ಜಳ್ಚೆಂ ಪಾಲ್ವೊಂವ್ಕ್ ಆನಿ ಪರ್ಜಳ್ಚೆಂ ಮಸ್ಕ್ ಕರುಂಕ್ ಹೊ ಹುನ್ನಾರ್ ತರಿ ಕೊಣಾಚೊ?

ಮಂಗ್ಳುರ್‍ಚ್ಯಾ ಬಾವ್ಟ್ಯಾ ಕಾಟ್ಯಾರ್ ಊಂಚ್ ಉಬಾರಾಯೆರ್ ಸೊಭುನ್ ಆಸಾ ಕರಾವಳಿ ಕರ್ನಾಟಕಾಚಿ ವ್ಹಡ್ ವಳಕ್ 1878 ಇಸ್ವೆಂತ್ ಉಬೊ ಜಾಲ್ಲೊ ಸಾಂತ್ ಲುವಿಸ್ ಶಿಕ್ಪಾ ಸಂಸ್ಥೊ ಆದ್ಲ್ಯಾ 140 – ಎಕ್ಶೆಂ ಚಾಳೀಸ್ ವರ್‍ಸಾಂ ಥಾವ್ನ್ ಲಾಗ್ಶಿಲ್ಯಾ ದಿವ್ಯಾಘರಾ (ಲಾಯ್ಟ್ ಹಾವ್ಜಾ) ಪ್ರಾಸ್ ಚಡ್ ಶಿಕ್ಪಾಚೊ ಉಜ್ವಾಡ್ ಫಾಂಕುನ್ ಆಯ್ಲಾ. (ವ್ಹಯ್ ಹಾಂವೆಂ ಸಾಂಗ್ಚಿ ಉತ್ಪ್ರೇಕ್ಷಿತ್ ಕಾಣಿ ನ್ಹಂಯ್, ಇದ್ಗಾ ಗುಡ್ಯಾ ವಯ್ಲ್ಯಾ ದಿವ್ಯಾ ಘರಾಚೊ ಉಜ್ವಾಡ್ ಅಮೇರಿಕಾ ಕೆನಡಾ ಆಸ್ಟ್ರೇಲಿಯಾ ಫಾಂಕ್ತಾ ಕಿತೆಂ? ಪೂಣ್ ಹ್ಯಾ ಗಾಂವಾಂನಿಂಯಿಂ ಉಜ್ವಾಡ್ ಫಾಂಕೊಂವ್ಚೆ ಲುವಿಸಿಯನ್ – ಅಲೋಷಿಯನ್ ನಾಂತ್ ಕಿತೆಂ?) ಹೊ ಸಂಸ್ಥೊ ಕ್ರಿಸ್ತಾಂವಾಂಚೊ, ಕಥೊಲಿಕಾಂಚೊ ಜಾವ್ನ್ ಉರುಂಕ್ ನಾ ಅಖ್ಖ್ಯಾ ಭಾರತಾಂತ್ ಉಂಚ್ಲ್ಯಾ ಶಿಕ್ಪಾಚೊ ಫಾಮಾದ್ ಸಂಸ್ಥೊ ಜಾವ್ನ್ ದೆಶಾಚ್ಯಾ ಮಹಾನ್‌ಪಣಾಂತ್ ವಾಂಟೆಲಿ ಜಾಲಾ.

ಭಾರತಾಚ್ಯಾ ಆರ್‍ತಿಕ್, ಸಾಮಾಜಿಕ್ ವಾಡವಳಿಕ್ ವಯ್‌ಜ್ಞಾನಿಕ್ ಸಂಸೊದಾಕ್, ಆರ್‍ತಿಕ್ ಫುಡಾರ್‍ಪಣಾಕ್ , ಶಿಕ್ಪಾ, ಖೆಳಾ ಆನಿ ಭಲಾಯ್ಕೆ ಶೆತಾಕ್ ಹ್ಯಾ ಸಂಸ್ಥ್ಯಾಚಿ ದೆಣ್ಗಿ ವರ್‍ತಿ. ದೆಶಾಚ್ಯಾ ವಾಡಾವಳೆಕ್ ವ್ಹಡ್ ಮಾಪಾನ್ ಕಾರಣ್ ಜಾಲ್ಲ್ಯಾ ಮಾತ್ರ್ ನ್ಹಂಯ್ ಜಾಗತಿಕ್ ತಳಾರ್ ನಾಂವ್ ಕೆಲ್ಲ್ಯಾ ಅಲೋಷಿಯನಾಂಚಿ ಪಟ್ಟಿ ವಾಚುಂಕ್ ದಿಸಾಂಚೆ ದೀಸ್ ಪಾಂವ್ಚೆನಾಂತ್ ದಿ. ಟಿ.ಎಂ.ಎ. ಪೈ, ಲೋಕಸಭಾ ಸ್ಪೀಕರ್ ಕೆ. ಎಸ್.ಹೆಗ್ಡೆ, ಶ್ರೀ ವಿನಯ ಹೆಗ್ಡೆ, ಲೋಕಾಯಕ್ತ್ ಜಸ್ಟಿಸ್ ಸಂತೋಷ್ ಹೆಗ್ಡೆ, ಭಾರತಾಚೊ ಭೋವ್ ಫಾಮದ್ ರಾಜಕಾರಣಿ ಮುಕೆಲಿ ಶ್ರೀ ಜಾರ್ಜ್ ಫೆರ್ನಾಂಡೀಸ್, ಕರ್ಣಾಟಕ ಬ್ಯಾಂಕ್ ಅಧ್ಯಕ್ಷ್ ಶ್ರೀ ಅನಂತಕೃಷ್ಣ, ಶ್ರೀ ಜಯರಾಮ ಭಟ್, ಶ್ರಿ ಮಹಾಬಲೇಶ್ವರ ಭಟ್, ಸಿಂಡಿಕೇಟ್ ಬ್ಯಾಂಕ್ ಅಧ್ಯಕ್ಷ್ ಶ್ರೀ ಆಲೆನ್ ಪೆರೇರಾ, ಬ್ರಿಕ್ಸ್ ಬ್ಯಾಂಕ್ ಅಧ್ಯಕ್ಷ್ ಶ್ರಿ ಕೆ.ವಿ.ಕಾಮತ್, ವಿಜ್ಞಾನಿ ಡಾ.ಕೆ.ವಿ.ರಾವ್, ಸಂಶೋಧಕ್ ಬಾಪ್ ಲಿಯೊ ಡಿಸೋಜಾ, ಶ್ರೀ ಉಲ್ಲಾಸ್ ಕಾರಂತ್, ಬುಕರ್ ಪ್ರಶಸ್ತಿ ವಿಜೇತ್ ಶ್ರೀ ಅರವಿಂದ ಅಡಿಗ, ಪದ್ಮಶ್ರೀ ಅನಂತ ಅಗರವಾಲ್, ಶ್ರೀ ಯೆನೆಪೋಯ ಅಬ್ದುಲ್ಲಾ ಕುನ್ಹಿ, ಕಾಫಿ ಡೇ ಸ್ಥಾಪಕ್ ಶ್ರೀ ಸಿದ್ದಾರ್ಥ್, ಯುಎಇ ಎಕ್ಷಚೇಂಜ್ ಸಿಇಒ ಶ್ರೀ ಸುಧೀರ್ ಶೆಟ್ಟಿ, ಕ್ರಿಕೆಟಿಸ್ತ್ ಶ್ರೀ ಕೆ.ಎಲ್. ರಾಹುಲ್, ಸಂಗೀತಗಾರ್ ಶ್ರೀ ಗುರುಕಿರಣ್, ಡಾ.ಶಾಂತಾರಾಮ ಶೆಟ್ಟಿ ಡಾ.ದೇವಿ ಪ್ರಸಾದ ಶೆಟ್ಟಿ, ಸುಪ್ರೀಂ ಕೋರ್ಟ್ ವಕೀಲ್ ಶ್ರೀ ವೇಣುಗೋಪಾಲ್, ದಿ. ಬ್ಲೇಸಿಯಸ್ ಡಿಸೋಜಾ, ದೆ. ಸುಬ್ಬಯ್ಯ ಶೆಟ್ಟಿ, ಶ್ರೀ ಜನಾರ್ಧನ ಪೂಜಾರಿ, ಶ್ರೀ ಯು.ಟಿ.ಖಾದರ್, ಶ್ರೀ ಐವಾನ್ ಡಿಸೋಜಾ, ಶ್ರೀ ಯೋಗೀಶ್ ಭಟ್, ಶ್ರೀ ನಾಗರಾಜ ಶೆಟ್ಟಿ ಅಶೆಂ ಹಾಂಚಿ ಪಟ್ಟಿ ಲಾಂಬ್ ಆಸಾ. ಹ್ಯಾ ಸರ್‍ವಾಂಕ್ ಆನಿ ಹೆರ್ ಹಜಾರೊ ಲೊಕಾಂಕ್ ಸಾಂತ್ ಲುವಿಸ್ ಕೊಲೆಜಿನ್ ದೆಶಾ ಖಾತಿರ್ ಆನಿ ಮನ್ಶಾಕುಳಾ ಖಾತಿರ್ ತಯಾರ್ ಕೆಲ್ಲೆಂ.

ಇತ್ಲೆಂ ಮಾಥ್ರ್ ನ್ಹಂಯ್ ಹ್ಯಾ ಕೊಲೆಜಿಚ್ಯಾ ವ್ಹಡಿಲಾಂನಿ ಉಬೆಂ ಕೆಲ್ಲೆಂ ಮ್ಯೂಜಿಯಮ್ ವರ್‍ಸಾಕ್ ಕಾಂಯ್ ಹಜಾರಾಂನಿ ವಿದೈಆರ್‍ತ್ಯಾಂಚಿ ಪಯ್ಣಾರ್‍ಯಾಂಚಿ ಜಾಣ್ವಾಯೆ ತಾನ್ ಬಾಗಯ್ತಾ. ಕೊಲೆಜಿಂತ್ ಆಸ್ಚೆಂ ಕೊಪೆಲ್ ಭಾವ್ ಆಂತೊನಿ ಮೆಸ್ಕೆನ್ ಸೊಡಯಿಲ್ಲ್ಯಾ ರಂಗಾಳ್ ಪಿಂತುರಾಂನಿ ಭರ್‍ಲಾಂ ಆನಿ ತೆಂ ದೆಶಾಚ್ಯಾ ನಾಮ್ಣೆಚ್ಯಾ ಭೊಂವ್ಡೆತಳಾಂ ಪಯ್ಕಿ ಏಕ್ ಜಾವ್ನ್ ಹಜಾರೊ ಯಾತ್ರಿಕಾಂ ಕ್ ಆಪ್ಣಾಥಂಯ್ ವೊಡ್ತಾ.

ಹ್ಯಾ ಸಂಸ್ಥ್ಯಾಚ್ಯಾ ಸೆವೆಕ್ ಮಾನ್ ಬಾಗೊವ್ನ್ ಹಾಂಗಾಚ್ಯಾ ರಸ್ತ್ಯಾಕ್ ‘ಲಾಯ್ಟ್ ಹಾವ್ಜ್ ಹಿಲ್ಲ್’ ಮ್ಹಳ್ಳೆಂ ನಾಂವ್ ಆಸ್‌ಲ್ಲೆಂ ಕಾಡ್ನ್ ಮುನ್ಸಿಪಾಲಿಟಿನ್ ಸೇಂಯ್ಟ್ ಅಲೋಷಿಯಸ್ ಕೊಲೆಜ್ ರೋಡ್’ ಮ್ಹಣ್ ನಾಂವ್ ದಿಲ್ಲೆಂ ಆನಿ ತ್ಯಾ ಧ್ವಾರಿಂ ಎದೊಳ್‌ಚ್ ಲೊಕಾಜಿಬೆರ್ ಆನಿ ವಾಸ್ತವಿಕ್ಪಣಾಂತ್ ಚಾಲ್ತೆರ್ ಆಸ್‌ಲ್ಲೆಂ ನಾಂವ್ ದೃಢೀಕೃತ್ ಕೆಲ್ಲೆಂ. ಆನಿ ಆತಾಂ ಆಯಿಲ್ಲ್ಯಾ ಖಬ್ರೆ ಪರ್‍ಮಾಣೆ ವೆಗ್ಗಿಂಚ್ ಹ್ಯಾ ರಸ್ತ್ಯಾಚೆಂ ನಾಂವ್ ವಿಜಯಾ ಬ್ಯಾಂಕ್ ಸಂಸ್ಥಾಪಕ್ ಮುಲ್ಕಿ ಸುಂದರ್ ರಾಮ್ ಶೆಟ್ಟಿಚ್ಯಾ ನಾಂವಾಕ್ ಸಮರ್‍ಪಿತಾತ್.

ಮುಲ್ಕಿ ಸುಂದರ್ ರಾಮ ಶೆಟ್ಟಿ ಏಕ್ ಭೋವ್ ಮಾನೇಸ್ತ್ ವೆಕ್ತಿ ತಾಚ್ಯಾ ವಾವ್ರಾನ್ ಹಜಾರೊ ಲೊಕಾಂಚೆಂ ಬರೆಂ ಜಾಲಾಂ. ಹಾಂವ್‌ಯಿ ತಾಚೆ ವಿಶೀಂ ಜಾಣಾಂ ಆಸ್ಚೊ ಆನಿ ಮಾನಾನ್ ಲೆಕ್ಚೊಂ. ತರಿ ಮುಲ್ಕಿ ಸುಂದರ್ ರಾಮ ಶೆಟ್ಟಿಚ್ಯಾ ನಾಂವಾನ್ ಎದೊಳ್‌ಚ್ ಸಭಾರ್ ಸ್ಮಾರಕ್ ಆಸಾತ್. ಆನಿ ತರಿ ಥೊಡೆ ಹೆರ್ ಜಾಗ್ಯಾಂನಿ ಸುರ್‍ವಾತುಯೆತ್. ಸಾಂತ್ ಲುವಿಸ್ ಕೊಲೆಜ್ ಹಾಂಗಾಚ್ ಆಸ್ಚಿ ಹಾಚ್ಯಾ ನಾಂವಾರ್ ದುಸ್ರೆ ರಸ್ತೆ ಆನಿ ಖಂಯ್ ತರಿ ಕರುಂಕ್ ಜಾಯ್ನಾಂತ್‌ಮೂ ಹೆಂ ಸವಾಲ್ ಸೊಂಪೆಂ ಜೆರಾಲ್ ಲೋಕ್ ಹ್ಯಾ ವಿಶಿಂ ಅಭಿಪ್ರಾಯ್ ದಿತಾ ತರಿ ಆಮ್ಚ್ಯಾ ಲೊಕಾಂಚ್ಯಾ ಆಮ್ಚೆ ಮಧ್ಲ್ಯಾ ಆಮ್ಚೆ ಮ್ಹಣುನ್ ಆಮಿ ವಳ್ಕೊಂಚ್ಯಾ ಬುಧ್ವೊಂತ್ ಮುಕೆಲ್ಯಾಂಕ್ ಹೆಂ ಸಮ್ಜಾನಾಂ ಕಿತ್ಯಾಕ್?

ಹಂಪನ್‌ಕಾಟ್ಯಾ ಥಾವ್ನ್ ಆಯ್ಚ್ಯಾ ಜ್ಯೋತಿ ಥಿಯೇಟರಾ ಪರ್‍ಯಾಂತ್ ಪಯ್ಲೆಂ ಇದ್ಗಾ ವಾಟೆನ್ ರಸ್ತ್ಯಾ ಸಂಚಾರ್ ನಾತ್‌ಲ್ಲೊಚ್. ಹಾಂವ್ ಹೆಂ ಸಾರ್‍ಕೆಂ ಜಾಣಾಂ ಕಿತ್ಯಾಕ್ ಪಾಂತ್ತೀಸ್ ವರ್‍ಸಾಂ ಆದಿಂ ಥಾವ್ನ್ ಸುಮಾರ್‍ನೋವ್ ವರ್‍ಸಾಂ ತ್ಯಾ ರಸ್ತ್ಯಾರ್ ಸದಾಂ ಚಲ್ಲಾಂ. ವಾಹನ್ ಸಂಚಾಋ ಸಕ್ಕಡ್ ಮಿಲಾರ್ ಇಗರ್‍ಜೆ ದೆಗೆನ್ ಆನಿ ಅರವಿಂದ ಮೋಟಾರಾ ಮುಕ್ಲ್ಯಾ ರಸ್ತ್ಯಾಂನಿ ದ್ವಿಮುಖ್ ಚಲ್ತಾಲೊ. ಕೊಲೆಜಿಚೊ ಮಾರೊಗ್ ಫಕತ್ ಕೊಲೆಜಿಕ್ ವೆಚ್ಯಾ ಮಾಸ್ತೆರಾಂಕ್ ಆನಿ ವಿದ್ಯಾರ್‍ತ್ಯಾಂಕ್ ಆಸ್‌ಲ್ಲೊ ಆನಿ ತೆಣೆಂ ಲೋಬೊ ಪ್ರಭುಚ್ಯಾ ಮೆನ್ಶನಾಂತ್ಲಿಂ ಆನಿ ಹೆರ್ ಚಾರ್ ಪಾಂಚ್ ಘರಾಂ ಆಸ್‌ಲ್ಲಿಂ ತ್ಯಾ ರಸ್ತ್ಯಾರ್ ಆಮಿ ಭುರ್‍ಗೆ ಕಂಡಪಟ್ಟೆ ಧಾಂವ್ಡಿ ಉಡ್ಕ್ಯೊ ಮಾರ್‍ತಾಲ್ಯಾಂವ್.

ತೆಂ ಕಿತೆಂಯ್ ಆಸುಂ ಮ್ಹಾಕಾ ಥೊಡಿಂ ಸವಾಲಾಂ ಧೊಸುನ್ ಆಸಾತ್. ಹ್ಯಾ ಸಗ್ಳ್ಯಾ ಪ್ರಕ್ರಿಯೆಕ್ ಕಾಂಯ್ ಉಣ್ಯಾರ್ ಉಣೆಂ ದೋನ್ ವರ್‍ಸಾಂ ಜಾಲಿಂ ಖಂಯ್ ಆನಿ ಆತಾಂ ಗಜಾಲಿ ನಿಮಾಣ್ಯಾ ಹಂತಾರ್ ಆಸಾತ್ ಖಂಯ್. ಹೊ ಸಗ್ಳೊ ವೆವ್ಹಾರ್ ಘುಟಾನ್ ಚಲುಂಕ್ ಸಾಧ್ಯಾಚ್ ನಾ ಕಿತ್ಯಾಕ್ ಹಿ ರಾಜಾಡಳ್ತ್ಯಾಚಿ ಗಜಾಲ್. ಮುನ್ಸುಪಾಲಿಟಿಂತ್ ಹೊ ವಿಷಯ್ ಚರ್‍ಚೆಕ್ ಆಯ್ಲೊ ಮ್ಹಣ್ಯಾಂ ತವಳ್ ‘ಆಮ್ಚೆ’ ಮ್ಹಣ್ ನಾಂವ್ ದವರ್‍ನ್ ಘೆತ್ಲಲೆ ಆನಿ ತ್ಯಾ ನಿಮ್ತಿಂ ವಿಂಚುನ್ ಯೇಂವ್ಕ್ ವಾವುರ್‍ಚೆ ಕರ್‍ತಾಲೆ ತರಿ ಕಿತೆಂ ಖಂಯ್? ಆಮಿ ಆಮ್ಚೆ ಆಮ್ಚೆ ಮ್ಹಣ್ ಲೆಂಬೆವ್ನ್ ಮಾತ್ಯಾರ್ ವ್ಹಾವೊಂವ್ಚೆ ಅಯಿನ್ನ್ ವೆಳಾರ್ ಅಯಿನ್ನ್ ಜಾಗ್ಯಾರ್ ಬಸುನ್ ಕರ್‍ತಾಲೆ ಕಿತೆಂ? ಕೋಣ್ ಸಾಂಗ್ತಾಲೊ ಜಾತಿ ಬಳಾನ್ ಆಮ್ಚ್ಯಾಂಚೊ ವೋಟ್ ಆಮ್ಕಾಂ ಪಡ್ತಾಚ್ ತರ್ ದುಸ್ರ್ಯಾಂಚೊ ವೊಡುಂಕ್ ತಾಂಕಾಂ ಭುಲಯಾಂ ಮ್ಹಣ್ಚೆಂ ಪ್ರೇತನ್ ಖಂಯ್ ಹೆಂ. ಹ್ಯಾ ಮುಕೆಲ್ಯಾಂಕ್ ಆಪೊವ್ನ್ ಆಮ್ಚ್ಯಾ ಧಾರ್‍ಮಿಕ್ ಮುಕೆಲಿ ಮ್ಹಣ್ತಲ್ಯಾಂನಿ ಕಾಂಯ್ ವಿಚಾರ್ ಉಚಾರ್ ಕೆಲ್ಲೊ ಆಸಾ ಖಂಯ್‌ಗಿ? ವಾ ತಾಂಕಾಂ ಹೆಂ ಸಕ್ಕಡ್ ಕಳ್ನಾಶೆಂಚ್ ಗೆಲಾಂ? ಗಾಂವಾರ್ ಜಾತಿ ದುಸ್ಮಾನ್ಕಾಯೆಚೊ ಉಜೊ ಪೆಟ್ತಾನಾ ಉಣ್ಯಾರ್ ಉಣೆಂ ಶಾಂತಿ ಸಮಾಧಾನಾಕ್ ಉಲೊ ದೀನಾತ್‌ಲ್ಲೆ ಹ್ಯಾ ಗಜಾಲಿಂ ವಿಶಿಂ ಕಿತ್ಯಾಕ್ ಖಂತ್ ಕರ್‍ತಿತ್.

 ► ಸ್ಟೀವನ್ ಕ್ವಾಡ್ರಸ್ ಪೆರ್‍ಮುದೆ

Leave a Reply

Your email address will not be published. Required fields are marked *

*

code

Share ...please don\'t COPY !