ಆಯ್ತಾರಾ, ಸಕಾಳಿಂಚ್ಯಾ 9.30 ವ್ಹರಾಂಚೇರ್, ಕೊಂಕ್ಣಿ ಸಂಸ್ಥೊ, ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯ್ ಹಾಂಗಾಸರ್ ಬೊಲ್ಕಾಂವ್ ಅಂಕೊ : 4 ಚಲ್ತಲೊ. ಮಾಲ್ಘಡೊ ಬಹುಭಾಶಿಕ್ ಲೇಖಕ್, ಪ್ರತೇಕ್ ಜಾವ್ನ್ ಕೃಷಿ ಆನಿ ಪರಿಸರ್ ಜಾಗೃತಿ ಲೇಖನಾಂ ಬರಂವ್ಚ್ಯಾಂತ್ ಪರಿಣತ್, ವಲ್ಲಿ ಬೋಳ ನಾಂವಾನ್ ಪರಿಚಿತ್, ವಲೇರಿಯನ್ ಸಿಕ್ವೇರಾ ‘ಸಾಗೊಳಿ ಆನಿ ಸಾಹಿತ್ಯ್’ ಹ್ಯಾ ವಿಷಯಾಚೆರ್ ಉಲಯ್ತಾಲೊ.
ಮುಳಾನ್ ಬೋಳ, ಕೆಂಲ್ಭೆಟ್ ಫಿರ್ಗಜೆಂತ್, ಕೃಷಿ ಕುಟ್ಮಾಂತ್ ಜಲ್ಮೊನ್ ವಾಡೊನ್, ಭಾರತೀಯ್ ತಪ್ಪಲ್ ಇಲಾಖ್ಯಾಂತ್ 1978 ಥಾವ್ನ್ ವಾವುರ್ನ್, ನಿವೃತ್ತೆ ಉಪ್ರಾಂತ್ ಆತಾಂ, ಕುಟ್ಮಾಸಾಂಗಾತಾ ಮುಕ್ಕ ವಸ್ತಿ ಕರುನ್ ಆಸ್ಚೊ, ವಲ್ಲಿ ಬೋಳ ಪಾಟ್ಲ್ಯಾ 41 ವರ್ಸಾಂ ಪಾಸುನ್ ಕೊಂಕ್ಣಿ, ಕನ್ನಡ ಆನಿ ತುಳು ಭಾಸಾಂನಿ ಸರಾಗ್ ಬರಯ್ತೇ ಆಸಾ. ಸಾಮಾಜಿಕ್, ಕೃಷಿ, ಸಂಪ್ರದಾಯ್, ಪರಿಸರ್ ಜಾಗೃತಿ ಆನಿ ಜಿಣ್ಯೆ ಸತಾಂ ತಾಚ್ಯಾ ಬರ್ಪಾಂಚೆಂ ಪ್ರಮುಕ್ ವಿಶಯ್ ಜಾವ್ನಾಸೊನ್ ಕಾಣಿಯೊ, ಕವಿತಾ, ನಾಟ್ಕುಳೆ, ವಿಡಂಬನ್, ಪ್ರಬಂದ್, ಚುಟುಕಾಂ ಬರಂವ್ಚೆ ಸಾಂಗಾತಾ ತಾಣೆ ಸಾಂಗ್ಣ್ಯೊ ಸಂಗ್ರಹ್ ಕೆಲ್ಯಾತ್. ಸಾಂಗ್ಣ್ಯಾ ತುಪೆಂ (ದೋನ್ ಆವೃತ್ತ್ಯೊ) ಗಾದ್ಯಾ ಮೆರೆರ್, ಜಗ್ಲಾಣೆ – ಕೊಂಕ್ಣೆಂತ್ ಪಾಯ್ಸ್ ಜಾಲ್ಲಿಂ ತಾಚಿಂ ಪುಸ್ತಕಾಂ. ತುಳು ಬಾಶೆಂತ್ ತಾಚೆಂ ಪೂಂಬೆ ಮ್ಹಳ್ಳೆಂ ಪುಸ್ತಕ್ ಫಾಯ್ಸ್ ಜಾಲಾಂ.
ಆದ್ಲ್ಯಾ ವರ್ಸಾ ಫಾಯ್ಸ್ ಜಾಲ್ಯಾ ತಾಚ್ಯಾ ‘ಶೆತಾಂ ಭಾಟಾಂ ತೊಟಾಂನಿ’ ಲೇಕನಾಂ ಸಂಗ್ರಹಾಕ್ – ಹ್ಯಾ ವರ್ಸಾಚೊ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪುಸ್ತಕ್ ಪುರಸ್ಕಾರ್ ಫಾವೊ ಜಾಲಾ.
2025 ಎಪ್ರಿಲ್ ಮಯ್ನ್ಯಾ ಪಾಸುನ್ ಬೊಲ್ಕಾಂವ್ ಕಾರ್ಯಕ್ರಮ್ ಮಯ್ನ್ಯಾಚ್ಯಾ ಪಯ್ಲ್ಯಾ ಆಯ್ತಾರಾ, ಸಕಾಳಿಂಚ್ಯಾ ಸಾಡೆ ನೋವ್ ಥಾವ್ನ್ ಇಕ್ರಾ ವ್ಹರಾಂ ಪರ್ಯಾಂತ್ ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಕೊಂಕ್ಣಿ ಸಂಸ್ಥ್ಯಾತ್ ಚಲ್ತಲೆಂ. ಸಕಾಳಿಂಚ್ಯಾ ಸಾಡೆ ನೋವ್ ವ್ಹರಾಂಚೇರ್ ಕಾಫಿ – ಫಳ್ಹಾರ್ ಆಸ್ತಲೊ. ಕಸಲಿಚ್ ಔಪಚಾರಿಕತಾ ನಾಸ್ತಾನಾ ಸಾಹಿತ್ಯಾಚಾ ಆಸಕ್ತಾಂ ಖಾತಿರ್ ಚಲ್ಚ್ಯಾ ಕಾರ್ಯಕ್ರಮಾಂತ್ ತ್ಯಾ ದಿಸಾಚೊ ಉಲವ್ಪಿ ದಿಲ್ಲ್ಯಾ ವಿಶಯಾಚೆರ್ ಆಪ್ಲೆ ವಿಚಾರ್ ಮಾಂಡ್ತಾಲೊ ಆನಿ ತಾಚೆರ್ ಏಕ್ ಲ್ಹಾನ್ ಸಂವಾದ್ ಚಲ್ತಲೊ. ಕಾರ್ಯಾಕ್ ಹಾಜರ್ ಜಾಂವ್ಕ್ ಕಸಲೀಚ್ ಬಂದಡ್ ನಾ. ಹ್ಯಾ ಸಕಯ್ಲ್ ದಿಲ್ಲೆಂ ವಾಟ್ಸಪ್ ಲಿಂಕ್ ವಾಪಾರುನ್ ಬೊಲ್ಕಾಂವ್ ವಾಟ್ಸಾಪ್ ಪಂಗ್ಡಾಂತ್ ಮೆಳ್ಳ್ಯಾರ್ ಕಾರ್ಯಕ್ರಮಾಚಿ ಮಾಹೆತ್ ವೆಳಾ ವೆಳಾ ಪಾವಿತ್ ಜಾವ್ನ್ ಆಸ್ತೆಲಿ.
