ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಅನುದಾನಾಕ್, ಮಂಗ್ಳುರ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾನ್ ಲೇಕಕಾಂ ಥಾವ್ನ್ ಹಾತ್ಬರ್ಪಾಂ ಧಾಡುಂಕ್ ಉಲೊ ದಿಲಾ. ಮಾರ್ಚ್ 15, 16 ತಾರಿಕೆರ್ ಮಂಗ್ಳುರ್ಚ್ಯಾ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಚಲ್ಲೆಲ್ಯಾ ರವೀಂದ್ರ – ಮನೋಹರ್ ದರ್ಶನ್ ಕಾರ್ಯಕ್ರಮಾಂತ್ ಹ್ಯಾ ವಿಶ್ಯಾಂತ್ ಮಾಹೆತ್ ಆಟಾಪ್ಚಿ ಪುಸ್ತಿಕಾ ವಿಶ್ವ ಕೊಂಕ್ಣಿ ಕೇಂದ್ರಾಚೊ ಅಧ್ಯಕ್ಷ್ ಸಿ.ಎ. ನಂದಗೋಪಾಲ ಶೆಣೈ ಹಾಣಿ ಉಗ್ತಾಯ್ಲಿ. ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಯೆವ್ಜಣೆಚೊ ಪ್ರದಾನ್ ಸಂಪಾದಕ್ ಎಚ್ಚೆಮ್ ಪೆರ್ನಾಲ್ ಹಾಣಿ ಪುಸ್ತಕ್ ಅನುದಾನಾವಿಶಿಂ ಸವಿಸ್ತಾರ್ ಮಾಹೆತ್ ದಿಲಿ.
ಕವಿತಾ, ಮಟ್ವಿ ಕಾಣಿ, ಪ್ರಬಂಧ್, ಲಲಿತ್ ಪ್ರಬಂಧ್, ಕಾದಂಬರಿ, ನಾಟಕ್, ಬಾಳ್ ಸಾಹಿತ್ಯ್ – ಅಶೆಂ ಖಂಯ್ಚ್ಯಾಯ್ ಪ್ರಕಾರಾಚೆಂ ಸಾಹಿತ್ಯ್ ಬುಕಾರುಪಾರ್ ಪರ್ಗಟ್ ಕರುಂಕ್ ಎಂಡಿವಿಕೆ ಉಪಕ್ರಮಾಕಾಲ್ ವಿಶ್ವ ಕೊಂಕ್ಣಿ ಕೇಂದ್ರ್, ಎಕಾ ಬುಕಾಕ್ ರುಪಯ್ ಚಾಳಿಸ್ ಹಜಾರ್ ಪರ್ಯಾಂತ್ ಅನುದಾನ್ ದಿತಾ ಆಸುನ್ ಬೂಕ್ ನಾಗರಿ, ಕನ್ನಡ ವಾ ರೊಮಿ ಲಿಪಿಯೆಂತ್ ಆಸುಂಯೆತಾ.
ಛಾಪ್ಯಾಕ್ ತಯಾರ್ ಆಸ್ಚಿ ಮುದ್ರಿತ್ ಹಾತ್ ಪ್ರತಿ ಆನಿ ತಾಚಿ ಪಿಡಿಎಫ್ ಪ್ರತಿ – ಸಂಪಾದಕ್, ಎಂಡಿವಿಕೆ , ರಾಹುಲ್ ಎಡ್ವಟೈಸರ್ಸ್, 405, ಕುನಿಲ್ ಕೊಂಪ್ಲೆಕ್ಸ್, ದುಸ್ರಿ ಮಾಳಯ್, ಬೆಂದೂರ್ ವೆಲ್, ಮಂಗ್ಳುರ್ – 575 002 ಹಾಂಗಾಸರ್ ಪಾವಿತ್ ಕರುಂಯೆತಾ ವಾ ತಪ್ಪಾಲಾರ್ ಧಾಡುಂಯೆತಾ. ಪಿಡಿಎಫ್ ಪ್ರತಿ visionkonkani@gmail.com ಹ್ಯಾ ಈಮೇಯ್ಲಾಕ್ ಧಾಡುನ್ ದೀಜಾಯ್.
ಪುಸ್ತಕ್ ಸ್ವಂತ್ ಬರಯಿಲ್ಲೆಂ ಜಾವ್ನಾಸೊನ್, ಎದೊಳ್ ಬುಕಾರುಪಾರ್ ಖಂಯ್ಸರೀ ಫಾಯ್ಸ್ ಜಾಲ್ಲೆಂ ಆಸುಂನಾಯೆ. ಭುರ್ಗ್ಯಾಂಚೆಂ ಸಾಹಿತ್ಯ್ ತರ್ ಉಣ್ಯಾರ್ ಉಣೆ 49 ಪಾನಾಂಚೆಂ ಸಾಹಿತ್ಯ್, ಹೆರ್ ಪ್ರಕಾರ್ ತರ್ ಉಣ್ಯಾರ್ ಉಣೆಂ 80 ಪಾನಾಂಚೆಂ ಸಾಹಿತ್ಯ್ ಆಸುಂಕ್ಚ್ ಜಾಯ್. ತಜ್ಞ್ ಸಾಹಿತಿಂಚಿ ಪರೀಕ್ಷಕ್ ಮಂಡಳಿ ಪುಸ್ತಕ್ ಅನುದಾನಾಕ್ ಯೋಗ್ಯ್ ಮ್ಹಣ್ ಠರಾಯ್ತಚ್, ಲೇಖಕಾನ್ ಎಂಡಿವಿಕೆ, ವಿಶ್ವಕೊಂಕಣಿ ಲಾಗಿಂ ಖರಾರ್ ಕರಿಜೆ ಪಡ್ತಲೊ. ಪುಸ್ತಕಾಕ್ ಐಎಸ್ಬಿಎನ್ ನಂಬರ್ ಘೆಂವ್ಚೆಂ ಆನಿ ಐಎಸ್ಬಿಎನ್ ರೆಗ್ರಾಂ ಪ್ರಕಾರ್ ಪುಸ್ತಕ್ ಛಾಪ್ಚೆಂ ಲೇಖಕಾಚಿ ಜವಾಬ್ದಾರಿ ಜಾವ್ನಾಸ್ತೆಲಿ. ರುಪಯ್ 40 ಲಾಕಾಂಚ್ಯಾ ಹ್ಯಾ ಯೆವ್ಜಣೆಖಾಲ್ ಎದೊಳ್ಚ್ 21 ಪುಸ್ತಕಾಂ ಪರ್ಗಟ್ ಜಾಲ್ಲಿಂ ಆಸುನ್ ಹಿ ಯೆವ್ಜಣ್ 100 ಬೂಕ್ ಪರ್ಗಟ್ ಜಾತಾಸರ್ ಚಾಲು ಆಸ್ತೆಲಿ.
ಚಡಿತ್ ವಿವರಾಕ್ ಮೈಕಲ್ ಡಿಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಅನುದಾನ್ ಸಮಿತಿಚೊ ಪ್ರಧಾನ್ ಸಂಪಾದಕ್ ಎಚ್ಚೆಮ್, ಪೆರ್ನಾಲ್ ಹಾಂಚೊ 9449770629 ಹ್ಯಾ ನಂಬ್ರಾಚೆರ್ ಸಂಪರ್ಕ್ ಜೊಡುಂಯೆತಾ.