ವಿಶ್ವ ಕೊಂಕಣಿ ಕೇಂದ್ರಾನ ವರ್ಧನಿ ಫೆಲೋಶಿಪ್ ಯೋಜನೆರಿ ಪ್ರಾರಂಭ ಕೆಲೆಲೆ “ಗೋಯಾಂತ ಮಾತೃದೇವಿಲೊ ಉಪಾಸನಾ” ಮ್ಹಳೆಲೆ ಸಂಶೋಧನಾಚೆ ಯೋಜನಾ ಕಾರ್ಯಾವಳ, 20-12-2025 ತಾರ್ಕೆರ , ಗೋಂಯಚೆ ಇತಿಹಾಸ ತಜ್ಞ ಡಾ. ರೋಹಿತ್ ಫಳಗಾಂವಕಾರ್ ಹಾನಿ ಉಗ್ತಾವಣ ಕೆಲೆಂ. ಆನಿ ತಾಂಗೆಲೆ ಸಂಶೋಧನಾ ಯೋಜನಾ ಬದ್ದಲ ಉಪನ್ಯಾಸ ದಿಲೆಂ.
ಪ್ರಾಕಾದಾಕುನೂಚಿ ಕೊಂಕಣಿ ಭಾಷಿಕಾಂಗೆಲೊ ಮಧ್ಯೆ ನಿಚ್ಚಳ ಜಾವನು ಆಸುಚೆ ಮಾತೃಶಕ್ತಿ ಆರಾಧನಾಕ ಸೂಕ್ತ ಸಂಶೋಧನಾತ್ಮಕ ಸ್ಪರ್ಶಾಚೆ ಅಗತ್ಯ ಜಾಯ್ ಆಸೂನು, ಅಸಲೆ ಕಾರ್ಯ ಅಧ್ಯಯನ ಯೋಜನಾ ವಿಶ್ವ ಕೊಂಕಣಿ ಕೇಂದ್ರಾನ ಹಾತ್ತಾಂತ ಘೆತಲಾಂ. ಹೆಂ ಸಂಶೋಧನಾ ಕಾರ್ಯಯೋಜನಾ ಆರತಾಂ ಆಖೇರೀಚೆ ಹಂತಾ ಮೆರೆನ ಪಾವಲಾಂ. ವಿಶ್ವ ಕೊಂಕಣಿ ಕೇಂದ್ರ ಆನಿ ವರ್ಧನಿ ಫೆಲೋಶಿಪ್ ಸಂಸ್ಥೆಚಾಚೆ ಹೆಂ ಕಾರ್ಯ ಮಸ್ತ ಪ್ರಶಂಶೆಕ ಸಾಬೀತ ಜಾಲಾಂ ಅಶಿಂ ತಾಂಗೆಲೆ ಉಲೊಂ ದಿಲೆಂ. ಅಶಿಂ ಉಲಯತಚಿ ಗೋಯಾಂತ ಮಸ್ತ ದೇವಿಮಂದಿರ, ಅಮೂರ್ಥ ಕಲ್ಪನಾಚೆ ಆನಿ ಮೂರ್ತಿ ರೂಪಾಂತ ದೇವೀ ವಿಗ್ರಹಾಚೆ ಚಿತ್ರ ಪ್ರದರ್ಶನ ವಯರ ಉಪನ್ಯಾಸ ದಿಲೆಂ. ಆನಿ ಗೊಯಾಂತ ಮಾತೃ ದೇವಿಲೊ ಉಪಾಸನಾ ಬದ್ದಲ ಸುಮಾರ 67 ವೆವೆಗಳೆ ದೇವಳಾಂತ ಚಲಚೆ ಸಾಂಪ್ರದಾಯಿಕ ಆರಾಧನಾ ನಂಬಿಕಾ ಬದ್ದಲ ಶಾಸ್ತ್ರೀಯ ವಿಧಾನಾಚೆ ವ್ಯಾಸಂಗಿಕ ಅಧ್ಯಯನ ಬದ್ದಲ ಸಂಕ್ಷಿಪ್ತ ಜಾಲೆಲೆ ಮಾಹಿತ ದಿಲೆಂ.
ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಮಾನೆಸ್ತ ಸಿಎ ನಂದಗೋಪಾಲ್ ಶೆಣೈ ಹಾನಿ ಸ್ವಾಗತ ಕೆಲೆಂ. ವರ್ಧನಿ ಸಂಸ್ಥಾ ಹೆಂ ಸಂಶೋಧನಾ ಪುಸ್ತಕ ರಚನಾಕ ಪ್ರಾಯೋಜಕ ಜಾವನ ಆಸಾಚಿ, ಸಂಶೋಧಕ ಡಾ. ರೋಹಿತ್ ಫಳಗಾಂವಕಾರ್ ಹಾನಿ ಕಾರ್ಯರೂಪಾಕ ಹಾಡಚೆ ಸಂಶೋಧನಾ ಪುಸ್ತಕ ಕೇಂದ್ರಾಚೆ ಅಧ್ಯಕ್ಷಾಲೊ ಹಾತ್ತಾಂತ ದಿಲೆಂ. ಹ್ಯಾ ಸಂಧರ್ಭಾರ ಸಂಶೋಧಕರ ಡಾ. ರೋಹಿತ್ ಫಳಗಾಂವಕಾರ್ ಹಾಂಕಾ ಸನ್ಮಾನ ದೀವನು ಗೌರವ ದಿಲೆಂ. ಮಾನೆಸ್ತ ಪುಂಡಳೀಕ ಪೈ (ಅನ್ನು ಮಂಗಳೂರು) ಹಾನಿ, ಸುಮಾರ್ ಏಕ ವರಸ ಅವಧಿಚೆ ಹ್ಯಾ ಸಂಶೋಧನೇಕ ಜಾವಕಾ ಜಾಲೆಲೆ, ಛಾಯಾಚಿತ್ರ ಕಾಣು, ಏಕ ಸೊಬಿತ್ ಜಾವನ ಕಾಫಿಟೆಬಲ್ ಪುಸ್ತಕ ರೂಪಾರ ಯೆವಚಾಕ ಕೆಲೆಲೆ ವಾವರ ಬದ್ದಲ ಸಭೆಕ ಮಾಹಿತ ದಿಲೆಂ. ಹಾಂಗೆಲೆ ವಾವರಾಕ ವಿಶ್ವ ಕೊಂಕಣಿ ಕೇಂದ್ರಾಚೆ ವಿಶ್ವಸ್ಥ ಮಂಡಳಿನ ಶ್ಲಾಘ್ಹನ ಕರನ ಸನ್ಮಾನ ಕೆಲೆಂ. ಮಾನೆಸ್ತಿಣ್ ಸುಚಿತ್ರಾ ಎಸ್ ಶೆಣೈ ನ ಅಧ್ಯಯನ ಯೋಜನಾಚೆ ಸಂಶೋಧಕ ಡಾ ರೋಹಿತ್ ಫಳಗಾಂವಕರ ಹಾಂಗೆಲೆ ಸಂಕ್ಷಿಪ್ತ ಪರಿಚಯ ದಿಲೆಂ ಆನಿ ಕಾರ್ಯಕ್ರಮ ನಿರೂಪಣ ಕೆಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಖಜಾಂಚಿ ಮಾನೆಸ್ತ ಬಿ ಆರ್ ಭಟ ಹಾನಿ ವಂದನಾರ್ಪಣ ಕೆಲೆಂ.
ವಿಶ್ವಸ್ಥ ಮಂಡಳಿಚಾ ಸಾಂದೆ ಮಾನೆಸ್ತ ಪ್ರಶಾಂತ ಶೇಟ್, ಉಪಾಧ್ಯಕ್ಷ ಮಾನೆಸ್ತ ಡಿ ರಮೇಶ ನಾಯಕ್ ಆನಿ ಸೊಯರೆ ಮಾನೆಸ್ತಿಣ್ ಉಷಾ ನಂದಗೋಪಾಲ ಶೆಣೈ, ಮಾನೆಸ್ತ ಪಯ್ಯನೂರು ರಮೇಶ ಪೈ, ಅಮೇರಿಕಾಚೆ ಮಾನೆಸ್ತ ಎಸ್ ಗಣೇಶ ಶೆಣೈ, ಕುಡಾಳ ದೇಶ ಆದ್ಯ ಗೌಡ ಬ್ರಾಹ್ಮಣ ಸೇವಾ ಸಂಘಾಚೆ ಆನಿ ಚಪ್ಟೇಕಾರ ಸಮಾಜ ಸುಧಾರಕ ಸಂಘಾಚೆ ಪ್ರಮುಖ ಮಾನೆಸ್ತ ಲೋಕ ಉಪಸ್ಥಿತ ಆಶಿಲಿಂಚಿ.