ಕ್ರಿಸ್ಬೆನ್ ಮ್ಯೂಜಿಕ್ ಥಾವ್ನ್ ಭುರ್ಗ್ಯಾಂಕ್ ಎನಿಮೆಟೇಡ್ ವಿಡಿಯೊ ಪದಾಂ

38

ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ಕೊಂಕ್ಣಿ ಸಂಗೀತಾಕ್ ಆಪ್ಲ್ಯಾ ತಾಂಕಿ ಪರ್ಮಾಣೆ ದೆಣ್ಗಿ ದೀವ್ನ್ ಆಸ್ಚ್ಯಾ ಕ್ರಿಸ್ಬೆನ್ ಮ್ಯೂಜಿಕಾನ್ ಮನೋರಂಜನಾಚೆ ಆನಿ ವಿಷಯಾಧಾರಿತ್ ಕೊಂಕ್ಣಿ ಸಂಗೀತ್ ವೀಡಿಯೊ ಕೊಂಕ್ಣಿ ಪರ್ಜೆಕ್ ಅರ್ಪಿಲ್ಯಾತ್. ಸೃಜನಾತ್ಮಕ್ ಪದಾಂ/ ವೀಡಿಯೊ ಕಾಡುನ್ ಕೊಂಕ್ಣಿ ಕಲೆಚೆಂ ಸಂರಕ್ಷಣ್ ಕರುಂಕ್ ಪೆಚಾಡ್ಚ್ಯಾ ಸಭಾರಾಂ ಮಧೆಂ ಆಪ್ಲಿ ಝಳಕ್ ದಾಕಯಿಲ್ಲ್ಯಾ ಕ್ರಿಸ್ಬೆನ್ ಮ್ಯೂಜಿಕಾನ್ ಆತಾಂ ಭುರ್ಗ್ಯಾಂಕ್ ಕೊಂಕ್ಣಿ ಭಾಸ್ ಆನಿ ಸಂಗೀತಾ ಥಂಯ್ ವೊಡುಂಕ್ ನವೆಂ ಮೇಟ್ ಕಾಡ್ಲಾಂ.

ಭುರ್ಗ್ಯಾಂ ಖಾತಿರ್‌ಚ್ ಮ್ಹಣೊನ್ ಭುರ್ಗ್ಯಾಂನಿ ಗಾಂವ್ಚ್ಯಾ ಪದಾಂಕ್ ಭುರ್ಗ್ಯಾಂಕ್ ಸಮ್ಜೊಂಚ್ಯಾ ಪರ್ಮಾಣೆ ಆನಿ ತಾಂಚ್ಯಾ ಪಸಂದಾಯೆ ಪರ್ಮಾಣೆ ಆನಿಮೇಟೆಡ್ ವೀಡಿಯೊದ್ವಾರಿಂ ಮೊಕ್ಳಿಕ್ ಕರುನ್ ಭುರ್ಗ್ಯಾಂಕ್ ಲ್ಹಾನ್ ಪ್ರಾಯೆರ್ ಥಾವ್ನ್ಂಚ್ ಕೊಂಕ್ಣಿ ಭಾಶೆಚೊ ಅಭಿಮಾನ್ ಆನಿ ಸಂಸ್ಕ್ರತಿ ಮುಕಾರುನ್ ವ್ಹರುಂಕ್ ಹೆಂ ಯೋಜನ್ ಪ್ರೋತ್ಸಾವ್ ದಿತೆಲೆಂ ಮ್ಹಣ್ ಹೆಂ ಮೇಟ್ ಕಾಡ್ಲಾಂ.

ಹ್ಯಾ ಶಿಂಕ್ಳೆಚೆಂ ಪಯ್ಲೆಂ ಪದ್ “ಜಯಂಟ್ ವೀಲಾ” ಎದೊಳ್’ಚ್ ಕ್ರಿಸ್ಬೆನ್ ಮ್ಯೂಜಿಕ್ ಯೂಟ್ಯೂಬ್ ಜಾಳಿ ಜಾಗ್ಯಾರ್ ಮೊಕ್ಳಿಕ್ ಜಾಲಾಂ. ಬಾಹ್ರೆಯ್ನ್‌ಚ್ಯಾ ಜೊಸ್ವಿಟಾ ನಜರೆತಾನ್ ಹೆಂ ಪದ್ ಗಾಯ್ಲಾಂ, ಲವಿ ಗಂಜಿಮಠ ಹಿಣೆಂ ಉತ್ರಾಂ ಬರಯ್ಲ್ಯಾಂತ್, ತಾಳೊ ಸಜಯ್ಲಾ ಕ್ರಿಸ್ಟೊಫರ್ ರೋಶನ್ ಲೋಬೊನ್, ಸಂಗೀತಾಚಿ ಮಾಂಡಾವಳ್ ಕೆಲ್ಯಾ ರೋಶನ್ ಡಿಸೋಜಾ ಆಂಜೆಲೊರಾನ್, ಆನಿ ರಂಗಾಳ್ ಎನಿಮೇಶನ್ ರಚ್ಲಾಂ ಕಾರ್ತಿಕ್ ಗೋಲ್ಡ್‌’ಸ್ಟೋನ್ ಹಾಣೆ. ಪದಾಕ್ ಆನಿ ವಿಡಿಯೊಕ್ ಬರಿ ಪ್ರತಿಕ್ರಿಯಾ ಲಾಭ್ಲ್ಯಾ, ಸ್ರಜನಾತ್ಮಕತಾ, ದರ್ಜೊ ಆನಿ ಭುರ್ಗ್ಯಾಂಕ್ ಆಕರ್ಶಿತ್ ಕರುಂಕ್ ಸುಫಳ್ ಜಾಲ್ಲ್ಯಾಕ್ ಹೊಗ್ಳಾಪ್ ಮೆಳ್ತೇ ಆಸಾ.

ಬರಿ ಪ್ರತಿಕ್ರಿಯಾ ಪಳೆವ್ನ್ ಕ್ರಿಸ್ಬೆನ್ ಮ್ಯೂಜಿಕಾನ್ ಆನಿಕೀ ಅಸಲೆಚ್ ಪದಾಂಚೆ ವೀಡಿಯೊ ಮೊಕ್ಳಿಕ್ ಕರ್ಚೆ ವಿಶಿಂ ಕಳಯ್ಲಾಂ. ಹ್ಯಾ ಪದಾಂ ದ್ವಾರಿಂ ಕೊಂಕ್ಣಿ ಭುರ್ಗ್ಯಾಂಕ್ ಕೊಂಕ್ಣಿ ಪದಾಂ ಗಾವುಂಕ್, ಕೊಂಕ್ಣಿ ಶಿಕುಂಕ್ ಆನಿ ತಾಂಚ್ಯೆ ಪ್ರಾಯೆ ಪರ್ಮಾಣೆ ಪದಾಂ ಶಿಕುಂಕ್ ಅವ್ಕಾಸ್ ಮೆಳ್ತಲೊ.

ಆದ್ಲ್ಯಾ ಪದಾಂ ಘಡ್ಣಾರಾಂನಿ ಭುರ್ಗ್ಯಾಂ ಖಾತಿರ್ ಪದಾಂ ರಚ್‌ಲ್ಲಿಂ ಆಸಾತ್, ತರ್‌ಯಿ ಆತಾಂಚ್ಯಾ ಜನಾಂಗಾಕ್ ಆತಾಂಚ್ಯಾ ಸಂಗೀತ್ ಶಯ್ಲೆಚಿಂ ನವಿಂ ಪದಾಂ ಗಾವುಂಕ್ ಸಂದ್ರಾಪ್ ಉಣೆ. ಹೆಂ ಉಣೆಪಣ್ ಸಮ್ಜೊನ್ ಕ್ರಿಸ್ಬೆನ್ ಮ್ಯೂಜಿಕಾನ್ ಎನಿಮೇಶನಾಚೆ ಕೊಂಕ್ಣಿ ಪದಾಂಚೆ ವಿಡಿಯೊ ಕರುನ್ ಭುರ್ಗ್ಯಾಂಕ್ ಸಮ್ಜುಂಚ್ಯಾ ಪರ್ಮಾಣೆ ಆನಿ ತಾಂಕಾಂ ಕೊಂಕ್ಣಿ ಸಂಗೀತಾ ಥಂಯ್ ಆನಿ ಕಲೆ ಥಂಯ್ ವೊಡ್ಚ್ಯಾಕ್ ದಾಕ್ಟೆಂ ಪೂಣ್ ಪ್ರಮುಖ್ ಮೇಟ್ ಕಾಡ್ಲಾಂ. ಅಶೆಂ ಕ್ರಿಸ್ಬೆನ್ ಮ್ಯೂಜಿಕಾನ್ ಸಂಸ್ಕ್ರತಿ, ಕಲೆಚಿ ಆನಿ ಸಮುದಾಯಾಚಿ ಅಭಿವ್ರದ್ಧಿ ಆಪ್ಲೊ ಧ್ಯೇಯ್ ಮ್ಹಣೊನ್ ಖಾತ್ರಿ ಕೆಲಾಂ.

ವಡಿಲಾಂನಿ, ಶಿಕ್ಶಕಾಂನಿ, ಆನಿ ಸಂಗೀತ್ ಪ್ರೇಮಿಂನಿ ಹಿಂ ಪದಾಂ ಆನಿ ರಂಗಾಳ್ ವಿಡಿಯೊ ಪಳೆವ್ನ್ ಪ್ರತಿಕ್ರಿಯಾ ದಿಂವ್ಕ್ ಜಾಯ್ ಆನಿ ಮುಖ್ಲ್ಯಾ ಜನಾಂಗಾಕ್ ಕೊಂಕ್ಣಿ ಭಾಸ್ ಆನಿ ಸಂಗೀತಾ ಥಂಯ್ ವೊಡುಂಕ್ ತೆಂಕೊ ದೀಂವ್ಕ್ ಜಾಯ್ ಮ್ಹಣೊನ್ ಕ್ರಿಸ್ಬೆನ್ ಮ್ಯೂಜಿಕಾನ್ ಉಲೊ ದಿಲಾ.