ಜಿಣ್ಯೆಂತ್ ಧನಾತ್ಮಕ್ ಗಜಾಲ್ಯಾಂಕ್ ಚಡ್ ಮಹತ್ವ್ ದೀಜಾಯ್. ಹ್ಯಾ ವರ್ವಿಂ ವೈಯುಕ್ತಿಕ್ ಭಲಾಯ್ಕಿ ಸಾಂಬಾಳುಂಕ್ ಸಾಧ್ ಜಾತಾ ಮಾತ್ರ್ ನ್ಹಂಯ್ ದುಸ್ರ್ಯಾಂಕ್ ಬರಿ ದೇಖ್ ಜಾಂವ್ಚ್ಯಾಕ್ ಅಧಾರ್ ಜಾತಾ. ಬರವ್ಪ್ಯಾಂನಿ ಧನಾತ್ಮಕ್ ಜಾಲ್ಯಾರ್ ತಾಂಚ್ಯಾ ಸಾಹಿತಿಕ್ ಕೃತಿಯಾಂನಿ ತೆಂ ಪ್ರತಿಫಲಿತ್ ಜಾತಾ. ಮ್ಹಜೆಂ ಬರಪ್ ಸದಾಂ ಧನಾತ್ಮಕ್ ರಿತಿನ್ ದವರ್ಚ್ಯಾಕ್ ಹಾಂವ್ ಪ್ರೇತನ್ ಕರ್ತಾಂ. ಮ್ಹಜ್ಯಾ ಭೊಂವಾರಾಂತ್ ಘಡ್ಚೊ ಗಜಾಲಿ ಸೊಂಪ್ಯಾ ರಿತಿನ್ ಬರವ್ನ್ ಕಾಡ್ಚೊ ವಾವ್ರ್ ಕೆಲ್ಲ್ಯಾನ್ ಜಿಣ್ಯೆಂ ಸತಾಂ ತಸಲೆಂ ಪುಸ್ತಕ್ ಪ್ರಕಟ್ ಕರ್ಚ್ಯಾಕ್ ಮ್ಹಜ್ಯಾನ್ ಸಾಧ್ ಜಾಲೆಂ… ಅಶೆಂ ಮ್ಹಣಾಲೊ ಡಯಾನ್ ಡಿ ಸೋಜಾ ಮುಕಾಮಾರ್.
ತೊ ದಾಯ್ಜಿ ಟ್ರಸ್ಟ್ ಮಂಗ್ಳುರ್ ಘಟಾಕಾನ್ ಮೇ 24 ತಾರಿಕೆರ್ ಸಂದೇಶ ಸಾಲಾಂತ್ ಮಾಂಡುನ್ ಹಾಡ್ಲೆಲ್ಯಾ ಅಪ್ಲ್ಯಾ ಜಿಣ್ಯೆಂ ಸತಾಂ ಪುಸ್ತಕಾವಯ್ಲ್ಯಾ ಸಂವಾದಾಂಕ್ ಜಾಪ್ ದೀವ್ನ್ ಉಲಯ್ತಾಲೊ.
“ಚಾರ್ ದಿಸಾಂಚಾ ಹ್ಯಾ ಸಂಸಾರಾಂತ್ ಗ್ರೇಸ್ತ್ ಕಾಯ್, ಆಸ್ತ್ ಬದಿಕ್, ಯೆವೆಂ-ದೆವೆಂ ಸಗ್ಳೆಂ ಆಮಿ ಲೇಕ್ ಘಾಲ್ತೆ ಆಸ್ತಾಂವ್. ಪುಣ್ ಆಮಿಂ ಕಿತ್ಲೆ ದೀಸ್ ವಾಂಚ್ತಾಂವ್ ಮ್ಹಳ್ಳೆವಿಶಿಂ ಲೇಖ್ ಘಾಲುಂಕ್ ಚುಕ್ತಾಂವ್. ಹ್ಯಾ ವರ್ವಿಂ ಆಮಿಂ ಜಿಯೆಜೆ ಜಾಲ್ಲೆಂ ಜಿವಿತ್ ಜಿಯೆಂವ್ಕ್ ವಿಸ್ರೊನ್ ಸೊಡ್ತಾಂವ್. ಮ್ಹಜಾ ಜಿಣ್ಯೆಂ ಸತಾಂ ಪುಸ್ತಕಾಂತ್ ಜಿಯೆಂವ್ಕ್ ವಿಸ್ರೊನ್ ಸೊಡ್ಲೆಲ್ಯಾಂಚೊ ಜಾಯ್ತ್ಯೊ ಗಜಾಲಿ ಅಟಾಪ್ತಾತ್ ಜಾಲ್ಲ್ಯಾನ್ ಪುಸ್ತಕ್ ದುಸ್ರೆಂ ಪಾವ್ಟಿಂ ಛಾಪಿಜೆ ಪಡ್ಲೊ. ವಾಚ್ಪ್ಯಾನಿಂ ತೊ ಖಾಯ್ಸ್ ಕೆಲಾ ಅನಿಂ ಹ್ಯಾ ಮಾರಿಫಾತ್ ಏಕ್ ಸಾಧೊ ಬರವ್ಪಿ ಜಾವ್ನ್ ಹಾಂವ್ ಮ್ಹಜಾ ಮಿಸಾಂವಾಂತ್ ಜಯ್ತೆವಂತ್ ಜಾಲಾಂ ಮ್ಹಳ್ಳಿ ಧಾದೊಸ್ಕಾಯ್ ಮ್ಹಕಾ ಆಸಾ…” ಮುಂದರುನ್ ತೊ ಮ್ಹಣಾಲೊ.
ಜಿಣ್ಯೆಂ ಸತಾಂ ಪುಸ್ತಕಾಂತ್ಲ್ಯಾ ದೇಸಾಂತರ್ ಜಿವಿತಾವಿಶಿಂ ನಾಮ್ನೆಚೊ ಸಾಹಿತ್ ವಿಮರ್ಶಕ್ ನಾನು ಮರೋಲಾನ್ ಅಪ್ಲೆ ವಿಚಾರ್ ಮಾಂಡ್ಲೆ. ಆಪ್ಲ್ಯಾ ಲೇಖನಾಂನಿ ಡಯಾನಾಚೆಂ ಪುಸ್ತಕ್ ಗಲ್ಫಾಂತ್ಲ್ಯಾ ಕೊಂಕ್ಣಿ ಲೊಕಾಚೆಂ ಜಿವಿತ್ ಪಿಂತ್ರಾಂವ್ಚ್ಯಾಂತ್ ಮಾತ್ರ್ ನ್ಹಂಯ್ ಆಸ್ತಾ ತಾಂಚಿ ಸಿಂತಿಮೆಂತಾಂ, ಸಮಸ್ಯೆ ಅನಿಂ ಮನೋಗತ್ ಧಾಕಲ್ ಕರ್ಚ್ಯಾಂತ್ ಯಶಸ್ವಿ ಜಾಲಾಂ ಮ್ಹಣ್ ತಾಣೆಂ ಅಭಿಪ್ರಾಯ್ ಉಚಾರ್ಲಿ.
ಸಾಹಿತಾಭಾಯ್ರ್ ಡಯಾನಾಚೆಂ ಪುಸ್ತಕ್ ಕಿತ್ಲೆಂ ಪ್ರಸ್ತುತ್ ಮ್ಹಳ್ಳ್ಯಾ ವಿಶಯಾಚೆರ್ ಸ್ಟ್ಯಾನಿ ಬೆಳಾನ್ ಆಪ್ಲೆ ವಿಚಾರ್ ಮಾಂಡ್ಲೆ. ಕಾಳಾಚೆಂ ಧಾಕಲೀಕರಣ್ ಮಾತ್ರ್ ನ್ಹಂಯ್ ಆಸ್ತಾಂ ದಿಸ್ತ್ಯಾ ಆನಿಂ ನಾದಿಸ್ತ್ಯಾ ರಿತಿನ್ ಜಾಯ್ತಿಂ ವೆಕ್ತಿತ್ವಾಂ ಜಿಣ್ಯೆಂ ಸತಾಂ ಪುಸ್ತಕಾಂತ್ ಲಿಪೊನ್ ಆಸಾತ್ ಆನಿ ಸಂದ್ರಾಪಾನುಸಾರ್ ತಿಂ ವಾಚ್ಪ್ಯಾಕ್ ಜಾಗಾಯ್ತಾತ್ ಮ್ಹಣ್ ತಾಣೆಂ ಉಚಾರ್ಲೆಂ.
ಅಧ್ಯಕ್ಷ್ ಪ್ರವೀಣ್ ತಾವ್ರೊನ್ ಸ್ವಾಗತಾಸವೆಂ ಪ್ರಾಸ್ತವಿಕ್ ವಿಚಾರ್ ಮಾಂಡ್ಲೆ. ವಿನ್ಸೆಂಟ್ ಪಿಂಟೊ ಅಂಜೆಲೋರಾನ್ ಉಪ್ಕಾರ್ ಆಟಾಯ್ಲೊ.
ಸಾಹಿತ್ ಅಕಾಡೆಮಿ , ನವಿ ಢೆಲ್ಲಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಮೆಲ್ವಿನ್ ರೊಡ್ರಿಗಸ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ್ ಸ್ಟ್ಯಾನಿ ಅಲ್ವಾರಿಸ್ ಆನಿ ಕೊಂಕ್ಣಿ ಕಾರ್ಭಾರಿ ಆನಿ ಬರ್ಪಿ ಮಿತ್ರ್ ಹಾಜರ್ ಆಸ್‌ಲ್ಲೆ.
