ಕೆಸಿಒ ಮೊತಿಯಾಳ್ಯಾ ವರ್ಸಾಚೊ ತಾಂಡೆಲಿ ಶ್ರೀ ಲಿಯೋ ರೊಡ್ರಿಗಸ್

ಅಬುಧಾಬಿಂತ್ ಆಯ್ಲೆವಾರ್ ಚಲ್ಲೆಲ್ಯಾ ಕೊಂಕಣಿ ಸಂಸ್ಕೃತಿಕ್ ಸಂಘಟನಾಚ್ಯಾ (ಕೆಸಿಒ) ವಾರ್ಷಿಕ್ ಮಹಾಸಭೆಂತ್, ಅನಿವಾಸಿ ಉದ್ಯಮಿ, ಸಮಾಜ್ ಸೇವಕ್ ತಶೆಂ ಸಮುದಾಯಾಚೊ ಮುಕೆಲಿ ಶ್ರೀ ಲಿಯೋ ರೊಡ್ರಿಗಸ್ ಮೊತ್ಯಾಳಾ ವರ್ಸಾಕ್ ಅಧ್ಯಕ್ಷ್ ಜಾವ್ನ್ ವಿಂಚೊನ್ ಆಯ್ಲ್ಯಾತ್. ಸತತ್ ತಿಸ್ರ್ಯಾ ಆವ್ಧೆಕ್ ಸಂಧ್ಯಾ ವಾಸ್ ಪ್ರಧಾನ್ ಕಾರ್ಯದರ್ಶಿ ಆನಿ ಅಮಿತಾ ಕೋಸ್ಟಾ ಖಜಾನಿ ಜಾವ್ನ್ ಮಹಾಸಭೆರ್ ವಿಂಚೊನ್ ಆಯ್ಲ್ಯಾಂತ್. ಹುದ್ದೆದಾರಾಂಚಿಂ ವಿಂಚವ್ಣ್ ಗುಪಿತ್ ಮತದಾನಾ ಮುಕಾಂತ್ರ್ ಜಾಲಿ ಆನಿ ಜೇಸನ್ ಕೊರೆಯಾ ಹಾಣೆ ಎಲಿಸಾಂವ್ ಅಧಿಕಾರಿ ಜಾವ್ನ್ ತಿ ಚಲವ್ನ್ ವೆಲಿ.

ಫೆಬ್ರವರಿ 13, 1995 ವೆರ್ ಕೆಸಿಒ ಶ್ರೀ  ಲಿಯೋ ರೊಡ್ರಿಗಸ್ ಹಾಣಿ ಸ್ಥಾಪನ್ ಕೆಲ್ಲೆಂ ಆಸುನ್, ಸಂಸ್ಥ್ಯಾಚೊ ಸ್ಥಾಪಕ್ ಅಧ್ಯಕ್ಷ್ ಜಾವ್ನ್ ಸಂಘಟನಾಕ್ ಫಾವೊತೆಂ ಮುಕೆಲ್ಪಣ್ ಆನಿ ದಿಶಾ ದೀವ್ನ್ ತಾಣಿ ಸಂಘಟನ್  ಮುಕಾರ್ ವರುನ್ ಆಜ್  ಮೊತ್ಯಾಳೊ ಸಂಭ್ರಮ್ ಆಚರಣ್ ಕರ್ಚೆಂ ಗಲ್ಫಾಂತ್ಲೆಂ ಪ್ರಮುಕ್ ಕೊಂಕ್ಣಿ ಸಂಘಟನ್ ಜಾವ್ನ್ ಪಯ್ಲ್ಯಾ ಫಂಗ್ತೆರ್ ತೆಂ ಸೊಭ್ತಾ.

ಏಕ್ ಯಶಸ್ವೀ ಉದ್ಯಮಿ, ಸಮಾಜ್ ಸೇವಕ್ ಆನಿ ಸಮುದಾಯಾಚೊ ಮುಕೆಲಿ ಜಾವ್ನ್ ಶ್ರೀ ಲಿಯೋ ರೊಡ್ರಿಗಸ್ ಹಾಂಕಾ ಕೊಂಕ್ಣಿ ಕ್ರೀಸ್ತಾಂವ್ ಸಮಾಜೆಂತ್ ವ್ಹಡ್ ನಾಂವ್ ಆನಿ ಗವ್ರವ್ ಆಸಾ. ಪಾಟ್ಲ್ಯ್ಯಾ  ಪಾಂತ್ತೀಸ್ ವರ್ಸಾಂ ಪಾಸುನ್ ಅಬುದಾಬಿಂತ್  ಆಮಿಗೋ  ಅಟೊಮೋಟಿವ್ ಸರ್ವಿಸಸ್ ಮ್ಹಳ್ಳ್ಯಾ ನಾಂವಾನ್  ತಾಂಚೆ ಉದ್ಯಮ್ ನಾಂವಾಡ್ಲಾಂ ಆಸುನ್ –  ಜಾತ್,  ಸಮಡ್ತ್, ಭಾಸ್ ಮ್ಹಣ್ ಫರಕ್  ಲೆಕಿನಾಸ್ತಾಂ  ಗಾಂವಾಂತ್ ತಶೆಂ ಪರ್ಗಾಂವಾಂತ್ ಚಲ್ಚ್ಯಾ ಹರ್ ಸಮಾಜ್‌ಮುಖಿ ಕಾರ್ಯಕ್ರಮಾಂಕ್ ವ್ಹಡ್ ಮಾಪಾನ್ ತೆಂಕೊ ಆನಿ ಆದಾರ್ ತೆ ದೀವ್ನ್ ಆಯ್ಲ್ಯಾತ್.  ಕೊಂಕ್ಣಿ  ಭಾಸ್, ಸಾಹಿತ್ಯ್, ಸಂಗೀತ್ ಆನಿ ಸಂಸ್ಕೃತಿ  ತಶೆಂ ಕಲಾಕಾರಾಂಕ್ ತಾಂಚ್ಯಾ ಕುಟ್ಮಾಥಾವ್ನ್ ವ್ಹಡ್ ಪಾಟಿಂಬೊ ಲಾಭ್ತಾ.

ಮುಳಾನ್ ಆಂಜೆಲೋರ್ ಫಿರ್ಗಜೆಚಿ ಪ್ರಸ್ತುತ್ ಕಿನ್ನಿಗೋಳಿಚಿ ಸಂಧ್ಯಾ ವಾಸ್, ಅಬುಧಾಬಿಂತ್ ಪಾಟ್ಲ್ಕ್ಯಾ 17 ವರ್ಸಾಂ ಪಾಸುನ್ ವಾವುರ್ನ್ ಆಸಾ. ಏಕ್ ಉತ್ತೀಮ್ ಖೆಳ್ಗಾಡಿ ಜಾವ್ನಾಸ್ಚ್ಯಾ ತಿಣೆಂ  ಹ್ಯಾ ಆದಿಂ ಖೆಳಾ ಕಾರ್ಯದರ್ಶಿ, ಸಹಾಯಕ್ ಪ್ರಧಾನ್ ಕಾರ್ಯದರ್ಶಿ ಆನಿ ಪ್ರಧಾನ್ ಕಾರ್ಯದರ್ಶಿ ಜಾವ್ನ್ ಸಂಘಟನಾಂತ್ ಸೆವಾ ದಿಲ್ಯಾ.

ಪರತ್ ಖಜಾನಿ ಜಾವ್ನ್ ಚುನಾಯಿತ್ ಜಾಲ್ಲಿ ಅಮಿತಾ ಕೋಸ್ಟಾ ವೃತ್ತೆನ್ ಚಾರ್ಟರ್ಡ್ ಅಕೌಂಟೆಂಟ್ ಜಾವ್ನಾಸೊನ್ ಹ್ಯಾ ಆದಿಂಯ್ ಖಜಾನಿ ಜಾವ್ನ್  ಸಂಘಟನಾ ಖಾತಿರ್ ತಿ ವಾವುರ್ಲ್ಯಾ.

ಮಾಲ್ಗಡ್ಯಾ ಸಾಂದ್ಯಾಂನಿ ವಿಚಾರ್ ವಿಮರ್ಸೊ ಕರುನ್ ಮೊತಿಯಾಳ್ಯಾ ವರ್ಸಾಚ್ಯಾ ಆಡಳ್ತ್ಯಾ ಸಮಿತೆಕ್ ಹೆರ್ ಹುದ್ದೆದಾರಾಂಕ್ ನೇಮಕ್ ಕೆಲಾಂ ಆಸುನ್ –  ಉಪಾಧ್ಯಕ್ಶ್ ಜಾವ್ನ್ ಸಿಎ ವಲೇರಿಯನ್ ದಾಲ್ಮೇದಾ, ಪರ್ಲ್ ಜುಬಿಲಿ ಸಂಚಾಲಕ್ ಜಾವ್ನ್ ಫ್ರಾಂಕ್ಲೈನ್ ಡಿ’ಕುನ್ಹಾ, ಸಲಹಾದಾರ್ ಜಾವ್ನ್  ಡಾಲ್ಫಿ ವಾಸ್ ಆನಿ ಜೇಸನ್ ಕೊರಿಯಾ, ಸಹಾಯಕ್ ಪ್ರಧಾನ್ ಕಾರ್ಯದರ್ಶಿ ಜಾವ್ನ್  ಕ್ರಿಸಿಲ್ ಡಿ’ಮೆಲ್ಲೊ, ಮನೊರಂಜನಾ ಕಾರ್ಯದರ್ಶಿ ಜಾವ್ನ್ ಬೆನೆಟ್ ಡಿ’ಮೆಲ್ಲೊ, ಖೆಳಾ ಕಾರ್ಯದರ್ಶಿ ಜಾವ್ನ್ ವಿವೇಕ್ ಸೆರಾವೊ, ಮಾಧ್ಯಮ್ ಆನಿ ಸಾರ್ವಜನಿಕ್ ಸಂಪರ್ಕ್ ಸಂಯೋಜಕಿ ಜಾವ್ನ್  ಅಕ್ಷತಾ ಫರ್ನಾಂಡಿಸ್, ವಿದ್ಯಾರ್ಥಿ ವೇತನ್ ಆನಿ ವಯ್ಜಾಕೀಯ್ ಕುಮ್ಕೆ ವಿತರಣ್ ಸಂಯೋಜಕಿ ಜಾವ್ನ್ ಕ್ಲೌಡಿಯಾ ಲಿಡಿಯಾ ಲೋಬೊ, ಟ್ರಸ್ಟ್ ಸಂಯೋಜಕಿ ಜಾವ್ನ್ ಅಮಿತಾ ಕೋಸ್ಟಾ ಆನಿ ಲೇಕ್ ತಪಾಸ್ಣಾರ್ ಜಾವ್ನ್ ವಲೇರಿಯನ್ ದಾಲ್ಮೇದಾ ಹೆ ನಾಮ್ ನಿರ್ದೇಶಿತ್ ಜಾಲ್ಯಾತ್.