ಮ್ಹಜ್ಯಾ ಕವಿತೆಂಚೊಂ ಚವ್ತೊ ಪುಸ್ತಕ್ ಜನೆಲ್ ಆಯ್ತಾರಾ ಜೂನ್ 1 ವೆರ್, ಕೊಂಕ್ಣಿ ಭವನ್, ಕೊಂಕ್ಣಿ ಭಾಶಾ ಮಂಡಳ್ , ಮಡ್ಗಾಂವ್ ಹಾಂಗಾಸರ್ ವಿಮೋಚನ್ ಜಾತಲೊ. ಅಖಿಲ್ ಭಾರತೀಯ್ ಕೊಂಕಣಿ ಪರಿಷದೆಚೊ ಕಾರ್ಯಕಾರಿ ಅಧ್ಯಕ್ಷ್ ಚೇತನ್ ಆಚಾರ್ಯ ಪುಸ್ತಕಾಚಿ ಒಳಕ್ ಕರುನ್ ದಿತಲೆ, ಗೋವಾ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ತಶೆಂ ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ ಜನರಲ್ ಕಾವ್ನ್‌ಸಿಲಾಚೊ ಸಾಂದೊ, ಪ್ರಾಚಾರ್ಯ್ ಡಾ| ಪೂರ್ಣಾನಂದ ಚಾರಿ ಪುಸ್ತಕ್ ಉಗ್ತಾಯ್ತಲೆ. ಸಾಹಿತಿ – ಸಮೀಕ್ಷಕ್ ಡಾ| ಕಿರಣ್ ಬುಡ್ಕುಲೆ ಅಧ್ಯಕ್ಷೀಯ್ ವಕ್ತವ್ಯ್ ಕರ್ತೆಲಿ. ಕಾರ್ಯಕ್ರಮ್ 5 ವರಾಂಕ್ ಸುರ್ವಾತುನ್ 6.30 ವರಾಂಚೇರ್ ಸಂಪ್ತಲೆಂ. 4.30 ವರಾಂಕ್ ಚಾ ಆಸ್ತೆಲಿ.
https://eventgoa.com/Book-Release/263—.html
1984 ವ್ಯಾ ವರ್ಸಾ, ಎಚ್. ಆರ್. ಆಳ್ವ ಸಂಪಾದಕ್ ಆಸ್ತಾನಾ, ‘ಯುವಕ್’ ಪತ್ರಾ ಥಾವ್ನ್ ಹಾಂವೆ ಕೊಂಕ್ಣೆಂತ್ ಬರಂವ್ಕ್ ಸುರ್ವಾತ್ ಕೆಲಿ. ಪದ್ವಿ ಶಿಕಪ್ ಸಂಪ್ತಚ್ ಮುಂಬಯ್ ಪಾವ್ಲೊಂ. 2006 ಪಾಸುನ್ ಆತಾಂ ಮಂಗ್ಳುರಾಂತ್ ವಸ್ತಿ ಕರುನ್ ಆಸಾಂ. ಮ್ಹಜ್ಯಾ ಚಡುಣೆಂ 40 ವರ್ಸಾಂಚ್ಯಾ ಸಾಹಿತೀಕ್ ಜಿಣಿಯೆಂತ್ 750+ ಕವಿತಾ, 100+ ಮಟ್ವ್ಯೊ ಕಾಣಿಯೊ, 2500+ ಲೇಕನಾಂ, ಸಂಪಾದಕೀಯಾಂ, ಪ್ರಬಂದ್, ಅಂಕಣ್ ಬರ್ಪಾಂ ಹಾಂವೆ ಬರಯ್ಲ್ಯಾಂತ್. ಆಜ್ ಮೆರೆನ್ ಮ್ಹಜ್ಯಾ ಕವಿತೆಚಿಂ ತೀನ್ ಪುಸ್ತಕಾಂ ; ಚಲ್ಯಾಂಕ್ ಚತ್ರಾಯ್ (1999) ಕಯ್ದ್ಯಾಚ್ಯೊ ಕವಿತಾ (2004) ಬಾಮುಣಾಂಚೆಂ ಚೆಡುಂ (2006 ), ಕಥೆಚಿಂ ದೋನ್ ಪುಸ್ತಕಾಂ – ದೆವಾಕ್ ಸೊಡ್‌ಲ್ಲೊ ಪಾಡೊ (2002) ಬೀಗ್ ಆನಿ ಬಿಗಾತ್ (2016) ಆನಿ ಸಮೀಕ್ಷೆಚೆಂ ಏಕ್ ಪುಸ್ತಕ್ – ಕೊಂಕ್ಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ (2021 ) ಪ್ರಕಟ್ ಜಾಲ್ಯಾಂತ್.
ಮ್ಹಜ್ಯಾ ಬೀಗ್ ಆನಿ ಬಿಗಾತ್ ಪುಸ್ತಕಾಕ್ 2018 ವ್ಯಾ ವರ್ಸಾ ವಿಮಲಾ ವಿ ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ್, ಕೊಂಕಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ ಪುಸ್ತಕಾಕ್ 2021 ವ್ಯಾ ವರ್ಸಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಉತ್ತೀಮ್ ಪುಸ್ತಕ್ ಪುರಸ್ಕಾರ್, ಆನಿ ತ್ಯಾಚ್ ಪುಸ್ತಕಾಕ್ 2023 ವ್ಯಾ ವರ್ಸಾ ಗೋವಾ ಕೊಂಕ್ಣಿ ಅಕಾಡೆಮಿ ಥಾವ್ನ್ ಸರ್ವೋತ್ಕೃಷ್ಟ ಸಾಹಿತ್ಯ ಕೃತಿ ಪುರಸ್ಕಾರ್ ಪಾವೊ ಜಾಲ್ಯಾತ್. ರುಪಾಂ ಆನಿ ರೂಪಕಾಂ ಪುಸ್ತಕಾಂತ್ ಆಧುನಿಕ್ ಕೊಂಕಣಿ ಕಾವ್ಯಾಂತ್ ಮಂಗ್ಳುರ್ ಆನಿ ಗೊಂಯ್ಚ್ಯಾ ವಿಂಚ್ಣಾರ್ ಕವಿಂನಿ ವಾಪರ್ಲೆಲ್ಯಾ ರುಪಕಾಂಚೇರ್ ಖೊಲಾಯೆಚೊ ತಶೆಂ ತುಲನಾತ್ಮಕ್ ಅಭ್ಯಾಸ್ ಕರ್ಚೆಂ ಪ್ರಾಮಾಣಿಕ್ ಪ್ರೇತನ್ ಹಾಂವೆ ಕೆಲಾಂ.
ಬೀಗ್ ಆನಿ ಬಿಗಾತ್ ಪುಸ್ತಕಾಕ್ ವಿಮಲಾ ವಿ ಪೈ ಪುರಸ್ಕಾರ್
ಮ್ಹಜ್ಯಾ ಕವಿತೆ ಖಾತೀರ್ 2006 ವರ್ಸಾ ದಾಯ್ಜ್ ವರ್ಸಾಚೊ ಕವಿ ಪುರಸ್ಕಾರ್, 2018 ವ್ಯಾ ವರ್ಸಾ ಕವಿತಾ ಟ್ರಸ್ಟಾನ್ ದಿಂವ್ಚೊ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಮ್ಹಾಕಾ ಪಾವೊ ಜಾಲ್ಯಾತ್. 2023 ವ್ಯಾ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಸಾಹಿತ್ಯಾ ಖಾತಿರ್ ಗವ್ರವ್ ಪುರಸ್ಕಾರ್ ಆನಿ ಕೊಂಕಣಿ ಸಾಹಿತ್ಯ ಆನಿ ಪತ್ರಿಕೋದ್ಯಮಾ ಖಾತೀರ್ ಕರ್ನಾಟಕ ಸರ್ಕಾರಾ ಥಾವ್ನ್ ದಕ್ಷಿಣ ಕನ್ನಡ ಜಿಲ್ಲ್ಯಾಚಿ ರಾಜ್ಯೋತ್ಸವ ಪ್ರಶಸ್ತಿಯ್ ಫಾವೊ ಜಾಲ್ಯಾ.
ಕವಿತಾ ಟ್ರಸ್ಟ್ ಮಥಾಯಸ್ ಕುಟಮ್ ಪುರಸ್ಕಾರ್
ಸಂಘಟನಾಚ್ಯಾ ಮಾಳಾರ್ ಕೊಂಕಣಿ ಲೇಖಕಾಂಚೊಂ ಎಕ್ವಟಾಂತ್, ಪಾವ್ಲು ಮೊರಾಸ್ ಅಧ್ಯಕ್ಷ್ ಆಸ್ತಾನಾ ಕಾರ್ಯದರ್ಶಿ ಆನಿ ಉಪ್ರಾಂತ್ ಅಧ್ಯಕ್ಷ್ ಜಾವ್ನ್ ಹಾಂವ್ ವಾವುರ್ಲಾಂ. ಮಂಗ್ಳುರಾಂತ್ ಜಾಲ್ಲ್ಯಾ 25 ವ್ಯಾ ಅಕಿಲ್ ಭಾರತ್ ಕೊಂಕ್ಣಿ ಸಾಹಿತ್ಯ್ ಸಮ್ಮೇಳನಾಚೊ ಕಾರ್ಯಾಧ್ಯಕ್ಷ್ ಜಾವ್ನ್ ಸಮ್ಮೇಳನ್ ಯಶಸ್ವೀ ಕರುಂಕ್ ವಾವುರ್ಲಾಂ. ಪಾಟ್ಲ್ಯಾ ತೀನ್ ವರ್ಸಾಂ ಪಾಸುನ್ ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ವಾಂಗ್ಡಿ ಜಾವ್ನ್ ಕಾಮ್ ಕರುನ್ ಆಸಾಂ. ಪಾಟ್ಲ್ಯಾ ವರ್ಸಾ ಪಾಸುನ್ ಅಕಿಲ್ ಭಾರತೀಯ್ ಕೊಂಕ್ಣಿ ಪರಿಷದೆಚೊ ಖಜಾನ್ದಾರ್ ಜಾವ್ನ್ ನೇಮಕ್ ಜಾಲಾಂ.
ಹ್ಯಾ ಭಾಯ್ರ್, ಮಂಗ್ಳುರ್ಚ್ಯಾ ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಮುಕೆಲ್ಪಣಾರ್ ಚಲೊನ್ ಆಸ್ಚ್ಯಾ, 100 ಬೂಕ್ ಫಾಯ್ಸ್ ಕರೂಂಕ್ ರುಪಯ್ 40 ಲಾಕ್ ಪುಸ್ತಕ್ ಅನುದಾನ್ ದಿಂವ್ಚ್ಯಾ ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಹ್ಯಾ ಯೋಜನೆಚೊ ಪ್ರಧಾನ್ ಸಂಪಾದಕ್ ಜಾವ್ನ್ ಜವಾಬ್ದಾರಿ ಸಾಂಬಾಳುನ್ ಅಸಾಂ. ಜಾಯ್ತ್ಯಾ ಪುರಸ್ಕಾರ್ ಸಮಿತೆಂನಿ ಜ್ಯುರಿ ಸಾಂದೊ ಜಾವ್ನ್ ವಾವುರ್ಚೆ ಸಾಂಗಾತಾಚ್ ಪಾಟ್ಲ್ಯಾ ದಿಸಾಂನಿ ಸಾ. ಸಾಂ. ಲುವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಾಚ್ಯಾ ಕೊಂಕಣಿ ಸಂಸ್ಥ್ಯಾಂತ್ ಬೊಲ್ಕಾಂವ್ ನಾಂವಾನ್ ಮಯ್ನ್ಯಾಳಿ ಸಾಹಿತ್ಯ್ – ಸಂವಾದ್ ಕಾರ್ಯಾವಳ್ ಆಯೋಜನ್ ಕರುನ್ ಆಸಾಂ.
ಕಿಟಾಳಾಕ್ ಚಾಲನ್ ; 5 ಫೆಬ್ರುವರಿ 2011
ಪಯ್ಲೊ ಕಿಟಾಳ್ ಯುವ ಪುರಸ್ಕಾರ್ 2012
ಕಿಟಾಳ್ ದಫ್ತರ್ ಉಗ್ತಾವಣ್ ; 2013
ಡೊ। ನಾ. ಡಿ ಸೊಜಾ ಹಸ್ತುಕಿಂ ‘ಆರ್ಸೊ’ ಸುರ್ವಾತ್ ; 2013
ಕಿಟಾಳ್ ಪ್ರಕಾಶನಾಚಿ ಸುರ್ವಾತ್ ; 2016
2023 ; ಕಿಟಾಳ್ + ಆರ್ಸೊ ಪುರಸ್ಕಾರ್
2024 ; ಲಿಯೊ ರೊಡ್ರಿಗಸ್ ಕಿಟಾಳ್ ಪುರಸ್ಕಾರ್
2011 ಪಾಸುನ್ ಕಿಟಾಳ್ ನಾಂವಾನ್ ಕೊಂಕಣಿ ಸಮಾಜೆಕ್, ಸಾಹಿತ್ಯ್ ಆನಿ ಸಮೀಕ್ಷೆಕ್ ಸಮರ್ಪಿತ್ ಅಂತರ್ಜಾಳ್ ಪತ್ರ್ ಚಲವ್ನ್ ಆಸಾಂ ಆನಿ 2013 ಪಾಸುನ್ ಆರ್ಸೊ ನಾಂವಾನ್ ಕೊಂಕ್ಣಿ ಪತ್ರ್ ಸ್ಥಾಪನ್ ಕರುನ್, ಪ್ರಸ್ತುತ್ ಮಯ್ನ್ಯಾಳೆಂ ಜಾವ್ನ್ ಕವಿ ವಿಲ್ಸನ್, ಕಟೀಲಾಚ್ಯಾ ಸಂಪಾದಕ್‌ಪಣಾರ್ ‘ಆರ್ಸೊ’ ಫಾಯ್ಸ್ ಜಾವ್ನ್ ಆಸಾ. ಕೆನ್ಯೂಟ್ ಕೆಲರಾಯ್ ಹಾಚ್ಯಾ ಎವರ್ಶೈನ್ ಪ್ರಕಾಶನಾಚೊ ಸಂಪಾದಕ್ ಜಾವ್ನ್ ತೀನ್ ಬೂಕ್ ಆನಿ ಉಪ್ರಾಂತ್ ಕಿಟಾಳ್ ಪ್ರಕಾಶನ್ ಸುರ್ವಾತುನ್ ನವೋದಿತ್ ಆನಿ ಮಾಲ್ಘಡ್ಯಾ ಬರಯ್ಣಾರಾಂಚಿಂ ಪುಸ್ತಕಾಂ ಪರ್ಗಟ್ ಕರುನ್ ಆಸಾಂ. ಆಜ್ ಮೆರೆನ್ ಪಂದ್ರಾ ಪ್ರಾಸ್ ಚಡ್ ಪುಸ್ತಕಾಂ ಎವರ್ಶೈನ್ ಆನಿ ಕಿಟಾಳ್ ಪ್ರಕಾಶನಾ ಮುಕ್ರಾಂತ್ರ್ ಫಾಯ್ಸ್ ಜಾಲ್ಲಿಂ ಆಸುನ್, ಚಡಾವತ್ ಪುಸ್ತಕಾಂಕ್ ವಿಮಲಾ ವಿ ಪೈ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಗೋವಾ ಕೊಂಕಣಿ ಅಕಾಡೆಮಿ, ಡೊ। ಟಿ.ಎಂ. ಪೈ ಫಾಂವ್ದೇಶನ್ ಅಶೆಂ ಪ್ರತಿಷ್ಠಿತ್ ಪುರಸ್ಕಾರ್ ಲಾಭ್ಲ್ಯಾತ್.
2012 ಪಾಸುನ್ ನವೋದಿತ್ ಸಾಹಿತಿಂಕ್ ಪ್ರೇರಣ್ ಆನಿ ಉತ್ತೇಜನ್ ದಿಂವ್ಚ್ಯಾ ಉದ್ದೇಶಾನ್ ಮಾನೆಸ್ತ್ ಲಿಯೋ ರೊಡ್ರಿಗಸ್ ಕುಟಮ್ ಕಿಟಾಳ್ ಯುವ ಪುರಸ್ಕಾರ್ ಆನಿ ಕೊಂಕ್ಣಿ ಪತ್ರಿಕೋದ್ಯಮಾಂತ್ ಸಾಧನ್ ಕೆಲ್ಲ್ಯಾ ಮಾಲ್ಘಡ್ಯಾಂತ್ ಮಾನ್ ಕರ್ಚೆ ದಿಶೆನ್ ಆರ್ಸೊ ಪತ್ರಾ ತರ್ಫೆನ್ ಡೊ। ಆಸ್ಟಿನ್ ಪ್ರಭು, ಚಿಕಾಗೊ ಕುಟಮ್ ಪತ್ರಿಕೋದ್ಯಮ್ ಪುರಸ್ಕಾರ್ ಪಾಟಂವ್ಚೊ ವಾವ್ರ್ ಚಾಲು ಆಸಾ. ರುಪಯ್ ಪಂಚ್ವೀಸ್ ಹಜಾರ್ ಹ್ಯಾ ಪುರಸ್ಕಾರಾಂಚೊಂ ಆಯ್ವಜ್ ಜಾವ್ನಾಸೊನ್, ಆಜ್ ಪರ್ಯಾಂತ್ ಕಿಟಾಳ್ ಪುರಸ್ಕಾರ್ ಜೊಡ್ಲೆಲ್ಯಾಂನಿ ನಿರಾಸ್ ಕರುಂಕ್ ನಾಂ.
ಜನೆಲ್ ಕವಿತಾ ಜಮ್ಯಾಂತ್ ಸಮಕಾಲೀನ್ ಆನಿ ಜಳ್ತ್ಯಾ ವಿಶಯಾಂಚೇರ್ ಬರಯಿಲ್ಲ್ಯೊ ಮ್ಹಜ್ಯೊ 65 ಕವಿತಾ ಆಸಾತ್. ಪುಸ್ತಕ್ ಕನ್ನಡ ಆನಿ ದೇವ್‌ನಾಗರಿ ದೊನೀ ಲಿಪಿಯಾಂನಿ ಆಸೊನ್, ಹ್ಯಾ ಪುಸ್ತಕಾಕ್ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಪುರಸ್ಕೃತ್ ಜ್ಯೇಷ್ಠ್ ಕವಿ ಮಾಧವ ಬೋರ್ಕಾರ್ ಹಾಣಿ ಪ್ರಸ್ತಾವನ್ ಬರಯ್ಲಾಂ. ಕಿಶೂ, ಬಾರ್ಕುರ್ ಹಾಣೆ ಪುಸ್ತಕಾಚೊ ಫ್ಹೊರ್ ವಿನ್ಯಾಸ್ ಕರುನ್, ಕವಿ – ಸಾಹಿತಿ ಜಾವ್ನ್ ಮ್ಹಜಿ ಒಳಕ್, ಆನಿ ಮ್ಹಜ್ಯಾ ಸಾಹಿತ್ಯಾಚೆರ್ ಮಟ್ವಿ ಸಮೀಕ್ಷಾ ಬರಯ್ಲ್ಯಾ. ಮ್ಹಜ್ಯಾಚ್ ಕಿಟಾಳ್ ಪ್ರಕಾಶನಾ ಮಾರಿಫಾತ್ ಹೆಂ ಪುಸ್ತಕ್ ಉಜ್ವಾಡಾಯ್ಲಾಂ ಆಸುನ್ ಪುಸ್ತಕಾಚೆಂ ಮೋಲ್ ರು. 250/- ಆಸಾ. ಐವಜ್ 87627 38629 ಹ್ಯಾ ನಂಬ್ರಾಕ್ ಗೂಗಲ್ ಪೇ ಕೆಲ್ಯಾರ್ ಪೊಸ್ಟಾರ್ ತುಮ್ಕಾಂ ಪುಸ್ತಕ್ ಪಾವಿತ್ ಕರ್ಚಿ ವೆವಸ್ತಾ ಆಸಾ. ಚಡಿತ್ ಪುಸ್ತಕಾಂ ಸಾಂಗಾತಾ ಘೆತೆಲ್ಯಾಂಕ್, ರಿಯಾಯ್ತ್ ಲಾಭ್ತೆಲಿ.
ಮ್ಹಜ್ಯಾ ಆದ್ಲ್ಯಾ ಪುಸ್ತಕಾಂಕ್, ಕಿಟಾಳ್ ಅಂತರ್ಜಾಳ್ ಆನಿ ಅರ್ಸೊ ಪತ್ರಾಕ್, ಕಿಟಾಳ್ ಪ್ರಕಾಶನಾಕ್ ತುಮಿ ಆಜ್ ಮೆರೆನ್ ದಿಲ್ಲ್ಯಾ ಬೇಶರ್ತ್ ಪ್ರೊತ್ಸಾವಾನ್ ಮ್ಹಜ್ಯಾನ್ ಇತ್ಲೊ ವಾವ್ರ್ ಕರುಂಕ್ ಸಾಧ್ಯ್ ಜಾಲೊ. ಜನೆಲ್ ಬುಕಾಕೀ ತುಮ್ಚೆಂ ಬೆಸಾಂವ್ ಆನಿ ಸಹಕಾರ್ ಅಶೆತಾಂ. ಸಾಧ್ಯ್ ಜಾಲ್ಯಾರ್ ಜೂನ್ ಮಯ್ನ್ಯಾಚ್ಯಾ ಅಕೆರಿಕ್ ವಾ ಜುಲಾಯ್ ಮಯ್ನ್ಯಾಂತ್ ಮಂಗ್ಳುರಾಂತ್ ಏಕ್ ಲ್ಹಾನ್‌ಶೆಂ ಪುಸ್ತಕ್ – ಸಂವಾದ್ ಕಾರ್ಯೆಂ ಮಾಂಡುನ್ ಹಾಡ್ಚೆಂ ಪ್ರೇತನ್ ಕರ್ತಲೊಂ. ತುಮ್ಚ್ಯಾ ಮೊಗಾಕ್ ಆನಿ ಪ್ರೊತ್ಸಾವಾಕ್ ಹಾಂವ್ ಸದಾಂಚ್ ಋಣಿಂ ಆಸ್ತಲೊಂ. ತುಮಿ ಕೆದಾಳಾಯ್ 94497 70629 ಹ್ಯಾ ನಂಬ್ರಾಚೆರ್ ಮ್ಹಜೊ ಸಂಪರ್ಕ್ ಕರ್ಯೆತ್ / ಉಲವ್ಯೆತ್. ದೇವ್ ಬರೆಂ ಕರುಂ.
ಉಪ್ಕಾರಿ ಮನಾನ್ ಆನಿ ಮಾಯೆಮೊಗಾನ್ ,
ಎಚ್ಚೆಮ್, ಪೆರ್ನಾಲ್
8 comments
Congratulations HM Pernal on your great achievement in Konkani Literature. Wishing you all the best for the release of your fourth book of collection of poems ‘Janel’ .
Congratulations HM. Looking forward to read the poems. Wish the book a huge success.
ಜನೆಲ್ ಪುಸ್ತಕಾಚಾ ಪ್ರಕಟನಾ ಸಂದರ್ಭಿಂ, ಕವಿತಾ ಸಂಸಾರಾಕ್ ಆಪ್ಲ್ಯಾಚ್ ಶೈಲೆಚಿಂ ಕವಿತಾಂ ದೀವ್ನ್, ಕೊಂಕ್ಣೆಚಿ ಗ್ರೇಸ್ತ್‌ಕಾಯ್ ಚಡಯಿಲ್ಲ್ಯಾ ’ಎಚ್ಚೆಮ್ ಪೆರ್ನಾಳ್’ ಹಾಚೆ ಥಾವ್ನ್ ಆನಿಕೀ ಚಡಿತ್ ಸಾಹಿತ್ ಯೇಂವ್ದಿ ಮ್ಹಣ್ ಆಶೆಂವ್ಚಾ ಸವೆಂ, ಪುಸ್ತಕಾಕ್ ಸರ್ವ್ ಜಯ್ತ್ ಮಾಗ್ತಾಂ.
-ಸುನಂದ್
Congratulations Henri Bab on your new achievement. I am sure this book is a window to many social issues which you have always reflect in your poems…
ಆಮ್ಚೊ ಎಚ್ಚೆಮ್ ಪರ್ತುನ್ ಆಮ್ಕಾಂ ವಾಚುಂಕ್ ಮೆಳ್ತಾ ಮುಳ್ಳೊ ವ್ಹಡ್ ಸಂತೊಸ್.ಬೊರೆಂ ಸಾಹಿತ್ಯ್ ವಾಚ್ಪ್ಯಾಂಕ್ ವಾಚುಂಕ್ ದೀಜೆ ಮುಳ್ಳ್ಯಾ ಜವಾಬ್ದಾರಿಯುತ್ ಚಿಂತ್ನಾಂನಿ ಸಾಂಗಾತಾಚ್ ವಿವಿಧ್ ಜವಾಭ್ದಾರೆಂಚ್ಯಾ ವಾವ್ರಾಂತ್ ಮಿಸ್ಳೊನ್ ಖಂಯ್‌ಗೀ ತುಜ್ಯಾ ಭಿತರ್ಲ್ಯಾ ಕವಿಕ್ ಆನಿ ಲೇಖಕಾಕ್ ಆನ್ಯಾಯ್ ಜಾತೊಲೊ.ಆತಾಂ ಹೊ ಬೂಕ್ ಭಾಯ್ರ್ ಕಾಡ್ನ್ ತ್ಯಾ ಚಿಂತ್ನಾಂಕ್ ಖಾಡುಂ ಮಾರ್ಲಾಂಯ್.ಆನಿ ಮುಕಾರಿಂ ತರೀ ತುಜ್ಯಾ ಹೆರ್ ವಾವ್ರಾ ಸಾಂಗಾತಾ ತುಜೊ ಖುದ್ದ್ ಸಾಹಿತಿಕ್ ವಾವ್ರ್ ಸಮಾಸಮ್ ಜಾವ್ನ್ ಚಲೊಂದಿ ಮುಣೊನ್ ತುಕಾ ಸರ್ವ್ ಬೊರೆಂ ಮಾಗ್ತಾಂ.
Lovely to read about your achievements HM bab. Congratulations and all the very best for “Janel” Looking forward to read it someday.
Congratulations H M. Your literature has enriched konkani literature a great deal. Conntinue writing n keep upnthe good work
ತುಮ್ಕಾಂ ಆನಿ ತುಮ್ಚ್ಯಾ ಸಾಧನಾಕ್ ಜಯ್ತ್ ಮಾಗ್ತಾಂ.