ಗುರುಭ್ಯೋ ನಮಃ

ಸಂಸ್ಕ್ರತ್ ಭಾಶೆನ್ ಪ್ರಚಲಿತ್ ಆಸ್ಚೊ ಏಕ್ ಶ್ಲೋಕ್ ಆಮಿ ಜಾಯ್ತೆ ಪಾವ್ಟಿಂ ಆಯ್ಕಾಲಾ ಆಸ್ತಲೊ.

‘ಗುರೂರು ಬ್ರಹ್ಮ, ಗುರೂರು ವಿಷ್ಣು, ಗುರುವೇ ದೇವೊ ಮಹೆಶ್ವರಾ.
ಗುರೂರು ಸಾಕ್ಷಾತ್ ಪರಭ್ರಹ್ಮ, ತಸ್ಮಹೇ ಶ್ರಿ ಗುರುವೇ ನಮಹ’

ಸಾದ್ಯಾ ಭಾಶೆನ್ ಆಮಿ ಟೀಚರ್, ಮಾಷ್ಟರ್, ಪ್ರಾಧ್ಯಾಪಕ್ ವ ಶಿಕೋಣ್ದಾರ್ ಅಶೆಂ ವಾಪಾರ್ಚೊ ಹೊ ಸಬ್ದ್ ಸಂಸ್ಕ್ರತಾಚಾ ‘ಗುರು’ ಮ್ಹಳ್ಳ್ಯಾ ಮೂಳ್ ಸಬ್ದಾಚಾ ಅರ್ಥಾ ಥಾವ್ನ್ ಉದೆವ್ನ್ ಆಯ್ಲಾ ತೆಂ ಆಮಿ ಜಾಣಾಂವ್. ಕ್ರಿಸ್ತಾಂವ್ ಧಾರ್ಮಿಕ್ ಶಿಕೊಣೆ ಪರ್ಮಾಣೆ ಬಾಪ್, ಪುತ್ರ್ ಆನಿ ಸ್ಪಿರಿತ್ ಸಾಂತ್ ಆನಿ ಸನಾತನ್ ಧರ್ಮಾ ಪರ್ಮಾಣೆ ಬ್ರಹ್ಮ, ವಿಷ್ಣು ಆನಿ ಮಹೆಶ್ವರಾ ಎಕಾಚ್ ಮೂಳ್ ಸೈಂಭಿಕ್ ಸಕ್ತೆಚೆ ಜಾವ್ನ್ ಆಸೊನ್, ಸಾಂಸಾರಿಕ್ ರಿತಿನ್ ಏಕ್ ‘ಗುರು’ ಜಾಂವ್ಕ್ ಯೋಗ್ಯ್ ವ್ಯಕ್ತಿ, ತೇಗ್ ಜಣಾ ಸಂಘಟಿತ್ ದೈವಿಕ್ ಸಕ್ತೆಂಚೆ ಮಾನವ್ ಪ್ರತಿರೂಪ್ ಮ್ಹಳ್ಳೆಂ ವ್ಯಾಖ್ಯಾನ್ ಸಂಸಾರಾನ್ ಮಾನುನ್ ಪರಿಕಲ್ಪಿತ್ ಜಾಲಾಂ.

ಮನ್ಶ್ಯಾಚಾ ಜೀವನಾಂತ್ ಏಕ್ ಗುರು ವ್ಹಡ್ ಆನಿ ಮಹತ್ವ್ ಪೂರ‍್ಣ್ ಪಾತ್ರ್ ಘೆತಾ. ಎಕಾ ವ್ಯಕ್ತಿಚೆಂ ಜೀವಿತ್ ವಿದ್ಯಾರ್ಥಿ ಹಂತಾರ್‌ಚ್ ರೂಪಿತ್ ಕರುನ್, ಶಿಸ್ತ್ ಸಂಸ್ಕ್ರತಿ ತತ್ವಾಂ ಧೋರಣಾ ಆನಿ ಆದರ್ಶಾಂ ತಾಚೆಂ ಥಂಯ್ ಭರುನ್ ಏಕ್ ಆದರ್ಶ್ ಆನಿ ಭಲಾಯ್ಕೆಭರಿತ್ ಸಮಾಜಿಚೊ ಸಾಂದೊ ಜಾವ್ನ್ ಜಿಯೆಂವ್ಕ್ ಎಕಾ ಗುರುಕ್ ಆಸ್ಚಿ ಸಕತ್ ತಾಕಾ ದೈವಿಕ್ ಸ್ಥಾನಾರ್ ವ್ಹರ್ನ್ ದವರ್ತಾ ಮ್ಹಳ್ಳ್ಯಾ ಅರ್ಥಾನ್ ವಯ್ಲೊ ಶ್ಲೋಕ್ ಅಸ್ಥಿತ್ವಾಕ್ ಆಯ್ಲಾ ಆಸ್ತಲೊ. ಆನಿ ಅಸಲೆ ಶ್ಲೋಕ್ ಅಧ್ಯಾತ್ಮಿಕ್ ಜೀವನಾ ದ್ವಾರಿಂ ಜೊಡುನ್ ಘೆತ್ಲ್ಯಾಲ್ಯಾ ದೈವಿಕ್ ಜ್ಞಾನಾದ್ವಾರಿಂ ಮನ್ಶ್ಯಾನ್ ಘಡ್‌ಲ್ಲೆ ಜಾವ್ನಾಸಾತ್ ಮಾತ್ರ್ ನಹಿಂ ಗೂಂಡ್ ಅರ್ಥ್ ಜೊಡುನ್ ದಿತಾತ್.

ಸಂಸ್ಕ್ರತಾಚೊ ‘ಗು’ ಮ್ಹಳ್ಳೊ ಸಬ್ದ್ ‘ಕಾಳೊಕ್’  ವ ‘ಅಜ್ಞಾನ್’ ಮ್ಹಳ್ಳೊ ಅರ್ಥ್ ದಿತಾ ತರ್ ‘ರು’ ಮ್ಹಳ್ಳೊ ಸಬ್ದ್ ‘ಪೈಸ್ ಧಾಂವ್ಡಾಯ್ತಾ’ ವ ‘ನಿತಳ್ ಕರ್ತಾ’ ಮ್ಹಳ್ಳೊ ಅರ್ಥ್ ದಿತಾ. ಆನಿ ಹಿಂ ದೋನ್ ಅಕ್ಶರಾಂ ಏಕ್ ಜಾವ್ನ್ ಗುರು ಮ್ಹಳ್ಳೊ ಸಬ್ದ್ ರೂಪಿತ್ ಜಾತಾನಾ, ಮತಿಂತ್ಲೊ ಕಾಳೊಕ್ ಪೈಸ್ ಕರುನ್ ಜ್ಞಾನ್ ದಿಂವ್ಚೊ ವ್ಯಕ್ತಿ ಮ್ಹಳ್ಳೊ ಅರ್ಥ್ ಆಮಿ ಕರುನ್ ಘೆವ್ಯೆತಾ.

 ‘ ಅಜ್ಞಾನ ಥಿಮಿರಾಂಧಸ್ಯ ಜ್ಞಾನ ಅಜ್ಞಾನ ಶಲಕಾಯ, ಚಕ್ಶುರುನುಮೀಲಿತಾಮ್ ಏನ ತಸ್ಮಯೆ ಶ್ರೀ ಗುರುವೇ ನಮಹ  ‘

‘ಮತಿಂತ್ಲೊ ಅಂಧ್‌ಕಾರ್ ಪೈಸ್ ಕರುನ್ ಗ್ಯಾನ್ ದಿಂವ್ಚಾ ದೈವಿಕ್ ಸ್ವರೂಪಾಚಾ ಏ ಗುರು, ತುಕಾ ವಂದನ್’ ಅಸೊ ಅರ್ಥ್ ಕರುನ್ ದಿಂವ್ಚಾ ಅಸಲ್ಯಾ ಸಬಾರ್ ಶ್ಲೋಕಾದ್ವಾರಿಂ ವಿದ್ಯಾ ಪ್ರಾಪ್ತ್ ಕರುನ್ ದಿಂವ್ಚಾ ವ್ಯಕ್ತಿಚೆಂ ಮಹತ್ವ್ ಅಮ್ಚಾ ಮಾಲ್ಗಡ್ಯಾ ಮೇಧಾವಿಂನಿ ಆಮ್ಚೆ ಮುಕಾರ್  ದವರ್ಲಾಂ. ಮಾತ್ರ್ ನಹಿಂ ಅಗ್ಯಾನ್ ದೂರ್ ಕರ್ಚೆ ಸವೆಂ ತಾಕಾ ಖರ‍್ಯಾ ದೆವಾಚಿ ವಳಕ್ ಕರುನ್ ದೀವ್ನ್ ಮತಿಂತ್ಲೊ ಅಹಂ ಮ್ಹಳ್ಳೊ ದೆಂವ್ಚಾರ್ ಪಯ್ಸ್ ಕರುನ್, ಅತ್ಮೊ ಸಾಲ್ವಾರ್ ಕರ್ಚ್ಯಾ  ದಿಶೆನ್ ಜಿಣಿ ಸಾರ್ಚ್ಯಾ‌ಕ್‌ಯೀ  ಪಾಟಿಂಬೊ ಜಾವ್ನ್ ಗುರುಚೊ ಪಾತ್ರ್ ಸಾದರ್ ಕೆಲಾ.

ಶಿಕ್ಷಣ್ ಜೀವನಾಚೊ ಅವಿಭಾಜ್ಯ್ ವಾಂಟೊ. ಶಿಕಾಪ್ ಜೊಡಿನಸ್‌ಲ್ಲೊ ಮನಿಸ್ ಗೊರ್ವಾ ಬರಿ ಮ್ಹಳ್ಳೆ ಚಿಂತ್ಪಾವಯ್ರ್ ‘ವಿದ್ಯಾ ವಿಹೀನಂ ಪಶು ಸಮಾನಂ’ ಮ್ಹಳ್ಳಿ ಪ್ರಚಲಿತ್ ಗಾದ್ ಆಮ್ಕಾಂ ಆಯ್ಕೊಂಕ್ ಮೆಳ್ತಾ. ಪೂಣ್ ಹಾಂಗಾಸರ್ ಪಾಠ್ ಶಾಳಾಕ್ ವಚೊನ್ ಶಿಕಾಪ್ ಜೊಡ್ಲೊಲೊ ವ ಮೆಸ್ತ್ರಿ ಮೆಸ್ತ್ರಿರ್ಣಿ ದ್ವಾರಿಂ ಉತ್ತೀರ್ಣ್ ಜಾಲ್ಲೊ ವ್ಯಕ್ತಿ ಮಾತ್ರ್ ಶಿಕ್ಪಿ ಮ್ಹಳ್ಳೆಂ ಚಿಂತಾಪ್ ಮುಕಾರ್ ದವರ್ಲಾಂ. ಪಾಠ್ ಶಾಳಾಕ್ ವಚಾನಾಶೆಂ ಇತರ್ ಪ್ರಕ್ರಿಯೆ ದ್ವಾರಿಂ ಶಿಕ್ಷಣ್ ಜೊಡ್‌ಲ್ಲೆ ವ್ಯಕ್ತಿಯೀ ಶಿಕ್ಪಿ ಸಮಾಜೆಚೊ ವಾಂಟೊ ಜಾವ್ನಾಸಾತ್. ಥೊಡಿಂ ಉದಾಹರಣಾ ದಿಂವ್ಚಿ ತರ್, ಸಾಗೊಳೆಗಾರ್ ಆಪ್ಲ್ಯಾ ಬಾಪಾಯ್ ಥಾವ್ನ್ ಸಾಗೊಳೆಚಿ ವಿದ್ಯಾ ಶಿಕ್ತಾ.  ಸುತಾರಿ, ಶಿಲ್ಪಿ, ವಾಹನ್ ಚಾಲಕ್, ಟೈಲರ್, ಗಾಂವ್ಟಿ ಪಂಡಿತ್, ಮೇಸ್ತ್, ಇಲೆಕ್ರಿಶಿಯನ್ , ಪ್ಲಂಬರ್ ಆನಿ ಅಸಲ್ಯಾ ವರ್ಗಾಚೆ ಸರ್ವ್ ವಿದ್ಯಾವಂತ್‌ಚ್. ಸಮಾಜೆಂತ್ ಲ್ಹಾನ್ ಕಾಮ್ ಕರುನ್ ಆಸ್ಚೆ , ದಾಕ್ಲ್ಯಾಕ್  –  ಸತ್ರಿ ವ ಗೇಸ್ ದಿವೊ ಸಮಾಕರ್ಚೆ, ಚಾಮ್ಗಾರ್, ಮಾಸ್ಳಿ ಪಾಗಿ, ಸುರ್ ಕಾಡ್ತಲೊ,  ಪೈಂಟಿಂಗ್ ವೃತ್ತಿ ಕರ್ಚೆ… ಸೊಧುನ್ ವೆತಾನಾ ಅಸಲೆ ಸಬಾರ್ ವರ್ಗ್ ಆಮ್ಕಾಂ ದಿಸ್ತಾತ್. ಎಕಾ ವಿಸ್ತ್ರಿತ್ ನದ್ರೆನ್ ಆಮಿ ಪಳೆಲ್ಯಾರ್ ಸಂಸಾರಾಂತ್ ವಿದ್ಯಾ ಜೊಡಿನಾತ್‌ಲ್ಲೊ ಮನಿಸ್ ಕೊಣಿ ನಾಂ. ಆನಿ ಹರ್ಯೆಕಾ ವಿದ್ಯಾ ಪಾಟ್ಲ್ಯಾನ್ ಏಕ್ ಗುರು ವ ಶಿಕೊಣ್ದಾರ್ ಆಸ್ತಾಚ್. ಆನಿ ಹರ್ಯೇಕಾ ವಿದ್ಯೆಂತ್ ಗುರುಚೊ ಪಾತ್ರ್ ಶ್ರೇಷ್ಟ್.

ಹರ್ ಗುರು ಏಕ್ ವ್ಯಕ್ತಿ ಮ್ಹಣ್ ಸಾಂಗ್ಚ್ಯಾಕೀ ಏಕ್ ಸಕತ್, ಸ್ಪೂರ್ಥಿ ವ ದೈವಿಕ್‌ಪಣಾಚೊ ಮಾರ್ಗ್‌ದರ್ಶಕ್ ಮ್ಹಣ್ ಸಾಂಗ್ಚಾಂತ್ ಚಡ್ ಅರ್ಥ್ ಆಸಾ ಕೊಣ್ಣಾಂ. ಆಧುನಿಕ್ ಕಾಳಾರ್ ಶಿಕ್ಷಣ್ ಕ್ಶೇತ್ರಾಂತ್ ಜಾಲ್ಲಿ ಪ್ರಗತಿ ಆನಿ ರೂಪಾಂ ಎಕಾ ಕಾಲಾಚಾ ವಿದ್ಯೆಚಾ ಘನತೆಕ್ ಖಂಯ್ಚ್ಯಾಯ್ ರಿತಿನ್ ತುಲನಾತ್ಮಕ್ ನಹಿಂ. ಭಾರತ್ ದೇಶಾಚಾ ಮಟ್ಟಾಕ್ ಆಮಿ ಪಳೆಂವ್ ತರ್ ಸನಾತನ್ ಧರ್ಮಾಚಾ ಸುರ್ವಾತೆಚ್ಯಾ ಸಮಾಜೆಂತ್ ಶಿಕ್ಷಣ್ ಜೊಡ್ಚೆಂ ಬೋವ್ ಥೊಡ್ಯಾ ವರ್ಗಾಂಕ್ ಸೀಮಿತ್ ಆಸ್‌ಲ್ಲೆಂ ತರ್ ಏಕ್ ಗುರು ಜಾವ್ನ್ ಶಿಕ್ಷಣ್ ದಿಂವ್ಚೆಂ ಚಡ್ ಕರುನ್ ಬ್ರಾಹ್ಮಣ್ ಸಮಾಜೆಚಿ ಮೊನೊಪೊಲಿ ಜಾವ್ನ್ ಆಸ್‌ಲ್ಲಿ.

ಇಂಡೊ ಆರ್ಯನ್ ಸಂಸ್ಕ್ರತಿಚೆಂ ಮೂಳ್ ಜುದೆಯಾಚಾ ಆಸ್ ಪಾಸ್ ಗ್ರೀಕ್ ಆನಿ ರೋಮನ್ ಸಂಸ್ಕ್ರತಿ ಪಾಳುನ್ ಆಯಿಲ್ಲ್ಯಾ ಜುದೆವಾಂ ಥಂಯ್ ಆಸ್‌ಲ್ಲೆಂ ಮ್ಹಳ್ಳೆಂ ಸತ್ ಚರಿತ್ರೆನ್ ಉಗ್ಡಾಪೆಂ ಕೆಲಾಂ ಆನಿ ಥಂಯ್ ಥಾವ್ನ್ ದಕ್ಷಿಣಾಕ್ ದೆಂವೊನ್ ಯೇವ್ನ್ ಹಿಮಾಲಾಯಾಚಾ ಎಕಾ ಕುಶಿ ಥಾವುನ್ ಉತ್ತರ್ ಭಾರತ್‌ ಪ್ರವೇಶ್ ಕೆಲ್ಲ್ಯಾ ಹ್ಯಾ ಸಮುದಾಯಾಚಾ ಎಕಾ ಪಂಗ್ಡಾನ್ ಹಾಂಗಾಚೆಂ ಪರಿಸರ್, ಪರ್ವತ್, ನಂಯ್, ರೂಕ್, ಪಾಳಾಂ ಝಡಾಂ ಆನಿ ಮಾತಿಯೆಚೊ ಗೂಣ್ ಹಾಂಚೊ ಗುಂಡಾಯೆನ್ ವೈಗ್ಯಾನಿಕ್ ಅಧ್ಯಯನ್ ಕರುನ್ ಜಾಣ್ವಾಯ್ ಆಪ್ಣಾಯ್ಲಿ. ತಪಸ್ಸ್, ಧ್ಯಾನ್, ಸತತ್ ಪ್ರಯತ್ನಾಚ್ಯಾ ಬಳಾನ್ ತಿ ಜಾಣ್ವಾಯ್ ಘಟ್ ಕೆಲಿ. ಆಜೂನ್ ಭಾರತ್ ದೇಶಾಂತ್ ರಾಜ್ ಕರುನ್ ಆಸ್ಚ್ಯಾ ಹ್ಯಾ ಪಂಗ್ಡಾನ್ ಶಿಕಾಪ್ ಜೊಡುನ್ ದಿಂವ್ಚಿ ರಿವಾಜ್ ಪ್ರಾರಂಬ್ ಕೆಲಿ.

ಆತಾಂ ಆಮಿ ಪುರಾತನ್ ಗುರುಕುಲ ಮ್ಹಣ್ ಒಳ್ಕೊಂಚಿ ಹಿ ರಿವಾಜ್ ಶತಕಾಂ ಆದಿಂ ಪ್ರಾರಂಭ್ ಜಾಲ್ಲಿ. ಥಂಯ್ಸರ್ ಸರ್ವ್ ಜಾಣ್ವಾಯ್ ಆಪ್ಣಾಯಿಲ್ಲೊ ಏಕ್ ಶಿಕ್ಶಕ್ ಆಸ್ತಾಲೊ. ಶಿಕಾಪ್ ಜೊಡುನ್ ಘೆಂವ್ಚೆಂ ಥೊಡ್ಯಾಚ್ ಸಮುದಾಯಾಂಕ್ ಸೀಮಿತ್ ಆಸ್‌ಲ್ಲೆಂ ತರೀ ಸರ್ವ್ ವಿದ್ಯಾರ್ಥಿಂಕ್ ಸಮಾನ್ ರಿತಿನ್ ಪಳೆಂವ್ಚಿ ವ್ಯವಸ್ತಾ ಆಸ್‌ಲ್ಲಿ. ಶಿಕ್ಷಕ್ ಆಪ್ಲ್ಯಾ ವಿಧ್ಯಾರ್ಥಿಂಕ್ ಪ್ರಥಮ್ ಹಂತಾರ್ ಶಿಸ್ತ್, ಖಾಲ್ತೆಂಪಣ್, ಗೌರವ್ ಆನಿ ವಿಧೇಯ್ಪಣ್ ಶಿಕಯ್ತಾಲೊ. ರಾಯಾಚೊ ಪೂತ್‌ಯೀ ಸರ್ವ್ ವಿಧ್ಯಾರ್ಥಿ ಸಾಂಗಾತಾ ರುಕಾಚಾ ಸಾವ್ಳೆಂತ್ ಧರ್ನಿರ್ ಬೊಸೊನ್ಂಚ್ ಅಧ್ಯಯನ್ ಕರ್ತಾನಾ, ತಾಂಚೆಂ ಭಿತರ್ಲೊ ಅಹಂ ಆಪಾಪಿಂಚ್ ಮಾಯಾಕ್ ಜಾವ್ನ್ ವಿದ್ಯಾಸಂಪನ್ನತಾ ಥಂಯ್ ಸರ್ವ್ ಸಮಾನ್ ಮ್ಹಳ್ಳೊ ಭಾವ್ ಗುರುಚಾ ಮಾರ್ಗ್‌ದರ್ಶನಾನ್ ಉದೆತಾಲೊ. ಥಂಯ್ಸರ್ ಗ್ರೇಸ್ತ್ ಆನಿ ದುಬ್ಳೊ, ಜಾತ್ ಕಾತ್, ಕಾಳೊ ವ ಗೊರೊ ಅಸಲೊ ಭೇದ್ ನಾತ್‌ಲ್ಲೊ. ಏಕ್ ಗುರು ಅಕ್ಷರಾಭ್ಯಾಸ್ ಮಾತ್ರ್ ನಹಿಂ ರಾಜ್ ಧರ್ಮ್, ಯುದ್ದ್ ಕಲಾ, ರಾಜ್ ನೀತಿ, ರಣ್‌ನೀತಿ, ಸಾಮಾಜಿಕ್ ರಿತಿ ರಿವಾಜಿ, ವೈಗ್ಯಾನಿಕ್ ಸತಾಂ, ಪ್ರಕೃತಿ ಥಂಯ್ ಮೋಗ್, ಸಂಸ್ಕಾರ್ ಆನಿ ಸಂಸ್ಕ್ರತಿಚೆಂ ಮೂಳ್ ಅದ್ಯಯನ್ ಕರಯ್ತಾಲೊ. ಆನಿ ಹೆ ವಿಧ್ಯಾರ್ಥಿ ಆಪಾಪ್ಲೆ ಕ್ಶೇತ್ರಾಂತ್ ಉಂಚ್ಲೆ ಸಾಧಕ್ ಜಾಂವ್ಕ್ ಪಾವ್ತಾಲೆ. ರಾಮಾಯಣ, ಮಹಾಭಾರತ, ವೆವೆಗ್ಳೆ ವೇದ ಆನಿ ಪುರಾಣ್ ತಸಲ್ಯಾ ಸಬಾರ್ ಭಾರತೀಯ್ ಕಾವ್ಯಾಂನಿ ಎಕಾ ಶಿಕ್ಶಕಾಚೆಂ ಮಹತ್ವ್ ವಿಸ್ತಾರಾಯೆನ್ ಸಾದರ್ ಕೆಲಾಂ. ದ್ರೋಣಾಚಾರ್ಯಾಚಿ ಕಾಣಿಯೆ ಭಂವಾರಿಂ ಉಲ್ಲೇಕಿತ್ ಪ್ರಕರಣಾಂ ಎಕಾ ಶಿಕ್ಶಕಾಚಾ ಸ್ಥಾನಿಕ್ ವಡ್ವಿಕಾಯೆಚೆಂ ಏಕ್ ಜಿವೆಂ ಉದಾಹರಣ್.

ಶಿಕ್ಷಣಾಚೆ ಪ್ರಮುಕ್ ವಾಂಟೆ ಜಾವ್ನ್ ಆಸಾತ್, ವಿದ್ಯಾರ್ಜನ್ ಆನಿ ಜ್ಞಾನಾರ್ಚನ್. ಆಮ್ಚೆ ವಿದ್ಯಾಸಂಸ್ಥೆ ಆಮ್ಚಾ ಮೂಳ್ ಶಿಕ್ಪಾಚಿಂ ದೇವ್ ಮಂದಿರಾಂ. ಪ್ರಥಮ್ ಕ್ಲಾಸಿ ಥಾವುನ್ ಅಕ್ಷರಾಭ್ಯಾಸಾ ಸಂಗಿಂ ವಿದ್ಯಾರ್ಥಿಂಕ್ ತಾಂಚಾ ಮಾನಸಿಕ್, ಭೌಥಿಕ್, ಸಾಮಾಜಿಕ್ ಆನಿ ವಯಕ್ತಿಕ್ ವಿಕಸನಾಕ್ ಗರ್ಜ್ ಆಸ್ಚೆಂ ಶಿಕಾಪ್ ಪ್ರಾಪ್ತ್ ಜಾತಾ. ಪ್ರಾಥಮಿಕ್ ಇಸ್ಕಾಲಾಚಾ ಭುರ್ಗ್ಯಾಂಕ್ ತಾಂಚಿ ಟೀಚರ್ ಏಕ್ ಆವಯ್‌ಚ್ ಜಾತಾ. ವಿದ್ಯಾರ್ಥಿಂ ಥಂಯ್ ಆಸ್ಚೆ ಗೂಣ್ ಆನಿ ಶೆಗುಣ್ ತಾಂಚೆ ತಾಲೆಂತ್ ಊರ್ಜಾ ತಾಕತ್ ತಿ ಒಳ್ಕೊನ್ ಘೆತಾ. ಖಂಯ್ಸರ್ ಆಶಿಕ್ಪಿ ಆವಯ್ ಬಾಪುಯ್ ಆಸಾತ್ ತರ್ ತಾಂಕಾಂ ತಾಂಚ್ಯಾ ಭುರ್ಗ್ಯಾಂಚಾ ತಾಲೆಂತಾಂ ಬಾಬ್ತಿಂ ಫಾವೊತಿ ಜಾಣ್ಕಾರಿ ತಿ ದಿತಾ. ಭುರ್ಗಿಂ ಸೈತ್ ತಿತ್ಲ್ಯಾಚ್ ಮಾಪಾನ್ ಟೀಚರಾಚಾ ಉತ್ರಾಂಕ್ ಸ್ಪಂದನ್ ದಿತಾತ್. ಆನಿ ವಿಶೇಷ್ ಮ್ಹಳ್ಯಾರ್ ಆವಯ್ಚೆಂ ಉತರ್ ಆಯ್ಕಾನಾತ್ಲಿಂ ಭುರ್ಗಿಂ ಸೈತ್ ಟೀಚರಾಂಚಾ ಉತ್ರಾಂಕ್ ಮಾನ್ ದಿತಾತ್.

ಹೊ ಕಸಲೊ ವಿಪರ್ಯಾಸ್? ಆವಯ್ಚ್ಯಾ ಉತ್ರಾಂಕ್ ನಾತ್‌ಲ್ಲೊ ಮಾನ್ ಟೀಚರಾಂಕ್ ಕಸೊ ಮೆಳ್ತಾ? ಟೀಚರಿ ಥಂಯ್ ತಸಲೆಂ ಖಂಚೆಂ ಮ್ಯಾಜಿಕ್ ಆಸಾ?

ಮ್ಯಾಜಿಕ್ ಖಂಡಿತ್ ಆಸಾ. ವಿಶಯ್ ಚರ್ಚಾಸ್ಪದ್ ತರಿ ಮೂಳ್ ಸೈಧಾಂತಿಕ್ ಸತಾಂ ಬದ್ಲಾನಾಂತ್. ಪ್ರಾಕೃತಿಕ್ ನಿಯಮಾಂ ಥಂಯ್ ವಿಚಾರ್‌ಧಾರಾ ಬದ್ಲಾನಾ. ಏಕ್ ಆವಯ್ ಆಪ್ಲ್ಯಾ ಭುರ್ಗ್ಯಾಕ್ ಸಂಸ್ಕಾರ್ ಶಿಕಯ್ತಾ ಆನಿ ಹೆಚ್ ಸಂಸ್ಕಾರ್ ವ್ಹಡ್ ಜಾತನಾ ಭುರ್ಗ್ಯಾ ಥಂಯ್ ಸಂಸ್ಕ್ರತಿ ಜಾವುನ್ ರೂಪ್ ಘೆತಾತ್. ‘ಮನೆಯೆ ಮೊದಲ ಪಾಠ ಶಾಲೆ, ಜನನಿ ತಾನೆ ಮೊದಲ ಗುರುವು’  ಹಿ ಸಾಂಗ್ಣಿ ಹಾಂಗಾ ಸಟೀಕ್ ಲಾಗು ಜಾತಾ. ಏಕಾ ಅವಯ್‌ಕ್ ಆಪ್ಲ್ಯಾ ಭುರ್ಗ್ಯಾ ಥಂಯ್ ರಗ್ತಾ ಸಂಭಂದ್ ಅಸಾ ಜಾಲ್ಲ್ಯಾನ್ ತಿ ಕಿತೆಂ ಆಪ್ಣಾಕ್ ಸಾಂಗ್ತಾ ತೆಂ ಭುರ್ಗೆಂ ಕರಿನಾ ಜಾಂವ್ಕ್ ಪುರೊ, ಪೂಣ್ ಅಪ್ಲಿ ಆವಯ್ ಕಿತೆಂ ಕರ್ತಾ ತೆಂ ಪಳೆವ್ನ್ ಭುರ್ಗೆಂ ತಿಚಾ ಪ್ರೇರಣಾ ವಯ್ರ್ ಅಪ್ಲಿಚ್ ಪ್ರತಿಕ್ರಿಯಾ ಆಪ್ಣಾಯ್ತಾ ಆನಿ ಹಿ ಸಂಸ್ಕಾರಿ ಕ್ರಿಯಾ ತಾಚೆ ಥಂಯ್ ಕ್ರೋಡಿಕೃತ್ ಜಾವ್ನ್ ತೆಂ ಭುರ್ಗೆಂ ಇಸ್ಕಾಲಾಚೆಂ ಮೇಟ್ ಚಡ್ತಾನಾ ತಾಕಾ ಮುಕಾರ್ ಮೆಳ್ತಾ ತಿ ಆನ್ಯೇಕ್ ಆವಯ್, ಶಿಕ್ಶಕಿ ವ ಗುರು ಮ್ಹಳ್ಳೆಂ ನಾಂವ್ ಘೆವುನ್. ಹಾಂಗಾ ಆವಯ್ ಥಾವ್ನ್ ಶಿಕ್ಲೆಲ್ಯಾ ಸಂಸ್ಕಾರಾಂಕ್ ಏಕ್ ಸುಂದರ್ ರೂಪ್ ಮೆಳೊನ್, ಶಿಕ್ಷಕಿ ಸಾಮೂಹಿಕ್ ರಿತಿನ್ ಶಿಕ್ಷಣ್ ದಿತಾನಾ ವಿದ್ಯಾರ್ಥಿಂ ಥಂಯ್ ಏಕ್ ನವಿ ಸಂಸ್ಕ್ರತಿ ರೂಪಿತ್ ಜಾತಾ ಆನಿ ಶಿಕ್ಷಕಿ ಮಾನಾಪಾತ್ರ್ ಜಾತಾ ಜಾಲ್ಲ್ಯಾನ್, ಮುಖ್ಲ್ಯಾ ಶಿಕ್ಪಾ ಜೀವನಾಂತ್ ಆಪ್ಲ್ಯಾ ಅಭಿರುಚೆಚಿ ವಾಟ್ ವಿಂಚುನ್ ಸಾಧನ್ ಕರ್ಚಾ ವಿದ್ಯಾರ್ಥಿಂಕ್ ಪ್ರಾಥಮಿಕ್ ಹಂತಾಚಾ ಶಿಕ್ಷಕ್/ಶಿಕ್ಷಕಿಂಚೊ ಪಾತ್ರ್ ಮಹತ್ವಾಚೊ ಜಾಂವ್ಕ್ ಪಾವ್ತಾ.

ಗುರು ವ ಶಿಕ್ಷಕ್ ಏಕ್ ವ್ಯಕ್ತಿ ಜಾವ್ನ್ ಆಮ್ಚೆ ಮುಖಾರ್ ಹಾಜರ್ ಆಸ್ತಾ ತರಿ ತಿ ಏಕ್ ಕೇವಲ್ ವ್ಯಕ್ತಿ ನಹಿಂ, ತೊ ದೈವಿಕ್ ಸಕ್ತೆಚೊ ಪ್ರತೀಕ್, ವಿಧ್ಯಾರ್ಥಿಂ ಥಂಯ್ ಸ್ಪೂರ್ತಿ ಆನಿ ಊರ್ಜಾ ಭರ್ಚೊ ಜಾದುಗಾರ್, ತಾಂಕಾ ತಿದ್ವುನ್ ತಾಂಣಿ ಸಾರ್ಕ್ಯಾ ವಾಟೆನ್ ಚಲಾಶೆಂ ಕರ್ಚೊ ಮಾರ್ಗ್ ದರ್ಶಕ್, ಬರೆಂ ಜೀವಿತ್ ಆನಿ ಬರಿ ಸಮಾಜ್ ರೂಪಿತ್ ಕರ್ಚೊ ಏಕ್ ಶಿಲ್ಪಿ, ವಿದ್ಯಾರ್ಥಿಂಚೆ ತಾಲೆಂತ್ ಸಮ್ಜೊನ್ ತಾಂಕಾ ಪಾಟಿಂಬೊ ದಿಂವ್ಚೊ ಕಲಾಕಾರ್. ಸೊಸ್ಣಿಕಾಯ್, ತ್ಯಾಗ್, ಮೋಗ್, ಮಯ್ಪಾಸ್, ಭೊಗ್ಸಾಣೆ ಆನಿ ದಯಾಳಾಯೆನ್ ಭರ್‌ಲ್ಲೊ ಸಾಗೊರ್. ಕಿತ್ಲೆಯೀ ಪೊಕ್ರಿ ಭುರ್ಗೆ ತೆ ಜಾಂವ್ದಿತ್, ಜರ್ತರ್ ತಾಂಚೆಂ ಸಾಧನ್ ವರ್ತೆಂ ಜಾಲೆಂ ತರ್ ತಾಂಚ್ಯಾ ಶಿಕ್ಶಕಾಂಕ್ ತಿತ್ಲೊಚ್ ಸಂತೊಸ್ ಆನಿ ತೃಪ್ತಿ ಪ್ರಾಪ್ತ್ ಜಾತಾ ಆನಿ ಮನಾ ಭಿತರ್‌ಚ್ ತ್ಯಾ ವಿದ್ಯಾರ್ಥಿಕ್ ಮಾನ್ ಭಾಗಾಯ್ತಾತ್. ಅಸಲ್ಯಾ ಕಾಳ್ಜಾಚಿ ವಡ್ವಿಕಾಯ್ ಆಸ್ಚಿಂ ವ್ಯಕ್ತಿ ಆಮ್ಚಾ ಸಮಾಜೆಂತ್ ಶಿಕ್ಷಣ್ ಸೊಡ್ಲ್ಯಾರ್ ದುಸ್ರ್ಯಾ ಖಂಯ್ಚ್ಯಾಯ್ ಕ್ಶೇತ್ರಾಂತ್ ವಿರಳ್. ‘ಶಿಷ್ಯಾದಿಚ್ಚೇ ಪರಾಜಯಮ್’ ಮ್ಹಳ್ಳೊ ಸಂಸ್ಕ್ರತಾಚೊ ಶ್ಲೋಕ್ ಹಾಂಗಾ ಉಲ್ಲೇಖನೀಯ್.

ಗುರು ಜಾವ್ನಾಸ್ಚಾ ವ್ಯಕ್ತಿಚೆಂ ಏಕ್ ಪ್ರಮುಖ್ ಕಾಮ್ ಸಂಸರಾಚಾ ರಚನೆ ಥಾವುನ್ಂಚ್ ಆಪ್ಲೊ ಪಾತ್ರ್ ಮನ್ಶ್ಯಾಂ ಥಂಯ್ ಖೆಳೊನ್ ಆಸಾ ತರಿ ನಾದಿಸ್ತೆಂ ಜಾವುನ್ಂಚ್ ಉರ್ಲಾಂ. ಮನ್ಶ್ಯಾನ್ ದೈವಿಕ್ ಸಂಪೂರ್ಣತಾ ಜೊಡಿಜೆ ತರ್ ಆಪ್ಣೆ ಆಪ್ಣಾಕ್ ಖುದ್ ಸಮ್ಜಾಜೆ. ಹೆಂ ಅದ್ರಷ್ಯ್ ಸತ್ ಸದೃಶ್ಯ್ ಕರ್ಚೆಂ ಕಾಮ್ ಕೇವಲ್ ಏಕ್ ಗುರು ಮಾತ್ರ್ ಕರುಂಕ್ ಸಖ್ತಾ. ‘ಹರ ತನ್ನೊಳಗಿದ್ದು ಗುರು ಅರುಹದೆ ಅರಿಯುವುದೆ? ಸುಡುವಗ್ನಿ ಮರದೊಳಗಿದ್ದು ನರ ತನ್ನ ತಾನರಿಯಬೇಕೆಂದ ಸರ್ವಜ್ಞ ‘ ರುಕಾ ಭಿತರ್ ಹುಲ್ಪೊಂಚಾ ಉಜ್ಯಾಚಿ ಸಖತ್ ಆಸ್ಚಾ ಬರಿ ಮನ್ಶ್ಯಾ ಭಿತರ್ ಆಸ್‌ಲ್ಲಿ ಪ್ರಖರ್ ದೈವಿಕ್ ಸಖತ್ ಮನ್ಶ್ಯಾನ್ ಖುದ್ ಸಮ್ಜಾಶೆಂ ಕರ್ಚೆಂ ಕಾಮ್ ಏಕ್ ಗುರು ಮಾತ್ರ್ ಕರುಂಕ್ ಸಕ್ತಾ ಮ್ಹಳ್ಳೊ ಅರ್ಥ್ ಹಾಂಗಾ ಆಮಿ ಕರ್ಯೆತ್.

ಶಿಕ್ಷಣಾಚೊ ಆನ್ಯೇಕ್ ಆನಿ ಪ್ರಮುಖ್ ವಾಂಟೊ ಜಾವ್ನಾಸಾ ಜ್ಞಾನಾರ್ಚನ್. ವಿದ್ಯಾರ್ಚನ್ ಆನಿ ಜ್ಞಾನಾರ್ಚನ್ ಎಕಾಚ್ ನಾಣ್ಯಾಂಚಿ ದೋನ್ ತೊಂಡಾಂ ಮ್ಹಣ್ಯೆತ್. ವ್ಯತ್ಯಾಸ್ ಮ್ಹಳ್ಯಾರ್, ವಿದ್ಯಾಬ್ಯಾಸ್ ಕರ್ತಾನಾ ಏಕ್ ಪಾಠ್‌ಶಾಳ್, ಸಾಂಗಾತಿ ವಿದ್ಯಾರ್ಥಿ, ಸೀಮಿತ್ ಸಂಖ್ಯಾಚೆ ಶಿಕ್ಷಕ್, ನಿಯಮಾವಳಿ ಆನಿ ಕಾರ್ಯಸೂಚಿ ಆಸ್ತಾ. ಆನಿ ಹೊ ಭಂವಾರ್‌ಚ್ ವಿದ್ಯಾರ್ಥಿಚೊ ಸಂಸಾರ್. ಪೂಣ್ ಜ್ಞಾನಾರ್ಚನ್ ಕರುಂಕ್ ಭಾಯ್ರ್ ಸರ್‌ಲ್ಲ್ಯಾ ಹರ್ ವ್ಯಕ್ತಿಕ್ ಹೊ ಸಂಸಾರ್‌ಚ್ ತಾಚೆಂ ಪಾಠ್‌ಶಾಳ್. ಥಂಯ್ ನಿಶ್ಚಿತ್ ನಿಯಮಾವಳಿ ಆನಿ ಕಾರ್ಯಸೂಚಿ ನಾ. ಅನುಭವ್ ಜೊಡುಂಕ್ ಕಾರಣ್‌ಕರ್ತ್ ಹರ್ಯೇಕ್ ವ್ಯಕ್ತಿ ತಾಚೊ ಗುರು, ಜೋಡ್‌ಲ್ಲೊ ಅನುಭವ್‌ಚ್ ತಾಚಿ ಸರ್ಟಿಪಿಕೇಟ್. ಜಿಣಿಯೆಂತ್ಲೇ ಹರ್ಯೇಕ್ ಅಕಸ್ಮಿಕ್‌ಚ್ ತಾಚೆಂ ಸಿಲೆಬಸ್. ಘಡ್ಚೆಂ ಹರ್ಯೇಕ್ ಘಟನ್ಂಚ್ ತಾಚಿ ಪ್ರಶ್ನ್ ಪತ್ರಿಕಾ. ಜಿಣಿಯೆಂತ್ ಅನುಭವ್ ಜೊಡಿಜಾಯ್ ತರ್ ಎಕಾ ವ್ಯಕ್ತಿಕ್ ತಿತ್ಲಿಚ್ ಸೊಸ್ಣಿಕಾಯ್, ಕಾಳಾಕ್ ತೆಕಿತ್ ರಾಜ್‌ನೀತಿ, ಸಂಧರ್ಬಾನುಸಾರ್ ರಣ್‌ನೀತಿ ವಾಪಾರುಂಕ್ ಆಸಾ. ಆವಯ್ನ್ ಶಿಕಯ್ಲೆಲೆ ಸಂಸ್ಕಾರ್, ಲಾನ್ ಪ್ರಾಯೆರ್‌ ಥಾವ್ನ್ ಅಭಿವೃದ್ದಿ  ಕರುನ್ ಆಯಿಲ್ಲೆ ಗೂಣ್ ಪಾಳುಂಕ್ ಆಸಾತ್.

ಮನ್ಶ್ಯಾನ್ ಜಿಣಿಯೆ ಅನುಭವ್ ಎಕಾ ಅಶಿಕ್ಪಿ ವ್ಯಕ್ತಿ ಥಾವ್ನ್, ವ ಘಡಿತಾಂ, ದೃಷ್ಟಾಂತಾ ಮುಖಾಂತ್ರ್ ವ ಬರ‍್ಯಾ ವ್ಯಕ್ತಿಂಚಾ ಸಾಂಗಾತ್‌ಪಣಾಂತ್ ಜೊಡ್ಯೆತ್.

ಏಕ್ ಅನುಭವಿ ಮಾತ್ರ್ ಆಪ್ಲ್ಯಾ ಅನುಭವಾಕ್ ಕಾರಣ್ ಜಾಲ್ಲ್ಯಾ ಗುರುಂಚೊ ಪಾತ್ರ್ ಕಿತ್ಲೊ ಪ್ರಮುಕ್ ಮ್ಹಳ್ಳೆಂ ಸಾಂಗೊಂಕ್ ಸಕ್ತಾ. ಅನುಭವ್ ಜೊಡ್ಚ್ಯಾ  ಹ್ಯಾ ಪ್ರಕ್ರಿಯೆಂತ್ ಪಾತ್ರ್ ಘೆಂವ್ಹೊ ಹರ್ ಏಕ್ ವ್ಯಕ್ತಿಯೀ ಏಕ್ ಮೆಸ್ತ್ರಿಚ್.

ಬಾರಾವ್ಯಾ ಶತಮಾನಾಂತ್ ಪಾಲ್ಗುರಿಕೆಚಾ ಸೋಮ ಕವಿನ್ ಅಶೆಂ ಬರಯ್ಲಾಂ:

ಹಲವಂ ಬಲ್ಲವರಿಂದ ಕಲಿತು, ಹಲವಂ ಶಾಸ್ತ್ರಗಳನೋದುತ, ಹಲವಂ ಮಾಳ್ಪವರಿಂದ ಕಂಡು, ಹಲವಂ ಸುಜ್ನಾನದಿ ನೋಡುತ, ಹಲವಂ ಸಜ್ಜನರ ಸಂಘದಿಂದರಿಯಲ್, ಸರ್ವಜ್ನಂಮಪ್ಪಂ ನರಂ, ಪಲವು ಪಳ್ಳ ಸಮುದ್ರವೈ ಹರಹರಾ ಶ್ರೀ ಚೆನ್ನಸೋಮೇಶ್ವರಾ!

ಜಾಣ್ವಾಯ್ ವಿವಿದ್ ಮೂಳಾಂ ದ್ವಾರಿಂ ಆಮಿ ಜೊಡುನ್ ಘೆವ್ಯೆತ್ ಮ್ಹಳ್ಳೆಂ ಕಿತ್ಲೆಂ ಸತ್‌ಗಿ, ತಿತ್ಲೆಂ ಜಾಣ್ವಾಯೆಚೆಂ ಮೂಳ್ ಸಾಮಾನ್ಯ್ ಜ್ಞಾನಾದ್ವಾರಿಂ ಯೆತಾ ಮ್ಹಳ್ಳೆಂಯ್ ತಿತ್ಲೆಂಚ್ ಸತ್.

ಮರುಭುಂಯ್ತ್ ಅಪ್ಲ್ಯಾ ಇಂಜಿನಿಯರ್ ಪುತಾ ಸಂಗಿಂ ಪಯ್ಣ್ ಕರ್ಚೊ ಏಕ್ ಅಶಿಕ್ಪಿ ಬಾಪಯ್ ರಾತಿಕ್ ಏಕ್ ತಂಬು ಘಾಲುನ್ ವಿಶೆವ್ ಘೆವುಂಕ್ ಲಾಗ್ಲೊ. ಮಧ್ಯಾನ್ ರಾತ್ ಉತರ್ತಾನಾ ಬಾಪಾಯ್ನ್ ಪುತಾಕ್ ಉಟವ್ನ್ ವಿಚಾರ್ಲೆಂ.

‘ಪುತಾ ವಯ್ರ್ ಪಳೆ ಕಿತೆಂ ದಿಸ್ತಾ?’

‘ನೆಕೆತ್ರಾಂ ದಿಸ್ತಾತ್ ಪಪ್ಪಾ’ ಮ್ಹಣಾಲೊ ಪೂತ್ ವಯ್ರ್ ಪಳೆವ್ನ್ ಆನಿ ತ್ಯಾ ನೆಕೆತ್ರಾಚೆಂ ವಿವರಣ್ ದಿಂವ್ಕ್ ಸುರು ಕರಿ ಲಾಗ್ಲೊ.

’ತೆಂ ಆಸೊಂ’  ಮ್ಹಳೆಂ ಬಾಪಾಯ್ನ್.  ‘ಕೊಣೆಂಗಿ ಆಮ್ಚೊ ತಂಬು ಚೊರಿ ಕೆಲಾ ತೆಂ ತುಂ ಜಾಣಾಂಯ್ಗಿ?’

ಜಾಣ್ವಾಯೆ ಮಧೆಂ ಅನಿ ಶಿಕ್ಪಾ ಮಧೆಂ ಆಸ್ಚೊ ವಡ್ಲೊ ವ್ಯತ್ಯಾಸ್ ಹೆಂ ದ್ರಶ್ಟಾಂತ್ ಆಮ್ಕಾಂ ದಾಕವ್ನ್ ದಿತಾ.

ಸೆಪ್ತೆಂಬರಾಚಾ 5 ತಾರಿಕೆರ್ ಟೀಚರಾಂಚೊ ದಿವಸ್ ಆಮಿ ಆಚರಣ್ ಕರ್ತಾಂವ್. ಹ್ಯಾ ಸಂದರ್ಭಾರ್ ಸರ್ವ್ ಶಿಕ್ಷಕ್ ವರ್ಗಾಕ್, ಗುರುಂಕ್, ಮೆಸ್ತ್ರಿಂಕ್ ಆನಿ ಮೆಸ್ತಿರ್ಣೆಂಕ್ ಧಾರ್ಮಿಕ್ ಶಿಕಾಪ್ ದಿಂವ್ಚಾ ಸರ್ವ್ ವಡಿಲಾಂಕ್ ಹಾಂವ್ ಚೆಪೆಂ ಉಕಲ್ನ್ ಮಾನ್ ಪಾಟಯ್ತಾಂ. ಮ್ಹಜ್ಯಾ ಜಿಣಿಯೆಂತ್ ಪಾಠ್‌ಶಾಳಾ ಭಿತರ್ ತಶೆಂಚ್ ಜೀವನ್ ಮ್ಹಳ್ಳ್ಯಾ ಇಸ್ಕಾಲಾಂತ್ ಶಿಕಾಪ್, ಜಾಣ್ವಾಯ್ ಆನಿ ಅನುಭವ್ ಜೊಡುಂಕ್ ಸಬಾರ್ ಮನಿಸ್ ಕಾರಣ್‌ಕರ್ತ್ ಜಾಲ್ಯಾತ್. ಹಾಂತು ಬೊರೆ ಅನಿ ಖೊಟೆ ಮ್ಹಣ್ ವಿಂಗಡಣ್ ಕರ್ಚಿ ಚೂಕ್ ಕರುಂಕ್ ಹಾಂವ್ ಕರುಂಕ್ ವಚಾನಾ. ಮ್ಹಜೆ ನಜ್ರೆನ್ ಸರ್ವ್ ಬೊರೆಚ್. ಮ್ಹಾಕಾ ಕಳಿತ್ ಆಸೊನ್ ವ ನಾಸ್ತಾಂ ಮ್ಹಾಕಾ ಸಾರ್ಥಕತಾ ಜೊಡುಂಕ್ ಕಾರಣ್ ಕರ್ತ್ ಜಾಲ್ಲ್ಯಾ ಸರ್ವ್ ಸಜ್ಜನಾಂಕ್ ಮ್ಹಜೆಂ ವಂದನ್. ಅಭಿನಂದನ್.

► ಶಿಕೇರಾಮ್ ಸುರತ್ಕಲ್.