ದುಬಯ್‌ಚ್ಯಾ ಅಲ್ ನಾಸರ್ ಲೀಸರ್ ಲ್ಯಾಂಡ್ ನಶ್ವನ್ ಸಾಲಾಂತ್ ಮ್ಯಾಂಗಲೋರ್ ಕೊಂಕಣ್ಸ್ ದುಬೈ ಹಾಚ್ಯಾ ಫುಡಾರ್ಪಣಾರ್, ಗೀತ್ ಗಜಾಲ್ ಪಂಗಡ್ ಆನಿ ಆಂಕ್ರಿ.ಕಾಮ್ ಜಾಳಿಜಾಗ್ಯಾಚ್ಯಾ ಜೋಡ್ ಆಸ್ರ್ಯಾರ್ , ಯುಎಇಚ್ಯಾ ಕೊಂಕಣಿ ಕವಿಂ ಥಾವ್ನ್ ಕೊಂಕಣಿ ಕವಿತಾ ಸಾದರೀಕರಣ್ ಕವಿತಾ ಸುವಾದ್ ಆನಿ ಯುಎಇಚ್ಯಾ ಕೊಂಕಣಿ ಭುರ್ಗ್ಯಾಂ ಥಾವ್ನ್ ಅಭಿನಯಾತ್ಮಕ್ ಶೈಲೆರ್ ಕೊಂಕಣಿ ಕವಿತಾ ಪ್ರಸ್ತುತ್ ಕರ್ಚೆಂ ಕಾವ್ಯ್ ಪ್ರಯೋಗ್ ಜೋಡ್ ಕಾರ್ಯಿಂ ವ್ಹಡಾ ಸಂಭ್ರಮಾನ್ ಪ್ರಸ್ತುತ್ ಜಾಲಿಂ.
ಮ್ಯಾಂಗಲೋರ್ ಕೊಂಕಣ್ಸ್ ದುಬೈ ಅಧ್ಯಕ್ಷ್ ಮಾನೆಸ್ತ್ ಸ್ಟೇಫನ್ ಮಿನೇಜಸ್ ವಾಮಂಜೂರ್ ಹಾಣಿಂ ಕಾರ್ಯಾಚೊ ಮಾನಾಚೊ ಸಯ್ರೊ ಶ್ರೀ ಲ್ಯಾನ್ಸಿ ಡಿಸೋಜ – ಆಡಳ್ತೆಂ ನಿರ್ದೇಶಕ್, ಲೀಟನ್ ಶಿಪ್ಪಿಂಗ್ ಆನಿ ಜಮ್ಲೆಲ್ಯಾ ಸರ್ವ್ ವೊವ್ಳ್ಯಾಂಕ್ ಗೋಡ್ – ಉದ್ಕಾಚ್ಯಾ ಗೌರವಾನ್ ಯೆವ್ಕಾರ್ ಮಾಗ್ಚ್ಯಾ ಸಂಗಿ ಕಾರ್ಯಾಚಿ ಸುರ್ವಾತ್ ಜಾಲಿ. ಅಧ್ಯಕ್ಷ್ ಸ್ಟೀಫನ್ ಹಾಣಿಂ ಬಾಯ್ ಅವಿನಾ ಮಿಯಾರ್ ಹಿಚಿ “ಕವಿತಾ” ಮಾತಾಳ್ಯಾಚಿ ಕವಿತಾ ಸಾದರ್ ಕರುನ್ ಕವಿಗೋಷ್ಟಿಚಿ ಉಗ್ತಾವ್ಣಿ ಕೆಲಿ.
ನಾಮ್ಣೆಚೊ ಕವಿ ರೋಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಕವಿತಾ ಸುವಾದ್ ಕಾರ್ಯಾಚೊ ಸೂತ್ರ್‌ಧಾರ್ ಜಾವ್ನಾಸೊನ್, ಅನ್ನು ಕುಲ್ಶೇಕರ್, ರೊನಾಲ್ಡ್ ಒಲಿವೆರಾ ಪಡುಕೋಣೆ, ಪ್ರೀತಿ ಸೀಮಾ ಡಿಸೋಜ ಬಿಕರ್ನಕಟ್ಟೆ, ಸನ್ನು ನಿಡ್ಡೋಡಿ, ಮೆಲ್ವಿನ್ ಕಲಾಕುಲ್, ದಿನೇಶ್ ಕೊರೆಯಾ, ವಲೇರಿಯನ್ ಅಲ್ಮೇಡಾ, ಲ್ಯಾನ್ಸಿ ನೊರೊನ್ಹಾ ಬೆಳ್ಳೂರ್, ಸುದರ್ಶನ್ ಹೆಗ್ಡೆ, ಅನಿಲ್ ಕರ್ಡೋಜ ಬೆಳ್ಮಣ್, ಜಾನೆಟ್ ಮಡಂತ್ಯಾರ್, ಫೇಬಿಯನ್ ಸಂತೋಶ್ ಅರ್ವಾ, ಕಿರಣ್ ನಿರ್ಕಾಣ್, ಸನ್ನು ಮೋನಿಸ್ ಬೊಳಿಯೆ, ಹಾಣಿ ಆಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ ತರ್, ಬಾಳ್ ನಿಕೋಲ್ ಈವಾ ತಾವ್ರೊನ್ ಕಿರಣ್ ನಿರ್ಕಾಣಾಚಿ “ಆಂಬೆ” ಬಾಳ್ ಸಾಹಿತ್ಯಾಚಿ ಕವಿತಾ ಪ್ರಸ್ತುತ್ ಕೆಲಿ. ಸ್ಟೇಫನ್ ಮಿನೇಜಸ್ ಹಾಣಿಂ ಕವಿ ಮಿತ್ರಾಂಕ್ ಗುಲೊಬ್ ದೀವ್ನ್ ವೆದಿಕ್ ಸ್ವಾಗತ್ ಮಾಗ್ಲೊ.
ಕವಿತಾ ಸುವಾದ್ ನಂತರ್ ಪ್ರಸ್ತುತ್ ಜಾಲ್ಲೆಂ ಕಾವ್ಯ್ ಪ್ರಯೋಗ್ ಸರ್ವ್ ಲೊಕಾಚಿಂ ಕಾಳ್ಜಾಂ ಜಿಕ್ಲೆಂ. ಲಿಯೋರಾ ಡಿಸೋಜ, ಶನೆಲ್ ಡಾಲ್ಮೇಡಾ, ಡೆಲಿಶಾ ಕೊರೆಯಾ, ಡಿಯೋನಾ ಕೊರೆಯಾ, ಅನೊರ್ ಮೆಡೋನ್ಸಾ, ಅಮೊರ್ ಮೆಂಡೋನ್ಸಾ ಆನಿ ಸಿಯಾನಾ ಮಥಾಯಸ್ ಹಾಣಿಂ, ಮೆಲ್ವಿನ್ ಕಲಾಕುಲ್, ಆನ್ಸ್ಟಿನ್ ಕಲಾಕುಲ್ ಆನಿ ರೋಹನ್ ಕಲಾಕುನ್ ಹಾಣಿಂ ಸಂಯೋಜನ್ ಕರ್ನ್, ಸಂಗೀತ್ ದೀವ್ನ್ ನಿರ್ದೇಶನ್ ಕೆಲ್ಲ್ಯಾ ಅಭಿನಯಾತ್ಮಕ್ ಶೈಲೆರ್ ಕವಿತಾ ಸಾದರ್ ಕರ್ಚ್ಯಾ ಕಾವ್ಯ್ ಪ್ರಯೋಗ್ ಪ್ರದರ್ಶನಾ ಮುಕಾಂತ್ರ್ ಜಮ್ಲೆಲ್ಯಾ ಲೊಕಾಕ್ ತಾಂಚ್ಯಾ ಮಾಂಯ್ ಗಾಂವಾಕ್, ಗಾಂವ್ಚ್ಯಾ ಫೆಸ್ತಾಂಕ್, ಗಾದ್ಯಾ ಮೆರೆಂಕ್ ಆನಿ ಮಾತ್ಯೆಚ್ಯಾ ಪರ್ಮಳಾಕ್ ವೆದಿರ್ ಅನ್ಭೊಗ್ ಕರುಂಕ್ ಅವ್ಕಾಸ್ ಕರ್ನ್ ದಿಲೊ.
ಮಾನಾಚೊ ಸಯ್ರೊ ಶ್ರೀ ಲ್ಯಾನ್ಸಿ ಡಿಸೋಜಾನ್ ಸರ್ವ್ ಭುರ್ಗ್ಯಾಂಕ್ ಉಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ. ಆಪ್ಲ್ಯಾ ಉಲವ್ಪಾಂತ್ ಹ್ಯಾ ಕಾರ್ಯಾಂತ್ ಭಾಗ್ ಘೆತ್‌ಲ್ಲ್ಯಾ ಸರ್ವ್ ಭುರ್ಗ್ಯಾಂಕ್, ಕವಿಂಕ್ ಆನಿ ಹಾಂಕಾಂ ಸರ್ವಾಂತ್ ಸಾಂಗಾತಾ ಹಾಡ್‌ಲ್ಲ್ಯಾ ಮ್ಯಾಂಗಲೋರ್ ಕೊಂಕಣ್ಸ್ ದುಬಯ್ ಆನಿ ಅಧ್ಯಕ್ಷ್ ಸ್ಟೇಫನ್ ವಾಮಂಜೂರ್ ತಾಂಕಾಂ ಶಾಭಾಸ್ಕಿ ಪಾಠಯ್ಲಿ.
ಆಪ್ಲ್ಯಾ ಸಂದೇಶಾಂತ್ “ಆಜ್ ಕೊಂಕಣಿ ಮುಕ್ಲ್ಯಾ ಪಿಳ್ಗೆಕ್ ಪಾವಂವ್ಚ್ಯಾ ವಾಟೆರ್, ಆಮಿ ಕೊಂಕಣಿ ಸದಾಂ ಉಲಂವ್ಚಿ ಆನಿ ಅಸಲ್ಯಾ ಕಾರ್ಯಕ್ರಮಾಂ ಮುಕಾಂತ್ರ್ ಲೊಕಾಂಕ್ ಪಾವಂವ್ಚಿ ಗರ್ಜ್ ಆಸಾ. ಅಸಲ್ಯಾ ಪ್ರಯತ್ನಾಕ್ ಕೊಂಕಣಿಚೊ ಅಭಿಮಾನಿ ಜಾವ್ನ್ ಮ್ಹಜೊ ಸಾಂಗಾತ್ ಸದಾಂ ಆಸ್ತಲೊ” ಮ್ಹಣ್ ಭರ್ವಸೊ ದಿಂವ್ಚ್ಯಾ ಸಾಂಗಾತಾ ಸರ್ವಾಂಕ್ ಮಾನೆಸ್ತ್ ಲ್ಯಾನ್ಸಿನ್ ಉಲ್ಲಾಸ್ ಪಾಟಯ್ಲೆ.
ಥೊಡ್ಯಾ ಹಾಫ್ತ್ಯಾಂ ಆದಿಂ ಮ್ಯಾಂಗಲೋರ್ ಕೊಂಕಣ್ಸ್ ದುಬಯ್ ಸಂಸ್ಥ್ಯಾಚೊ ಅಧ್ಯಕ್ಷ್ ಜಾವ್ನ್ ವಿಂಚೊನ್ ಆಯಿಲ್ಲೊ, ಗೀತ್ ಗಜಾಲ್ ಪಂಗ್ಡಾಚೊ ಸಾಂದೊ ಸ್ಟೇಫನ್ ಮಿನೇಜಸ್ ಹಾಕಾ, ಆಂಕ್ರಿ.ಕಾಮ್ ಹಾಚೊ ಸಂಪಾದಕ್ ಆನಿ ಗೀತ್ ಗಜಾಲ್ ಪಂಗ್ಡಾಚೊ ಮುಕೆಲ್ ಸಂಚಾಲಕ್ ಸನ್ನು ಮೋನಿಸ್ ಹಾಣಿಂ ಫುಲಾಂ ತುರೊ ದೀವ್ನ್ ಗೌರವ್ ಪಾಠಯ್ಲೊ. ಸನ್ನು ಮೋನಿಸಾನ್ ಕಾರ್ಯಕ್ರಮಚ್ಯಾ ಯಶಸ್ವೆಕ್ ವಾವುರ್ಲೆಲ್ಯಾ ಸರ್ವಾಂಕ್ ಧಿನ್ವಾಸ್ ಪಾಠಯ್ಲೆ.
