ಸಾಹಿತ್ಯ ಅಕಾಡೆಮಿ , ನವೀ ಡೆಲ್ಲಿ ಆನಿ ಕಯ್ಯಾರ್ ಆರ್ಟ್ ನೆಸ್ಟ್ ಹಾಂಚ್ಯಾ ಜೋಡ್ ಆಸ್ರ್ಯಾಖಾಲ್ ಆಯ್ತಾರಾ, ಮೇ 25 ಸಾಂಜೆರ್, ನಾಮ್ನೆಚೊ ಕಲಾಕಾರ್ ವಿಲ್ಸನ್ ಸೋಜಾ ಹಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಗ್ರಾಮ ಲೋಕ ಕಾರ್ಯೆಂ ಸಾದರ್ ಜಾಲೆಂ.
ಸಾಹಿತ್ಯ ಅಕಾಡೆಮಿ, ಕಾರ್ಯಕಾರಿ ಸಮಿತಿಚೊ ಸಾಂದೊ ತಶೆಂ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಕವಿ ಮೆಲ್ವಿನ್ ರೊಡ್ರಿಗಸ್, ಘರ್ಚೆ ಯೆಜ್ಮಾನ್ ವಿಲ್ಸನ್ ಆನಿ ಲವ್ಲಿ, ಸಯ್ರ್ಯಾಂ ಸಾಂಗಾತಾ ಪಣ್ತಿ ಪೆಟವ್ನ್ ಕಾರ್ಯಾವಳ್ ಉಗ್ತಾಯ್ಲಿ.
ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ಸಾಂದೊ ಎಚ್ಚೆಮ್, ಪೆರ್ನಾಲ್ ಹಾಣೆ ಗ್ರಾಮಲೋಕ ಕಾರ್ಯಾವಳ್ ಅನಿ ಸಾಹಿತ್ಯ ಅಕಾದೆಮಿಚ್ಯಾ ಕಾರ್ಯಕ್ರಮಾಂಚಿಂ ಒಳಕ್ ಕರುನ್ ದಿತಚ್, ಕಾರ್ಯಾವಳಿಂತ್ ವಾಂಟೊ ಘೆಂವ್ಚ್ಯಾ ಬರಯ್ಣಾರಾಂಚಿಂ ಒಳಕ್ ಕರುನ್ ದಿಲಿ. ಕಯ್ಯಾರ್ ಆರ್ಟ್ ನೆಸ್ಟ್ ಮುಕೆಲಿ ಕಲಾಕಾರ್ ವಿಲ್ಸನ್ ಸೋಜಾನ್ ಯೆವ್ಕಾರ್ ಮಾಗ್ಲೊ ಆನಿ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಗುಲೊಬ್ ದೀವ್ನ್ ಸಯ್ರ್ಯಾಂಕ್ ಸ್ವಾಗತ್ ದಿಲೊ.
ಮಾಲ್ಫಡೊ ಸಾಹಿತಿ ಸಂಶೋಧಕ್ ಆನಿ ಪ್ರಾಧ್ಯಾಪಕ್ ಡೊ| ಎವ್ಜಿನ್ ಡಿ ಸೊಜಾ, ಬೊಳಿಯೆ ಹಾಣಿ 1975 ವ್ಯಾ ಫಾಯ್ಸ್ ಜಾಲ್ಲಿ ಸೊರ‍್ಯಾಚೆಂ ಕಾರ್ಭಾರ್ ಕಥಾ ವಾಚ್ಲಿ. ಅಸುಂತಾ ಡಿ ಸೊಜಾ ಪಾಂಬೂರ್ ಹಿಣೆ ಕೊಂಕ್ಣಿ ಜಾನಪದ್ ಪ್ರಕಾರ್ ವೊವಿಯಾಂಚೊಂ ಇತಿಹಾಸ್, ಪ್ರಕಾರ್ ಆನಿ ದೆಕಿ ದೀವ್ನ್ ಆಯ್ಲೆವಾರ್ಚ್ಯಾ ದಿಸಾಂನಿ ವಾಟ್ಸಪ್ ಯುನಿವರ್ಸಿಟಿಕ್ ಲಾಗೊನ್ ಮೆಳೊನ್ ಯೆಂವ್ಚ್ಯಾ ವೊವಿಯಾಂಚೇರ್ ಆಕಾಂತ್ ಉಚಾರುನ್, ಆಪ್ಲೆ ವಿಚಾರ್ ಮಾಂಡ್ಲೆ. ಕವಿ ವಿಲ್ಫ್ರ‍ೆಡ್ ಆರ್ ಪಾಂಗ್ಳಾ ಹಾಣೆ ಮೊಂತಿ ಪೆಸ್ತ್ , ಮರಣ್, ಸುವಿ ಆನಿ ಸುತ್ ಹ್ಯಾ ವಿಶಯಾಂ ಭಂವ್ತಿ ವಿಣ್ಲಲ್ಯೊ ಕವಿತಾ ಸಾದರ್ ಕೆಲ್ಯೊ. ಪ್ರಾಧ್ಯಾಪಕ್ ಡೊ| ಮೆಲ್ವಿನ್ ಪೆರ್ನಾಲ್ ಹಾಣೆ ಸಾಂಬಾಳ್ ಕಾಣಿ ಪ್ರಸ್ತುತ್ ಕೆಲಿ. ಕಾರ್ಯಾವಳಿಚೊ ಅಧ್ಯಕ್ಷ್ ಶಿಕ್ಶಕ್ ಆಲ್ವಿನ್ ದಾಂತಿಚೆರ್ ಕಾರ್ಯಾವಳಿಂತ್ ಸಾದರ್ ಕೆಲ್ಲ್ಯಾ ರಚನಾಂ ಆನಿ ವಿಚಾರಾಂಚೇರ್ ಅಧ್ಯಕ್ಷೀಯ್ ಉಲವ್ಪ್ ಕೆಲೆಂ.
ಸಾಹಿತ್ಯ ಅಕಾಡೆಮಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಚೊ ಸಾಂದೊ ಸ್ಟ್ಯಾನಿ ಬೆಳಾ ಹಾಣೆ ದಿನ್ವಾಸ್ ಪಾಟಯ್ಲೆ. ಕಾರ್ಯಾವಳಿಕ್ ಶಿರ್ವಾಂ, ಪೆರ್ನಾಲ್, ಪಾಂಬೂರ್, ಬೊಳಿಯೆ, ಬೆಳ್ಮಣ್, ಬಾರ್ಕೂರ್ ವಠಾರಾಂ ಥಾವ್ನ್ ಜಾಯ್ತೆ ಸಾಹಿತ್ಯಾಸಕ್ತ್ ಹಾಜರ್ ಆಸ್ಲೆ.
ಕಾರ್ಯಕ್ರಮಾಂತ್ ಸಾಹಿತ್ಯ್ – ವಿಚಾರ್ ಸಾದರ್ ಕೆಲ್ಲ್ಯಾ ಸಮೇಸ್ತಾಂಕ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಉಗ್ತೆಂ- ಮನ್ ಬೂಕ್ ಉಡಾಸಾಚಿ ಕಾಣಿಕ್ ಜಾವ್ನ್ ದಿಲೊ.
■ ತಸ್ವಿರ‍್ಯೊ / ವರ್ದಿ : ಅಲ್ಪೋನ್ಸ್ ಮೆಂಡೋನ್ಸಾ, ಪಾಂಗ್ಳಾ
