ಕೊಂಕಣಿ ಮಹಾನ ಸಾಹಿತಿ, ತಜ್ಞ ನಾಗೇಶ ಸೋಂದೆ ಅಂತರಲೊ

ಉತ್ತರ ಕನ್ನಡ ಜಿಲ್ಲಾ ಶಿರಸಿಂತ ನಾಂವ ಪಾವಿಲೊ ಸೋಂದೆ ಘರಾಣೆಂತ ಜಲ್ಮಲೆಲೊ ಆನಿ ಕುಮಟಾಂತ ಶಿಕ್ಷಣ ಕರನ ಮುಖಾರಿ ಮುಂಬಯಿಕ ವಚುನ ಮಫತಲಾಲ್ ಕಂಪೆನಿಂತ ಕಾನೂನು ಸಲ್ಲಾಗಾರ ಜಾವನ ಆಶಿಲೊ ಮಾನೆಸ್ತ ನಾಗೇಶ ಸೋಂದೆ ಹಾಂಗೆಲೆ 90 ವರಸಾ ವಯಾರಿ 15-11-2020 ತಾರ್ಕೆರ ಮುಂಬಯಿಂತ ತಾಂಗೆಲೆ ಘರಾಂತ ಮರಣ ಪಾವಲಿಂತಿ.

‘ಮುಂಬಯಿಚೆ ಕರ್ನಾಟಕ ಸಂಘ’ ಚೆ ಪ್ರವರ್ತಕ ಜಾವನ 1960 ದಶಕಾಂತ ಕರ್ನಾಟಕ ಸಂಘ ಸ್ಥಾಪನ ಕರಚಾಂತ ಪಯಲೆ ಸ್ಥಾನಾರ ಆಶಿಲಿಂಚಿ. ತಶೀಂಚಿ ಮುಂಬಯಿ ಮಾಟುಂಗಾಂತ ‘ವಿಶ್ವೇಶ್ವರಯ್ಯ ಕನ್ನಡ ಭವನ’ ನಿರ್ಮಾಣಾಂತ ಅಧ್ಯಕ್ಷ ಶ್ರೀ ವರದರಾಜ ಆದ್ಯ ಹಾಂಗೆಲೆ ಸಾಂಗಾತಾಕ ವಾವರ ಕಲೆಲೆ. ದಿ. ನಾಗೇಶ ಸೋಂದೆ ದೇಶ ವಿದೇಶಾಚೆ ಸಾಹಿತ್ಯ ವಾಜುನು ಸಂಗ್ರಹ ಕರತಶಿಲಿಂಚಿ. ಆನಿ ಸಂಸ್ಕೃತ, ಇಂಗ್ಲಿಷ್ ಆನಿ ಕೊಂಕಣಿ ಭಾಷಾ ಸಾಹಿತ್ಯ ಮನನ ಕರನು ಇಂಗ್ಲಿಷಾಂತ 20 ಆನಿ ಕೊಂಕಣಿ ಭಾಷೆಂತ 10 ಪಶಿ ಚಡ ಪುಸ್ತಕ ಬರಯಲಾಂತಿ. ಆನಿ ಕೊಂಕಣಿ ಭಾಷೆಚೋ ಇತಿಹಾಸ ಸಂಶೋಧನಾತ್ಮಕ ಗ್ರಂಥ ಬರೊವನ ಪ್ರಖ್ಯಾತ ಜಾಲಾಂತಿ. ಮಹಾದಾನಿ ಜಾವನ ಆಶಿಲೊ ಶ್ರೀ ನಾಗೇಶ ಸೋಂದೆ ತಾಂಗೆಲೆ ಜಲ್ಮ ಜಾಲೆಲೆ ಗಾಂವ ಶಿರಸಿ ಎಂ.ಇ.ಎಸ. ಕಾಲೇಜಾಕ ರೂ. 10 ಲಕ್ಷ ದೇಣಿಗಾ ದಿಲೆಲೆಂ ನಂತಾ ಶಿರಸಿಚೆ ಪಂಡಿತ ಲೈಬ್ರೆರಿಕ ಅಭಿವೃದ್ದಿ ಖಾತಿರ ತಾಂಗೆಲೊ ಸ್ಥಿರಾಸ್ತಿ ದಾನ ಕೆಲೆಲೆಂ. ಆನಿ ಶಿರಸಿ ರೋಟರಿ ಆಸ್ಪತ್ರೆಕ ಉದಾರ ಸಹಾಯ ದಿಲೆಲೊ.

ಮಾನೆಸ್ತ ನಾಗೇಶ ಸೋಂದೆ ಹಾಂಗೆಲೆ ನಿಧನ ಕೊಂಕಣಿ ಭಾಸ ಆನಿ ಸಾಹಿತ್ಯ ಕ್ಷೇತ್ರಾಕ ಅಪಾರ ನಷ್ಟ ಜಾಲಾಂ. ತಾಂಗೆಲೆ ದಿವ್ಯ ಆತ್ಮಾಕ ಚಿರಶಾಂತಿ ಪ್ರಾರ್ಥನ ಕರನ ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನ, ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ಶ್ರೀ ಬಸ್ತಿ ವಾಮನ ಶೆಣೈ, ಚೆಯರ್‌ಮೆನ್ ಡಾ. ಪಿ. ದಯಾನಂದ ಪೈ, ಉಪಾಧ್ಯಕ್ಷ ಶ್ರೀ ಕುಡ್ಪಿ ಜಗದೀಶ ಶೆಣೈ, ಶ್ರೀ ಗಿಲ್ಬರ್ಟ್ ಡಿಸೋಜಾ ಆನಿ ಕೊಂಕಣಿ ಭಾಷಾ ಮಂಡಳಾಚೆ ಅಧ್ಯಕ್ಷ ಶ್ರೀ ವೆಂಕಟೇಶ ಎನ್. ಬಾಳಿಗಾ, ಖಜಾಂಚಿ ಶ್ರೀ ಬಿ. ಆರ್. ಭಟ್, ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿ ಕಾರ್ಯದರ್ಶಿ ಶ್ರೀ ಪ್ರದೀಪ ಜಿ. ಪೈ, ವಿಶ್ವ ಕೊಂಕಣಿ ಕೇಂದ್ರ ಕಾರ್ಯದರ್ಶಿ ಸಿ.ಎ. ಶ್ರೀ ನಂದಗೋಪಾಲ ಶೆಣೈ, ಶ್ರೀ ಬಿ. ಪ್ರಭಾಕರ ಪ್ರಭು, ಶಾಳೆಂತ ಕೊಂಕಣಿ ಶಿಕ್ಷಣಚೊ ಮುಖೇಲ ಡಾ. ಕೆ. ಮೋಹನ ಪೈ, ಅಖಿಲ ಭಾರತ ಕೊಂಕಣಿ ಪರಿಷದ್ ಆದಲೆ ಅಧ್ಯಕ್ಷ ಶ್ರೀ ಕೆ. ಗೋಕುಲದಾಸ ಪ್ರಭು, ಕುಮಟಾ ಶ್ರೀ ಸರಸ್ವತಿ ವಿದ್ಯಾ ಕೇಂದ್ರ ಮುಖೇಲ ಶ್ರೀ ಮುರಳೀಧರ ಪ್ರಭು ಆನಿ ಕೇರಳ ಕೊಂಕಣಿ ಅಕಾಡೆಮಿ ಆದಲೆ ಅಧ್ಯಕ್ಷ ಶ್ರೀ ಪಯ್ಯನೂರು ರಮೇಶ ಪೈ, ಮುಂಬಯಿಚೆ ವಿಶ್ವ ಕೊಂಕಣಿ ಸಂಗೀತ ನಾಟಕ ಅಕಾಡೆಮಿ ಅಧ್ಯಕ್ಷ ಡಾ. ಸಿ. ಎನ್. ಶೆಣೈ ಆನಿ ಇತರ ಸಂಘ ಸಂಸ್ಥೆಚೆ ಪದಾಧಿಕಾರಿಂನಿ ಸಂತಾಪ ವ್ಯಕ್ತ ಕೆಲಾಂ.