಾತ್, ಲಾಖಾಂನಿ ಮೊಡಿಂ ನಿದಾಯ್ಲ್ಯಾಂತ್.
ಆಮಿಂ ಕೆಲ್ಲೆಂ, ಆಮಿಂ ಪಳೆಲೆಂ ಆನಿ ಆಮ್ಕಾಂ ತೆಂ ಬರೆಂ ದಿಸ್ಲೆಂ, ಆನಿ ಆಮಿ ನಿದ್ಲ್ಯಾಂವ್.

ಆನಿ ತವಳ್ ತೆಂ ಯೇವ್ನ್ ಆಮ್ಕಾಂ ಆಪ್ಟಾಲೆಂ.. ..

ಸೊಂಪ್ಯಾನ್ ತೆಂ ಏಕ್ ಜೀವಂತ್ ವಸ್ತ್ ಸಯ್ತ್ ನಂಯ್. ಪ್ರೋಟಿನಾಚ್ಯಾ ಸರ‍್ಲಾಂತ್ ಆಸ್ಚಿಂ ಫಕತ್ ಥೊಡಿಂ RNA (Ribonucleic Acid) ಸುತಾಂ ಮಾತ್. ಇತ್ಲ್ಯಾ ಸೂಕ್ಶಿಮ್ ಕಿ, ಇಲೆಕ್ಟ್ರೊನಿಕ್ ಮಾಯ್ಕ್ರೊಸ್ಕೋಪಾವಿಣೆಂ ಸಾಧಾರಣ್ ಮಾಯ್ಕ್ರೋಸ್ಕೋಪಾಂತ್ ಬಿಲ್ಕುಲ್ ದೊಳ್ಯಾಂಕ್ ದಿಸಾನಾಂ. ಆನಿ ತಾಚೊ ಹೊ ನವೊ ಆವ್ತಾರ್ ಸೊಡ್ಲ್ಯಾರ್ ಪಯ್ಲೆಥಾವ್ನ್ ಆಸ್ಲೆಲೆಂಚ್. ಏಕ್ ಜೀವಾಕಣಾ ಭಿತರ್ ರೀಗ್ ಮೆಳ್ಳೆ ಶಿವಾಯ್ ಆಪ್ಲಿಂ ಕಸಲಿಂಚ್ ಕಾರ‍್ಬಾರಾಂ ಕರುಂಕ್ ಸಕಾನಾತ್‌ಲ್ಲೆಂ. ಆನಿ ಜೀವಾಕಣಾ ಭಿತರ್ ರಿಗಲ್ಲೆಂಚ್, ಲಾಖಾನಿಂ ಆಪ್ಣಾಚ್ಯೊಚ್ ಪ್ರತಿಯೊ ಛಾಪ್ಚೆಂ ತಾಚೆಂ ಸೊಂಪೆ ಕಾಮ್. ಫೂಣ್ ಹ್ಯಾ ಸೊಂಪ್ಯಾ ಕಾಮಾಂತ್‌ಚ್ ಸಗ್‌ಳ್ಯಾ ಸಂಸಾರಾರ್‌ಚ್ ವಾದಾಳ್ ಉಟವ್ನ್, ಆಕಾಂತ್ ಹಾಡುನ್, ಹ್ಯಾ ತಾಕ್ತೆವಂತ್ ಸಂಸಾರಾಕ್ ಥೊಡ್ಯಾಚ್ ದಿಸಾಂನಿ ಕಸಲ್ಯಾಯ್ ತಫಾವತೆಂವೀಣ್ ದಿಂಬ್ಯೆರ್ ಮೊಡ್ಲೆಲೆಂ. ಬೋವ್ ಸಕ್ತೆವಂತ್ ಗಿರೇಸ್ತ್ ದೇಶ್ ಜಾಂವ್ ಯಾ ದುಬ್ಳೆ ನಾಕಾರಿ ದೇಶ್, ಕಮ್ಯುನಿಸ್ತ್, ಪರ‍್ಜೆರಾಜ್ ಯಾ ರಾಯಾಳ್, ತಾಣೆಂ ತಾಂಚೆ ಬಿಲ್ಕುಲ್ ಫರಕ್ ಕೆಲೊನಾಂ. ಕೊಣಾಯ್ಚಿ ಜಾತ್, ಧರ‍್ಮ್, ಭಾಸ್, ಶಿಕಾಪ್, ದುಡ್ವಾತಾಂಕ್, ವೆವ್ಹಾರಿಕ್ ಪಾಟ್‌ಥಳ್ ಯಾ ಭೂಂಯ್ಗೋಳಿಕ್ ಸ್ಥಾನ್ ಕಿತೆಂಯ್ ಪಳಯಿಲ್ಲೆಂ ನಾಂ.

ವಯ್, ನೊವೆಲ್ ಕೊರೊನಾ ವಾಯ್ರಸ್…

ಆಮ್ಕಾಂ ಕಾಂಯ್ ಪಯ್ಲೆಂ ಜಾಗ್ವಣ್ಯೊ ನಾತ್‌ಲ್ಲ್ಯೊ ಮ್ಹಣ್ ಬಿಲ್ಕುಲ್ ಕೊಣೇಂಯ್ ಸಾಂಗ್ಚೆಬರಿ ನಾಂ. ಆಮ್ಚ್ಯಾ ಚರಿತೆಂತ್ ಅಸಲ್ಯಾ ಮಾರೆಕಾರ್ ಪಿಡೆಂನಿಮ್ತಿ ಕರೋಡಾನಿಂ ಲೋಕಾನಿಂ ಅಪ್ಲೊ ಜೀವ್ ಹೊಗ್ಡಾಯಿಲ್ಲೆ ಜಾಯ್ತೆ ಧಾಕ್ಲೆ ಆಸಾತ್. ಬಿಲ್ ಗೇಟ್ಸ್, ಆಮೆರಿಕಾಚೊ ಆದ್ಲೊ ಅಧ್ಯಕ್ಶ್ ಜೋರ‍್ಜ್ ಬುಶ್ ಆನಿ ಹೆರ್ ಕಾಂಯ್ ಜಾಣ್ತ್ಯಾನಿಂ ಆನಿ ವಿಗ್ಯಾನಿಂನ್ ಅಸಲ್ಯಾ ಮಾರೆಕಾರ್ ಪಿಡೆನ್ ಆಪ್ಟೊಂಚೆವಿಶಿಂ ಆನಿ ಕರ‍್ಯೆತ್ ಜಾಲ್ಲ್ಯಾ ನಾಸಾವಿಶಿಂ ಜಾಯ್ತ್ಯಾ ತೆಂಪಾಪಯ್ಲೆಂಚ್ ಸಾಂಗೊನ್ ಅಸಲ್ಯಾ ಆಪ್ಟೊವ್ಣೆಕ್ ಕಶೆಂ ಆಯ್ತೆಂ ಆಸೊನ್ ಫುಡ್ ಕರಿಜೆ ಮ್ಹಣ್ ಜಾಗಯಿಲ್ಲೆಂ ಆಸಾ.

ವಾಟ್ಸ್ಯಾಪ್, ಫೇಸ್ಬುಕ್ ತಸಲ್ಯಾ ಸಾಮಾಜಿಕ್ ಮಾಜ್ಯಾನಿಂ, ಅಸಲ್ಯಾ ಮ್ಹಾಮಾರೆವಿಶಿಂ ಬುಕಾಂನಿಂ ಆನಿ ಫಿಲ್ಮಾನಿಂ ಜಾಗೊವ್ಣ್ ದಿಲ್ಯಾ ಮ್ಹಣ್ ದಾಕಂವ್ಚೆ ಥೊಡೆ ವಿಡಿಯೊ ಆನಿ ತಸ್ವಿರ‍್ಯೊ ಹ್ಯಾ ದಿಸಾಂನಿ ವಾಯ್ರಲ್ ಜಾವ್ನೀ ಆಸಾತ್. ಅಸಲ್ಯಾ ಸರ‍್ವ್ ಬೊಲ್ಮ್ಯಾವಿಶ್ಯಾಂತ್ಲಿ ಮಝೆಚಿ ಗಜಾಲ್ ಕಿತೆಂಗಿ ಮ್ಹಳ್ಯಾರ್, ಹಿಂ ಸರ‍್ವ್ ಬೊಲ್ಮಿಂ ಭಾಯ್ರ್ ಪಡ್ಚಿಂಚ್ ಕಸಲೆಂಯ್ ಘಡಿತ್ ಘಡೊನ್ ಗೆಲ್ಲೆ ಉಪ್ರಾಂತ್. ಖಂಯ್ಸರ್ ತರೀ ಉಸ್ತುನ್ ಅಳೆ ನೊಸ್ಟ್ರೊಡಾಮಸಾನ್ ಪಯ್ಲೆಂಚ್ ಸಾಂಗಲ್ಲೆಂ, ಆನಿ ಕೊಣೆಂ ಪಯ್ಲೆಂಚ್ ಬರವ್ನ್ ದವರ್‌ಲ್ಲೆಂ ಮ್ಹಣ್ ಸಾಂಗ್ಚ್ಯಾಂತ್‌ಚ್ ಸಕ್ಕಡೀ ವೆಸ್ತ್.

ಏಕ್ ಮಾರೆಕಾರ್ ಘಡಿತ್, ತೆಂ ಘಡ್ಚೆ ಪಯ್ಲೆಂಚ್ ಜಾಣಾಸೊನ್, ತ್ಯಾ ವಿಶಿಂ ಚತ್ರಾಯ್ ಘೇವ್ನ್ ಲುಕ್ಸಾಣ್ ಉಣೆಂ ಕರುಂಕ್ ಯಾ ತಸಲೆಂ ಘಡುಂಕ್‌ಚ್ ನಾತ್‌ಲ್ಲೆಬರಿಂ ಕರುಂಕ್ ಜಾಯ್ನಾಂ ತರ್, ಅಸಲ್ಯಾ ಬೊಲ್ಮ್ಯಾಂಚೊ ತರೀ ಕಾಂಯ್ ಫಾಯ್ದೊ ನಾಂ.

ಮ್ಹನ್ಶ್ಯಾಕುಳಾಚಾ ಫುಡಾರಾವಿಶಿಂ ಬರಯಿಲ್ಲೊ ಯುವಲ್ ನೊವಾ ಹರಾರಿ, ಆಪ್ಲ್ಯಾ 21 Lessons for the 21st Century  ಹ್ಯಾ ನವ್ಯಾ ಬೂಕಾಂತ್ ಕಾಮ್, ಸುಟ್ಕಾ, ಸಮಾಸಮ್ಪಣ್, ಧರ‍್ಮ್, ಆಕಾಂತ್‌ವಾದ್ ತಸಲ್ಯಾ ಎಕ್ವಿಸಾವ್ಯಾ ಶತಾಬ್ದೆಚ್ಯಾ ಎಕ್ವೀಸ್ ಸಂಗ್ತಿಂಚಿಂ ಸವಾಲಾಂ ಆನಿ ತಿಂ ಕಶೆಂ ಫುಡ್ ಕರ‍್ಯೆತ್ ಮ್ಹಣ್ ಆಪ್ಲೊ ವಾದ್ ಮಾಂಡ್ತಾ ಪೂಣ್ ತ್ಯಾ ಬೂಕಾಂತ್ ಅಸಲ್ಯಾ ಏಕ್ ಮ್ಹಾಮಾರೆಕ್ ತೊ ಚುಕೊನ್ ಗೆಲಾ.

ಆಜ್ ಸಂಸಾರಾರ್ ಚಾಲ್ತೆರ್ ಆಸ್ಚ್ಯಾ ಆಮ್ಚ್ಯಾ ಸರ‍್ವ್ ದೆವಾಂಕ್, ಧರ‍್ಮಾಂಕ್, ರಾಜಕೀ, ತಾಂತ್ರಿಕ್ ಆನಿ ವಯ್ಜಾಕೀ ಮಾಂಡಾವಳೆಂಕ್ ಹ್ಯಾ ಖಿಣಾ ತಾಂಕಾ ಕಿತೆಂ ಯೇವ್ನ್ ಆಪ್ಟಾಲಾಂ ಮ್ಹಳ್ಳ್ಯಾಚಿ ಖಬರ್ ನಾಂ. ಸಕ್ಕಡ್ ದೇವ್, ಧರ‍್ಮ್, ಆನಿ ಹ್ಯೊ ಸರ‍್ವ್ ಮಾಂಡಾವಳ್ಯೊ ಆನಿ ವಿಗ್ಯಾನಿಕ್ ವಾಡಾವಳ್ಯೊ ಹ್ಯಾ ವೆಳಾರ್ ಸಲ್ವಾಲ್ಯಾತ್ ಆನಿ ಅಸಲ್ಯಾ ಎಕಾ ಪರಿಗತೆಕ್ ಫುಡ್ ಕರುಂಕ್ ಬಿಲ್ಕುಲ್ ಆಯ್ತೆ ನಾತ್‌ಲ್ಲ್ಯೊ ಮ್ಹಣ್ಚ್ಯಾಕ್ ಆಮ್ಕಾಂ ಆನಿಂ ಗವಾಯೆಂಚಿ ಗರಜ್ ನಾಂ.

ಸದ್ದ್ಯಾಕ್ ಕಾಂಯ್ ಹ್ಯಾ ಪಿಡೆನ್ ಉಟಯಿಲ್ಲ್ಯಾ ಸವಾಲಾಂಕ್ ದಿಸಾನಾಂ. ಹೆಂ ಬರಯ್ತಾನಾ, ಆಮ್ಚ್ಯಾ ದೇಶಾಂತ್ ಲೊಕ್-ಡಾವ್ನ್ ಮೇಯಾಚಾ ತೀನ್ ತಾರಿಕೆಪರ‍್ಯಾಂತ್ ವಾಡಯ್ಲಾಂ. ಸಗ್‌ಳ್ಯಾ ಸಂಸಾರಾರ್ ಹ್ಯಾ ಪಿಡೆಂತ್ ಮರ‍್ತಲ್ಯಾಂಚೊ ಸಂಖೊ ವಾಡೊನಂಚ್ ಆಸಾ. ಪರಿಹಾರ್ ಆಸಾಗಿ ಮ್ಹಳ್ಳೆಂಚ್ ಕಳಿತ್ ನಾಂ, ಆಸಾ ತರೀ ಕೆನ್ನಾ ಮ್ಹಣ್ ಬಿಲ್ಕುಲ್ ನೆಣಾಂವ್.

ಆನಿ ಜರ್ ಆಮಿಂ ಹ್ಯಾ ಖರ‍್ಗಾಥಾವ್ನ್ ಉತ್ರಾಲ್ಯಾಂವ್, ತಾಚೆ ಪಯ್ಲೆಂ ಕಿತ್ಲ್ಯಾ ಲೊಕಾಂಚಿ ಬಲಿ ಭೆಟಂವ್ಕ್ ಆಸಾ ಮ್ಹಣ್ ಹಾಂವ್ ನೆಣಾಂ, ತ್ಯಾ ಉಪ್ರಾಂತ್ಲೊ ಸಂಸಾರ್ ಮಾತ್ ವೆಗ್ಳೊಚ್ ಆಸ್ತಲೊ. ಆಮಿಂ ಎದೊಳ್ ಪಳೆವ್ನ್ ಆಯಿಲ್ಲ್ಯಾ ಸಂಸಾರಾಪ್ರಾಸ್ ಬದ್ಲಾಲ್ಲೊ ಬಿಲ್ಕುಲ್ ವೆಗ್ಳೊಚ್ ಏಕ್ ಸಂಸಾರ್. ಆನಿ ಹ್ಯಾ ಬದ್ಲಾಪಾಚಿ ಹ್ಯಾ ವೆಳಾರ್ ಖಂಡಿತ್ ಜಾವ್ನ್ ಗರ‍್ಜ್ ಆಸಾ, ಹ್ಯಾ ಖರ‍್ಗಾಥಾವ್ನ್ ಬಚಾವ್ ಜಾವ್ನ್ ಉರ್‌ಲ್ಲ್ಯಾ ಸರ‍್ವಾನಿಂ ಸಾಂಗಾತಾ ಬಸೊನ್ ಯೆದೊಳ್ ಪರ‍್ಯಾಂತ್ ಹೊ ಸಂಸಾರ್ ಚಲವ್ನ್ ಹಾಡ್‌ಲ್ಲ್ಯಾ ರೀತಿವಿಶಿಂ ಆಪಾಪ್ಲ್ಯಾ ಅಂತಸ್ಕರ‍್ನಾಂಚಿ ಝಡ್ತಿ ಕರಿಜೆ. ದೇವ್, ಸಮಡ್ತಿ ಆನಿ ಧರ‍್ಮಾಂಚಿ ಆಮ್ಕಾಂ ಗರ‍್ಜ್ ಆಸಾಗಿ, ಆಸಾ ತರ್ ಕಸಲೆ ದೇವ್, ಆನಿ ಖಂಯ್ಚೆ ಧರ‍್ಮ್ ಮ್ಹಳ್ಳೆವಿಶಿಂ ಚಿಂತಿಜೆ. ಆತಾಂ ಚಾಲ್ತೆರ್ ಆಸ್ಚ್ಯಾ ಸರ‍್ವ್ ರಾಜಕೀ, ತಾಂತ್ರಿಕ್, ವೆವ್ಹಾರಿಕ್ ಆನಿ ವಯ್ಜಾಕೀ ಮಾಂಡಾವಳೆಂಚೊ ವಿನ್ಯಾಸ್ ಬದ್ಲುನ್, ಪ್ರಭಾವೀಕ್ ಥರಾನ್ ನವ್ಯಾನ್ ಮಾಂಡುನ್ ಹಾಡ್ಚೆಂವಿಶಿಂ ತಕ್ಲಿ ಆಟಯ್ಜೆ.

ಹರ‍್ಯೆಕಾ ಮ್ಹನ್ಶ್ಯಾಕ್ ಆಪ್ಲ್ಯಾ ಅಸ್ಥಿತ್ವಾಚೊ ಆನಿ ಬರ‍್ಯಾಜಿಣ್ಯೆಚೊ ಸಮಾನ್ ಅವ್ಕಾಸ್ ಮೆಳ್ಚೊ ಏಕ್ ನವೊ ಸಂಸಾರ್ ಬಾಂಧುನ್ ಹಾಡ್ಚೆವಿಶಿಂ ಯೆವ್ಜಣ್ಯೊ ಘಾಲ್ನ್ ಜಾರ‍್ಯೆಕ್ ಹಾಡಿಜೆ.

ಚಾರ್ ಬಿಲಿಯನ್ ವರ‍್ಸಾಂ ಪ್ರಾಯೆಚ್ಯಾ ಭುಂಯ್ಗೋಳಾಚ್ಯಾ ಮ್ಹಾನ್ ಯೆವ್ಜಣೆಂತ್ ವಯ್ರ್ ಉಟ್‌ಲ್ಲ್ಯಾ ಮಾಂಕ್ಡಾಕ್ ಆಪ್ಣಾಚ್ಯಾ ಕಿರ‍್ದಾರಾಚಿ ಒಳೋಕ್ ಆಜೂನೀ ಜಾಲ್ಲೆಬರಿ ನಾಂ.

► ಕಿಶೂ, ಬಾರ‍್ಕುರ್.