ಎಪ್ರಿಲ್ 3 ವೆರ್; ಸಾಂತಿಪಣಾಚ್ಯಾ ವಾಟೆರ್ ವೆಗಾನ್ ಚಮ್ಕೊನ್ ಆಸ್ಚೊ ಆಮ್ಚೊ ಪಾದ್ರ್ಯಾಬ್ ಪಾ। ಅಲ್ಪ್ರೆಡ್ ರೋಚ್ ಹಾಂಚ್ಯಾ ಜಲ್ಮಾಶತಾಬ್ದಿ ವರ್ಸಾಚೊ ಸಂಭ್ರಮ್ ಅಕೇರ್ ಜಾತಾ. 1924 ವ್ಯಾ ವರ್ಸಾ, ಆತಾಂಚ್ಯಾ ಉಡುಪಿ ದಿಯೆಸೆಜಿಚ್ಯಾ ಬಾರ್ಕೂರ್ ಪಿರ್ಗಜೆಚ್ಯಾ ಪಾಂಡೇಶ್ವರ್ ಕುದ್ರ್ಯಾಂತ್, ಪೆದ್ರು ಜುವಾಂವ್ – ಇಸಾಕ್ ರೋಚ್ ಆನಿ ಕಾರ್ಮಿಣ್ ಮೊಂತೆರ್ ಜೊಡ್ಯಾಕ್ ಜಲ್ಮಾಲ್ಲೊ.
ಆಪ್ಲ್ಯಾ ವೀಸ್ ವರ್ಸಾಂಚ್ಯಾ ಪ್ರಾಯೆರ್ 1944 ವ್ಯಾ ವರ್ಸಾ, ಪೆದ್ರು ಜುವಾಂವ್ ಕಾಪುಚಿನ್ ಮೆಳಾಕ್ ಭರ್ತಿ ಜಾಲೊ ಆನಿ ತಾಣೆ ಆಲ್ಪ್ರೆಡ್ ಮ್ಹಳ್ಳೆಂ ನಾಂವ್ ಘೆತ್ಲೆಂ. ದೇವ್‌ಶಾಸ್ತ್ರ್ ಆನಿ ತರ್ಕ್‌ಶಾಸ್ತ್ರಾಂತ್ ಉಂಚ್ಲೆಂ ಶಿಕಪ್ ಜೊಡ್ತಕೂಚ್, 1951 ವ್ಯಾ ವರ್ಸಾ ಎಪ್ರಿಲ್ 11 ವೆರ್ ತಾಣಿ ಯಾಜಕೀ ದೀಕ್ಷಾ ಜೊಡ್ಲಿ. ಆನಿ ಹಾಂಗಾಥಾವ್ನ್ ಸುರ್ವಾತ್ಲೆಂ ತಾಂಚೆಂ ಸಾಂತಿಪಣಾಚೆಂ ಜಿವಿತ್.
ಮೊಂತೆ ಮಾರಿಯಾನೊ ನೊವಿಶಿಯೆಟ್, ಬ್ರಹ್ಮಾವರ್, ಬಿಣಗಾ, ಲೋವರ್ ಕಾಸರಕೋಡ್ ಅಶೆಂ ಗೆಲ್ಲೆ ಗೆಲ್ಲೆ ಕಡೆ ತಾಣಿ ಮನ್ಶ್ಯಾಂಕ್ ಆಪಡ್ಲೆಂ ಆನಿ ಜೆಜುಚೊ ಮೋಗ್ ತೆ ವಾಂಟಿತ್ ಗೆಲೆ. 1994 ವ್ಯಾ ವರ್ಸಾ ನಿವೃತ್ತ್ ಜಾಲ್ಯಾ ಉಪ್ರಾಂತ್, ನಾಭಲಾಯ್ಕೆಂತೀ ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಕ್ ಸಮರ್ಪಿಲ್ಲ್ಯಾ ದೇವ್ತೆಂಪ್ಲಾಂತ್ ತಾಣಿ ದೆವಾಚೆಂ ಉತರ್ ಆನಿ ಸೊಮ್ಯಾ ಜೆಜು ಕ್ರಿಸ್ತಾಚೊ ಮೋಗ್ ವಾಂಟ್ಚೆಂ ಮಿಸಾಂವ್ ಥಾಂಬಯ್ಲೆಂ ನಾ – 1996 ದಸೆಂಬರ್ 31 ವೆರ್ ಸಾಂತಿಪಣಾಚೆಂ ಸಂಸಾರಿ ಪಯ್ಣ್ ಸಂಪವ್ನ್; ಸರ್ಗಾರಾಜಾಂತ್ ಆರಂಬ್ ಕರ್ತಾ ಮೆರೆನ್.
ಸಂಭ್ರಮ್ ತಿದೊಡೊ, ಸಂದೇಶ್ ಏಕ್ : ಸಂಪೂರ್ಣ್‌ಕಾಯೆಚೊ! – ಅ|ಮಾ|ದೊ| ಜೆರಾಲ್ಡ್ ಐಸಾಕ್ ಲೋಬೊ.
2023 ಅಗೋಸ್ತ್ 15 ವೆರ್, ಆಮ್ಚ್ಯಾ ಪಾದ್ರ್ಯಾಬಾಕ್ ದೆವಾಚೊ ಸೆವಕ್ ಮ್ಹಣ್ ಅಧಿಕೃತ್ ತರಾನ್ ಘೋಷಿತ್ ಕೆಲ್ಲಿ ಗಜಾಲ್, ಆದ್ಲ್ಯಾ ವರ್ಸಾ, 2024 ವೆರ್ ಸುರು ಜಾವ್ನ್ ಹ್ಯಾ ವರ್ಸಾ 2025 ವೆರ್ ಅಕೇರ್ ಜಾಂವ್ಚ್ಯಾ ತಾಂಚ್ಯಾ ಜಲ್ಮಾಶತಾಬ್ದಿ ವರ್ಸಾ ಸಂಭ್ರಮಾಚೇರ್ ಭಾಂಗಾರಾಚೊ ವೋಪ್ ಕಶಿ ಜಾಲಿ. ಅಸುಪ್ಸಾಂವ್ ಮಾಯೆಚ್ಯಾ ಫೆಸ್ತಾ ದಿಸಾ, 2023 ವ್ಯಾ ವರ್ಸಾ ಆಮ್ಚ್ಯಾ ಪಾದ್ರ್ಯಾಬಾಕ್ ಉಡುಪಿ ದಿಯೆಸೆಜಿಚೊ ಧರ್ಮಾಧ್ಯಕ್ಷ್ ಅ। ಮಾ। ದೊ। ಜೆರಾಲ್ಡ್ ಐಸಾಕ್ ಲೋಬೊ ಹಾಣಿ ದೆವಾಚೊ ಸೆವಕ್ ಮ್ಹಣ್ ಅಧಿಕೃತ್ ಜಾವ್ನ್ ಘೋಷಿತ್ ಕೆಲೆಂ. ಆನಿ ಹೆ ಮಾರಿಫಾತ್ ಲಾಂಬ್ ತೆಂಪಾಥಾವ್ನ್ ಆಮ್ಚ್ಯಾ ಪಾದ್ರಾಬಾಚ್ಯಾ ಅಭಿಮಾನಿ ಆನಿ ಭಕ್ತಾಂನಿ ರಾಕೊನ್ ಆಸ್‌ಲ್ಲ್ಯಾ ಸಾಂತಿಪಣಾಚ್ಯಾ ಪ್ರಕ್ರಿಯೆಕ್ ಹುರುಪ್ ಆಯ್ಲೊ.
ಪರಿಣಾಮ್ ಜಾವ್ನ್ 2023 ಮಾಯ್ 23 ವೆರ್ ಬ್ರಹ್ಮಾವರಾಂತ್ ಆಲ್ಫ್ರೆಡ್ ರೋಚ್ ಟ್ರಸ್ಟ್ ಉಭೆಂ ಜಾಲೆಂ. ಖುದ್ ಫಾ। ಆಲ್ಫ್ರೆಡ್ ರೋಚಾಥಾವ್ನ್ ಪ್ರೇರಣ್ ಆನಿ ಮಾರ್ಗದರ್ಶನ್ ಜೊಡುನ್, ಪ್ರಸ್ತುತ್ ಸೊಮ್ಯಾಚಾ ಶೆತಾಂತ್ ಕಾಪುಚಿನ್ ಯಾಜಕ್ ಜಾವ್ನ್ ಸೆವಾ ದೀವ್ನ್ ಆಸ್ಚೊ – ಮಾ। ಬಾ। ಸಾಂತಾ ಲೊಪೆಜ್ ಹ್ಯಾ ಟ್ರಸ್ಟಾಚೊ ಅಧ್ಯಕ್ಶ್ ಜಾಲೊ. ರೋಹನ್ ಲೋಬೊ ಕಾರ್ಯದರ್ಶಿ, ಲೀನಾ ಪ್ರಿಯಾ ಪುರ್ಟಾದೊ ಖಜಾನಿ ಸಾಂಗಾತಾ ಜೋನ್ ಫೆರ್ನಾಂಡಿಸ್, ಅಂತೊನಿ ಪ್ರಕಾಶ್ ಡಿ ಸೊಜಾ, ಮೈಕಲ್ ಪುರ್ಟಾದೊ ಆನಿ ಶ್ರೀಮತಿ ಮಾರ್ಗರೆತ್ ಸಾಂದೆ ಜಾವ್ನ್ ಆಮ್ಚ್ಯಾ ಪಾದ್ರ್ಯಾಬಾಕ್ ವೆಗಿಂಚ್ ಆಲ್ತಾರಿಚೊ ಮಾನ್ ಜೊಡುನ್ ದಿಂವ್ಚ್ಯಾ ಮಿಸಾಂವಾಂತ್ ಮಾ। ಬಾ। ಲೊಪೆಜಾ ಸಾಂಗಾತಾ ಖಳ್ಮಿತ್ ನಾಸ್ತಾನಾ ವಾವುರ್ನ್ ಆಸಾತ್.
2023 ಸಪ್ತೆಂಬರ್ 30 ವೆರ್, ಆಮ್ಚೊ ಪಾದ್ರ್ಯಾಬ್ ಜಲ್ಮೊನ್ ವ್ಹಡ್ ಜಾಲ್ಲ್ಯಾ ಬಾರ್ಕೂರ್ ಕುದ್ರು ವಾಡ್ಯಾಗಾರಾಂನಿ ಟ್ರಸ್ಟಾಕ್ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಾಂತಿಪಣಾಣೆಂ ಮಿಸಾಂವ್ ಮುಕಾರುನ್ ವರುಂಕ್ ಆದಾರಿ ಜಾಂವ್ಚೆ ದಿಶೆನ್ ಜಾಗೊ ದಾನ್ ದಿಲೊ ಆನಿ ಹೊ ಜಾಗೊ ಟ್ರಸ್ಟಾಚ್ಯಾ ನಾಂವಾರ್ ನೋಂದಾಯಿತ್ ಜಾವ್ನ್ 2024 ಜನೆರ್ 21 ವೆರ್ ಜಾಗ್ಯಾಚಿ ಆರ್.ಟಿ.ಸಿ. ಸಮೇತ್ ಹೆರ್ ಸರ್ಕಾರಿ ದಾಕ್ಲೆ ಟ್ರಸ್ಟಾಚ್ಯಾ ನಾಂವಾರ್ ಜಾಲೆ. ಪ್ರಸ್ತುತ್ ಟ್ರಸ್ಟಾಲಾಗಿಂ ಇನ್‌ಕಂ ಟ್ಯಾಕ್ಸ್ ವಿನಾಯ್ತೆಚೆಂ 10 ಎ ಫೊರ್ಮ್ ಆಸುನ್, ಆಮ್ಚ್ಯಾ ಪಾದ್ರ್ಯಾಬಾಕ್ ಅಲ್ತಾರಿಚೊ ಮಾನ್ ಮೆಳ್ಚೆಂ ದಿಶೆನ್ ವಾವುರ್ಚ್ಯಾ ಮಿಸಾಂವ್ ವಾವ್ರಾಕ್ ದಾನ್ ದಿತೆಲ್ಯಾಂಕ್ ಇನ್‌ಕಂ ಟ್ಯಾಕ್ಸ್ ರಿಯಾಯ್ತ್ ಮೆಳ್ತಾ. ಆಮ್ಚೊ ಪಾದ್ರ್ಯಾಬ್ ದೆವಾಚೊ ಸೆವಕ್ ಆಲ್ಫ್ರೆಡ್ ರೋಚ್ ಸಾಂತಿಪಣಾಚ್ಯಾ ಮಿಸಾಂವಾಂತ್ ಮೆತೆರ್ ಜಾಂವ್ಕ್ ಆಶೆತೆಲ್ಯಾಂನಿ ಮಾ। ಬಾ। ಸಾಂತಾ ಲೊಪೆಜ್ ಹಾಂಚೊ ಸಂಪರ್ಕ್ ಕರ್ಯೆತ್. ಚಡಿತ್ ವಿವರ್ : https://www.alfredrochecap.com/ ಹಾಂಗಾಥಾವ್ನ್ ಜೊಡುನ್ ಘೆವ್ಯೆತ್.
2024 ಫೆಬ್ರೆರ್ 5 ವೆರ್ ಸಾಂತಿಪಣಾಚ್ಯಾ ಪ್ರಕ್ರಿಯೆಕ್ ಚಡಿತ್ ಬಳ್ ಆನಿ ಪ್ರೇರಣ್ ಮೆಳ್ಚೆ ದಿಶೆನ್ ಟ್ರಸ್ಟಾನ್ ಬಾರ್ಕೂರ್ ಫಿರ್ಗಜೆಚ್ಯಾ ಕುದ್ರು ವಾಡ್ಯಾಂತ್ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಆಲ್ಪ್ರೆಡ್ ರೋಚ್ ಸ್ಮಾರಕಾಕ್ ಬುನ್ಯಾದಿ ಫಾತೊರ್ ದವರ್ಚೆಂ ಕಾಮ್ ಕೆಲೆಂ. ಆನಿ ಮೇಯಾಚ್ಯೆ 26 ವೆರ್ ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾಸವೆಂ ಬಾರ್ಕೂರ್ ಪಿರ್ಗಜೆಚೊ ವಿಗಾರ್ ಮಾ। ಬಾ। ರೊನಾಲ್ಡ್ ಮಿರಾಂದಾ ಹಾಣಿ ಆಶೀರ್ವಚನ್ ಕರುನ್ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಫಾ। ಆಲ್ಫ್ರೆಡ್ ರೋಚ್ ಜಲ್ಮಾ ಶತಾಬ್ದಿ ಸ್ಮಾರಕ್ ಉಗ್ತಾಯ್ಲೆಂ.
ಮೂಡಾಡುಕುದ್ರುಂತ್ ದೆವಾಚೊ ಸೆವಕ್ ಆಲ್ಫ್ರೆಡ್ ರೋಚ್ ಜಲ್ಮಾ ಶತಾಬ್ದಿ ಸ್ಮಾರಕ್ ಉಗ್ತಾವಣ್
ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಾಂತಿಪಣಾಚ್ಯಾ ಪ್ರಕ್ರಿಯೆ ಪಾಟ್ಲ್ಯಾನ್ ಎಕೀನ್ಪಣಿ ವಾವುರ್ಚ್ಯಾ ಆಲ್ಪ್ರೆಡ್ ರೋಚ್ ಟ್ರಸ್ಟಾನ್ ನಿರಂತರ್ ಮಯ್ನ್ಯಾಚೆಂ ಭಕ್ತಿಪಣ್ ಆರಂಭ್ ಕೆಲಾಂ ಆಸುನ್, ಚಡ್ ಕರುನ್ ಮಯ್ನ್ಯಾಚ್ಯಾ ಅಕೇರಿಕ್, ತೀಸ್ ತಾರಿಕೆಚ್ಯಾ ಆಸ್‌ಪಾಸ್ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಆಲ್ಪ್ರೆಡ್ ರೋಚಾಚ್ಯಾ ಸಾಂತಿಪಣಾಚ್ಯಾ ಇರಾದ್ಯಾ ಪಾಸೊತ್ ಮಿಸಾಚೆಂ ಬಲಿದಾನ್ ಆನಿ ಸಮಾದಿಲಾಗಿಂ ವಿಶೇಸ್ ಮಾಗ್ಣೆಂ ಆನಿ ನೊವೆನ್ ಚಲ್ತಾ. ಮಿಸಾಚ್ಯಾ ಬಲಿದಾನಾ ವೆಳಾರ್ ಆನಿ ಮಾಗ್ಣ್ಯಾವಿದಿಂತ್ ಫಾ। ಆಲ್ಫ್ರೆಡ್ ರೋಚ್ ಜಿವಿತ್ ಆನಿ ಮಿಸಾಂವಾಂ ವಿಶ್ಯಾಂತ್ ಮಣಿಯಾರಿ ವಿಶೇಸ್ ನಿಯಾಳ್ ದಿತಾತ್. ಹ್ಯಾ ಮಯ್ನ್ಯಾಚ್ಯಾ ಭಕ್ತಿಪಣಾ ಮಾರಿಫಾತ್ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಾಂತಿಪಣಾಚ್ಯಾ ಜಿಣ್ಯೆಥಾವ್ನ್ ಪ್ರೇರಣಾ ಆನಿ ಬೆಸಾಂವಾಂ ಜೊಡುಂಕ್ ಜಾಯ್ತೊ ಲೋಕ್ ಬ್ರಹ್ಮಾವರ್ ಪಾವ್ತಾತ್. ವೆಗಿಂಚ್ ದೆವಾಚೊ ಸೆವಕ್ ಫಾ। ರೋಚಾಚಿ ಸಮಾಧಿ ಭಾವಾರ್ಥ್ಯಾಂಕ್ ಏಕ್ ಯಾತ್ರಿಕ್ ಥಳ್ ಜಾವ್ನ್ ಬದಲ್ಚಿಂ ಖುಣಾಂ ದಿಸೊಂಕ್ ಲಾಗ್ಲ್ಯಾಂತ್.
ಹರ್ ವರ್ಸಾಪರಿಂ ಆದ್ಲ್ಯಾ ವರ್ಸಾಯ್ 2024 ದಸೆಂಬರ್ 22 ವೆರ್ ದೆವಾಚೊ ಸೆವಕ್ ಆಲ್ಪ್ರೆಡ್ ರೋಚ್ ಹಾಂಚ್ಯಾ ಸರ್ಗಿಂ ಪಯ್ಣಾಚೊ ಉಡಾಸ್ ಕಾಡುನ್, ಕಾಪುಚಿನಾಂಚೆಂ ಪವಿತ್ರ್ ತ್ರಿಂದಾದ್ ಪ್ರಾಂತ್, ಕರ್ನಾಟಕ ಹಾಚೊ ವಿಕಾರ್ ಪ್ರೊವಿನ್ಶಿಯಲ್ ಮಾ। ಬಾ। ಪಾವ್ಲ್ ಮೆಲ್ವಿನ್ ಡಿ ಸೊಜಾ ಹಾಣಿ, ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಚ್ಯಾ ದೇವ್ತೆಂಪ್ಲಾಂತ್ ಸಂಭ್ರಮಿಕ್ ಪವಿತ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಆಪ್ಲ್ಯಾ ಶೆರ್ಮಾಂವಾಂತ್ ತಾಣಿ ಆಮ್ಚೊ ಪಾದ್ರ್ಯಾಬ್ ಆಲ್ಪ್ರೆಡ್ ರೋಚ್ ಹಾಂಚ್ಯಾ ಶೆಗುಣಾಂಚೊಂ ಉಲ್ಲೇಕ್ ಕರುನ್, ಕಶೆಂ ಅಮ್ಚೊ ಪಾದ್ರ್ಯಾಬ್ ಪಿಡೆಸ್ತ್ ಆನಿ ಕಶ್ಟಾಂತೆಲ್ಯಾಂಚಿಂ ವಿಶೇಸ್ ಕಾಳ್ಜಿ ಘೆತಾಲೊ ಆನಿ ಪಿಡೆ ಶಿಡೆಂತ್ ಕಶ್ಟಾತೆಲ್ಯಾಂಕ್ ಬರಿ ಚಿಕಿತ್ಸಾ ಮೆಳಾಜಾಯ್ ಮ್ಹಳ್ಳ್ಯಾ ಅತ್ರೆಗಾನ್ ತಾಂಕಾ ಆಸ್ಪತ್ರೆಂಕ್ ಖುದ್ ಘೆವ್ನ್ ವೆತಾಲೊ ಮ್ಹಳ್ಳೆ ವಿಶ್ಯಾಂತ್ ದೃಶ್ಟಾಂತ್ ದೀವ್ನ್ ಸಾಂಗ್ಲೆಂ. ಮಿಸಾ ಉಪ್ರಾಂತ್ ಫಾ। ರೋಚ್ ಸಮಾಧಿಲಾಗಿಂ ವಿಶೇಸ್ ಮಾಗ್ಣೆಂ ಚಲ್ಲೆಂ.
ನವ್ಯಾನ್ ಸುರು ಜಾಲ್ಲ್ಯಾ 2025 ವ್ಯಾ ವರ್ಸಾ ಜನೆರ್ ಮಯ್ನ್ಯಾಂತ್, 30 ತಾರಿಕೆರ್ ಮಾ। ಬಾ। ವಿನ್ಸೆಂಟ್ ಪುರ್ಟಾದೊ ಹಾಣಿ ಆನಿ ಪೆಭ್ರೆರ್ 27 ತಾರಿಕೆರ್ ಮಾ। ಬಾ। ಲೊರೆನ್ಸ್ ವಿಲ್ಸನ್ ರೊಡ್ರಿಗಸ್ ಹಾಣಿ ಮಿಸಾಚಿಂ ಬಲಿದಾನಾಂ ಬೆಟವ್ನ್ ದೆವಾಚೊ ಸೆವಕ್ ಆಮ್ಚೊ ಪಾದ್ರ್ಯಾಬ್ ಆಲ್ಪ್ರೆಡ್ ರೋಚ್ ಹಾಂಚ್ಯಾ ಜಿವಿತಾಚೆರ್ ಪ್ರೇರಣಾದಾಯಿ ಪ್ರಸಂಗ್ ದಿಲ್ಯಾತ್ ಆನಿ ಸಾಂತಿಪಣಾಚ್ಯಾ ಪ್ರಕ್ರಿಯೆಚ್ಯಾ ಮಿಸಾಂವಾಂಕ್ ಬಳ್ ಮೆಳೊಂಕ್ ನೊವೆನಾಂಚಿಂ ಮಾಗ್ಣಿಂ ಭೆಟಯ್ಲ್ಯಾಂತ್. ಟ್ರಸ್ಟಾಚೆಂ ಹೆಂ ಉಪಕ್ರಮ್ ಮುಕ್ಲ್ಯಾ ದಿಸಾಂನಿ ಚಾಲೂಚ್ ಆಸ್ತಲೆಂ. “ದುಬ್ಳ್ಯಾ ಧಾಕ್ಟ್ಯಾಂಚೊಂ ವಿಶೇಸ್ ಹುಸ್ಕೊ ಆಸ್‌ಲ್ಲೊ ಆಮ್ಚೊ ಪಾದ್ರ್ಯಾಬ್ ಘರಾಂಕ್ ಭೆಟ್ ದಿತಾನಾ ಲೊಕಾಚಿ ಭಲಾಯ್ಕಿ ಆನಿ ಭುರ್ಗ್ಯಾಂಚ್ಯಾ ಶಿಕ್ಪಾ ವಿಶ್ಯಾಂತ್ ಸದಾಂಚ್ ಗುಮಾನ್ ದಿತಾಲೊ ಆನಿ ಮಾಹೆತ್ ಆರಾವ್ನ್ ಘೆವ್ನ್ ಕುಮಕ್ ಕರ್ತಾಲೊ” ಮ್ಹಣ್ ಜನೆರ್ ಮಯ್ನ್ಯಾಚ್ಯಾ ನಿಯಾಳಾಂತ್ ಮಾ। ಬಾ। ವಿನ್ಸೆಂಟಾನ್ ಮ್ಹಳ್ಳಿ ಗಜಾಲ್ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಾಂತಿಪಣಾಚ್ಯಾ ಜಿಣ್ಯೆಚಿ ಗೊವಾಯ್ ದಿತಾ.
ಫಾ| ರೋಚಾಪರಿಂ ಜಿವಿತಾಂತ್ ಕ್ರೀಸ್ತಾಚೊ ಉಜ್ವಾಡ್ ಜಾವ್ಯಾಂ – ಮಾ| ಬಾ| ಸಂತಾ ಲೊಪೆಸ್
ಮಯ್ನ್ಯಾಚಾ ಭಕ್ತಿಪಣಾ ವೆಳಾರ್ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಮಾದಿ ಥಳಾರ್ ಮಾಗ್ಣಿಂ ಆನಿ ನಿಯಾಳ್ ಚಲ್ತಾತ್ ಆನಿ ಜಾಯ್ತೆ ಭಕ್ತಿಕ್ ಹಾಚೆಥಾವ್ನ್ ಆತ್ಮಿಕ್ ಫಾಯ್ದೊ ಜೊಡುನ್ ಘೆಂವ್ಚೆಂ ಚಾಲು ಆಸಾ. “ಟ್ರಸ್ಟಾಚ್ಯಾ ಎಕೀನ್‌ಪಣಾಚ್ಯಾ ವಾವ್ರಾಂತ್ ಆನಿ ದೆವಾಚೊ ಸೆವಕ್ ಅಲ್ಪ್ರೆಡ್ ರೋಚಾಕ್ ವೆಗಿಂಚ್ ಅಲ್ತಾರಿಚೊ ಮಾನ್ ಮೆಳಾಜಾಯ್ ಮ್ಹಣ್ಚ್ಯಾ ಮಿಸಾಂವಾಂ ಪಾಟ್ಲ್ಯಾನ್ ಜಾಯ್ತೆ ಜಣ್ ವಾವುರ್ನ್ ಆಸಾತ್. ಹಾಂಚೆ ಪಯ್ಕಿ ಆಮ್ಚ್ಯಾ ಪಾದ್ರ್ಯಾಬಾ ಸಾಂಗಾತಾ ಆಪ್ಲೆ ದೀಸ್ ಖರ್ಚಿಲ್ಲೊ, ತಾಚೆಥಾವ್ನ್ ಉರ್ಬಾ ಅನಿ ಮಾರ್ಗದರ್ಶನ್ ಜೊಡ್‌ಲ್ಲೊ ಪ್ರಸ್ತುತ್ ಅಮೆರಿಕಾಚ್ಯಾ ಶಿಕಾಗೊಂತ್ ಜಿಯೊನ್ ಆಸ್ಚೊ ಮುಳಾನ್ ಬಾರ್ಕೂರ್‌ಗಾರ್ ಜೇಮ್ಸ್ ಫೆರ್ನಾಂಡಿಸ್ ಹಾಚೊ ಮೊಟೊ ವಾವ್ರ್ ಆಸಾ” ಮ್ಹಣ್ತಾ ಉಪ್ಕಾರಿ ಮನಾನ್ ಟ್ರಸ್ಟಾಚೊ ಅಧ್ಯಕ್ಷ್ ಮಾ। ಬಾ। ಸಾಂತಾ ಲೊಪೆಜ್.
ಬ್ರೇಸ್ತಾರಾ ಎಪ್ರಿಲ್ ಮಯ್ನ್ಯಾಚೆ 3 ತಾರಿಕೆರ್, ಅಮ್ಚೊ ಪಾದ್ರ್ಯಾಬ್ ದೆವಾಚೊ ಸೆವಕ್ ಆಲ್ಫ್ರೆಡ್ ರೋಚ್ ಹಾಂಚ್ಯಾ ಜಲ್ಮಾಶತಾಬ್ದಿ ವರ್ಸಾಚೆಂ ಆಚರಣ್ ಸಂಪ್ಚ್ಯಾ ವಗ್ತಾ, ತಾಂಚಿ ಸಮಾದಿ ಆಸ್ಚ್ಯಾ ಬ್ರಹ್ಮಾವರ್ ಭಾಗೆವೊಂತ್ ಕುಟ್ಮಾಚ್ಯಾ ಇಗರ್ಜೆಂತ್ ಸಕಾಳಿಂಚ್ಯಾ ಇಕ್ರಾ ವೊರಾರ್ ವಿಶೇಸ್ ಮಿಸಾಚೆಂ ಬಲಿದಾನ್, ತೆ ಉಪ್ರಾಂತ್ ಸಮಾಧಿ ಸರ್ಶಿಂ ವಿಶೇಸ್ ಪ್ರಾರ್ಥನ್ ಆನಿ ಆಮ್ಚ್ಯಾ ಪಾದ್ರ್ಯಾಬಾಚ್ಯಾ ಸಾಂತಿಪಣಾಚ್ಯಾ ನಿಯಾಳಾಚೆಂ ಕಾರ್ಯೆಂ ಆಸ್ತಲೆಂ. ಹ್ಯಾ ಕಾರ್ಯಾಕ್ ಆಮ್ಚೊ ಪಾದ್ರ್ಯಾಬ್ ದೆವಾಚೊ ಸೆವಕ್ ಆಲ್ಫ್ರೆಡ್ ರೋಚ್ ಹಾಂಚ್ಯಾ ಅಭಿಮಾನಿಂಕ್ ಮೊಗಾಚೆಂ ಆಪವ್ಣೆಂ ಆಸಾ ಮ್ಹಣ್ ಟ್ರಸ್ಟಾಚೊ ಅಧ್ಯಕ್ಷ್ ಆನಿ ಸಾಂತಿಪಣಾಚ್ಯಾ ಪ್ರಕ್ರಿಯೆಚೊ ಖಬಾಡ್ದಾರಿ ಮಾ। ಬಾ। ಸಾಂತಾ ಲೊಪೆಜ್ ಹಾಣಿ ಕಳಯ್ಲಾಂ.
3 comments
very descriptive and very informative article on Servant of God Fr Alfred Roche. Specail thanks for this initiative. 🙏🏻
Good , Meaningful & Excellent article on the Servant of God Fr Alfred Roche by Mr. Pernal. Thank you. Hope it reaches to many. Would be nice if the same is published in diocesean Weeklies and dailies. God bless you .
Very detailed and informative article.. Also life of Fr. Alfred Roche inspiring to us all, especially Priests and nuns those who have pledged to Serve Jesus… May Fr. Alfred Roche attain sainthood soon..