ಕೆ.ಸಿ.ಒ. ಮೊತ್ಯಾಳೊ ಸಂಭ್ರಮ್ : ಯೇನಾ ಜಾಲ್ಯಾರ್ ವಚನಾ

37

ಸ್ಥಾಪನೆಚ್ಯಾ ತೀಸ್ ವರ್ಸಾಂಚ್ಯಾ ಸಂಭ್ರಮಾರ್ ಆಸ್ಚೆಂ ಅಬುದಾಬಿಂತ್ಲೆಂ ಮಾಲ್ಘಡೆಂ ಸಾಂಸ್ಕೃತಿಕ್ ಸಂಘಟನ್ ಕೆ.ಸಿ.ಒ. ( ಕೊಂಕಣಿ ಕಲ್ಚರಲ್ ಓರ್ಗನೈಸೇಶನ್ ) ಹಾಣಿ,   ಮೊತ್ಯಾಳಾ ವರ್ಸುಗೆ ಆಚರಣ್ ಸುವಾಳ್ಯಾರ್, ಅಬುದಾಬಿ ಇಂಡಿಯನ್ ಸೋಶಿಯಲ್ ಸೆಂಟರಾಂತ್, ಸನ್ವಾರಾ, ಜ್ಯೂನ್ 14 ವೆರ್ ಸಾಂಗೊನ್ ಮುಗ್ದಾನಾ ಕಲಾಪಂಗ್ಡಾಚೊ ಯೇನಾ ಜಾಲ್ಯಾರ್ ವಚನಾ ಹಾಸ್ಯ್ ನಾಟಕ್ ಸಾದರ್ ಕೆಲೊ.

ಕಾರ್ಯೆಂ ಸುರ್ವಾತ್ಚೆ ಪಯ್ಲೆಂ, ಹಾಲಿಂಚ್ ಅಹ್ಮದಾಬಾದ್, ಭಾರತಾಂತ್ ಜಾಲ್ಲ್ಯಾ ವಿಮಾನ್ ಅವ್ಘಡಾಂತ್ ಜೀವ್ ಹೊಗ್ಡಾಯ್ಲೆಲ್ಯಾಂಚ್ಯಾ ಆತ್ಮ್ಯಾಕ್ ಮಾ। ಬಾ। ಡೆರಿಕ್ ಸೊಜ್ , ಕಾಪುಚಿನ್ ಹಾಂಚ್ಯಾ ಮುಕೆಲ್ಪಣಾರ್ ಪ್ರಾರ್ಥನ್ ಕರುನ್ ಶಾಂತಿ ಮಾಗ್ಲಿ. ಸಭಾಸಾಲಾಂತ್ ಜಮ್ಲೆಲ್ಯಾ ಸಭಿಕಾಂನಿ ಏಕ್ ಮಿನುಟ್ ಮಾವ್ನ್ ಉಬೆ ರಾವೊನ್ ಶೃದ್ದಾಂಜಲಿ ಭೆಟಯ್ಲಿ.

ಸಂಘಟನಾಚೊ ಗವ್ರವ್ ಅಧ್ಯಕ್ಷ್ ಮಾನೆಸ್ತ್ ಲಿಯೋ ರೊಡ್ರಿಗಸ್ ಹಾಣಿ, ಮಾ। ಬಾ। ಡೆರಿಕ್ ಆನಿ ಹಾಜರ್ ಆಸ್ಲೆಲ್ಯಾ ಮಾನಾಚ್ಯಾ ಸಯ್ರ್ಯಾಂಕ್, ಯೆವ್ಕಾರ್ ಮಾಗ್ಲೊ. ಹ್ಯಾ ವೆಳಿಂ ತಾಣಿ ಸಂಘಟನಾಚ್ಯಾ ಪಾಟ್ಲ್ಯಾ ತೀನ್ ದಶಕಾಂಚ್ಯಾ ವಾವ್ರಾಚಿ ಝಳಕ್ ಪೇಶ್ ಕೆಲಿ ಆನಿ ಚಲೊನ್ ಆಯಿಲ್ಲ್ಯಾ ವಾಟೆಚೆರ್ ಸುಕ್ಣ್ಯಾ ನದರ್ ಮಾರ್ಲಿ. ಕೊಂಕ್ಣಿ ಸಂಸ್ಕೃತಿ ಜಗಂವ್ಚ್ಯಾ ಆನಿ ಗಾಂವಾಂತ್ ತಶೆಂ ಪರ್ಗಾಂವಾಂತ್ ಕೊಂಕ್ಣಿ ಲೊಕಾಜಿವಿತ್ ಫುಲಂವ್ಕ್ ಕೆಲ್ಲ್ಯಾ ಆನಿ ಕರುನ್ ಆಸ್ಚ್ಯಾ ಪ್ರಾಮಾಣಿಕ್ ಪ್ರೇತನಾಂಚೊ ತಾಣಿ ಹ್ಯಾ ವೆಳಿಂ ಪ್ರಸ್ತಾಪ್ ಕೆಲೊ.

ಸುವಾಳ್ಯಾರ್ ಕಾರ್ಯಾಕ್ ಆದಾರ್ ದಿಲ್ಲ್ಯಾ ಪ್ರಾಯೋಜಕಾಂಚೊಂ ಉಪ್ಕಾರ್ ಆಟವ್ನ್ ತಾಂಕಾ ಫುಲಾಂ ತುರೊ ಪಾಟವ್ನ್ ಗವ್ರವ್ ಅಧ್ಯಕ್ಷಾನ್ ಮಾನ್ ಕೆಲೊ.

ಆಪುರ್ಬಾಯೆಚೆಂ ನಟನ್, ಕುಸಾಳಾಂ ದುಕಾಸರ್ ಹಾಸಂವ್ಚೆಂ ಹಾಸ್ಯ್ ಆನಿ ನಿಮಾಣೆ ಏಕ್ ಅರ್ಥಾಭರಿತ್ ಸಂದೇಶ್ ದಿಂವ್ಚೊ ನಾಟಕ್ ಪ್ರದೀಪ್ ಬರ್ಬೋಜಾ, ಪಾಲಡ್ಕಾ ಹಾಚ್ಯಾ ನಿರ್ದೇಶನಾಚೆರ್ ಸಾದರ್ ಜಾಲೊ. ಅಬುದಾಬಿ, ಮುಸಾಫಾ ಆನಿ ದುಬಯ್ ಪರಿಸರಾಥಾವ್ನ್ ಯೇವ್ನ್, ಸಾಲ್ ಭರ್ ಜಮ್ಲೆಲ್ಯಾ ಲೊಕಾಕ್ ನಾಟಕಾನ್ ಬರ್ಪೂರ್ ಮನೊರಂಜನ್ ಸಾಂಗಾತಾ ಏಕ್ ಸಾಮಾಜಿಕ್ ಸಂದೇಶ್ ದಿಲೊ.

ನಾಟಕ್ ಬರಯ್ಣಾರ್, ನಿರ್ದೇಶಕ್ ಆನಿ ಸಾಂಗೊನ್ ಮುಗ್ದಾನಾ ಕಲಾಕಾರ್ ಪಂಗ್ಡಾಚೊ ತಾಂಡೆಲಿ ಪ್ರದಿಪ್ ಬರ್ಬೋಜಾ ಆನಿ ಸರ್ವ್ ಕಲಾಕಾರಾಂಕ್ ಹ್ಯಾ ಸುವಾಳ್ಯಾರ್ ಕೆ.ಸಿ.ಒ. ತರ್ಫೆನ್ ಮಾನ್ ಕೆಲೊ. ಕೆ.ಸಿ.ಒ. ಕಾರ್ಯದರ್ಶಿ ಸಂದ್ಯಾ ವಾಜ್ ಹಿಣೆ ದಿನ್ವಾಸ್ ಪಾಟಯ್ಲೆ. ವಿವೇಕ್ ಸೆರಾವೊ ಹಾಣೆ ಕಾರ್ಯೆಂ ಚಲಯ್ಲೆಂ.

ಮೊತ್ಯಾಳಾ ವರ್ಸಾ ಸಂದರ್ಭಾರ್ ಕೆ.ಸಿ.ಒ. ಸಂಘಟನಾನ್ ಜಾಯ್ತಿಂ ಕಾರ್ಯಿಂ ಮಾಂಡುನ್ ಹಾಡ್ಲೆಲಿಂ ಆಸುನ್, ಆಗೋಸ್ತ್ ಮಯ್ನ್ಯಾಂತ್ ಮಂಗ್ಳುರಾಂತ್ ವಿದ್ಯಾರ್ಥಿವೇತನ್ ವಿತರಣ್, ಅಕ್ತೋಬರ್ ಮಯ್ನ್ಯಾಂತ್ ಅಬುದಾಬಿಂತ್ ತ್ರೋ ಬಾಲ್ ಟೂರ್ನಮೆಂಟ್, ನವೆಂಬರ್ 8 ತಾರಿಕೆರ್, ಸನ್ವಾರಾ ಅಬುದಾಬಿಂತ್ ಮೊತಿಯಾಳೊ ಉತ್ಸವ್ ಆಚರಣ್ ಆನಿ ದಶೆಂಬರ್ 7 ತಾರಿಕೆರ್, ಅಯ್ತಾರಾ ಮಾಯ್ಗಾಂವ್ ಮಂಗ್ಳುರಾಂತ್ ಮೊತಿಯಾಳ್ಯಾ ಉತ್ಸವಾಚೆಂ ಆಚರಣ್ ಚಲ್ತಲೆಂ ಮ್ಹಣ್ ಹ್ಯಾ ವೆಳಿಂ ಜಾಹೀರ್ ಕೆಲೆಂ.

ಎಮಿರೆತಾಂತ್ ಆನಿ ಭಾರತಾಂತ್ ಗರ್ಜೆವೊಂತ್ ಭುರ್ಗ್ಯಾಂಚ್ಯಾ ಶಿಕ್ಪಾಕ್, ಪಿಡೇಸ್ತಾಂಚ್ಯಾ ಚಿಕಿತ್ಸೆಕ್ ಕೆ.ಸಿ.ಒ. ಸಂಘಟನ್, ಪಾಟ್ಲ್ಯಾ ತೀಸ್ ವರ್ಸಾಂ ಪಾಸುನ್ ನಿರಂತರ್ ಕುಮಕ್ ಕರುನ್ ಆಯ್ಲಾಂ. ಸಾಂಗಾತಾ ಕರ್ನಾಟಕಾಂತ್ ದುಬ್ಳ್ಯಾ – ಧಾಕ್ಟ್ಯಾಂ ಖಾತಿರ್, ನಿರ್ಗತಿಕಾಂ ಖಾತಿರ್ ವಾವುರ್ಚ್ಯಾ ಬೆಸರ್ಕಾರಿ ಸೆವಾ ಸಂಸ್ಥ್ಯಾಂಕೀ ಪಾಟಿಂಬೊ ದೀವ್ನ್ ಆಯ್ಲಾಂ. ಚಡಿತ್ ವಿವರಾಕ್ ಸಂಘಟನಾಚೆಂ ಪೇಸ್‌ಬುಕ್ ಪಾನ್ KCO Trust India ವಾ ಇನ್‌ಸ್ಟಾ ಖಾತೊ https://www.instagram.com/kcotrust ಹಾಂಗಾಸರ್ ಭೆಟ್ ದಿವ್ಯೆತ್ ಮ್ಹಣ್ ಸಂಘಟಕಾಂನಿ ಕಳಯ್ಲಾಂ.