ಜಿಣಿ ಆನಿ ಕೊಂಕ್ಣಿ ‘ಅಮೃತ್’ ಕೆಲ್ಲೊ ಓಸ್ಟಿನ್

ಕೊಂಕ್ಣಿ ಭಾಸ್, ಬರಪ್, ಪತ್ರಿಕೋದ್ಯಮ್, ನಾಟಕಾಂ, ಭಾಷಾ ಮಂಡಳ್, ಕಥೊಲಿಕ್ ಯುವ ಸಂಚಾಲನ್ – ಸಿವೈಎಂ (ಆತಾಂ ಐಸಿವೈಎಂ) ಆನಿ ವಿಸಾವ್ಯಾ ಶತಮಾನಾಂತ್ಲೆಂ ಕಲಾ ಸಂಪತ್, ಲಯನ್ಸ್ ಸಂಘಟನ್ ಆನಿ ಮುಕೇಲ್ಪಣ್ ಆಸಲಿಂ ಸಂಘಟನಾಂ ಆನಿ ಸಂಗ್ತಿಂನಿ ಬಳಾಧಿಕ್ ಛಾಪ್ ಮಾರ‍್ಲೆಲ್ಯಾ ಓಸ್ಟಿನ್ ಡಿಸೋಜಾ ಪ್ರಭುವಿಶಿಂ ನೆಣಾಸ್ಚೆ ಭೊವ್ಶ್ಯಾ ವಿರಳ್. ಆತಾಂ ಅಮೆರಿಕಾಂತ್ ಜಿಯೆತಾ ತರೀ ಆಪ್ಲ್ಯಾ ತರ್ನಾಟ್ಪಣಾರ್ ಮಂಗ್ಳುರಾಂತ್ ತಾಣೆ ಸುರ್ವಾತ್ ಕೆಲ್ಲ್ಯಾ ಆನಿ ಹಾಂಗಾಸರ್ ಕಳಯಿಲ್ಲ್ಯಾ ಕಾರ್ಭಾರಾಂ ಪಯ್ಕಿಂ ಥೊಡಿಂ ಓಸ್ಟಿನ್ ಆಜೂನ್ ಮುಕಾರುನ್ ವರ್ಚಾಸವೆಂ ಜಾಯ್ತಿಂ ನವಿಂ ಕಾರ್ಭಾರಾಂ ತಾಚಾ ಪಟ್ಟೆರ್ ಸೆರ್ವಾಲ್ಯಾಂತ್.

1974 ಆಗೊಸ್ತ್ 16 ವೆರ್ ಪಾಂಗ್ಳಾಚೆಂ ಕಥೊಲಿಕ್ ಯುವ ಸಂಚಾಲನ್ (ಸಿವೈಎಂ) ಘಟಕ್ ಉಗ್ತಾವಣ್ ಕರುಂಕ್ ತೆದ್ನಾಂಚೊ ಕೇಂದ್ರಿಕ್ ಅಧ್ಯಕ್ಷ್, ಆಕರ್ಷಕ್ ತರ್ನಾಟೊ ಓಸ್ಟಿನ್ ಆನಿ ಕೇಂದ್ರಿಕ್ ದಿರೆಕ್ತೊರ್ (ಪದ್ವಾ ಹೈಸ್ಕೂಲಾಚೊ ಮುಕೆಲ್ ಮೆಸ್ತ್ರಿ ಜಾವ್ನಾಸ್‌ಲ್ಲೊ) ಬಾಪ್ ವಿಲಿಯಮ್ ಗೊನ್ಸಾಲ್ವಿಸ್ ಆಯಿಲ್ಲ್ಯಾ ತೆದ್ನಾಂ ಆಟ್ವ್ಯಾ ಕ್ಲಾಸಿಂತ್ ಆಸ್‌ಲ್ಲ್ಯಾ ಆನಿ ಸಿವೈಎಂ ಘಟಕಾಕ್ ಭರ್ತಿ ಜಾಂವ್ಕ್ ಪ್ರಾಯ್ ಜಾವ್ನಾತ್ಲ್ಯಾ ಹಾಂವೆಂ ಓಸ್ಟಿನ್ ಡಿಸೋಜ ಪ್ರಭು ಮ್ಹಣ್ಚ್ಯಾ ವ್ಯಕ್ತಿಕ್ ಪಯ್ಲ್ಯಾ ಪಾವ್ಟಿಂ ಪಳೆಲ್ಲೆಂ. 1976 ಮೇ ಮಹಿನ್ಯಾಂತ್ ಮ್ಹಜಿ ಧಾವಿ ಜಾತಾನಾ ಸಿವೈಎಂ ಪಾಂಗ್ಳಾ ಘಟಕಾಕ್ ಭರ್ತಿ ಜಾಲ್ಲ್ಯಾ ಹಾಂವೆಂ ಫುಡೆಂ ಎಕಾ ದಿಸಾ ಯುವಕ್ – ಸಿವೈಎಂ ಹಾತ್‌ಪತ್ರಾಚೆಂ ಸಂಪಾದಕ್‌ಪಣ್ ಓಸ್ಟಿನಾ ಥಾವ್ನ್ ಜೋಡ್ನ್ ಘೆತಲೊಂ ಮ್ಹಣ್ ಸ್ವಪ್ಣಾಂತ್‌ಯೀ ಚಿಂತುಂಕ್ ನಾ. ಪಾಂಗ್ಳಾಂತ್ ಜಲ್ಮೊನ್ ವಾಡ್‌ಲ್ಲೊಂ ಹಾಂವ್ ವಿಶಿಷ್ಟ್ ಸನ್ನಿವೇಶಾಂನಿ ಕದ್ರಿಗುಡ್ಯಾ ವಯ್ಲ್ಯಾ ಕರ್ನಾಟಕ ಪೊಲಿಟೆಕ್ನಿಕಾಂತ್ ಶಿಕ್ಪಾ ಖಾತಿರ್ (1978 – 81) ಮಂಗ್ಳುರಾಕ್ ಪಾವ್‌ಲ್ಲೊಂ ಆನಿ 1979 ಜುಲಾಯ್ ೮ವೆರ್ ಸಿವೈಎಂ ಕೇಂದ್ರಿಕ್ ಸಮಿತೆಂತ್ ಹುದ್ದೆದಾರ್ ಜಾಲ್ಲೊಂ.

ತ್ಯಾ ಉಪ್ರಾಂತ್ ಹಾಂವ್ ಓಸ್ಟಿನಾಚಾ ಸಳಾವಳಿಂತ್ ಆಸಾಂ.

ಓಸ್ಟಿನ್ 2025 ಆಗಸ್ಟ್ 8 ವೆರ್ ಆಪ್ಲ್ಯಾ ಜಿವಿತಾಚಿಂ 75 ಸಂಪಯ್ತಾ.  ತಾಚಾ ಜಲ್ಮಾಚಾ ಅಮೃತೋತ್ಸವಾ ಸಂದರ್ಭಾರ್ ಹೆಂ ಲೇಖನ್.

ಬೆಂದೂರ‍್ಚಾ ಗೋಲ್ಬರ್ಟ್ ಡಿಸೋಜಾ ಆನಿ ರೋಸ್ ಡಿಸೋಜ ಜೊಡ್ಯಾಚೆಂ ತಿಸ್ರೆಂ ಬಾಳ್ ಓಸ್ಟಿನ್ 1950 ಆಗೊಸ್ತ್ 8 ವೆರ್ ಜಲ್ಮಾಲ್ಲೊ. ತಾಚಿಂ ಭಾಂವ್ಡಾಂ: ಲಿಯೊನಿಲ್ಲಾ, ವಿಕ್ಟರ್ (ಲಾನ್ಪಣಿಂ ಅಂತರ‍್ಲಾ), ನೊರ್ಬರ್ಟ್, ಡೊರೊತಿ, ಸ್ಟ್ಯಾನಿ, ಮೆಲ್ವಿಲ್, ಫೆಲಿಕ್ಸ್ ಆನಿ ಕ್ವೀನಿ. ಗೋಲ್ಬರ್ಟ್ ಮಂಗ್ಳುರಾಂತ್ಲೊ ನಾಂವಾಡ್ದಿಕ್ ಲೇಡಿಸ್ ಟೈಲರ್. ಓಸ್ಟಿನಾನ್ ನಂತೂರ್ ಸಾಂ ಜುಜೆ ಕಲ್ವರಿ ಪ್ರೈಮರಿ ಸ್ಕೂಲಾಂತ್ ಪ್ರೈಮರಿ, ಪದ್ವಾ ಹೈಸ್ಕೂಲಾಂತ್ ಹೈಸ್ಕೂಲ್ ಆನಿ ಸರ್ಕಾರಿ ಐಟಿಐ-ಂತ್ ಮೆಕ್ಯಾನಿಕಲ್ ಫಿಟ್ಟರ್ ಶಿಕಪ್ ಕೆಲೆಂ. ಉಪ್ರಾಂತ್ಲ್ಯಾ ವರ್ಸಾಂನಿ ಮೈಸೂರ್ ವಿಶ್ವವಿದ್ಯಾನಿಲಯಾ ಥಾವ್ನ್ ಕರೆಸ್ಪೋಂಡೆನ್ಸ್ ರುಪಾರ್ ಶಿಕೊನ್ ಓಸ್ಟಿನಾನ್ ಬಿಎ ಪದ್ವಿ ಜೊಡ್ಲಿ.

ಮಂಗ್ಳುರ‍್ಚ್ಯಾ ಕೆನರಾ ವರ್ಕ್ ಶೊಪಾಂತ್ ಥೊಡಿ ಆವ್ದಿ ವಾವುರ‍್ಲ್ಯಾ ಉಪ್ರಾಂತ್ ಬೊಂಬಯ್ ಗೆಲ್ಲೊ ಓಸ್ಟಿನ್ ದೋನ್ ವರ್ಸಾಂ ಕೇಸಿ ಕೈಗಾರಿಕೆಂತ್ (Kaycees Industries) ಆನಿ ಥೊಡೆ ಮಹಿನೆ ‘ಪಯ್ಣಾರಿ’ ಹಫ್ತಾಳ್ಯಾಂತ್ ವಾವುರ‍್ಲೊ. 1972-ಂತ್ ಮಂಗ್ಳುರಾಕ್ ಪಾಟಿಂ ಆಯ್ಲೊ. ಥೊಡೊ ತೇಂಪ್ ಬಾಪಾಯ್ಚ್ಯಾ ಟೈಲರಿಂಗ್ ಶೊಪಾಂತ್ ಬಾಪಾಯ್ಕ್ ಕುಮ್ಕೆದಾರ್ ಜಾಲೊ. ಆಪ್ಣಾಕ್ ನಾಂವಾಡ್ದಿಕ್ ಲೇಡಿಸ್ ಟೈಲರ್ ಕರ್ಚಿ ಆಶಾ ಬಾಪಯ್ಚಿ ಆಸ್‌ಲ್ಲಿ ಮ್ಹಳಾಂ ಓಸ್ಟಿನಾನ್.

ಓಸ್ಟಿನಾ ಥಂಯ್ ಕೊಂಕ್ಣಿ ಭಾಸ್, ಸಾಹಿತ್ಯ್, ಪತ್ರಿಕೋದ್ಯಮ್, ನಾಟಕಾಂ, ಸಂಗೀತ್, ಮುಕೇಲ್ಪಣ್, ಸಮಾಜ್ ಸೆವಾ ಆನಿ ಹೆರ್ ಕ್ಷೇತ್ರಾಂತ್ ಉರ್ಭಾ ಆಸ್ಲೆಲಿ. ‘ವೀಕ್‌ನೆಸ್ ನಂತೂರ್’ ನಾಂವಾರ್ ತೊ ರಾಕ್ಣೊ ಆನಿ ಹೆರ್ ಪತ್ರಾಂನಿ ಬರಯ್ತಾಲೊ. ಜೊ.ಸಾ. ಆಲ್ವರಿಸಾನ್ ಝೆಲೊ ಪಂದ್ರಾಳ್ಯಾಚೆಂ ಪ್ರಕಟಣ್ ರಾವಂವ್ಕ್ ಯೋಜಿಲ್ಲ್ಯಾ ವೆಳಾರ್ ತೆವೀಸ್ ವರ್ಸಾಂಚೊ ಓಸ್ಟಿನ್ ತೆಂ ಮೊಲಾಕ್ ಘೆತಾ. ಸ ಮಹಿನ್ಯಾಂನಿ ಜೊ.ಸಾ. ಥಾವ್ನ್ ಮಿತ್ರ್ ಹಫ್ತ್ಯಾಳೆಂ ಮೊಲಾಕ್ ಘೆವ್ನ್ ಚಲಯ್ತಾ. ತ್ಯಾ ವೆಳಾರ್ ತಾಚಾ ಬಾಪಾಯ್ನ್ ಎಂಸಿಸಿ ಬ್ಯಾಂಕಾಕ್ ಘರ್ ಆಡವ್ ಗಾಲ್ನ್ 10,000 ರುಪಯ್ ರೀಣ್ ಕಾಡ್ನ್ ದಿಲ್ಲೆಂ ಖಂಯ್. ಸಿರಿವಂತಾ ಥಾವ್ನ್ ಕಾಣಿಕ್ ಘೆವ್ನ್ ಚಲಯ್ತಾ. ಹ್ಯಾಚ್ ಆವ್ದೆಂತ್ ಓಸ್ಟಿನಾನ್ ಸಿವೈಎಂ ಬುಲೆಟಿನ್ ‘ಯುವಕ್’ ಸಂಪಾದಕ್ಪಣ್ ಚಲಯಿಲ್ಲ್ಯಾನ್, ಏಕಾಚ್ಚ್ ವೆಳಾರ್ ಚ್ಯಾರ್ ಕೊಂಕ್ಣಿ ತ್ರಾಂ ಚಲಯಿಲ್ಲೊ ದಾಖ್ಲೊ ತಾಚೊ.

ಅಚಾತುರ್ಯಾನ್ ಪತ್ರಾಚೆರ್ ಪ್ರಗಟ್ ಜಾಲ್ಲ್ಯಾ ಎಕಾ ಲಿಖಿತಾಚೆರ್ ಖುಬಾಳ್‌ಲ್ಲ್ಯಾ ಬಾಪ್ ಸ್ಟ್ಯಾನ್ಲಿ ಆರ್. ಪಿರೇರಿನ್ ಬೊಂಬೈ ಬೆಂಡ್ರಾ ಕೊಡ್ತಿಂತ್ ಗಾಲ್ಲ್ಯಾ ದಾವೆಕ್(ಕೆಸಿಕ್) ಲಾಗೊನ್ ಒಸ್ಟಿನ್ ಜಾಯ್ತೊ ಕಷ್ಟಾತಾ. ತೆದ್ನಾಂ ಪತಾಂಚಾ ಜವಾಬ್ದಾರೆ ಶಿವಾಯ್ ಸಂಘ್ – ಸಂಸ್ಥ್ಯಾಂಚ್ಯೊ ಆನಿ ಹೆರ್ ಜಾಯ್ತ್ಯೊ ರಾಟಾವಳಿ ಓಸ್ಟಿನಾಚಾ ಖಾಂದ್ಯಾರ್ ಆಸ್‌ಲ್ಲ್ಯೊ. ಬೊಂಬಂಯ್ತ್ ಕೇಸ್ ತೆದಾಳಾ ತೆದಾಳಾ ವಿಚಾರಣಾಕ್ ಯೆತಾಲಿ. ಆಸಲ್ಯಾ ಪರಿಗತೆಂತ್ ಬೊಂಬಯ್ ಬಸ್ಸಾಂನಿ ಆಡ್ಚೊನ್ ಪಯ್ಣ್ ಕರ್ಚಿ ಗತ್ ತಾಚಿ.

ಕೊಡ್ತಿಚಾ ತಿರ್ಪಾ ಪ್ರಕಾರ್ ಓಸ್ಟಿನ್ ಆಪ್ಲ್ಯಾ ಪತ್ರಾಂಚೆರ್ ಆನಿ ಬೊಂಬಯ್ಚಾ ಪಯ್ಣಾರಿಚೆರ್ ಕ್ಷಮಾ ಅಪೇಕ್ಷಿತಾ. ದೇಶಾಂತ್ಲ್ಯಾ ತುರ್ತ್ ಪರಿಸ್ಥಿತೆಖಾಲ್ ಆಡ್ಚೊನ್ ಸಾಡೆಚ್ಯಾರ್ ವರ್ಸಾಂ ಚಲಯಿಲ್ಲಿಂ ಪತ್ರಾಂ ರಾವಯ್ತಾ. ಅಮೆರಿಕಾಕ್ ಗೆಲ್ಲ್ಯಾ ಉಪ್ರಾಂತ್, ಓಸ್ಟಿನಾನ್ ಹೆರಾಂಕ್ ದಿಲ್ಲಿಂ ಪತ್ರಾಂ ಆತಾಂ ಬಂಧ್ ಪಡ್ಲ್ಯಾಂತ್.

ಓಸ್ಟಿನಾನ್ ಆನಿ ಆರ್ಥರ್ ಡಿಸೋಜಾನ್ ಘಡ್ಲೆಲ್ಯಾ ಕಲಾ ಸಂಪತ್ ಸಂಘಟನಾನ್ ಜಾಯ್ತಿಂ ವರ್ಸಾಂ ಖೆಳ್ ಪಂದ್ಯಾಟ್, ನಾಟಕ್ ಆನಿ ಹೆರ್ ವಾವ್ರ್ ಚಲಯಿಲ್ಲೊ. 1970 ವ್ಯಾ ದಶಕಾಚಾ ಮಧೆಗಾತ್ ಮಂಗ್ಳುರಾಂತ್ ಕೊಂಕ್ಣಿ ಭಾಷಾ ಮಂಡಳ್ ಕರ್ನಾಟಕ ಉಬೊ ಜಾಲ್ಲೊ. ಸ್ಥಾಪಕ್ ಕಾರ್ಯದರ್ಶಿ ಓಸ್ಟಿನ್ 1976 -ಂತ್ ಮಂಗ್ಳುರಾಂತ್ ಚಲ್ಲೆಲ್ಯಾ ಇಕ್ರಾವ್ಯಾ ಅಖಿಲ್ ಭಾರತ್ ಕೊಂಕ್ಣಿ ಸಾಹಿತ್ ಪರಿಷದೆಚ್ಯಾ ಸಂಘಟನ್ ಸಮಿತಿಚೊ ಸಹ-ಕಾರ್ಯದರ್ಶಿ ಜಾವ್ನಾಸ್ಲೊ. ಹ್ಯಾ ವೆಳಾರ್ ಚಾ. ಫ್ರಾ. ದೆ’ಕೊಸ್ತಾಚ್ಯಾ ಪ್ರಕಟಣಾಖಾಲ್ ತೀನ್ ದೀಸ್ ಚಲಯಿಲ್ಲ್ಯಾ ಉದೆವ್  ದಿಸಾಳ್ಯಾಚೊ ತೊ ಪ್ರಧಾನ್ ಸಂಪಾದಕ್ ಜಾಲ್ಲೊ.

ಮಂಗ್ಳುರ್ ದಿಯೆಸೆಜಿಚಾ ಕಥೊಲಿಕ್ ಯುವ ಸಂಚಾಲನಾಂತ್ ದಿಯೆಸೆಜಿಚಾ ಕೇಂದ್ರಿಕ್ ಸಮಿತೆಚೊ ಅಧ್ಯಕ್ಷ್ ಜಾವ್ನ್ ಓಸ್ಟಿನಾನ್ ಮಾಜ್ವೊಂಕ್ ಜಾಯ್ನಾತ್ಲೊ ದಾಖ್ಲೊ ರಚ್ಲಾ. ಸತತ್ ಚಾರ್ ವರ್ಸಾಂ ಅಧ್ಯಕ್ಷ್ ಆನಿ ಎಕಾ ವರ್ಸಾ ಗೌರವ್ ಅಧ್ಯಕ್ಷ್ ತೊ ಆಸ್ಲೊ. ಮಂಗ್ಳುರಾಂತ್ಲ್ಯಾ ಕೊಂಕ್ಣಿ ನಾಟಕ್ ಸಭೆಚೊಯ್ ಕಾರ್ಯದರ್ಶಿ ಜಾವ್ನ್ (1974-1980) ಓಸ್ಟಿನ್ ವಾವುರ್ಲೆಲೊ. ಓಸ್ಟಿನಾನ್ ನಾಟಕ್ ಸಭೆಚಾ ಆನಿ ಹೆರಾಂಚಾ ನಾಟಕಾಂನಿ ನಟನ್ ಕೆಲಾಂ. ಹಾಸ್ಯ್ ಪಾತ್ರ್ ತಾಕಾ ಖುಶಿ ದಿಂವ್ಚೆ ತರ್ ಗಂಭೀರ್ ಪಾತ್ರಾಂನಿ ತಾಚೆಂ ನಟನ್ ಮೆಚ್ವಣೆಚೆಂ ಆಸ್ಲೆಂ. ‘ಸೊಮ್ಯಾಚೊ ಪಾಶಾಂವ್’ ನಾಟಕಾಂತ್ ಓಸ್ಟಿನ್ ಜೆಜು ಜಾಲ್ಲೊ.

ಬೆಂದುರ‍್ಚ್ಯಾ ಕಥೊಲಿಕ್ ಮಿನತೆಚಾ ಸಂಘಾಂತ್ ಓಸ್ಟಿನ್ ಮುಕೆಲಿ ಜಾವ್ನಾಸ್ಲೊ. ಸೈಂಟ್ ಜೋಸೆಫ್ ಕಲ್ವರಿ ಪ್ರಾಯ್ಮರಿ ಸ್ಕೂಲ್ ಆನಿ ಪದ್ವಾ ಹೈಸ್ಕೂಲ್ ಆದ್ಲ್ಯಾ ವಿದ್ಯಾರ್ಥಿ ಸಂಘಾಂಚೊ ಅಧ್ಯಕ್ಷ್ ಜಾವ್ನ್‌ಯೀ ಓಸ್ಟಿನಾನ್ ಸೆವಾ ದಿಲ್ಯಾ.

1977 ವ್ಯಾ ವರ್ಸಾಂತ್ ರೂಪಿತ್ ಜಾಲ್ಲ್ಯಾ ಜನತಾ ಪಾಡ್ತಿಂತ್ ಓಸ್ಟಿನ್ ಜಿಲ್ಲಾ ಯುವ ಘಟಕಾಚೊ ಹುದ್ದೆದಾರ್ ಆಸ್ಲೊ. 1978 -ಂತ್ ಜನತಾ ಪಾಡ್ತಿಚಾ ಓಂ ಪ್ರಕಾಶ್ ತ್ಯಾಗಿ ಮ್ಹಳ್ಳ್ಯಾ ಸಂಸತ್ ಸಾಂದ್ಯಾನ್ ಸಂಸತಾಂತ್ ಮತಾಂತರ್ ನಿಷೇಧ್ ಮಸೂದ್ ಮಾಂಡ್ಲೆಂ. ಹಾಚಾ ವಿರೋಧ್ ದೇಶ್‌ಬರ್ ಪ್ರತಿಭಟನಾಂ ಜಾಲಿಂ.

ಮಂಗ್ಳುರ್ ದಿಯೆಸೆಜಿ ಹಂತಾರ್ ಪ್ರತಿಭಟನ್ ಮಾಂಡುನ್ ಹಾಡ್ಚ್ಯಾ ವಿಷ್ಯಾಂತ್ ವಿಚಾರ್ – ವಿನಿಮಯ್ ಚಲಂವ್ಕ್ ಬಿಸ್ಪ್ ಬಾಜಿಲ್ ಸಾಲ್ವದೊರ್ ಸೊಜಾನ್ ಸಭಾ ಆಪಯ್ಲಿ. ಸಭೆರ್ ಉಲಯಿಲ್ಲ್ಯಾ ಧಾರ್ಮಿಕ್ ಆನಿ ಲಾಯಿಕ್ ವ್ಹಡ್ ವ್ಹಡ್ ಮುಕೆಲ್ಯಾಂನಿ ಆಪಾಪ್ಲಿ ಅಭಿಪ್ರಾಯ್ ದಿಲಿ. ತಾಂಚಾ ಅಭಿಪ್ರಾಯೆರ್ ಹೊಂದ್ವೊನ್ ಮಂಗ್ಳುರ್ ದಿಯೆಸೆಜಿ ಮಟ್ಟಾಚೆಂ ಪ್ರತಿಭಟನ್ ಡೊನ್ ಬೊಸ್ಕೊ ಹೊಲಾಂತ್ ಚಲಂವ್ಚೆಂ ಮ್ಹಣ್ತಾನಾ ಮಾತ್ರ್ ಜಮಾತೆಂತ್ ಆಸ್ಲೆಲ್ಯಾ ಓಸ್ಟಿನಾಕ್ ತಡ್ವಾಲೆಂ ನಾ. ಬಸ್‌ಲ್ಲ್ಯಾ ಕಡ್ಚೊ ಉಟ್ಲೊ ಆನಿ ವೇದಿಕ್ ಗೆಲೊ. ಡೊನ್ ಬೊಸ್ಕೊ ಹೊಲಾಂತ್ ಚಲಂವ್ಕ್ ಯೆವ್ಜಿಲ್ಲ್ಯಾ ಪ್ರತಿಭಟನಾಚೊ ಖಡಾಖಡ್ ವಿರೋಧ್ ಕೆಲೊ ಆನಿ ನೆಹರೂ ಮಯ್ದಾನಾರ್ ಚಲವ್ಯಾಂ ಮ್ಹಣಾಲೊ. ‘ಕೊಣೆಂ ಜವಾಬ್ದಾರಿ ಘೆಂವ್ಚಿ?’ ಸವಾಲ್ ಆಯ್ಲೆಂ. ಆಪುಣ್ ಘೆತಾಂ ಮ್ಹಳ್ಳ್ಯಾ ಓಸ್ಟಿನಾನ್ ಆಪ್ಲೊ ಮಿತ್ರ್ ಆನಿ ಸಿವೈಎಂ ಕೇಂದ್ರಿಕ್ ಸಮಿತಿ ಉಪಾಧ್ಯಕ್ಷ್ ಓಸ್ಟಿನ್ ಡಿಕುನ್ಹಾ ಆನಿ ಹೆರ್ ಯುವಜಣಾಂಚಾ ಮಿನತೆನ್ ದೀಸ್ – ರಾತ್ ಮ್ಹಳ್ಳ್ಯಾಬರಿ ವಾವ್ರುನ್ 1979 ಎಪ್ರಿಲ್ 1 ತಾರಿಕೆರ್ ನೆಹರೂ ಮಯ್ದಾನಾರ್ ಚಲ್‌ಲ್ಲ್ಯಾ ಪ್ರತಿಭಟನ್ ಸಭೆಕ್ ಲೊಕಾಕ್ ಜಮಯ್ಲೆಂ. ಬರೋಬ್ಬರಿ ಸಾಟ್ ಹಜಾರಾಂ ತಿತ್ಲೊ ಲೋಕ್ ಜಮ್‌ಲ್ಲೊ ತೊ ದಾಖ್ಲೊ. ಹಿ ಓಸ್ಟಿನಾಚಿ ಶ್ಯಾತಿ ಚರಿತ್ರೆಂತ್ ದಾಖಲ್ ಜಾಲ್ಯಾ. ಹ್ಯಾಚ್ ಸಭೆರ್ ಓಸ್ಟಿನಾನ್ ಅದ್ಭುತ್ ಭಾಷಣ್ ಕೆಲ್ಲೆಂ.

ತ್ಯಾಗಿ ಮಸೂದೆ ಉಪ್ರಾಂತ್ 1979 ಎಪ್ರಿಲಾಂತ್ ಉಡುಪಿಂತ್ ಸುರ್ವಾತ್ ಜಾಲ್ಲ್ಯಾ ಕಥೊಲಿಕ್ ಸಭೆಚಾ ಆರಂಭಾಂತ್ ಓಸ್ಟಿನಾಚೊ ವಾವ್ರ್ ಆಸ್ಲೊ. ತಾಕಾ ಓಸ್ಕರ್ ಫೆರ್ನಾಂಡಿಸ್ ಅಧ್ಯಕ್ಷತೆಚಾ ಪಯ್ಲ್ಯಾ ಕೇಂದ್ರಿಕ್ ಸಮಿತೆಚೊ ಉಪಾಧ್ಯಕ್ಷ್ ನೆಮ್‌ಲ್ಲೊ.

1980 ಅಕ್ಟೋಬರ್ 25 ವೆರ್, ಓಸ್ಟಿನ್ ಅಮೆರಿಕನ್ ನಾಗರಿಕ್ಪಣ್ ಆಸ್‌ಲ್ಲ್ಯಾ ಮುಂಬಯ್ಚ್ಯಾ (ಮಂಗ್ಳುರಿ ಮೂಳ್) ಟ್ರೀಜಾ ಪಿಂಟೊಲಾಗಿಂ ಲಗ್ನಾಂತ್ ಎಕ್ವಟ್ಲೊ. ಫಕತ್ ಆಟ್ – ಧಾ ದಿಸಾಂಚಿ ವ್ಹಳಕ್ ತಾಂಚಿ. ಸತ್ರಾ ವರ್ಸಾಂ ಪ್ರಾಯೆರ್ ಟ್ರೀಜಾನ್ ಬೊಂಬಯ್ ಥಾವ್ನ್ ಅಮೆರಿಕಾಕ್ ವಚೊನ್ ಅಮೆರಿಕನ್ ನಾಗರೀಕತ್ವ್ ಆಪ್ಣಾಯಿಲ್ಲೆಂ. 1981 ಸಪ್ಟೆಂಬರಾಂತ್ ಓಸ್ಟಿನ್ ಅಮೆರಿಕಾಕ್ ಉಬ್ಲೊ.

ಓಸ್ಟಿನ್ – ಟ್ರೀಜಾಚಾ ಲಗ್ನಾಕ್ ಆತಾಂ ಸಾಡೆಚಾರ್ ದಶಕಾಂ ಜಾತಾತ್. ಅನಿತಾ, ಅನಿಲ್, ಅಟಿನಾ ಆನಿ ಆಂಜೆಲ್ ತಾಂಚಿಂ ಭುರ‍್ಗಿಂ. ವ್ಹಡ್ ವ್ಹಡ್ ಕಂಪೆನಿಂನಿ ತಿಂ ವಾವ್ರಾರ್ ಆಸಾತ್. ಚವ್ಗಾಂಯೀ ತಾಂಚಾ ತಾಂಚಾ ಪಸಂದೆಚಾ ಜಿಣಿಯೆ ಸಾಂಗಾತ್ಯಾಕ್ ವಿಂಚುನ್ ಲಗ್ನಾಂತ್ ಎಕ್ವಟ್ಲ್ಯಾಂತ್. ಎದೊಳ್‌ಚ್ ಚೊವ್ಗಾಂ ನಾತ್ರಾಂ ಆಸ್ಚಿಂ ಓಸ್ಟಿನ್ – ಟ್ರೀಜಾ ವೆಗಿಂಚ್ ಧುವೆಚೆಂ ಏಕ್ ಬಾಳ್ ಸಂಸಾರ್ ದೆಕ್ತಾನಾ ಪಾಂಚ್ ನಾತ್ರಾಂಚಿಂ ಮೊಗಾಳ್ ಆಬ್ – ವ್ಹಡ್ಲಿಮಾಂಯ್ ಜಾತಾತ್.

ಅಮೆರಿಕಾಂತ್ ಆಸ್ಲ್ಯಾರೀ ಓಸ್ಟಿನ್ ಆದ್ಲ್ಯಾಬರಿಚ್ ಉರ‍್ಲಾ. ತೊಚ್ ಕೊಂಕ್ಣಿ ಮೋಗ್. ತಿಚ್ ಲಯನ್ಸ್ ಸೆವಾ. ಕಷ್ಟಾಂತ್ ಆಸ್‌ಲ್ಲ್ಯಾಂಕ್ ತೊಚ್ ಕುಮ್ಕೆ ಹಾತ್. ಗಾಂವಾಂತ್ ಥಾವ್ನ್ ಓಸ್ಟಿನಾಕ್ ಸಂಘ್ – ಸಂಸ್ಥ್ಯಾಂಚ್ಯೊಂ ಆನಿ ವೈಯಕ್ತಿಕ್ ಜಾವ್ನ್ ತಾಂತುಂಯೀ ಕೊಂಕ್ಣಿ ಬರಯ್ಣಾರ್, ಸಾಹಿತಿ, ಕಲಾಕಾರ್, ಲಯನ್ಸ್ ಕ್ಲಬ್ಬಾಂ, ಶಿಕ್ಪಾ ಸಂಸ್ಥೆ ಆನಿ ಹೆರಾಂಚ್ಯೊ ಮನವ್ಯೊ ಗೆಲ್ಲ್ಯೊ ಶೆಂಬರಾಂನಿ ಆಸ್ತಿತ್. ತಾಣೆ ತೆಂ – ಹೆಂ ಪಳಯ್ನಾಸ್ತಾಂ ಹಾತ್ ಉಕಲ್ಲೆಲೊ ಕೊರೊಡೊಂ ರುಪ್ಯಾಂಚೊ ಜಾಯ್ತ್ ಕೊಣ್ಣಾ. ಹ್ಯಾ ತಾಚ್ಯಾ ಬೊರ‍್ಯಾ ಮನಾಕ್ ಟ್ರೀಜಾ ಬಾಯೆಚೊ ಸಹಕಾರ್ ನಾತ್‌ಲ್ಲೊ ತರ್ ಓಸ್ಟಿನಾಕ್ ಹೆಂ ಸಾಧ್ಯ್ ಜಾತೆಂನಾ ಮ್ಹಳ್ಳೆಂಯೀ ಸತ್. ಜಿಣ್ಯೆಂತ್ ಜಾಯ್ತಿಂ ಪಂಥಾಹ್ವಾನಾಂ ತಿಣೆ ಫುಡ್ ಕೆಲ್ಯಾಂತ್. ಘರ‍್ಚಿ, ಪತಿಚಿ ಆನಿ ಭುರ‍್ಗ್ಯಾಂಚಿ ಜವಾಬ್ದಾರಿ ತಿಣೆ ಬೊರ‍್ಯಾನ್ ಸಾಂಭಾಳ್ಳ್ಯಾ. ಲಯನ್ಸ್ ಚಳ್ವಳೆಂತ್ ಟ್ರೀಜಾ ಬಾಯೆಚೊ ಸಕ್ರೀಯ್ ಪಾತ್ರ್. ಎಕಾ ಆವ್ದೆಕ್ ತಿ ಲಯನ್ಸ್ 1ಎ ಜಿಲ್ಲ್ಯಾಚಿ ಗವರ್ನರ್ ಆಸ್ಲಿ.

ಓಸ್ಟಿನಾಕ್ ಉಜ್ವ್ಯಾ ಹಾತಾನ್ ದಿಲ್ಲೆಂ ಖುದ್ ದಾವ್ಯಾ ಹಾತಾಕ್ ಕಳ್‌ಲ್ಲೆಂ ನಾ. ನಿವೃತ್ ಜಾತಾನಾ ಜೋಡ್ ಉಣಿ ಜಾಂವ್ಚಿ ಸ್ವಾಭಾವಿಕ್. ತ್ಯಾ ಉಪ್ರಾಂತೀ ದುಡ್ವಾಕ್ ತಾಂಚ್ಯೊ – ಹಾಂಚ್ಯೊ ಮನವ್ಯೊ ವಚೊನ್ಂಚ್ ಆಸ್‌ಲ್ಲ್ಯಾ ವೆಳಾರ್ – ಡೊಲರಾಂಚೊ ರೂಕ್ ಸುಕ್ಲಾ ಮ್ಹಣ್ ಓಸ್ಟಿನಾನ್ ಎಕೆಕಡೆ ಮಾರ್ಮಿಕ್ ಜಾವ್ನ್ ಬರಯಿಲ್ಲೆಂ.

ಓಸ್ಟಿನಾನ್ ವಾವ್ರಾ ಸಾಂಗಾತಾ ಉಂಚ್ಲೆಂ ಶಿಕಪ್ ಜೊಡ್ಲಾಂ. ತೊ ಎಂಬಿಎ, ಪಿಎಚ್.ಡಿ. – ಡೊಕ್ಟರೆಟ್ ಸನದೆವಂತ್. ಸಿಕ್ಸ್ತ್ ಸಿಗ್ಮಾ ಆನಿ ವನ್ ಪೀಸ್ ಪ್ರೊಡಕ್ಷನ್, ಲೀನ್ ಮ್ಯಾನೆಜ್‌ಮೆಂಟ್ ವಿಷಯಾಂಚೆರ್ ಪರಿಣತ್. ಕಂಪ್ಯೂಟರಾಂತ್ ಉಂಚ್ಲೊ ಶಿಕ್ಪಿ.

ಚಿಕಾಗೊ ಫೊರೆಸ್ಟ್ ಪಾರ್ಕ್ ಸೈಂಟ್ ಬರ್ನಾಡಿನ್ ಫಿರ್ಗಜ್ ಸಲಹಾ ಮಂಡಳಿಚೊ ಸಾಂದೊ, ಚಿಕಾಗೊ ಆರ್ಚ್ ದಿಯೆಸೆಜಿಚ್ಯೆ ಮುಖೇಲ್ಪಣ್ ಸಮಿತೆಚೊ ಸಾಂದೊ, ತಾಂಚಾ ಮಾಗ್ಣ್ಯಾ ಸಮಿತೆಚೊ ಮುಖೆಲಿ, ಫೊರೆಸ್ಟ್ ಪಾರ್ಕ್ ಚೇಂಬರ್ ಆಫ್ ಕೊಮರ್ಸ್, ನೇಬರ್‌ಹುಡ್ ವೋಚ್, ಪೋಲಿಸ್ ಅಕಾಡೆಮಿ ಹಾಂತುಂ ಸಾಂದೆಪಣ್ ಆನಿ ಹೆರ್ ಜಾಯ್ತ್ಯಾ ಸಂಘ್ – ಸಂಸ್ಥ್ಯಾಂನಿ ಓಸ್ಟಿನಾಚೊ ವಾವ್ರ್ ಚಲ್ಲಾ. ಮ್ಯಾರಥಾನ್ ಆನಿ ಹೆರ್ ವಿವಿಧ್ ಚಟುವಟಿಕಾಂನಿ ತಾಣೆ ಭಾಗ್ ಘೆತ್ಲಾ.

ಇಂಡಿಯಾ ಕಥೊಲಿಕ್ ಅಸೋಸಿಯೇಶನ್ ಆಫ್ ಅಮೆರಿಕ ಹಾಚೊ ಅಧ್ಯಕ್ಷ್ ಆನಿ ಫೆಡರೇಶನ್ ಆಫ್ ಇಂಡಿಯನ್ ಅಸೋಸಿಯೇಶನ್ಸ್ – ಮಿಡ್ ಅಮೆರಿಕ ಹಾಚೊ ಕಾರ್ಯದರ್ಶಿ, ಫೆಡರೇಶನ್ ಆಫ್ ಇಂಡೋ – ಅಮೆರಿಕನ್ ಕ್ರಿಶ್ಚಿಯನ್ ಅಸೋಸಿಯೇಶನ್ಸ್ ಆಫ್ ನೊರ್ಥ್ ಅಮೆರಿಕ, ಡೈರೆಕ್ಟರ್ ಆಫ್ ನ್ಯೂ ರಿಪಬ್ಲಿಕ್ ಆಫ್ ಇಂಡಿಯಾ ಇಂಟರ್ ನ್ಯಾಷನಲ್, ಅಡ್ವೈಸರ್ ಆಫ್ ಇಂಟರ್ ನ್ಯಾಷನಲ್ ಬಯೋಗ್ರಫಿಕಲ್ ಸೆಂಟರ್, ಕ್ಯಾಂಬ್ರಿಡ್ಜ್, ಇಂಗ್ಲೆಂಡ್ ಆನಿ ಹೆರ್ ಸಂಘ್ – ಸಂಸ್ಥ್ಯಾಂನಿ ವಾವುರ‍್ಲಾ. ಬೊರೆ ನಾಗರಿಕ್, ಮುಖೆಲಿ ಆನಿ ಉದ್ಯಮಿ ಜಾಂವ್ಚ್ಯಾಕ್ ಇಸ್ಕೊಲಾಂನಿ – ಕೊಲೆಜಿಂನಿ ಓಸ್ಟಿನ್ ಕಾರ್ಯಕ್ರಮಾಂ ದಿತಾ. ಭಾರತಾಂತ್, ಅಮೆರಿಕಾಂತ್, ಇಂಗ್ಲೆಡಾಂತ್, ಅಯರ್‌ಲ್ಯಾಂಡಾಂತ್ ಆನಿ ಗಲ್ಫ್ ದೇಶಾಂನಿ ತಾಣೆ ಆಸಲಿಂಚ್ ಕಾರ್ಯಕ್ರಮಾಂ ಚಲವ್ನ್ ವೆಲ್ಯಾಂತ್.

ಓಸ್ಟಿನಾನ್ ಅಮೆರಿಕಾಂತ್ ಕಲಾ ಸಂಪತ್ ಕಲ್ಚರರ್ ಅಸೋಸಿಯೇಶನ್ ಸ್ಥಾಪನ್ ಕರ್ನ್ 2000 ಇಸ್ವೆಂತ್ ಕಲಾ ಸಂಪತ್ ಬೊಂದೆರಾಖಾಲ್ ಚಿಕಾಗೊಂತ್ ಕೊಂಕ್ಣಿ ಕಾರ್ಯಕ್ರಮಾಂ ಪ್ರದರ್ಶನ್ ಕೆಲ್ಯಾಂತ್. 2002 ಇಸ್ವೆಂತ್ ಚಿಕಾಗೊಂತ್ ಅಮೇರಿಕಾಚೊ ಮಂಗ್ಳುರ್ ಕೊಂಕ್ಣಿ ಕ್ರೀಸ್ತಾಂವ್ ಸಂಘ್ ಸ್ಥಾಪನ್ ಕರ್ನ್ ಕೊಂಕ್ಣಿ ಭಾಶೆಚೊ ಆನಿಂ ಸಂಸ್ಕೃತಿಚೊ ವಾಸ್ ಅಮೇರಿಕಾಂತ್‌ಯ್ ಪ್ರಸಾರ್ಲಾ.

ಓಸ್ಟಿನಾಚೆ ಹೆರ್‌ಯೀ ಜಾಯ್ತ್ಯೊ ಚಟುವಟಿಕೊ ಆಸಾತ್. ಲೇಖನ್ ಲಾಂಬ್ ಜಾತಾ ಮ್ಹಳ್ಳ್ಯಾಕ್ ತೆ ಹಾಂಗಾ ಕಳಂವ್ಕ್ ನಾಂತ್.

1979 -ಂತ್ ಪಡೀಲ್ ಲಯನ್ಸ್ ಕ್ಲಬ್ಬಾ ಮುಕಾಂತ್ರ್ ಓಸ್ಟಿನಾಚಾ ಲಯನ್ಸ್ ಸೆವೆಚಿ ಸುರ್ವಾತ್ ಜಾಲ್ಲಿ. ಚಿಕಾಗೊ ಗೆಲ್ಯಾ ಉಪ್ರಾಂತ್ ಚಿಕಾಗೊ ಡಮಯನ್ ಲಯನ್ಸ್ ಕ್ಲಬ್ಬಾಕ್ ಸೆರ್ವೊನ್ ಕ್ಲಬ್ಬಾಚೆ ಸರ್ವ್ ಜವಾಬ್ದಾರಿ ಸಾಂಭಾಳ್ಳ್ಯಾತ್. 1996-ಂತ್ ಬ್ರೊಡ್‌ವ್ಯೂವ್ ಕಲಾ ಸಂಪತ್ ಲಯನ್ಸ್ ಕ್ಲಬ್ ರಚುನ್ ತಾಚೊ ಚಾರ್ಟರ್ ಅಧ್ಯಕ್ಷ್ (2 ವರ್ಸಾಂಕ್) ಜಾಲ್ಲೊ. ಪರಿಸರ್ ಪಂಗ್ಡಾಚೊ ಅಧ್ಯಕ್ಷ್, ಝೋನ್ ಆನಿ ವಲಯ್ ಅಧ್ಯಕ್ಷ್, ಡಿಸ್ಟ್ರಿಕ್ಟ್ 1ಎ ಸಾಂದೊ, ವೈಸ್ ಗವರ್ನರ್ ಆನಿ 2004-ಂತ್ ಡಿಸ್ಟ್ರಿಕ್ಟ್ ಗವರ್ನರ್ ಜಾಲೊ. ಲಯನ್ಸ್ 1ಎ ಜಿಲ್ಲೊ ಅಂತಾರಾಷ್ಟ್ರೀಯ್ ಲಯನ್ಸ್ ಸಂಘಟನಾಚೊ ಆವಯ್ ಜಿಲ್ಲೊ ಜಾವ್ನಾಸಾ.

ಹ್ಯಾ ಜಿಲ್ಲ್ಯಾ ಥಾವ್ನ್ ಗವರ್ನರ್ ಜಾಲ್ಲೊ ಓಸ್ಟಿನ್ ಭಾರತೀಯ್ ಮುಳಾಚೊ ಪಯ್ಲೊ ಜಾಲಾ. 2013-ಂತ್ ಪರತ್ ಡಿಸ್ಟ್ರಿಕ್ಟ್ ಗವರ್ನರ್. ಓಸ್ಟಿನಾನ್ ಜಾಯ್ತಿಂ ಲಯನ್ಸ್ ಕ್ಲಬ್ಬಾಂ ಸ್ಥಾಪನ್ ಕೆಲ್ಯಾಂತ್. 2023-ಂತ್ ಓಸ್ಟಿನ್ ಲಯನ್ಸ್ ಅಂತಾರಾಷ್ಟ್ರೀಯ್ ನಿರ್ದೇಶಕ್ ಜಾಂವ್ಚ್ಯಾಕ್ ಅಮೆರಿಕಾಚೊ ಪ್ರತಿನಿಧಿ ಜಾಲಾ. ಫುಡ್ಲ್ಯಾ ವಿಂಚವ್ಣೆಚೆರ್ ಹೊಂದ್ವೊನ್ ಹುದ್ದೊ ತಾಕಾ ಲಾಭೊಂಕ್ ಪುರೊ.

ಅಮೆರಿಕಾಕ್ ಪಾವ್‌ಲ್ಲ್ಯಾ ಜಾಯ್ತ್ಯಾ ಭಾರತೀಯಾಂಕ್ ಆನಿ ಪ್ರತ್ಯೇಕ್ ಜಾವ್ನ್ ಮಂಗ್ಳುರಿ ಮುಳಾಚಾಂಕ್ ಓಸ್ಟಿನಾನ್ ಆಪ್ಲ್ಯಾ ಘರಾ ಆತಿಥ್ವ್ ದೀವ್ನ್ ಭಂವ್ಡಾಯಿಲ್ಲೆಂ ಆಸಾ. ಕಲಾಂಗಣಾಚಾ ಚಟುವಟಿಕಾಂಕ್ ಓಸ್ಟಿನಾನ್ ಪಾಟಿಂಬೊ ದಿಲಾ.

ಓಸ್ಟಿನ್ ಡಿಸೋಜಾ ಪ್ರಭುಚೆರ್ ವಿಶ್ವ ಕೊಂಕಣಿ ಕೇಂದ್ರಾಚಾ ಬಸ್ತಿ ವಾಮನ್ ಶೆಣೈ ಮಾಮಾಕ್ ಮಸ್ತ್ ಮೋಗ್ ಆನಿ ಗೌರವ್ ಆಸ್‌ಲ್ಲಿ ಹಾಂವೆಂ ಪಾರ‍್ಕಿಲ್ಲಿ ಗಜಾಲ್. ಹಾಕಾ ಕಾರಣ್ ಮಂಗ್ಳುರಾಂತ್ ಆಸ್ತಾನಾ ಕೊಂಕ್ಣಿ ಸಂಬಂಧಿ ಓಸ್ಟಿನಾಚೊ ವಾವ್ರ್ ಏಕ್ ಮುಕೆಲ್ ಕಾರಣ್ ತರ್ ಬಸ್ತಿ ಮಾಮಾನ್ಂಚ್ ಸಾಂಗ್‌ಲ್ಲ್ಯಾಬರಿ ಬಸ್ತಿ ಮಾಮ್ ವಿಶ್ವ ಕೊಂಕಣಿ ಸಮ್ಮೇಳನಾಚಾ ವಾವ್ರಾನ್ ಅಮೆರಿಕಾ ಗೆಲ್ಲ್ಯಾವೆಳಿಂ ಓಸ್ಟಿನಾನ್ ತಾಕಾ ದಿಲ್ಲೊ ಆದರಾತಿಥ್ವ್ ಆನಿ ತಾಚಾಸವೆಂ ಕೆಲ್ಲ್ಯೊ ಭಂವ್ಡ್ಯೊ. ಓಸ್ಟಿನ್ ಗಾಂವಾಂಕ್ ಆಯಿಲ್ಲ್ಯಾ ವೆಳಾರ್ ತಾಕಾ ಬಸ್ತಿ ಮಾಮಾಚೊ ಜೆವ್ಣಾ ಸತ್ಕಾರ್ ಆಸ್ತಲೊಚ್.

2018-ಂತ್ ಫೊರೆಸ್ಟ್ ಪಾರ್ಕ್ ಮೇಯರಾನ್ ಓಸ್ಟಿನಾನ್ ವಸ್ತಿ ಕರ್ಚಾ ವಠಾರಾಂತ್ಲ್ಯಾ ಎಕಾ ರಸ್ತ್ಯಾ ಭಾಗಾಕ್ ಡೊಕ್ಟರ್ ಆಸ್ಟಿನ್ ಪ್ರಭು ವೇ ನಾಂವಾನ್ ವೊಲಾಯಿಲ್ಲೆಂ ಆನಿ 2009 ವ್ಯಾ ಇಸ್ವೆಂತ್ ಅಮೆರಿಕಾಂತ್ಲ್ಯಾ ಕೊಂಕ್ಣಿ ವಾವ್ರಾ ಖಾತಿರ್ ಮಾಂಡ್ ಸೊಭಾಣ್ ಸಂಸ್ಥ್ಯಾ ಮುಕಾಂತ್ರ್ ಭಾರತಾಚಿ ತೆದ್ನಾಂಚಿ ರಾಷ್ಟ್ರಪತಿ ಪ್ರತಿಭಾ ಪಾಟೀಲಾನ್ ಕೆಲ್ಲೊ ಮಾನಾಚೊ ಸನ್ಮಾನ್, ವಿಶ್ವ ಕೊಂಕಣಿ ಕೇಂದ್ರಾಚಾ ಮಹಾನ್ ಕೊಂಕ್ಣಿ ಸಾಧಕಾಂಚ್ಯೊ ತಸ್ವಿರ‍್ಯೊ ಆಟಾಪ್ಚಾ ಹೊಲ್ ಆಫ್ ಫೇಮ್ ಹಾಂತುಂ ದವರ್‌ಲ್ಲಿ ತಸ್ವಿರ್, ಕಲಾಂಗಣಾಂತ್ ಓಸ್ಟಿನಾಚಾ ನಾಂವಾನ್ ವೊಲಾಯಿಲ್ಲೆಂ ಪುಸ್ತಕ್ ಭಂಡಾರ್ – ಹ್ಯೊ ಪ್ರಮುಕ್ ಜಾವ್ನಾಸಾತ್.

ಲಯನ್ಸ್ ಕ್ಲಬ್ಬಾಂ ಥಾವ್ನ್ ಆರಂಭ್ ಕರ‍್ನ್ ಲಯನ್ಸ್ ಡಿಸ್ಟ್ರಿಕ್ಟ್, ಮಲ್ಟಿಪಲ್ ಡಿಸ್ಟ್ರಿಕ್ಟ್ ಆನಿ ಸಗ್ಳ್ಯಾ ಸಂಸಾರಾಚಾ ಹಂತಾರ್ ಜಾಯ್ತೆ ಪ್ರಶಸ್ತ್ಯೊ ಜೊಡ್ಲ್ಯಾತ್.

ಥೊಡ್ಯೊ ಪ್ರಶಸ್ತೊ ಹ್ಯೊ: ‘ಲಯನ್ಸ್ ಇಂಟರ್‌ನ್ಯಾಷನಲ್’ ಥಾವ್ನ್ ತೀನ್ ಪ್ರೆಸಿಡೆನ್ಸಿಯಲ್ ಮೆಡಲ್ಸ್ ಆನಿ ತೀನ್ ಲೀಡರ್‌ಶಿಪ್ ಮೆಡಲ್ಸ್, ‘ಮೆಲ್ವಿನ್ ಜೊನ್ಸ್ ಫೆಲೊ’ 1988-ಂತ್ ಪಯ್ಲಿ ತರ್ 2025 ಮೇ ಮಹಿನ್ಯಾಂತ್ 81-ವಿ. ತೀನ್ ಕ್ಲಬ್ಬಾಂ ಥಾವ್ನ್ ‘ಲಯನ್ ಆಫ್ ದಿ ಇಯರ್’, ಡಿಸ್ಟ್ರಿಕ್ಟ್ 1ಎ ಥಾವ್ನ್ ‘ಡಿಸ್ಟ್ರಿಕ್ಟ್ ಲಯನ್ ಆಫ್ ದಿ ಇಯರ್’ ಆನಿ ‘ಡಿಸ್ಟ್ರಿಕ್ಟ್ 1ಎ ಸಿಟಿಜನ್ ಆಫ್ ದಿ ಇಯರ್’, ‘ಲಯನ್ ಆಫ್ ಇಲಿನೊಯ್ಸ್ ಫೌಂಡೇಶನ್’ ಹಾಚೊ ಧಾವೊ ಫೆಲೊ ಕಾರ್ಯದರ್ಶಿ, 19 ಅಂತಾರಾಷ್ಟ್ರೀಯ್ ಅಧ್ಯಕ್ಷಾಂ ಥಾವ್ನ್ ಪ್ರಶಂಸಾ ಪತ್ರಾಂ, ಏಷ್ಯಾ ಟಿವಿ ಥಾವ್ನ್ ‘ಬೆಸ್ಟ್ ಫೆಮಿಲಿ ಆಫ್ ದಿ ಇಯರ್’, ‘ಬೆಸ್ಟ್ ಕಪಲ್ ಆಫ್ ದಿ ಇಯರ್’, ಕೊಂಗ್ರೆಸ್ ಮ್ಯಾಂಡೆವಿಸ್ ಥಾವ್ನ್ ‘ಬೆಸ್ಟ್ ಹ್ಯುಮಾನಿಟೇರಿಯನ್ ಕಪಲ್’ ಚಿಕಾಗೊಚಿ ‘ಮಿಲ್ಲೇನಿಯಮ್ ಲೀಡರ್‌ಶಿಪ್’, ಏಶಿಯನ್ – ಅಮೆರಿಕನ್ ಹಾಲ್ ಆಫ್ ಫೇಮ್’, ಫೆಡರೇಶನ್ ಆಫ್ ಇಂಡಿಯನ್ ಅಸೋಸಿಯೇಶನ್ಸ್ ಥಾವ್ನ್ ‘ಮಿಲೇನಿಯಮ್ ಲೀಡರ್‌ಶಿಪ್ ಅವಾರ್ಡ್’ ಪ್ರಶಸ್ತ್ಯೊ ಆಟಾಪ್ಲ್ಯಾತ್.

ಕೊಂಕ್ಣೆಕ್ ಸಂಬಂಧಿತ್ ಗಾಂವ್ಚ್ಯಾ ಸಂಘ್ – ಸಂಸ್ಥ್ಯಾಂ ಥಾವ್ನ್ ಥರಾವಳ್ ಮಾನ್ – ಸನ್ಮಾನ್ ಆಪ್ಣಾಯ್ಲ್ಯಾತ್. ಹಾಂತ್ಲೆಂ ಪ್ರಮುಕ್ ಜಾವ್ನ್ – ಮೈಸೂರ‍್ಚ್ಯಾ ಕೊಂಕ್ಣಿ ಸಂಘಾನ್ ‘ಕೊಂಕ್ಣೆಚೊ ಪೂತ್’, ಕುವೈಟ್ ವೆಲ್ಫೇರ್ ಅಸೋಸಿಯೇಶನಾನ್ ‘ಕೊಂಕಣಿ ಕರಾವಳಿ ವೀರ್’, ಸಾಂ ಲುವಿಸ್ ಕೊಲೆಜಿನ್ ‘ಶತಮಾನಾಚೊ ಕೊಂಕ್ಣಿ ಸಾಧಕ್’ ಆಶಾವಾದಿ ಪ್ರಕಾಶನಾನ್ ‘ಅಂತಾರಾಷ್ಟ್ರೀಯ್ ಮ್ಹಾ-ಮನಿಸ್’ ಆಸಲೆ ಬಿರುದ್ ಲಾಭ್ಲ್ಯಾತ್. ಹ್ಯಾ ಶಿವಾಯ್, ದೆ. ವಿಕ್ಟರ್ ರೊಡ್ರಿಗಸ್ ಸ್ಮಾರಕ್ ಕೊಂಕ್ಣಿ ಸಾಹಿತಿ ಪ್ರಶಸ್ತಿ, ದಾಯ್ಜಿ ದುಬಾಯ್ ಸಂಘಟನಾನ್, ಸರಿಗಮ ಟ್ರಸ್ಟಾನ್, ಪೊಯೆಟಿಕಾ ಪಂಗ್ಡಾನ್ ಮಾನ್‌ಪತ್ರಾಂಸವೆಂ ಗೌರವ್ ದಿಲಾ. ಅಮೆರಿಕಾಂತ್ ಆನಿ ಗಾಂವಾಂತ್ ತಾಕಾ ಹೆರ್‌ಯೀ ಜಾಯ್ತ್ಯೊ ಪ್ರಶಸ್ತ್ಯೊ, ಮಾನ್ – ಸನ್ಮಾನ್ ಸೊಧುನ್ ಆಯ್ಲ್ಯಾತ್.

ಓಸ್ಟಿನ್ ಕೆನಡಾ, ಅಸ್ಟ್ರೇಲಿಯಾ, ಇಂಗ್ಲೆಂಡ್ ಆನಿ ಯೆರೊಪಾಚೆ ಹೆರ್ ದೇಶ್, ಏಷ್ಯಾ – ಆಫ್ರಿಕಾಚಾ ಆನಿ ಸಂಸಾರಾಚ್ಯಾ ಜಾಯ್ತ್ಯಾ ದೇಶಾಂಕ್ ಪಾವ್ಲಾ. ಭಾರತೀಯ್ ಆನಿ ಮಂಗ್ಳುರ್‌ಗಾರ್ ಮುಕೆಲ್ಯಾಂಕ್, ಬರವ್ಪ್ಯಾಂಕ್, ಸಂಘ್ – ಸಂಸ್ಥ್ಯಾಂಕ್ ಭೆಟ್ಲಾ. ತಾಂಚೊ ಮಾನ್ – ಸನ್ಮಾನ್ ಸ್ವೀಕಾರ್ ಕೆಲಾ.

ಆಸ್ಟಿನಾನ್ 8 ನಾಟಕ್, 35 ನಾಟ್ಕುಳೆ ಆನಿ 10 ಕೊಂಕ್ಣಿ ಆನಿ 2 ತುಳು ರೇಡಿಯೊ ನಾಟಕ್ ಬರವ್ನ್ ವಿತ್ರಾಯ್ಲ್ಯಾತ್. ತಾಚೊ ಏಕ್ ನಾಟಕ್ ‘ಸೊಮಿಯಾಂ ಕಾಕುಳ್ತ್ ಕರ್’ ಕೊವ್ಳೆ ರುಪಾರ್ ಪರ್ಗಟ್ ಜಾಲಾ. ಪತ್ರಾಂನಿ ಆನಿ ಅಂತರ್‌ಜಾಳಿಂನಿ ತಾಣೆ ಸಭಾರ್ ಲೇಖನಾಂ ಬರಯ್ಲ್ಯಾಂತ್ ಆನಿ ಶೆಂಬೊರಾಂ ವಯ್ರ್ ತಾಚಿಂ ಕೊಂಕ್ಣಿ ಕವಿತಾ ಪ್ರಕಟ್ ಜಾಲ್ಯಾತ್.

 

1978 ವ್ಯಾ ವರ್ಸಾ ಪ್ರಗಟ್ ಜಾಲ್ಲೆಂ ಓಸ್ಟಿನಾಚೆಂ ‘ಆದರ್ಶ್ ಯುವಜಣ್’ ಪುಸ್ತಕ್ ಜಾಯ್ತ್ಯಾ ಹೊಗ್ಳಾಪಾಕ್ ಪಾತ್ರ್ ಜಾಲ್ಲೆಂ. ಹಾಕಾ ಗೊಂಯ್ಚ್ಯಾ ಕೊಂಕ್ಣಿ ಭಾಶಾ ಮಂಡಳಾ ಥಾವ್ನ್ ಪ್ರಶಸ್ತಿ ಮೆಳ್ಳ್ಯಾ. ಓಸ್ಟಿನಾಚಾ ‘ಆಂಕ್ವಾರ್ ಸೆಲ್ಲಿ’ ಏಕಾಂಕ್ ನಾಟಕಾಕ್ 1977 ಇಸ್ವೆಂತ್ ಗೊಂಯ್ಚ್ಯಾ ಕೊಂಕ್ಣಿ ಭಾಶಾ ಮಂಡಳಾನ್ ಚಲಯಿಲ್ಲ್ಯಾ ನಾಟಕ್ ಸ್ಪರ್ಧ್ಯಾಂತ್ ದುಸ್ರೆಂ ಬಹುಮಾನ್ ಲಾಭ್ಲಾಂ. ಓಸ್ಟಿನಾಚಿಂ ಸಭಾರ್ ಕವನಾಂ ಕವಿತಾ ಸಂಗ್ರಹ್ ಪುಸ್ತಕಾಂನಿ ಪ್ರಕಟ್ ಜಾಲ್ಯಾಂತ್. 2007 ಇಸ್ವೆಂತ್ ತಾಚೆಂ ಕವಿತಾ ಸಂಗ್ರಹ್ ಪುಸ್ತಕ್ “ಆಡೊಸಾಂತ್ಲಿಂ ಫುಲಾಂ” ಆನಿ 2008-ಂತ್ ತಾಚೆಂ ಲ್ಹಾನ್ ಕಾವ್ಯಾಂಚೆಂ ಪುಸ್ತಕ್ “ಮೊತಿಯಾಂ” ಪ್ರಕಟ್ ಜಾಲಾಂ. 2009 ವ್ಯಾ ವರ್ಸಾಂತ್ ಓಸ್ಟಿನಾಚೆಂ 3,500+  ಚುಟ್ಕುಲ್ಯಾಂಚೆಂ ಪುಸ್ತಕ್ “ವಜ್ರಾಂ” ಆಮ್ಚ್ಯಾ ‘ಮರಿಯಾಡ್ಸ್ ಪ್ರಕಾಶನಾ’ಖಾಲ್ ಕನ್ನಡ ಲಿಪಿಂತ್ ಉಜ್ವಾಡ್‌ಲ್ಲೆಂ. ತ್ಯಾಚ್ ವೆಳಾರ್, ಮುಂಬಯ್-ಗೊಂಯಾಂ ಥಾವ್ನ್ ದೇವ್‌ನಾಗರಿ ಲಿಪಿಂತ್ ಪ್ರಗಟ್ ಜಾಲಾಂ. ಸಭಾರ್ ಕವನಾಂ ಕನ್ನಡ ಆನಿ ತುಳು ಭಾಶೆಂನಿಂಯ್ ಪ್ರಗಟ್ ಜಾಲ್ಯಾಂತ್. ಸಾಡೆ ಚಾರ್ ದಶಕಾಂ ಥಾವ್ನ್ ಓಸ್ಟಿನ್ ಅಮೇರಿಕಾಂತ್ಲ್ಯಾ ಚಿಕಾಗೊಂತ್ ಕುಟ್ಮಾ ಬರಾಬರ್ ಜಿಯೆವ್ನ್ ಆಸಾ ಜಾಲ್ಯಾರೀ ತಾಚಿ ಕೊಂಕ್ಣಿ ಭಾಸ್ ಆಜೂನ್ ಆಪುಟ್ಟ್ ಉರ್ಲ್ಯಾ ಮಾತ್ರ್ ನಂಯ್ ತಾಚಿ ಬರಂವ್ಚಿ ವಿದ್ಯಾಯ್ ಭಾರಿಚ್ ಚುರುಕ್ ಜಾಲ್ಯಾ.

ಅಮೆರಿಕಾಕ್ ಗೆಲ್ಯಾ ಉಪ್ರಾಂತ್ ಓಸ್ಟಿನಾನ್, ತಾಚಾ ವಾವ್ರಾ ಸಂಸ್ಥ್ಯಾಂಚಿ, ಲಯನ್ಸಾಚಿಂ ಬುಲೆಟಿನಾಂ – ಮುಖ್‌ಪತ್ರಾಂ ಸಂಪಾದನ್ ಕೆಲ್ಯಾಂತ್. ಹ್ಯಾ ಶಿವಾಯ್ ರಾಕ್ಣೊ ಆನಿ ಹೆರ್ ಪತ್ರಾಂಕ್ ತಶೆಂ ಜಾಯ್ತ್ಯಾ ಇ-ಪತ್ರಾಂಕ್ ಬರ‍್ಪಾಂ ದಿತೆಚ್ ಆಯಿಲ್ಲೊ. 2018 ಜನೆರಾ ಥಾವ್ನ್ ತಾಣೆ ವೀಜ್ ಕೊಂಕಣಿ ನಾಂವಾರ್ ಕನ್ನಡ ಲಿಪಿಂತ್ ಇ-ಪತ್ರಾಚಿ ಸುರ್ವಾತ್ ಕೆಲಿ. ಓಸ್ಟಿನ್ ಚಿಕಾಗೊಂತ್ ಆಸೊಂ, ಮಂಗ್ಳುರಾಂತ್ ವಾ ಸಂಸಾರಾಚ್ಯಾ ಖಂಯ್ಚ್ಯಾಯೀ ಮುಲ್ಯಾಂತ್ ಆಸೊಂ, ವೀಜ್ ಕೊಂಕಣಿ ಹಫ್ತ್ಯಾವಾರ್ ಪ್ರಗಟ್ ಜಾತೆಚ್ ಗೆಲಾಂ. 2019 ನವೆಂಬರ್ 24 ವೆರ್ ಮಂಗ್ಳುರ‍್ಚ್ಯಾ ಸೈಂಟ್ ಆಗ್ನೆಸ್ ಕೊಲೆಜಿಚಾ ವಠಾರಾಂತ್ ವೀಜ್ ಕೊಂಕಣಿ 101 ವ್ಯಾ ಅಂಕ್ಯಾಚೊ ದಬಾಜಿಕ್ ಉತ್ಸವ್ ಚಲ್‌ಲ್ಲೊ.

ಮಹತ್ವಾಚಿ ಘಡಿತಾಂ ಘಡ್‌ಲ್ಲ್ಯಾ ವೆಳಾರ್ ದಿಸಾಳ್ಯಾ ಪತ್ರಾಚಾ ವೇಗಾನ್ ವಿಶೇಷ್ ಅಂಕೆಯೀ ಉಜ್ವಾಡ್ಲ್ಯಾತ್. ರೆಗ್ಯುಲರ್ ಆನಿ ವಿಶೇಷ್ ಓಸ್ಟಿನಾಚಾ ಜಲ್ಮಾ ವಜ್ರೋತ್ಸವಾ ಪರ್ಯಾಂತ್ ಒಟ್ಟುಕ್ 413 ಅಂಕೆ ಉಜ್ವಾಡ್ಲ್ಯಾತ್. ಮಧೆಗಾತ್ ದೇವ್‌ನಾಗರಿ, ರೋಮಿ ಆನಿ ಮಲಯಾಳಂ ಲಿಪಿನ್ ಅಂಕೆ ಪ್ರಗಟ್ ಕೆಲೆ. ಪೂಣ್ ತ್ಯಾ ಲಿಪಿಂತ್ಲ್ಯಾಂತ್ಲ್ಯೊ ಪ್ರೋತ್ಸಾಹ್ ನಾತ್‌ಲ್ಲ್ಯಾನ್ ಆತಾಂ ಫಕತ್ ಕನ್ನಡ ಲಿಪಿಂತ್ ಪ್ರಗಟ್ತಾ.

ಜಾಯ್ತಿಂ ಬರ‍್ಪಾಂ ಇಂಗ್ಲಿಷಾಂತ್ ಯೆಂವ್ಕ್ ಲಾಗ್‌ಲ್ಲಿಂ. ಸುರ್ವೆರ್ ತಿಂ ಓಸ್ಟಿನಾನ್ ಭಾಷಾಂತರ್ ಕರ್ನ್ ಪ್ರಗಟ್ಲಿಂ. ಇಂಗ್ಲಿಷ್ ಬರ‍್ಪಾಂ ಚಡೊನ್ ಯೆತಾನಾ ವೀಜ್ ಕೊಂಕಣಿ ಪತ್ರಾಂತ್ ಛಾಪ್ಲಿಂ. ಇಂಗ್ಲಿಷ್ ಬರ‍್ಪಾಂ ಮಸ್ತ್ ಚಡ್ತಾನಾ ತ್ಯಾ ಖಾತಿರ್‌ಚ್ ‘ವೀಜ್ ಇಲ್ಲಸ್ಟ್ರೇಟೆಡ್ ವೀಕ್ಲಿ’  ವಿಂಗಡ್ ವಿಭಾಗ್ ಛಾಪುನ್ ಆಸಾ.

1979 – 80 ವ್ಯಾ ವರ್ಸಾಕ್ ಸಿವೈಎಂ ಕೇಂದ್ರಿಕ್ ಸಮಿತೆಚಿ ಮಹಾಸಭಾ ಮಂಗ್ಳುರ್ ಮಿಲಾರ್ ಹೈಸ್ಕೂಲಾಚಾ ಕ್ಲಾಸ್ ರುಮಾಂತ್ 1979 ಜುಲೈ 8 ವೆರ್ ಚಲ್‌ಲ್ಲಿ. ಸಿವೈಎಂ ‘ಯುವಕ್’ ಹಾತ್ ಪತ್ರಾಚಾ ಸಂಪಾದಕ್ ಹುದ್ದ್ಯಾಚಾ ಅಭ್ಯರ್ಥಿಪಣಾಕ್ ತೆದೊಳ್‌ಚ್ ಪತ್ರಿಕೋದ್ಯಮಾಂತ್ ಹೆಳ್‌ಲ್ಲ್ಯಾ ಓಸ್ಟಿನಾಚಾ ಮುಕಾರ್ ಮ್ಹಜೆಂ ನಾಂವ್ ಸೂಚಿತ್ ಜಾಲ್ಲೆಂ.

ಮಂಗ್ಳುರ್ ಶ್ಹೆರಾಂತ್ಲೊ ಪ್ರತಿಭಾವಂತ್ ಯುವಜಣ್ ಓಸ್ಟಿನ್ ತೆದೊಳ್‌ಚ್ ಚಾರ್ ವರ್ಸಾಂ ಕೇಂದ್ರಿಕ್ ಅಧ್ಯಕ್ಷ್ ಜಾಲ್ಲೊ ಅನ್ಭೊಗಿ. ಯುವಕ್ ಪತ್ರ್‌ಯೀ ತಾಚಾಖಾಲ್ ಪ್ರಕಾಶಿತ್ ಜಾತಾಲೆಂ. ಕೊಂಕ್ಣಿ ಲೇಖಕ್ ಆನಿ ಎಕಾಚ್ ವೆಳಾರ್ ತೀನ್ ಪತ್ರಾಂ ಚಲಯಿಲ್ಲೊ ಕಾರ್ಭಾರಿ. ತ್ಯಾಚ್ ವೆಳಾ – ಪಾಂಗ್ಳಾ ಮ್ಹಳ್ಳ್ಯಾ ಹಳ್ಳೆಂತ್ ಜಲ್ಮೊನ್ ವಾಡ್‌ಲ್ಲ್ಲೊ ಹೆರಾಲ್ಡ್ ರೆಜಿನಾಲ್ಡ್ ಆಳ್ವ (ಹೊ ಲೇಖಕ್) ಓಸ್ಟಿನಾಕ್ ಪ್ರತಿಸ್ಫರ್ಧಿ. ಮುಲ್ಕಿ ಶಾಖ್ಯಾಚಾ ಸಾಂದ್ಯಾಂನಿ ಮ್ಹಾಕಾ ಯುವಕ್ ಸಂಪಾದಕ್ ಹುದ್ದ್ಯಾಕ್ ಸೂಚಿತ್ ಕರ್ನ್ ರಾವಯಿಲ್ಲೊ.

ಚುನಾವ್ ಕಣಾಂತ್ ಎಕಾ ಹುದ್ದ್ಯಾಕ್ ದೋಗ್ ಅಭ್ಯರ್ಥಿ. ಮತದಾನಾಚಿ ಗಜಾಲ್. ಮ್ಹಜೆಂ ನಾಂವ್ ಆಯಿಲ್ಲೆಂಚ್ ಓಸ್ಟಿನ್ ಉಬೊ ಜಾಲ್ಲೊ. ಮ್ಹಾಕಾ ನಾಕಾ, ತಾಕಾ ದಿವ್ಯಾಂ. ಚುನಾವ್ ಜಾಲ್ಲೊ ತರ್ ಓಸ್ಟಿನ್ ವ್ಹಡ್ ಬಹುಮತಾನ್ ಜಿಕ್ತೊ ತೆಂ ಖಂಡಿತ್. ಹಾಂವ್ ಸಲ್ವಾಲ್ಲೊಂ ತರ್ ಫುಡ್ಲ್ಯಾ ವರ್ಸಾಂನಿ ಪರತ್ ಚುನಾವಾಕ್ ರಾವ್ತೊಂ ಆನಿ ಜಿಕ್ತೊಂ ತೆಂ ಹಾಂವ್ ನೆಣಾ. ಎಚ್. ಆರ್. ಆಳ್ವ ನಾಂವಾನ್ ಸಿವೈಎಂ ಆನಿ ಮಂಗ್ಳುರಿ ಕೊಂಕ್ಣಿ ಸಮಾಜೆಂತ್ ಆಯ್ಚ್ಯಾಬರಿ ವ್ಹಳ್ಕಿಚೊ ಜಾತೊಂ ತೆಂಯೀ ಮ್ಹಜ್ಯಾನ್ ಸಾಂಗೊಂಕ್ ಜಾಯ್ನಾ. ಮಂಗ್ಳುರ್ ಮಿಲಾರ್ ಹೈಸ್ಕೂಲಾಂತ್ ಓಸ್ಟಿನಾನ್ ದಾಕಯಿಲ್ಲ್ಯಾ ಉದಾರ್ ಮನಾ ಉಪ್ರಾಂತ್ಲ್ಯಾ ವರ್ಸಾಂನಿ ಹಾಂವ್ ಕೇಂದ್ರಿಕ್ ಸಮಿತೆಚೊ ಜೆರಾಲ್ ಕಾರ್ಯದರ್ಶಿ, ಪಾಟಾಪಾಟ್ ತೀನ್ ವರ್ಸಾಂ ಅಧ್ಯಕ್ಷ್ ಜಾಲ್ಲೊಂ. ಸಗ್ಳ್ಯಾ ಸಂದರ್ಭಾಂನಿ ಚುನಾವ್ ಫುಡ್ ಕರ್ನ್ ಹರ್ಯೆಕ್ ಪಾವ್ಟಿಂ ಚಡ್‌ಲ್ಲೆ ಮತ್ ಆಪ್ಣಾವ್ನ್ ಹುದ್ದೆ ಘೆತ್‌ಲ್ಲೆ. ಓಸ್ಟಿನಾ ಉಪ್ರಾಂತ್ ಚಡಿತ್ ಆವ್ದೆಕ್ ಅಧ್ಯಕ್ಷ್ ಜಾಲ್ಲೊ ಮ್ಹಜೊಚ್ ದಾಖ್ಲೊ. ವರ್ಸಾಂತ್ ತೀನ್ ಪಾವ್ಟಿಂ ವ್ಹಡ್ ಕಾರ್ಯಿಂ ಆಸ್ತಾನಾ ಚಾರ್ – ಸ – ಆಟ್ ಪಾನಾಂನಿ ಛಾಪೊನ್ ಯೆಂವ್ಚ್ಯಾ ಯುವಕ್ ಹಾತ್ ಪತ್ರಾಕ್ ಮಹಿನ್ಯಾಳೊ – ‘ಆಮ್ಚೊ ಯುವಕ್’ ಕರ್ನ್ ತೀನ್ ವರ್ಸಾಂ ಸಂಪಾದಕ್ (ಮ್ಹಜೊ ಚುನಾವ್ ಸ್ಪರ್ಧ್ಯಾವಿಣೆ) ಆಸ್ಲೊಂ. ಮ್ಹಜ್ಯಾ ಉಪ್ರಾಂತ್ ಬಾವೀಸ್ – ಪಂಚ್ವೀಸ್ ವರ್ಸಾಂ ಛಾಪ್ಯಾ ಮಾರಿಫಾತ್ ವೀಸ್ – ತೀಸ್ – ಪನ್ನಾಸ್ ಪಾನಾಂನಿ ಸಜೊನ್ ಮಹಿನ್ಯಾವಾರ್ ಪ್ರಕಟ್ ಜಾಲ್ಲ್ಯಾ ಆಮ್ಚೊ ಯುವಕ್ ಮಹಿನ್ಯಾಳ್ಯಾನ್ ಜಾಯ್ತ್ಯಾ ನವ್ಯಾ ಬರವ್ಪ್ಯಾಂಕ್ ಉಜ್ವಾಡಾಕ್ ಹಾಡ್ಲೆಲೆಂ ಆಸಾ.

1979-ಂತ್ಲ್ಯಾ ಸಿವೈಎಂ ಜೆರಾಲ್ ಜಮಾತೆ ಉಪ್ರಾಂತ್ ಓಸ್ಟಿನ್ ಆನಿ ಮ್ಹಜ್ಯಾ ಮಧೆಂ ವ್ಹಳಕ್ ವಾಡ್ಲಿ ತರೀ ಚಡ್ ತೇಂಪ್ ತಾಚೆಂ ಮಾರ್ಗದರ್ಶನ್ ಘೆಂವ್ಚೊ ಆವ್ಕಾಸ್ ಚುಕ್ಲೊ. ಮಸ್ತ್ ಚಟುವಟಿಕಾಂನಿ ಭರ್ಸೊನ್ ಆಸ್‌ಲ್ಲೊ ಓಸ್ಟಿನ್ ತರಾತುರಿನ್ ಕಾಜಾರ್ ಜಾಲೊ ಆನಿ ಅಮೆರಿಕಾಕ್ ಗೆಲೊ. ಹಿ ಗಜಾಲ್ ತೆದ್ನಾಂ ಮ್ಹಾಕಾ ವಿಚಿತ್ರ್ ದಿಸ್‌ಲ್ಲಿ. ತಾಕಾ ಕಾರಣ್ ಜಾಲ್ಲಿಂ ಘಡಿತಾಂ ಉಪ್ರಾಂತ್ ಮ್ಹಾಕಾ ಓಸ್ಟಿನಾ ಥಾವ್ನ್ಂಚ್ ಕಳ್‌ಲ್ಲಿಂ. ಅಮೆರಿಕಾಕ್ ವೆಚಾ ಪಯ್ಲೆಂ ಆನಿ ಗೆಲ್ಯಾ ಉಪ್ರಾಂತ್ ಓಸ್ಟಿನಾ ಆನಿ ಮ್ಹಜ್ಯಾ ಮಧೆಂ ತಪ್ಪಾಲ್ ಪತ್ರಾಂ ಮುಕಾಂತ್ರ್ ಸಂಪರ್ಕ್ ಆಸ್‌ಲ್ಲೊ (ತಾಂತ್ಲಿಂ ಥೊಡಿಂ ಪತ್ರಾಂ ಆಜೂನ್ ಸಾಂಬಾಳ್ನ್ ದವರ‍್ಲ್ಯಾಂತ್. ಇ-ಮೈಲ್, ವಾಟ್ಸಪ್ ಆಯ್ಲ್ಯಾ ಉಪ್ರಾಂತ್ ತ್ಯಾ ಮುಕಾಂತ್ರ್ ಸಂಪರ್ಕ್ ಚಾಲು ಉರ‍್ಲಾ).

ಓಸ್ಟಿನಾಚಾ ಅಮೆರಿಕಾಂತ್ಲ್ಯಾ ಸುರ್ವಿಲ್ಯಾ ವರ್ಸಾಂನಿ ತೊ ಆಪ್ಲ್ಯಾ ವಾವ್ರಾಂತ್, ಶಿಕ್ಪಾಂತ್ ಆನಿ ಕುಟ್ಮಾ ಜವಾಬ್ದಾರೆನ್ ವ್ಯಸ್ತ್ ಆಸ್‌ಲ್ಲೊ ತೆಂ ನಖ್ಖಿ. ಸುರ್ವಿಲ್ಯಾ ಸುಮಾರ್ ಆಟ್ರಾ ವೀಸ್ ವರ್ಸಾಂನಿ ತೊ ಕುಟ್ಮಾ ಕಾರ್ಯಾಂಕ್ ಆನಿ ಹೆರ್ ವಾವ್ರಾಕ್ ಲಾಗೊನ್ ದೋನ್ – ತೀನ್ ಪಾವ್ಟಿಂ ಥೊಡ್ಯಾಚ್ ದಿಸಾಂಚಾ ರಜೆರ್ ಗಾಂವಾಂಕ್ ಯೇವ್ನ್ ಗೆಲ್ಲೊ.

1999 ದಸೆಂಬ್ರಾಂತ್ ಜಾಲ್ಲ್ಯಾ ವಿಲ್ಫಿ ರೆಬಿಂಬಸಾಚಾ 200 ವ್ಯಾ ನಾಯ್ಟ್ ಕಾರ್ಯಕ್ರಮಾಕ್ ಓಸ್ಟಿನ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಜಾಲ್ಲೊ. ವಿಲ್ಫಿ ನಾಯ್ಟಾಂತ್ ಪದ್ ಗಾಂವ್ಕ್ ತಾಕಾ ಆಸ್‌ಲ್ಲಿ ಲಾಂಬ್ ಕಾಳಾಚಿ ಆಶಾ ತಾಣೆ ವ್ಯಕ್ತ್ ಕೆಲ್ಲಿ. ಏಕ್ ಪದ್ ಗಾಯ್ಲೆಂ ಮ್ಹಳ್ಳೊಯೀ ಉಡಾಸ್. 1994 ಥಾವ್ನ್ ಮಂಗ್ಳುರ್ ಅಶೋಕನಗರ್ ಆಕಾಶವಾಣಿ ಕ್ವಾಟರ‍್ಸಾಂತ್ ಕುಟ್ಮಾಸವೆಂ ಮ್ಹಜಿ ವಸ್ತಿ ಆಸ್‌ಲ್ಲಿ. ಓಸ್ಟಿನಾನ್ ತಾಚಾ ಕುಟ್ಮಾಸವೆಂ ಆಮ್ಚಿ ಭೆಟ್ ಕೆಲ್ಲಿ. 2004 ಥಾವ್ನ್ ಆಮಿ ವಸ್ತೆಕ್ ಕರಂಗಲಪಾಡಿ ಪ್ರದೇಶಾಕ್ ಆಯ್ಲ್ಯಾಂವ್. ಗಾಂವಾಂಕ್ ಆಯ್ಲೆಲ್ಯಾ ಹರ್ಯೆಕ್ ಪಾವ್ಟಿಂ ಓಸ್ಟಿನ್ ಆಮ್ಚ್ಯಾ ವಸ್ತೆಕ್ ಸರಾಗ್ ಆಯ್ಲಾ.

2007 ಜನೆರ್ 12 ಥಾವ್ನ್ 14 ತಾರಿಕೆ ಪರ್ಯಾಂತ್ ಚಲ್ಲೆಲ್ಯಾ ಐಸಿವೈಎಂ (2000 ಇಸ್ವೆಂತ್ ಕಥೊಲಿಕ್ ಯೂಥ್ ಮೂವ್‌ಮೆಂಟಾಕ್ ‘ಇಂಡಿಯನ್’ ಕುಡ್ಸೊನ್ – ಐಸಿವೈಎಂ ಜಾಲ್ಲೆಂ) ವಜ್ರಾಳ್ಯಾ ಉತ್ಸವಾಂತ್ ಭಾಗಿದಾರ್ ಜಾಂವ್ಕ್ ಆಯ್ಲೆಲೊ. ತೆದ್ನಾಂ ಆಮಿ ಮಸ್ತ್ ಪಾವ್ಟಿಂ ಭೆಟ್‌ಲ್ಲ್ಯಾಂವ್. ಜನೆರ್ 12 ತಾರಿಕೆರ್ ನೆಹರೂ ಮಯ್ದಾನಾ ಥಾವ್ನ್ ಕಂಕನಾಡಿ ಮಯ್ದಾನಾ ಪರ್ಯಾಂತ್ ಚಲ್ಲೆಲ್ಯಾ ಮೋಟಾರ್ ಬೈಕ್ ರ‍್ಯಾಲಿಂತ್ ಮ್ಹಜ್ಯಾ ಬಾಯ್ಕಾರ್ ಆಮಿ ಸಾಂಗಾತಾ ಆಸ್‌ಲ್ಲ್ಯಾಂವ್. ತ್ಯಾ ಉಪ್ರಾಂತ್ ಓಸ್ಟಿನ್ ಕೊರೊನಾ ಯೆತಾಸರ್ ತೀನ್ ವರ್ಸಾಂ, ದೋನ್, ವರ್ಸಾವರ್ಸಾಕ್ ವಾ ಎಕ್ದೋನ್ ಸಂದರ್ಭಾಂನಿ ಸ ಮಹಿನ್ಯಾಂನಿ ಮ್ಹಳ್ಳ್ಯಾಬರಿ ಸರಾಗ್ ಗಾಂವಾಂಕ್ ಆಯ್ಲಾ. ಚಡುಣೆ ಹರ್ಯೆಕಾ ಭೆಟೆವೆಳಿಂ ಓಸ್ಟಿನಾಚಿ ಪತಿಣ್ ಟ್ರೀಜಾ ಬಾಯ್ ಸಾಂಗಾತಾ ಆಸ್ತಾಲಿ. ಥೊಡ್ಯಾ ಪಾವ್ಟಿಂ ತಾಂಚಿಂ ಭುರ‍್ಗಿಂಯೀ ಆಯ್ಲ್ಯಾಂತ್.

ದಾಯ್ಜಿವರ್ಲ್ಡಾಚಾ ವಾಲ್ಟರ್ ನಂದಳಿಕೆನ್ ಬೊಂದೆಲಾಂತ್ ವಸ್ತಿ ಕರುಂಕ್ ಧರ‍್ಲ್ಯಾ ಉಪ್ರಾಂತ್ ಓಸ್ಟಿನ್ ಗಾಂವಾಂಕ್ ಆಯ್ಲೆಲ್ಯಾ ವೆಳಾರ್ ಸರಾಗ್ ವಾಲ್ಟಿಗೆರ್ ರಾವ್ಲಾ. ಬೊಂದೆಲ್ ದಾಯ್ಜಿವರ್ಲ್ಡ್ ರೆಸಿಡೆನ್ಸಿ ಥಾವ್ನ್ ಓಸ್ಟಿನಾಕ್ ಮ್ಹಜ್ಯಾ ಕಾರಾರ್ ಘೆವ್ನ್ ತಾಣೆ ಆನಿ ಹಾಂವೆಂ ದಕ್ಷಿಣ ಕನ್ನಡ ಆನಿ ಉಡುಪಿ ಜಿಲ್ಲೊಬರ್ ಭಂವ್‌ಲ್ಲೆಂ ಆಸಾ. ಉಳ್ಳಾಲ ಥಾವ್ನ್ ತ್ರಾಸಿ – ಮರವಂತೆ, ಪಣಂಬೂರ್ ಥಾವ್ನ್ (ದರ್ಯಾ ತಡಿಂಕ್ ನ್ಹಯ್ – ತಾಂಕಾಂ ಹಾಂಕಾಂ ಭೆಟ್ಚ್ಯಾಕ್) ಧರ್ಮಸ್ಥಳ ಆನಿ ತೆಣೆ – ಹೆಣೆ, ಹ್ಯೊ ಭೆಟೊ ಚಲ್ಲ್ಯಾತ್. ಹ್ಯೊ ಭೆಟೊ ಗಾಂವ್ ಭಂವೊಂಕ್ ನ್ಹಯ್ – ಓಸ್ಟಿನಾಚಾ ಸಯ್ರ್ಯಾ – ದಯ್ರ್ಯಾಂಕ್, ಇಷ್ಟಾ – ಮಂತ್ರಾಂಕ್, ಲಯನ್ಸ್, ಯುವಜಣ್, ಕೊಂಕ್ಣಿ ಕಾರ್ಯಕ್ರಮಾಂಕ್ ಆನಿ ಕೊಣೆ ತಾಕಾ ಆಪಯ್ಲಾಂಗೀ ತಾಂಕಾಂ ಭೆಟೊಂಕ್. ಆಮಿ ತಾಂಕಾಂ – ಹಾಂಕಾಂ ಭೆಟ್ಲ್ಯಾಂವ್, ಉಲಯ್ಲ್ಯಾಂವ್, ಸಾಂಗಾತಾ ಚ್ಹಾ – ಕಾಫಿ ಪಿಯೆಲ್ಯಾಂವ್, ಜೆವ್ಲ್ಯಾಂವ್.

ಕೊರೊನಾ ಉಪ್ರಾಂತ್ ಗಾಂವಾಂಕ್ ಓಸ್ಟಿನಾಚ್ಯೊ ಭೆಟೊ ಉಣ್ಯೊ ಜಾಲ್ಯಾತ್. ಟ್ರೀಜಾ ಬಾಯೆನ್ ಚಲೊಂಕ್ ಕಷ್ಟಾಲ್ಲ್ಯಾ ಉಪ್ರಾಂತ್‌ಯೀ ತಿ ಗಾಂವಾಂಕ್ ಆಯ್ಲ್ಯಾ. ಆಯ್ಲೆವಾರ್ ಚಡಿತ್ ಕಷ್ಟಾತಾ ಜಾವ್ಯೆತಾ. ಘರ‍್ಚಿ ಚಡಿತ್ ಜವಾಬ್ದಾರಿ ಓಸ್ಟಿನಾಚೆರ್ ಪಡ್‌ಲ್ಲ್ಯಾನ್ ಓಸ್ಟಿನಾಚ್ಯೊ ಗಾಂವಾಂಕ್ ಭೆಟೊ ಉಣ್ಯೊ ಜಾಂವ್ಕ್ ಕಾರಣ್ ಕೊಣ್ಣಾ.

2006 ದಸೆಂಬರ್ 31-ವೆರ್ ಮಂಗ್ಳುರ್ ಬಂಟ್ಸ್ ಹೊಸ್ಟೆಲಾ ಲಾಗ್ಸಿಲ್ಯಾ ಅಭಿಮಾನ್ ಹೋಟೆಲಾಂತ್ ಓಸ್ಟಿನಾಸಂಗಿಂ ಮುಲಾಕಾತ್ ಕಾರ್ಯಕ್ರಮ್ ಮಾಂಡುನ್ ಹಾಡ್‌ಲ್ಲೆಂ. ಹಾಂತುಂ ಬಸ್ತಿ ವಾಮನ್ ಶೆಣೈ, ಲಯನ್ ಶ್ರೀಮತಿ ಕೃಪಾ ಅಮರ್ ಆಳ್ವ ಆನಿ ಮಂಗ್ಳುರ‍್ಚ್ಯಾ ಖ್ಯಾತ್ ವ್ಯಕ್ತಿಂನಿ ಭಾಗ್ ಘೆತ್‌ಲ್ಲೊ. ದೋನ್ ಪಾವ್ಟಿಂ, (2010 ಜನೆರ್ 4 ವೆರ್ ‘ನತ್ತಿಂಗ್ ಇಸ್ ಇಂಪೋಸಿಬುಲ್’ ವಿಷಯಾರ್ ಆನಿ 2017 ಎಪ್ರಿಲ್ 6 ವೆರ್ ‘ಟೋಪ್ ಮೆನೇಜ್‌ಮೆಂಟ್ ರಿಸೊರ್ಸ್ – ಎಂಪ್ಲೋಯಿಸ್’ ವಿಷಯಾರ್) ಮಂಗ್ಳುರ್ – ಕೊಡಿಯಾಲ್‌ಬೈಲಾಂತ್ಲ್ಯಾ ಎಸ್‌ಡಿಎಂ ಬಿಜ್ನೆಸ್ ಮೆನೆಜ್‌ಮೆಂಟ್ ಕೊಲೆಜಿಂತ್ಲ್ಯಾ ಸಭಾ ಭವನಾಂತ್ (ಹಾಂವೆಂ ಕಾನೂನ್ ಶಿಕಪ್ ಜೊಡ್‌ಲ್ಲೆಂ ಶಿಕ್ಪಾ ಸಂಸ್ಥ್ಯಾಚೆಂ ವಠಾರ್) ಮೆಂಗ್ಳುರ್ ಮೆನೆಜ್‌ಮೆಂಟ್ ಅಸೋಸಿಯೇಶನ್ – ಎಂಎಂಎ ಮಾರಿಫಾತ್ (ಹಾಂವ್ ಎಂಎಂಎ ಆಜೀವ್ ಸಾಂದೊ) ಓಸ್ಟಿನಾಚಿಂ ವಿಶೇಷ್ ಉಪಾನ್ಯಾಸ್ ಕಾರ್ಯಿಂ ಆಸಾ ಕೆಲ್ಲಿಂ. ಹ್ಯಾ ಕಾರ್ಯಾಂನಿ ಬ್ಯಾಂಕಿಂಗ್, ಶಿಕ್ಷಣ್ ಆನಿ ಹೆರ್ ಕ್ಷೇತ್ರಾಂತ್ಲೆ ಖ್ಯಾತ್ ಮುಖೆಲಿ ಹಾಜರ್ ಜಾಲ್ಲೆ.

ಓಸ್ಟಿನಾಚಿ ಸಾಡೆ ತೀನ್ ಹಜಾರ್ ಚುಟುಕಾಂ ಆಟಾಪ್ಚೊ ‘ವಜ್ರಾಂ’ ಪುಸ್ತಕ್ ಆಮ್ಚ್ಯಾ ಮರಿಯಾಡ್ಸ್ ಪ್ರಕಾಶನಾಖಾಲ್ 2009 ಇಸ್ವೆಂತ್ ಆಮಿ ಪ್ರಕಾಶಿತ್ ಕೆಲ್ಲೆಂ. ಓಸ್ಟಿನಾಚಾ ಜಿವಿತಾಚಾ ಸಾಟಾವ್ಯಾ ಸುವಾಳ್ಯಾರ್ ಪುಸ್ತಕಾಕ್ ‘ವಜ್ರಾಂ’ ನಾಂವ್ ದವ್ರಿಲ್ಲೆಂ. ತಾಚೆಂ ಮೊಕ್ಳಿಕ್ ಕಾರ್ಯೆಂ 2009 ದಸೆಂಬರ್ 290 ವೆರ್ ಕೊಡಿಯಾಲ್‌ಬೈಲಾಂತ್ಲ್ಯಾ ದೀಪ ಕಂಪರ್ಟ್ಸ್ ಹೊಟೆಲಾಂತ್ ದಬಾಜ್ಯಾನ್ ಆಮ್ಚ್ಯಾ ಪ್ರಕಾಶನಾನ್ ಮಾಂಡುನ್ ಹಾಡ್‌ಲ್ಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈಚಾ ಅಧ್ಯಕ್ಷತೆಖಾಲ್ ಚಲ್‌ಲ್ಲ್ಯಾ ಕಾರ್ಯಾಂತ್ ಮುಂಬಯಿಂತ್ಲೊ ಖ್ಯಾತ್ ಉದ್ಯಮಿ ಆಲ್ಬರ್ಟ್ ಡಬ್ಲ್ಯು. ಡಿಸೋಜಾನ್ ಪುಸ್ತಕ್ ಮೊಕ್ಳಿಕ್ ಕೆಲ್ಲೆಂ. 2010 ವ್ಯಾ ವರ್ಸಾಂತ್ ಆಮಿ ಕಟ್ಪಡಿಚಾ ಕ್ಯಾಥರಿನ್ ರೊಡ್ರಿಗಸಾಚ್ಯೊ ಮಟ್ವ್ಯೊ ಕಾಣ್ಯೊ ಆಟಾಪ್ಚೆಂ ‘ಸಾತೆಂ’ ಪುಸ್ತಕ್ ಪ್ರಕಾಶಿತ್ ಕೆಲ್ಲೆಂ. 2010 ದಸೆಂಬರ್ 9 ವೆರ್ ಕಟ್ಪಾಡಿಂತ್ ಚಲ್‌ಲ್ಲ್ಯಾ ಮೊಕ್ಳಿಕ್ ಕಾರ್ಯಾಂತ್ ಓಸ್ಟಿನ್ ಮುಕೆಲ್ ಸಯ್ರೊ ಜಾವ್ನ್ ಹಾಜರ್ ಆಸ್ಲೊ.

ಜಾಯ್ತಿಂ ವರ್ಸಾಂ, ಮ್ಹಜಿ ಪತಿಣ್ ಕನ್ಸೆಪ್ಟಾ ಫೆರ್ನಾಂಡಿಸ್ ಮಂಗ್ಳುರ್ ಆಕಾಶವಾಣಿಂತ್ ಹುದ್ದೆದಾರ್ ಆಸ್ಲಿ. ಹರ್ಯೆಕ್ ಪಾವ್ಟಿಂ ಓಸ್ಟಿನ್ ಗಾಂವಾಂಕ್ ಯೆತಾನಾ ತಾಕಾ ತಿಣೆ ಆಕಾಶ್‌ವಾಣಿಕ್ ಆಪಯ್ಲಾಂ. ಥೊಡ್ಯಾ ಪಾವ್ಟಿಂ ಕಾರ್ಯಕ್ರಮಾಂ ರೆಕೊರ್ಡ್ ಕರ‍್ನ್ ಪ್ರಸಾರ್ ಕೆಲ್ಯಾಂತ್.

ಪಾಂವುಣ್ಶೆಂ ವರ್ಸಾಂ ಸಂಪಯ್ಲ್ಯಾರೀ ಓಸ್ಟಿನ್ ಆಜೂನ್ ತರ್ನಾಟ್ಯಾಚಾ ಹುಮೆದಿನ್ ವಾವುರ್ತಾ. ಖಾಣಾ – ಜೆವ್ಣಾಂತ್ ಮೀತ್ ಸಾಂಬಾಳ್ತಾ. ಮಾಸಾಂ ಮಿತಿನ್ ಖಾತಾ. ರಾಂದ್ವಾಯ್ ಆನಿ ಮಾಸ್ಳಿ ಪಸಂದ್ ಕರ್ತಾ. ಆಪ್ಲ್ಯಾ ಜಿವಿತಾಂತ್ ವಾಯ್ನ್‌ಯೀ ಧರ್ನ್ ಖಂಯ್ಚ್ಯಾಯೀ ನಮೂನ್ಯಾಚ್ಯಾ ಅಮಾಲ್ ಪಿಯೊಣ್ಯಾಕ್, ಸಿಗ್ರೆಟ್ ಆನಿ ಹೆರ್ ಧುವ್ರಾಪಾನಾಕ್ ತಾಣೆ ಆವ್ಕಾಸ್ ದಿಲ್ಲೊ ನಾ. ಫಿಲ್ಮಾಂ ಥಾವ್ನ್ ಪಯ್ಸ್ ರಾವ್ಲಾ. ರಾತಿಚಿ ಮಾತ್ರ್ ನೀದ್ ಕಾಡ್ತಾ. ಪೂಣ್ ಸ್ವಪ್ಣಾಂ ಮಾತ್ರ್ ದಿಸಾಕ್‌ಯೀ ದೆಖ್ತಾ ಆನಿ ತಿಂ ಸಾಕಾರ್ ಕರುಂಕ್ ಒದ್ದಾಡ್ತಾ. ಜಿವಿತಾಚೊ ಸಗ್ಳೊ ವೇಳ್ ವಾವಾಂತ್ರ್ ಮಗ್ನ್, ಖುಶಾಲಿ ಜಿನೊಸ್, ಸದಾಂಚ್ ಹೆರಾಂಚೆಂ ಬೊರೆಂಪಣ್ ದೆಕ್ಚೆಂ, ಆಪ್ಣಾಕ್ ಖೆಂಡ್‌ಲ್ಲ್ಯಾಂಚೆಂ ಆನಿ ದುಖಯಿಲ್ಲ್ಯಾಂಚೆಂ ಸಯ್ತ್ ಬೊರೆಂಪಣ್ ಆಶೆಂವ್ಚೆಂ ಆನಿ ಆಸಲ್ಯೊ ಜಾಯ್ತ್ಯೊ ಸವಯೊ ಓಸ್ಟಿನಾಚಾ ತರ್ನಾಟ್ಪಣಾಚೊ ಘುಟ್ ಕೊಣ್ಣಾ.

ಒಸ್ಟಿನಾಕ್ ಫುಡೆಂಯೀ ಬೊರಿ ಭಲಾಯ್ಕಿ ಆನಿ ತ್ರಾಣ್ ದೀವ್ನ್ ದೇವ್ ಸಾಂಬಾಳುಂದಿ ಮ್ಹಣ್ ಮಾಗ್ತಾನಾ ಅಮೃತೋತ್ಸವ್ ಶತಕಾಂತ್ ಬದ್ಲೊಂದಿ ಮ್ಹಣ್ ಆಶೆತಾಂ.

ಹೆಪ್ಪಿ ಪ್ಲಾಟಿನಮ್ ಬರ್ಥ್‌ಡೇ ಡಿಯರ್ ಓಸ್ಟಿನ್.

■ ಎಚ್. ಆರ್. ಆಳ್ವ