ಟುಲಿಫ್ ಲವ್ : ಐರ್ಲೆಂಡ್ ಟು ಹೋಲೆಂಡ್

116

ಟಾಲಾ ಯುನಿವರ್ಸಿಟಿ ಅಸ್ಪತ್ರೆಚ್ಯಾ ಆಪರೇಶನ್ ಥಿಯೇಟರಾಂತ್ಲ್ಯಾ ಇಂಡಿಯನ್ ನರ್ಸಾಂನಿಂ ಹೋಲೆಂಡಾಂತ್ಲ್ಯಾ ಟುಲಿಪ್ ಫೆಸ್ತಾಕ್ ವೆಚೊ ನಿರ್ದಾರ್ ಕೆಲೊ. ಹೋಲೆಂಡಾಂತ್ ಹರ್ಯೆಕಾ ವರ್ಸಾ ಮಾರ್ಚ್ ಥಾವ್ನ್ ಮೇ ಪರ್ಯಾಂತ್ ಟುಲಿಪ್ ಫುಲಾಂಚೆ ಫೆಸ್ತ್ ಆಸ್ತಾ. ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾ ಥಾವ್ನ್ ಹ್ಯಾ ಫೆಸ್ತಾಕ್ ಲೋಕ್ ಯೆತಾ.

ರಜೆಚ್ಯಾ ದಿಸಾನಿಂ ಧಾ ವಾಜ್ತಾ ಪರ್ಯಾಂತ್ ನಿದೊನ್ ಪಡ್ಚಿಂ ಹಾಂವ್ ಬೊಂವ್ಡಿ ಮ್ಹುಣ್ತಾನಾ ಫಾಂತ್ಯಾಚ್ಯಾ ಚಾರಾಂಕ್ ಉಟೊನ್ ತಯಾರ್ ಜಾಲಿಂ. ಮ್ಹಜ್ಯಾ ಸಾಂಗಾತ್ಯಾಂ ಸಂಗಿ ಹಾಂವೀ ಆಮ್ಕಾಂ ಏರ್ ಪೋರ್ಟಾಕ್ ವರೊಂಕ್ ಅಯಿಲ್ಲ್ಯಾ ಟ್ಯಾಕ್ಸೆ ಬಿತರ್ ಘುಸ್ಲಿಂ. ಫಾಂತ್ಯಾಚ್ಯಾ ಸ ವರಾಂಚೆರ್ ಆಮ್ಕಾಂ ಘೆವ್ನ್ ಆಮ್ಚೆಂ ವಿಮಾನ್ ನೆದರ್ಲ್ಯಾಂಡ್ ಉಬೊಂಕ್ ಆಯ್ತೆಂ ಜಾಲ್ಲೆಂ. ವಿಮಾನಾಚ್ಯಾ ಜನೆಲಾ ಥಾವ್ನ್ ಸುರ್ಯೊ ಉದೆಂವ್ಚೆಂ ತೆಂ ದೃಶ್ಯ್ ಪಳಯ್ತಾನಾ ದೊಳ್ಯಾಂ ಆಸ್ಡ್ಯಾನಿಂ ದಾಂಪುಂಕ್ ಇನ್ಕಾರ್ ಕೆಲೆಂ.

ಏಕಾ ಘಂಟ್ಯಾ ಭಿತರ್ ಆಮಿ ಶಿಫೋಲ್ ಆಮ್ಸ್‌ಟರ್‌ರ್ಡ್ಯಾಮ್ ಏರ್ಪೋರ್ಟಾಕ್ ಪಾವ್ಲ್ಯಾಂವ್. ಚಡಾವತ್ ಜಾವ್ನ್ ನೆದರ್ಲ್ಯಾಂಡಾಕ್ ಹೋಲ್ಯಾಂಡ್ ಮ್ಹುಣೊನ್‌ಚ್ ಆಪಯ್ತಾತ್. ಹೋಲೆಂಡ್ ನೆದರ್ಲ್ಯಾಂಡಾಂತ್ಲೊ ಏಕ್ ವೆಗ್ಳೊಚ್ ಜಾಗೊ ಜಾವ್ನಾಸಾ. ಹಾಚೆ ದೋನ್ ಭಾಗ್ ಉತ್ತರ್ ಆನಿಂ ದಕ್ಶಿಣ್ ಹೋಲೆಂಡ್. ಹೋಲೆಂಡಾಂತ್ಲಿಂ 3 ಪ್ರಮುಖ್ ಶೆರಾಂ ಅಮ್‌ಸ್ಟರ್‌ಡ್ಯಾಮ್, ರೋಟ್ಟರ್ ಡ್ಯಾಮ್ ಆನಿ ಹೇಗ್. ಅಮ್‌ಸ್ಟರ್‌ಡ್ಯಾಮ್ ಹ್ಯಾ ತೀನ್ ಶೆರಾಂ ಪಯ್ಕಿಂ ವ್ಹಡ್ಲೆಂ ಶ್ಹೆರ್ ಜಾವ್ನಾಸೊನ್, ನೆದರ್ಲ್ಯಾಂಡ್ಯಾಚಿ ರಾಜದಾನೀಯ್ ಜಾವ್ನಾಸಾ. ಡಚ್ ಹಾಂಗಾಚ್ಯಾ ಲೋಕಾನಿಂ ಉಲಂವ್ಚಿ ಭಾಸ್.

ಏರ್ ಪೋರ್ಟಾ ಥಾವ್ನ್ ಭಾಯ್ರ್ ಯೆತಾನಾ ಹೋಟೆಲಾಚೆಂ ಶಟಲ್ ಬಸ್ಸ್ ಆಮ್ಕಾಂ ರಾಕೊನ್ ಆಸ್‌ಲ್ಲೆಂ. ಆಮ್ಕಾಂ ಬಾರಾ ಜಣಾಂಕ್ ಘೆವ್ನ್ ತೆಂ ಹೋಟೆಲಾ ಕುಶಿನ್ ದಾಂವ್ತಾನಾ ಅಮ್ಚೆಂಚ್ ಖಾಸ್ಗಿ ಶಟಲ್ ಬಸ್ಸ್ ಮ್ಹಳ್ಳ್ಯಾ ಬರಿಂ ಆಮ್ಕಾಂ ಭೊಗ್ಲೆಂ.

ಆಮ್ಚಿಂ ಬ್ಯಾಗಾಂ ಹೊಟೆಲಾಂತ್ ದವರ್ನ್ ಅಮ್‌ಸ್ಟರ್‌ಡ್ಯಾಮಾಚಿ ಸೊಭಾಯ್ ಪಳೆಂವ್ಕ್ ಭಾಯ್ರ್ ಸರ್ಲ್ಯಾಂವ್. ಅಮ್‌ಸ್ಟೆಲ್ ನಂಯ್ ವಯ್ರ್ ಬಾಂದುನ್ ಹಾಡ್‌ಲ್ಲೆಂ ಹೆಂ ಶೆರ್ ಉದ್ಕಾ ವಾಟಾನಿಂ (ಕೆನಾಲ್ಸ್) ಭರ್ಲಾಂ. ದೆಕುನ್ ಹಾಕಾ ಉತ್ತರಾಚೆಂ ವೆನಿಸ್ ಮ್ಹಣ್ ಆಪಯ್ತಾತ್. ಹೆಂ ಶಹರ್ ಸಂಸಾರಾಚೆಂ ಸೈಕಲ್ ರಾಜಧಾನಿ ಮ್ಹಣ್‌ಯೀ ನಾಂವಾಡ್ಲಾಂ. ಹಾಂಗಾಸರ್ ಮೆಟಾ ಮೆಟಾಂಕ್ ರಸ್ತ್ಯಾ ದೆಗೆರ್ ಸೈಕಲಾಂ ಪಳೆಂವ್ಕ್ ಮೆಳ್ತಾತ್. ಕೊಣಾಯ್ಕಿ ಹಿಂ ಸೈಕಲಾಂ ಚಲಂವ್ಚಿ ಪರ್ವಣ್ಗಿ ಆಸಾ.  ಸೈಕಲಾಕ್ ಮ್ಹಣ್ 240 ಮೈಲಾಂಚಿ ವೆಗ್ಳಿಚ್ ವಾಟ್ ಆಸಾ. ಕಾರ್ ಫ್ರೀ ಶೆರ್ ಜಾವ್ನ್ 0 ಎಮಿಶನ್ ಶೆರ್ ಮ್ಹಣ್ ನಾಂವ್ ಜೊಡ್ಚೊ ಹಾಚೆ ಪಾಟ್ಲೊ ದ್ಯೇಯ್ ಜಾವ್ನಾಸಾ.

ಹ್ಯಾ ಶೆರಾಚಿಂ ಮುಖ್ಯ್ ಆಕರ್ಶಣಾಂ ಮ್ಯುಸಿಯಮಾಂ ಜಾವ್ನಾಸಾತ್. ಅನ್ ಫ಼್ರ್ಯಾಂಕ್ ಮ್ಯುಸಿಯಮ್, ವ್ಯಾನ್ ಗೋವ್ ಮ್ಯುಸಿಯಮ್, ಅಮ್‌ಸ್ಟರ್‌ಡ್ಯಾಮ್ ಮ್ಯುಸಿಯಮ್ ಆನಿ  ಹೆರ್. ಅನ್ ಫ಼್ರ್ಯಾಂಕ್ ಜ್ಯುವಿಶ್ ಬರಯ್ಣಾರ್. ಮಹಾಝುಜ್ 2 ವೇಳಾರ್ ನೆದರ್ಲ್ಯಾಂಡಾಕ್ ಜರ್ಮನಿನ್ ಅಪ್ಲ್ಯಾ ತಾಬೆಂತ್ ಘೆತ್‌ಲ್ಲ್ಯಾ ತವಳ್ ಅನ್ ಫ಼್ರ್ಯಾಂಕ್ ತಾಂಚೆಂ ಕುಟಾಮ್ ಆನಿ ಹೆರ್ ಚೊವ್ಗಾಂ ಕೆನಾಲ್ ಹೌಸ್ ಮ್ಹಳ್ಳ್ಯಾ ಕಟ್ವಣಾಚ್ಯಾ ಪಾಟ್ಲ್ಯಾ ಕುಶಿಚ್ಯಾ ಮಾಳಿಯೆರ್ ಲಿಪೊನ್ ಬಸ್‌ಲ್ಲಿಂ. ಝುಜಾಂತ್ ತಾಣಿಂ ಪ್ರಾಣ್ ಹೊಗ್ಡಾಯ್ಲ್ಯಾರೀ ಅನ್ ಫ಼್ರ್ಯಾಂಕಾನ್ ಬರಯಿಲ್ಲಿ ಝುಜಾ ವೇಳಾಚಿ ಡೈರಿ 1947 ವ್ಯಾ ವರ್ಸಾ ಪರ್ಗಟ್ ಜಾಲಿ. ಉಪ್ರಾಂತ್ ತೆಂ ಕಟ್ವಣ್ ಧರ್ಣಿ ಸಮಾ ಕರುಂಕ್ ಮಸ್ತ್ ಪ್ರಯತ್ನ್ ಚಲ್ಲ್ಯಾರೀ ಅನ್ ಫ಼್ರ್ಯಾಂಕ್ ಫ಼ೌಂಡೇಶನ್ ಮ್ಹಳ್ಳ್ಯಾ     ಸಂಸ್ಠ್ಯಾನ್ ಹೆಂ ಅಡಾವ್ನ್ ಮೇ 1960 ವ್ಯಾ ವರ್ಸಾ ಹೆಂ ಏಕ್ ಮ್ಯುಸಿಯಮ್ ಜಾವ್ನ್ ಬದ್ಲಿಲೆಂ. ತಾಣಿಂ ಲಿಪೊನ್ ಬಸ್‌ಲ್ಲೆಂ ತೆಂ ಕೂಡ್ ಆನಿ ಮಾಳಿಯೆಕ್ ವೆಚಿ ತಿ ಅಶೀರ್ ವಾಟ್ ಪಳಯ್ತಾನಾ ಆತಾಂಯ್  ಕುಡಿಂತ್ ಶಿರ್ಶಿರೊ ದಾಂವ್ತಾ.

ಅನ್ಯೇಕ್ ಪ್ರಮುಖ್ ಆಕರ್ಶಣ್ ವಿನ್ಸೆಂಟ್ ವ್ಯಾನ್ ಗೋವ್ ಹಾಚ್ಯಾ ಚಿತ್ರ್ ಕಲೆಚೆಂ ಮ್ಯುಸಿಯಮ್. ದೋನ್ ಮಾಳಿಯೆಚ್ಯಾ ಹ್ಯಾ ಕಟ್ವಣಾಂತ್ ವ್ಯಾನ್ ಗೋವಾಚ್ಯಾ ಚಿತ್ರ್ ಕಲೆ ಸಾಂಗಾತಾ ತಾಚಿ ಸಗ್ಳಿ ಜಿಣಿಂಯ್ ವಿವರ್ಸಿಲ್ಯಾ. ಚೀತ್ ದೀವ್ನ್ ವಾಚ್ಲ್ಯಾರ್ ದೊಳ್ಯಾಂ ಇಡ್ಯಾಂನಿ ದುಖಾಂ ಪಾಜಾರ್ಚಿಂ ಖಂಡಿತ್.

ಅಮ್‌ಸ್ಟರ್‌ಡ್ಯಾಮ್ ಉದ್ಕಾ ವಯ್ಲೆಂ ಶಹರ್ ಜಾಲ್ಲ್ಯಾನ್ ಉದ್ಕಾಂತ್ಲ್ಯಾನ್ ಸಗ್ಳ್ಯಾ ಶಹರಾಚಿ ಸೊಭಾಯ್ ಚಾಕೊಂಕ್ ಸಿಟಿ ಕ್ರೂಜಾಚೆರ್ ಚಡ್ಲ್ಯಾಂವ್. ಭೋವ್ ಸೊಬಿತ್ ಶಹರಾಚಿ ಸೊಭಾಯ್ ಕಾಳ್ಜಾಂತ್ ಆನಿ ಕ್ಯಾಮರಾಂತ್ ಕೈದ್ ಕರ್ನ್ ಪಾವ್ಲ್ಯಾಂವ್ ದಿಸ್ ಈಸ್ ಹೋಲೆಂಡ್ ಮ್ಹಳ್ಳ್ಯಾ ಜಾಗ್ಯಾಕ್. ಥಂಯ್ಸರ್ ಆಮ್ಕಾಂ ಹೋಲೆಂಡಾ ವಿಶ್ಯಾಂತ್ ಮಸ್ತ್ ಜಾಣ್ವಾಯ್ ಲಾಬ್ಲಿ. (ಸಕಯ್ಲ್ ಚಿಡ್ಕಾಯಿಲ್ಲ್ಯಾ ವಿಡಿಯೋಂತ್ ಸವಿಸ್ತಾರ್ ವರ್ಣಿಲಾಂ)

ದರ್ಣಿ ಥಾವ್ನ್ ಶೆಂಬೊರ್ ಮೀಟರ್ ಪಯ್ರ್ ಕಟ್ವಣಾಚ್ಯಾ ತಕ್ಲೆರ್ ಏಕ್ ಪಾಳ್ಣೆಂ ಅಸಾ. ಕಾಳಿಜ್ ಘಟ್ ಅಸ್‌ಲ್ಲಿಂ ದೊಳೆ ಉಗ್ತೆ ಕರ್ನ್ ಸಗ್ಳೆಂ ಶಹರಚೆರ್ ಗೀದಾ ನದರ್ ಮಾರ್ತಾತ್. ಉಪ್ರಾಂತ್ ಅಮಿಂ 5D ವಿಮಾನಾರ್ ಪಯ್ಣ್ ಕೆಲೆಂ. ಆಮಿ  ಬಸ್‌ಲ್ಲ್ಯಾ ಕಡೆಚ್ ಬಸ್ಲ್ಯಾರೀ 5D ವಿಮಾನ್ ಸಗ್ಳ್ಯಾ ನೆದರ್ಲ್ಯಾಂಡಾ ವಯ್ಲ್ಯಾನ್ ಉಬ್ತಾನಾ ಅಂಗಾಚಿ ಲೋಂವ್ ಉಬಿ ಜಾಲಿ.

ಹ್ಯಾ ಶಹರಾಕ್ ಪಾತ್ಕಾಂಚೆಂ ಶಹರ್ ಮ್ಹಳ್ಳೆಂಯ್ ನಾಂವ್ ಆಸಾ. ಹಾಂಗಾ ಅಸ್ಚ್ಯಾ ರೆಡ್ ಡಿಸ್ಟ್ರಿಕ್ಟ್ ಮ್ಹಳ್ಳಾ ಜಾಗ್ಯಾರ್ ಭುಂಯ್ಕ್ ಕಾಳೊಕ್ ಪಡ್‌ಲ್ಲೆಂಚ್ ತಾಂಬ್ಡೆ ದಿವೆ ಜಳ್ತಾತ್ ಆನಿ ಬಾಯ್ಲಾಂ ಅಪ್ಲೆಂ ಆಂಗ್ ವಿಕ್ರಾಪಾಕ್ ಘಾಲ್ತಾತ್. ಏಕ್ ವ್ಯಕ್ತಿ ಆಪ್ಲ್ಯಾ ಪೋಟಾಚ್ಯಾ ಭುಕೆ ಖಾತಿರ್ ಕಿತೇಂಯ್ ಕರುಂಕ್ ಸಕ್ತಾ ತರ್ ಅನ್ಯೇಕ್ ವ್ಯಕ್ತಿ ಅಪ್ಲ್ಯಾ ಕುಡಿಚಿ ತಾನ್ ಭಾಗಂವ್ಕ್ ಅಸ್ಕತ್ ವ್ಯಕ್ತಿಚೊ ಫಾಯ್ದೊ ಉಟಯ್ತಾ ಮ್ಹಳ್ಳೆಂ ಚಿಂತೂನ್ ಮನ್ ದುಕ್ಲೆಂ.

ಸಾಂಜೆಚ್ಯಾ ಜೆವ್ಣಾಕ್ ಮಾಂಯ್ಗಾಂವ್ಚೆಂ ಜೆವಾಣ್ ಜೆಂವ್ಚಿ ಅಶಾ ಜಾಲಿ ದೆಕುನ್ ವಾಟ್ ದರ್ಲಿ ಸರವನ ಭವನಚಿ. ರುಚಿಕ್ ಗಾಂವ್ಚೆಂ ಜೆವಾಣ್ ಜೇವ್ನ್ ಪಾವ್ಲ್ಯಾಂವ್ ಪಾಟಿಂ ಆಮ್ಚ್ಯಾ ಹೋಟೆಲಾಕ್.

ದುಸ್ರ್ಯಾ ದಿಸಾ ಸಕಾಳಿಂ ವೆಗ್ಗಿಂ ಉಟೊನ್ ನಾಸ್ಟೊ ತಿರ್ಸುನ್ ಟುಲಿಪ್ ಫೆಸ್ತಾಚಿ ಪ್ಯಾಕೇಜ್ ಘೆತ್‌ಲ್ಲ್ಯಾ ಬಸ್ಸಾರ್ ಚಡ್ಲ್ಯಾಂವ್. ಬಸ್ಸ್ ಪಯ್ಲೆಂ ಆಮ್ಕಾಂ ಟುಲಿಪ್ ಫುಲಾಂನಿ ಸೊಭ್ಚ್ಯಾ  ಗಾದ್ಯಾಂಕ್ ವರ್ನ್ ಗೆಲೆಂ. ತ್ಯಾ ಗಾದ್ಯಾಚ್ಯಾ ಮಾಲಿಕಾನ್ ಅಮ್ಕಾಂ ಟುಲಿಪಾ ವಿಶ್ಯಾಂತ್ ಮಸ್ತ್ ಸಮ್ಜಣಿ ದಿಲಿ. ತೊ ಫರ್ಮಳ್ ಆನಿ ತಿ ಸೊಭಾಯ್ ಪಳೆವ್ನ್ ಥಂಯ್ ಥಾವ್ನ್ ಪಾಟಿಂ ವಚೊಂಕ್ ಮನ್ ಆಯ್ಲೆಂ ನಾಂ.

ಉಪ್ರಾಂತ್ ಬಸ್ಸ್ ಆಮ್ಕಾಂ ವಿಂಡ್ ಮಿಲ್ಲ್ ಕ್ರೂಜಾಕ್ ವರ್ನ್ ಗೆಲೆಂ. ವಾರ‍್ಯಾ ಮಿಲ್ಲಾಂತ್ ಕಿತ್ಲೆ ಉಪ್ಯೋಗ್ ಆಸಾತ್. ಆನಿ ನೆದರ್ಲ್ಯಾಂಡಾಂತ್ ತೆ ಕಿತ್ಯಾಕ್ ವಾಪಾರ್ತಾತ್  ಮ್ಹಳ್ಳೆ ವಿಶ್ಯಾಂತ್ ಸಮ್ಜೊನ್ ಘೆತ್ಲೆಂ.  ಉಪ್ರಾಂತ್  ಬಸ್ಸ್ ಆಮ್ಕಾಂ ಘೆವ್ನ್ ಪಾವ್ಲೆಂ ಕೆವ್ ಕೆನ್ ಹೋಫ್ ಟುಲಿಪ್ ಫುಲಾಂಚ್ಯಾ ವೊಡ್ತಾಕ್. ಹೊ ಜಾಗೊ ಮ್ಹಾಕಾ ಭೊವ್ ಚಡ್ ಪಸಂದೆಚೊ. ತ್ಯಾ ದಿಸಾ ಥಂಯ್ ಫುಲಾಂಚಿ ಪರೇಡ್ ಆಸ್‌ಲ್ಲ್ಯಾನ್ ಸಂಸಾರಾಚ್ಯಾ ಕೊನ್ಶ್ಯಾ ಕೊನ್ಶ್ಯಾ ಥಾವ್ನ್ ಹಾರಿ ಹಾರಿಂನಿ  ಲೋಕ್ ಬಸ್ಸಾನಿಂ ಥಂಯ್ಸರ್ ಅಯಿಲ್ಲೊ. ಪ್ರವೇಶ್ ದ್ವಾರಾಚೆರ್ ಆಸ್ಲೆಲ್ಯಾ ಬಾಯ್ಲೆಲಾಗಿಂ ವಿಚಾರ್ಲೆಂ “ಹಾಂಗಾಸರ್ ಆಜ್ ಕಿತ್ಲೊ ಲೋಕ್ ಅಯ್ಲಾ”  ತಿ ಮ್ಹುಣಾಲಿ “ಸಾಟ್ ಹಜಾರಾಚೆಂ ಬುಕ್ಕಿಂಗ್ ಜಾಲಾಂ”. ಆಯ್ಕೊನ್ ಮ್ಹಜಿ ತಕ್ಲಿ ಘುಂವ್ಲಿ. ಹಾಂವೆ ಮ್ಹಜ್ಯಾ ಸಾಂಗಾತ್ಯಾಂಕ್ ಸಾಂಗ್ಲೆಂ ಹಾಂಗಾ ಥಾವ್ನ್ ವೆಗ್ಗಿಂ ಭಾಯ್ರ್ ಪಡಾಜಯ್ ಪಡ್ತಾಲೆಂ ನಾಂ ತರ್ ಆಮಿ ಮದ್ಯಾನ್ ರಾತ್ ಪರ್ಯಾಂತ್ ಹಾಂಗಾಸರ್ ಕ್ಯೂ ರಾವಾಜೇ ಪಡ್ತಾಲೆಂ. ತೀಂಯ್ ಒಪ್ಲಿಂ.

ಕೆವ್ ಕೆನ್ ಹೋಫ್  – ಯುರೋಪಾಚೆಂ ವೋಡ್ತ್

ಕೆವ್ ಕೆನ್ ಹೋಫ್ ಯುರೋಪಾಚೆಂ ವೋಡ್ತ್ ಮ್ಹಣ್ ನಾಂವಾಡ್ಲಾಂ. ಹೆಂ ಸಂಸಾರಾಂತ್ಲೆಂ ವ್ಹಡ್ಲೆಂ ಫುಲಾಂಚೆಂ ವೋಡ್ತ್ ಜಾವ್ನಾಸಾ.  79 ಎಕ್ರ್ಯಾಚ್ಯಾ ಹ್ಯಾ ವೊಡ್ತಾಂತ್ ವರ್ಸಾಕ್  7 ಮಿಲಿಯನ್ ಫುಲಾಂಚೆ ಬಲ್ಬ್ ಲಾಯ್ತಾತ್. ಹೆಂ ವೋಡ್ತ್ ಟುಲಿಪ್ ಫುಲಾಂಕ್ ನಾಂವಾಡ್ಲಾಂ ತರೀ ಹಾಂಗಾಸರ್ ಡ್ಯಾಫೊಡಿಲ್, ಹೈಸಿಂತಾ, ಲಿಲ್ಲಿ, ಗುಲೊಬ್, ಐರಿಸ್, ಆನಿ  ಕಾರ್ನೇಶನ್ ಫುಲಾಂಯ್ ಪಳೆಂವ್ಕ್ ಮೆಳ್ತಾತ್.

ಹ್ಯಾ ಫುಲಾಂಚಿ ಸೊಭಾಯ್ ಪಳೆವ್ನ್ ಫರ್ಮಳ್ ಘೆವ್ನ್ ಚಲ್ತಾನಾ ಪುರಾಸಣ್‌ಚ್ ಭೊಗಾನಾ. ಸಗ್ಳೆಂ ವೋಡ್ತ್  ಭಂವೊನ್ ಸಾಂಜ್ ಜಾಲ್ಲಿಚ್ ಗಮನಾಕ್ ಆಯ್ಲಿ ನಾ. ಲೋಕಾಚ್ಯಾ ಖೆಟಿ ಥಾವ್ನ್ ಭಾಯ್ರ್ ಪಡೊನ್ ಕಶೇಂಯ್ ಬಸ್ಸಾರ್ ಬಸ್ಲ್ಯಾಂವ್. ಪೂಣ್ ಬಸ್ಸ್ ಆಮ್ಚೆಂ ರಸ್ತ್ಯಾರ್ ಟ್ರಾಫಿಕಾಂತ್ ಸಾಂಪ್ಡಾಲೆಂ.

ದೋನ್ ಘಂಟೆ ಬಸ್‌ಲ್ಲ್ಯಾ ಕಡೆಚ್ ಬಸ್ಸಾರ್ ಬಸೊನ್ ಕಾಂಠಾಳೊ ಆಯ್ಲೊ. ಹಾಂವ್ ವೊಡ್ತಾಂತ್ ಪುಣೀ ಆನಿ ಥೊಡೊ ವೇಳ್ ಟುಲಿಪಾ ಸಗಿಂ ಖರ್ಚಿತಾಂ ಆಸ್ಲಿಂ ಮ್ಹಣ್ ಭೊಗ್ಲೆಂ. ರಾತಿಚ್ಯಾ ಸಾತಾಂಕ್ ಹೊಟೇಲಾಕ್ ಪಾವ್ಲ್ಯಾಂವ್. ಕುಡಿಚಿ ನಿತಳಾಯ್ ತಿರ್ಸುನ್ ಹೊಟೆಲಾಚ್ಯಾ ರೆಸ್ಟೊರೆಂಟಾಂತ್ ರಾತ್ಚೆಂ ಜೆವಾಣ್ ಸಂಪಯ್ಲೆಂ. ಹ್ಯಾ ಚಲಿಯಾಂಚ್ಯಾ ಟ್ರಿಪ್ಪಾಚ್ಯಾ ಉಡಾಸಾಕ್ ಸಾಂಗಾತಾ ಮೆಳೊನ್ ಇನ್ಸ್ಟಾಗ್ರಾಮ್ ರೀಲ್‌ಯ್ ಕೆಲೆಂ. ಹಾಸೊನ್ ನಾಚೊನ್ ಮದ್ಯಾನ್ ರಾತಿಂ ಉಶ್ಯಾಕ್ ಮಾತೆಂ ತೆಂಕ್ಲೆಂ.

ತಿಸ್ರ್ಯಾ ದೀಸ್ ಆಮಿ ಗೇತೂರ್ನ್ ಮ್ಹಳ್ಳ್ಯಾ ಹಳ್ಳೆಕ್ ವೆಚೊ ನಿರ್ದಾರ್ ಕೆಲ್ಲೊ. ಹ್ಯಾ ಹಳ್ಳೆಕ್ ವೆನಿಸ್ ಆಫ್ ನೆದರ್ಲ್ಯಾಂಡ್ಸ್  ಮ್ಹಣ್ ಆಪಯ್ತಾತ್. ನೆದರ್ಲ್ಯಾಂಡಾಚ್ಯಾ ಉತ್ತರಾಕ್ ಆಸ್ಚಿ ಹಿ ಲ್ಹಾನ್ ಹಳ್ಳಿ ಗೇತೂರ್ನ್. ಥಂಯ್ಚೊ ಲೋಕ್ “ಹೇತೂರ್ನ್” ಮ್ಹಣ್ ಉಚ್ಹಾರಣ್ ಕರ್ತಾತ್. ತಿಂ ಸಾಂಗ್ತಾತ್ ಹ್ಯಾ ರಸ್ತೆ ನಾತ್ಲ್ಯಾ ಹಳ್ಳೆಕ್ ಹರ್ಯೆಕಾ ವರ್ಸಾ ಎಕ್ ಮಿಲಿಯನ್ ಲೋಕ್ ಸಂಸಾರಾಚ್ಯಾ ಮುಲ್ಯಾ ಮುಲ್ಯಾ ಥಾವ್ನ್ ಪಯಣ್ ಕರ್ತಾತ್. ಹ್ಯಾ ಹಳ್ಳೆಂತ್ ಕಾರಾಂ ವಚೊಂಕ್ ರಸ್ತೆ ನಾಂತ್. ಆದಿಂ ಸೈಕಲಾಂಕ್ ಸಮೇತ್ ವಾಟ್ ನಾತ್‌ಲ್ಲಿ. ಆತಾಂ ಬಾರೀಕ್ ವಾಟ್ ಕೆಲ್ಯಾ.

ಗೇತೂರ್ನ್ – ವೆನಿಸ್ ಆಫ್ ನೆದರ್ಲ್ಯಾಂಡ್ಸ್

ಹಾಂಗಾ ಹರ್ಯೆಕ್ಲ್ಯಾಂಚ್ಯಾ ಘರಾ ಬೋಟಿ ಅಸಾತ್. ತಾಂತುಂಚ್ ತಾಣಿಂ ಪಯ್ಣ್  ಕರ್ಚೆಂ.  ಶಹರಾಚ್ಯಾ ಅವಾಜಾ ಥಾವ್ನ್ ಪಯ್ಸ್ ಆಸ್ಚಿ ಹಿ ಹಳ್ಳಿ, ಹಾಂಗಾಚೆಂ ಶಾಂತ್ ವಾತಾವರಣ್ ಹರ್ಯೆಕ್ಲ್ಯಾಕ್ ಹ್ಯಾ ಹಳ್ಳೆಚೆರ್ ಮೋಗ್ ಉದೆಶೆಂ ಕರ್ತಾ. ಹಿ ಹಳ್ಳಿ ಪಳೆಂವ್ಕ್ ಆಮಿ ಬೋಟಿರ್ ಚಡ್ಲ್ಯಾಂವ್. ಬೋಟಿರ್ ವಿವಿಂಗಡ್ ಚೀಸ್ ಮಾಂಡುನ್ ದವರ್‌ಲ್ಲಿ. ತಿ ಹಳ್ಳಿ ಚೀಜ್ ಉತ್ಪಾದನಾಕ್ ನಾಂವಾಡ್ಲ್ಯಾ. ಬೋಟಿರ್ ಬಸೊನ್ ತ್ಯಾ ಹಳ್ಳೆಚಿ ಸೊಭಾಯೆ ಸಂಗಿ ಮೆಜಾರ್ ಮಾಂಡ್‌ಲ್ಲಿ ಚೀಜ್‌ಯ್ ಜಿರಯ್ಲಿ. ತ್ಯಾ ಬೋಟಿಚ್ಯಾ ಮಾಲಕಾನ್ ತ್ಯಾ ಗಾಂವಾ ವಿಶಿಂ, ಥಂಯ್ಚ್ಯಾ ಲೋಕಾ ವಿಶಿಂ ವಿವರಣ್ ದಿಲೆಂ. ಉಪ್ರಾಂತ್ ಬೋಟಿ ಥಾವ್ನ್ ದೆಂವೊನ್ ದೊನ್ಪಾರಾಚೆಂ ಜೆವಾಣ್ ತಿರ್ಸುನ್ ಪಾಂಯ್ ವಾಟೆನ್ ತ್ಯಾ ಹಳ್ಳೆಚಿ ಭೊಂವ್ಡಿ ಮಾರ್ಲಿ.

ಸಾಂಜೆಚ್ಯಾ ಸ ವರಾಂಕ್ ಪಾಟಿಂ ಹೊಟೆಲಾಕ್ ಪಾವ್ಲ್ಯಾಂವ್. ಕುಡಿಚಿ ನಿತಳಾಯ್ ತಿರ್ಸುನ್ ಏರ್ ಪೋರ್ಟಾಚಿ ವಾಟ್ ದರ್ಲಿ. ವೀಜ್ ದಿವ್ಯಾನಿಂ ಪರ್ಜಳ್ಚ್ಯಾ ಅಮ್‌ಸ್ಟರ್‌ಡ್ಯಾಮಾಕ್ ಆದೇವ್ಸ್ ಮಾಗೊನ್ ಪಾವ್ಲ್ಯಾಂವ್ ಪಾಟಿಂ ಡಬ್ಲಿನಾಕ್.

■ ಮೋನಿಕಾ, ಶಾಂತಿಪುರ