ಮಂಗ್ಳುರ್ ಧರ್ಮ್‌ಪ್ರಾಂತ್ಯ್ ಬೈಬಲ್, ಸುವಾರ್ತಾ ಪ್ರಸಾರ್, ಸಾಮಾಜಿಕ್ ಸಂಪರ್ಕ್ ಆನಿ ಲ್ಹಾನ್ ಕ್ರೀಸ್ತಾಂವ್ ಸಮುದಾಯ್ ಆಯೋಗ್ ಹಾಣಿ ಸಾಂಗಾತಾ ಮೆಳುನ್, ಸಾಂತ್ ಅಂತೋನಿ ಆಶ್ರಮ್, ಸಾಂತ್ ಜುಜೆ ಸೆಮಿನರಿ, ಕಾಸ್ಸಿಯಾ, ಜೆಪ್ಪು ಆನಿ ವೆಲೆನ್ಸಿಯಾ ಫಿರ್ಗಜ್ ಹಾಂಚ್ಯಾ ಮುಕೆಲ್ಪಣಾರ್ ಜೆಪ್ಪು, ಸಾಂತ್ ಅಂತೋನಿ ಆಶ್ರಮಾಂತ್ ಬ್ರೇಸ್ತಾರಾ, ಜನವರಿ 26, 2023 ಥಾವ್ನ್ ತೀನ್ ದೀಸ್ ಬೈಬಲ್ ಪ್ರದರ್ಶನ್ ಮಾಂಡುನ್ ಹಾಡ್ಲಾಂ.
ಸಾಂತ್ ಆಂತೊನ್ ಆಶ್ರಮ್, ಜೆಪ್ಪು – ಮಂಗ್ಳುರ್
ಕಥೊಲಿಕ್ ಕ್ರೀಸ್ತಾಂವ್ ಲಿತುರ್ಜಿಕ್ ವರ್ಸಾಚೊ ತಿಸ್ರೊ ಆಯ್ತಾರ್, ಸಂಸಾರ್‌ಭರ್ ’ಬೈಬಲ್ ಆಯ್ತಾರ್’ ಮ್ಹಣ್ ಆಚರಣ್ ಕರ್ತಾತ್. ಹ್ಯಾ ವರ್ಸಾ ಜನೆರ್ 22 ವೆರ್ ಬೈಬಲ್ ಆಯ್ತಾರ್ ಆಚರಣ್ ಕೆಲ್ಲೊ ಅಸುನ್, ಹ್ಯಾ ಪಾಟಿಥಳಾರ್ ಮಂಗ್ಳುರಾಂತ್ ವಿಶೇಸ್ ಬೈಬಲ್ ಪ್ರದರ್ಶನ್ ಮಾಂಡುನ್ ಹಾಡ್ಲಾಂ.
ಸಾಂತ್ ಆಂತೋನಿ ಚಾರಿಟೇಬಲ್ ಸಂಸ್ಥ್ಯಾಂಚೊಂ ನಿರ್ದೇಶಕ್ ಆನಿ ಪ್ರದರ್ಶನಾಚೊ ಸಂಚಾಲಕ್ ಮಾ| ಬಾ| ಜೆ. ಬಿ. ಕ್ರಾಸ್ತಾ ” ಸಂಸಾರಾಂತ್ ಚಡ್ ಪ್ರತಿಯೊ ವಿಕೊನ್ ಗೆಲ್ಲ್ಯಾ ಪುಸ್ತಕಾಂ ಪಯ್ಕಿ ಬೈಬಲ್ ಏಕ್ ಜಾವ್ನಾಸಾ. ಅಜ್ ಪರ್ಯಾಂತ್ ಬೈಬಲಾಚ್ಯೊ ಸುಮಾರ್ 5 ಬಿಲಿಯನ್ ಪ್ರತಿಯೊ ವಿಕುನ್ ಗೆಲ್ಯಾತ್. ಮನ್ಶ್ಯಾಕುಳಾಚ್ಯಾ ಚರಿತ್ರೆಂತ್ ಚಡ್ ಭಾಸಾಂನಿ ಅನುವಾದಿತ್ ಜಾಲ್ಲೊ ಪುಸ್ತಕ್‌‌ಯ್ ಬೈಬಲ್ ಜಾವ್ನಾಸಾ” ಮ್ಹಣ್ತಾ.
ಮಾ। ಬಾ। ಜೆ. ಬಿ. ಕ್ರಾಸ್ತಾ
ಮುಕಾರುನ್ ಮಾ| ಬಾ| ಕ್ರಾಸ್ತಾ “ಹ್ಯಾ ಪ್ರದರ್ಶನಾಂತ್ ಪವಿತ್ರ್ ಗ್ರಂಥ್ ಬೈಬಲಾಚೆಂ ಸರ್ವಜಣಿಕ್ ವಾಚನ್, ಬೈಬಲ್ ಕಲಾ, ಚಿತ್ರ್‌ಕಲಾ, ವಿಡಿಯೊ, ಬೈಬಲ್ ಕ್ವಿಜ್, ಪದಾಂ, ನಾಟಕ್ ಆನಿ ನಾಚ್ ಹ್ಯಾ ಮುಕಾಂತ್ರ್ ಚಡಿತ್ ಲೊಕಾಕ್ ಪಾವೊನ್, ವಿಶೇಸ್ ಅನ್ಭೊಗಾ ಸಾಂಗಾತಾ ವಿಶ್ವಾಸಿ ಪಯ್ಣಾಂತ್ ಸಗ್ಳ್ಯಾಂಕ್ ಮೆತೆರ್ ಕರ್ಚೊ ಇರಾದೊ ಆಮ್ಕಾಂ ಆಸಾ” ಮ್ಹಣ್ತಾ.
“ಪದ್ವಾಚೊ ಸಾಂತ್ ಅಂತೊನ್ ದೆವಾಚ್ಯಾ ಉತ್ರಾಚೊ ಶ್ರೇಷ್ಠ್ ಬೋಧಕ್ ಜಾವ್ನಾಸೊನ್, ದೆವಾಚೆಂ ಉತರ್ ಸರ್ವಾಂಕ್ ಪಾವಂವ್ಚ್ಯಾ ದಿಶೆನ್ ತಾಣೆ ವಿಶೇಸ್ ಉರ್ಭಾ ದಾಕಯಿಲ್ಲಿ. ಹ್ಯಾ ಕಾರಣಾಕ್ ಲಾಗೊನ್ ದೆವಾಚ್ಯಾ ಉತ್ರಾಚೆಂ ಬೈಬಲ್ ಪ್ರದರ್ಶನ್ ಸಾಂ. ಅಂತೊನ್ ಆಸ್ರ್ಯಾಂತ್ ಮಾಂಡುನ್ ಹಾಡ್ತಾಂವ್” ಮ್ಹಣ್ತಾ ಮಾ| ಬಾ| ಜೆ.ಬಿ. ಕ್ರಾಸ್ತಾ, ನಿರ್ದೇಶಕ್, ಸಾಂತ್ ಆಂತೋನಿ ಚಾರಿಟೇಬಲ್ ಸಂಸ್ಥೆ, ಜೆಪ್ಪು – ಮಂಗ್ಳುರ್.
ಧರ್ಮ್‌ಪ್ರಾಂತ್ಯಾಚ್ಯಾ ಸುವಾರ್ತಾ ಪ್ರಸಾರ್ ಆಯೋಗಾಚೊ ಕಾರ್ಯದರ್ಶಿ ಆನಿ ಕಾರ್ಯಕ್ರಮಾಚೊ ಸಂಯೋಜಕ್ ಮಾ| ಬಾ| ರೂಪೇಶ್ ತಾವ್ರೊ ಮ್ಹಣ್ತಾ ” ಹ್ಯಾ ಪ್ರದರ್ಶನಾಂತ್ ಬೈಬಲಾಚ್ಯೊ ವಿವಿದ್ ಭಾಶಾಂತರ್ ಪ್ರತಿಯೊ, ಬೈಬಲ್ ಕಲಾ, ಬೈಬಲ್ ಚಿತ್ರಾಂ, ಪ್ರತಿಮಾಶಾಸ್ತ್ರ್, ಭಾರತೀಯ್ ಬೈಬಲ್ ಕಲಾ ಆನಿ ಬೈಬಲ್ ಘಡಿತಾಂಚ್ಯಾ ಕಾಳಾಚೆಂ ಪ್ರದರ್ಶನ್ ಆಸ್ತೆಲೆಂ. ಸಾಂಗಾತಾ ಬೈಬಲ್ ಗೀತಾಂ, ನಾಟಕ್, ಬೈಬಲ್ ವರ್ಣಚಿತ್ರಾಂ, ಬೈಬಲ್ ಕ್ವಿಜ್ ಆನಿ ಪ್ರಮುಕ್ ಬೈಬಲ್ ಘಡಿತಾಂಚೆಂಯ್ ಪ್ರದರ್ಶನ್ ಅಸ್ತಲೆಂ”
ಬ್ರೇಸ್ತಾರಾ ಜನವರಿ 26, 2023 ವೆರ್ ಸಕಾಳಿಂ 10 ವ್ಹರಾಂಚೆರ್ ಆಶ್ರಮಾಚ್ಯಾ ಆವರಣಾಂತ್ ಬೈಬಲ್ ಪ್ರದರ್ಶನ್ ಉಗ್ತಾವಣ್ ಸುವಾಳೊ ಚಲ್ತಲೊ. ಇಂಗ್ಲಿಶಾಥಾವ್ನ್ ಕೊಂಕ್ಣೆಕ್ ಬೈಬಲ್ (ನವೊ ಸೊಲ್ಲೊ) ಅನುವಾದ್ ಕೆಲ್ಲೊ ಮಾ| ಬಾ| ದೊ| ವಿಲಿಯಮ್ ಬರ್ಬೋಜಾ ಪ್ರದರ್ಶನ್ ಉಗ್ತಾಯ್ತಲೊ.
ಪ್ರದರ್ಶನ್ ಜ. 26 ಥಾವ್ನ್ 28 ಪರ್ಯಾಂತ್ ಸಕಾಳಿಂ 9 ಥಾವ್ನ್ ಸಾಂಜೆರ್ 7 ವರೆಗ್ ಸರ್ವಜಣಿಕಾಂಕ್ ಉಗ್ತೆಂ ಆಸ್ತಲೆಂ. ಹರೇಕಾ ದಿಸಾ ಸಾಂಜೆರ್ 4.30 ಪಾಸುನ್ 7 ಪರ್ಯಾಂತ್ ಬೈಬಲ್ ಆಧಾರಿತ್ ಸಾಂಸ್ಕೃತಿಕ್ ಕಾರ್ಯಕ್ರಮಾಂ ಚಲ್ತೆಲಿಂ. ಸಮಾರೋಪ್ ಸಂಭ್ರಮ್ ಸನ್ವಾರಾ, ಜನೆರಾಚ್ಯಾ 28 ವೆರ್ ಸಾಂಜೆರ್ 6 ವ್ಹರಾಂಕ್ ಚಲ್ತಲೊ.
ಚಡಿತ್ ವಿವರಾಕ್ ಮಾ| ಬಾ| ಜೆ. ಬಿ ಕ್ರಾಸ್ತಾ, ಸಂಚಾಲಕ್ (ಮೊ: 9448724276) ಮಾ| ಬಾ| ರೂಪೇಶ್ ತೌರೊ, ಕಾರ್ಯಕ್ರಮ್ ಸಂಯೋಜಕ್ (ಮೊ: 8762784733) ಮಾ| ಬಾ| ಲ್ಯಾರಿ ಪಿಂಟೋ, ಕಾರ್ಯಕ್ರಮ್ ಸಂಯೋಜಕ್ (ಮೊ: 9611502489) ಹಾಂಕಾ ಸಂಪರ್ಕ್ ಕರ್ಯೆತ್ ಮ್ಹಣ್ ಮಂಗ್ಳುರ್ ದಿಯೆಸೆಜಿಚೆಂ ಮಾಧ್ಯಮ್ ಆನಿ ಪ್ರಚಾರ್ ಕೇಂದ್ರ್, ಕೆನರಾ ಸಂಪರ್ಕ್ ಕೇಂದ್ರ್ ಹಾಣಿ ಪತ್ರಾ ಪರ್ಗಟ್ಣೆಂತ್ ಕಳಯ್ಲಾಂ.
