ಮಂಗ್ಳುರ್ ಧರ್ಮ್ಪ್ರಾಂತ್ಯಾಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಪೀಟರ್ ಪಾವ್ಲ್ ಸಲ್ಡಾನ್ಹಾ ಹಾಣಿ ನತಾಲಾಂಚೊಂ ಸಂತೊಸ್ ಜೆಪ್ಪು, ಸಾಂತ್ ಆಂತೊನ್ ಆಸ್ರ್ಯಾಚ್ಯಾ ನಿವಾಸಿಂ ಸವೆಂ, ಆಸ್ರ್ಯಾಂತ್ ಫೆಸ್ತಾಚೆಂ ಪವಿತ್ ಮಿಸಾಚೆಂ ಬಲಿದಾನ್, ಆಸ್ರ್ಯಾಚೆ ನಿವಾಸಿ, ದಾನಿ, ಹಿತಯ್ಶಿ ಹಾಂಚೆ ಸಾಂಗಾತಾ ಭೆಟಂವ್ಚೆ ಸವೆಂ ವಾಂಟುನ್ ಘೆತ್ಲೊ ಆನಿ ಆಸ್ರ್ಯಾಂತ್ ಸೆವೆಕಾರ್ಯಾಂತ್ ನಿರತ್ ಶಿಬಂದೆ ಖಾತಿರ್ ವಿಶೇಸ್ ಮಾಗ್ಣೆಂ ಕೆಲೆಂ.
“ಜೆಜು ಕ್ರಿಸ್ತಾಚ್ಯಾ ಜಲ್ಮಾವರ್ವಿಂ ಮನ್ಶಾಕುಳಾಕ್ ದೆವಾ ವಿಶ್ಯಾಂತ್ ಸ್ಪಷ್ಟ್ ಸಮ್ಜಣಿ ಲಾಭ್ಲಿ. ಜೆಜು ಸಂಸಾರಾಕ್ ಯೇನಾತ್ಲೊ ಜಾಲ್ಯಾರ್ ದೆವಾವಿಶಿಂ ಆಮ್ಚಿ ಸಮ್ಜಣಿ ಫಕತ್ ಏಕ್ ವಿಲಕ್ಷಣ್ ಕಲ್ಪನಾ ಮಾತ್ ಜಾವ್ನ್ ಉರ್ತಿ. ಕ್ರೀಸ್ತಾಚ್ಯಾ ಯೆಣ್ಯಾನ್ ಆಮಿ ದೇವ್ ಕಿತೆಂ ಮ್ಹಳ್ಳೆಂ ಸಮ್ಜಾಲ್ಯಾಂವ್. ಬಾಳ್ಕಾಪರಿಂ – ಮುಗ್ದ್, ಸರಳ್, ಕುರ್ಪೆನ್ ಆನಿ ಮೊಗಾನ್ ಭರ್ಲಲೊಚ್ ದೇವ್” ಮ್ಹಣ್ ಆಪ್ಲ್ಯಾ ಪ್ರಸಂಗಾಂತ್ ದೊ| ಸಲ್ಡಾನ್ಹಾನ್ ಮ್ಹಳೆಂ.
“ನತಾಲ್ ಫಕತ್ ಭಾಯ್ಲೆಂ ಆಚರಣ್ ಮಾತ್ ಜಾವ್ನ್ ಉರಾನಾಸ್ತಾನಾ, ಅರ್ಥಾಪೂರ್ಣ್ ಸಂಬಂದಾಂನಿ ರೂಪಿತ್ ಜಾಯ್ಜೆ. ಆಚರಣಾಂ ಥಾವ್ನ್ ಸಂಬಂದಾಂ ಕಡೆನ್ ಆಮ್ಚೆಂ ಪಯ್ಣ್ ಆಸುಂಕ್ ಜಾಯ್.” ಮ್ಹಳ್ಳ್ಯಾ ದೊ| ಸಲ್ಡಾನ್ಹಾನ್, ಆಪ್ಲ್ಯಾ ಪೆಲ್ಯಾಂಸಂಗಿಂ ದಯಾ, ಸೆವಾ ಆನಿ ಮೊಗಾಚೊ ಘಟ್ಟ್ ಬಾಂದ್ ರುತಾ ಕೆಲ್ಯಾರ್ ಮಾತ್ ನತಾಲ್ ಅರ್ಥಾಪೂರ್ಣ್ ಜಾತಾ ಮ್ಹಣ್ ದಾಂಬೂನ್ ಸಾಂಗ್ಲೆಂ.
ಸಂಭ್ರಮಿಕ್ ಮಿಸಾಚ್ಯಾ ಬಲಿದಾನಾ ಉಪ್ರಾಂತ್ ಗೊವ್ಳಿಬಾಪಾನ್ ಕಾಂಯ್ ಘಡಿಯೊ ಆಸ್ರ್ಯಾಚ್ಯಾ ನಿವಾಸಿಂ ಸಂಗಿಂ ಸಂವಾದಾಂತ್ ಖರ್ಚಿಲ್ಯೊ ಆನಿ ಫೆಸ್ತಾಚೆ ಉಲ್ಲಾಸ್ ಪಾಟವ್ನ್, ಮೋಗ್ ವಾಂಟುನ್ ಘೆತ್ಲೊ.
ಹ್ಯಾ ಸಂದರ್ಭಾರ್ ಸಾಂತ್ ಆಂತೊನ್ ಆಸ್ರ್ಯಾಚೊ ನಿರ್ದೇಶಕ್ ಮಾ| ಬಾ| ಜೆ. ಬಿ. ಕ್ರಾಸ್ತಾ, ಆಡಳ್ತ್ಯಾ ಅಧಿಕಾರಿ ಮಾ| ಬಾ| ಪ್ರವೀಣ್ ಮಾರ್ಟಿಸ್, ಸಹಾಯಕ್ ಆಡಳ್ತ್ಯಾ ಅಧಿಕಾರಿ ಮಾ| ಬಾ| ನಿಶಾಂತ್ ವಿವಿಯನ್ ರೋಡ್ರಿಗಸ್ ಮತ್ತು ಕೆನರಾ ಕಮ್ಯುನಿಕೇಶನ್ ಸೆಂಟರ್ ಹಾಚೊ ನಿರ್ದೇಶಕ್ ಮಾ| ಬಾ| ಅನಿಲ್ ಐವನ್ ಫೆರ್ನಾಂಡಿಸ್ ಹಾಜರ್ ಆಸೊನ್ ಬಿಸ್ಪಾ ಸಾಂಗಾತಾ ತಾಣಿ ಮಿಸಾಚಿ ಸಹಭೆಟವ್ಣಿ ಕೆಲಿ.
■ ತಸ್ವಿರ್ಯೊ / ಖಬರ್ : ಕೆನರಾ ಸಂಪರ್ಕ್ ಕೇಂದ್ರ್