ರಾಯನ್ ಮ್ಯಾಗ್ನಿಟ್ಟೊ ನಿರ್ಮಾಣ್ / ನಿರ್ದೇಶನಾಚೆಂ ದುಸ್ರೆಂ ಸಿನೆಮಾ ಫೊಂಡಾಚೊ ಮಿಸ್ತೆರ್ ಪ್ರೀಮಿಯರ್ ಶೋ ಮಂಗ್ಳುರ್ ಆನಿ ಉಡುಪಿ ಜಿಲ್ಲ್ಯಾಂನಿಂ ಯಶಸ್ವೆನ್ ಚಲ್ಲೆ. ಸೊಮಾರಾ, ಎಪ್ರಿಲ್ 21 ವೆರ್ ಮಂಗ್ಳುರ್ ಭಾರತ್ ಸಿನೇಮಾಸ್ ಹಾಂಗಾಸರ್ ಚಲ್ಲೆಲ್ಯಾ ಪ್ರೀಮಿಯರ್ ಶೋಕ್ ಮಾನೆಸ್ತ್ ಮೈಕಲ್ ಡಿ ಸೊಜಾ ಸೇವಾ ಟ್ರಸ್ಟಾಚೆ ಪ್ರಮುಖ್ ಸಲಹಾದಾರ್ ಶ್ರೀ ಸ್ಟೀಫನ್ ಪಿಂಟೊ, ಬೆಂದುರ್ ಆನಿ ಶ್ರೀ ಓಸ್ವಲ್ಡ್ ರೊಡ್ರಿಗಸ್, ಇಜಯ್ ಮುಕೆಲ್ ಸಯ್ರೆ ಜಾವ್ನ್ ಹಾಜರ್ ಆಸ್ಲೆ.
ಲೆಕ್ಸಾ ಲೈಟಿಂಗ್ ಹಾಚೊ ಮಾಲಕ್ ಶ್ರೀ ರೊನಾಲ್ಡ್ ಸಿಲ್ವನ್ ಹಾಣಿ ಪಣ್ತಿ ಪೆಟವ್ನ್ ಪ್ರಿಮಿಯರಾಕ್ ಚಾಲನ್ ದಿಲೆಂ. ಆಪ್ಲ್ಯಾ ಸಂದೇಶಾಂತ್ ಶ್ರೀ ಸಿಲ್ವನಾನ್ ತರ್ನೊ ಸಿನೆಮಾ ನಿರ್ದೇಶಕ್ ರಾಯನ್ ಮಾಗ್ನಿಟ್ಟೊನ್ ಕೊಂಕ್ಣೆಂತ್ ಏಕ್ ಅದ್ಬುತ್ ಹಾಸ್ಯ್ ಸಿನೆಮಾ ನಿರ್ಮಾಣ್ ಕರ್ಚ್ಯಾಂತ್ ದಾಕಯಿಲ್ಲಿ ವೃತ್ತಿಕುಶಲತಾ ವಾಖಣುನ್ ಸಿನೆಮಾಕ್ ಸರ್ವ್ ಬರೆಂ ಮಾಗ್ಲೆಂ ಆನಿ ಆಪ್ಲೊ ಪುರ್ತೊ ಸಹಕಾರ್ ಭಾಸಾಯ್ಲೊ. ಹ್ಯಾ ಸುವಾಳ್ಯಾರ್ ಫಿಲ್ಮಾಕ್ ಸಹಕಾರ್ ದಿಲ್ಲ್ಯಾ ಪೋಶಕಾಂಕ್ ಸಿನೆಮಾ ಪಂಗ್ಡಾನ್ ಮಾನ್ ಕೆಲೊ. ರಾಯನ್ ಮ್ಯಾಗ್ನಿಟ್ಟೊನ್ ದಿನ್ವಾಸ್ ಪಾಟಯ್ಲೆ. ಡಾ| ಮೆಲ್ವಿನ್ ಪೆರ್ನಾಲ್ ಹಾಣೆ ನಿರೂಪಣ್ ಕೆಲೆಂ.
ಮಂಗ್ಳಾರಾ, ಎಪ್ರಿಲ್ 22 ವೆರ್ ಉಡುಪಿ ಜಿಲ್ಲ್ಯಾಚ್ಯಾ ಪಡುಬಿದ್ರಿಂತ್, ಭಾರತ್ ಸಿನೇಮಾಸ್ ಹಾಂಗಾಸರ್ ಕೊಂಕ್ಣಿ ಸಮರ್ಥಕ್ ಆನಿ ಉದ್ಯಮಿ ಶ್ರೀ ಜೆರಾಲ್ಡ್ ಪಿಂಟೊ ಹಾಣೆ ಪ್ರೀಮಿಯರಾಕ್ ಚಾಲನ್ ದಿಲೆಂ ಆನಿ ಸಿನೆಮಾ ಪಂಗ್ಡಾಕ್ ಬರೆಂ ಮಾಗ್ಲೆಂ. ಆಪ್ಲ್ಯಾ ಸಂದೇಶಾಂತ್ ಶ್ರೀ ಪಿಂಟೊನ್ ಕೊಂಕ್ಣಿ ಲೊಕಾನ್ ಸಿನೆಮಾ ಪಳೆವ್ನ್ ಫಿಲ್ಮ್ ಪಂಗ್ಡಾಕ್ ಪಾಟಿಂಬೊ ದಿಂವ್ಚ್ಯಾಕ್ ಉಲೊ ದಿಲೊ. ಆಲ್ವಿನ್ ದಾಂತಿ ಹಾಣೆ ನಿರೂಪಣ್ ಕೆಲೆಂ.
ಫೊಂಡಾಚೊ ಮಿಸ್ತೆರ್ ಕೊಂಕ್ಣಿ ಸಿನೆಮಾ ಕುಂದಾಪುರ್, ಉಡುಪಿ, ಪಡುಬಿದ್ರಿ, ಮಂಗ್ಳುರ್, ದೇರಳಕಟ್ಟೆ ಆನಿ ಪುತ್ತೂರ್ ಭಾರತ್ ಸಿನೇಮಾ ಸಿನೆಮಾಘರಾಂನಿ ಆಜ್, 25 ಎಪ್ರಿಲ್ ಪಾಸುನ್ ದಾಖವ್ಣೆಕ್ ಪಡ್ಲಾಂ.
