ಆತ್ಮಹತ್ಯಾ

33

ತಿಂ ವ್ಹಡ್ಲಿಂ ಮನ್ಶ್ಯಾಂ ಪುತಾ, ತುಜೆಂ ಕಾಜಾರ್ ತ್ಯಾ ಘರಾ ಹಾಂವ್ ಕಶೆಂ ಕರುನ್ ದೀಂವ್?” ಮನೋಜ್ ಧುವೆಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕರಿಲಾಗ್ಲೊ.

“ಹಾಂವ್ ಪ್ರದೀಪಾಚೊ ಮೋಗ್ ಕರ‍್ತಾಂ ಪಪ್ಪಾ. ತಾಚೆಂ ಕುಟಾಮ್ ಪಳವ್ನ್ ಹಾವೆಂ ಮೋಗ್ ಕರುಂಕ್ನಾಂ ” ವೈಶಾಲಿ ಬಾಪಾಯ್ಕ್ ಸಾಂಗಾಲಾಗ್ಲೆಂ. ಪ್ರದೀಪ್ ಬರೊ ಚಲೊ. ಮ್ಹಾಕಾ ಮೊಗಾನ್ ಸಾಂಬಾಳ್ತೊಲೊ ಮ್ಹಳ್ಳಿ ಗ್ಯಾರಂಟಿ ಹಾಂವ್ ದಿತಾಂ.

“ತ್ಯಾ ಚಲ್ಯಾಚಿ ವಳ್ಹಕ್ ತುಕಾ ಫಕತ್ತ್ ಸ ಮಹಿನ್ಯಾಂಚಿ. ಆನಿ ತುಂ ತಾಚಿ ಗ್ಯಾರಂಟಿ ದಿಂವ್ಚಿ ಜಿಮ್ಮೆಧಾರಿ ಕಶಿ ಘೆತಾಯ್ ವೈಶಾಲಿ…?” ಆವಯ್ ಮಧೆಂ ಪಡ್ಲಿ. “ತುಜೊ ಬಾಪಯ್ ಆಮ್ಚ್ಯಾ ಕಾಜಾರಾಕ್ ತೀಸ್ ವರ‍್ಸಾಂ ಉತ್ರಾಲ್ಯಾರ್‌ಯಿ ಗ್ಯಾರಂಟಿ ದೀಂವ್ಕ್ ಸಕಾನಾ”

“ವ್ಹಯ್ ಶಾಲಿನಿ. ಹಾಂವ್ ಆಮ್ಚ್ಯಾ ಕಾಜಾರಾಚಿ ಗ್ಯಾರಂಟಿ ಕಿತ್ಯಾಕ್ ದೀಂವ್ಕ್ ಸಕಾನಾ ಮ್ಹಳ್ಯಾರ್, ತುಜಿ ಜೀಬ್ ಮ್ಹಜ್ಯಾ ಗ್ಯಾರಂಟಿಕ್ ಸಪೊರ್ಟ್ ಕರಿನಾ” ಮನೋಜ್ ಮ್ಹಣಾಲೊ.

“ಆತಾಂ ತುಮಿಂ ಝಗ್ಡೊನ್ ಪಡಾನಾಕಾತ್. ಮ್ಹಜಿ ಜೀಬ್ ಹಾಂವ್ ಸಾಂಬಾಳ್ತೆಲಿಂ ಆನಿ ಪ್ರದಿಪಾ ಸಂಗಿಂ ಮೋಗಾನ್ ಜಿಯೆತೆಲಿಂ. ಹಾವೆಂ ತಾಚೆಲಾಗ್ಗಿಂ ಕಾಜಾರ್ ಜಾತೆಲಿಂ ಮ್ಹಳ್ಳಿ ಭಾಸ್‌ಯಿ ದಿಲ್ಯಾ” ವೈಶಾಲಿ ಮ್ಹಣಾಲೆಂ.

ವೈಶಾಲಿಚೊ ಬಾಪಯ್ ಮನೋಜ್ ಬರೊ ಶಿಕ್ಪಿ ಆನಿ ಬರ‍್ಯಾ ಜೊಡಿರ್ ಆಸ್‌ಲ್ಲೊ. ತಾಣೆ ತಾಚ್ಯಾ ಸಗ್ಳ್ಯಾ ಜೀವನಾಚಿ ಜೋಡ್, ಆಪ್ಲ್ಯೆ ಎಕ್ಯೆಚ್ ಧುವೆಚ್ಯಾ ಫುಡಾರಾ ಖಾತಿರ್ ಜಮವ್ನ್ ದವರ್‌ಲ್ಲಿ. ಬರ‍್ಯಾ ಕುಟ್ಮಾಂತ್ ತಿಚೆಂ ಕಾಜಾರ್ ಕರುನ್, ತಿಚ್ಯಾ ತೊಡಾರ್ ಸದಾಂಚ್ ಸಂತೋಸ್ ಪಳಂವ್ಚಿಂ ಸ್ವಪ್ಣಾ ಬಾಂಧೂನ್ ಆಸ್‌ಲ್ಲೊ.

ಪೂಣ್ ಆಯ್ಚ್ಯಾ ಕಾಳಾರ್ ಭುರ್ಗಿಂ ಪ್ರಾಯೆಕ್ ಪಾವ್ತಾನಾ, ಕಶಿಂ ಆನಿ ಕೆದಾಳಾ ಮೊಗಾರ್ ಪಡೊನ್ ಎಕಾಮೆಕಾಕ್ ಪಸಂದ್ ಕರುನ್, ಭಾಸ್‌ಯಿ ದೀವ್ನ್ ಬಸ್ತಾತ್ ಮ್ಹಳ್ಳೆಂ ಕೊಣೆಂಯಿ ಸಾಂಗೊಂಕ್ ಜಾಯ್ನಾಂ. ತಶೆಂ ಮನೋಜ್ ಆನಿ ಶಾಲಿನಿಚಿ ಧುವ್ ವೈಶಾಲಿ ಪ್ರದಿಪಾಚ್ಯಾ ಮೊಗಾರ್ ಪಡೊನ್ ತಾಚೆಸಂಗಿಂ ಕಾಜಾರ್ ಜಾತೆಲಿಂ ಮ್ಹಳ್ಳಿ ಭಾಸ್ ದೀವ್ನ್ ಬಸ್‌ಲ್ಲೆಂ.

ಪ್ರದೀಪ್ ಪೂನಾಂತ್ಲ್ಯಾ ಡಿಸ್ಟ್ರಿಕ್ಟ್ ಕಲೆಕ್ಟರಾಚೊ ಪೂತ್ ಜಾವ್ನಾಸ್‌ಲ್ಲೊ. ಏಕ್ ದೀಸ್ ಆಪ್ಲ್ಯಾ ಮಿತ್ರಾಚ್ಯಾ ಕಾಜಾರಾಚ್ಯಾ ಪಾರ್ಟೆ ವೆಳಾರ್, ತಾಣೆ ಆಪ್ಲ್ಯಾ ಆವಯ್ ಬಾಪಾಯ್ ಸಂಗಿಂ ಆಯಿಲ್ಲ್ಯಾ ವೈಶಾಲಿಕ್ ಪಳಯಿಲ್ಲೆಂ. ವೈಶಾಲಿಚಿ ಸೊಭಾಯ್ ಪಳವ್ನ್ ತಿಚೆ ಥಂಯ್ ಆಕರ‍್ಶಿತ್ ಜಾಲ್ಲ್ಯಾ ಪ್ರದೀಪಾನ್, ವೈಶಾಲಿ ವಿಶಿಂ ಖಭಾರ್ ಕಾಡ್‌ಲ್ಲಿ.

ವೈಶಾಲಿ ಮಧ್ಯಾಮ್ ವರ್ಗಾಚ್ಯಾ ಕುಟ್ಮಾಂತ್ಲೆಂ ಎಕ್ಲೆಂಚ್ ಚೆಡುಂ. ಸಾಯಿನ್ಸಾಂತ್ ಮಾಸ್ಟರ್ ಕರುನ್, ಕಾಮಾಚ್ಯಾ ಸೊಧ್ನೆರ್ ಭಾಯ್ಲ್ಯಾ ಗಾಂವಾಕ್ ವಚೂಂಕ್ ಪ್ರಯಾತನ್ ಕರುನ್ ಆಸಾ.  ಬಾಪಯ್ ಬರ‍್ಯಾ ಜೊಡಿರ್ ಆಸೊನ್, ಆಪ್ಲ್ಯಾ ಲಾನ್ಶ್ಯಾ ಕುಟ್ಮಾಸಂಗಿಂ ಸುಖಾನ್ ಜಿಯೆವ್ನ್ ಆಸಾ ಮ್ಹಣ್ ಜಾಣಾ ಜಾಲ್ಯಾ ಉಪ್ರಾಂತ್, ಪ್ರದೀಪ್ ವೈಶಾಲಿಚ್ಯಾ ಪಾಟಿಕ್ ಪಡ್‌ಲ್ಲೊ.

“ಪ್ರದೀಪ್ ಗ್ರೇಸ್ತ್ ಕುಟ್ಮಾಂತ್ಲೊ ಚಲೊ ವೈಶಾಲಿ. ಹಾಂಗಾಚ್ಯಾ ಕಲೆಕ್ಟರಾಚೊ ಪೂತ್. ತುಕಾ ಪಳಯಿಲ್ಲ್ಯಾ ದೀಸ್ ಥಾವ್ನ್ ತುಜ್ಯಾ ಮೊಗಾರ್ ಪಡ್ಲಾ… ” ವೈಶಾಲಿಚಿ ಮಿತ್ರಿಣ್ ಪೂನಮ್ ಸಾಂಗಾಲಾಗ್ಲಿ. “ತುಜೆಲಾಗ್ಗಿಂ ಕಾಜಾರ್ ಜಾಂವ್ಚಿಂ ಸ್ವಪ್ಣಾಂ ದಿಸಾ ಉಜ್ವಾಡಾಕ್‌ಯಿ ಪಳವ್ನ್ ಆಸಾ. ತುಂ ಏಕ್ ಪಾವ್ಟಿಂ ತಾಕಾ ಭೆಟ್”

“ಕಲೆಕ್ಟರಾಚೊ ಪೂತಾಕ್ ಹಾಂವ್ ಕಶಿಂ ಸೊಭ್ಲಿಂ ಪೂನಮ್…? ಹ್ಯಾ ಗಾವಾಂತ್ ಚಲಿಯೆಂಚೊ ಬರ್ಗಾಲ್ ಪಡ್ಲಾವೆ?”

“ಚಲಿಯೆಂಚೊ ಬರ್ಗಾಲ್ ಪಡೊಂಕ್ನಾ. ಪುಣ್ ತುಜೆ ತಿತ್ಲಿ ಸೊಭೀತ್ ಚಲಿ ಬಹುಷಾ ತಾಣೆ ಪಳಂವ್ಕ್‌ನಾ. ದೆಕುನ್, ತಾಣೆ ಮ್ಹಾಕಾ ತುಜ್ಯಾ ಕಾನಾಂತ್ ತಾಚ್ಯಾ ಕಾಳ್ಜಾಚೊ ಘುಟ್ ಘಾಲ್ಚಿ ವಿನಂತಿ ಕೆಲ್ಲಿ”

“ಹಾಂವ್ ಉಲೈತಾಂ ತಾಚೆ ಕಡೆ. ತುಂ ಮ್ಹಾಕಾ ತಾಚೆಂ ನಂಬರ್ ದೀ” ವೈಶಾಲಿನ್ ಸಾಂಗ್ತಾನಾ, ಪೂನಾಮಾನ್ ಪ್ರದಿಪಾಚೆಂ ಮೊಬಾಯ್ಲ್ ನಂಬರ್ ದಿಲೆಂ.

ಫೊನಾರ್ ಉಲವ್ನ್ ಜಾತಚ್, ವೈಶಾಲಿ ಪ್ರದಿಪಾಕ್ ಎಕಾ ಕೋಫಿ ಶೊಪಾಂತ್ ಭೆಟ್ಲೆಂ. ತಿಚ್ ಪಯಿಲ್ಲಿ ಮುಲಾಕಾತ್ ಜಾಲಿ ಮೊಗಾಚಿ ಸುರ‍್ವಾತ್. ಉಪ್ರಾಂತ್ ದೊಗಾಂಯ್ ಸಭಾರ್ ಪಾವ್ಟಿಂ ಭೆಟ್ಲಿಂ. ಪ್ರದೀಪಾನ್ ವೈಶಾಲಿಕ್ ಆಪ್ಲ್ಯಾ ಘರಾಯಿ ವೆಲ್ಲೆಂ. ತಾಚೊ ಬಂಗ್ಲೊ ಆನಿ ಗ್ರೇಸ್ತ್‌ಕಾಯ್ ಪಳವ್ನ್, ವೈಶಾಲಿನ್ ಕಾಮಾಚ್ಯಾ ಸೊಧ್ನೆರ್ ಭಾಯ್ಲ್ಯಾ ಗಾಂವಾಕ್ ವೆಚಿ ಆಲೊಚೆನ್ ಸೊಡ್ಲಿ. ಎಕಾ ಉತ್ರಾನ್ ಸಾಂಗ್ಚೆಂ ತರ್, ವೈಶಾಲಿ ಪ್ರದೀಪಾಚ್ಯಾ ಮೊಗಾರ್, ಇತ್ಲ್ಯಾ ಘೂಂಡಾಯೆನ್ ಪಡ್ಲೆಂಕೀ, ತಾಚೆವಿಣೆ ಎಕ್ಸುರ‍್ಪಣ್ ಭಗೊಂಕ್ ಲಾಗ್ಲೆಂ. ತ್ಯಾ ಎಕ್ಸುರ‍್ಪಣಾಕ್ ಪಯ್ಸ್ ಕರುಂಕ್ ತೆಂ ಪ್ರದೀಪಾಸಂಗಿಂ ವೆಗ್ಗಿಂಚ್ ಕಾಜಾರ್ ಜಾಂವ್ಕ್ ಆಶೆಲೆಂ.

“ತಿಂ ಮನ್ಶ್ಯಾಂ ಆಮ್ಕಾಂ ಸಾಂಗ್‌ಲ್ಲಿಂ ನಹಿಂ ಪುತಾ. ಆಮ್ಚಿ ತಾಂಕ್ ಆನಿ ತಾಂಚಿ ವ್ಹಡ್ವಿಕಾಯ್ ದೀಸ್ ಆನಿ ರಾತಿಚ್ಯಾ ಫರಾಕಾಚಿ. ತುಂ ಆಮ್ಚೆಂ ಎಕ್ಲೆಂಚ್ ಬಾಳ್. ಫಾಲ್ಯಾಂ ತುಜೆ ಥಂಯ್ ಕಾಂಯ್‌ ಕೀಸ್ ಘಡಾತ್, ಆಮಿಂ ತುಜ್ಯಾ ಪಾಡ್ತೆನ್ ಝುಜೊಂಕ್‌ಯಿ ಸಕ್ಚಿಂನಾಂವ್. ಪೊಲಿಟಿಶೆನಾಂಕ್ ಪಾತ್ಯೆಂವ್ಕ್ ಜಾಯ್ನಾಂ. ದೆಕುನ್ ಫಾಲ್ಯಾಂ ರಡ್ಚ್ಯಾ ಬದ್ಲಾಕ್ ಆಜ್‌ಚ್ ಜಾಗ್ರುತ್ ಜಾ ” ಬಾಪಯ್ ಪರತ್ ಸಮ್ಜಾಂವ್ಕ್ ಪಳೆಲಾಗ್ಲೊ ಧುವೆಕ್.

“ಪಪ್ಪಾ, ಹಾಂವ್ ಕಾಮಾಚ್ಯಾ ಸೊಧ್ನೆರ್ ಭಾಯ್ಲ್ಯಾ ಗಾಂವಾಕ್ ವೆಚ್ಯಾರ್ ಆಸ್‌ಲ್ಲಿಂ. ತ್ಯಾ ಮಧೆಂ ಮ್ಹಜಿ ವಳಕ್ ಪ್ರದೀಪಾಸಂಗಿಂ ಜಾವ್ನ್, ಹಾವೆಂ ಭಾಯ್ಲ್ಯಾ ಗಾಂವಾಚೊ ವೆಚೊ ಇರಾಧೊ ಬದ್ಲಿಲ್ಲೊ. ಎಕಾದಾವೆಳಾ ಹಾಂವ್ ಭಾಯ್ಲ್ಯಾ ಗಾಂವಾಂಕ್ ವಚೊನ್, ಕೊಣಾಯ್ಚ್ಯಾ ಮೊಗಾರ್ ಪಡೊನ್, ಕಾಜಾರ್ ಜಾಲ್ಲಿಂ ತರ್, ತುಮ್ಕಾಂ ಬರೆಂ ಲಾಗ್ತೆಂನಾ. ತಶೆಂ ಆಸ್ತಾಂ, ಹಾಂವ್ ತುಮ್ಚೆ ಮುಖಾರ್‌ಚ್ ಆಸೊನ್, ಹ್ಯಾಚ್ ಗಾಂವಾಂತ್ ಮ್ಹಾಕಾ ಪಸಂದ್ ಆಸ್‌ಲ್ಲ್ಯಾ ಚಲ್ಯಾಲಾಗ್ಗಿಂ ಕಾಜಾರ್ ಜಾಲ್ಯಾರ್ ಬರೆಂ ನಹಿಂಗಿ ಪಪ್ಪಾ…? ಮಾಮ್ಮಾ, ಪಪ್ಪಾಕ್ ತುಂ ತರೀ, ಸಮ್ಜಯ್”

ಆವಯ್ನ್ ಜಾಪ್ ದಿಲಿನಾ. ತಿಕಾಯಿ ಧುವೆಚೆಂ ಹಟ್ಟ್‌ಸಾರ್ಕೆಂ ಮ್ಹಣ್ ಭಗ್ಲೆಂ ನಾ.

“ಕಾಜಾರ್ ಜಾಲ್ಯಾರ್ ಪ್ರದೀಪಾಸಂಗಿಂ, ನಾ ತರ್ ಹಾಂವ್ ಕಾಜಾರ್‌ಚ್ ಜಾಂವ್ಚಿಂನಾ. ಭಾಯ್ಲ್ಯಾ ಗಾಂವಾಕ್ ಗೆಲ್ಯಾರ್ ಪಾಟಿಂಯಿ ಯೆಂವ್ಚಿಂನಾ…” ವೈಶಾಲಿ ರಡೊನ್ ಸಾಂಗ್ತಾನಾ, ಬಾಪಯ್ ಸಲ್ವಾಲೊ.

ಏಕ್ ದೀಸ್ ವೇಳ್ ಕಾಡುನ್ ವೈಶಾಲಿಸಂಗಿಂ, ಮನೋಜ್ ಆನಿ ಶಾಲಿನಿ ಪ್ರದೀಪಾಚ್ಯಾ ಬಂಗ್ಲ್ಯಾಕ್ ಗೆಲಿಂ.

ಥಂಯ್ ಪ್ರದೀಪಾಚಿ ಆವಯ್ ಆನಿ ಆಂಕ್ವಾರ್ ಭಯ್ಣ್ ಪ್ರವೀಣಾ ಆಸ್‌ಲ್ಲಿಂ.

“ಮ್ಹಜ್ಯಾ ಪುತಾಕ್ ವೈಶಾಲಿ ಪಸಂದ್ ಜಾಲಾಂ. ನಾ ತರ್ ವ್ಹಡಾ ಘರಾಣ್ಯಾಂತ್ಲ್ಯೊ, ಸಭಾರ್ ಸೈರಿಕ್ಯೊ ಯೇವ್ನ್ ಆಸ್‌ಲ್ಲ್ಯೊ” ಪ್ರದೀಪಾಚಿ ಆವಯ್ ಮಾನೊಜ್ ಆನಿ ಶಾಲಿನಿಕ್ ಪಳವ್ನ್ ಹಾಸ್ಲಿ.

ತಿಣೆ ಸಾಂಗ್‌ಲ್ಲೆಂ ಆಯ್ಕೊನ್, ಮನೋಜಾಕ್ ತ್ಯಾಚ್ ವೆಳಾ ಥಂಯ್ ಥಾವ್ನ್ ಚಲ್ಯಾಂ ಮ್ಹಣ್ ಭಗ್ಲೆಂ. ಪುಣ್ ಶಾಲಿನಿನ್ ದೊಳ್ಯಾಂಚ್ಯಾ ಹಿಶ್ಯಾರ‍್ಯಾನ್ ಘೊವಾಕ್ ಆಡಾಯ್ಲೆಂ.

“ದೋನ್ ವರ‍್ಸಾಂ ಆಧಿಂ ಮ್ಹಜ್ಯಾ ವ್ಹಡ್ಲ್ಯಾ ಧುವೆಚೆಂ ಕಾಜಾರ್ ಜಾಲ್ಲೆಂ. ತಿತ್ಲೆಂ ವ್ಹಡ್ಲೆಂ ಕಾಜಾರ್ ಹ್ಯಾ ಗಾಂವಾಂತ್ ಬಹುಷಾಚ್ ಹೆರಾಂಚೆಂ ಜಾಲಾಂ ಆಸ್ತೆಲೆಂ”

“ವ್ಹಯ್ ಮಾಮ್ಮಿ. ದೀದಿಚ್ಯಾ ಗಳ್ಯಾಂತ್ ಆಮಿಂ ಘಾಲ್ಲೆಂ ಬಾಂಗಾರ್-ಶಿಂಗಾರ್ ಪಳವ್ನ್, ಸಗ್ಳೊ ಗಾಂವ್ ಅಜ್ಯಾಪ್ ಪಾವ್‌ಲ್ಲೊ. ಕಿತ್ಲಿ ಸೊಭೀತ್ ದಿಸ್ತಾಲಿ ದೀದಿ” ಭಯ್ಣ್ ಪ್ರವೀಣಾ ದಾಯ್ ಘಾಲಿಲಾಗ್ಲೆಂ.

ಮನೋಜ್ ಆನಿ ಶಾಲಿನಿ ಎಕಾಮೆಕಾಚಿಂ ತೊಂಡಾಂ ಪಳೆಲಾಗ್ಲಿಂ.

“ಪ್ರದೀಪಾಚ್ಯಾ ತರ್ಫೆನ್ ಆಮಿಂ ದೋತ್ ಘೆನಾಂವ್. ತುಮ್ಚ್ಯಾ ತಾಂಕಿ ಭಿತರ‍್ಲೆಂ ಕಿತೆಂಯ್ ಸಾಧ್ಯ್ ಜಾಲ್ಲೆಂ ತುಮಿಂ ವೈಶಾಲಿಚ್ಯಾ ಗಳ್ಯಾಂತ್ ಘಾಲ್ಯಾರ್, ಫಾಲ್ಯಾಂ ತಾಕಾಚ್ ಉಪ್ಕಾರ್ತೆಲೆಂ” ಪ್ರದಿಪಾಚಿ ಆವಾಯ್ ಮ್ಹಣಾಲಿ.

ಥಂಯ್ ಥಾವ್ನ್ ಘರಾ ಗೆಲ್ಲಿಂ ಮನೋಜ್ ಆನಿ ಶಾಲಿನಿ ಖಂತಿನ್ ಬುಡ್ಲಿಂ.

ಪ್ರದೀಪಾಚ್ಯಾ ಆವಯ್ನ್ ಸಾಂಗ್‌ಲ್ಲೆಂ ಅಯ್ಕೊನ್, “ತುಮಿಂ ಚೂಕ್ ಸಮ್ಜಾನಾಕಾತ್ ಪಪ್ಪಾ. ಪ್ರದೀಪ್ ಬರೊ ಚಲೊ. ತಾಣೆ ಕಿತೆಂಚ್ ವಿಚಾರುಂಕ್‌ನಾ. ಮ್ಹಾಕಾ ತುಮಿಂ ರಿತೆಂ ಧಾಡ್ಲ್ಯಾರ್‌ಯಿ ತೊ ಮ್ಹಾಕಾ ಸ್ವೀಕಾರ‍್ತಲೊ” ವೈಶಾಲಿ ಸಾಂಗಾಲಾಗ್ಲೆಂ.

“ಧುವೆಚೆಂ ಕಾಜಾರ್ ಕರುನ್ ದಿತಾನಾ, ತಿಕಾ ರಿತೆಂ ಕಿತ್ಲೊ ದುಬ್ಳೊ ಬಾಪಯ್‌ಯಿ ಧಾಡ್ಚೊನಾ ಪುತಾ. ಆಮ್ಚ್ಯಾ ತಾಂಕಿ ಭಿತರ‍್ಲೆಂ ಆಮ್ಕಾಂ ದೀಂವ್ಕ್ ಆಸಾಚ್. ಪುಣ್ ಕಿತ್ಯಾಕ್‌ಗಿ ಮ್ಹಾಕಾ ಭಗ್ತಾ, ತ್ಯಾ ಘರಾ ತುಂ ಸಂತುಸ್ಟಿ ಆಸ್ಚೆಂನಾಂಯ್”

“ಹಾಂವ್ ಮ್ಹಜ್ಯಾ ಜಿಬೆಕ್ ಬೀಗ್ ಘಾಲುನ್ ಆಸ್ತೆಲಿಂ ಪಪ್ಪಾ. ಕೊಣೆ ಕಿತೆಂ ಮ್ಹಳ್ಯಾರ್‌ಯಿ ಹಾಂವ್ ಸೊಸುನ್ ವರ‍್ತೆಲಿಂ. ತ್ಯಾ ಘರಾ ಮ್ಹಜೊ ಮೊಗಾಚೊ ಸಂಬಂಧ್ ಫಕತ್ತ್ ಪ್ರದೀಪಾಸಂಗಿಂ ಆಸ್ತಲೊ. ತೊ ಮ್ಹಜೊ ಮೋಗ್ ಕರ‍್ತಾನಾ, ಮ್ಹಾಕಾ ಹೆರಾಂಚೆಂ ಕಸಲೆಂ ಭ್ಯೆಂ…?”

“ಜಾಯ್ತ್ ಪುತಾ. ತುಂ ಪ್ರದೀಪ್‌ಚ್ ಜಾಯ್ ಮ್ಹಣ್ ಹಟ್ಟ್ ಕರ‍್ತ್ತಾನಾ, ಆಮಿಂ ಆಡಾಯ್ನಾಂವ್” ಮನೋಜ್ ಮ್ಹಣಾಲೊ.

ವೈಶಾಲಿಚೆಂ ಕಾಜಾರ್ ಘಟ್ ಜಾಲೆಂ.  ಮನೋಜಾನ್ ದೊತಿ ರೂಪಾರ್, ಧುವೆಕ್ 51 ತೊಲೆ ಬಾಂಗಾರ್, 20 ಕಿಲೊ ರುಪೆಂ, ಜಾಂವ್ಯಾಂಕ್ 1.7 ಕೊರೊಡಾಚೆಂ ನವೆಂ ಪೊರ್ಶ್  ಕಾರ್ ಕಾಣಿಕೆಚ್ಯಾ ರೂಪಾರ್ ದಿಲೆಂ. ತ್ಯಾ ಕಾರಾಚಿ ಚಾವಿ ಎಕಾ ಪೊಲಿಟಿಷೆನಾಚ್ಯಾ ಹಾತಿಂ ದಿವಯಿಲ್ಲಿ.

ಕಾಜಾರ್ ಬರ‍್ಯಾ ಥರಾನ್ ಜಾಲೆಂ. ಹೊಕಾಲ್ ತ್ಯಾ ದೀಸ್ ಇತ್ಲಿ ಸಂತುಷ್ಟಿ ಆಸ್‌ಲ್ಲಿಕೀ, ತಿಕಾ ಬಾಪಾಯ್ನ್ ಒಪ್ಸುನ್ ದಿತಾನಾ, ಸಂತೋಸಾಚಿಂ ದುಖಾಂ ರಡೊನ್, ತಿ ಬಾಪಾಯ್ ಸಂಗಿಂ ನಾಚ್‌ಲ್ಲಿ. ಪಳಯಿಲ್ಲೊ ಲೋಕ್‌ಯಿ ಸಾಕ್ಸ್ ಜಾವ್ನಾಸ್‌ಲ್ಲೊ, ಎಕಾ ಮಧ್ಯಮ್ ವರ್ಗಾಚ್ಯಾ ಕುಟ್ಮಾನ್ ಆಪ್ಲ್ಯಾ ಧುವೆಚೆಂ ಕಾಜಾರ್, ಎಕಾ ರಾಯ್‌ಕುಂವರ‍್ನಿ ಪರಿಂ ಕರುನ್ ದಿಲೆಂ ಮ್ಹಣ್.

ದೀಸ್ ಉಬ್ಲೆ. ಮಹಿನೆಯಿ ಥಾಂಬ್ಲೆನಾಂತ್. ವರಸ್‌ಯಿ ಪಾಶಾರ‍್ಲೆಂ.

ಗರ್ಭೆಸ್ತ್ ಆಸ್‌ಲ್ಲೆಂ ವೈಶಾಲಿ ಎಕಾ ಚೆರ್ಕ್ಯಾ ಭುರ್ಗ್ಯಾಕ್ ಪ್ರಸೂತ್ ಜಾಲೆಂ. ಹ್ಯಾ ಮಧೆಂ ವೈಶಾಲಿಚ್ಯಾ ಜಿಣ್ಯೆಂತ್ ಕಿತೆಂ ಘಡ್ಲೆಂ, ತೆಂ ಕಿತ್ಲೆಂ ಸಂತೋಸಾನ್ ಆಸ್‌ಲ್ಲೆಂ ವ ತೆಂ ಕಿತ್ಲ್ಯಾ ಬೆಜಾರಾಯೆಂತ್ ಜಿಯೆಲೆಂ ಮ್ಹಳ್ಳೆಂ ವೈಶಾಲಿ ಎಕ್ಲೆಂ ಮಾತ್ರ್ ಜಾಣಾ ಆಸ್‌ಲ್ಲೆಂ ಶಿವಾಯ್ ತಾಣೆ ಕಿತೆಂಚ್ ಭಾಯ್ರ್ ಕಳೊಂಕ್ ಸೊಡ್ಲೆಂನಾ.

ವ್ಹಯ್ ವೈಶಾಲಿನ್ ಆಪ್ಲ್ಯಾ ಜಿಬೆಕ್ ಬೀಗ್ ಘಾಲುನ್ ದವರ್‌ಲ್ಲೆಂ. ಮಾಯ್ನ್ ಆನಿ ನಣಂದಿನ್ ತಾಕಾ ಚಲಯಿಲ್ಲಿ ರೀತ್ ಆನಿ ತಾಚೊ ಕೆಲ್ಲೊ ಗೋಳ್ ತಾಣೆ ಗುಪಿತ್ ಸೊಸುನ್ ವೆಲ್ಲೊ.

ಮಾಸ್ಟರ್ ಡಿಗ್ರಿ ಜೊಡ್‌ಲ್ಲೆಂ ಹುಶ್ಯಾರ್ ಚೆಡುಂ, ಗ್ರೇಸ್ತ್ ಚಲ್ಯಾಚ್ಯಾ ಫುಸ್ಲಾವ್ಣೆಂತ್ ಪಸೊನ್, ಕಾಜಾರ್ ಜಾಲ್ಲೆಂ.  ಪ್ರದೀಪ್ ತಾಚೊ ಫುಡಾರ್ ಆನಿ ಜಿಣ್ಯೆಚೊ ಶೆವೊಟ್ ಮ್ಹಣ್ ತಾಣೆ ಆಪ್ಲೆಂ ಘರ್ ತ್ಯಾಗ್ಸುನ್ ತಾಚೊ ಹಾತ್ ಧರ್‌ಲ್ಲೊ. ಪುಣ್ ತೆಂ ಚುಕೊನ್ ಪಡ್‌ಲ್ಲೆಂ.

ಕಾರಣ್ ಕಸಲೆಂ?

ಬಾಪಾಯ್ನ್ ದಿಲ್ಲೆಂ ದೋತ್ ದೆಣೆ ಲೆಕಾ ವರ್ತೆಂ ಜಾಲ್ಲೆಂ?

ಎಕ್ಲಿಚ್ ಧುವ್, ವ್ಹಡಾ ಘರಾಣ್ಯಾಂತ್ ದಿತಾನಾ, ಬಾಪಾಯ್ನ್ ತಾಚ್ಯಾ ಸಗ್ಳ್ಯಾ ಜಿಣ್ಯೆಚಿ ಜೋಡ್, ಧುವೆಚ್ಯಾ ದೋತ್ ದೆಣ್ಯಾಂತ್ ಲುಟಯಿಲ್ಲಿ. ವ್ಹಯ್ಲ್ಯಾನ್ ಕಂಪೆನಿ ಥಾವ್ನ್ ರೀಣ್‌ಯಿ ಕಾಡ್‌ಲ್ಲೆಂ.

ವೈಶಾಲಿಚ್ಯಾ ಬಾಪಾಯ್‌ಲಾಗ್ಗಿಂ ಮಸ್ತು ಪಯ್ಶೆ ಆಸಾತ್ ಮ್ಹಣ್ ಲೇಕ್ ಘಾಲ್ಲ್ಯಾ ಪ್ರದೀಪಾಚ್ಯಾ ಘರ‍್ಚ್ಯಾಂನಿ, ವೈಶಾಲಿಕ್ ಅನಾವಶೆಂ ತವೊಳ್ ತವೊಳ್ ತಾಂಚ್ಯಾ ಗರ್ಜೆಂಕ್ ಪಯ್ಶ್ಯಾಂಚಿ ಮಾಗ್ಣಿಂ ಕೆಲ್ಲಿ. ಪುಣ್ ವೈಶಾಲಿನ್ ತಾಂಚ್ಯೊ ಗರ್ಜೊ ಆಪ್ಲ್ಯಾ ಬಾಪಾಯ್ಕ್ ಸಾಂಗೊಂಕ್ ನಾತ್‌ಲ್ಲ್ಯೊ. ತೆಂ ಜಾಣಾ ಆಸ್‌ಲ್ಲೆಂ, ಬಾಪಾಯ್ನ್ ರೀಣ್ ಕಾಡುನ್, ಆಪ್ಲೆಂ ಕಾಜಾರ್ ಕರುನ್ ದಿಲ್ಲೆಂ ಮ್ಹಣ್.

ಏಕ್ ದೀಸ್ ಪ್ರದೀಪ್ ವೈಶಾಲಿಕ್ ಸಾಂಗಾಲಾಗ್ಲೊ-  “ಆಮ್ಚ್ಯಾ ಬಂಗ್ಲ್ಯಾಚ್ಯಾ ಮುಖಾರ್ ಏಕ್ ಜಮೀನ್ಧಾರ್ ೧೨ ಎಕ್ರೆ ಜಾಗೊ ವಿಕ್ಚ್ಯಾರ್ ಆಸಾ. ಮ್ಹಾಕಾ ತೊ ಖರೀದ್ ಕರುನ್ ಏಕ್ ಫಾರ್ಮ್ ಹೌಸ್ ಬಾಂಧೂಂಕ್ ಆಸಾ. ಖರ್ಚ್ ಲಗ್ಬಗ್ ದೋನ್ ಕೊರೊಡ್ ಲಾಗ್ತೊಲೊ. ತುಂ ತುಜ್ಯಾ ಪಪ್ಪಾಕ್ ಸಾಂಗೊನ್ ದೋನ್ ಕೊರೊಡಾಂಚಿ ಬಂದೊಬಸ್ತ್ ಕರ್. ಮ್ಹಜೆಂ ಬಿಸ್ನೆಸ್ ಸೆಟ್ಟ್ ಜಾತಚ್ ಹಾಂವ್ ತೆ ಪಯ್ಶೆ ಪಾಟಿಂ ದಿತಾಂ”

“ಮ್ಹಜೊ ಪಪ್ಪಾ ಪಯ್ಲೊಚ್ ರೀಣಾಂತ್ ಆಸಾ ಪ್ರದೀಪ್. ತಾಣೆ ಖಂಯ್‌ಥಾವ್ನ್ ದೋನ್ ಕೊರೊಡ್ ಹಾಡ್ಚೆ?” ವೈಶಾಲಿ ಮ್ಹಣಾಲೆಂ.

“ಹಾಂವ್‌ಯಿ ರೀಣ್ಂಚ್ ವಿಚಾರ‍್ತಾಂ. ತುಜ್ಯಾ ಬಾಪಾಯ್ಚೆ ಪಯ್ಶೆ ಬುಡಂವ್ಚೊನಾ. ಕಾಜಾರಾಚ್ಯಾ ವೆಳಾರ್ ಕಶಿ ತಾಂಕಿಚ್ಯಾಕ್‌ಯಿ ಚಡ್ ಸರ್ಭಾರಾಯ್ ಕೆಲ್ಲಿ…?” ಪ್ರದೀಪ್ ರಾಗಾನ್ ಸಾಂಗಾಲಾಗ್ಲೊ. “ಲೊಕಾಕ್ ದಾಖಂವ್ಕ್ ವ ಆಮ್ಚಿ ಬರಾಬರಿ ಕರುಂಕ್?”

“ತುಮ್ಚಿ ಬರಾಬರಿ ಕಶಿ ಮ್ಹಜ್ಯಾ ಪಪ್ಪಾನ್ ಕರ‍್ಚಿ ಪ್ರದೀಪ್? ಜೆಂ ಕಿತೆಂಯಿ ಮ್ಹಜ್ಯಾ ಪಪ್ಪಾನ್ ದಿಲಾಂ ತೆಂ ತುಮ್ಚೆಂಚ್ ಡಿಮಾಂಡ್ ಜಾವ್ನಾಸ್‌ಲ್ಲೆಂ. ಪುಣ್ ತಾಣೆ ಹೆಂ ಕೊಣಾಕ್‌ಚ್ ಕಳೊಂಕ್ ಸೊಡುಂಕ್ ನಾ”

ತ್ಯಾಚ್ ಫರಾ ಪ್ರದೀಪಾಚೆಂ ಥಾಪಾಡ್ ವೈಶಾಲಿಚ್ಯಾ ಕಾನ್ಸುಲಾರ್ ಪಡ್ಲೆಂ!

“ಮಾರ್ ಆನಿ ಕಾಭಾರ್ ಕಾಡ್ ಮ್ಹಾಕಾ. ಹ್ಯಾ ಘರಾ ಯೇವ್ನ್ ತುಜೆಚ್ ನಹಿಂ, ತುಜ್ಯಾ ಆವಯ್ ಆನಿ ಭಯ್ಣಿಚೆಯಿ ಮಾರ್ ಖೆಲ್ಯಾತ್. ಮ್ಹಜ್ಯಾ ಘರಾ ಮ್ಹಾಕಾ ಮ್ಹಜ್ಯಾ ಆವಯ್-ಬಾಪಾಯ್ನ್ ಬೋಟ್ ಸೈತ್ ಲಾಂವ್ಕ್ ನಾತ್‌ಲ್ಲೆಂ. ತಾಣಿಂ ಛತ್ರಾಯ್ ದಿಲ್ಲಿ ಮ್ಹಾಕಾ ಹಾಂವ್ ಚೂಕ್ ಆಧಾರುನ್ ಆಸಾಂ ಮ್ಹಣ್. ತಾಣಿಂ ಸಾಂಗ್‌ಲ್ಲೆಂ ಸತ್ ಮ್ಹಾಕಾ ತ್ಯಾ ವೆಳಾ ಫಟ್ ಮ್ಹಣ್ ಭಗ್‌ಲ್ಲೆಂ. ಕಿತ್ಯಾಕ್, ಹಾಂವ್ ತುಕಾ ಪಾತ್ಯೆಲ್ಲಿಂ”

ಪಯಿಲ್ಲೆಪಾವ್ಟಿಂ ವೈಶಾಲಿನ್ ಪಾಟಿಂ ಜಾಪ್ ದೀವ್ನ್ ಘೊವಾಕ್ ಮುಖಾರ್ ರಾವ್‌ಲ್ಲೆಂ ಪಳವ್ನ್, ಪದೀಪ್ ಸಗ್ಳೊಚ್ ರಾಗಾನ್ ಖಡ್ಕಡ್ಲೊ ಆನಿ ತಾಣೆ ವೈಶಾಲಿಕ್, ಖೊಟೊ-ಮುಟಿ ಘಾಲುನ್ ಮಾರ‍್ಲೆಂ.

ಹೆಂ ತ್ಯಾ ಘರ‍್ಚ್ಯಾಂಕ್ ಕಳ್ತಾನಾ, ನಣಂದಿನ್ ಆನಿ ಆವಯ್ನ್‌ಯಿ ಮೆಳೊನ್ ವೈಶಾಲಿಕ್ ಸುಶೆಗಾತ್ ಮಾರ‍್ಲೆಂ. ಅಶೆಂ ವೈಶಾಲಿಕ್ ತ್ಯಾ ಘರಾ ಮಾರ್ ಪಡ್ಚೆ ಸದಾಂಚೆ ಜಾಲೆ.

ವೈಶಾಲಿಚೊ ಚೆರ್ಕೊ ಫಕತ್ತ್ ನೋವ್ ಮಹಿನ್ಯಾಂಚೊ ಆಸ್‌ಲ್ಲೊ. ಸದಾಂಯ್ ತಾಕಾ ಮೆಳ್ಚಿ ಇಝಾ ಆನಿ ಮಾರ್ ತೆಂ ಸೊಸುಂಕ್ ಸಕಾನಾ ಜಾಲೆಂ.

ಆವಯ್ ಬಾಪಾಯ್ನ್ ಕಿತ್ಲೆಂ ಸಮ್ಜಾಯಿಲ್ಲೆಂ ಆಸ್ತಾಂಯಿ, ಪ್ರದೀಪಾಚೊ ಮೋಗ್ ವರ್ತೊ ತಾಕಾ ಜಾಲ್ಲೊ. ತಾಚ್ಯಾಚ್ ಹಟ್ಟಾನ್ ತೆಂ ಕಾಜಾರ್ ಜಾಲ್ಲೆಂ ಆಸ್ತಾಂ, ತೆಣೆ ಬಾಪಯ್‌ಯಿ ರೀಣಾಂತ್ ಬುಡೊನ್ ಆಸ್ತಾಂ, ಆಪ್ಲ್ಯಾ ಘರಾ ಪಾಟಿಂ ತೆಂ ಖಂಚೆಂ ತೊಂಡ್ ಘೆವ್ನ್ ವೆತೆಲೆಂ?

ತ್ಯಾ ಎಕಾ ರಾತಿಂ ತೆಂ ನಿದೊಂಕ್ ಸಕ್ಲೆಂನಾ. ತಾಚೆಂ ಸಗ್ಳೆಂ ಆಂಗ್, ಮಾರ್ ಖೆಲ್ಲ್ಯಾ ದುಖಿನ್ ಫಡ್ತಾಲೆಂ. ನಿಮಾಣೆ ತೆಂ ಏಕ್ ಭೋವ್ ವ್ಹಡ್ಲೊ ನಿರ್ಧಾರ್ ಘೆವ್ನ್ ಹುಸ್ಕೆಲೆಂ. ಆಪ್ಲ್ಯಾ ನೋವ್ ಮಹಿನ್ಯಾಂಚ್ಯಾ ಬಾಳ್ಶ್ಯಾಕ್ ಪಟ್ಲುನ್ ಧರುನ್ ಮಸ್ತು ರಡ್ಲೆಂ.

ತಾಣೆ ಏಕ್ ಕಾಗದ್ ಬಾಪಾಯ್ಕ್ ಬರಯ್ಲೆಂ-

“ಪಪ್ಪಾ ಮ್ಹಾಕಾ ಭಗ್ಗಿ. ಹಾಂವ್ ಚುಕೊನ್ ಪಡ್ಲಿಂ. ಹಾವೆಂ ಕೆಲ್ಲ್ಯಾ ಚೂಕಿಕ್, ಹಾಂವ್ ಪಾಟಿಂ ಯೇಂವ್ಕ್‌ಯಿ ಸಕಾನಾ. ಮ್ಹಜ್ಯಾ ಮರ್ಣಾಕ್ ಹಾಂವ್ಂಚ್ ಕಾರಣ್ ಜಾಲ್ಯಾಂ. (ಪಾಟ್ಲ್ಯಾ ದೋನ್ ವರ‍್ಸಾಂನಿ ತಾಚೆ ಥಂಯ್ ಘಡ್‌ಲ್ಲ್ಯಾ ಸರ್ವ್ ಘಟಾನಾಂಕ್ ತಾಣೆ ತ್ಯಾ ಪತ್ರಾರ್ ಕಾಣ್ಸಿಲೆಂ) – ತುಜಿ ನಿರ್ಭಾಗಿ ಧುವ್- ವೈಶಾಲಿ.”

ತೆಂ ಕಾಗದ್ ತಾಣೆ ತ್ಯಾ ಘರ‍್ಚ್ಯಾ ಎಕಾ ಕಾಮಾಚ್ಯಾ ಮನ್ಶ್ಯಾಚ್ಯಾ ಹಾತಿಂ ದೀವ್ನ್, ಆಪ್ಲ್ಯಾ ಬಾಪಾಯ್ಕ್ ಪಾವಂವ್ಕ್ ವಿನಂತಿ ಕೆಲಿ. ಉಪ್ರಾಂತ್ ಧಾರ್ ಬಂಧ್ ಕರುನ್ ತೆಂ ಕದೆಲಾರ್ ಚಡ್ಲೆಂ!

ವ್ಹಯ್. ವೈಶಾಲಿಲಾಗ್ಗಿಂ ಆಪ್ಲ್ಯಾ ಚೂಕಿಚೆಂ ಪ್ರಾಜೀತ್ ಕರುಂಕ್ ಎಕ್‌ಚ್ ವಾಟ್ ಆಸ್‌ಲ್ಲಿ ಆತ್ಮಹತ್ಯಾಚಿ.

♦ ♦ ♦

ಪೊಸ್ಟ್‌ಮೊರ್ಟಮಾಂತ್ ವೈಶಾಲಿಚ್ಯಾ ಸಗ್ಳ್ಯಾ ಕುಡಿಚೆರ್ ಆಸ್‌ಲ್ಲೆಂ ಘಾಯ್ ಉಜ್ವಡಾಕ್ ಪಡ್ಲೆ!

ಹೆಣೆ ಬಾಪಾಯ್ಕ್ ಬರಯಿಲ್ಲೆಂ ಕಾಗದ್‌ಯಿ ಪಾವ್‌ಲ್ಲೆಂ!

ವೈಶಾಲಿಚ್ಯಾ ಆತ್ಮಹತ್ಯಾಚಿ ಖಭಾರ್ ಸಗ್ಳ್ಯಾ ಗಾಂವಾರ್ ವಿಸ್ತಾರ‍್ಲಿ. ಮನೋಜಾನ್ ಪೊಲಿಸಾಂಕ್ ವೈಶಾಲಿನ್ ಮರ‍್ಚ್ಯಾ ಆಧಿಂ ಬರಯಿಲ್ಲೆಂ ಕಾಗದ್ ದಿಲೆಂ.

ಧುವೆಚ್ಯಾ ತೊಂಡಾರ್ ಸಂತೊಸ್ ಪಳಂವ್ಕ್, ಬಾಪಾಯ್ನ್ ಇತ್ಲಿ ದೋತ್ ದೆಣೆ ದೀವ್ನ್ ವ್ಹಡ್ಲ್ಯಾ ಘರಾ ಧಾಡುನ್ ದೀವ್ನ್, ಧುವೆಕ್‌ಯಿ ಹೊಗ್ಡಾಯ್ಲೆಂ ಆನಿ ರೀಣಾಂತ್‌ಯಿ ಬುಡ್ಲೊ.

■ ಎಚ್. ಜೆ. ಗೋವಿಯಸ್