“ಕವಿಕ್ ತಾಚೆ ಸ್ವತಾಚೆ ಮ್ಹಳ್ಳೆ ವಿಚಾರ್ ಆಸುಂಕ್ ಜಾಯ್. ಆನಿ ಹೆ ವಿಚಾರ್ ಆಪ್ಣಾಚ್ಯಾ ಅನ್ಭೋಗಾಂತ್ಲ್ಯಾನ್ ರೂಪ್ ಜೊಡಲ್ಲೆ ಆಸುಂಕ್ ಜಾಯ್.” ಮ್ಹಣಾಲೊ ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ, ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ತಸೆಂ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ್ ಕವಿ ಮೆಲ್ವಿನ್ ರೊಡ್ರಿಗಸ್. ಮಂಗ್ಳುರ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್, ಸುಕ್ರಾರಾ 23 ಮೇ ದನ್ಪಾರಾಂ 2 ವರಾಂಚೇರ್, ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ ಯೋಜನಾಚೆ ವಿದ್ಯಾರ್ಥಿಂ ಖಾತೀರ್ ಮಾಂಡುನ್ ಹಾಡ್ಲೆಲ್ಯಾ ಕ್ಷಿತಿಜ ಕಾರ್ಯಾವಳಿಂತ್, ಕೊಂಕ್ಣಿ ಕವಿ ಮನೋಜ್ ನರೇಂದ್ರ ಕಾಮತ್ ಹಾಚೊ ಕವಿತಾ ಜಮೊ ವಿಚಾರ್ ವಲಯ್ ಉಗ್ತಾವಣ್ ಸುವಾಳ್ಯಾರ್ ಮುಕೆಲ್ ಸಯ್ರೊ ಮ್ಹಣೂನ್ ತೋ ಉಲಯ್ತಾಲೊ.
ಕವಿ ಮನೋಜಾಕ್ ಬರೆಂ ಮಾಗೊನ್ ತಾಣೆ ಮ್ಹಳೆಂ ” ಹೆರಾಂಚ್ಯಾ ಅನ್ಭೋಗಾಕ್ ಆಪ್ಲ್ಯಾ ಉತ್ರಾಂನಿ ಮಾಖುನ್ ಕವಿತಾ ರಚ್ಚೆಂ ಕಾಂಯ್ ಉಪ್ಕಾರಾಕ್ ಪಡನಾ. ಜಿವಿತಾಚ್ಯಾ ಪೊಂತಾನ್ ಪೊಂತ್ ಡಿಸ್ಕವರಿಚ್ಯಾ ವಾ ಸೊದಾಚ್ಯಾ ಪಯ್ಣಾರ್ ಆಸ್ಚೊ ಕವಿ, ಆಪ್ಲ್ಯಾಚ್ ವಿಚಾರಾಂಕ್ ರೂಪ್ ದೀಂವ್ಕ್ ಸಕ್ತಾ. ಅಸಲ್ಯಾ ವಿಚಾರಾಂನಿ ರಚಲ್ಲ್ಯೊ ಕವಿತಾ ತಾಕಾ ಜಿವಿತಾಚ್ಯಾ ಬಂಧಡೆಂತ್ಲಿ ಸುಟ್ಕಾ ದಿತಾನಾ, ಆಖ್ಖ್ಯಾ ಮನ್ಶಾಕುಳಾಕೀ ತಸಲಿಚ್ ಸುಟ್ಕಾ ದಿತಾ”
ಕೊಂಕ್ಣಿ ಭಾಸ್ ಆನಿ ಸಂಸ್ಕ್ರತಿ ಪ್ರತಿಷ್ಠಾನ್ ಹಾಚೊ ಅಧ್ಯಕ್ಷ್ ಸಿ.ಎ. ನಂದಗೋಪಾಲ ಶೆಣೈ ಹಾಣಿ ಕಾರ್ಯಾಕ್ ಅಧ್ಯಕ್ಷ್ ಮ್ಹಣುನ್ ಹಾಜರ್ ಆಸುನ್ ಕವಿ ಮನೋಜ್ ಕಾಮತ್ ಹಾಚ್ಯಾ ಸಾಹಿತಿಕ್ ವಾವ್ರಾಚಿ ತೊಕ್ಣಾಯ್ ಕರುನ್, ಬರೆಂ ಮಾಗ್ಲೆಂ.
ಕಥಾಕಾರ್, ಕೊಂಕ್ಣಿ ಶಿಕ್ಶಕ್ ಆನಿ ಸಮೀಕ್ಷಕ್ ವಿಶಾಲ್ ಸಿನಾಯ್ ಖಾಂಡೆಪಾರ್‌ಕಾರ್ ಹಾಣಿ ಕವಿ ಮನೋಜ್ ಕಾಮತ್ ಆನಿ ವಿಚಾರ್ ವಲಯ್ ಪುಸ್ತಕಾಚಿ ವಿಸ್ತಾರ್ ಒಳಕ್ ಕರುನ್ ದಿಲಿ.
ಕವಿ ಮನೋಜ್ ಕಾಮತ್ ಹಾಣಿ ಆಪ್ಲ್ಯೊ ತೀನ್ ಕವಿತಾ ಸಾದರ್ ಕರುನ್ ಕೊಂಕಣಿ ಕಾವ್ಯಾ ಶೆತಾಂತ್ಲ್ಯಾ ಆಪ್ಲ್ಯಾ ಪಯ್ಣಾಚೊ ಅನ್ಭೊಗ್ ವಾಂಟುನ್ ಘೆತ್ಲೊ.
ಕವಿ, ಸಮೀಕ್ಷಕ್ ಎಚ್ಚೆಮ್, ಪೆರ್ನಾಲ್ ಆನಿ ವಿಶ್ವ ಕೊಂಕಣಿ ಕೇಂದ್ರಾಚೊ ಆಡಳ್ತ್ಯಾ ಅಧಿಕಾರಿ ಡಾ। ಬಿ. ದೇವದಾಸ ಬಿ. ಪೈ ಸುವಾಳ್ಯಾರ್ ಹಾಜರ್ ಆಸೊನ್ ಕವಿ ಮನೋಜಾಕ್ ಬರೆಂ ಮಾಗ್ಲೆಂ.
ವಿಚಾರ್ ವಲಯ್ – ವೃತ್ತೆನ್ ಶಿಕ್ಷಕ್ ಜಾವ್ನಾಸ್ಚ್ಯಾ ಕವಿ ಮನೋಜ್ ನರೇಂದ್ರ ಕಾಮತ್ ಹಾಚೆಂ ಕವಿತೆಚೆಂ ಚವ್ತೆಂ ಪುಸ್ತಕ್ ಆಸುನ್, ಮನೋವೆಗ್ಯಾನಿಕ್ ಆನಿ ತತ್ವಗಿನ್ಯಾನಾಚೆರ್ 77 ಕವಿತಾ ಪ್ರಸ್ತುತ್ ಜಮ್ಯಾಂತ್ ಆಸಾತ್. ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ್ ಕವಿ ಆರ್. ಎಸ್. ಭಾಸ್ಕರ್ ಹಾಣೆ ಪುಸ್ತಕಾಕ್ ಪ್ರಾಸ್ತಾವಿಕ್ ಉತ್ರಾಂ ಬರಯ್ಲ್ಯಾಂತ್. ಹ್ಯಾ ಆದಿಂ ಕವಿ ಮನೋಜಾಚಿಂ ತೀನ್ ಕವಿತಾ ಜಮೆ ಉಜ್ವಾಡಾಕ್ ಆಯಿಲ್ಲೆ ಆಸುನ್, 2021 ವ್ಯಾ ವರ್ಸಾ ಪ್ರಕಾಶಿತ್ ಜಾಲ್ಲ್ಯಾ ಪಾಂಖ್ ಪರ್ಜಳ್ ಕವಿತಾ ಜಮ್ಯಾಕ್ ಮಣಿಪಾಲ್ ಡಾ। ಟಿ.ಎಂ. ಎ. ಪೈ ಫಾಂವ್ದೇಶನ್ ಪ್ರಶಂಸಾ ಪುರಸ್ಕಾರ್ ಫಾವೊ ಜಾಲಾ. 2019 ವರ್ಸಾ ಆತ್ಮ – ಬ್ರಹ್ಮಾ ಆನಿ 2003 ವ್ಯಾ ವರ್ಸಾ ತಾಂಬ್ಶಿ – ಹೆ ಉಜ್ವಾಡಾಕ್ ಆಯಿಲ್ಲೆ ತಾಚೆ ಕವಿತಾ ಜಮೆ.
