ಸ್ತ್ರೀ ಸಾಹಿತಿಂನಿಂ ರಚ್ಲಲೆಂ ಸಾಹಿತ್ಯ್, ತಾಂಚ್ಯಾಚ್ ಸಾದರೀಕರಣಾ ಮಾರಿಫಾತ್ ಸಂಭ್ರಮುನ್, ಆಸ್ವಾದನ್ ಕರ್ಚಿ, ಭಾರತ್ ಸರ್ಕಾರಾಚ್ಯಾ ಸಂಸ್ಕೃತಿ ಸಚಿವಾಲಯಾ ಅದೀನ್ 24 ಭಾಸಾಂ ಪಾಸೊತ್ ವಾವುರ್ಪಿ ಸಾಹಿತ್ಯ್ ಅಕಾದೆಮಿ , ನವಿ ದಿಲ್ಲಿಚಿ ಅಸ್ಮಿತಾ ಕಾರ್ಯಾವಳ್, ಆಯ್ತಾರಾ, ಮೇ 11 ವೆರ್, ಸಾಂಸಾರಿಕ್ ಆವಯಾಂಚ್ಯಾ ದಿಸಾ, ಸಾಂಜೆಚ್ಯಾ 4 ವ್ಹರಾಂಚೇರ್ ಮಂಗ್ಳುರ್ಚ್ಯಾ ವಿಶ್ವ ಕೊಂಕ್ಣಿ ಕೇಂದ್ರಾಂತ್ ಸಾದರ್ ಜಾಲಿ.
ಸಾಹಿತ್ಯ ಅಕಾಡೆಮಿ ಯುವ ಪುರಸ್ಕಾರ್ ಪುರಸ್ಕೃತ್ ಸಾಹಿತಿ ವಿಲ್ಮಾ ಲವೀನಾ ಡಿ ಸೊಜಾ ( ವಿಲ್ಮ, ಬಂಟ್ವಾಳ್) ಹಿಣೆ ಕಾರ್ಯಾವಳಿಚೆಂ ಅಧ್ಯಕ್ಷ್‌ಪಣ್ ಘೆತ್‌ಲ್ಲೆಂ. ಡಯಾನಾ ಶರಲ್ ಲೋಬೊ ಆನಿ ಮೇರಿ ಸಲೋಮಿ ಹಾಣಿ ಕವಿತಾ, ಫೆಲ್ಸಿ ಲೋಬೊ ಹಿಣೆ ಪ್ರಬಂದ್ ಆನಿ ಸ್ಮಿತ ಪ್ರಜ್ಞ ಹಿಣೆ ಮಟ್ವಿ ಕಾಣಿ ಸಾದರ್ ಕೆಲಿ.
ಆಪ್ಲ್ಯಾ ಸಾಹಿತ್ಯ್ ಸಾದರೀಕಣಾಂತ್ ಸ್ತ್ರೀ ಸಾಹಿತಿಂನಿ – ಝುಜ್, ಆವಯ್ ಪ್ರಕೃತಿ, ದೇಶ್- ಮಾತಿ, ಬಾಯ್ಲಾಂಚಿಂ ಸುಟ್ಕಾ ಆನಿ ಸಶಕ್ತೀರಣಾಚೆರ್ ಸಂಕೀರ್ಣ್ ರೂಪಕಾಂ ವಾಪಾರುನ್ ವಿಚಾರ್ ಪ್ರಸ್ತುತ್ ಕೆಲೆ. ಸಾಂಗಾತಿ ಸಾಹಿತಿಂಚ್ಯಾ ಸಾದರೀಕರಣಾಚೆರ್ ಆಪ್ಲೊ ಶರೊ ದೀವ್ನ್, ಕಾರ್ಯಾವಳಿಚಿ ಅಧ್ಯಕ್ಷ್ ವಿಲ್ಮಾನ್ ಆಪ್ಲ್ಯೊ ದೋನ್ ಕವಿತಾ ಪ್ರಸ್ತುತ್ ಕೆಲ್ಯೊ. ತಾಂತ್ಲಿ ಏಕ್ ಕವಿತಾ ಆವಯ್ಪಣಾಚೆರ್ ಆಸ್ಲಿ.
ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಆಡಳ್ತ್ಯಾ ಅಧಿಕಾರಿ ಡೊ| ಬಿ. ದೇವದಾಸ ಪೈ ಹಾಣೆ ಸಯ್ರ್ಯಾಂಕ್ ಆನಿ ಅಕಾಡೆಮಿಚ್ಯಾ ಕಾರ್ಭಾರ‍್ಯಾಂಕ್ ಯೆವ್ಕಾರ್ ಮಾಗ್ಲೊ. ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಸಾಹಿತ್ಯ ಅಕಾಡೆಮಿಚೊ ದಿಶ್ಟಾವೊ, ಆಜ್ ಪಾಸುನ್ ಕೆಲ್ಲೊ ವಾವ್ರ್ ಆನಿ ಪ್ರಸ್ತುತ್ ಮಂಡಳಿನ್ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೆಂ ಸುಂಕಾಣ್ ಘೆತ್ಲ್ಯಾ ಉಪ್ರಾಂತ್ ಕೆಲ್ಲ್ಯಾ ವಾವ್ರಾಚೊ ವಿವರ್ ದೀವ್ನ್, ಕಾರ್ಯಾವಳಿಚ್ಯಾ ಅಧ್ಯಕ್ಷಾಚಿ ಒಳಕ್ ಕರುನ್ ದಿಲಿ.
ಸಾಹಿತ್ಯ ಅಕಾಡೆಮಿ, ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ವಾಂಗ್ಡಿ, ಕಿಟಾಳ್ ಸಂಪಾದಕ್ ಎಚ್ಚೆಮ್, ಪೆರ್ನಾಳಾನ್ ಕಾರ್ಯಾವಳ್ ಚಲವ್ನ್ ವೆಲಿ ಆನಿ ಕಾರ್ಯಾವಳ್ ಸಾದರ್ ಕರುಂಕ್ ಜೋಡ್ ಪಾಲಂವ್ ದಿಲ್ಲ್ಯಾ ಕೊಂಕ್ಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನಾಚೊ ಅಧ್ಯಕ್ಷ್ ಸಿ.ಎ. ನಂದಗೋಪಾಲ ಶೆಣೈ ಆನಿ ವಾಂಗ್ಡ್ಯಾಂಚೊಂ ಅಬಾರ್ ಮಾಂದ್ಲೊ ಆನಿ ದಿನ್ವಾಸ್ ಪಾಟಯ್ಲೆ. ಮಂಗ್ಳುರ್, ಉಡುಪಿ ಆನಿ ಕೇರಳ ಥಾವ್ನ್ ಬರಯ್ಣಾರಾಂನಿ ಆನಿ ಸಾಹಿತ್ಯಾಸಕ್ತಾಂನಿಂ ಅಸ್ಮಿತಾ ಕಾರ್ಯಾವಳಿಂತ್ ವಾಂಟೊ ಘೆತ್ಲೊ.
