ಜಿಣಿಯೆ ಸತಾಂ : ಗಲ್ಫಾಂತ್ ಜೊಡಿರ್ ಆಸ್ಲೆಲ್ಯಾಂಕ್ ಹಾತ್ ಪುಸ್ತಕ್

67

ಸನ್ವಾರಾ,  ಮೇ 24 ವೆರ್ ಸಾಂಜೆಚ್ಯಾ 4 ವರಾಂಚೇರ್, ನಂತೂರ್ – ಸಂದೇಶ ಸಭಾಸಾಲಾಂತ್ ದಾಯ್ಜಿ ಟ್ರಸ್ಟ್ ಮಂಗ್ಳುರ್ ಹಾಣಿ  ಜಿಣಿಯೆ ಸತಾಂ : ಪುಸ್ತಕ್ ಸಂವಾದ್  ಕಾರ್ಯೆಂ  ಮಾಂಡುನ್ ಹಾಡ್ಲಲೆಂ. ಕಾರ್ಯಾಕ್ ಮುಕೆಲ್ ಉಲವ್ಪಿ ಜಾವ್ನ್ ಪುಸ್ತಕಾಚೊ ಲೇಖಕ್ ಡಯಾನ್ ಡಿ’ ಸೊಜಾ, ಮುಕಾಮಾರ್ ಹಾಜರ್ ಆಸೊನ್, ಕಾರ್ಯಕ್ರಮಾಂತ್ ಸಮೀಕ್ಷಕ್  ನಾನು ಮರೋಲ್, ತೊಟ್ಟಾಮ್ ಹಾಣೆ ಪುಸ್ತಕಾಚೆರ್ ದಿಲ್ಲ್ಯಾ ಉಲವ್ಪಾಚೆಂ ಸಂಪಾದಿತ್ ರೂಪ್ ಹಾಂಗಾಸಾರ್ ದಿಲಾಂ.  ಕಿಟಾಳಾರ್ ಕಾರ್ಯಕ್ರಮಾಚಿ ವರ್ದಿ ಹಾಂಗಾಸರ್ ವಾಚುಂಯೆತಾ : 

ಧನಾತ್ಮಕ್ ಚಿಂತ್ಪಾಚೆಂ ಸಾಹಿತ್ ಸಮಾಜಿಕ್ ಜಾವ್ನ್ ಚಡ್ ಪರಿಣಾಮ್‌ಕಾರಿ – ಡಯಾನ್ ಡಿ ಸೋಜಾ ಮುಕಾಮಾರ್

ಡಯಾನ್ ಡಿ’ಸೋಜಾ ಮುಕಾಮಾರ್ ಹಾಚೊ ಪುಡ್ಲದ್ ಪುಸ್ತಕ್ ದಾಯ್ಜಿ ಪ್ರಕಾಶನಾ ಖಾಲ್ ಪಾಯ್ಸ್ ಜಾಲ್ಲೊ ಜಿಣಿಯೆ ಸತಾಂ ಹ್ಯಾ ಬುಕಾವಿಶಿಂ ಎದೊಳ್ ಭಾಸಾಬಾಸ್ ಜಾಯ್ಜೆ ಆಸ್‌ಲ್ಲಿ. ವಾಲ್ಟರ್ ನಂದಳಿಕೆನ್ ಹೊ ಬೂಕ್ ಉಗ್ತಾವಣ್ ಕರುನ್ ಮ್ಹಳ್ಳೆಂ ಆಸಾ ” ಡಯಾನಾಚಿ ಚಿಂತ್ನಾಂ ಆನಿ ಉಲೊವ್ಣೆಂ ಆಮ್ಕಾಂ ಸರ್ವಾಂಕ್ ಪ್ರೇರಣ್ ಜಾವ್ನಾಸಾ. ಕಠಿಣ್ ವಿಶಯಾಂಕ್ ಭೊವ್ ಸಲೀಸ್ ಜಾವ್ನ್ ಥೊಡೆಂ ಹಾಸ್ಯ್ ಮಿಶ್ರಣ್ ಕರುನ್ ವಿವರ್ಸುಂಚೆಂ ವಿಶೇಷ್ ದೆಣೆಂ ತಾಕಾ ಆಸಾ. ನಿಸ್ವಾರ್ಥಿ ಮುಖೆಲಿ ಜಾವ್ನ್ ತಾಣೆ ಭವಿಶ್ಯಾಚ್ಯಾ ಮುಖೆಲ್ಯಾಂಕ್ ಜೊಕ್ತೆಂ ಮಾರ್ಗದರ್ಶನ್ ದೀವ್ನ್ ವಾಗಯ್ಲಾಂ.ತಾಣೆ ತಾಚಿಂ ಬೊರ‍್ಯಾಂತ್ಲಿಂ ಬೊರಿಂ ಲೇಖನಾಂ ಹ್ಯಾ ಬುಕಾಂತ್ ಘಾಲ್ಯಾಂತ್”

ಮ್ಹಾಕಾ ವರ್ತಿ ಧಾದೊಸ್ಕಾಯ್ ಆನಿ ಸಂತೊಸ್. ಕಿತ್ಯಾಕ್ ಮುಳ್ಳ್ಯಾರ್ ಹಾಂತ್ಲಿಂ ಚಡ್ತಿಕ್ ಲೇಖನಾಂ ಹಾವೆಂಚ್ ಟೈಪ್ ಕರುನ್ ದಿಲ್ಲಿಂ. ೩೫ ಲೇಖನಾಂ ಆಟಾಪ್ಚೊ ಹೊ ಬೂಕ್ ಉಗ್ತೊ ಕರುನ್ ವಾಚುನ್ ಗೆಲ್ಲ್ಯಾಬರಿ ಜಿಣಿಯೆಚಿಂ ಸತಾಂ ನ್ಹಂಯ್ ಬಗಾರ್ ಲಿಸಾಂವಾಂ ಮೆಳೊನ್ಂಚ್ ವೆತಾತ್.

ಮನ್ಶಾಕ್ ಜಿತಿತಾಂತ್ ಭೊವ್ ಮುಖ್ಯ್ ಜಾವ್ನಾಸಾ ಆಪ್ಣಾಚಿ ಭಲಾಯ್ಕಿ.ಹ್ಯಾ ಭಲಾಯ್ಕೆ ವಿಶಿಂ ಕಶಿ ಜಾಗ್ರುತ್ ಘೆಂವ್ಕ್ ಜಾಯ್ ತೆಂ ಭೊವ್ ಪ್ರಾಯೋಗಿಕ್ ರಿತಿನ್ ವಿವರ್ಸಿಲ್ಲ್ಯಾ ಡಯಾನಾನ್ ಫುಗ್‌ಲ್ಲ್ಯಾ ಕುಲ್ಯಾಂ ವಯ್ರ್ ತಶೆಂಚ್ ಮುಕಾರ್ ದೆಂವ್‌ಲ್ಲ್ಯಾ ಪೊಟಾಂ ವಯ್ರ್ ಸೂಕ್ಷ್ಮ್ ದೀಶ್ಟ್ ಮಾರ್ಲ್ಯಾ.ಎಕಾ ಉತ್ರಾನ್ ಸಾಂಗ್ಚೆಂ ತರ್ ಚಾರ್ ಕಾಸ್ ಜೊಡ್ಚ್ಯಾ ಉದ್ದೇಶಾನ್ ಗಲ್ಫಾಕ್ ಆಯಿಲ್ಲ್ಯಾ ದಿಸಾ ಥಾವ್ನ್ ಆಪಾಪ್ಲಿ ಭಲಾಯ್ಕಿ ಸಾಂಬಾಳುಂಕ್ ಉಲೊ ದಿತಾ.ಇತ್ಲೆಂ ತಾಣೆ ಸಾಂಗ್‌ಲ್ಲ್ಯಾ ಉಪ್ರಾಂತಿ ಕ್ರಿಸ್ಮಸ್ ಬತ್ತ್ಂಡ್ , ಈಸ್ಟರ್ ಬತ್ತ್ಂಡ್ , ಮದ್ಮೇದಾ ಸೀಸನ್ , ಗೆಸ್ಟ್ ಬತ್ತೆರ್ , ಜಿಮ್ಮ್‌ಗ್ ಪೊತುಜಿ ಮುಣೊನ್ ಜಿವಾಚೆಂ Shape ಪಾಡ್ ಕರ್ನ್ ವಾ ಭಲಾಯ್ಕಿ ಪಾಡ್ ಕರ್ನ್ ಘೆತ್‌ಲ್ಲೆ ದಾಖ್ಲೆ ಕಾಂಯ್ ಉಣೆಂ ನಾಂತ್.

ವಿದೇಶಾಂನಿ ಆಪ್ಲ್ಯಾ ಭಲಾಯ್ಕೆಚಿ ಪರ್ವಾ ಕರಿನಾಸ್ತಾನಾ ವಾವುರ್ತೆಲ್ಯಾಂಕ್ ಡಯಾನ್ ವಾಜ್ಭಿ ಸವಾಲಾಂ ವಿಚಾರ್ತಾ.ತಾಚ್ಯಾ ಸರ್ವ್ ಸವಾಲಾಂಚೊ ಸಾರಾಂಶ್ ಜಾವ್ನ್ ತೊ ವಿಚಾರ್ತಾ ನಿವೃತ್ತೆ ಉಪ್ರಾಂತ್ ಗಾಂವಾಂಕ್ ಪಾವ್ತಾನಾ ಜೊಡ್‌ಲ್ಲೆಂ ಸಗ್ಳೆಂ ವೊಕ್ತಾಂ / ಭಲಾಯ್ಕೆ ಖಾತಿರ್ ಖರ್ಚಿಲ್ಯಾರ್ ಗಲ್ಫಾಂತ್ ನೀದ್ , ಭುಕ್ ನಾಸ್ತಾನಾ ಸುಖ್ ಸಂತೊಸ್ ಸಾಂಡುನ್ ವಿರಾಮಾ ವಿಣೆಂ ಪಾಶಾರ್ ಕೆಲ್ಲ್ಯಾ ತರ್ನಾಟ್ಪಣ್ ಆನಿ ಮಧ್ಯಮ್ ಪ್ರಾಯೆಕ್ ಮೋಲ್ ಖಂಯ್ ಆಸಾಗೀ ? ಖಂಡಿತ್ ಜಾವ್ನ್ ಮೋಲ್ ನಾ.

ಆಮ್ಕಾಂ ಏಕ್ ಪಿಶೆಂಪಣ್. ಗಲ್ಫಾಂತ್ ಜೊಡ್ಲೆಂ..ನಿವ್ರತ್ತ್ ಜಾಲ್ಯಾಂವ್.ಉಪ್ರಾಂತ್ ಸಗ್ಳೆಂಚ್ ಪಾಟಿಂ ಸೋಡ್ನ್ , ಆಮ್ಚಿಂ ಮನ್ಶಾಂ , ಸಂಸ್ಕ್ರತಿ ಕಿತೆಂಚ್ ನಾತ್‌ಲ್ಲ್ಯಾ ಕೆನಡಾ , ಲಂಡನ್ ತಸಲ್ಯಾ ಯುರೋಪಿಯನ್ ದೆಶಾಂನಿ ಸೆಟಲ್ ಜಾಲ್ಯಾಂವ್.ತಾಚ್ಯಾ ವಯ್ಲ್ಯಾನ್ ಇಂಡಿಯಾಂತ್ ಕಿತೆಂ ಆಸಾ ಮುಳ್ಳೊ ಸುಖೊ ಸೈಲಾಪ್.ಆಸಲ್ಯಾ ಚಿಂತ್ಪಾಚ್ಯಾ ಗಲ್ಫಾಗಾರಾಂಕ್ ತಾಣಿಂ ಆಪ್ಲೆಂ ಆಸ್ಥಿತ್ವ್ ಸಾಂಡ್ಚ್ಯಾ ಪಯ್ಲೆಂ ಡಯಾನ್ ಭೊವ್ ಸುಂದರ್‌ಪಣಿಂ ಉಜ್ವಾಡ್ ಫಾಂಕಯ್ತಾ.

ಶಿಸ್ತ್ ನಾತ್‌ಲ್ಲಿ ಜಿಣಿ ಜಿಯೆವ್ನ್ ಮೊಬಾಯ್ಲ್/ಟಿ. ವಿಂನಿ ವ್ಯಸ್ತ್ ಆಸ್ಚ್ಯಾ ಭುರ್ಗ್ಯಾಂ ವಿಶಿಂ ಲೇಖಕ್ ಕಳ್ವಳ್ತಾ.ಕುಟ್ಮಾ ಸಾಂದ್ಯಾಂಚಿಂ , ಕುಟ್ಮಾ ಸಂಬಂದಾಂಚಿ ವ್ಹಳೊಕ್ ಹ್ಯಾ ಭುರ್ಗ್ಯಾಂಕ್ ಆಸಾನಾ ಮುಣೊನ್ ಬೆಜಾರ್ ಪಾವ್ತಾ.ಕಾಮಾಚ್ಯಾ ದಭಾವಾಚ್ಯಾ ನಾಂವಾಂತ್ , ಭುರ್ಗ್ಯಾಂಚ್ಯಾ ಶಿಕ್ಪಾಚ್ಯಾ ನಿಬಾನ್ ಆಪ್ಲ್ಯಾ ಭುರ್ಗ್ಯಾಂಕ್ ಶಿಷ್ಟಾಚಾರ್ , ಸಾಮಾಜಿಕ್ ಗಿನ್ಯಾನ್ ಶಿಕಯ್ನಾತ್‌ಲ್ಲ್ಯಾ ವಿಶಿಂ ಬೆಜಾರ್ ಪಾವ್ತಾ . ಸಾಂಗಾತಾಚ್ಚ್ ಜೆಂ ಕುಟಾಮ್ ಸಾಂಗಾತಾ ಮಾಗ್ತಾ , ತೆಂ ಲಾಂಬ್ ಕಾಳ್ ಬಾಳ್ತಾ ಮುಳ್ಳೆಂ ಬಾವಾರ್ಥಾಚೆಂ ಕಾನಿ ಉತಾರ್ ಆಸಲ್ಯಾ ವ್ಹಡಿಲಾಂಕ್ ಸಾಂಗೊನ್ ಆಮ್ಚ್ಯಾ ಜಿಣಿಯೆಂತ್ ದೆವಾಸ್ಪಣ್ ಕಿತ್ಲೆಂ ಗರ್ಜೆಚೆಂ ಮುಣೊನ್ ಆಮ್ಕಾಂ ಮನದಟ್ಟ್ ಕರ್ತಾ.

ವಿದೇಶಾಂ ಥಾವ್ನ್ ಗಾಂವಾಂಕ್ ಆಯಿಲ್ಲ್ಯಾಂಕ್ ಏಕ್ ವಿಶೇಷ್ ಪಿಶೆಂ.ಆಪ್ಣಾ ವರ್ವಿಂ ಹುಶಾರ್ ಕೊಣಿಂ ನಾ ಮುಣೊನ್ ಕೊಣಿ ಕರಿನಾತ್‌ಲ್ಲೆಂ ಆಪ್ಣೆ ಕರುನ್ ದಾಕೊಂವ್ಕ್ ಜಾಯ್ ಮುಣೊನ್.ಪರಿಣಾಮ್…ಹೆಲ್ಮೆಟ್ ನಾಸ್ತಾನಾ ಬೈಕ್ ಸೊಡ್ಚೆಂ , ವಿದೇಶಾಂತ್ ೧೨೦ರ್ ಗಾಡಿ ಸೊಡ್ಲ್ಯಾ ಮುಣೊನ್ ಗಾಂವಾಂತ್ ಸೊಡುಂಕ್ ಪ್ರಯತ್ನ್ ಕರ್ಚೆಂ…..ಉಪ್ಯೆಂವ್ಕ್ ಆಡ್ವಾರಿಲ್ಲ್ಯಾ ಆನಿ ಗುಂಡಾಯೆಚ್ಯಾ ಜಾಗ್ಯಾಂನಿ ಉದ್ಕಾಕ್ ದೆಂವೊನ್ ಆಮೂಲ್ಯ್ ಜೀವ್ ಹೊಗ್ದಾವ್ನ್ ಘೆಂವ್ಚೆಂ ಹೆಂ ಸರ್ವ್ ಪಳೆವ್ನ್ / ಆಯ್ಕೊನ್ ಲೇಖಕ್ ದೂಖ್ ಉಚಾರ್ತಾ ಆನಿ ಯೋಗ್ಯ್ ಜಾಗ್ವಣಿ ದಿತಾ.

ಗಲ್ಫಾಚ್ಯಾ ಜಿಣಿಯೆ ಪಯ್ಣಾಂತ್ , ಪಯ್ಶೆ ಕಮೊಂವ್ಚ್ಯಾ ಧಾವ್ಣೆಂತ್ , ಕಾಮಾಂ ಉರೊಂವ್ಚ್ಯಾ ಸ್ಪರ್ದ್ಯಾಂತ್ , ಭುರ್ಗ್ಯಾಂಕ್ ಉಂಚ್ಲೆಂ ಶಿಕಾಪ್ ದೀಂವ್ಕ್ ಜಾಯ್ ಮುಳ್ಳ್ಯಾ ಚಿಂತ್ನಾಂನಿ ಆಮಿಂ ಆಮ್ಚ್ಯೊ ಹಾಸೊಚ್ಚ್ ವಿಸ್ರೊನ್ ಸೊಡ್ತಾಂವ್.ಬೊರ‍್ಯಾ ಭಲಾಯ್ಕೆ ಭರಿತ್ ಆನಿ ಸಂತೊಸ್ಭರಿತ್ ಜೀವನಾಕ್ ಹಾಸೊ ಕಿತ್ಲ್ಯಾ ಗರ್ಜೆಚ್ಯೊ ತೆಂ ಲೇಖಕ್ ಭೊವ್ ಬೊರ‍್ಯಾ ರಿತಿನ್ ಸಮ್ಜಾಯ್ತಾ.

ವಿದೇಶಾಂತ್ ವಸ್ತಿ ಕರ್ಚ್ಯಾ ಆಮ್ಚ್ಯಾ ಮೊಗಾಚ್ಯಾಂಕ್ ಮೋಗ್ ದಿಂವ್ಚೆಂ ಕುಟಾಮ್ ಆಸ್ತಾ , ಸಾಂಗಾತ್ ದಿಂವ್ಚೆ ಈಷ್ಟ್ ಆಸ್ತಾತ್ , ದಿಸಾಕ್ ದೋನ್ ಪೌವ್ಟಿಂ ಜೆಂವ್ಚಿ ತಾಂಕ್ , ರಾವೊಂಕ್ ಏಕ್ ಬಿಡಾರ್ ಆನಿ ದೆವಾನ್ ಬೊರಿ ಭಲಾಯ್ಕಿ ದಿಲ್ಯಾ ತರೀ ೩-೪ ಕ್ರೆಡಿಟ್ ಕಾರ್ಡಾಂ ಆಸಾತ್ ಜಾಲ್ಯಾರ್ ಮಾತ್ರ್ ಜಿವಿತ್ ಸಂಪೂರ್ಣ್.ಉಪ್ರಾಂತ್ ತ್ಯಾ ಕ್ರೆಡಿಟ್ ಕಾರ್ಡಾಂಚ್ಯಾ ಟ್ರ್ಯಾಪಾಂತ್ ಪಡೊನ್ ಏಕ್‌ಚ್ ಥಂಯ್ಚ್ಯಾ ಜೈಲಾಂನಿ ಪಿಚಾರ್ ಜಾಂವ್ಚೆಂ ಯ್ಯಾ ಕಶೆಂಯ್ ಬುಡ್ಲಾಂ ಮುಣೊನ್ ಬ್ಯಾಂಕಾ ಥಾವ್ನ್ ಪರ್ಸನಲ್ ಲೋನ್ ಕಾಡ್ನ್ ಪರಾರ್ ಜಾಂವ್ಚೆಂ ಮಾತ್ರ್ ನ್ಹಂಯ್ ಆಸ್ತಾಂ ಥೊಡ್ಯಾಂನಿ ಆಪ್ಲ್ಯಾ ಬಾಯ್ಲಾಂಚ್ಯಾ ನಾಂವಾರ್ ಪರ್ಸನಲ್ ಲೋನ್ ಕಾಣ್ಘೇವ್ನ್ ಉಪ್ರಾಂತ್ ಗಲ್ಫ್ ಸೊಡ್ನ್ ಪರಾರಿ ಜಾವ್ನ್ ಬಾಯ್ಲ್ ಭುರ್ಗ್ಯಾಂಕ್ ಕಷ್ಟಾರ್ ಘಾಲ್ಲೆ ದಾಖ್ಲೆ ಜಾಯ್ತೆ ಆಸಾತ್.ಆಸಲ್ಯಾಂಕ್ ಡಯಾನಾನ್ ಚತ್ರಾಯೆಚೊ ಆರ್ಸೊ ಭೊವ್ ಬೊರ‍್ಯಾನ್ ಧರ್ಲಾ.

ಪರ್ಗಾವಾಂತ್ ಬಾಪಯ್ , ಘೊವ್ ಯ್ಯಾ ಭಾವ್ ಕಾಮ್ ಕರ್ತಾ ಮುಳ್ಳ್ಯಾರ್ ಗಾಂವಾಂತ್ ಆಸ್ಚ್ಯಾ ಕುಟ್ಮಾ ಸಾಂದ್ಯಾಂಚ್ಯಾ ಆಭಿಲಾಶೆಕ್ ಘಡ್ ನಾ.ಹಿ ಆಭಿಲಾಶಾ ಗಲ್ಫಾಂತ್ ವಾವುರ್ಚ್ಯಾ ತಾಂಚ್ಯಾ ಕುಟ್ಮಾ ಸಾಂದ್ಯಾಕ್ ಪಿಂವ್ಡೊ ಕರ್ತಾ , ಡಿಪ್ರೆಶನಾಕ್ ವ್ಹರುನ್ ಪಾಯ್ತಾ ಆನಿ ಆಖ್ರೇಕ್ ವಾಟ್ ನಾಸ್ತಾನಾ ತಾಣೆ ಜಿವ್ಘಾತ್ ಕರ್ನ್ ಘೇಜೆ ಪಡ್ತಾ.ಲೇಖಕಾಚೆಂ ಕಾಳಿಜ್ ತಾಂಚ್ಯಾ ಪಾಸೊತ್ ದುಖ್ತಾ ಆನಿ ತಾಂಚ್ಯಾ ಸಾಂಗಾತಾ ತಾಂಚ್ಯಾ ಕುಟ್ಮಾನ್ ಸಯ್ತ್ ಬೊರೆಂ ಜಾಯ್ಜೆ ಮುಳ್ಳ್ಯಾ ಉದ್ದೇಶಾನ್ ಥೊಡಿಂ ಮಾರ್ಗದರ್ಶನಾಚಿಂ ಉತ್ರಾಂ ಸಾಂಗೊಂಕ್ ಲೇಖಕ್ ಪಾಟಿಂ ಮುಖಾರ್ ಪಳೆಯ್ನಾ.

ಡಯಾನ್ ಆನಿ ವಾಲ್ಟಿ ಆಮ್ಚ್ಯಾ ಸಮಾಜೆಚ್ಯಾ ಥೊಡ್ಯಾ ಆಂಗಾಚೆ ರಾಕೊಣ್ದಾರ್ ಆನಿ ಸೊಡ್ವೊಣ್ದಾರ್.ಸಮಾಜೆಚ್ಯಾ ಸಾಮಾಜಿಕ್ ಗಜಾಲಿಂಚ್ಯೊ ಜವಾಭ್ದಾರಿ ಡಯಾನ್ ಘೆತಾ ತರ್ ತಾಂತ್ರಿಕ್ ಗಜಾಲಿ ವಾಲ್ಟಿ ಜಾಗ್ರುತ್ ಘೆತಾ. ತಶೆಂ ಆಸಾ ಹಾಂಚ್ಯಾ ದೊಸ್ತೆಕ್ ಕೆದಾಂಚ್ ತುಟಾನಾತ್‌ಲ್ಲೆಂ ವೆಲ್ಡಿಂಗ್. ತ್ಯಾ ದೆಕುನ್ ಆಪ್ಲ್ಯಾ ವೆಬ್‌ಸೈಟಾ ಮುಖಾಂತ್ರ್ ವಿದೇಶಾಂತ್ ಆನಿವಾಸಿ ಮಂಗ್ಳೂರ್‌ಗಾರಾಂ ಮದೆಂ ಜಾಲ್ಲಿ ಸಾಮಾಜಿಕ್ ಕ್ರಾಂತಿ ತೊ ವಿಸ್ರಾನಾ. ತ್ಯಾ ದೆಕುನ್ ತೊ ವಾಲ್ಟಿಕ್ ಮುಣ್ತಾ ಹಾಂವ್ ಚಿಂತ್ತಾಂ ಮ್ಹಾಕಾ ಏಕ್ ಬರೊ ಮಿತ್ರ್ ಮೆಳ್ಳಾ . ಖಂಡಿತ್ ಜಾವ್ನ್ ಡಯಾನಾಕ್ ಮಾತ್ರ್ ನ್ಹಂಯ್ ಆಸ್ತಾಂ ಮ್ಹಾಕಾ ಆನಿ ಆಮಾ ಸರ್ವಾಂಕ್ ಬೊರೊ ಈಷ್ಟ್ ವಾಲ್ಟಿ ರುಪಿಂ ಮೆಳ್ಳಾ.ತೊ ಉಲಾಯ್ನಾ ಜಾಲ್ಯಾರೀ ತಾಕಾ ಉಗ್ಡಾಸ್ ಕಾಡಿನಾತ್‌ಲ್ಲೊ ದೀಸ್ ಆಸಾನಾ.ತಾಚ್ಯಾ ಜಿವಿತಾಚ್ಯಾ ಜಿಣಿಯೆ ಪಾವ್ಲಾಂ ಸಾಂಗಾತಾ ಚಮ್ಕಾನಾತ್‌ಲ್ಲಿ ಘಡಿ ಆಸಾನಾ.

ವಿದೇಶಾಂಕ್ ಕಾಮ್ ಕರ್ತೆಲ್ಯಾಂಕ್ ವಿವಿಧ್ ಕಾರಣಾಂ ಲಾಗೊನ್ ಜಾಯ್ತೆ ಮಾನಸಿಕ್ ದಭಾವ್ ಆಸ್ತಾತ್.ತಾಂಚೆ ವಯ್ರ್ ಕಶೆಂ ಜೈತ್ ಜೊಡ್ಯೆತ್…ಭೆಷ್ಟೆಂಚ್ ರಾಗ್ ಕರ್ಚ್ಯಾಕಿ ಇಲ್ಲೆಂ ಸಮಧಾನ್ ಕಾಣ್ಘೇವ್ನ್ ಮನ್ಶಾ ಸಂಬಂದ್ ಕಶೆಂ ಸಾಂಬಾಳುನ್ ವರ್ಯೆತ್ ಮುಣೊನ್ ಜಾಗ್ರುತ್ಕಾಯ್ ಸಾಂಗೊಂಕ್ ತೊ ವಿಸ್ರಾನಾ.

ಮುಖಾರ್ಸುನ್ ಆಜ್-ಕಾಲ್ ಕಾಜಾರ್ ಜಾಂವ್ಚ್ಯಾ ಗಲ್ಫಾಂತ್ ವಾವುರ್ತೆಲ್ಯಾ ತರ್ನಾಟ್ಯಾ ಜೊಡ್ಯಾಂ ಥಂಯ್ ಸಮಧಾನ್ ಆಸಾನಾ.ಸಭಾರ್ ಕಾರಣಾಂ ಪಯ್ಕಿ ಚೆಡ್ವಾಕ್ ರಾಂದುಂಕ್ ಯೇನಾ ತೆಂ ಪ್ರಮುಖ್ ಕಾರಣ್ ಜಾವ್ನಾಸಾ.ಆಮ್ಚ್ಯಾ ಚೆಡ್ವಾಂ ಭುರ್ಗ್ಯಾಂಕ್ ಉಂಚ್ಲೆಂ ಶಿಕಾಪ್ , ಪಯ್ಶೆ , ಆಸ್ತ್-ಬದಿಕ್ ಕರ್ನ್ ದಿತಾಂವ್.ತಾಂಚ್ಯಾ ಕಾಜಾರಾಕ್ ಲಾಖಾಂನಿ ಖರ್ಚಿತಾಂವ್.ಪುಣ್ ರಾಂದುಂಕ್ ತಶೆಂ ಘರ್ ಚಲೊಂವ್ಚಿ ಜವಾಭ್ದಾರಿ ಶಿಕಯ್ನಾಂವ್.ದಾದ್ಲ್ಯಾಂಕ್ ಸಯ್ತ್ ಲೇಖಕ್ ಸೋಡ್ನ್ ದಿನಾಂ.ಘೊವಾಂನಿ ಸಮ್ಜೊನ್ ಘೆಜಾಯ್ ಕೀ ಕಾಳ್ ಬದಾಲ್ಲಾ , ಆತಾಂಚೊ ಸ್ತ್ರೀಯೊ ಫಕತ್ತ್ ಕುಜ್ನಾಕ್ ಮಾತ್ರ್ ಸಿಮಿತ್ ನ್ಹಂಯ್ ತಿಂ ದಾದ್ಲ್ಯಾ ಬರಿ ಭಾಯ್ಲೊ ಸಂಸಾರ್ ದೆಖ್ತಾತ್ ಮುಣೊನ್ ಕುಟ್ಮಾಚೆಂ ಬ್ಯಾಲನ್ಸ್ ಸಾಂಬಾಳುಂಕ್ ಡಯಾನ್ ಮಾರ್ಗದರ್ಶನ್ ದಿತಾ ಸಾಂಗಾತಾಚ್ಚ್ ವ್ಹಡಿಲಾಂನಿ ಕುಟ್ಮಾಚೊ ಎಕ್ವೊಟ್ , ಕಷ್ಟ್ – ದೂಖ್ , ಜಿವಿತಾಕ್ ಗರ್ಜೆಕ್ ಪಡ್ಚ್ಯಾ ಸಂಗ್ತಿಚಿ ಮಾಹೆತ್ , ಘರ್ಚ್ಯಾ ಕಾಮಾಚಿ , ರಾಂದ್ಪಾಚಿ , ನಿತಳಾಯೆಚಿ ವ್ಹಳೊಕ್ ಹಾಚೆ ವಿಶಿಂ ಭುರ್ಗ್ಯಾಂಕ್ ಮನಾಂತ್ ಘಾಲೆಂ ಜಾಲ್ಯಾರ್ ಸಮಸ್ಯಾಂಕ್ ಪರಿಹಾರ್ ಸೊಧುನ್ ಬೊರೆಂ ಕುಟಾಮ್ ಮಾಂಡುನ್ ಹಾಡ್ಯೆತ್ ಮುಣೊನ್ ದ್ರಡ್ ಪಾತ್ಯೆಣಿ ವ್ಯಕ್ತ್ ಕರ್ತಾ.

ದುಬಾಯ್ ಮುಳ್ಳ್ಯಾ ಸರ್ಗಾರ್ ಆತೀ ಉಣೆಂ ಜೊಡುನ್ ಆಪ್ಕ್ಯಾ ಕುಟ್ಮಾಕ್ ಸಾಂಬಾಳ್ಚೊ ಜಾಯ್ತೊ ಲೋಕ್ ಆಸಾ.ಭೊವ್ ಕಶ್ಟಾಂನಿ ತಾಂಚೆಂ ಜಿವಿತ್ ಭೊವ್ ನಿಕೃಷ್ಟ್‌ಪಣಿಂ ಜಿಯೆತಾತ್. ತಾಂಚ್ಯಾ ವಿಶಿಂ ಆಮಿಂ ಚಡ್ತಿಕ್ ಚಿಂತುಂಕ್ ವಚಾನಾಂವ್.ತಸಲ್ಯಾ ಲೋಕಾ ತೆವ್ಶಿನ್ ಆಮಿಂ ಧ್ಯಾನ್ ದೀವ್ನ್ ತಾಂಚ್ಯಾ ವಿಶಾಲ್ ಕಾಳ್ಜಾಕ್ ಸಮ್ಜೊಂಚಿ ಗರ್ಜ್ ಆಸಾ ಮುಣೊನ್ ಸಾಂಗೊಂಕ್ ಆಪ್ಲ್ಯಾ ರಾಠಾವಳಿಂ ಮದೆಂ ಡಯಾನ್ ವಿಸ್ರಾನಾ.

ವಿದೇಶಾಂಕ್ ಚಾರ್ ಕಾಸ್ ಕರ್ಚ್ಯಾ ಪೈಪೊಟಿಂತ್ ಜಾಯ್ತೊ ಲೋಕ್ ಆಪ್ಲೆಂ ಜಿವಿತ್ ಸಾರ್ಕೆಂ ಜಿಯೆನಾ.ದೆವಾನ್ ತಾಂಚೆರ್ ಆಪ್ಲಿಂ ಧಾರಾಳ್ ಬೆಸಾಂವಾಂ ವೊತ್ಲ್ಯಾರೀ ಜಿವಿತಾಂತ್ ಪಿಟ್ಟಾಸ್‌ಪಣ್ ಆಧಾರುನ್ ಪುಂಜೊವ್ನ್ ದವರ್ತಾತ್.ತಸಲ್ಯಾಂಕ್ ಡಯಾನ್ ಮುಣ್ತಾ ಗರ್ಜೆ ತೆಕಿದ್ ಖರ್ಚ್ ಕರ್ಚೊ , ದೆವಾನ್ ಭಲಾಯ್ಕಿ ದಿಲ್ಲ್ಯಾ ವೆಳಾರ್ ಬರೆಂ ಜೆಂವ್ಚೆಂ , ಪಸಂದಾಯೆಚೆಂ ಖಾಣ್ ಖಾಂವ್ಚೆಂ ಆನಿ ಸಾಂಗಾತಾ ಇಲ್ಲೆಂ ಭಂವೊಂಕ್ ವೆಚೆಂ.ದೆವಾನ್ ಗ್ರೇಸ್ತ್‌ಕಾಯ್ ದಿಲ್ಲ್ಯಾ ವೆಳಾರ್ ಚಡ್ ಉಡನಾಸ್ತಾನಾ , ದುಬ್ಳಿಕಾಯ್ ಆಯಿಲ್ಲ್ಯಾ ವೆಳಾರ್ ಚಡ್ ರಡಾನಾಸ್ತಾನಾ ಆಸ್‌ಲ್ಲ್ಯಾಂತ್ ಖುಶಿ ಪಾವೊನ್ ಸಾದೆಪಣಿಂ ಜಿಯೆಂವ್ಚೆಂ ಗರ್ಜೆಚೆಂ.ಕಿತ್ಯಾಕ್ ಮುಳ್ಳ್ಯಾರ್ ಸುರಾತ್‌ಪಣ್ ಕರ್ನ್ ದವರ್‌ಲ್ಲೆ ಪಯ್ಶೆ , ಆಸ್ತ್-ಬದಿಕ್ ಆಮಿಂ ಹೊ ಸಂಸಾರ್ ಸಾಂಡ್ತಾನಾ ಆಮ್ಚ್ಯಾ ಸಂಗಿಂ ವ್ಹರುಂಕ್ ಜಾಯ್ನಾ ಮುಣೊನ್ ಡಯಾನ್ ಸಾಂಗೊಂಕ್ ವಿಸ್ರಾನಾ.

ವಿದೇಶಾಂನಿ ಜೊಡ್ತೆಲ್ಯಾ ಥೊಡ್ಯಾ ಜೊಡ್ಯಾಂ ಮದೆಂ ಆಶೆಂಯ್ ಘಡ್ತಾ. ಘೊವಾನ್ ಸೆವಿಂಗ್ಸ್ ಕೆಲ್ಲೆಂ ಬಾಯ್ಲೆಕ್ ಕಳಿತ್ ಆಸಾನಾ ಆನಿ ಬಾಯ್ಲೆನ್ ಕೆಲ್ಲೆಂ ಘೊವಾಕ್. ಆತಾಂ ಬದ್ಲಾಲ್ಲ್ಯಾ ಕಾನೂನಾಂತ್ ಚಡಾವತ್ ನಿವೇಶಾಂಕ್ ನೊಮಿನಿ ಆಸ್ತಾ ತರೀ ಹಿಶೆ , ಮ್ಯೂಚುವಲ್ ಫಂಡ್ ತಸಲ್ಯಾ ನಿವೇಶಾ ವಿಶ್ಯಾಂತ್ ಎಕಾಮೆಕಾಕ್ ಕಳಿತ್ ಆಸಾಜೆ ಪಡ್ತಾ. ನಾಂ ತರ್ ಆಪ್ಲೆ ಪಯ್ಶೆ ಕೊಣಾ ಕೊಣಾಚ್ಯಾ ಆಧಿನ್ ಜಾಂವ್ಚಿ ಸಾಧ್ಯತಾ ಚಡ್ ಆಸ್ತಾ ಕೊಣಿ ನಾ ಜಾಲ್ಯಾರೀ ಸರ್ಕಾರ್‌ಚ್ಚ್ ಭಿತರ್ ಘಾಲುಂಕ್ ಆಸಾ.ತ್ಯಾ ದೆಕುನ್ ಕುಟ್ಮಾಂನಿ ಬಸೊನ್ ಎಕಾಮೆಕಾಕ್ ನಿರ್ಧಾರಾಕ್ ಯೆಂವ್ಚೆಂ ಚಡ್ ಗರ್ಜೆಚೆಂ .ಜೊಡ್‌ಲ್ಲೆ ಪಯ್ಶೆ ಇಲ್ಲೆಶೆ ಜಾಂವ್ದಿತ್ ವ ಚಡ್ ಜಾಂವ್ದಿತ್ ತೆ ಕೊಣೆ ಕೊಣೆ ಕಿತ್ಯಾಕ್ ಖಾಂವ್ಕ್ ಜಾಯ್ ಮುಳ್ಳೆಂ ವಾಜ್ಭಿ ಸವಾಲ್ ಲೇಖಕ್ ಉಬೆಂ ಕರ್ತಾ.

ವಿದೇಶಾಂನಿ ವಾವುರ್ಚ್ಯಾ ಆಮ್ಚ್ಯಾ ಯುವಜಣಾಂಚೆ ರೋಸಾ ಸಂಭ್ರಮ್ , ಕಾಜಾರಾ ಸಂಭ್ರಮಾಚಿ ಗದ್ದಳಾಯ್ ಹಾಚೆ ಪಾಟ್ಲ್ಯಾನ್ ಕಷ್ಟಾಂನಿ ಘೊಳ್‌ಲ್ಲ್ಯಾ ದುಡ್ವಾಚೊ ವಿಭಾಡ್ , ನಾಂ ತರ್ ಲೋನ್ ಕಾಡ್ನ್ ಉಪ್ರಾಂಕ್ ಜಿಣಿಭರ್ ಮಯ್ನ್ಯಾಚೆ ಕಂತ್ ಭರ್ಚೆಂ ಹೆಂ ಪಳೆವ್ನ್ ಡಯಾನ್ ಕಳ್ವಳ್ತಾ ಆನಿ ತರ್ನಾಟ್ಯಾಂಕ್ ಆಶಿ ಬೂದ್ ಬಾಳ್ ಸಾಂಗ್ತಾ…ಮುಖ್ಲ್ಯಾ ದಿಸಾಂನಿ ಶಿಕಪ್ ಆನಿ ಸಾಮಾನ್ಯ್ ಜ್ಞಾನ್ ಆಸ್‌ಲ್ಲ್ಯಾ ನವ್ಯಾ ಜೊಡ್ಯಾಂನಿ ಪಯ್ಶಾಂಚೊ ವಿಬಾಡ್ ಕರಿನಾಸ್ತಾನಾ ಉರಯ್ಲ್ಯಾರ್ ತಾಂಚ್ಯಾಚ್ ಮುಖ್ಲ್ಯಾ ಪುಡಾರಾಕ್ ತಾಚಿ ಗರ್ಜ್ ಪಡ್ತಾ ನಾಂ ತರ್ ತ್ಯಾ ಉಗ್ಡಾಸಾಕ್ ಸಮಾಜೆಂತ್ಲ್ಯಾ ಗರ್ಜೆವಂತಾಂಕ್ ಕಾಂಯ್ ತರೀ ಕುಮೊಕ್ ಕರ್ಚೆಂ ಬರೆಂ ಮ್ಹನ್ ದಾಕಯ್ಲ್ಯಾರ್ ತಾಂಚೆಂ ಕಾಜಾರಿ ಜಿವಿತ್ ಸುಫಳ್ ಜಾತೆಲೆಂ ಮುಣೊನ್ ಆಪ್ಲೊ ಸಾಮಾಜಿಕ್ ಹುಸ್ಕೊ ದಾಕಯ್ತಾ.

ಜಿಣಿಯೆಂತ್ ಕೂಡ್ ಘಟ್ ಆಸ್ತಾನಾ ಜಮಾಯಿಲ್ಲೊ ದುಡು ಸರ್ವ್ ಆಪ್ಲ್ಯಾ ಘೊವ್-ಬಾಯ್ಲ್ ವ ಭುರ್ಗ್ಯಾಂಚ್ಯಾ ನಾಂವಾರ್ ಕರಿನಾಕತ್.ಆಪಾಪ್ಲ್ಯಾ ನಿವೃತ್ತಿ ಜೀವನಾಂತ್ ತುಮಿಂ ಘೊಳ್‌ಲ್ಲೊ ದುಡು ತುಮ್ಚ್ಯಾ ಮುಖ್ಲ್ಯಾ ಜಿವಿತಾಕ್ ಜಾಯ್ ತಿತ್ಲೊ ತರೀ ತುಮ್ಚ್ಯಾ ನಾಂವಾರ್ ದವರಾ.ಪಾಲ್ಯಾಂಚೆ ದೀಸ್ ಕಶೆ ಆಸ್ತಾಲೆ ತೆ ಕೊಣಾಕಿ ಕಳಾನಾ ಮುಣೊನ್ ನಿವೃತ್ತಿ ಘೆವ್ನ್ ಪಾಟಿಂ ವೆತೆಲ್ಯಾಂಕ್ ದೋನ್ ಚತ್ರಾಯೆಚಿಂ ಉತ್ರಾಂ ಸಾಂಗೊಂಕ್ ಡಯಾನ್ ವಿಸ್ರಾನಾ.

ಆಮ್ಚ್ಯಾ ಫೆಸ್ತಾ ಸಂಭ್ರಮಾಂನಿ ಹೆರಾಂಕ್ ಜೆ Less Fortunate ಕೋಣ್ ಆಸ್ತಾತ್ ತಾಂಕಾಂ ಸಾಂಗಾತಾ ಘೆವ್ಯಾಂ.ತಾಂಕಾಂ ಆಮ್ಚೊ ಥೊಡೊ ಸಂತೊಸ್ ವಾಂಟ್ಯಾಂ , ತಾಂಕಾಂಯ್ ಏಕ್ ಬೊರ‍್ಯಾ ಫೆಸ್ತಾಚೊ ಆನ್ಭೊಗ್ ದಿವ್ಯಾಂ ಮುಣೊನ್ ಸಾಂಗ್ತಾ.ಹಾಂಗಾ ಹಾಂವ್ ಸಾಂಗೊಂಕ್ ಆಶೆತಾಂ ಡಯಾನ್ ಕಿತೆಂ ಉಲ್ಲೇಖ್ ಕರ್ತಾ ತಶೆಂ ಚಲ್ಚೊ ವ್ಯಕ್ತಿ.ಆನಿ ಹಾಂವ್‌ಚ್ಚ್ ಹಾಕಾ ಉದಾಹರಣ್. ಫೆಸ್ತಾಂ ಪರ್ಬೆಂ ವೆಳಿಂ ಮೊಜ್ಯಾಚ್ ಕುಟ್ಮಾಚ್ಯಾಂನಿ ತುಂ ಬ್ಯಾಚುಲರ್ ರಾವ್ತಾಯ್ ಪಳೆ , ನಾ ಜಾಲ್ಯಾರ್ ಫೆಸ್ತಾಕ್ ಆಪೊವ್ಯೆತ್ ಆಸ್‌ಲ್ಲೆಂ ಮುಣೊನ್ ಮ್ಹಾಕಾ ಆಪೊಂವ್ಕ್ ಇನ್ಕಾರ್ ಕರ್ತಾನಾ ಡಯಾನಾನ್ ಮ್ಹಾಕಾ ತಶೆಂಚ್ಚ್ ಮೊಜ್ಯಾ ತಸಲ್ಯಾ ಬ್ಯಾಚುಲರ್ ರಾವ್ತೆಲ್ಯಾಂಕ್ ಫೆಸ್ತಾಕ್ ಆಪಯ್ಲಾಂ ಆನಿ ತಾಚಿ ಶ್ರೀಮತಿ , ಲವೀನಾನ್ ಆಪ್ಲ್ಯಾಚ್ಯಾ ಘರ್ಚ್ಯಾ ಸಾಂದ್ಯಾಂಬರಿ ಸಂತೊಸಾನ್ ಆಮ್ಕಾಂ ಸುಧಾರ್ಸಿಲಾಂ.

ಆತಾಂಚ್ಯಾ ಆಧುನಿಕ್ ಯಾಂತ್ರಿಕ್ ಜೀವನಾಂತ್ ಮನ್ಯಾಂಚಿ ಆಶಾ ಗಡ್ ಮಿರ್ಮೊನ್ ವೆತಾನಾ , ಮತ್ ಹಜಾರೊಂ ಸಮಸ್ಯಾಂನಿ ರೆವ್ಡೊನ್ ಆಸ್ತಾನಾ ಖಂಯ್ಗೀ ಆಮಿಂ ಸೊಸ್ಣಿಕಾಯ್ ಮ್ಹಳ್ಳಿಚ್ಚ್ ಹೊಗ್ಡಾವ್ನ್ ಘೆತ್ಲ್ಯಾ.ಹರ್ಯೆಕಾ ಮೆಟಾಂನಿ ಆಮ್ಕಾಂ ಆಡ್ಚಣ್‌ಚ್ ಪಳೆಂವ್ಕ್ ಮೆಳ್ತಾ.ಜಿವಿತಾಂತ್ ಲ್ಹಾನ್ ಲ್ಹಾನ್ ಸಂಗ್ತಿಂನಿ ನಿರಾಶಾ ಜಾಲ್ಲ್ಯಾ ಖರಿತ್ ವ್ಹಡ್ಲ್ಯಾ ಸಂಗ್ತಿಚೆಂ ಮೋಲ್ ಕಳಾನಾ.ಮ್ಹನಿಸ್ ವ್ಹಡ್ ಪರ್ವತ್ ಆದ್ಳೊನ್ ಪಡಾನಾ , ಬಗಾರ್ ವಾಟೆರ್ ಆಸ್‌ಲ್ಲ್ಯಾ ಲ್ಹಾನ್ ಫಾತ್ರಾಂಕ್ ಆದ್ಳೊನ್ ಧರ್ಣಿಕ್ ಶೆವ್ಟಾತಾ ಆಶಿ ಡಯಾನ್ ಸೊಸ್ಣಿಕಾಯೆಚಿಂ ಸೂತ್ರಾಂ ವಾಚ್ಪ್ಯಾಂಕ್ ಸಾಂಗ್ತಾ.

ಆಶಿಂ ಸರ್ವ್ ಜಿಣಿಯೆ ಸತಾಂ ಸಾಂಗೊನ್ ಡಯಾನ್ ಹಾಣೆ ವರ್ಸಾಂ ಥಾವ್ನ್ ಪಾತ್ಯೆವ್ನ್ ಯೇವ್ನ್ ಆಮ್ಕಾಂಯಿ ಶಿಕಯಿಲ್ಲೆಂ ಮೂಳ್‌ಮಂತ್ರ್ ಹೆರಾಂಚೆಂ ಬರೆಂ ಚಿಂತಾ , ತುಮ್ಚೆಂ ಬರೆಂ ಜಾತೆಲೆಂ ಮ್ಹುಣ್ ಸಾಂಗೊನ್ ಹ್ಯಾ ಬುಕಾಚ್ಯಾ ಆವೃತ್ತೆಕ್ ಪೂರ್ಣ್ ವಿರಾಮ್ ದಿತಾ.ಮಂಗ್ಳೂರಾ ಬಾಯ್ರ್ ವಚೊನ್ ಆಪ್ಲೆಂ ಜಿವಿತ್ ಜಿಯೆತೆಲ್ಯಾಂಕ್ ಯೆಂವ್ಚೆ ಸರ್ವ್ ಕಷ್ಟ್ ಆನಿ ತಾಚ್ಯಾ ವಯ್ರ್ ತಾಣಿಂ ಕಶೆಂ ಜೈತ್ ವರ್ಯೆತ್ ಮುಣೊನ್ ಡಯಾನಾನ್ ಭೊವ್ ಸಂಪ್ಯಾ ರಿತಿನ್ ತರೀ ಪರಿಣಾಮ್‌ಕಾರಿ ರಿತಿನ್ ಉಜ್ವಾಡ್ ಹ್ಯಾ ಬುಕಾಂತ್ ಫಾಂಕಯ್ಲಾ. ವಿಶೇಷ್ ಜಾವ್ನ್ ಗಲ್ಫಾಂತ್ ಕಾಮ್ ಕರ್ತೆಲ್ಯಾಂನಿ ಸಾಂಪ್ಡೊಂಚೆಂಚ್ ಭಲಾಯ್ಕಿ , ಪಯ್ಶಾಂಚೊ ಆಬ್ಲೆಸ್ , ಮಾಂಯ್ ಗಾಂವ್ಚಿ ವಿಸರ್ , ಭುರ್ಗ್ಯಾಂ ವಿಶಿಂ ಹುಸ್ಕೊ ಆನಿ ದೆವಾಸ್ಪಣ್ , ಜಿವಿತ್ ರಕ್ಷಣ್ , ಹಾಸೊ , ಕ್ರೆಡಿಟ್ ಕಾರ್ಡಾಂ / ಪರ್ಸನಲ್ ಲೋನ್ , ಪರ್ಗಾವಾಂತ್ ಜೊಡ್ತೆಲ್ಯಾ ವಯ್ರ್ ದಭಾವ್ , ಬೊರಿ ಇಷ್ಟಾಗತ್ , ಮಾನಸಿಕ್ ದಭಾವ್ , ಚೂಕ್ ಸಮ್ಜಣಿ , ಸಮಾಸಮ್‌ಪಣ್, ದುಬ್ಳ್ಯಾ ದಾಕ್ಟ್ಯಾಂ ವಿಶಿಂ ಬೊರೆಂ ಚಿಂತ್ , ತುಜೆಂ ಜಿವಿತ್ ಜಿಯೆ , ಉರವ್ಣಿ , ಆನಾವಶ್ಯಕ್ ಖರ್ಚ್ , ನಿವ್ರತ್ತಿ ಜೀವನಾಕ್ ದುಡು , ಹೆರಾಂ ಥಂಯ್ ಸಂತೊಸ್ ವಾಂಟ್ಯಾಂ , ಸೊಸ್ಣಿಕಾಯ್ ಹ್ಯಾ ಸಮಸ್ಯಾಂನಿ. ಹ್ಯಾ ಸರ್ವ್ ಸಮಸ್ಯಾಂ ವಯ್ರ್ ಡಯಾನಾನ್ ಭೊವ್ ಬೊರೊ ಕರುನ್ ಆರ್ಸೊ ಧರ್ಲೊ ಮುಣ್ತಾನಾ ತಾಣೆ ಗಲ್ಫಾಚ್ಯಾ ಜಿವಿತಾಚಿ ನಾಡ್ ಭೊವ್ ಬೊರಿ ಕರ್ನ್ ಧರ್ಲ್ಯಾ. ಡಯಾನ್ ಹ್ಯಾ ಬುಕಾಂತ್ ಕಿತೆಂ ಸಾಂಗ್ತಾ ತಸೊ ಜಿಯೆಲಾ ಆನಿ ಆಪ್ಲ್ಯಾ ಜಿವಿತಾಚಿ ಗೊಡ್ಸಾಣ್ ಚಾಕ್ಲ್ಯಾ ತ್ಯಾ ದೆಕುನ್ ಆಪ್ಲಿ ಟಿ ಆರ್ ಪಿ ವಾಡೊಂವ್ಚ್ಯಾ ಖಾತಿರ್ ಆಪ್ಲಿ ಲಿಖ್ಣಿ ವಾಪಾರಿನಾಸ್ತಾನಾ ಆಪ್ಣಾಕ್ ಕಿತೆಂ ಬೊರೆಂ ಜಾಲಾಂ / ತಶೆಂಚ್ ಕಶೆಂ ಬೊರೆಂ ಜಾವ್ಯೇತ್ ತೆಂ ಆಪ್ಲ್ಯಾ ಗಾಂವ್ ಭಾವಾಂಕ್ / ಭಯ್ಣಿಂಕ್ ವಾಂಟ್ಲಾಂ. ಮ್ಹಾಕಾ ಹ್ಯಾ ಬುಕಾಕ್ “Modern Biblical Quotes for Better Living to Mangalorean NRI’s” ಮುಣೊನ್ ಒಲಾಂವ್ಕ್ ಕಿತೆಂಚ್ ದಾಕ್ಷೆಣ್ ಭಗಾನಾ. ೨-೩ ಪಾದ್ರ್ಯಾಬಾಂನಿ ಆಮ್ಚ್ಯಾ ಸೆರ್ಮಾಂವಾಂಕ್ ತಯಾರಿ ಕರುಂಕ್ ಆತಾಂ ಹೊಚ್ಚ್ ಬೂಕ್ ರೆಫರ್ ಕರ್ತಾಂವ್ ಮುಣೊನ್ ಮೊಜ್ಯಾ ಲಾಗಿಂ ಸಾಂಗ್‌ಲ್ಲೆಂ ಆಸಾ.

ಮಂಗ್ಳೂರಿ ಸಮಾಜೆಕ್ ಗಲ್ಫಾಂತ್ ದೊಸ್ಚ್ಯಾ ಥೊಡ್ಯಾ ಸಮಸ್ಯಾಂ ಥಂಯ್ ಡಯಾನಾನ್ ಆಪ್ಲಿ ದೀಷ್ಟ್ ಘುಂವ್ಡೊಂವ್ಕ್ ನಾ ಮುಳ್ಳಿ ಬೆಜಾರಾಯ್ ಮ್ಹಾಕಾ ಆಸಾ.ತಾಂತುಂ ಪ್ರಮುಖ್ ಜಾವ್ನಾಸಾತ್ ಲಗ್ನಾ ಭಾಯ್ಲೆ ಸಂಬಂದ್, ಲಿವ್ ಇನ್ ಸಂಬಂದ್, ಚಡೊನ್ ಯೆಂವ್ಚ್ಯೊ ಡೈವೊರ್ಸ್ ಕೇಸಿ , ಚೆಡ್ವಾಂನಿ ಕಾಜಾರ್ ಜಾವ್ನ್ ಉಪ್ರಾಂತ್ ಡೈವೊರ್ಸ್ ದೀವ್ನ್ ಚೆಡ್ಯಾಕ್ ಆನಿ ತಾಚ್ಯಾ ಕುಟ್ಮಾಕ್ ಪಯ್ಶಾಂ ಲಾಗೊನ್ ಬ್ಲ್ಯಾಕ್‌ಮೈಲ್ ಕರ್ಚೆಂ , ಗಲ್ಫಾಂತ್ ವಾಡ್‌ಲ್ಲ್ಯಾ ತರ್ನಾಟ್ಯಾ ಭುರ್ಗ್ಯಾಂಚ್ಯೊ ರಾತಿಕ್ ಜಾಂವ್ಚೊ ಹುತಾವಳಿ… ಡಯಾನಾಚ್ಯಾ ಘರಾ ಲಾಗ್ಶಿಲೆಂ ಪಾರ್ಕಿಂಗ್‌ಚ್ಚ್ ಹಾಕಾ ಬೊರೆಂ ಉದಾಹರಣ್. ಕಾಂಯ್ ವಾಕಿಂಗ್ ಕರ್ತಾನಾ ಕುಲೆ ಧಲ್ಚೆ ಆನಿ ಪೊಟಾಂ ಹಾಲ್ಚಿಂ ಪಳೆವ್ನ್ ಆಸ್‌ಲ್ಲ್ಯಾ ಡಯಾನಾಚಿ ದೀಷ್ಟ್ ಹ್ಯಾ ಸಮಸ್ಯಾಂ ವಯ್ರ್ ವಚೊಂಕ್ ನಾ ಮುಣೊನ್ ಪಾತ್ಯೆಂವ್…..

ಕಿತೆಂಯ್ ಜಾಂವ್…ಡಯಾನಾನ್ ಆಪ್ಲಿ ದೀಷ್ಟ್ ಪ್ರಮುಖ್ ಜಾವ್ನ್ ಗಲ್ಫಾಂತ್ ಜೀಣ್‌ಭರ್ ಘೊಳ್ನ್ ಪಾಟಿಂ ವೆತೆಲ್ಯಾಂಚ್ಯಾ ಬೊರ‍್ಯಾ ದಿಸಾಂ ವಯ್ರ್ ಕೇಂದ್ರಿಕ್ರತ್ ಕೆಲ್ಯಾ. ಥೊಡ್ಯಾಂಕ್ ತರೀ ಮುಣ್ಚ್ಯಾಕೀ ಸಬಾರಾಂಕ್ ಡಯಾನಾಚ್ಯಾ ಚಿಂತ್ನಾಂ ಥಾವ್ನ್ ಬೊರೆಂಪಣ್ ಮೆಳ್ಳಾಂ ತೆಂ ಖಂಡಿತ್. ಡಯಾನಾಚ್ಯಾ ಹ್ಯಾ ಬುಕಾಂತ್ ಕಾವ್ಯಾಳ್ ಹ್ಯಾ ಸಾಹಿತಿಕ್ ಉತ್ರಾಂ ನಾಂತ್. ಆಮಿಂ ಆಮ್ಚ್ಯಾ ಜಿಣಿಯೆಂತ್ ಸದಾಂ ಉಲೊಂವ್ಚಿ ಬಾಸ್. ವಾಚುಂಕ್ ಸಲೀಸ್ ಆಸಾ ತರೀ ಸಂದೇಶ್ ತಿತ್ಲೆಚ್ ಪ್ರಬಲ್ ಆಸಾತ್. ಹೊ ಬುಕ್ ಗಲ್ಫಾಂತ್ ಜೊಡಿರ್ ಆಸ್ಚ್ಯಾ ಹರ್ಯೆಕ್ಲ್ಯಾಚೊ ಹಾತ್ ಪುಸ್ತಕ್ ಜಾಂವ್ಕ್ ಜಾಯ್ ಆಶೆಂ ಆಶೆತಾಂ.

■ ನಾನು ಮರೋಲ್, ತೊಟ್ಟಾಮ್