ಹಾಂವೆ ಸನ್ಮಾನಾ ಪಯ್ಲೆಂಚ್ ಸಾಂಗ್ಲ್ಲೆಂ ಆಸಾ – ತೊ ಜಾವ್ನಾಸಾ ರಿಯಲ್ ಹಿರೋ … ಆನಿ ಹೆಂ ಉತರ್ ಸತ್ ಜಾಲೆಂ. ಫೋರ್ ಚಲ್ಲ್ಲ್ಯಾ ಸನ್ಮಾನ್ ಕಾರ್ಯಾಕ್ ಹಾಜರ್ ಆಸ್ಲೆಲ್ಯಾ ಲೊಕಾನ್ ತೆಂ ರುಜು ಕರ್ನ್ ದಾಕಯ್ಲೆಂ. ವಯ್ರ್ ವೆದಿರ್ ಸಬಾರ್ ಮುಕೆಲಿ, ಸಾಂಗಾತಾ ಥೊಡೆ ಮುಕ್ಕೆಲಿ ಆನಿ ’ಸ್ಟ್ಯಾಂಡರ್ಡ್ ಭಿಕಾರಿ’ಯ್ ಆಸ್ಲ್ಲೆ. ತರ್ಯೀ, ಲೋಕ್ ಫಕತ್ ರೊನಿ ಬಾಬಾ ಖಾತಿರ್ ಆಯಿಲ್ಲೊ ಜಾಲ್ಲ್ಯಾನ್ ಹಾಂತು ಕಾಯ್ ಚಡ್ ಫರಕ್ ಪಡೊಂಕ್ ನಾ.
ಸಗ್ಳೆಂ ಕಾರ್ಯೆಂ ಆಪುರ್ಬಾಯೆಚೆಂ. ವ್ಯವಸ್ಥಿತ್ ಮಾಂಡಾವಳ್. ಹಾಂತು ಕಾಯ್ ‘ಮೈನಸ್’ ನಾ. ಪುಣ್ ಹೊ ‘ನಾಗರಿಕ’ ಸನ್ಮಾನ್ಗೀ ಯಾ ‘ಪೊರ್ಬು’ ಸನ್ಮಾನ’ ಗೀ – ಹೆಂ ಮಾತ್ರ್ ಮ್ಹಾಕಾ ಸಮ್ಜೊಂಕ್ ನಾ!
ತುಮಿ ಮ್ಹಣೊಂಕ್ ಆಸಾತ್ – ಪೊರ್ಬುಯ್ ನಾಗರಿಕ್ ಮ್ಹಣ್. ವ್ಹಯ್, ಹಾಂವ್ಯೀ ಮಾನ್ತಾಂ, ಪೊರ್ಬುಯೀ ನಾಗರಿಕ್ ತೆಂ ಸತ್! ಪೂಣ್ ‘ನಾಗರಿಕ’ ಮ್ಹಣ್ತಾನಾ ಸಕ್ಕಡ್ ಜಾತ್ – ಕಾತ್, ಧರ್ಮ್, ಬೇದ್ ಬಾವ್ ನಾಸ್ತಾನಾ ಸಗ್ಳ್ಯಾಂಕ್ ಸಾಂಗಾತಾ ಹಾಡ್ಲ್ಲೆಂ ತರ್ ಕಿತ್ಲೆಂ ಬರೆಂ ಆಸ್ತೆಂ ? ಬೊಟಾಂನಿ ಮೆಜ್ಚೆ ತಿತ್ಲೆ ಅಕ್ರಿಸ್ತಾಂವ್, ಆನಿ ಉರ್ಲ್ಲೆ ಪೂರಾ ಆಮಿ, ಆಮ್ಗೆಲೆ ಪೊರ್ಬುಂಗೆಲೆ. ವೆದಿರ್ ಅರ್ಧೆಂ ಡಜನ್ ಬಿಸ್ಪ್ ಸಾಯ್ಬ್. ಅಕ್ರೀಸ್ತಾಂವ್ ಮುಕೆಲ್ ಸಯ್ರೆ ? ಆಪಯಿಲ್ಲೆಂ ಸಬಾರಾಂಕ್, ಆಯಿಲ್ಲೆ ಬೋವ್ ಥೊಡೆ ! ವೇದಿರ್ ತಾಂಚಿ – ಗಯ್ರ್ ಹಾಜ್ರಿ ಉಟೊನ್ ದಿಸ್ತಾಲಿ. ಹೆಂ ಸರ್ವ್ ಪಳಯ್ತಾನಾ ಹೊ ‘ನಾಗರಿಕ ಸನ್ಮಾನ’ ಗೀ ಯಾ ಮುಕ್ಲ್ಯಾ ಇಲೆಕ್ಶನಾಕ್ ರ್ಯಾಲಿ ?
ಸನ್ಮಾನಿತ್ ಕುಲಾಸೊ ಬಾಬಾಚೆಂ ಭಾಷಣ್ ಆಯ್ಕಾತಾನಾಂಯ್ ಆಸಲೊಚ್ ಏಕ್ ದುಬಾವ್ ಮ್ಹಾಕಾ ಆಯ್ಲೊ. ಕಿತ್ಯಾಕ್ ಮ್ಹಳ್ಯಾರ್ ಜೊ ಮನಿಸ್ ಆಜ್ ಮ್ಹಣಾಸರ್ ಪ್ರಶಸ್ತಿಂಕ್, ಸನ್ಮಾನಾಂಕ್ ಲಬ್ದಾಲ್ಲೊಚ್ ನಂಯ್ ಮ್ಹಣ್ತಾ ಆನಿ ಆಪ್ಲ್ಯಾ ದಾನ್ ಧರ್ಮಾನ್ ಸಗ್ಳ್ಯಾ ಸಂಸಾರಾಚ್ಯಾ ಲೊಕಾಚಿಂ ಕಾಳ್ಜಾಂ ಜಿಕ್ಲಾ – ತ್ಯಾ ಮನ್ಶ್ಯಾಕ್ ಹೆಂ ಪೂರಾ ಖಂಯ್ಚೆಂ ಲೇಖ್ ? ಸನ್ಮಾನಿತ್ ಮನ್ಶಾನ್ ಸನ್ಮಾನ್ ಕಾರ್ಯಾಚ್ಯಾ ಆಯೋಜಕಾಂಕ್ ವೇದಿರ್ಚ್ ಬೂದ್ ಬಾಳ್ ಸಾಂಗ್ತಾನಾ, ವೇದಿರ್ ಆಸ್ಲೆಲೆ ಲೀಡರ್ಗೀ? ಫಾಲೋವರ್ಗೀ? ಮುಕಾರ್ ತೆ ಕಿತ್ಲೆ ಇಫೆಕ್ಟಿವ್ ಲೀಡರ್ ಜಾತಿತ್ ಮ್ಹಳ್ಳೆಂ ಸುಸ್ತಾನಾ ಜಾಲೆಂ!
ಕ್ರೀಸ್ತಾಂವ್ ಸಮುದಾಯಾಂತ್ ಯುವವಾವ್ರ್ ಕರುನ್ ವಯ್ರ್ ಆಯಿಲ್ಲ್ಯಾಂಕ್ ಲೀಡರ್ ಜಾಂವ್ಕ್ ಶಿಕಯ್ತಾತ್. ಪೂಣ್ ಸಮುದಾಯಾಚ್ಯಾ ಎಕಾ ಮುಖ್ಯ್ ಲೀಡರಾಕ್ ಪ್ರೊಮೋಟ್ ಕರುಂಕ್, ಲೊಕಾ ಮುಕಾರ್ ‘ಹೊಚ್ ಆಮ್ಚೊ ಮುಕ್ಲೊ ಲೀಡರ್’ ಮ್ಹಣ್ ದಾಖಂವ್ಚೆಂ ಶಿಕಯ್ನಾಂತ್. ಎಕಾ ಖಂಯ್ಚ್ಯಾಯ್ ಕಾರ್ಯಾಕ್ ಅಧ್ಯಕ್ಷ್ ಆನಿ ಕಾರ್ಯದರ್ಶಿ ವೆದಿರ್ ಆಸ್ಚಿ ರಿವಾಜ್. ಪೂಣ್ ಸನ್ಮಾನ್ ಕಾರ್ಯಾಕ್ ಉಪಾಧ್ಯಕ್ಷ್, ಕಾರ್ಯಕಾರಿ ಸಾಂದೆ, ಸಕ್ಡಾಂಕ್ ಹಾಂವ್ಯೀ ಏಕ್ ‘ಲೀಡರ್’ ಮ್ಹಣ್ ದಾಕೊಂವ್ಚೊ ಹೊರ್ಬೊಸ್ ಉಟೊನ್ ದಿಸ್ತಾಲೊ. ಹಾತ್ ಜೋಡ್ನ್ ಲೊಕಾಕ್ ನಮಸ್ಕಾರ್ ಮಾರ್ಚೊ ಪಳಯ್ತಾನಾ ಮಂಗ್ಳುರ್ಚ್ಯಾ ಎಂ.ಎಲ್.ಎ. ಸಿಟಿಕ್ ಫಕತ್ ‘ತೊ’ ಮಾತ್ರ್ ನಯ್, ಆಮಿಂಯ್ ‘ಆಕಾಂಕ್ಷಿ’ ಮ್ಹಣ್ ಪರೋಕ್ಷ್ ಥರಾನ್ ಪಾಚಾರ್ಚೆಂ ಉಟೊನ್ ದಿಸ್ತಾಲೆಂ.
ದಿಯೆಸೆಜಿಂತ್, ರಾಜಕೀಯಾಂತ್, ಸಂಘ್ ಸಂಸ್ತ್ಯಾಂನಿ ವ್ಹಡ್ ವ್ಹಡ್ ಹುದ್ದೆ ಸೊಭಯ್ಲೆಲ್ಯಾಂನಿ, ಪ್ರಸ್ತುತ್ ಹುದ್ದ್ಯಾರ್ ಆಸ್ಲೆಲ್ಯಾಂನಿ, ಮೊಗಾನ್ ಲೊಕಾಕ್ ಯೆವ್ಕಾರ್ ಮಾಗೊನ್ ಆದಾರ್ಸುಂಚೆಂ, ಸುಧಾರ್ಸುಂಚೆಂ ಆನಿ ತುಮ್ಚೆ ಮಧೆಂ ಹಾಂವ್ಯೀ ಏಕ್ ಮ್ಹಣ್ಚೆಂ ತಾಂಚೆಂ ಖಾಲ್ತೆಂ ಸ್ವಯಂ ಸೇವಕ್ ವರ್ತನ್ ಮನ್ ಜಿಕೊಂಕ್ ಪಾವ್ಲೆಂ. ಪೂಣ್ ಹ್ಯಾ ಮಧೆಂ ‘ನಾಗರಿಕ್’ ಸನ್ಮಾನಾಕ್ ‘ಮೈನಸ್’ ತಶೆಂ ಥೊಡಿಂ ‘ಅನಾಗರಿಕ್’ ವರ್ತನಾಂಯ್ ಪಳೆಂವ್ಕ್ ಮೆಳ್ಳಿಂ.
1. ಹಾವೆಂ ಹೊ ‘ನಾಗರಿಕ ಸನ್ಮಾನ’ ನಯ್, ಬಗಾರ್ ‘ಪೊರ್ಬು ಸನ್ಮಾನ’ ಮ್ಹಣೊನ್ ಶೀದಾ ಆಯೋಜಕಾಂಚೆರ್ ಆರೋಪ್ ಮಾಂಡ್ಲಾ. ಮ್ಹಜ್ಯಾ ಆರೋಪಾಕ್ ಸಾಕ್ಸ್ ದಿತಾಂ – ಮಂಗಳೂರಿನ ನಾಗರಿಕ ವಾ ಪೌರ ಸನ್ಮಾನ ಮ್ಹಳ್ಯಾರ್ ತಾಂತು ಮಂಗ್ಳೂರ್ಚೊ ‘ಪ್ರಥಮ ಪ್ರಜೆ’ ಮ್ಹಳ್ಯಾರ್ ಮಹಾನಗರ ಪಾಲಿಕೆಚೊ ‘ಮೇಯರ್’ ಆಸಜೆಚ್. ಆಯೋಜಕಾಂನಿ ತಾಕಾ ಕಿತ್ಯಾಕ್ ಆಪಂವ್ಕ್ ನಾ? ಮೇಯರ್ ‘ನಾಗರಿಕ’ ನಂಯ್ಗೀ ? ಎಕಾದಾವೆಳಾ ಮೇಯರ್ ಕೊಂಗ್ರೆಸ್ ಪಾಡ್ತಿಚೊ ಆಸ್ಲ್ಲೊ ಜಾಲ್ಯಾರ್ ತಾಕಾ ತುಮಿ ಆಪಯ್ನಾಸ್ತಾನಾ ರಾವ್ತ್ಯಾತ್ಗೀ ? ಮಾಗಿರ್ ಕೊಣಾಕ್ಗಾ ತುಮಿ ಶೆರ್ಮಾಂವ್ ದಿಂವ್ಚೆ ? ಆಮ್ಚ್ಯಾ ಮನ್ಶ್ಯಾಂನಿ ಸಗ್ಳ್ಯಾ ಪಾಡ್ತಿಂನಿ ಆಸಜೆ ಮ್ಹಣ್ ಬೂದ್ ಬಾಳ್ ಸಾಂಗ್ಚಿ? ಆಮ್ಚ್ಯಾ ಮನ್ಶ್ಯಾಂನಿ ಸಗ್ಳ್ಯಾ ಪಾಡ್ತಿಂನಿ ಆಸಜೆ ಜಾಲ್ಯಾರ್ ತ್ಯಾ ತ್ಯಾ ಪಾಡ್ತಿಂತ್, ತ್ಯಾ ತ್ಯಾ ವೆಳಾರ್ ಹುದ್ದ್ಯಾರ್ ಆಸ್ಚ್ಯಾ ಮುಕೆಲ್ಯಾಂಕ್ ಶಿಷ್ಠಾಚಾರಾ ಪರ್ಮಾಣೆ ಆಪಂವ್ಕ್ / ಮಾನ್ ದಿಂವ್ಕ್ ಪಯ್ಲೆಂ ಶಿಕಾ.
2. ಉಲ್ಲಾಳಾಂತ್ ಜಿಕ್ಲ್ಲೊ ಕೊಂಗ್ರೆಸ್ ಪಾಡ್ತಿಚೊ ಖಾದರ್ ಆಮ್ಚೊ ಲೀಡರ್, ಕೊಂಕ್ಣಿ ಆಮ್ಚಿ ಮಾಂಯ್ಭಾಸ್ ಉಲಂವ್ಚೊ ಬಿಜೆಪಿಚೊ ಕಾಮತ್ ಆಮ್ಕಾಂ ಲೀಡರ್ ನಂಯ್ಗೀ ? ಮಂಗ್ಳುರ್ ಶಹರಾಕ್ ಬೋವ್ ಲಾಗ್ಶಿಲೆ ಭರತ್ ವಾ ಕೋಟ್ಯಾನ್ ತೇಯ್ ಆಮ್ಚೆ ಲೀಡರ್ ನಂಯ್ಗೀ ? ಮುಕೆಲಿ ತೆ ಕೋಣ್ಯೀ ಜಾಂವ್ ಎಲಿಸಾಂವ್ ಜಿಕ್ತಾ ಮ್ಹಣಾಸರ್ ತೆ ಎಕಾ ಪಾಡ್ತಿಕ್ ಸೀಮಿತ್. ಎಲಿಸಾಂವ್ ಜಿಕ್ಲ್ಯಾ ಉಪ್ರಾಂತ್ ತೆ ಸಾರ್ವಜಣಿಕ್ ನಾಗರಿಕ್ ಆನಿ ಆಮ್ಚೆ ಸರ್ವಾಂಚೆ ಮುಕೆಲಿ ಮ್ಹಳ್ಳೆಂ ತುಮ್ಚ್ಯಾ ಗಿನಾನ್ಯಾಕ್ ಗೆಲೆಂ ನಾಂಗೀ ?
3. ವೇದಿರ್ ಆಸಾಜಾಯ್ ಜಾಲ್ಲೆ ನಿಟ್ಟೆ ಹೆಗ್ಡೆ, ಧರ್ಮಸ್ಥಳಾಚೊ ಹೆಗ್ಡೊ, ಬಿದ್ರ್ಯಾಂಚೊ ಆಳ್ವಾ ಕಿತ್ಯಾಕ್ ಕಾರ್ಯಕ್ರಮಾಕ್ ಯೇಂವ್ಕ್ ನಾಂತ್ ? ಆಯೋಜಕಾಂನಿ ದಿಲ್ಲೆಂ ಕಾರಣ್ – ‘ವಾಟೆರ್ ಆಸಾತ್, ಆತ್ತಾಂ ಯೆತಾತ್’ – ನಿಜಾಯ್ಕೀ ಹಾಸ್ಯಸ್ಪದ್! ನೀಜ್ ಕಾರಣ್ ಸರ್ವ್ ಜಾಣಾಂತ್. ತರೀ ಲೊಕಾಚ್ಯಾ ಕಾನಾಂಕ್ ವಾಂಯ್ಗಿ ಬಾಂದ್ಚಿಂ ಕಾಮಾಂ ತುಮಿ ಕರ್ತಾತ್ಮೂ ! ಲಜ್ ದಿಸಾನಾ?
4. ಸ್ವಾಗತ್ ಭಾಷಣ್ ಧಾವ್ಯಾ ಕ್ಲಾಶಿಚ್ಯಾ ಭುರ್ಗ್ಯಾನ್ ಆನಿ ದನ್ಯವಾದ್ ಸಮರ್ಪಣ್ ಸಾತ್ವ್ಯಾ ಕ್ಲಾಶಿಚ್ಯಾ ಭುರ್ಗ್ಯಾನ್ ಕೆಲ್ಲೆಪರಿಂ ಭೊಗ್ಲೆಂ. ದನ್ಯವಾದ್ ಕರ್ತಲೊ ಉಪ್ಕಾರ್ ಬಾವುಡ್ಚೆಂ ಸೊಡ್ನ್ ಅಭಿನಂದನ್ ಭಾಷಣ್ ಕರುಂಕ್ ಲಾಗ್ಲೊ. ಆಮ್ಚ್ಯಾ ಲೀಡರಾಂಕ್ ಖಂಯ್ಚ್ಯಾ ಕಾರ್ಯಕ್ರಮಾಂತ್, ಖಂಯ್ಚ್ಯಾ ವೆಳಾರ್, ಕಶೆಂ ಆನಿ ಕಿತೆಂ ಉಲಯ್ಜೆ ಮ್ಹಣ್ ಕಳಿತ್ ನಾಂಗೀ ?
5. ಕರೆಜ್ಮಾಚ್ಯಾ ಪವಿತ್ರ್ ಕಾಳಾಚೊ ಪಯ್ಲೊ ಸುಕ್ರಾರ್! ಉಪಾಸ್, ಪ್ರಾಚಿತ್, ದಂಡವ್ಣಿ, ಮಾಗ್ಣೆಂ, ಮೀಸ್, ರಜಾರ್ ಮ್ಹಣ್ ಜೆಜುಚ್ಯಾ ಕಶ್ಟಾಂಚೆಂ ದೀಸ್ ನಿಯಾಳ್ ಕರಿಜೆ ಜಾಲ್ಲೆ ರೋಮನ್ ಪ್ರತಿನಿಧಿ ಆಮ್ಚೆ ವ್ಹಡಿಲ್ ಸಗ್ಳೆ ಕಶೆಂ ಹಾಂಗಾ ಪಾವ್ಲೆ? ಹೊಲ್ ಪಾದ್ರಿ, ಸಿಸ್ಟರಾಂನಿ ಭರೊನ್ ಆಸ್ಲೆಂ. ವೆದಿರ್ ಸ ಜಣ್ ಬಿಸ್ಪ್. ದೆವಾ ವರ್ನಿ ಪಯ್ಶೆ ಉಂಚಾಯೆರ್ ಆಸಾತ್ ಮ್ಹಣ್ ಥಂಯ್ ಆಯಿಲ್ಲ್ಯಾ ಎಕ್ಲ್ಯಾನ್ ಮ್ಹಳ್ಳೆಂ ಹಾಂವೆ ಆಯ್ಕಾಲೆಂ. ಮ್ಹಾಕಾಯ್ ಹೆಂ ಸತ್ ಮ್ಹಣ್ ಭೊಗ್ಲೆಂ.
6. ಏಕ್ ಚುನಾಯಿತ್ ಶಾಸಕ್ ಕಾರ್ಯಾಚ್ಯಾ ಸರ್ವೆರ್ ಥಾವ್ನ್ ಅಕೇರ್ ಪರ್ಯಾಂತ್ ಲೊಕಾ ಜಮ್ಯಾಂತ್ ಬಸ್ಲೊ ಆನಿ ತಾಕಾ ವೇದಿಕ್ ಆಪಂವ್ಚಿ ಕನಿಷ್ಟ್ ಸಮ್ಜಣಿ ತುಮ್ಕಾಂ ನಾ? ತೊ ಆಮ್ಚೊ ಚುನಾಯಿತ್ ಮುಕೆಲಿ ಆನಿ ರೊನಿ ಬಾಬಾಚ್ಯಾ ಮೊಗಾನ್ ಕಾರ್ಯಾಕ್ ಆಯಿಲ್ಲೊ. ತಾಚಿ ಹಾಜ್ರಿ ಲೆಕಿನಾಸ್ತಾನಾ ತುಮಿ ಕೆಲ್ಲೊ ಹೊ ಸರ್ಕಾರಿ ಅಕ್ಮಾನ್. ತಾಚ್ಯಾ ಕ್ಷೇತ್ರಾಚ್ಯಾ ಲೊಕಾನ್ ಹೊ ಅಕ್ಮಾನ್ ಪಳಯ್ಲಾ ಆನಿ ಹ್ಯಾ ಅಕ್ಮಾನಾಕ್ ಕ್ಷೇತ್ರಾಚೊ ಲೋಕ್ ಜಾಪ್ ದಿತಲೊಚ್. ವಿದಾನ್ ಸಭೆಂತ್ ಏಕ್ ಕ್ಷೇತ್ರ್ ಪ್ರತಿನಿಧಿತ್ವ್ ಕರ್ಚ್ಯಾ ಎಕಾ ಚುನಾಯಿತ್ ಶಾಸಕಾಕ್ (ಸಗ್ಳ್ಯಾ ಸಭೆಂತ್ ಹಾಲಿ ಶಾಸಕ್ ಮ್ಹಣ್ ಆಸ್ಲ್ಲೊ ತೋ ಎಕ್ಲೊ ಮಾತ್, ಉರ್ಲ್ಲೆ ಸಗ್ಳೆ ಮಾಜಿ) ತುಮಿ ನಾಗರಿಕಾಂಚೊಂ ಪ್ರತಿನಿಧಿ ಮ್ಹಣ್ ಲೆಕಿನಾಂತ್ ತರ್ ತೊ ‘ನಾಗರಿಕ ಸನ್ಮಾನ’ ಜಾಂವ್ಚೊ ತರೀ ಕಸೊ ?
ಅಕೇರ್ ಕರ್ತಾನಾ –
ಕ್ರಿಸ್ತಾಂವ್ ಸಮಾಜೆಚ್ಯಾ ಮುಕೆಲ್ಯಾಕ್ ಅಸಲೊ ಏಕ್ ಸನ್ಮಾನ್ ಖಂಡಿತ್ ಜಾಯ್ ಆಸ್ಲೊ. ಪೂಣ್ ಸನ್ಮಾನ್ ಆಯೋಜಿತ್ ಕೆಲ್ಲೆ ಲೀಡರ್ಸ್ ಮಾತ್ರ್ ಆಲ್ತಾರ್ ಭುರ್ಗೆ ಜಾಲೆ. ಪೊಲಿಟಿಕ್ಸ್ ತುಮಿ ಖೆಳ್ಳ್ಯಾತ್, ಪೂಣ್ ಫಲಿತಾಂಶ್ ಶೂನ್ಯ್. ತುಮಿ ಕೆಲ್ಲೊ ನಾಗರಿಕ್ ಸನ್ಮಾನ್ಗೀ ? ಮ್ಹಣ್ ಮ್ಹಾಕಾ ವಿಚಾರ್ಲ್ಯಾರ್ – ಖಂಡಿತ್ ನಯ್!
ಎಕಾ ಪಾಡ್ತಿಚೊ ಸನ್ಮಾನ್ಗೀ ಮ್ಹಣ್ ಮ್ಹಾಕಾ ವಿಚಾರ್ಲ್ಯಾರ್ – ತೋಯ್ ನಯ್! ಕಾರಣ್ – ಮಂಗ್ಳುರ್ ಶಹರಾ ಭಿತರ್ ಆಸ್ಚ್ಯಾ ಕೊಂಗ್ರೆಸ್ ಪಾಡ್ತಿಚ್ಯಾ ಕ್ರೀಸ್ತಾಂವ್ ಕೊರ್ಪೊರೇಟರಾಂಕೀ ತುಮಿ ಲೆಕಾಕ್ ಧರುಂಕ್ ನಾ. ತೆ ಭಾಯ್ರ್ ಮಂಗ್ಳುರ್ ಮಹಾ ನಗರ ಪಾಲಿಕೆಂತ್ ಪ್ರಸ್ತುತ್ ವಿರೋದ್ ಪಾಡ್ತಿಚೊ ನಾಯಕ್ ಜಾವ್ನ್ ಕ್ರೀಸ್ತಾಂವ್ ಕೊರ್ಪೊರೇಟರ್ ಆಸಾ.
ಬಿದ್ರ್ಯಾಂತ್ಲ್ಯೊ ಕಥೊಲಿಕ್ ಸಭೆಚೊ ಸಮ್ಮೇಳ್ ಕರಾವಳೆಂತ್ ಕ್ರಿಸ್ತಾವಾಂಚ್ಯಾ ರಾಜಕೀಯ್ ಫುಡಾರಾಚ್ಯಾ ಮೊರ್ನಾಪೆಟೆಕ್ ಮಾರ್ಲ್ಲೊ ಪಯ್ಲೊ ಖಿಳೊ ತರ್, ನಾಗರಿಕ್ ಸನ್ಮಾನ್ ಕಾರ್ಯೆಂ ನಿಮಾಣೊ ಖಿಳೊ ಮ್ಹಣ್ಯೆತ್. ಆನಿ ಮೆಳ್ಚಿ ಏಕ್ ಸೀಟ್ಯೀ ಮೆಳಾನಾ, ಮೆಳ್ಳ್ಯಾರೀ ಜಿಕಾನಾ! ದೆಕುನ್ ವೊಟಾ ಉಪ್ರಾಂತ್ ‘ಸಕ್ಕಡ್ ಸಾಂಗಾತಾ ಮೆಳ್ಯಾಂ’ ಮಾತ್ಯೆಕ್ ಪಾಂವ್ಕ್ !?!
► ವಿನೋದ್ ಪಿಂಟೊ, ತಾಕೊಡೆ
ಷರೊ : ಹ್ಯಾ ಲೇಖನಾಂತ್ಲೆ ವಿಚಾರ್ ಲೇಖಕಾಚೆ ಸ್ವಂತ್ ಆನಿ ವಯಕ್ತಿಕ್ . ವಾಚ್ಪ್ಯಾಂಚ್ಯಾ ಪ್ರತಿಕ್ರಿಯೆಂಕ್ ಸ್ವಾಗತ್ ಆಸಾ.
2 comments