Javascript Disabled!

Please Enable Javascript if you disabled it, or use another browser we preferred Google Chrome.
Please Refresh Page After Enable

Powered By UnCopy Plugin.

 

   

ಕಾವ್ಯಾಕ್ ತಲ್ವಾರಿಚೆಂ ಬಳ್ ದಿಲ್ಲೊ ಕವಿ – ಸಿದ್ಧಲಿಂಗಯ್ಯ

ಜಾತಿ ವೈರದ ಜ್ವರವು ಏರುತಿಹುದಣ್ಣ,
ಕೋಮು ದ್ವೇಷದ ಬೆಂಕಿ ಉರಿಯುತಿಹುದಣ್ಣ,
ಈ ಬೆಂಕಿಯಾರಿಸಲು ಪ್ರೀತಿಗಂಗೆಯು ಬೇಕು,
ಎಲ್ಲರೂ ಅಗ್ನಿಶಾಮಕರಿಂದು ಆಗಬೇಕು.
ಕವಿತಾ : ಅಗ್ನಿಶಾಮಕರು

ಲ್ವಾರ್ ಜಾಂವ್ ಕಾವ್ಯೆಂ (ಖಡ್ಗವಾಗಲಿ ಕಾವ್ಯ) ಮ್ಹಣುನ್ ತಲ್ವಾರಿ ಧಾರಿ ಪ್ರಾಸ್ ತೊಂಕಾಳ್ ಕಾವ್ಯಿಂ ಬರವ್ನ್ ಆಪ್ಲ್ಯಾ ಕಾವ್ಯಾಂಚ್ಯಾ ಸಕ್ತೆನ್ ವ್ಹಡ್ ರಾಜಕೀಯ್ ಬದ್ಲಾಪ್ ಹಾಡ್ಚ್ಯಾಕ್, ಎಕಾ ಕಾಳಾಕ್ ಆನಿ ಜನಾಂಗಾಕ್ ಸ್ವಾಭಿಮಾನ್ ಆನಿ ಬಳ್ವಂತ್ ಸಕತ್ ದೀಂವ್ಕ್ ಸಕ್‌ಲ್ಲೊ ಕವಿ ಸಿದ್ಧಲಿಂಗಯ್ಯ 11 ಜೂನ್ 2021 ವೆರ್ ಸಾಸ್ಣಾಕ್ ಅಂತರ‍್ಲೊ. ಭೋವ್ಶಾ ಸಂಸ್ರಾಚ್ಯಾ ಕವಿ ಮಂಡಳೆಂತ್ ಕ್ರಾಂತಿಕಾರಿ ಕವಿತ್ವಾಚ್ಯಾ ಆನಿ ಜನಾಂಗಾಂಕ್ ಸಬಲೀಕರಣ್ ದೀವ್ನ್ ಸಾಸ್ಣಾಕ್ ಉರ‍್ಚಿ ತಾಂಕ್ ಆಸ್ಚ್ಯಾ ಭೋವ್ ಥೊಡ್ಯಾ ಭಾರತೀಯ್ ಕವಿಂ ಪಯ್ಕಿ ಸಿದ್ಧಲಿಂಗಯ್ಯ ಎಕ್ಲೊ. ಜಶೆಂ ಬಂಕೀಮ ಚಂದ್ರ ಚಟರ‍್ಜಿಚ್ಯಾ ‘ವಂದೇ ಮಾತರಂ’ (ಆನಂದಮಠ ಕಾದಂಬರಿಚೊ ವಾಂಟೊ) ಕಾವ್ಯಾನ್ ಸುಟ್ಕಾಯೆ ಪಯ್ಲೆಂ (ಆನಿ ಉಪ್ರಾಂತ್‌ಯಿ) ಭಾರತೀಯ್ ಯುವಜಣಾಂಕ್ ಬ್ರಿಟೀಷಾಂ ವಿರೋದ್ ಝುಜುಂಕ್ ಆಯ್ತೆಂ ಕೆಲ್ಲೆಂ ತಶೆಂಚ್ ‘ಯಾರಿಗೆ ಬಂತು, ಎಲ್ಲಿಗೆ ಬಂತು ನಲ್ವತ್ತೇಳರ ಸ್ವಾತಂತ್ರ್ಯ'(ಕಪ್ಪು ಕಾಡಿನ ಹಾಡು) ‘ದೊಡ್ಡ ಗೌಡರ ಬಾಗಿಲೀಗೆ ನಮ್ಮ ಮೂಳೆಯ ತೋರಣ (ಬೆಲ್ಚಿಯ ಹಾಡು) ‘ದಲಿತರು ಬರುವರು ದಾರಿಬಿಡಿ’ (ಸಾವಿರಾರು ನದಿಗಳು) ಅಸಲ್ಯಾ ಕಾವ್ಯಾಂನಿ ಸಿದ್ಧಲಿಂಗಯ್ಯಾನ್ ಕರ್ನಾಟಕಾಂತ್ ವ್ಹಡ್ ಕ್ರಾಂತಿ ಉಬಿ ಕೆಲ್ಲಿ.

SQ2

1954 ಫೆಬ್ರೆರ್ 3 ತಾರ‍್ಕೆರ್ ರಾಮನಗರಾ ಜಿಲ್ಲ್ಯಾಚ್ಯಾ ಮಾಗಡಿ ತಾಲುಕಾಂತ್ಲ್ಯಾ ಮಂಚನಬೆಲ್ಲೆ ಹಳ್ಳೆಚ್ಯಾ ದೇವಯ್ಯ ಆನಿ ವೆಂಕಟಮ್ಮಾ ಹಾಂಚೊ ಪೂತ್ ಜಾವ್ನ್ ಸಿದ್ಧಲಿಂಗಯ್ಯ ಜನ್ಮಾಲ್ಲೊ. ತಾಚೆಂ ಬಾಳ್ಪಣ್ ಆನಿ ತರ‍್ನಾಟ್ಪಣ್ ದುಬ್ಳಿಕಾಂಯೆತ್ ಆನಿ ಜಾತಿ ನಿಂದೆಂತ್ ಖರ‍್ಚುನ್ ಗೆಲ್ಲೆಂ. ಅಕ್ಮಾನಾಚ್ಯಾ ಉಜ್ಯಾಂತ್ ತೊ ಲಾಸ್‌ಲ್ಲೊ ತರೀ ಫಾಂಕಿವಂತ್ ಜಾವ್ನ್ ಪರ‍್ಜಳ್ಳೊ ಶಿವಾಯ್ ಭಸ್ಮುನ್ ವಚುಂಕ್ ನಾಂ. ಸರ್ವ್ ಫರಕ್ಪಣ್ ಆನಿ ಶೋಷಣಾಂ ಮಧೆಂ ತಾಣೆಂ ಮಾಗಡಿಂತ್ ಆಪ್ಲೆಂ ಪ್ರಾಥಮಿಕ್ ಶಿಕಪ್ ಸಂಪಯ್ಲೆಂ. 1974 ವ್ಯಾ ವರ‍್ಸಾ ಬೆಂಗ್ಳುರ್ ವಿಶ್ವವಿದ್ಯಾಲಯಾಥಾವ್ನ್ ಬಿ ಎ ಆನರ್ಸ್ ಪದ್ವಿ ಆಪ್ಣಾಯ್ಲಿ ಆನಿ 1976 ವ್ಯಾ ವರ‍್ಸಾ ಕನ್ನಡ ಎಮ್ ಎ ಪದ್ವಿ ಡಿ ಎಲ್ ನರಸಿಂಹಾಚಾರ‍್ಯ ಬಾಂಗ್ರಾಳ್ಯಾ ಪದಕಾಸವೆಂ ಜೊಡ್ಲಿ. ಕನ್ನಡಾಚೊ ಮಹಾನ್ ಸಾಹಿತಿ ಪ್ರಾಧ್ಯಾಪಕ್ ಡಾ. ಜಿ ಎಸ್ ಶಿವರುದ್ರಪ್ಪಾಚ್ಯಾ ಮಾರ‍್ಗದರ‍್ಶನಾಂತ್ ತಾಣೆಂ ಗ್ರಾಮ ದೇವತೆಗಳು ಮ್ಹಣ್ಚ್ಯಾ ವಿಷಯಾರ್ ಪಿಹೆಚ್‌ಡಿ ಸನದ್ ಆಪ್ಣಾಯ್ಲಿ.

SQ10

ಡಿ. ಆರ್. ನಾಗರಾಜ್, ಆರ್. ಎನ್. ಶೆಟ್ಟಿ, ರಾಮಕೃಷ್ಣ ಹೆಗ್ಡೆ – ಬೆಂಗ್ಳುರ್ ವಿಶ್ವವಿದ್ಯಾಲಯಾಂತ್

ಬೆಂಗ್ಳುರ್ ವಿಶ್ವವಿದ್ಯಾಲಯಾಂತ್ ಅಧ್ಯಾಪಕ್ ಜಾವ್ನ್, ಕನ್ನಡ ಅಧ್ಯಯನ್ ಕೇಂದ್ರಾಚೊ ನಿರ‍್ದೇಶಕ್ ಜಾವ್ನ್ ತೊ ವಾವುರ‍್ಲಾ. ಆಪ್ಲ್ಯಾ 38 ವರ‍್ಸಾಂಚ್ಯಾ ತರ‍್ನ್ಯಾ ಪ್ರಾಯೆರ್ ತಾಕಾ ಕರ್ನಾಟಕ ವಿಧಾನ್ ಪರಿಷಧೆಚೊ ಸಾಂಧೊ ಜಾವ್ನ್ 1988 ಂತ್ ನೆಮ್ಲೊ ಆನಿ ದೋನ್ ಅವ್ದೆಂಕ್ ತೊ ಪರಿಷಧೆಚೊ ಸಾಂಧೊ ಆಸ್‌ಲ್ಲೊ. ತೆಚ್‌ಪರಿಂ ಕನ್ನಡ ಅಭಿವೃದ್ಧಿ ಪ್ರಾಧಿಕಾರಾಚೊ ಅಧ್ಯಕ್ಷ್ ಜಾವ್ನ್. ಕನ್ನಡ ಪುಸ್ತಕ್ ಪ್ರಾಧಿಕಾರಾಚೊ ಅಧ್ಯಕ್ಷ್ ಜಾವ್ನ್ ತಾಣೆಂ ಸೆವಾ ದಿಲ್ಯಾ. ಶ್ರವಣಬೆಳಗೊಳಾಂತ್ ಚಲ್‌ಲ್ಲ್ಯಾ 81 ವ್ಯಾ ಕನ್ನಡ ಸಾಹಿತ್ ಸಮ್ಮೇಳನಾಚೊ ಅಧ್ಯಕ್ಷ್ ಕರ್ನ್ ತಾಕಾ ಮಾನ್ ಕೆಲಾ.

ಹೊಲೆ ಮಾದಿಗರ ಹಾಡು (1975) ಮ್ಹಣ್ಚ್ಯಾ ಕ್ರಾಂತಿಕಾರಿ ಕವನಾಂಚ್ಯಾ ಸಂಗ್ರಹಾಧ್ವಾರಿಂ ಹಾಚೆಂ ಕಾವ್ಯಪಯ್ಣ್ ಸುರ‍್ವಾತ್ಲೆಂ. ಮೆರವಣಿಗೆ, ಸಾವಿರಾರು ನದಿಗಳು, ಕಪ್ಪು ಕಾಡಿನ ಹಾಡು, ಆಯ್ದಕವಿತೆಗಳು, ಅಲ್ಲೆಕುಂತವರೆ, ನನ್ನ ಜನಗಳು ಮತ್ತು ಇತರ ಕವಿತೆಗಳು, ಹಾಚೆ ಹೆರ್ ಕಾವ್ಯಾಂ ಘೊಸ್. ಹಕ್ಕಿ ನೋಟ, ರಸಗಳಿಗೆಗಳು, ಎಡಬಲ, ಉರಿಕಂಡಾಯ ಹಾಚ್ಯೊ ವಿಮರ‍್ಶ್ಯಾ ಸಾಹಿತಾಚ್ಯೊ ಕೃತಿಯೊ. ಅವತಾರಗಳು, ಸದನದಲ್ಲಿ ಸಿದ್ದಲಿಂಗಯ್ಯ ಭಾಗ್ – 1 ಆನಿ ಸದನದಲ್ಲಿ ಸಿದ್ದಲಿಂಗಯ್ಯ ಭಾಗ್ – 2 ತಶೆಂಚ್ ಜನಸಂಸ್ಕೃತಿ, ಹಾಚ್ಯಾ ಬರ‍್ಪಾಂಚೆ ಸಂಗ್ರಹ್. ಏಕಲವ್ಯ, ನೆಲಸಮ, ಪಂಚಮ, ಹಾಣೆಂ ಲಿಕ್ಲಲೆ ನಾಟಕ್. ಊರುಕೇರಿ – ಭಾಗ್ – 1 ಆನಿ ಊರುಕೇರಿ ಭಾಗ್ 2 ಹಾಚಿ ಜಿಣ್ಯೆಕಥಾ. ತಾಚೆಂ ಸಾಹಿತ್ ಸಭಾರ್ ಭಾಸಾಂಕ್ ಭಾಷಾಂತರ್ ಜಾಲಾಂ.

SD01

ಸಿದ್ಧಲಿಂಗಯ್ಯಾಕ್ ಸಭಾರ್ ಪ್ರಶಸ್ತ್ಯೊ ಸೊಧುನ್ ಆಯ್ಲ್ಯಾತ್ ಪುಟ್ಟಣ್ಣ ಕಣಗಲಾಚ್ಯಾ ‘ಬಾ ನಲ್ಲೆ ಮಧುಚಂದ್ರಕೆ’ ಫಿಲ್ಮಾಕ್ ಲಿಕ್ಲಲ್ಯಾ ‘ಆ ಬೆಟ್ಟದಲ್ಲಿ, ಬೆಳದಿಂಗಳಲ್ಲಿ ಸುಳಿದಾಡಬೇಡ ಗೆಳತಿ’ ಪೊದಾಕ್ ಉತ್ತೀಮ್ ಚಲನಚಿತ್ರಗೀತ್ ರಚ್ನೆಕ್ ಆಸ್ಚಿ ಕರ್ನಾಟಕ ಸರ್ಕಾರಾಚಿ ಪ್ರಶಸ್ತಿ 1984 ವ್ಯಾ ವರ‍್ಸಾ ಲಾಬ್ಲ್ಯಾ. 1986 ವ್ಯಾ ವರ‍್ಸಾ ರಾಜ್ಯೋತ್ಸವ ಪ್ರಶಸ್ತಿ ಡಾ| ಬಿ ಆರ್ ಅಂಬೇಡ್ಕರ್ ಶತಮಾನೋತ್ಸವ್ ವಿಶೇಷ್ ಪ್ರಶಸ್ತಿ (1992), ಕರ್ನಾಟಕ ಸಾಹಿತ್ಯ ಅಕಾಡೆಮಿ ಗವ್ರವ್ ಪ್ರಶಸ್ತಿ, ಜಾನಪದ ತಜ್ಞ ಪ್ರಶಸ್ತಿ, ಸಂದೇಶ ಪ್ರಶಸ್ತಿ, ಡಾ| ಬಾಬಾಸಾಹೇಬ್ ಅಂಬೇಡ್ಕರ್ ಪ್ರಶಸ್ತಿ, ಸತ್ಯಕಾಮ ಪ್ರತಿಷ್ಠಾನ್ ಪ್ರಶಸ್ತಿ, ಬಾಬು ಜಗಜೀವನರಾಮ್ ಪ್ರಶಸ್ತಿ, ನಾಡೋಜ ಪ್ರಶಸ್ತಿ, ಪ್ರೆಸಿಡೆನ್ಸಿ ಇನ್ಸ್‌ಟಿಟ್ಯೂಷನ್ ಪ್ರಶಸ್ತಿ, ಆಳ್ವಾಸ್ ನುಡಿಸಿರಿ ಪ್ರಶಸ್ತಿ, ನೃಪತುಂಗ ಪ್ರಶಸ್ತಿ, ಪಂಪ ಪ್ರಶಸ್ತಿ ಹ್ಯಾ ಪಯ್ಕಿ ಥೊಡ್ಯೊ.

SQ20

ಜಲ್ಮ್ ದಾತಾರಾಂ – ಬಾಪ್ ದೇವಯ್ಯ, ಆವಯ್ ವೆಂಕಟಮ್ಮ ಆನಿ ಭಾವ್

SQ7

SQ8

SQ16

ಕುಟಮ್ –  ಪತಿಣ್ ರಾಮಕುಮಾರಿ, ಧುವ್ ಮಾನಸ ಆನಿ ಪೂತ್ ಗೌತಮ್ 

ಕರ್ನಾಟಕಾಂತ್ 1983 ಘುಂವ್ಡೆಚೊ ಕಾಳ್. ಸಾಹಿತಾಂತ್ ಮಂತ್ರಿ ಬಿ ಬಸವಲಿಂಗಪ್ಪಾಚ್ಯಾ ಎಕಾ ಉತ್ರಾಧ್ವಾರಿಂ ಬೂಸಾ ಚಳ್ವಳ್ ವಾಡ್‌ಲ್ಲಿ ತರ್ ರಾಜಕೀಯಾಂತ್ ದಲಿತ್ ಆನಿ ರಯ್ತಾಂಚ್ಯಾ ಸಕ್ತೆಚೊ ಉದೆವ್ ಜಾಲ್ಲೊ ಹ್ಯಾ ಸರ‍್ವಾಂಕ್ ಜೀವ್ ದಿಂವ್ಚೆಪರಿಂ ಸಿದ್ಧಲಿಂಗಯ್ಯಾಚಿಂ ಕಾವ್ಯಾಂ ಉಜ್ಯಾ ತಲ್ವಾರಿಂಪರಿಂ ಉಸುಂವ್ಕ್ ಲಾಗ್ಲ್ಯೊ ಆನಿ ರಸ್ತ್ಯಾಂರಸ್ತ್ಯಾಂನಿ ಸಿದ್ಧಲಿಂಗಯ್ಯಾಚ್ಯಾ ಕವಿತೆಂಕ್ ಘೆವ್ನ್ ಸ್ಟ್ರೀಟ್ ಪ್ಲೇ (ರಸ್ತ್ಯಾಂ ನಾಟ್ಕುಳೆ) ಚಲ್ತಾಲೆ. ‘ನ ಭೂತೋ ನ ಭವಿಷ್ಯತೀ’ (ಪಯ್ಲೆಂಯ್ ನಾಂ ಮಾಗಿರ್‌ಯೀ ನಾಂ) ಮ್ಹಣ್ಚೆಪರಿಂ ಲೋಕ್ ಹ್ಯಾ ನವ್ಯಾ ಸಾಹಿತಿಕ್ ಆಯಾಮಾಕ್ ಆಕರ‍್ಷಿತ್ ಜಾಲೊ. ಅಶೆಂ ಪಳಯ್ತಾನಾಂ, ತಾಚೆಲಾಗಿಂ ಉಲಯ್ತಾನಾಂ ಎಕ್ ಮೊವಾಳ್ ಮಯ್ಪಾಶಿ ದಿಸ್ಚ್ಯಾ, ಖುಶಾಲಾಯೆಚೆಂ ಉಲೊವ್ಪ್ ಚಲೊಂವ್ಚ್ಯಾ ಸಿದ್ಧಲಿಂಗಯ್ಯಾನ್ ಪರಂಪರೆಕ್, ಆಡಳ್ತ್ಯಾಕ್ ಆನಿ ಪಾತ್ಯೆಲ್ಲ್ಯಾ ಸತಾಂಕ್ ಘಾಲ್ಲಿಂ ಭಿರಾಂಕುಳ್ ಸವಾಲಾಂ ಸಾದ್ಯಾ ಲೊಕಾಂಕ್ ಖರಿಂ ಮ್ಹಣ್ ದಿಸ್ಲಿಂ ಆನಿ ಕರ್ನಾಟಕಾಂತ್ ಕ್ರಾಂತಿ ಜಾಲಿ. ತಾಚ್ಯಾ ಕಾಳಾರ್ ಚಡಾವತ್ ಕವಿ ಪ್ರಾಚೀನ್ ಗ್ರೇಸ್ತ್‌ಕಾಯೆಕ್ ಪುಗಾರ್ನ್ ಪ್ರಸ್ತುತ್ ಸ್ಥಿತೆಂತ್ ಪುರಾತನ್ ವ್ಹಡ್ವಿಕಾಯೆಚೆಂ ತಳ್ ಸೊಧ್ತಾಲೆ ತರ್ ಸಿದ್ಧಲಿಂಗಯ್ಯಾಕ್ ಪುರಾತನ್ ವಾ ಪ್ರಸ್ತುತ್ ಗ್ರೇಸ್ತ್‌ಕಾಯೆಚೆಂ ಕಿತೆಂಚ್ ಬಳ್ ನಾತ್‌ಲ್ಲೆಂ ತಾಕಾ ಫಕತ್ ಅಂಬೇಡ್ಕರ್ ಪ್ರಣೀತ್ ಫುಡಾರಾಚೊ ಭರ‍್ವಸೊ ಆಸ್‌ಲ್ಲೊ ಆನಿ ತೊ ಭರ‍್ವಸೊ ಆಪ್ಲ್ಯಾ ಲೊಕಾಂಸವೆಂ ವಾಂಟುನ್ ಘೆಂವ್ಚಿ ಅನಿವಾರ‍್ಯತಾ ಆಸ್‌ಲ್ಲಿ. ಹ್ಯಾ ನಿಮ್ತಿಂ ಜಿವ್ಸಾಣೆಚಿ ಸಾಹಿತ್ ಕ್ರಾಂತಿ ಕರ‍್ಚ್ಯಾಕ್ ಸಿದ್ಧಲಿಂಗಯ್ಯಾನ್ ಮುಕಾರ್ ಸರ‍್ಚೆಂ ಪಡ್ಲೆಂ.

SQ14

ಡಿ.ಆರ್. ನಾಗರಾಜ್, ಟಿ. ಎನ್. ಸೀತಾರಾಂ, ಪಿ. ಲಂಕೇಶ್, ಯು. ಆರ್. ಅನಂತಮೂರ್ತಿ,
ಎಚ್. ಎಸ್. ಬಿಳಿಗಿರಿ, ಶೂದ್ರ ಸ್ರೀನಿವಾಸ್, ಶ್ರೀನಿವಾಸ್ ಕಪ್ಪಣ್ಣ

SQ11

ಬಿ. ವಿ. ಕಾರಂತಸವೆಂ

SQ17

ಪರಿವರ‍್ತನಾಕ್ ಜಾಯ್ ತಿ ಪ್ರಾಮಾಣಿಕ್ ರಾಜಕೀಯ್ ಸಕತ್ ಆನಿ ಬರೆಂಪಣ್ ಹಾಡುಂಕ್ ಆಶೆಂವ್ಚಿ ಕಾವ್ಯಾತ್ಮಕ್ ತಾಂಕ್ ಕಿತೆಂ ಬರೆಂ ಹಾಡ್ತಾ ಮ್ಹಣ್ಚ್ಯಾಕ್ ಸಿದ್ಧಲಿಂಗಯ್ಯ ವ್ಹಡ್ ಸಾಕ್ಸ್. ಮಾಗಡಿಚಿ ಹಳ್‌ಕೇರ್ ಆನಿ ಶ್ರೀರಾಮಪುರ ಸ್ಲಮ್ ಸಿದ್ಧಲಿಂಗಯ್ಯಾಚ್ಯಾ ಬಳ್ವಂತ್ ಅಂತಃಸಕ್ತೆಕ್ ದಾಂಬುನ್ ಧರುಂಕ್ ವಾ ಮುಗ್ದುನ್ ಕಾಡುಂಕ್ ಸಕುನಾಂ ಬಗಾರ್ ತೊ ಆಪ್ಲ್ಯಾ ಲೊಕಾಚ್ಯಾ ಸಂಕಷ್ಟಾಂಕ್ ತಾಳೊ ಜಾಲೊ. (ಹಸಿವಿನಿಂದ ಸತ್ತೋರು, ಸೈಜುಗಲ್ಲು ಹೊತ್ತೋರು, ವದೆಸಿಕೊಂಡು ವರಗಿದೋರು, ನನ್ನ ಜನಗಳು) ತ್ಯಾ ಲೊಕಾಂಥಂಯ್ ಲಿಪುನ್ ಆಸ್ಚಿ ಬಳ್ವಂತ್ ಸಕತ್ ಆನಿ ತ್ಯಾ ಸಕ್ತಿಚೆರ್ ವೆವಸ್ತ್ಯಾನ್ ಘಾಲ್ಲಿ ಬಂಧಡ್ ತಾಚ್ಯಾ ಕಾವ್ಯಾತ್ಮಕ್ ದೊಳ್ಯಾಂಕ್ ಸ್ಪಷ್ಟ್ ದಿಸ್ಲಿ. ತಾಂಕಾಂ ಸಂಘಟಿತ್ ಕರ್ನ್ ತಾಂಚ್ಯಾ ಎಕ್ವಟಾಚ್ಯಾ ಬಳಾನ್ ತಾಂಕಾಂ ಸುಟ್ಕಾ ಲಾಬೊಂವ್ಕ್ ತೊ ವಾವುರ‍್ಲೊ. ಸಿದ್ಧಲಿಂಗಯ್ಯ ದಲಿತ್‌ವಾದ್ ಘೆವ್ನ್ ವಾವುರ‍್ಲೊ ತರೀ ತಾಕಾ ದಲಿತ್ ಮ್ಹಳ್ಯಾರ್ ದುಬ್ಳಿಕಾಯೆಕ್, ಸಾಮಾಜಿಕ್ – ಆರ‍್ಥಿಕ್ ಅನ್ಯಾಯಾಕ್ ಬಲಿ ಜಾಲ್ಲೆ ಸರ್ವ್ ಲೋಕ್. ರಯ್ತ್, ಕಾರ‍್ಖಾನ್ಯಾಂತ್ಲೆ ಕಾಮೆಲಿ, ಭುಂಯ್ ಹೊಗ್ಡಾವ್ನ್ ಘೆತ್‌ಲ್ಲೆ ರಯ್ತಾಪಿ ಕಾಮೆಲಿ, ಅಶೆಂ ತಾಳೊ ನಾತ್ಲಲ್ಯಾ ಸರ್ವ್ ವರ‍್ಗಾಂಚೊ ಪ್ರತಿನಿಧಿ ಜಾವ್ನ್ ತೊ ಸಂಘರ್ಶಾಕ್ ದೆಂವ್ಲೊ. ಕರ್ನಾಟಕ ಸುರ್‌ಯೊ ಮ್ಹಣ್ ನಾಂವಾಡ್ಲಲ್ಯಾ ಬಿ. ಕೃಷ್ಣಪ್ಪ ಸವೆಂ ಮೆಳುನ್ ದಲಿತ್ ಚಳ್ವಳೆಕ್ ತಾಣೆಂ ಬಳ್ ದಿಲೆಂ. ತಾಚೆಂ ಸಾಹಿತ್ ದಲಿತ್ – ಬಂಡಾಯ ಸಾಹಿತ್ ಮ್ಹಣ್ ನಾಂವಾಡ್ಲೆಂ ಆನಿ ಕರ್ನಾಟಕಾಂತ್ ಅನೀತೆಕ್ ವಳಗ್ ಜಾಲ್ಲ್ಯಾಂಕ್ ತೆಂ ತಾಳೊ ದಿಂವ್ಚೆಂ ಸಾಧನ್ ಜಾಲೆಂ.

SQ4

SQ13

SQ12

SQ3

SQ19

ಅನ್ಭವಾಸವೆಂ ಆಪ್ಣಾಯ್ಲಲಿ ಸಮ್ಜಣಿ ಮಾರ್ಕ್ಸ್‌ವಾದಿ ದಿಷ್ಟಿನ್ ವಿಮರ‍್ಸೊ ಕರ್ನ್ ಸ್ವೀಕಾರ್ ಕರ‍್ಚಿ ತಾಂಕ್ ತಾಣೆಂ ವಾಡವ್ನ್ ಘೆತ್‌ಲ್ಲಿ. ತಾಚಿಂ ಕಾವ್ಯಾಂ ವಾ ಬರ‍್ಪಾಂ ಖಂಚ್ಯಾಯ್ ಸಂದರ‍್ಭಾರ್ ಫಕತ್ತ್ ಕ್ಷಣಿಕ್ ರಾಗಾಚಿಂ, ಭೊಗ್ಣಾಂಚ್ಯಾ ಉಂಚಾಬಳಾಯೆಚಿಂ ವಾ ದ್ವೇಷಾಚಿಂ ಪ್ರತೀಕಾಂ ಮ್ಹಣ್ ಘೆಂವ್ಕ್ ಜಾಯ್ನಾಂ ಬಗಾರ್ ತಾಂತುಂ ಗೂಂಡ್ ಅಧ್ಯಯನಾಚಿ ತಾಂಕ್ ಆಸಾ. ಬಾಬಾಸಾಹೇಬ್ ಬಿ ಆರ್ ಅಂಬೇಡ್ಕರಾಚ್ಯಾ, ರಾಮ್ ಮನೋಹರ ಲೋಹಿಯಾಚ್ಯಾ ಸಿದ್ಧಾಂತಾಂನಿ ತೊ ಪ್ರಭಾವಿತ್ ಜಾಲ್ಲೊ ಆನಿ ತಿಂ ಸಿದ್ಧಾಂತಾಂ ಕಾರ‍್ಯಾರುಪಾಕ್ ಹಾಡ್ಚ್ಯಾಕ್ ಸ್ಥಳೀಕ್ ವಿಧಾನಾಂ ತಾಣೆಂ ವಾಪಾರ್‌ಲ್ಲಿಂ. ಅಶೆಂ ಜಾಗತಿಕ್ ದಿಷ್ಟಾವೊ ಆನಿ ಸ್ಥಳೀಕ್ ಕಾರ‍್ಯವಿಧಾನಾನ್ ತಾಣೆಂ ಆಪ್ಲ್ಯಾ ಲೊಕಾಕ್ ಬಳ್ವಂತ್ ಕೆಲ್ಲೆಂ. ಆಜ್ ಕರ್ನಾಟಕಾಂತ್ ಆಸಾ ಜಾಲ್ಲ್ಯಾ ದಲಿತ್ ಜಾಗ್ರುತೆಂತ್ ತಾಚೊ ವಾಂಟೊ ಮಹತ್ವಾಚೊ ಆಸಾ. ತಾಳೊ ನಾತ್ಲಲ್ಯಾ ಲೊಕಾಂಚೊ ತಾಳೊ ಮ್ಹಣ್ಚೆಪರಿಂ ಉಲೊಂವ್ಚೊ ಸಿದ್ಧಲಿಂಗಯ್ಯ ಕೆದಿಂಚ್ ವೆಕ್ತಿಗತ್ ರಿತಿನ್ ಕೊಣಾಯ್‌ಲಾಗಿಂ ದುಸ್ಮಾನ್ ಜಾವ್ನಾಂ ಮ್ಹಣ್ಚೆಂ ವ್ಹಡ್ ಅಜಾಪಾಂಚೆಂ ಸತ್. ಮಹಾತ್ಮ ಗಾಂಧೀಜಿಪರಿಂ ತಾಚೊ ಪ್ರತಿರೋಧ್ ಆಸ್‌ಲ್ಲೊ ಅನ್ಯಾಯ್ ಕರ‍್ಚ್ಯಾ ಸಿದ್ಧಾಂತಾಂಚೆರ್ ಶಿವಾಯ್ ಖಂಚ್ಯಾಯ್ ವೆಕ್ತಿಂಚೆರ್ ನ್ಹಂಯ್. ದೆಕುನ್ಂಚ್ ಹರ‍್ಯೆಕಾ ವೆಕ್ತಿಕ್ ಮಾನಾನ್ ಲೆಕ್ಚೆಂ ವಿಶಾಲ್ ಮನ್ ತಾಕಾ ಆಸ್‌ಲ್ಲೆಂ. ತಶೆಂಚ್ ವಿಮರ‍್ಶಾತ್ಮಕ್ ಅಧ್ಯಯನ್ ಮಾಂಡ್ತಾನಾ ಆಪ್ಲೊ ಪೆಲೊ ಮ್ಹಣ್ಚೊ ಥರ್‌ಭೆದ್ ತೊ ಕರಿನಾತ್‌ಲ್ಲೊ. ಏಕ್ ಪುರ‍್ತೊ ಜಾತ್ಯಾತೀತ್‌ವಾದಿ, ಸಮಸ್ಥಿತಿ ಪ್ರಜ್ಞೆಚೊ ವೆಕ್ತಿ ಜಾವ್ನ್ ಆಪ್ಲೆಂ ಅಧ್ಯಯನ್ ತೊ ಮಾಂಡ್ತಾಲೊ.

SQ5

SQ6

SQ15

ಧುವ್ ಮಾನಸಾಚೆಂ ಕಾಜಾರ್

SQ1

ನಾತ್ ವಿದಿಶಾಗಿರಿ 

ಸಿದ್ಧಲಿಂಗಯ್ಯ ಪ್ರತಿಭಾನ್ವಿತ್ ಕವಿ. ಆಪ್ಲ್ಯಾ ವ್ಹರ್ತ್ಯಾ ವ್ಯುತ್ಪತ್ತಿಚ್ಯಾ ಬಳಾನ್ ಎಕಾ ಜನಾಂಗಾಕ್ ಫಕತ್ ಸಂಘರ‍್ಷಾಚ್ಯಾ ವಾಟೆನ್ ಮಾತ್ರ್ ನ್ಹಂಯ್ ಆಸ್ತಾಂ ಸಂಘಟನಾಚ್ಯಾ ವಾಟೆನ್ ಮುಕಾರುನ್ ವ್ಹರುಂಕ್ ತಾಕಾ ತಾಂಕ್‌ಲ್ಲೆಂ. ‘ಪ್ರಜ್ಞಾ ನವನವೋನ್ಮೇಷಾಶಾಲಿನಿ ಪ್ರತಿಭಾ’ ಮ್ಹಣ್ತಾತ್ ಹ್ಯಾಚ್ ಪರ‍್ಮಾಣೆಂ ಆಪ್ಣಾ ಭಿತರ್ ಲಿಪ್‌ಲ್ಲಿ ಪ್ರಜ್ಞಾ ಆನಿ ಜಾಗೃತಿ ತಾಣೆಂ ಫಕತ್ ಆಪ್ಣಾಕ್ ಜಾಗ್ರುತ್ ಕರ‍್ಚ್ಯಾಕ್ ಮಾತ್ರ್ ನ್ಹಂಯ್ ಆಪ್ಲ್ಯಾ ಲೊಕಾಂಕ್ ಜಾಗವ್ನ್ ಉಟೊಂವ್ಚ್ಯಾಕ್ ವಾಪರ‍್ಲಿ. ತಾಚಿ ಕವಿತಾ ಕೋಲಾರಾಥಾವ್ನ್ ಬೀದರ್ ಪರ‍್ಯಾಂತ್ ಅನ್ಯಾಯಾಕ್ ವಳಗ್ ಜಾಲ್ಲ್ಯಾ ಲೊಕಾಂಚ್ಯಾ ಜಿಬೆಂನಿ ಘೊಳ್ಳಿ ಆಪ್ಣಾಕ್ ಜಾಲ್ಲ್ಯಾ ಅನಿತೆ ವಿರೋಧ್ ತಾಳೊ ಜಾಲಿ. ಸಿದ್ಧಲಿಂಗಯ್ಯಾಚ್ಯಾ ಕವಿತೆಚೆಂ ವ್ಹಡ್ ಲಕ್ಷಣ್ ಸಂವಾಧನಾತ್ಮಕ್ಪಣ್. ಸಭೆಂತ್ ಜಶೆಂ ಲೊಕಾಂಲಾಗಿಂ ತೊ ಉಲಯ್ತಾಲೊ ತಶೆಂಚ್ ಕವಿತಾ ಉಪ್ಜುನ್ ಯೆತಾಲಿ. ಆಯ್ಕೊಪ್ಯಾಲಾಗಿಂ ತಶೆಂಚ್ ವಾಚ್ಪ್ಯಾಲಾಗಿಂ ಶೀದಾಶೀದಾ ಸಂವಹನ್ ಚಲಯ್ತಾಲಿ. ಜಶೆಂ ಪ್ರಿನ್ಸ್ ವೋಲ್ಟೇರಾಚಿಂ ಬರ‍್ಪಾಂ ರಾಯಾಚ್ಯಾ ಅನ್ಯಾಯಾಕ್ ವಳಗ್ ಜಾಲ್ಲ್ಯಾ ಫ್ರೆಂಚ್ ಲೊಕಾಕ್ ಜಾಗಯ್ತಾಲಿ ತಶೆಂ ತಾಚ್ಯೊ ಕವಿತಾ ನಿದ್ಲಲ್ಯಾಂಕ್ ಸಯ್ತ್ ಧೊಂಕುಳ್ನ್ ಉಟಯ್ತಾಲಿಂ.

ಸಿದ್ಧಲಿಂಗಯ್ಯಾಕ್, ತಾಚ್ಯಾ ಕಾವ್ಯಾಕ್ ಆನಿ ಮ್ಹಾಕಾ ಏಕ್ ನಾತೆಂ ಆಸಾ ತೆಂ ಹಾಂವೆಂ ‘ವಾಚ್ತಾಂ ವಾಚ್ತಾಂ…’ ಪುಸ್ತಕಾಚ್ಯಾ ‘ದುಬ್ಳ್ಯಾಂಕ್ ಮರಣ್ ದೀನಾಕಾ ದೆವಾ’ ಅಧ್ಯಾಯಾಂತ್ ಲಿಕ್ಲಾಂ. ಆಮಿ ಸಾಂತ್ ಲುವಿಸ್ ಕೊಲೆಜಿಚೆ ಸೊಡೆಲಿಸ್ತ್ ಜಾವ್ನಾಸ್ತಾನಾಂ ಆತಾಂಚೊ (2021) ರೆಕ್ಟರ್ ಬಾಪ್ ಮೆಲ್ವಿನ್ ಪಿಂಟೊ, ಬಾಪ್ ಗಿಲ್ಬರ್ಟ್ ಸಲ್ಡಾನ್ಹಾ ಆನಿ ಹೆರ್ ಎಕ್ದಮ್ ಕಾರ‍್ಯಾಳ್ ಆಸ್‌ಲ್ಲೆ. ಆಮಿ ಸಿದ್ಧಲಿಂಗಯ್ಯಾಚ್ಯಾ ಕವಿತೆಂಚೆರ್ ರೊಟ್ಟಿ ಮ್ಹಣ್ಚೊ ಏಕ್ ಸ್ಟ್ರೀಟ್ ಪ್ಲೇ (ರಸ್ತ್ಯಾಂ ನಾಟ್ಕುಳೊ) ತಯಾರ್ ಕೆಲ್ಲೊ ಆನಿ ತೊ ಆಮಿ ಗಾಂವ್‌ಭರ್ ಪ್ರದರ‍್ಶಿತ್ ಕರ‍್ತಾಲ್ಯಾಂವ್. ತವಳ್ ತಿಂ ಪೊದಾಂ ತಶೆಂಚ್ ‘ಹಸಿರು ಹೊನ್ನು’ ಕ್ಯಾಸೆಟಿಂತ್ಲಿಂ ಹೆರ್ ಪೊದಾಂ ಮ್ಹಾಕಾ ವಳ್ಕಿಚಿಂ ಜಾಲ್ಲಿಂ. ತೆ ಉಪ್ರಾಂತ್ ಪಿ ಲಂಕೇಶಾಚ್ಯಾ ‘ಪ್ರಗತಿ ರಂಗ’ ಪಾಡ್ತಿಚ್ಯಾ ಪಾಟ್ಲ್ಯಾನ್ ಹಾಂವ್ ಆನಿ ಡೇವಿಡ್ ಡಿಸೋಜಾ ವಾಮಂಜೂರ್ ಸಕ್ರಿಯ್ ಆಸ್‌ಲ್ಲ್ಯಾನ್ ಮ್ಹಾಕಾ ಸಿದ್ಧಲಿಂಗಯ್ಯಾಚ್ಯಾ ಬರ‍್ಪಾಂಚಿ ಲಾಗ್ಶಿಲ್ಯಾನ್ ವಳಕ್ ಜಾಲ್ಲಿ ತಶೆಂಚ್ ಏಕ್ ದೋನ್ ಪಾವ್ಟಿಂ ತಾಕಾ ಮೆಳ್ಚೊ ಆವ್ಕಾಸ್‌ಯಿ ಹಾಂವೆಂ ಕರ‍್ನ್ ಘೆತ್‌ಲ್ಲೊ.

‘ಇಕ್ರಲಾ ವದೀರ್ಲಾ, ಈ ನನ್ನ ಮಕ್ಕಳ ಚರ್ಮ ಎಬ್ರಲಾ’  ‘ದೇವ್ರು ಒಬ್ರೇ ಅಂತಾರೆ, ಓಣೆಗೊಂದ್ ತರ ಗುಡಿ ಕಟ್ಸವ್ರೆ’ ಮ್ಹಣುನ್ ಸಿದ್ಧಲಿಂಗಯ್ಯಪರಿಂ ಇತ್ಲ್ಯಾ ಬಳ್ವಂತ್ ಸ್ಪಿರಿತಾನ್ ಪರ‍್ಗಟ್ಲಲೊ ಕನ್ನಡ ಕವಿ ಆನ್ಯೆಕ್ಲೊ ಆಸ್ಚೊ ನಾ. ಚೋಮನ ಮಕ್ಕಳ ಹಾಡು, ನಿನ್ನ ಮಗನ ಕೊಂದರು, ಕಪ್ಪು ದೇವತೆಯ ಕಣ್ಗಾವಲು, ದಲಿತರು ಬರುವರು ದಾರಿ ಬಿಡಿ, ನನ್ನ ಜನಗಳು, ಸಾವಿರಾರು ನದಿಗಳು, ಕೊಳೆಗೇರಿಯ ಹಾಡು ಹಾಚಿಂ ಥೊಡಿಂ ಮಹತ್ವಾಚಿಂ ಕವನಾಂ ಜಿಂ ಹಜಾರೋ ಲೊಕಾಚ್ಯಾ ಜಿಬೆಂತ್ ಆಜೂನ್ ಘೊಳುನ್ ಆಸಾತ್.

► ಸ್ಟೀವನ್ ಕ್ವಾಡ್ರಸ್ ಪೆರ‍್ಮುದೆ

ಕಿಟಾಳ್ ತುಮ್ಕಾಂ ಮೊಗಾಚೆಂ? ಪಾಟ್ಲ್ಯಾ 10 ವರ್ಸಾಂ ಪಾಸುನ್ ಖಳಾನಾಸ್ತಾನಾ ನಿರಂತರ್ ಫಾಯ್ಸ್ ಜಾವ್ನ್ ಆಸ್ಚ್ಯಾ ಕಿಟಾಳಾರ್ ಹಜಾರೊಂ ಪಾನಾಂನಿ ವಿಂಚ್ಣಾರ್ ಕೊಂಕ್ಣಿ ಸಾಹಿತ್ಯ್ ಆಸಾ. ಪಾಟ್ಲ್ಯಾ ಧಾ ವರ್ಸಾಂನಿ ಬಾಂದುನ್ ಹಾಡ್ಲೆಲೆಂ ಕೊಂಕ್ಣಿ ಸಾಹಿತ್ಯಾಚೆಂ ದಾಯ್ಜ್ ಮುಕಾರುನ್ ವ್ಹರುಂಕ್ ತುಮ್ಚಿ ಕುಮಕ್ ಗರ್ಜ್ ಆಸಾ. ಸಕಯ್ಲೊ ಬುತಾಂವ್ ದಾಂಬುನ್ ಗೂಗಲ್ ಪೇ, ಪೋನ್ ಪೇ, ಬ್ಯಾಂಕ್ ಟ್ರಾನ್ಸ್‌ಫರ್ , ಡೆಬಿಟ್ ಕ್ರೆಡಿಟ್ ಕಾರ್ಡಾ ಮಾರಿಫಾತ್ ಖುಶೆಚಿ ವಂತಿಗೆ ದಿವ್ಯೆತ್.

42% feel thumbs up. And how do you feel?
3 :thumbsup: Thumbs up
0 :heart: Love
0 :joy: Joy
1 :heart_eyes: Awesome
3 :blush: Great
0 :cry: Sad
0 :rage: Angry

One comment

  1. Winston Dsouza Bangalore

    Beautiful article, well presented

Leave a Reply

Your email address will not be published. Required fields are marked *

Disclaimer : Please write your correct name and email address. Kindly do not post any personal, abusive, defamatory, infringing, obscene, indecent, discriminatory or unlawful or similar comments. Kittall.com will not be responsible for any defamatory message posted under this article. Please note that sending false messages to insult, defame, intimidate, mislead or deceive people or to intentionally cause public disorder is punishable under law. It is obligatory on kittall.com to provide the IP address and other details of senders of such comments, to the authority concerned upon request. Hence, sending offensive comments using kittall.com will be purely at your own risk, and in no way will kittall.com be held responsible.