ಮಾಯ್ ಮಹಿನ್ಯಾಚೆ ದುಲೊಬ್ ರಾಣಿಯೆ

51

ಮಾಯ್ ಮಹಿನೊ ಉದೆತಾನಾ ಪ್ರಥ್ವೆರ್ ಫುಲ್ತಾತ್ ಮೇ ಫುಲಾಂ. ಆನಿ ಮೇ ಫುಲಾಂಚೆರ್ ನದರ್ ಪಡ್ತಾನಾ ಮತಿಂ ಉದೆತಾ … ಫುಲಾಂ ಪರಿಂ ನಿತಳ್ ನಿಸ್ಕಾಳಾಯೆನ್ ಪರ್ಜಳ್ಚಿ ಮೊವಾಳ್ ಮರಿಮಾಯ್. ಆನಿ ಹ್ಯಾ ವೆಳಾ ಆಮ್ಚೆ ವೋಂಟ್ ಮರಿಮಾಯೆಕ್ ಹೊಗಳ್ಸುನ್ ಉಚಾರ್ತಾತ್  ‘ನಮಾನ್ ಆಂಕ್ವಾರ್ ಮರಿಯೆ’ ಆನಿ ಕಾನಿಂ ಆಯ್ಕಾತಾತ್ ಕಾಂತಾರಾಂ   ‘ಮಾಯ್ ಮಹಿನ್ಯಾಚೆ ದುಲೊಬ್ ರಾಣಿಯೆ’

ಮೇ ಮಹಿನ್ಯಾಂತ್ ಮರಿಯೆಕ್ ಮಾನ್ ಕರ್ಚೊ ಫಕತ್ತ್ ಏಕ್ ದೀಸ್ ಮಾತ್ರ್ ನ್ಹಂಯ್, ಬಗಾರ್ ಸಗ್ಳೊ ಮಹಿನೊ ಮರಿಯೆಕ್ ಸಮರ್ಪಿಲ್ಲೊ ಜಾವ್ನ್, ಮರಿಯೆಕ್ ಹೊಗ್ಳಾಪ್ ಅರ್ಗಾಂ ಆರಾಧಾನಾನಿಂ ಭರ್ಲೊಲೊ ಜಾವ್ನಾಸ್ತಾ.

ದೆವಾಚ್ಯಾ ಖುಶೆಕ್ ಖಾಲ್ತಿಮಾನ್ ಘಾಲುನ್, ಮರಿಯೆನ್ ಆಪ್ಲಿ ಸಂಪೂರ್ಣ್ ಜಿಣಿ ದೆವಾಕ್ ಸಮರ್ಪಿತ್ ಕೆಲಿ. ಆನಿ ಸಂಸಾರಾಚ್ಯಾ ಸೊಡ್ವಣೆ ಖಾತಿರ್ ಸಂಸಾರಾಚ್ಯಾ ದುಬಾವಿ ನದ್ರೆಚಿ   ಪರ್ವಾ ಕರಿನಾಸ್ತಾಂ, ಧೈರಾನ್ ತಿ ಜಿಯೆಲಿ. ಆಂಕ್ವಾರ್ಪಣಿಂ ಜೆಜುಚಿ ಆವಯ್ ಜಾಲಿ. ಆನಿ ಅಶೆಂ ಸ್ತ್ರೀಯಾಂ ಭಿತರ್ ಸದೆಂವ್ ಜಾಲಿ… ಆಂಕ್ವಾರ್ ಮರಿ!

ಪಾಪ್ ಖತ್ ನಾತ್ಲೆಲಿ ದೈವಿಕ್ ಖುಣಾಂನಿಂ ಭರ್ಲೆಲಿ ಮರಿಮಾಯ್, ಭಕ್ತಿಕ್ ನಿಯಾಳ್, ಪೆಲ್ಯಾಕ್ ದಯಾಳ್ ಜಾವ್ನ್ ಜಿಯೆಂವ್ಕ್ ಆಮ್ಕಾಂ ಶಿಕಯ್ತಾ. ಆನಿ ಹ್ಯಾ ಮಾರಿಫಾತ್ ಆಮ್ಕಾಂ  ಸರ್ಗಾಚಿ ವಾಟ್ ದಾಕಯ್ತಾ.

ಶತಮಾನಾಂ ಥಾವ್ನ್ ಮರಿಮಾಂಯ್ ಮಾಯ್ ಮಹಿನ್ಯಾಚಿ ರಾಣಿ ಮ್ಹಣ್ ನಾಂವಾಡ್ಲ್ಯಾ.  ‘ಮೇ ಮಹಿನೊ ಮರಿಮಾಯೆಕ್ ಭೆಟಯಿಲ್ಲೊ ಮಹಿನೊ’ ಮ್ಹಣ್ ಪರ್ಗಟ್ ಕೆಲ್ಲೊ ಪಾಪಾ ಪಿಯುಸ್ ಬಾರಾವ್ಯಾನ್.  ನವ್ಯಾನ್ ವಿಂಚೊನ್ ಆಯ್ಲಲೊ ಪಾಪಾ ಲಿಯೊ IX ಆಗಸ್ಟಿಯನ್ ಮೆಳಾಚೊ ಯಾಜಕ್ ಜಾವ್ನಾಸೊನ್, ಆಗಸ್ಟಿಯನ್ ಮೇಳ್ ಮರಿಯೆಚ್ಯಾ ಭಕ್ತಿಪಣಾಕ್ ಸಂಸಾರ್‌ಭರ್ ನಾಂವಾಡ್ಲಾ ಮ್ಹಳ್ಳೆಂ ಆಮಿ ವಿಸ್ರೊಂಕ್ ನಜೊ.

ಮೇ ಮಹಿನ್ಯಾಂತ್ ಸಂಸಾರ್ ಭರ್ ಲೋಕ್ ವಿವಿಧ್ ಆಚರಣಾನಿಂ ಮರಿಯೆಚೆಂ ದೆವಾಸಾಂವ್ ಆಚರ್ಸಿತಾತ್. ಇಂಗ್ಲಿಶ್ ಭಾಶೆಚ್ಯಾ ಮ್ಹಳ್ಯಾರ್ ಇಂಗ್ಲೆಂಡ್, ಐಯರ್ಲೇಂಡ್, ಆಮೇರಿಕಾ ತಶೆಂಚ್ಚ್ ಜರ್ಮನ್ ಉಲಂವ್ಚ್ಯಾ ದೇಶಾಂನಿ, ಆನಿ ಫಿಲಿಪಾಯ್ನ್ ಗಾಂವಾನಿಂ ಮೇ ಮಹಿನ್ಯಾಂತ್ ಮರಿಯೆಚೆಂ ವಿವಿಧ್ ಥರಾಚೆಂ ವಿಶೇಶ್ ದೆವಾಸ್ಪಣ್ ಆಸ್ತಾ. ಮರಿಯೆಕ್ ಆಲ್ತಾರ್ ಮಾಂಡುನ್, ಫುಲಾಂನಿ ಸಜವ್ನ್, ಹೊಗಳ್ಸಿತಾತ್. ನೋವೆನ್, ಕಾಂತಾರಾಂನಿಂ ಮರಿಯೆಚೆಂ ಆರಾಧಾನ್ ಕರ್ತಾತ್. ಆನಿ ಜೆಜು ಮರಿಫಾತ್ ಆಮ್ಕಾಂ ಕುಮೊಕ್ ಕರ್ ಮ್ಹಣ್ ವಿನತೆಚಿಂ ಮಾಗ್ಣಿಂ ಕರ್ತಾತ್. ಮರಿಯೆ ಥಂಯ್ ಲೊಕಾಂಚೆಂ ವಿಶೇಸ್ ದೆವಾಸ್ಪಣ್ ವಾಡೊವ್ನ್ ಯೆಂವ್ಚೆಂ ಪಳೆವ್ನ್‌ಚ್  ಇಗರ್ಜ್ ಮಾತಾ  ಮರಿಯೆಚ್ಯಾ ದೆವಾಸ್ಪಣಾಕ್ ಚಡ್ ಆನಿ ಚಡ್ ಮಹತ್ವ್ ದೀವ್ನ್ ಆಯ್ಲ್ಯಾ  ಮ್ಹಣ್ ಥೊಡೆ ಜಾಣಾರಿ ಮ್ಹಣ್ತಾತ್. ಮಾಯ್ ಮಹಿನ್ಯಾಂತ್ ಮರಿಯೆಕ್ ಸರ್ಗಾ ಸಂಸಾರಾಚಿ ರಾಣಿ ಮ್ಹಣ್ ಕುರೋವಾನ್ ಸಜವ್ನ್ ಆರಾಧಾನ್ ಕರ್ತಾತ್. ಹೆಂ ಕುರೋವಾಚೆಂ ದೆವಾಸಾಂವ್ ಪಾಸ್ಕಾಂಚ್ಯಾ ಆನಿ ಪೆಂತೆಕೊಸ್ತಾಚ್ಯಾ ಮಧ್ಲ್ಯಾ ದಿಸಾಂನಿ ಮರಿಯೆಕ್ ಕುರೊವಾನ್ ಸಜವ್ನ್ ಆಧಾರ್ತಾತ್.

ರೋಮಾಂತ್ ಸಾಂ. ಲೂಕಾನ್ ಪಿಂತ್ರಾಯಿಲ್ಲೆಂ ಬಾಳೊಕ್ ಜೆಜುಕ್ ಉಕಲ್ನ್ ಧರ್‌ಲ್ಲಿ ಕುರೋವಾಚಿ ಮರಿ ಆಸ್ಚೆಂ ಸಾಂತಾ ಮರೀಯಾ ಮಾಜ್ಜೊರೆ ಬಾಸಿಲಿಕಾ ಸಂಸಾರ್ ಭರ್ ಪ್ರಸಿಧ್ಧ್ ಜಾವ್ನಾಸಾ.  ಎಪ್ರಿಲ್ 21 ವೆರ್  ಅಂತರ್ಲೊಲೊ ಪಾಪಾ ಫ್ರಾನ್ಸಿಸ್ ಹ್ಯಾಚ್ಚ್ ಮರಿಯೆ ಮುಕಾರ್ ಮಾಗ್ತಾಲೊ. 2013 ಇಸ್ವೆಂತ್ ಪಯಿಲ್ಲೆ ಪಾವ್ಟಿಂ ಹ್ಯಾ ಬಾಸಿಲಿಕಾಕ್ ತಾಣೆಂ ಭೆಟ್ ದಿಲ್ಲಿ. ಹ್ಯಾ ನಂತರ್ ಹರ್ಯೆಕಾ ಆಪೊಸ್ತೊಲಿಕ್ ಪಯ್ಣಾ ಆದಿಂ ಆನಿ ಉಪ್ರಾಂತ್ ಪಾಪಾ ಹಾಂಗಾಸರ್ ಆಸ್ಚ್ಯಾ ಬಾಳೊಕ್ ಜೆಜುಕ್ ಧರ್ನ್ ಆಸ್ಚ್ಯಾ ಮರಿಯೆಚ್ಯಾ ಇಮಾಜೆ ಮುಕಾರ್ ಮೌನ್ ಪ್ರಾರ್ಥನ್ ಕರ್ತಾಲೊ. ಪಾಪಾ ಫ್ರಾನ್ಸಿಸಾಚೆಂ ನಿಕೆಪೊಣ್ ತಾಚೆ ಆಶೆ ಪರ್ಮಾಣೆಂ ಥಂಯ್ಸರ್‌ಚ್ಚ್ ಜಾಲಾಂ. ಆನಿ ಪಯ್ಲೊ ಮಾನ್ ಮರಿಯೆಕ್ ಫಾವೊ ಮ್ಹಣ್ ತಾಣೆಂ ಆಪ್ಲೊ ಪೊಂಡ್ ಮರಿಯೆಚ್ಯಾ ಮುಕಾರ್ ನ್ಹಂಯ್, ಬಗಾರ್ ಥಂಯ್ಚ್ ದೆಗೆನ್ ಜಾಂವ್ಕ್ ಜಾಯ್ ಮ್ಹಣ್ ಸಾಂಗ್ಲೆಲೆ ಪರ್ಮಾಣೆಂ ಆಸಾ ಕೆಲಾ.

ಪಾಪಾ ಕ್ಲೆಮೆಂಟ್ ಆಟ್ವ್ಯಾನ್ ಮರಿಯೆಕ್ ದೋನ್ ಕುರೊಂವಾನಿ ಸಜಯಿಲ್ಲೆಂ. ಪೂಣ್ ಥೊಡ್ಯಾ ತೆಂಪಾನ್ ತಿಂ ನಪೈಂಚ್ಚ್ ಜಾಲಿಂ. ನಂತರ್ ಪಾಪಾ ಗ್ರೆಗರಿ ಸೊಳಾವ್ಯಾನ್ 1838 ಇಸ್ವೆಂತ್  ಮರಿಯೆಚ್ಯಾ ಸರ್ಗಾವ್ಹರಣ್ ಫೆಸ್ತಾ ದಿಸಾ ಪರತ್ ಮರಿಯೆಕ್ ಕುರೊವಾನ್ ಸಜಯ್ಲೊ. ಮಾಯ್ ಮಹಿನ್ಯಾಚೆಂ ಮರಿಯೆಚೆಂ ದೆವಾಸಾಂವ್ ಕೆನ್ನಾ ಆರಂಭ್ ಜಾಲೆಂ ಮ್ಹಳ್ಯಾಕ್ ಪಕ್ಕಾ ರುಜ್ವಾತ್ ಮೆಳಾನಾಂ. ತರೀ ತೆರಾವ್ಯಾ ಶತಮಾನಾಂತ್ ಆಲ್ಫೋನ್ಸೊ ಮ್ಹಳ್ಳ್ಯಾ ಬರಯ್ಣಾರಾನ್ ಮೇ ಮಹಿನ್ಯಾಂತ್ ಮರಿಯೆಚಿ ವಿವಿಧ್ ದೆವಾಸ್ಪಣಾಂ, ಫೆಸ್ತಾಂ ಆಚರಣಾಂ ಆಸ್ತಾಲೆಂ ಮ್ಹಣ್ ಬರಯ್ಲಾಂ.

ಸತ್ರಾವ್ಯಾ ಶತಮಾನಾಂತ್ ಮೇ ಮಹಿನೊ ಮರಿಯೆಚ್ಯಾ ಬೆಸಾಂವಾನಿಂ ಭರ್ಲೊಲೊ ಮ್ಹಹಿನೊ ಮ್ಙಣ್ ಸಂಸಾರಾಂತ್ ಥಂಯ್ ಹಾಂಗಾ ಮಾನ್ತಾಲೆ. ಅಸಲೆಂ ಮರಿಯೆಚೆಂ ದೆವಾಸಾಂವ್ 1739  ಇಸ್ವೆಂತ್ ಇಟೆಲಿಂತ್ ಆರಂಭ್ ಜಾಲೆಂ. 1747 ಇಸ್ವೆಂತ್ ಗೆನೋವಾಚ್ಯಾ ಆರ್ಚ್ ಭಿಸ್ಪಾನ್ ಮರಿಯೆಚೆಂ ಮೇ ಮಹಿನ್ಯಾಚೆಂ ದೆವಾಸಾಂವ್ ಘರಾ ಘರಾಂನಿ ಆಚರ್ಸುಂಕ್ ಉಲೊ ದಿಲೊ.

1838 ಇಸ್ವೆಂತ್ ಯಾ ಉಪ್ರಾಂತ್ ರೋಮಾಂತ್ಲ್ಯಾ ಜೆಜ್ವಿತ್ ಪಾದ್ರ್ಯಾಬಾಂನಿಂ ಮೇ ಮಹಿನ್ಯಾಂತ್ ಮರಿಯೆಚ್ಯಾ ಭಕ್ತಿಪಣಾಕ್ ಚಡಿತ್ ಮಹತ್ವ್ ದೀವ್ನ್, ಕ್ರೀಸ್ತೀ ಲೊಕಾ ಥಂಯ್ ಚಡ್ ಆನಿ ಚಡ್ ಮರಿಯೆಚೆಂ ದೆವಾಸಾಂವ್ ಪ್ರಸಾರ್ಲೆಂ. ತಾಂಚ್ಯಾ ಕಾಳ್ಜಾಂತ್ ಮರಿಯೆಚೆಂ ಭಕ್ತಿಪಣ್ ಬರೆಂಚ್ಚ್  ರೊಂಬಾಶೆಂ ಕೆಲೆಂ. ಅಟ್ರಾವ್ಯಾ ಶತಮಾನಾಂತ್ ರೋಮನ್ ಜೆಜ್ವಿತ್ ಪಾದ್ರ್ಯಾಬ್ ಲೆಟೊಮಿಯಾ ಹಾಣೆಂ, ಜೆಜ್ವಿತ್ ಕೋಲೆಜೆಂತ್ಲ್ಯಾ ಭುರ್ಗ್ಯಾಂ ಥಂಯ್ ವಾಯ್ಟ್ ಅನೈತಿಕ್ ಚಾಲ್ ಸವಯೊ ಚಾಲ್ತೆರ್ ಆಸ್ಲೆಲೆಂ ಪಳೆವ್ನ್, ಮರಿಯೆ ಮಾರಿಫಾತ್ ತಾಂಕಾ ನಿತಿಚ್ಯಾ ನಿತಳ್ ನಿಸ್ಕಳ್  ಜಿವಿತಾಕ್ ಪರ್ತುಂಕ್ ತಾಣೆಂ ಮೇ ಮಹಿನ್ಯಾಂತ್ ಮರಿಯೆಚೆಂ ಭಕ್ತಿಪಣ್ ಆರಂಭ್ ಕೆಲೆಂ.

ಆನಿ ಹೆಂಚ್ಚ್ ಮೇ ಮಹಿನ್ಯಾಚೆಂ ಮರಿಯೆಚೆಂ ಭಕ್ತಿಪಣ್ ಸಂಸಾರಾಂತ್ತ್ಯಾ ಹೆರ್ ಜೆಜ್ವಿತ್ ಕೊಲೆಜಿನಿಂ ಆರಂಭ್ ಕೆಲೆಂ ಆನಿಂ ಮುಂದರುನ್ ವ್ಹೆಲೆಂ. 1815 ಇಸ್ವೆಂತ್ ಪಾಪಾ ಪಿಯುಸ್ ಸಾತ್ವ್ಯಾನ್ ಮೇ ಮಹಿನ್ಯಾಚ್ಯಾ ಮರಿಯೆಚ್ಯಾ ಪ್ರತ್ಯೇಕ್ ದೆವಾಸ್ಪಣಾಕ್ ಇಂದುಲ್ಜೆನ್ಸ್ ಪಾಚಾರ್ಲೆಂ. ತಶೆಂಚ್ಚ್ ಪಾಪಾ ಪಿಯುಸ್ ನೊವ್ಯಾನ್ ಮೇ ಮಹಿನ್ಯಾಚ್ಯಾ ಮರಿಯೆಚ್ಯಾ ದೆವಾಸಾಂವಾಕ್ ಚಡಿತ್ ಮಹತ್ವ್ ದೀವ್ನ್ ಮರಿಯೆಚೆಂ ಹೆಂ ದೆವಾಸಾಂವ್ ಚಡ್ ಆನಿ ಚಡ್ ಲೊಕಾ ಮೊಗಾಳ್ ಜಾಯ್ಶೆಂ ಕೆಲೆಂ.

ಮೇ ಮಹಿನೊ ಮರಿಮಾಂಯ್ ಸಬಾರ್ ಸಾಂತಾಂಕ್ ಆನಿ ಭುರ್ಗ್ಯಾಂಕ್ ದಿಶ್ಟಿಕ್ ಪಡ್ ಲ್ಲೊ ಮಹಿನೊ. 1830 ಇಸ್ವೆಂತ್ ಸಾಂ.ಕ್ಯಾಥಾರಿನ್ ಲೆಬೊರೆಕ್ ಆಂಕ್ವಾರ್ ಮರಿ ದಿಶ್ಟಿಕ್ ಪಡ್ಲಿ. ಆನಿ ತಿಕಾ ತಿ ಮರಿ ಸಬಾರ್ ಪಾವ್ಟಿಂ ದಿಶ್ಟಿ ಪಡ್ಲೆಲ್ಯಾ ನಂತರ್ ಸಾಂ. ಕ್ಯಾಥಾರಿನಾನ್, ಹೆಂ ಫಾ| ಎಲ್ಡೆಲ್ ಲಾಗಿಂ ವಾಂಟುನ್ ಘೆತ್ಲೆಂ.  ಉಪ್ರಾಂತ್ 1832 ಇಸ್ವೆಚ್ಯಾ ಮೇ ಮಹಿನ್ಯಾಂತ್ ಪ್ಯಾರಿಸಾಚ್ಯಾ ಭಿಸ್ಪಾಕ್, ತಿಣೆಂ ಆಪ್ಣಾಕ್ ಮರಿ ಕಶಿ ದಿಶ್ಟಿ ಪಡ್ಲಿ ಮ್ಹಣ್ ಎಡ್ರಿಯನ್ ವಾಚೆಟ್ಟೆ ಮ್ಹಳ್ಯಾ ಎಕಾ ಸೋನಾರಾಲಾಗಿಂ ಸಾಂಗುನ್ ಕೆಲ್ಲ್ಯಾ ಅರ್ಲುಕ್ಯಾ ಮುಖಾಂತರ್ ವಿವರಿಲೆಂ. ಆತಾಂ ತಿ ಅಜಾಪಾಚಿ ಅರ್ಲುಕ್, ಪ್ಯಾರಿಸಾಚ್ಯಾ ‘ಅವರ್ ಲೇಡಿ ಓಫ್ ದ ಮಿರಾಕ್ಯುಲಸ್ ಮೆಡಲ್’ ಚ್ಯಾಪಲಾಂತ್ ಆಸಾ. ಆನಿ ಹಾಂಗಾಸರ್ ಹಾರಿ ಹಾರಿಂನಿ ಲೋಕ್ ಭೆಟ್ ದೀವ್ನ್ ಮರಿಯೆಲಾಗಿಂ ಮಾಗ್ತಾ.  ಆನಿ 1876 ಇಸ್ವೆಂತ್ ಸಾಂ. ಕ್ಯಾಥಾರಿನಾಚ್ಯಾ ಮರಣಾ ನಂತರ್, ಮರಿ ತಿಕಾ ದಿಶ್ಠಿಕ್ ಪಡ್ಲೆಲ್ಯಾ ವಿನ್ಯಾಸಾಚ್ಯೊ ಆರ್ಲುಕ್ಯೊ ಸಂಸಾರ್ ಭರ್ ಪ್ರಸಾರ್ ಜಾಲ್ಯೊ.

ತ್ಯಾಉಪ್ರಾಂತ್ 1917 ಇಸ್ವೆಚ್ಯಾ ಮೇ ತೆರಾ ತಾರ್ಕೆರ್ ಮರಿಮಾಂಯ್ ಫಾತಿಮಾಚ್ಯಾ ತೆಗಾಂ ಭುರ್ಗ್ಯಾಂಕ್ ದಿಶ್ಟಿಕ್ ಪಡ್ಲಿ . ತಿ ಸುರ್ಯಾ ಪ್ರಾಸ್ ಚಡ್ ಪರ್ಜಾಳ್ತಾಲಿ ಮ್ಹಣ್ ತಾಣಿಂ ವಿವರಿಲೆಂ. ತಾಂಕಾ ಮರಿಮಾಯೆನ್ ತೆರ್ಸಾಚೆಂ ಭಕ್ತಿಪಣಾ ವಿಶಿಂ ವಿವರುನ್, ತೆರ್ಸಾಚೆಂ ಭಕ್ತಿಪಣ್ ಚಡ್ ಆನಿ ಚಡ್ ಮಾಪಾನ್ ಆಧಾರಿಜಾಯ್ ಮ್ಹಳ್ಳೊ ಸಂದೇಶ್ ತಾಂಚ್ಯಾ ಮಾರಿಫಾತ್ ಆಮಾ ಸರ್ವಾಂಕ್ ದಿಲೊ. ಆನಿ ನಿರಂತರ್ ಮ್ಹಣ್ಚ್ಯಾ ತೆರ್ಸಾ ವರ್ವಿಂ, ಚಲುನ್ ಆಸ್ಚೆಂ ಮಹಾ ಝುಜ್ ಅಕೇರ್ ಜಾತೆಲೆಂ ಮ್ಹಣ್ ತಾಂಕಾ ಭಾಸಾಯ್ಲೆಂ. ತಾಚೊ ಪರಿಣಾಮ್ ಜಾವ್ನ್ ತೆರ್ಸಾ ಮುಂಖಾಂತರ್ ಮರಿಯೆಲಾಗಿಂ ಮಾಗ್ಚೆಂ ದೆವಾಸಾಂವ್ ವಾಡಾತ್ತ್ ಗೆಲೆಂ.

ಲಿತುರ್ಜಿಕ್ ವರ್ಸಾಂತ್ ಆದಿಂ ಆನಿ ಆತಾಂಯೀ ಮಾಯ್ ಮಹಿನ್ಯಾಂತ್ ಮರಿಯೆಕ್ ಮಾನ್ ಕರ್ನ್ ಆಸ್ಚಿಂ ಸಬಾರ್ ಫೆಸ್ತಾಂ ಆಸಾತ್. ಆಪೊಸ್ತಾಲಾಂಚಿ ರಾಣಿ ಮ್ಹಣ್ ಪರ್ಗಟ್‌ಲ್ಲೆಂ ಫೆಸ್ತ್, ಮೇ 13 ವೆರ್ ಫಾತಿಮಾ ಸಾಯ್ಬಿಣ್ ತೆಗಾಂ ಭುರ್ಗ್ಯಾಂಕ್ ದಿಶ್ಟಿಕ್ ಪಡ್ಲೆಲೆಂ ಫೆಸ್ತ್, ಮೇ 24 ವೆರ್ ಮರಿ ಕ್ರೀಸ್ತಾವಾಂಚೊ ಆಧಾರ್ ತಶೆಂಚ್ಚ್ ಮೇ 31 ವೆರ್ ಮರಿ ಎಲಿಜಾಬೆತೆಕ್ ಭೆಟ್‌ಲ್ಲೊ ದೀಸ್ ಮ್ಹಣ್ ಉಗ್ಡಾಸ್ ಕಾಡುನ್ ಆಚರಣ್ ಕರ್ತಾಂವ್.

1799 ಮೇ 4 ತಾರೀಕ್ ಕೆನಾರಾ ಕ್ರೀಸ್ತಾವಾಂಕ್ ಮರಿಯೆ ದ್ವಾರಿಂ ಟಿಪ್ಪು ಸುಲ್ತಾನಾ ಥಾವ್ನ್ ಸುಟ್ಕಾ ಮೆಳ್ಳೊ ದೀಸ್ ಮ್ಹಣ್ ಮರಿಯೆಕ್ ಅರ್ಗಾಂ ದಿಲ್ಲೊ ದೀಸ್ ಮ್ಹಣ್ ಬೋವ್ ಆದ್ಲ್ಯಾ ಕ್ರೀಸ್ತಾಂವಾನಿಂ ಸಾಂಗ್‌ಲ್ಲೆಂ ಮ್ಹಣ್ ಮ್ಹಣ್ತಾತ್. ತೊ ದೀಸ್ ಟಿಪ್ಪು ಝಜಾಂತ್ ಮೆಲ್ಲೊ ದೀಸ್. ಟಿಪ್ಪುಚ್ಯಾ ರಾಜ್ವೊಟೆ ಕಾಳಾರ್ ಆಮ್ಚ್ಯಾ ಕೆನಾರಾ ಕ್ರೀಸ್ತಾವಾಂಕ್ ಟಿಪ್ಪುನ್ ಇಗರ್ಜ್ಯೊ ಕೊಸ್ಳುನ್ ತಾಚ್ಯಾ ಫಾತ್ರಾಂನಿ ಸುಲ್ತಾನ್ ಬತ್ತೇರಿ ಕೊಟೆ ಬಾಂದ್ಲೆಂ. ಕ್ರೀಸ್ತೀ ಲೊಕಾಕ್ ಶ್ರೀರಂಗಪಟ್ಟಣಾಕ್ ಅಂಬೋಡ್ನ್ ವ್ಹೆಲೆಂ. ಅಸಲ್ಯಾವೆಳಾ ಸಬಾರ್ ಜಣ್ ಮರಿಯೆಚೊ ತೇರ್ಸ್ ಮತಿಂತ್, ವೊಂಟಾನಿ ಘುಣ್ಘುಣೊನ್ ಕ್ರೀಸ್ತೀ ಭರ್ವಾಶ್ಯಾನ್ ಪಾಂಯ್ ವಾಟೆನ್ ಚಲಾತ್ತ್ ಗೆಲ್ಲೆ. ಅಸಲ್ಯಾ ಸಂಧರ್ಭಾರ್ ಹಜಾರಾನಿಂ ಕ್ರೀಸ್ತಾಂವ್ ಲೋಕ್ ಮರಣ್ ಪಾವ್ಲೆ. ಆನಿ ಟಿಪ್ಪುಚ್ಯಾ ಮರಣಾ ನಂತರ್ ಪಾಟಿಂ ಆಯ್ಲೆಲ್ಯಾಂನಿಂ ಮಂಗ್ಳುರಾಂತ್ ಪರತ್ ಕ್ರೀಸ್ತೀ ಸಮಡ್ತ್ ಜಿವಾಳ್ ಕೆಲಿ. ಆನಿ ಹಿ ಮೇ ಚಾರ್ ತಾರೀಕ್ ತ್ಯಾ ವೆಳಾ ತೆ ವರ್ಸಾನ್ ವರಸ್  ಮರಿಯೆಕ್ ಅರ್ಗಾಂ ದಿವುನ್ ಆಚರ್ಸಿತಾಲೆ ಮ್ಹಣ್ತಾತ್.

ಅಶೆಂ ಆಮಿ ಮೇ ಮಹಿನ್ಯಾಂತ್ ಮರಿಯೆಚೊ ಉಗ್ಡಾಸ್ ಕಾಡುನ್ ಮರಿಯೆಚೆಂ ದೆವಾಸಾಂವ್ ಕರುನ್ ತಿಕಾ ಹರ್ಸಿಲೆಂ ತರ್, ಆಮ್ಕಾಂ ಜಿಣಿಂ ಭರ್ ತಿಚ್ಯಾ ಪುತಾ ಮುಖಾಂತರ್ ತಿಚಿ ಸಸಾಯ್ ಆಮ್ಕಾಂ ಪಾಟಯ್ತೆಲಿ. ಆನಿ ಆಮ್ಚ್ಯಾ ಜಿವಿತಾಂತ್ ದೆವಾಚಿ ಖುಶಿ ಆಮ್ಚೆಂ ಥಂಯ್ ರುತಾ ಜಾತೆಲಿ ಮ್ಹಳ್ಳ್ಯಾ ಭರ್ವೊಶ್ಯಾನ್ ಆಮ್ಕಾಂ ಭರ್ತೆಲಿ.

■ ರೋನ್ ರೋಚ್ ಕಾಸ್ಸಿಯಾ