ಆಯ್ತಾರಾ, ಮೇ 18 ವೆರ್ ಸಾಹಿತ್ಯ್ ಅಕಾಡೆಮಿ ಆನಿ ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ , ದಾದರ್ ಸಾಹಿತ್ಯಾ ಅಕಾಡೆಮಿ ಸಭಾಘರಾಂತ್, ಸಾಂಜೆಚ್ಯಾ 4 ವ್ಹೊರಾಂಚೆರ್ ಕೊಂಕ್ಣೆಂತ್ಲೊ ನಾಂವಾಡ್ದಿಕ್ ಕಾದಂಬರಿಕಾರ್ ಶ್ರೀ ಎಚ್. ಜೆ. ಗೋವಿಯಸಾ ಸಂಗಿಂ ಕಥಾಸಂಧಿ ಕಾರ‍್ಯಕ್ರಮ್ ಚಲ್ಲೆಂ.
ಸಾಹಿತ್ಯ ಅಕಾಡೆಮಿಚೊ ಪ್ರಾಂತೀಯ್ ಅಧಿಕಾರಿ, ಡೊ| ಓಂ ನಗರ್ ಹಾಣಿಂ ಶ್ರೀ ಎಚ್. ಜೆ. ಗೋವಿಯಸಾಚಿ ಒಳಕ್ ಕರುನ್ ದೀವ್ನ್, ಮಾಂಚಿಯೆರ್ ಸ್ವಾಗತ್ ಕರುನ್, ತಾಚ್ಯಾ ಸಾಹಿತ್ಯ್ ವಾವ್ರಾವಿಶಿಂ ಉಲವ್ನ್ ಕಾರ‍್ಯಕ್ರಮಾಕ್ ಚಾಲನ್ ದಿಲೆಂ.
ಎಚ್. ಜೆ. ಗೋವಿಯಸಾನ್ ಬರಯಿಲ್ಲ್ಯಾ ಅಂತಿಮ್ ನಿರ್ಣಯ್ ನವ್ಯಾ ಕಾದಂಬರಿಚೊ ಸಾರಂಶ್ ವಾಚುನ್ ಸಾಂಗ್ಲೊ. ಉಪ್ರಾಂತ್ ಆಪ್ಲ್ಯಾ ವಾವ್ರಾವಿಶಿಂ ಉಲವ್ನ್ ಸಭಿಕಾಂಚ್ಯಾ ಸವಾಲಾಂಕ್ ಜಾಪಿ ದಿಲ್ಯೊ.
ಕೊಂಕಣಿ ಭಾಷಾ ಮಂಡಳ್, ಮಹಾರಾಷ್ಟ್ರ ಹಾಚೊ ಜೆರಾಲ್ ಕಾರ್ಯದರ್ಶಿ ತಶೆಂ ಸಾಹಿತ್ಯ ಅಕಾಡೆಮಿ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ಸಾಂದೊ ಲೊರೆನ್ಸ್ ಡಿಸೊಜಾ, ಕಮಾನಿ ಹಾಣಿ ಎಚ್. ಜೆ. ಗೋವಿಯಸಾಚಿ ವಯಕ್ತಿಕ್ ಒಳಕ್ ಸಾಂಗೊನ್, ತಾಚ್ಯಾ ಸಾಹಿತಿಕ್ ಪಯ್ಣಾವಿಶಿಂ ವಿವರಣ್ ದೀವ್ನ್, ಪಾಟ್ಲ್ಯಾ ಪನ್ನಾಸ್ ವರ‍್ಸಾಂ ಥಾವ್ನ್ ತಾಣೆ ಕೊಂಕ್ಣೆಕ್ ದಿಲ್ಲಿ ದೆಣ್ಗಿ ಆನಿ ಸಾಹಿತಿಕ್ ವಾವ್ರಾವಿಶಿಂ, ಸಂಕ್ಷಿಪ್ತ್ ವಿವರಣ್ ದಿಲೆಂ.
ಕಾರ‍್ಯಾಕ್ ದಿವೊ ಪತ್ರಾಚೊ ಸಂಪಾದಕ್, ಶ್ರೀ ಲೊರೆನ್ಸ್ ಕುವ್ಹೆಲ್ಲೊ ಆನಿ ಸಂಚಾಲಕಿ ಶ್ರೀಮತಿ ಸುಜಾನ್ ಕುವ್ಹೆಲ್ಲೊ, ಕೊಂಕಣಿ ಭಾಷಾ ಮಂಡಳ್, ಮಾಹಾರಾಷ್ಟ್ರ ಹಾಚೊ ಸಹ ಕಾರ್ಯದರ್ಶಿ ಜೊನ್ ಪಿರೆರಾ, ನೇರಿ ನಜ್ರೆತ್, ಫ್ಲೋರಾ ಆನಿ ಹೆರ್ ಗಣ್ಯ್ ವ್ಯಕ್ತಿ ಹಾಜರ್ ಆಸ್ಲೆ.
ಕೊಂಕಣಿ ಭಾಷಾ ಮಂಡಳ್,ಮಾಹಾರಾಷ್ಟ್ರ ಹಾಚೊ ಖಜಾನ್ದಾರ್ ಮೆಲ್ವಿನ್ ಫೆರ್ನಾಂಡಿಸ್ ಹಾಣೆ ಉಪ್ಕಾರ್ ಭಾವುಡ್ಲೊ.
