ಅಡ್ಕಳಿ ಟ್ರಂಪ್ ಆನಿ ಝುಜಾರಿ ಜೆಲೆನ್ಸ್ಕಿ: ದೋಗ್ ವಿಸಂಗತ್ ಸರ್ವಾಧಿಕಾರಿ

ಹ್ಯೆ ಫೆಬ್ರೆರ್ 28 ವ್ಯೆರ್, ಸುಕ್ರಾರಾ ಸಕಾಳಿಂ, ಅಮೆರಿಕನ್ ಫಿರ್ಜೆಂತ್ ಟ್ರಂಪ್ ಆನಿ ಉಕ್ರೇನ್ ಫಿರ್ಜೆಂತ್ ಜೆಲೆನ್ಸ್ಕಿ ಹಾಂಚ್ಯೆಂ ಮೀಟಿಂಗ್ ಒವಲ್ ಒಫಿಸಾಂತ್ ಚಲ್ಲೆಂ. ಹ್ಯೆ ಸಭೆಂತ್ ಟ್ರಂಪ್ ಆನಿಂ ತಾಚೊ ಉಪಾಧ್ಯಕ್ಶ್ ವೇನ್ಸ್ ಹೆ ಸಾಂಗತಾ ಮೆಳ್ಳೆ ಆನಿಂ ಜೆಲೆನ್ಸ್ಕಿಚಿ ಠಿಕಾ ತಾಣಿಂ ಕೆಲಿ. ತಾಂಚೊ ತಾಳೊ ಮ್ಹಸ್ತ್ ವಾಡ್ಲೊ. ಎಕಾ ಪಾಟ್ಲ್ಯಾನ್ ಏಕ್ ಫಟ್ ತೆ ಉಲಯಿತ್ತ್ ಗೆಲೆ. ಟ್ರಂಪಾಕ್ ದೇವ್ ಬೊರೆಂ ಕರುಂ ಮ್ಹಣೊಂಕ್ ನಾಂ ಮ್ಹಳ್ಳೊ ಆರೋಪ್ ವೇನ್ಸಾಚೊ. ಜೆಲೆನ್ಸ್ಕಿ ಒವಲ್ ಒಫಿಸಾಕ್ ಯೇವ್ನ್, ಅಮೇರಿಕನ್ ಫಿರ್ಜೆಂತಿಚೊ ಆನಿ ಪರ್ಜ್ಯೆಚೊ ಅಕ್ಮಾನ್ ಕರ್ತಾ ಮ್ಹಣ್ ಪರತ್ ಪರತ್ ವೇನ್ಸಾನ್ ಆರೋಪ್ ಕೆಲೊ.

ಉಲಂವ್ಕ್ ಆವ್ಕಾಸ್ ದೀವ್ನಾ ದೆಕುನ್  ಜೆಲೆನ್ಸ್ಕಿ ಖುಬಾಳ್ಳೊ. ತಾಣೆಂ ಟ್ರಂಪಾಚ್ಯೊ ಆನಿಂ ವೇನ್ಸಾಚ್ಯೊ ಜಿವ್ಯೊ ಜಿವ್ಯೊ ಫಟಿ ಉಕಲ್ನ್ ದಾಕಯ್ಲ್ಯೊ. ಸುಮಾರ್ ಮಿನುಟಾಂ ತೇಗಿ ಮುಕೆಲಿ ಉಲಯಿತ್ತ್ ಗೆಲೆ. ಆಯ್ಕತೆಲೆ ಪತ್ರಕಾರ್ ಮಾತ್ರ್! ಪ್ರತ್ಯೇಕ್ ಜಾವ್ನ್ ಟ್ರಂಪ್ ಆಪ್ಲೆಂ ತರ್ಜನಿ ಬೋಟ್ (index finger) ಉಕ್ಲುನ್ ಆನಿ ಹಾಲವ್ನ್ ಜೆಲೆನ್ಸ್ಕಿ ಸಂಗಿಂ ವಾದ್ ಮಾಂಡಿತ್ತ್ ಗೆಲೊ. ಆಕ್ರೇಕ್ ತಾಣೆಂ ಸಭಾ ಭಂಗ್ ಕೆಲಿ: “ಮ್ಹಕಾ ದಿಸ್ತಾ ಆಮಿಂ ಮ್ಹಸ್ತ್ ಪಳೆಲೆಂ. this is going to be great television”.

ವ್ಹಯ್, ಆಪೂರ್ಬಾಯೆಚಿ ಟಿವಿ. ಟ್ರಂಪ್ ಏಕಾ ತೆಂಪಾರ್ ಟಿವಿ ಹೋಸ್ಟ್ ಜಾವ್ನಾಸ್ಲೊ. Apprentice ತಾಚೊ ಲೋಕಾಮೋಗಾಳ್ ರೀಯಾಳ್ಟಿ ಶೋ. You are fired ತಾಚಿಂ ಹಾಂಕಾರಿ ಉತ್ರಾಂ. ತಾಚ್ಯೆ ನದ್ರೆಂತ್, ಹ್ಯೆ ಸಭೆಂತ್ ಜೆಲೆನ್ಸ್ಕಿ Apprentice. ಆಪುಣ್ ದಿರೆಕ್ತೊರ್. ತಾಣೆಂ ಜೆಲೆನ್ಸ್ಕಿಚೊ ಪಾತ್ರ್ (script) ಬರಯ್ಲಾ.  ಹ್ಯಾ ಪಾತ್ರಾ ಪ್ರಮಾಣೆಂ, ಜೆಲೆನ್ಸ್ಕಿ ಭಿಕ್ ಮಾಗೊಂಕ್ ಆಯಿಲ್ಲೊ supplicant. ತ್ಯಾ stupid ಬಾಯ್ಡೆನಾನ್ ಉಕ್ರೇನಾಕ್ 350 ಬಿಲ್ಲಿಯನ್ ಡೊಲರ್ ಕುಮಕ್ ದಿಲ್ಯಾ. ಹೊ ದುಡು ಪಾಟಿಂ ಮೆಳ್ತಲೊ ಕಸೊ? ಹಾಚಿ ಕಸಲಿ ಖಾತ್ರಿ? ಫುಡೆಂ, ಅಶೆಂಚ್ ಚಲ್ಚ್ಯೆಂ ನಾಂ. ಉಕ್ರೇನಾನ್ ಅಮೆರಿಕಾಚಿ ಶರ್ತಾಂ ಮಾಂದುಂಕ್ ಜಾಯ್: ಪಯ್ಲ್ಯೆ ಸುವಾತೆರ್, ಝುಜಾ-ವಿರಾಮಾಕ್ (ceasefire) ಒಪ್ವಾಜೆ. ದುಸ್ರ್ಯೆ ಸುವಾತೆರ್, ಉಕ್ರೇನಾಚಿ rare earth minerals ಗಿರೆಸ್ತ್ಕಾಯ್ ಆಡವ್ ದವರ್ಚೊ ಸೊಲ್ಲೊ ಅಮೆರಿಕಾಕ್ ಜಾಯ್.

2019 ವರ್ಸಾ ಉಕ್ರೆನಾಂತ್ ಫಿರ್ಜೆಂತ್ ಪದ್ವೆಕ್ ಚುನಾವ್ ಚಲ್ಲೊ. ಜೆಲೆನ್ಸ್ಕಿಜಿಕ್ಲೊ. ಪಾಂಚ್ ವರ್ಸಾಂ ಪೈಲೆ, 2014 ಇಸ್ವೆಂತ್ ಉಕ್ರೇನಾಚ್ಯೆಂ ಕ್ರಿಮೀಯಾ ವಠಾರ್ ಅಕ್ರಮಣ್ ಕರ್ನ್ ರಸಿಯಾನ್ ಭಿತರ್ ಘಾಲೆಂ. ತವಳ್ ಒಬಾಮಾ ಅಮೆರಿಕನ್ ಫಿರ್ಜೆಂತ್ ಆಸ್ಲೊ. 2016 ಇಸ್ವೆಂತ್ ಟ್ರಂಪ್ ಜಿಕ್ಲೊ. ರಸಿಯಾಚೊ ಪುಟಿನ್ ಆನಿಂ ಟ್ರಂಪ್ ಎಕಾಚ್ಚ್ ಕಾಸ್ತಾಚ್ಯೆ: ದೋಗಿ ಸರ್ವಾಧಿಕಾರಿ. ದೆಕುನ್, ಫಿರ್ಜೆಂತ್ ಟ್ರಂಪಾನ್ ಉಕ್ರೇನಾಕ್ ಕಾಂಯ್ ಮಜತ್ ದಿಲ್ಲಿನಾಂ ಮಾತ್ರ್ ನಹಿಂ ಝುಜಾ-ಸಾಹೆತಾಂ ಧಾಡುಂಕ್ ಅಡ್ಕಳ್ ಘಾಲಿ. ಬಾಯ್ಡೆನಾಚ್ಯಾ ಪೂತಾ ಹಂಟರ್ ಬಾಯ್ಡೆನಾಕ್ ಉಕ್ರೇನಾಂತ್ ಬಿಜ್ನೆಸ್ ಆಸಾ. ತಾಚ್ಯಾ ವಯ್ರ್ ಭ್ರಸ್ಟಾಚಾರಾಚಿ ಕೇಜ್ ಕರಿಜೆ ಮ್ಹಣ್ ತಾಣೆಂ ಜೆಲೆನ್ಸ್ಕಿ ವಯ್ರ್ ರಾಜಕೀಯ್ ದಬಾವ್ ಘಾಲೊ. ಅಮೇರಿಕಾಂತ್ ಹ್ಯಾ ಕಾಂಡಾಚಿ ಸೆನೆಟ್ ತನ್ಕಿ ಚಲ್ಲಿ ಆನಿ ಟ್ರಂಪ್ impeach ಜಾಲೊ. ದೆಕುನ್, ಟ್ರಂಪ್ ಆನಿಂ ಜೆಲೆನ್ಸ್ಕಿ ಮಧೆಂ ಸಂಬಂಧ್ ಬರೆ ನಾಂತ್. ಜೆಲೆನ್ಸ್ಕಿ ಪ್ರತಿಪಕ್ಶ್ ಡಿಮೋಕ್ರೆಟ್ ಸಮರ್ತಕ್ ಮ್ಹಣ್ ತಾಚಿ ಪಾತ್ಯೆಣಿ.

ವೇನ್ಸಾಕ್ ಉಕ್ರೇನಾಚಿ ಕಾಂಯ್ ಕಾಳ್ಜಿ ನಾಂ; ಅಶೆಂ ತಾಣೆಂಚ್ ಜಾಯಿತ್ತ್ಯಾಂ ಪಾವ್ಟಿಂ ಸಾಂಗ್ಲಾಂ. ಟ್ರಂಪಾನ್ 2024 ಚುನಾವಾ ಪಯ್ಲೆಂ ತಾಕಾ ಆಪ್ಲೊ ಸಹಾಯಕ್ ಫಿರ್ಜೆಂತ್ ಅಭ್ಯರ್ಥಿ ಜಾವ್ನ್ ವಿಂಚ್ಲೆಲ್ಯಾ ವೇಳಾ, ಜೆಲೆನ್ಸ್ಕಿನ್ ವೇನ್ಸ್ “ವ್ಹಡ್ ತೀವ್ರಗಾಮಿ” ಮ್ಹಣ್ ಠಿಕಾ ಕೆಲ್ಲಿ ಆಸಾ. ಹೆಂ ವೇನ್ಸ್ ವಿಸ್ರೊಂಕ್ ನಾಂ.

ಟ್ರಂಪ್ ಆಡಳ್ತ್ಯಾಕ್ ಜೆಲೆನ್ಸ್ಕಿ ಮೀಟಿಂಗಾಂತ್ ಹುಮೆದ್ ನಾತ್ಲಿ. ಹೆಂ ಮೀಟಿಂಗ್ ರದ್ದ್ ಕರ್ತಾಂವ್ ಮ್ಹಣ್ ಹಫ್ತ್ಯಾ ಪಯ್ಲೆಂಚ್ ಸಾಂಗ್ಲೆಲೆಂ. ಪೂಣ್, ಫ್ರೆಂಚ್ ಫಿರ್ಜೆಂತ್ ಮ್ಯಾಕ್ರೊನ್ ಮಧೆಂ ಪಡ್ಲೊ ಆನಿ ಟ್ರಂಪ್ ಒಪ್ಲೊ. ಪೂಣ್, ಉಕ್ರೇನಾನ್ ಆಪ್ಲಿ ಕಚ್ಚಾ ಖನಿಜಾಂಚಿ ಜೋಡ್ ಅಮೇರಿಕಾ ಸಾಂಗಾತಾ ವಾಂಟುನ್ ಘೆಜೆ ಮ್ಹಣ್ ಶರ್ತ್ ಘಾಲೆಂ. ಹ್ಯಾ ಬಾಬ್ತಿನ್ ಏಕ್ ಚವ್ಕಟ್ ಕಬ್ಲಾತ್ ದೀವ್ನ್ ಜೆಲೆನ್ಸ್ಕಿನ್ ಸೊಲ್ಲ್ಯಾಕ್ ದಸ್ಕತ್ ಘಾಲುಂಕ್ ಮಾತ್ರ್ ಒವಲ್ ಒಫಿಸಾಕ್ ಯೆವ್ಯೆತ್ ಮ್ಹಳೆಂ. ಭದ್ರತಾ ಖಾತ್ರಿ ವಿಷಿಂ ವಾ ಝುಜ್ ರಾವಂವ್ಚ್ಯಾ ವಿಷಿಂ ಉಲಂವ್ಕ್ ನಜೊ ಮ್ಹಳೆಂ.

ಹ್ಯಾ ಪುರಾಸ್ಕಾರಾಚಿ ಆಸ್ ಟ್ರಂಪಾಕ್ ತಾಚ್ಯಾ ಪಯ್ಲ್ಯಾ ಆಡಳ್ತ್ಯಾ ಥಾವ್ನ್ ಧೊಸ್ತಾ. ತವಳ್ ಆಬ್ರಾಹಾಮ್ ಅಕ್ಕೊರ್ಡ್ಸ್ ಮ್ಹಣೊನ್ ನಾಂವ್ ಪಡ್ಲೆಲೊ ಸೊಲ್ಲೊ ತಾಣೆಂ ಮಾಡುನ್ ಹಾಡ್ಲೆಲೊ. ಚಾರ್ ಆರ್ಬಿ ರಾಷ್ಟ್ರ್ ಆನಿ ಇಸ್ರಾಯೆಲಾ ಮಧೆಂ ಹೊ ಸೊಲ್ಲೊ ಜಾಲ್ಲೊ. ತಾಚ್ಯೆಂ ಹೆಂ ರಾಜಕೀಯ್ ಮೇಟ್ ಮಹತ್ವಾಚ್ಯೆಂ ಪುಣ್ ತಾಕಾ ನೋಬೆಲ್ ಶಾಂತಿ ಪುರಸ್ಕಾರ್ ಲಾಭೊಂಕ್ ನಾಂ. ಹ್ಯಾ ಪಾವ್ಟಿಂ ರಸಿಯಾ-ಉಕ್ರೇಯ್ನ್ ಮಧ್ಲೆಂ ಝುಜ್ ಥಾಂಬವ್ನ್ ನೋಬೆಲ್ ಪ್ರಶಸ್ತಿ ಜೊಡಿಜೆಚ್ ಮ್ಹಳ್ಳಿ ತಾಚಿ ಭಾರಿಚ್ ವ್ಹಡ್ ಆಶಾ.

ಬಾಯ್ಡೆನಾಚಿ ರಸಿಯಾ-ವಿರುದ್ಧ್ ಉಕ್ರೇನ್- ತರ್ಫೆ ವಿದೇಶಾಂಗ್ ನೀತ್ ಆಪುಣ್ ಬದ್ಲಿತಾಂ ಮ್ಹಣ್ ತಾಣೆಂ ಚುನಾವಿ ಪ್ರಚಾರಾಂತ್ ಭಾಸಯಿಲ್ಲೆಂ. ಹ್ಯಾ ವರ್ವಿಂ ರಸಿಯಾ ಸಮಲೋಚನ್ ಸಭೆಂತ್ ವಾಂಟೆಲಿ ಜಾತೆಲೆಂ ಕಿತ್ಯಾಕ್ ಅಮೇರಿಕಾ ತಟಸ್ತ್ ಮ್ಹಣ್ ಪುಟಿನಾಕ್ ಭೊಗ್ತೆಲೆಂ.  ಹೆಂ ಧೊರಣ್ ಸಾರ್ಕೆಂಚ್. ತಟಸ್ತ್ ಪಾಡ್ತಿಕ್ ಮಾತ್ರ್ ಸಂಘರ್ಶಾಚ್ಯಾ ದೋನೀ ಪಾಡ್ತಿಂಕ್ ಉಲವ್ಪಾಚ್ಯಾ ಮೇಜಾಕ್ ಹಾಡುಂಕ್ ಸಾಧ್ಯ್. ಹ್ಯಾ ಇರಾದ್ಯಾನ್ ಪದ್ವೆಚೊ ಸೊಫುತ್ ಘೆತಚ್ ಟ್ರಂಪಾನ್ ಪುಟಿನಾಕ್ ಫೊನ್ ಕೆಲ್ಲೆಂ. ಚ್ಯಾರ್ ವರ್ಸಾಂ, ಬಾಯ್ಡೆನಾನ್ ತಾಕಾ ಬಿಲ್ಕುಲ್ ಫೊನ್ ಕರುಂಕ್ ನಾತ್ಲೆಂ. ದೆಕುನ್ ಪುಟಿನಾಕ್ ಟ್ರಂಪಾಚ್ಯೆರ್ ಅಭಿಮಾನ್ ಭೊಗ್ಲೊ.  ಟ್ರಂಪಾನ್ ಸಾವ್ದಿ ಅರೇಬಿಯಾಂತ್ ಉಕ್ರೇನ್ ಝುಜ್ ಅಕೇಯ್ರ್  ಕರ್ಚ್ಯಾ ಎಜೆಂಡಾ ಬಾಬ್ತಿನ್ ಏಕ್ ಜಮಾತ್ ಮಾಡುನ್ ಹಾಡ್ಲಿ. ಹ್ಯೆ ಜಮಾತೆಕ್ ಪುಟಿನಾನ್ ಬೆಸಾಂವ್ ದಿಲೆಂ. ತಾಚೊ ಪಂಗಡ್ ಹಾಜರ್ ಜಾಲೊ. ಹ್ಯೆ ಜಮಾತೆಕ್ ಜೆಲೆನ್ಸ್ಕಿಕ್ ಆಪವ್ಣೆಂ ನಾತ್ಲೆಂ.

ಹೆಂ ಜೆಲೆನ್ಸ್ಕಿಕ್ ರುಚೂಂಕ್ ನಾಂ. ರಸಿಯಾನ್ ಉಕ್ರೇನಾ ವಯ್ರ್ ಆಕ್ರಮಣ್ ಕೆಲಾಂ. ದೆಕುನ್ ಪುಟಿನ್ killer ಆನಿಂ terrorist. ಹೆಂ ಸತ್ ಆಸೊನ್ ಸಯ್ತ್ ಟ್ರಂಪ್ “ರಸಿಯಾಚ್ಯಾ ಪ್ರೊಪಗಾಂಡಾಕ್ ಶಿರ್ಕಾಲಾ” ಮ್ಹಣ್ ಜೆಲೆನ್ಸ್ಕಿನ್ ಠಿಕಾ ಕೆಲಿ. ಹಿ ಠಿಕಾ ಸೊಸುಂಕ್ ಟ್ರಂಪಾಕ್ ನಜೊ ದೆಕುನ್ ತಾಣೆಂ ಜೆಲೆನ್ಸ್ಕಿಕ್ “ಸರ್ವಾಧಿಕಾರಿ” ಮ್ಹಳೆಂ. ಝುಜಾಚಿ ಸುರ್ವಾತ್ ಉಕ್ರೇನಾನ್ ಕೆಲ್ಲಿ ಅಸಲೊ ಫಟ್ಕಿರೊ ಪ್ರಚಾರ್ ಟ್ರಂಪಾನ್ ಕೆಲೊ. ಸಂಯುಕ್ತ್ ರಾಷ್ಟ್ರ್ ಜೆರಾಲ್ ಎಸೆಂಬ್ಲಿಂತ್ ಅಮೇರಿಕಾನ್ ರಸಿಯಾಕ್ ಪಾಟಿಂಬೊ ದಿಲೊ.

ಒವಲ್ ಒಫಿಸಾಚ್ಯಾ ಮೀಟಿಂಗಾ ಪೈಲೆಂಚ್ ಜೆಲೆನ್ಸ್ಕಿಕ್ ಹಲ್ಕ್ ಕರಿಜೆ ಮ್ಹಳ್ಳೊ ಇರಾದೊ ಟ್ರಂಪ್ ಆಡಳ್ತ್ಯಾಕ್ ಆಸ್ಲೊ. ಒವಲ್ ಒಫಿಸಾಚಿ ಸಭಾ ಟಿವಿ ಪತ್ರಕಾರಾಂಕ್ ಉಗ್ಡಾಯಿಲ್ಲಿ ಕಿತ್ಯಾಕ್ ಮ್ಹಳ್ಳೆಂ ಸವಾಲ್ ಏಕ್ ನವಾಲ್. ಹ್ಯಾ ಮೀಟಿಂಗಾಕ್ ಯೇತಾನಾ, ಜೆಲೆನ್ಸ್ಕಿನ್ ಸೂಟ್ ಆನಿ ಟೈ ನೆಸೊನ್ ಯೆಜೆ ಮ್ಹಣ್ ಶರ್ತ್ ದವರ್ಲೆಲೆಂ. ತಶೆಂ ನೆಸಾನಾ ಮ್ಹಣ್ ಜೆಲೆನ್ಸ್ಕಿನ್ ಜಾಪ್ ದಿಲ್ಲಿ. ತಾಚೆಂ ನೆಸಣ್ ಪಳೆವ್ನ್, ದಾರಾ ಕಢೆಚ್ ಟ್ರಂಪಾನ್ ವ್ಯಂಗ್ ಉತ್ರಾಂನಿಂ “all dressed up today” ಮ್ಹಳ್ಳೆಂ. ಹ್ಯಾ ವಿಷಿಂ ವಿವಾದ್ ಉಠಂವ್ಚ್ಯಾ ಇರಾದ್ಯಾನ್  pro-Trump ಪತ್ರಕಾರಾನ್ “ತುಂ ಸೂಟ್ ಕಿತ್ಯಾಕ್ ನೆಸೊಂಕ್ ನಾಂಯ್” ಮ್ಹಣ್ ಸವಾಲ್ ಕೆಲ್ಲೆಂ. ಹೆಂ ಸವಾಲ್ ಹಲ್ಕ್ ಕರ್ಚ್ಯಾ ಇರಾದ್ಯಾನ್ ಮ್ಹಣ್ ಜೆಲೆನ್ಸ್ಕಿಕ್ ಭೊಗ್ಲೆಂ ದೆಕುನ್ ತೊ ಸಭೆಂತ್ “ಝುಜಾರಿ (combative)” ಜಾಲೊ ಮ್ಹಣ್ಯೆತ್.

ಯೆದೊಳ್‌ಚ್ ಅಮೇರಿಕಾನ್ ಉಕ್ರೇನಾಕ್ ದಿಂವ್ಚಿ ಮಜತ್ ಬಂಧ್ ಕೆಲ್ಯಾ. ಗುಪ್ತಿ ಮಾಹೆತ್ ವಾಂಟುನ್ ಘೆಂವ್ಚಿ (intelligence sharing) ನೀತ್ ಬದ್ಲಿಲ್ಯಾ. ಹ್ಯಾ ವರ್ವಿಂ ಜೆಲೆನ್ಸ್ಕಿಕ್ ಅಮೆರಿಕಾಚಿ ದುಸ್ಮಾನ್ಕಾಯ್ ಭಾರಿಚ್ ಮಾರಗ್ ಪಡ್ತಾ ಮ್ಹಣ್ ಘೊಮ್ಲಾಂ. ಒವಲ್ ಒಫಿಸಾಂತ್ ತಾಣೆಂ ಸತ್ ಸಾಂಗ್ಲೆಂ, ದೋಗ್ ಫಟ್ಕಿರ‍್ಯಾ ಮನ್ಶಾಂ ಮುಕಾರ್ ತಕ್ಲಿ ಭಾಗವ್ನಾ. ತಾಂಚ್ಯೆ ಕಡೆಂ ತರ್ಕ್ ಕೆಲೆಂ. ಅಶೆಂ ತೊ ಉಕ್ರೇನಿ ಲೋಕಾಚೊ ತಶೆಂಚ್ ಟ್ರಂಪಾಚ್ಯಾ ಸಮರ್ಥಕಾಂಕ್  ಸೊಡ್ನ್ ಹೆರ್ ಸರ್ವಾಂಚೊ ಹೀರೊ ಜಾಲೊ. ಫಾಯ್ದೊ ಕಿತೆಂ? ಟ್ರಂಪ್ ಆನಿ ತಾಚ್ಯೆಂ ಆಡಳ್ತೆಂ “ಸರ್ಕಾರ್ ಬದ್ಲಿ (regime change)” ಫಿತೂರಿ ರಚುನ್ ಜೆಲೆನ್ಸ್ಕಿಕ್ ಪದ್ವೆರ್ ಥಾವ್ನ್ ಕಾಡ್ಚ್ಯೆಂ ಪ್ರೊಜೆಕ್ಟ್ ವೆಗಿಂಚ್ ಮುಗ್ದಿತೆಲೆಂ. ಜೆಲೆನ್ಸ್ಕಿನ್ “ಆತ್ಮ ಸಮರ್ಪಣ್ ಪತ್ರ್ (surrender letter) ದಿಲಾಂ ತೆಂ “ಮಾಫಿ ಮಾಗ್ಣಾಪ್” ನಹಿಂ ಮ್ಹಣ್ ಟ್ರಂಪ್ ಆಡಳ್ತೆಂ ಪ್ರಚಾರ್ ಕರ್ತೆಲೆಂ.

ಜೆಲೆನ್ಸ್ಕಿಚ್ಯೆ ದೀಸ್ ಬರ್ಲ್ಯಾತ್!

■ ಫಿಲಿಫ್ ಮುದಾರ್ಥ್