ಸಾಂ ಪಾವ್ಲುಚ್ಯಾ ಉತ್ರಾಂಕ್ ಜಿವ್ದಾಳಿಂನಿ ವೀಕ್ ಹೊಗ್ಡಾಯಿಲ್ಲೊ ಗಾಂವ್ – ಮಾಲ್ಟಾ

99

ಕಾಮ್,  ಘರ್, ಭುರ್ಗಿಂ, ಕುಟಾಮ್ ಸಾಂಬಾಳ್ನ್ ಥಕ್‌ಲ್ಲ್ಯಾ ಆಮಿ ಸ್ತೀಯಾಂನಿ ಥೊಡ್ಯಾ ದಿಸಾಂಕ್ ಕಾಮಾಕ್ ಆನಿ ಕುಜ್ನಾಕ್ ರಜಾ ಘಾಲ್ನ್ ಮಾಲ್ಟಾ ಬೊಂವ್ಡೆಕ್ ವೆಚೊ ನಿರ್ಧಾರ್  ಘೆತ್ಲೊ.  ಸ ಮಹಿನ್ಯಾಂಚ್ಯಾ ಸತತ್ ಮಾಂಡಾವಳೆ ಉಪ್ರಾಂತ್ ಮಾರ್ಚ್ ತೆರಾ ತಾರಿಕೆರ್ ದೊನ್ಪಾರಾಂ ಸಾಡೆ ತೀನಾಂಕ್ ಅಮ್ಕಾಂ ಡಬ್ಲಿನ್ ಥಾವ್ನ್ ಘೆವ್ನ್ ಉಬ್‌ಲ್ಲೆಂ ವಿಮಾನ್ ಸಾಡೆ ಆಟಾಂಕ್ ಮಾಲ್ಟಾ ಮಾತ್ಯೆಕ್ ತೆಂಕ್ಲೆಂ. ಆಕಾಸಾರ್ ಥಾವ್ನ್ ವೀಜ್ ದಿವ್ಯಾಂನಿ ಮಾಲ್ಟಾ ದ್ವೀಪ್ ಬೋವ್ ಸೊಬಿತ್ ದಿಸ್ತಾಲೊ.

ಏರ್ ಪೋರ್ಟಾ ಥಾವ್ನ್ ಬಾಯ್ರ್ ಯೆತಾನಾ ಅಮ್ಕಾಂ ಚೊವ್ದಾ ಜಣಾಂಕ್ ವ್ಹರುಂಕ್ ವ್ಹಡ್ಲೆಂ ಸಯ್ತ್ ವಾಹನ್ ಡ್ರೈವರಾ ಸಂಗಿ ಉಭೆಂ ಆಸ್ಲೆಂ. ಆಮ್ಕಾಂ ಘೆವ್ನ್ ಮಾಲ್ಟಾಚ್ಯಾ ರಾಜ್ ರಸ್ಯ್ತಾರ್ ತೆಂ ದಾಂವೊಂಕ್ ಲಾಗ್ಲೆಂ. ರಸ್ತ್ಯಾಚ್ಯಾ ದೊನೀ ಕುಶಿನಿಂ ದಿಸ್ಚೆ ವೀಜ್ ದಿವೆ ಮಾಲ್ಟಾಚಿ ಸೊಭಾಯ್ ದೊಡ್ತಿ ಕರ್ತಾಲೆ. ಥೊಡ್ಯಾಚ್ ವೆಳಾನ್ ಆಮ್ಚೆಂ ವಾಹನ್ ಏಕ್ ವ್ಹಡ್ ಜಯ್ತ್ ಬೊಂಗ್ಲ್ಯಾ ಸಾಮ್ಕಾರ್ ಉಭೆಂ ಜಾಲೆಂ. ಬೊಂಗ್ಲ್ಯಾ ಬಿತರ್ ರಿಗೊನ್ ಕುಡಿಚಿ ನಿತಳಾಯ್ ತಿರ್ಸುನ್, ರಾತ್ಚೆಂ ಖಾಣ್ ಸೆವ್ನ್, ಥೊಡೊ ವೇಳ್ ಬಸೊನ್; ಉಲವ್ನ್, ಉಪ್ರಾಂತ್ ಉಶ್ಯಾಕ್ ಮಾತೆಂ ತೆಂಕ್ಲೆ.

ಮಾಲ್ಟಾ ದಕ್ಶಿಣ್ ಯುರೋಪಾಚೊ ಏಕ್ ‘ದ್ವೀಪ್’ ಜಾವ್ನಾಸಾ. ಐತಿಹಾಸಿಕ್ ಜಾಗ್ಯಾಂಕ್ ನಾಂವಾಡ್ಲಾ. ಬೈಬಲಾಂತ್ ಮಾಲ್ಟಾಕ್ ‘ಮೆಲಿಟಾ’ ಮ್ಹಣ್ ಅಪಯ್ತಾತ್. ಮೆಲಿಟಾ ಮ್ಹಳ್ಳ್ಯಾರ್ ‘ಆಸ್ರೊ’. ವಾದಾಳಾಂತ್ ಸಾಂಪಾಡ್‌ಲ್ಲ್ಯಾ ಸಾಂ. ಪಾವ್ಲಾಕ್ ಆನಿ ತಾಚ್ಯಾ ಸಾಂಗಾತ್ಯಾಂಕ್ ಮೆಳ್‌ಲ್ಲೊ ಆಸ್ರೊ.  21 ಸಪ್ತೆಂಬರ್ 1964 ವೆರ್ ಮಾಲ್ಟಾ ಬ್ರಿಟಿಶಾಂ ಥಾವ್ನ್ ಸ್ವತಂತ್ರ್ ಜಾಲ್ಲೆಂ.

ಆಮ್ಚ್ಯಾ ಪಯ್ಣಾಚೊ ದುಸ್ರೊ ದೀಸ್ –  ಮಾರ್ಚ್ ಚೊವ್ದಾ. ಸಕಾಳಿಂ ಉಟೊನ್ ಡಬ್ಲಿನ್ ಥಾವ್ನ್ ಬಾಂದುನ್ ಹಾಡ್‌ಲ್ಲಿಂ ಗೋಡ್ ನಾರ್ಲಾಚಿಂ ಮುಟ್ಲಿಂ ಆನಿ ಕಲ್ತಪ್ಪ ಸಂಗಿ ನಾಸ್ಟೊ ಸಂಪವ್ನ್ ಮಾಲ್ಟಾ ಪಳೆಂವ್ಕ್ ಭಾಯ್ರ್ ಸರ್ಲ್ಯಾಂವ್. ಆಮ್ಚೊ ಪಯ್ಲೊ ಥಾಂಬೊ ‘ಬಾಂಗಾರಾಚೊ ದರ್ಯೊ’ (ಗೋಲ್ಡನ್ ಬೇ) ಥಂಯ್ಚೆಂ ತೆಂ ಸಕಾಳಿಂಚೆ ಥಂಡ್ ವಾರೆಂ ಮತಿಕ್ ಸುಶೆಗ್ ದೀಲಾಗ್ಲೆಂ. ಹಾಕಾ ಪಯ್ಲೆಂ ‘ಮಿಲಿಟರಿ ಬೇ’  ಮ್ಹಣ್ ಆಪಯ್ತಾಲೆ. ಕಿತ್ಯಾಕ್ ಮ್ಹಳ್ಯಾರ್ ಅಂತರ್‌ರಾಶ್ಟ್ರೀಯ್ ಸ್ಕೌಟ್ಸಾಚೆಂ ಕ್ಯಾಂಪ್ ಹಾಂಗಾಸರ್ ಆಸ್‌ಲ್ಲೆಂ. ಹ್ಯಾ ದರ್ಯಾ ತಡಿರ್ ಆಸ್ಚ್ಯಾ ಪರ್ಜಳಿಕ್, ಬಾರೀಕ್ ರೆಂವೆನ್ ಹ್ಯಾ ದರ್ಯಾಕ್  ಹೆಂ ನಾಂವ್ ಲಾಬ್ಲಾಂ ಮ್ಹಣ್ತಾತ್.

ಉಪ್ರಾಂತ್ ಆಮಿ  ಪಾವ್ಲ್ಯಾಂವ್ ಪೋಪಾಯ್ ಹಳ್ಳೆಕ್ (ಪೋಪಾಯ್ ವಿಲೇಜ್) 1980  ವ್ಯಾ  ವರ್ಸಾ ಭುರ್ಗ್ಯಾಂಚೆಂ ಸಿನೇಮಾ ಸೆಟ್ ಜಾವ್ನ್ ರೂಪಿತ್ ಜಾಲ್ಲೊ ಹೊ ಜಾಗೊ ಆಜ್ ಏಕ್ ಫನ್ ಪಾರ್ಕ್ ಜಾವ್ನ್ ಬದ್ಲಾಲಾ ಆನಿ ಮಾಲ್ಟಾಚ್ಯಾ ಪ್ರಸಿದ್ದ್ ಆಕರ್ಶಣಾ ಪಯ್ಕಿಂ ಏಕ್ ಜಾಲಾ. ಫಿಲ್ಮಾಂತ್ಲೆ ಪಾತ್ರ್ ಅಜೂನ್ ಅಮ್ಕಾಂ ಥಂಯ್ ಪಳೆಂವ್ಕ್ ಮೆಳ್ತಾತ್.

ಉಪ್ರಾಂತ್ ಪಾವ್ಲ್ಯಾಂವ್ ಆಮಿ ಮೆಲೀಹಾ ಇಗರ್ಜೆಕ್. 1881 ವ್ಯಾ ವರ್ಸಾ ಹ್ಯಾ ಇಗರ್ಜೆಚೆಂ ಬಾಂದಪ್ ಆರಂಭ್ ಜಾಲ್ಲೆಂ. ಥಂಯ್ಚ್ ಲಾಗ್ಸಾರ್ ರಸ್ತ್ಯಾ ಥಾವ್ನ್ ಮಸ್ತ್ ಸಕಯ್ಲ್ ಸರಿ ಸುಮಾರ್ ಶೆಂಬೊರಾಂ ವಯ್ರ್ ಮೆಟಾಂ ದೆವ್ಲ್ಯಾ ಉಪ್ರಾಂತ್ ಮೆಳ್ತಾ ನೈಸರ್ಗಿಕ್ ಮಾಟ್ಯಾ ಬಿತರ್ ಆಸ್ಚೊ ಮರಿಯೆಚೊ ಗ್ರೊಟ್ಟೊ. ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾ ಥಾವ್ನ್ ಭಕ್ತಿಕ್ ಹಾಂಗಾ ಭೆಟ್ ದಿತಾತ್.

2021 ವ್ಯಾ ವರ್ಸಾ  ಕಾಡ್ ಲ್ಲ್ಯಾ ಸರ್ವೆ ಪ್ರಕಾರ್ 98% ಮಾಲ್ಟಾಚೊ ಲೋಕ್ ರೋಮನ್ ಕ್ಯಾಥೊಲಿಕ್. ಉರ್‌ಲ್ಲೊ 2% ಲೋಕ್ ಧರ್ಮ್ ಪಾತ್ಯೆನಾಂ ಮ್ಹಣ್ ಸರ್ವೆಂತ್ ದಿಸೊನ್ ಅಯ್ಲೆಂ. ಮಾಲ್ಟಾ ಕ್ರೀಸ್ತಾಂವ್ ಧರ್ಮ್ ಆಪ್ಣಾಯಿಲ್ಲೊ ಯುರೋಪಾಚೊ ಪಯ್ಲೊ ದೇಶ್. ಹಾಂಗಾಸರ್ ಸಭಾರ್ ಇಗರ್ಜ್ಯೊ ಆನಿ  ಕೆಥೆಡ್ರಲಾಂ ಪಳೆಂವ್ಕ್ ಮೆಳ್ತಾತ್. ಸಾಂ ಪಾವ್ಲು  ಹಾಂಗಾಚೊ ಪಾತ್ರೊನ್ ಸಾಂತ್. ಸಾಂ ಪಾವ್ಲುನ್ ಮಾಲ್ಟಾಂತ್ ಕ್ರೀಸ್ತಾಂವ್ ಧರ್ಮಾಚಿ ಸುರ್ವಾತ್ ಕೆಲ್ಲಿ.

ಸಾಂ ಪಾವ್ಲು ರೋಮಾಚ್ಯಾ ಪಯ್ಣಾರ್ ಆಸ್ತಾನಾ ಆಯಿಲ್ಲ್ಯಾ ಭಿರಾಂಕೂಳ್ ವಾದಾಳಾಕ್ ತಾಂಕಾ ಪಯ್ಣ್ ಮುಂದರುಂಕ್ ಜಾಯ್ನಾಸ್ತಾನಾ ತೋ ಆನಿ ತಾಚ್ಯಾ ಸಾಂಗಾತಾ ಆಸ್ಲೆಲೆ 270 ಜಣ್ ಜೀವ್ ವಾಂಚಂವ್ಕ್ ಉಪ್ಯೆವ್ನ್ ಮೆಲಿಹಾ ಥಾವ್ನ್ 80 ಮೀಟರ್ ಪಯ್ಸ್ ಆಸ್ಚ್ಯಾ ತಡಿಕ್ ಯೇವ್ನ್ ಪಾವ್ಲೆ. ಮಾಲ್ಟಾಚ್ಯಾ ಲೋಕಾನ್ ಉಪ್ಯೆವ್ನ್ ಥಂಡ್ ಜಾವ್ನ್ ಅಯಿಲ್ಲ್ಯಾ ಸಾಂ ಪಾವ್ಲು ಆನಿ ತಾಚ್ಯಾ ಸಾಂಗಾತ್ಯಾಂ ಖಾತಿರ್ ವ್ಹಡ್ ಜಯ್ತ್ ಉಜ್ಯಾಚೆಂ ಅಗ್ಟೆಂ ಕರ್ನ್ ಊಬ್ ದಿಲಿ. ಸಾಂ ಪಾವ್ಲುಚ್ಯಾ ಹಾತಾಕ್ ರೆವ್ಡಾಲ್ಲ್ಯಾ ಏಕ್ ವಿಕಾಳ್ ಜಿವ್ದಾಳಿನ್ ತಾಕಾ ಖೋಂಚ್ ಮಾರ್ಲಿ. ತರೀ ಸಾಂ ಪಾವ್ಲುಕ್ ಕಿತೆಂಚ್ ಜಾಲೆಂ ನಾಂ. ಉಪ್ರಾಂತ್ಲ್ಯಾ ದಿಸಾಂನಿ ಸಾಂ ಪಾವ್ಲುಚ್ಯಾ ಶೆರ್ಮಾಂವಾನ್ ತ್ಯಾ ದ್ವೀಪಾಂತ್ ಅಸ್ಚ್ಯಾ ಸರ್ವ್ ವಿಕಾಳ್ ಜಿವ್ದಾಳಿಂನಿ ಆಪ್ಲೆಂ ವೀಕ್ ಹೊಗ್ಡಾಯ್ಲೆಂ ಮ್ಹಣ್ತಾತ್. ದೆಕುನ್ ತ್ಯಾ ಜಾಗ್ಯಾಕ್ ಸಾಂ ಪಾವ್ಲುಚೊ  ದ್ವೀಪ್  ಮ್ಹಣ್ ನಾಂವ್ ದಿಲಾಂ. ಥಂಯ್ ಆಜ್ ಆಮ್ಕಾಂ ಸಾಂ ಪಾವ್ಲುಚಿ ಇಮಾಜ್ ಪಳೆಂವ್ಕ್ ಮೆಳ್ತಾ.  ಮಾಲ್ಟಾಚಿ ರಾಜ್‌ಧಾನಿ ಜಾಲ್ಲ್ಯಾ ವೆಲೆಟ್ಟಾಂತ್ ಅಜೂನ್ ತೊ ವಾದಾಳ್ ಅಯಿಲ್ಲೊ ದೀಸ್ ಸಂಭ್ರಮ್ತಾತ್.

ಉಪ್ರಾಂತ್ ಆಮಿ ಪಾವ್ಲ್ಯಾಂವ್ ಸಾಂ ಅಗಾಥಾ ಟವರ್ಸಾ ಸರ್ಶಿನ್. ಉಬಾರಾಯೆರ್ ಆಸ್ಚ್ಯಾ ಅಗಾಥಾ ಟವರ್ಸಾ ಸರ್ಶಿನ್ ಪಾವೊಂಕ್ ಅಮ್ಚ್ಯಾ ಗಾಡಿಯೆಕ್ ಕಶ್ಟ್ ಮಾರ್ಲೆ. ದೆಕುನ್ ಅಮಿ ದೆಂವೊನ್ ಚಲಜಾಯ್ ಪಡ್ಲೆಂ. ತ್ಯಾ ಉಬಾರಾಯೆಚ್ಯಾ ಸುವಾತೆ ಥಾವ್ನ್ ಸಗ್ಳೊ ದ್ವೀಪ್ ದಿಸ್ತಾಲೊ. ಅನಿ ಸಾಂಗಾತಿ ದ್ವೀಪ್ ಜಾವ್ನಾಸ್ಚೆ ಕೊಮಿನೋ ಆನಿ ಗೊಝೊ ದ್ವೀಪ್‌ಯ್ ದಿಸ್ತಾಲೆ.  ಹೆಂ ಝುಜಾ ವೇಳಾಚೆಂ ಮಿಲಿಟರಿ ಥಳ್ ಜಾವ್ನಾಸ್ಲೆಂ. ಚಾರೀ ಭಂವ್ತಿ ಚೌಕಾಚೆ ಟವರ್ಸ್ ಆಸೊನ್ ತಾಚೆ ಬಾಯ್ಲೆ ವೊಣ್ತಿ ಚಾರ್ ಮೀಟರ್ ದಾಟ್ ಅಸಾತ್. ಸಕಯ್ಲ್ ದಿಸ್ಚ್ಯಾ ಮೆಲೀಹಾ ದರ್ಯಾ ತಡಿ ಥಾವ್ನ್ ದೇಶಾಕ್ ಪ್ರವೇಶ್ ಜಾಂವ್ಚ್ಯಾ ವೈರಿಂಕ್ ಆಡಾಂವ್ಕ್ ಬಾಂದ್‌ಲ್ಲೆಂ ಘಟ್ ಮೂಟ್ ಸೈನಿಕಾಂಚೆಂ ಬಾಂದಾಪ್ ಹೆಂ.  ಅಜೂನ್ ಹೆಂ ಬಾಂದಾಪ್ ಬರ‍್ಯಾನ್ ಸಾಂಬಾಳ್ಳಾಂ. ಆಜ್ ಹೆಂಯ್ ಏಕ್ ಮಾಲ್ಟಾಚೆಂ ಪ್ರಮುಖ್ ಆಕರ್ಶಣ್ ಜಾವ್ನ್  ಉಭೆಂ ಆಸಾ.

ಮೆಲೀಹಾ ದರ್ಯಾ ತಡಿಚೆಂ ಥಂಡ್ ವಾರೆಂ ಸೆವ್ನ್ ಚಮ್ಕಾಲ್ಯಾಂವ್ ಪಾಟಿಂ ಅಮ್ಚ್ಯಾ ಚಾರ್ ದಿಸಾಂಚ್ಯಾ ಬಂಗ್ಲ್ಯಾಕ್. ನಾವ್ನ್ ನಿತಳ್ ಜಾವ್ನ್ ಭಾಯ್ರ್ ಸರ್ಲ್ಯಾಂವ್ ಮಾಲ್ಟೀಸ್ ಪಾರಂಪರಿಕ್ ಖಾಣ್ – ಜೆವಣ್ ಸೆಂವ್ಕ್ ಆನಿ ನಾಚ್ ಪಳೆಂವ್ಕ್. ಜೆವ್ಣಾ ಮೆಜಾರ್ ಥೊಡ್ಯೊ ಗಜಾಲಿ ಚಲ್ಲ್ಯೊ. ಪೊಟಾಚಿ ಭುಕ್ ಥಾಂಬಯ್ಲಿ ಆನಿ ಕುಡಿಚಿ ಪುರಾಸಣ್ ಪಯ್ಸ್ ಕರ್ನ್,  ಮಾಲ್ಟೀಸಾಂನಿಂ ತಾಂಚೊ ನಾಚ್ ದಾಕಯ್ತಚ್ ಆಮೀಂಯ್ ಥೊಡೆಂ ಪೆಂಕಾಡ್ ಹಾಲಯ್ಲೆಂ.

ದುಸ್ರ್ಯಾ ದೀಸ್ ಸಕಾಳಿಂ ಉಟ್ತಾನಾ ಪೊಣ್ಸಾಚೆ ಪಾತೊಳ್ಯೊ ಆನಿ ಗರಿಯೊ ತಯಾರ್ ಆಸ್ಲೆ. ಸಕಾಳಿಂಚೊ ನಾಸ್ಟೊ ಕರ್ನ್ ಬಾಯ್ರ್ ಸರ್ತಾನಾ ಬಸ್ಸ್ ಆಮ್ಕಾಂ ಆಪವ್ನ್ ವರುಂಕ್ ತಯಾರ್ ಆಸ್ಲೆಂ. ಆಜ್ ಆಮಿ ಸೆಜಾರಿ ದ್ವೀಪಾಂಕ್ ವೆಚಿ ವಿಲೆವಾರಿ ಕೆಲ್ಲಿ. ಗೋಝೊ, ಕೊಮೀನೊ, ಬ್ಲೂ ಲಗೂನ್ ಆನಿ ಕ್ರಿಸ್ಟಲ್ ಲಗೂನ್ ದ್ವೀಪಾಂಚಿ ವಾಟ್ ದರ್ಲಿ. ಗೋಝೋಂತ್ ಆಮಿ ಬೋಟಿರ್ ಥಾವ್ನ್ ದೆಂವೊನ್ ಬಸ್ಸಾರ್ ಥೊಡೆಂ ಭಂವ್ಲ್ಯಾಂವ್.

ಥಂಯ್ಸರ್ ಗೋಝೊ ಕ್ಯಾಥೆಡ್ರಲಾಕ್ ಆಮಿ ಭೆಟ್ ದಿಲಿ. ಪಯ್ಲೆಂ ರೋಮನ್ ದೀವ್ಳ್ ಜಾವ್ನ್ ಆಸ್‌ಲ್ಲೆಂ ಹೆಂ ಬಾಂದಪ್ 1697 ವ್ಯಾ ವರ್ಸಾ ಇಗರ್ಜ್ ಜಾವ್ನ್ ಬದಲ್ಲೆಂ. ಹ್ಯಾ ಇಗರ್ಜೆಚೆಂ ಅನ್ಯೇಕ್ ಆಕರ್ಶಣ್ 1897 ವ್ಯಾ ವರ್ಸಾ ರೋಮಾಂತ್ ರೂಪಿತ್ ಕೆಲ್ಲಿ ಮರಿಯೆಚಿ ಇಮಾಜ್. ಹಾಂಗಾಸರ್ ಮರಿಯೆಚ್ಯಾ ಸ್ವರ್ಗರೋಹಣಾಚೆಂ ಫೆಸ್ತ್ ಆಗೋಸ್ತ್ 15 ತಾರಿಕೆರ್ ಭೊವ್‌ಚ್ ದಬಾಜಾನ್ ಸಂಭ್ರಮ್ತಾತ್.

ದೊನ್ಪಾರಾಂಚೆಂ ಜೆವಣ್ ಸಂಪವ್ನ್ ಪಾಟಿಂ ಬೋಟಿಕ್ ಹಾಡ್ನ್ ಪಾಯ್ಲೆಂ ಆಮ್ಚ್ಯಾ ಬಸ್ಸಾನ್. ಥಂಯ್ ಥಾವ್ನ್ ಕೊಮಿನೋ, ಬ್ಲು ಲಗೂನ್ ಆನಿ ಕ್ರಿಸ್ಟಲ್ ಲಗೂನ್ ದ್ವೀಪಾಂತ್ ಉದ್ಕಾಂತ್ ಬುಡೊನ್, ವೋತಾಕ್ ಸುಕೊನ್ ವೇಳ್ ಪಾಶಾರ್ ಕೆಲೊ. ರಾತ್ಚೆಂ ಜೆವಾಣ್ ಸ್ಲಿಯೆಮಾ ಚೈನೀಸ್ ರೆಸ್ಟೊರೆಂಟಾಂತ್ ಸಂಪವ್ನ್ ಪಾವ್ಲ್ಯಾಂವ್ ಪಾಟಿಂ ಬಂಗ್ಲ್ಯಾಕ್.

ತಿಸ್ರ್ಯಾ ದಿಸಾ ಆಯ್ತಾರಾ ಪೊವ್ ಆನಿ ಅಪ್ಯಾಂಚೊ ನಾಸ್ಟೊ ತಿರ್ಸುನ್ ನೋವ್ ವರಾಂಚ್ಯಾ ಮಿಸಾಕ್ ಪಾವ್ಲ್ಯಾಂವ್ ವೆಲೆಟ್ಟ ಸಾಂ ಜೋನ್ಸ್ ಕೆಥೆಡ್ರಲಾಕ್. ಇಗರ್ಜೆ ಬಿತರ್ಲಿ ಶಿಲ್ಪ್ ಕಲಾ ಪಳೆವ್ನ್ ದೊಳೆ ದಾಂಪುಂಕ್‌ಚ್ ಮನ್ ಆಯ್ಲೆಂ ನಾಂ. ಮಾಲ್ಟಾ ಬಾಶೆಚ್ಯಾ ಮೀಸಾಕ್ ಕೊಂಕ್ಣೆಂತ್ ಜಾಪಿ ದಿಲ್ಯೊ. ಶೆರ್ಮಾಂವ್ ಸಮ್ಜನಾತ್ಲ್ಯಾರೀ ಮೀಸ್ ಭೊವ್‌ಚ್ ಭಕ್ತಿನ್ ಆಯ್ಕಾಲೆಂ. ಮೀಸ್ ಸಂಪ್ಲ್ಯಾ ಉಪ್ರಾಂತ್ ತ್ಯಾ ಕೆಥೆಡ್ರಲಾಚಿ ಸೊಭಾಯ್ ಮ್ಹಜ್ಯಾ ಕ್ಯಾಮರಾಂತ್ ಕೈದ್ ಕರ್ನ್ ಸಿಟಿ ರೈಲಾರ್ ಭಾಯ್ರ್ ಸರ್ಲ್ಯಾಂವ್ ಮಾಲ್ಟಾಚಿ ರಾಜಧಾನಿ ವೆಲೆಟ್ಟಾಚಿ ಸೊಭಾಯ್ ಚಾಕೊಂಕ್.

ಉಪ್ರಾಂತ್ ರಿಗ್ಲ್ಯಾಂವ್ ಗ್ರ್ಯಾಂಡ್ ಮಾಸ್ಟರ್ಸ್ ಪ್ಯಾಲೆಸಾ ಭಿರ್. ತಾಚ್ಯಾ ಭಿತರ್ಲಿ ಸೊಭಾಯ್ ಪಳೆಂವ್ಕ್ ದೋನ್ ದೊಳೆ ಪಾವನಾಂತ್. ಪಯ್ಲೆಂಚೆ ಝುಜಾರಿ, ಝುಜಾಕ್ ವಾಪಾರ್ಚಿಂ  ಆಯ್ದಾಂ, ಸರ್ವ್ ಬೋವ್ ಜೊಗಾಸಣೆನ್ ಸಾಂಭಾಳ್ನ್ ದವರ್ಲ್ಯಾಂತ್. ಅದ್ಲ್ಯಾ ಕಾಲಾಚಿ ತಿ ಶಿಲ್ಪ್ ಕಲಾ ತ್ಯಾ ರಾಜ್ ಭವನಾಚಿ ಸೊಭಾಯ್ ಚಡಯ್ತಾಲಿ. ಹೆಂ ರಾಜ್ ಭವನ್ ಬ್ರಿಟೀಶ್ ರಾಣಿಯೆಕ್ ಆನಿ ಗವರ್ನರಾಂಕ್ ರಾಯಾಳ್ ಘರ್ ಜಾವ್ನಾಸ್ಲೆಂ. ಅತಾಂ ತೆಂ ಮಾಲ್ಟಾಚ್ಯಾ ಪ್ರೆಸಿಡೆಂಟಾಚೆಂ ಕಾಮಾಸಳ್ ಜಾಲಾಂ. 1921 ಥಾವ್ನ್ 2015 ಪರ್ಯಾಂತ್ ಮಾಲ್ಟಾಚೆಂ ಪಾರ್ಲಿಮೆಂಟ್ ಘರಾಣೆ ಜಾಲ್ಲೆಂ. ಹ್ಯಾ ಪ್ಯಾಲೆಸಾಚೊ ಅರ್ದೊ ವಾಂಟೊ ಪ್ರವಾಸಿಕಾಂಕ್ ಆಕರ್ಶಣ್ ಜಾಲಾಂ. ಉರ್‌ಲ್ಲೊ ಅರ್ದೊ ವಾಂಟೊ ಅಜೂನ್ ರಾಜಕಾರಣಿ ವಾಪಾರುನ್ ಅಸಾತ್.  ಥಂಯ್ ಆಮ್ಕಾಂ ವಚೊಂಕ್ ಆಡಾಯ್ಲಾಂ.

ಗ್ರ್ಯಾಂಡ್ ಮಾಸ್ಟರ್ ಪ್ಯಾಲೇಸ್

ವೆಲೆಟ್ಟಚ್ಯಾ ಬಾಂದ್ಪಾಂಚಿಂ ಆನಿ ರಸ್ತ್ಯಾಂಚಿ ಸೊಭಾಯ್ ಚಾಕೊನ್ ಪಾವ್ಲ್ಯಾಂವ್ ಮಾರ್ಸಾಕ್ಸ್ ಲೋಕ್ ಮ್ಹಳ್ಳ್ಯಾ ಮಾಸ್ಳಿ ಪಾಗ್ಪಿ ಹಳ್ಳೆಕ್ (ಫಿಶಿಂಗ್ ವಿಲೇಜ್). ಥಂಯ್ಸರ್ ಮಾಸ್ಳೆಚೆಂ ಬಂದರ್ ತಶೆಂಚ್ಚ್ ಅಯ್ತಾರಾಚಿ ಸಾಂತ್ ಅಸ್ತಾ. ತಾಜಾ ತರ್ಕಾರಿ, ಫಳಾಂ ಆನಿ ಮಾಸ್ಳಿ ಮೆಳ್ತಾ. ಥೊಡೊ ವೇಳ್ ಸಾಂತೆಂತ್ ಭಂವೊನ್ , ಥಂಯ್ಚ್ಯಾ ರೆಸ್ಟೊರೆಂಟಾಂತ್ ರುಚಿಕ್ ಮಾಸ್ಳೆಚೆಂ ಜೆವಾಣ್ ಜೇವ್ನ್ ಪಾಟಿಂ ಪರ್ತಾಲ್ಯಾಂವ್.

ಥೊಡೊ ವೇಳ್ ವಿರಾಮ್ ಕರ್ನ್ ಥಂಯ್ಚ್ ಲಾಗ್ಸಾರ್ ಆಸ್ಚ್ಯಾ ಸಾಂತ್ ಜುಲಿಯನ್ಸ್ ಜಾಗ್ಯಾಕ್ ಪಾವ್ಲ್ಯಾಂವ್. ಮಾರ್ಚ್ 17 ಸಾಂ ಪ್ಯಾಟ್ರಿಕ್ ಆಮ್ಚ್ಯಾ ಐಯರ್ಲ್ಯಾಂಡ್ ಪಾತ್ರೊನ್ ಸಾಂತಾಚೊ ದೀಸ್. ಮಾಲ್ಟಾಂತ್‌ಯ್  ಹೊ ದೀಸ್ ವ್ಹಡಾ ದಬಾಜಾನ್ ಆಚರಣ್ ಕರ್ಚೆಂ ಪಳೆವ್ನ್ ಅಜ್ಯಾಪ್ ಪಾವ್ಲ್ಯಾಂವ್. ರಸ್ತ್ಯಾಂನಿ  ಪಾಂಯ್ ಘಾಲುಂಕ್ ಜಾಗೊ ನಾತ್ಲೊ ತಿತ್ಲಿ ಗಡ್ದಿ. ಥೊಡೊ ವೇಳ್ ಥಂಯ್ ಖರ್ಚುನ್ ಇಲ್ಲೆಂ ಪೊಟಾಕ್ ಘಾಲ್ನ್ ರಾತ್ಚ್ಯಾ ಧಾ ವರಾಂಕ್ ಪಾಟಿಂ ಬೊಂಗ್ಲ್ಯಾಕ್ ಪಾವ್ಲ್ಯಾಂವ್.

ಉದೆಲ್ಲೊ ದೀಸ್ ಮಾರ್ಚ್ 17. ಮಾಲ್ಟಾಕ್ ಆದೇವ್ಸ್ ಮಾಗ್ಚೊ ದೀಸ್. ಸಕಾಳಿಂ ಸಾಡೆ ಪಾಂಚಾಂಕ್ ಆಮ್ಚ್ಯಾ ಚಾರ್ ದಿಸಾಂಚ್ಯಾ ಬೊಂಗ್ಲ್ಯಾಕ್ ಅದೇವ್ಸ್ ಮಾಗೊನ್ ಮಾಲ್ಟಾ ಏರ್ ಪೋರ್ಟಾಚಿ ವಾಟ್ ದರ್ಲಿ. ಆಮ್ಚ್ಯಾ ಸಾಂತ್ ಪ್ಯಾಟ್ರಿಕಾಚೆಂ ಫೆಸ್ತ್ ಆಸ್‌ಲ್ಲ್ಯಾನ್ ತಾಚೊ ಪಾಚ್ವೊ ರಂಗ್ ಆಮಿ ಸಗ್ಳಿಂ ನೆಸ್‌ಲ್ಲ್ಯಾಂವ್. ವಿಮಾನಾಚ್ಯಾ ಪೈಲೆಟಾಕೀ ಆಮ್ಕಾಂ ಪಾಚ್ವ್ಯಾ ಚೊವ್ದಾ ಚಲಿಯಾಂಕ್ ಪಳೆವ್ನ್ ಖುಶಿ ಜಾಲಿ ಜಾಯ್ಜಯ್.  ವಿಮಾನಾಚ್ಯಾ ಜನೆಲಾಂತ್ಲ್ಯಾನ್ ಹಾತ್ ಭಾಯ್ರ್ ಘಾಲ್ನ್ “ಹೆಪ್ಪಿ ಸೈಂಟ್ ಪ್ಯಾಟ್ರಿಕ್ಸ್ ಡೇ” ಮ್ಹಣ್ ಬೊಬಾಟ್ಲೊ. ಮಾಲ್ಟಾಚ್ಯಾ ಮಾತಿಯೆಕ್ ವಾರ‍್ಯಾರ್ ಉಮೊ ಉಬವ್ನ್ ಉಬ್ಲ್ಯಾಂವ್ ಪಾಟಿಂ ಆಮ್ಚ್ಯಾ ಡಬ್ಲಿನ್ ಘೊಂಟೆರಾಕ್.

■ ಮೋನಿಕಾ ಡೆ’ಸಾ ಮಥಾಯಸ್, ಡಬ್ಲಿನ್