2025 ದಶೆಂಬ್ರ್ 07 : ಪರಾಗ್ – ಕೊಂಕ್ಣಿ ಭುರ್ಗ್ಯಾಂಚೆಂ ಸಾಹಿತ್ಯ್ ಸಮ್ಮೇಳನ್

ಕೊಂಕ್ಣೆಚೆಂ ಪ್ರಮುಖ್ ಸಾಂಸ್ಕೃತಿಕ್ ಸಂಘಟನ್ ಮಾಂಡ್ ಸೊಭಾಣಾನ್ ಆಪ್ಲೊ ಸಾಹಿತ್ಯಾಚೊ ಸಹಸಂಸ್ಥೊ ಮಿಟಾಕಣ್ ಅಕಾಡೆಮಿ ಮುಖಾಂತ್ರ್ ಭುರ್ಗ್ಯಾಂ ಥಂಯ್ ಸಾಹಿತ್ಯಾಚಿ ಅಭಿರೂಚ್ ಚಡೊಂವ್ಕ್ ಹೈಸ್ಕೂಲ್ ವಿದ್ಯಾರ್ಥಿಂಕ್ ಎಕಾ ದಿಸಾಚೊ ಸಾಹಿತ್ಯ್ ಸಮ್ಮೇಳ್ ಮಾಂಡುನ್ ಹಾಡ್ಲಾ. 2025 ದಶೆಂಬ್ರ್ 07 ವೆರ್ ಸಕಾಳಿಂ 8.45 ಥಾವ್ನ್ ಸಾಂಜೆರ್ 4.00 ಪರ್ಯಾಂತ್ ಶಕ್ತಿನಗರಾಂತ್ ಅಸ್ಚ್ಯಾ ಕಲಾಂಗಣ್ ಮೈದಾನಾರ್ ಕೊಂಕ್ಣಿ ಭುರ್ಗ್ಯಾಂಚೆಂ ಸಾಹಿತ್ಯ್ ಸಮ್ಮೇಳನ್ ಪರಾಗ್ ಸಮ್ಮೇಳ್ ಚಲ್ತಲೊ.

ಹಿ ಮಾಹೆತ್ ಮಂಗ್ಳುರ್ಚ್ಯಾ ಪತ್ರಿಕಾ ಭವನಾಂತ್ ಚಲ್ಲಲ್ಯಾ ಪರಾಗ್ ಸಮ್ಮೇಳಾಚಾ ಪತ್ರಿಕಾ ಗೋಷ್ಟಿಂತ್ ಆಟ್ವ್ಯೆ ಕ್ಲಾಶಿಚ್ಯಾ ವಿಯೊನಾ ಜಾನಿಸ್ ಪಿಂಟೊ ಹಿಣೆಂ ದಿಲಿ. ಬಜ್ಜೋಡಿ ಫಿರ್ಗಜೆಚೆಂ ಹುಮೆದ್ವಂತ್ ಭುರ್ಗೆಂ ವಿಯೊನಾಕ್ ಗಾಯಾನಾಂತ್, ಸಂಗೀತಾಂತ್, ವಾಚ್ಪಾಂತ್, ಖೆಳಾಂತ್ ವ್ಹಡ್ ಆಸಕ್ತ್ ಆಸಾ. ಮಾಂಡ್ ಸೊಭಾಣಾಚ್ಯಾ ವೋಪ್ ರಜೆ ಶಿಬಿರಾಂತ್ ತಾಕಾ ಗಾಯಾನ್ ಶ್ರೇಷ್ಟ್ ಪುರಸ್ಕಾರ್ ಮೆಳ್ಳಾ. ತಶೆಂಚ್ ಶಾಳೆಂತ್ ಸಭಾರ್ ಇನಾಮಾಂ ಮೆಳ್ಳ್ಯಾಂತ್.

ಕರ್ನಾಟಕ ಕೊಂಕಣಿ ಸಾಹಿತ್ಯ್  ಅಕಾಡೆಮಿಚೊ ಅಧ್ಯಕ್ಷ್ ಜೊಕಿಂ ಸ್ಟ್ಯಾನಿ ಆಲ್ವಾರಿಸ್ ಸಮ್ಮೇಳಾಚೊ ಪುರ್ಶಾಂವ್ ಉಗ್ತಾಯ್ತಲೊ. ಸಮ್ಮೇಳಾಚೆಂ ಅಧ್ಯಕ್ಷ್ ಪಣ್ ಶಿಕ್ಪಾ ತಜ್ಞ್ ಆನಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ವಿಜೇತ್ ಮಾ. ಬಾ. ಪ್ರಶಾಂತ್ ಮಾಡ್ತಾ ಘೆತಲೊ. ಭುರ್ಗ್ಯಾಂಚೆಂ ಪ್ರತಿನಿಧಿ ಜಾವ್ನ್ ನೊವ್ಯೆ ಕ್ಲಾಶಿಚೆಂ ವಿದ್ಯಾರ್ಥಿಣ್ ಸಂಜನಾ ರಿವಾ ಮತಾಯಸ್ ಆಶಯ್ ಭಾಷಣ್ ಕರ್ತಲೆಂ. ಸಾಹಿತ್ಯಾಂತ್ ನಾಂವಾಡ್ದಿಕ್ ಜಾಲ್ಲೆ ಶಿಕೊವ್ಪಿ ʻಭುರ್ಗ್ಯಾಂಚ್ಯಾ ಸಾಹಿತ್ಯಾಚೊ ಫುಡಾರ್ʼ ಮ್ಹಳ್ಳ್ಯಾ ವಿಷಯಾಚೆರ್ ವಿಚಾರ್ ಗೋಷ್ಟಿ ಚಲಯ್ತಲೆ. ಆಲ್ವಿನ್ ದಾಂತಿ ಪೆರ್ನಾಲ್, ಸತ್ರ್ ಸಂಚಾಲಕ್ ಆಸ್ತಲೊ.  ಫೆಲ್ಸಿ ಲೋಬೊ ದೇರೆಬೈಲ್ (ವ್ಹಡ್ಲಿಮಾಂಯ್ಚ್ಯೊ ಕಾಣಿಯೊ ಆನಿ ಆಧುನಿಕ್ ಭುರ್ಗಿಂ: ಕಶೆಂ ಸಂವಹನ್ ಕರ್ಚೆಂ ಆನಿ ಕಸೊ ಸಂಬಂಧ್ ಘಡ್ಚೊ?) ಆನಿ ವೆಂಕಟೇಶ್ ನಾಯಕ್ (ಫುಡಾರಾಂತ್ ಭುರ್ಗ್ಯಾಂಲೆಂ ಸಾಹಿತ್ಯ್) ಪ್ರಬಂಧ್ ಮಂಡನ್ ಕರ್ತಲೆ. ʻಕವಿತಾ ರಚನ್ ಆನಿ ವಾಚನ್ʼ ವಿಷಯಾಚೆರ್ ಕವಿ ಆಂಡ್ರ್ಯೂ ಎಲ್ ಡಿಕುನ್ಹಾ ಉಲೊವ್ಪ್ ಸಾದರ್ ಕರ್ತಲೊ.

ಭುರ್ಗ್ಯಾಂ ಥಾವ್ನ್ ಕವಿಗೋಷ್ಟಿ, ಪ್ರಶ್ನೋತ್ತರಿ, ಕಾರ್ಯೆಂ ನಿರೂಪಣ್, ಸಾಂಸ್ಕೃತಿಕ್ ಕಾರ್ಯಕ್ರಮಾಂ ಸಾದರ್ ಜಾತಲಿಂ. ರಂಗಾಳ್ ಪುರ್ಶಾಂವ್, ರುಚಿಕ್ ಜೆವಣ್ ಸಮ್ಮೇಳಾಚೊ ಸಂಭ್ರಮ್ ಚಡಯ್ತಲೊ. ಭಾಗೆಲಿ ವಿದ್ಯಾರ್ಥಿಂಕ್ ಸಂಪ್ಣೆ ಕಾರ್ಯಾವೆಳಿಂ ಪ್ರಮಾಣ್ ಪತ್ರಾಂ ಆಸ್ತೆಲಿಂ.

ಹ್ಯಾ ಸಂದರ್ಭಾರ್ ಮಿಟಾಕಣ್ ಅನುವಾದ್ ಕಾರ್ಯಾಗಾರಾಂತ್ ಭುರ್ಗ್ಯಾಂನಿ ಆನಿ ಹೆರಾಂನಿ ವೆವೆಗ್ಳ್ಯಾ ಭಾಸಾಂ ಥಾವ್ನ್ ಕೊಂಕ್ಣೆಕ್ ಅನುವಾದ್ ಕೆಲ್ಲೊ ಭುರ್ಗ್ಯಾಂಚೊ ಕಾಣಿಯಾ ಸಂಗ್ರಹ್ ಮ್ಹೊಂವಾ-ಪೊಳಿ ಆನಿ ಎರಿಕ್ ಒಝೇರಿಯೊ ಅಮೃತೋತ್ಸವ್ ಸಂಶೋಧನ್ ಅನುದಾನಾ ಖಾಲ್ ಪ್ರಿಥುಮಾ ಮೊಂತೇರೊನ್ ತಯಾರ್ ಕೆಲ್ಲಿ ಸಂಸೊಧಿತ್ ಕೃತಿ ʻKonkani Christian Folk Cultureʼ ಛಾಪ್ಯಾ ಆನಿ ಇ ಬುಕ್ ರುಪಾರ್ ತಶೆಂಚ್ ಕೇರನ್ ಮಾಡ್ತಾನ್ ಸಂಪಾದಿಲ್ಲ್ಯೊ ಸಿಲ್ವೆಸ್ಟರ್ ಡಿಸೋಜ, ಮೈಸೂರ್ ಹಾಚ್ಯೊ ʻವ್ಹಡ್ಲಿಮಾಂಯ್ಚ್ಯೊ ಕಾಣಿಯೊʼ ಪುಸ್ತಕ್ ಇ ಬುಕ್ ರುಪಾರ್ ಲೊಕಾರ್ಪಣ್ ಜಾತಲೆ.

ಹ್ಯಾ ಸಮ್ಮೇಳಾಂತ್ ಭಾಗ್ ಘೆಂವ್ಕ್ ಆಶೆಂವ್ಚ್ಯಾ ಭುರ್ಗ್ಯಾಂನಿ ವೈಯುಕ್ತಿಕ್ ಜಾವ್ನ್, ಶಾಳಾ ವಾ ಫಿರ್ಗಜೆ ಮುಖಾಂತ್ರ್ ನಾಂವಾಂ ಧಾಡುಂಕ್ ಜಾತಾತ್. ಚಡಿತ್ ಮಾಹೆತಿಕ್ ಆನಿ ನಾಂವ್ ನೊಂದಾಂವ್ಕ್ ಫೊನ್ 8105 22 6626.

ಹ್ಯಾ ಸಮ್ಮೇಳಾಂತ್ ವ್ಹಡಾ ಸಂಖ್ಯಾನ್ ಭುರ್ಗ್ಯಾಂನಿ ಭಾಗ್ ಘೆಜೆ ವ್ಹಡಿಲಾಂನಿ, ಶಿಕೊವ್ಪ್ಯಾಂನಿ ಉಮೆದ್ ಭರಿಜೆ ಮ್ಹಣ್ ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಪಿಂಟೊ ಆನಿ ಮಿಟಾಕಣ್ ಸಂಚಾಲಕ್ ರೊನಿ ಕ್ರಾಸ್ತಾನ್ ವಿನತಿ ಕೆಲ್ಯಾ. ಉಪಾಧ್ಯಕ್ಷ್ ನವೀನ್ ಲೋಬೊ ಹ್ಯಾ ವೆಳಿಂ ಹಾಜರ್ ಆಸ್ಲಲೊ.