ಚಿತ್ರ್-ವಿಚಿತ್ರಾಂಚಿಂ ಚಲಚಿತ್ರಾಂ

ಸಿನೆಮಾ ಫಕತ್ ಮನೊರಂಜನಾಚ್ಯೆಂ ಸಾಧನ್ ನ್ಹಯ್, ತೆಂ ಜಾವ್ನಾಸಾ ಆಮ್ಚ್ಯಾ ಪಾಟ್ಲ್ಯಾ ಜೀವನಾಕ್ ಆರ್ಸೊ, ಆಮ್ಚ್ಯಾ ಸಮಾಜೆಚೆಂ ಪ್ರತಿಬಿಂಬ್ ಆನಿ ಸಾಂಗೊಂಕ್ ಜಾಯ್ ಆಸ್ಚ್ಯಿ ಕಥಾ, ಪ್ರಭಾವಿತ್ ಥರಾನ್ ಸಾಂಗೊಂಕ್ ಸಾಧ್ಯ್ ಕರ್ಚ್ಯೆಂ ಏಕ್ ವಿಶೇಸ್ ಮಾದ್ಯಮ್. ಹೆಂ ಮಾದ್ಯಮ್, ಆಮ್ಕಾಂ ಆನಿ ಆಮ್ಚಾ ಭಂವ್ತಿಂಚ್ಯಾಂಕ್, ಎಕಾಮೆಕಾಚಿಂ ಭೊಗ್ಣಾ, ಸಿಂತಿಮೆಂತಾಂ, ಚೂಕಿ ಆನಿ ಅಭಿಪ್ರಾಯೊ ಉಗ್ತಾಡಾಕ್ ಹಾಡುಂಕ್ ಸಕ್ಚ್ಯೆಂ ಏಕ್ ಹಾತೆರ್ ಜಾವ್ನಾಸಾ. 19-ವ್ಯಾ ಶೆಕ್ಡ್ಯಾಚಾ ಆಖೇರಿಯಿತ್ಲ್ಯಾಕ್, ಏಕ್ ಕುತೂಹಲ್‌ಭರಿತ್ ಪ್ರಯೋಗ್ ಜಾವ್ನ್ ಸುರು ಜಾಲ್ಲೆಂ ಸಿನೆಮಾ, ಆಜ್, ರಾಷ್ಟ್ರಾಂ ಆನಿ ಸಂಸ್ಕ್ರತ್ಯಾಂ ಮಧೆಂ ಗಡ್ ವ ಅಡ್ಕಳ್ ನಾತ್‌ಲ್ಲೆಂ ವಾತಾವರಣ್ ಆಸಾ ಕರುಂಕ್ ಸಕ್ಚೆಂ ಪ್ರಭಾವಿತ್ ಮಾದ್ಯಮ್ ಜಾಲಾಂ ಮ್ಹಣ್ಚಾಕ್ ದುಬಾವ್ ನಾ.

ಸಿನೆಮಾಚಿ ಆತುರಾಯ್, ಝೋಟ್ರೋಪ್ (zoetrope) ಆನಿ ಫೆನಕಿಸ್ಟಾಸ್ಕೋಪ್ (phenakistiscope) ನಾಂವಾಚಾ, ಹಾತಾನ್ ಘುಂವ್ಡಾವ್ನ್, ಭಿತರ್ಲಿಂ ಚಿತ್ರಾಂ ಚಲ್ಚೆಬರಿ ಕರ್ಚ್ಯಾ ಲ್ಹಾನ್ ಮಟ್ಟಾಚಾ ಉಪಕರಣಾಂ ಥಾವ್ನ್ ಸುರು ಜಾಲ್ಲಿ ಮ್ಹಣ್ಯೆತ್. ಅಸಲ್ಯಾ ಸಾಮಾನ್ಯ್ ಚಿಂತ್ಪಾ ಥಾವ್ನ್, ಆರಂಭ್ ಜಾಲ್ಲೆಂ ಸಿನೆಮಾಚ್ಯೆಂ ಪಯ್ಣ್, ಕಿತ್ಲ್ಯಾರ್ ಪಾವಾತ್ ಮ್ಹಣ್ ಕೊಣೆಂಚ್ ಚಿಂತುಂಕ್ ನಾತ್‌ಲ್ಲೆಂ ತೆಂ ಖಂಡಿತ್.

19-ವ್ಯಾ ಶೆಕ್ಡ್ಯಾಚಾ ಅಂತ್ಯಾಕ್, ಮನ್ಶ್ಯಾಚ್ಯಿ ವ ಮನ್ಜಾತಿಂಚ್ಯಿ ಚಲಾವಣ್ ಕೆಮರಾಂತ್ ಧರುನ್ ದವರುಂಕ್ ಜಾಯಿತ್ತ್ಯಾನಿ ಸಾಧನ್ ಕೆಲೆಂ. ತ್ಯಾ ಪಯ್ಕಿ, ತೊಮಸ್ ಆಲ್ವಾ ಎಡಿಸನಾಚೆಂ ನಾಂವ್ ಪಯ್ಲೆಂ ಗಮನಾಕ್ ಯೆತಾ. ಆಧುನಿಕ್ ಸಂಸಾರಾರ್ ಘರಾಂ-ಘರಾಂನಿ ವೀಜ್-ಸಕತ್ ಪಾವೊಂಕ್ ಪ್ರಮುಖ್ ಕಾರಾಣ್ ಜಾಲ್ಲ್ಯಾ ಅಮೆರಿಕಾಚ್ಯಾ ಹ್ಯಾ ಉದ್ಯಮಿನ್, ಸಿನೆಮಾಂತ್ ಆತುರಾಯ್ ದಾಕಯಿಲ್ಲ್ಯಾಂತ್ ನವಾಲ್ ನಾ. ಹಾಣೆಂ, ವಿಲ್ಲಿಯಮ್ ಕೆನೆಡಿ ಆನಿ ಲೊರಿ ಡಿಕ್ಸನ್ ಹಾಂಚ್ಯಾ ಸಂಗಿಂ ಮೆಳೊನ್, 1891 ಇಸ್ವೆಂತ್, ಕನೆಟೊಸ್ಕೋಪ್ (Kinetoscope) ನಾಂವಾಚೊ ಸಿನೆಮಾ ಪ್ರೊಜೆಕ್ಟರ್ ಆಸಾ ಕೆಲೊ.

ಹ್ಯಾ ಕನೆಟೊಸ್ಕೋಪಾಂತ್, ಎಕಾ ಬುರಾಕಾಂತ್ಲ್ಯಾನ್, ಏಕ್ ಪಾವ್ಟಿಂ ಎಕ್ಲ್ಯಾನ್ ಮಾತ್ ಪಳೆಂವ್ಕ್ ಜಾಂವ್ಚ್ಯೆ ತಸಲ್ಯಾ, ಸಿನೆಮಾಚೊ ಪ್ರಯೋಗ್ ಜಾಲೊ. 35 ಮಿಲಿಮೀಟರ್ ಫಿಲ್ಮಾಚ್ಯೆರ್ ಕೆಲ್ಲೆಂ ಹೆಂ ರೆಕೊರ್ಡಿಂಗ್, ಮುಕಾರ್, ಸರ್ವ್ ಫಿಲ್ಮಾಂಕ್ ಏಕ್ ದೇಕ್ ಜಾಲೆಂ.

ಚಡುಣೆ ತ್ಯಾಚ್ ಆವ್ದೆಂತ್, 1895 ಇಸ್ವೆಂತ್, ಫ್ರಾನ್ಸಾಂತ್, ಅಗುಸ್ಟ್ ಆನಿ ಲುವಿಸ್ ಲುಮಿಯೆರ್ (Auguste and Louis Lumière) ಭಾವಾಂನಿ ಮೆಳೊನ್, ಸಿನೆಮಾಟೊಗ್ರಾಫ್ (Cinématographe) ನಾಂವಾಚೊ, ಕನೆಟೊಸ್ಕೋಪಾಚಾಕೀ ಲ್ಹಾನ್ ಗಾತ್ರಾಚೊ, ಹಾತಾನ್ ಘುಂವ್ಡಾವ್ನ್ ರೆಕೊರ್ಡ್ ಕರ್ಚೊ ಕೆಮೆರಾ ರಚ್ಲೊ. ಎಡಿಸನಾಚಾ ಮೆಶಿನಾಂತ್, ಎಕ್ಲ್ಯಾನ್ ಮಾತ್ ಪಿಂತುರಾಂ ಪಳೆಂವ್ಚೆಕಡೆ, ಸಿನೆಮಾಟೊಗ್ರಾಫ್ ಕೆಮೆರಾ ಎಕಾ ಪ್ರೊಜೆಕ್ಟರಾ ಬರಿ ವಾಪರ್ಚ್ಯಿ ಸಾಧ್ಯತಾ ಆ‌ಸ್‌ಲ್ಲ್ಯಾನ್, ಸಭಾರ್ ಜಣಾಂಕ್, ಧವ್ಯಾ ಪಡ್ದ್ಯಾರ್ ಸಾಂಗಾತಾ ಪಿಂತುರಾಂ ಪಳೆಂವ್ಕ್ ಸಾಧ್ಯ್ ಜಾಲೆಂ. 1895 ಇಸ್ವೆಚಾ, ದಶೆಂಬರ್ 28 ತಾರ್ಕೆರ್, ಸಿನೆಮಾಟೊಗ್ರಾಫಾ ದ್ವಾರಿಂ ಸಾರ್ವಜನಿಕ್ ಪ್ರದರ್ಶನ್ ಕೆಲ್ಲೆಂ ಪಯ್ಲೆಂ ಚಲಚಿತ್ರ್, ಫ್ರಾನ್ಸಾಂತ್ ಸಾಧರ್ ಜಾಲೆಂ. 

ಆರಂಭಾರ್, ಸಿನೆಮಾ ಫಕತ್, ರಯ್ಲಾ ಸಂಚಾರ್, ಆವಯೊ ಆನಿ ಬಾಳ್ಶಿಂ ವ ಫೆಕ್ಟರಿಂತ್ಲೆ ಕಾಮಾಗಾರ್, ಅಶೆಂ ಸಾಮಾನ್ಯ್ ಸಂಗ್ತಿಂಚೆರ್ ಕೇಂದ್ರಿತ್ ಜಾಲ್ಲೆಂ ತರಿ, ಕ್ರಮೇಣ್, ಹ್ಯಾ ಮಾದ್ಯಮಚೊ ಪ್ರಭಾವ್ ಬುದ್ವಂತಾಂಕ್ ಕಳೊನ್ ಆಯ್ಲೊ. ಹಾಂಚ್ಯೆ ಪಯ್ಕಿ, ಫ್ರಾನ್ಸಾಚೊ, ಜೊರ್ಜ್ ಮೆಲಿಯಾಸ್ (Georges Méliès) ನಾಂವಾಚೊ ಮನಿಸ್ ನಾಂವಾಡ್ದಿಕ್ ಮ್ಹಣ್ಯೆತ್. ಹಾಣೆ 1902 ಇಸ್ವೆಂತ್ ತಯಾರ್ ಕೆಲ್ಲೆಂ, ’ಎ ಟ್ರಿಪ್ ಟು ದ ಮೂನ್’ (A Trip to the Moon) ನಾಂವಾಚ್ಯೆಂ, ತ್ಯಾ ಕಾಳಾರ್ ವಿಜ್ನಾನ್ ಆನಿ ಸ್ರಜಾನಾತ್ಮಕ್ ಚಿಂತಾಪ್ ಮೆಳೊನ್ ಉಬ್ಜಲ್ಲೆಂ, ವಿಶೇಸ್ ಚಲಚಿತ್ರ್ ಮ್ಹಣ್ಯೆತ್. 

20-ವ್ಯಾ ಶೆಕ್ಡ್ಯಾಚಾ ಆರಂಭಾರ್‌ಚ್, ಯುರೊಪಾಂತ್, ಫ್ರಾನ್ಸ್ ಮಾತ್ ನ್ಹಯ್ ಆಸ್ತಾಂ, ಬ್ರಿಟನ್, ಜರ್ಮನಿ, ಇಟೆಲಿ, ರಷ್ಯಾಂತ್, ಸಿನೆಮಾಚ್ಯೆಂ ವಾರೆಂ ಘುಸ್ಲೆಂ.  

ಭಾರತಾಂತ್, ಸಿನೆಮಾಚೊ ಪ್ರವೇಶ್ ಜಾಲ್ಲೊ, 1896 ಇಸ್ವೆಚಾ ಜುಲಾಯ್ 7 ತಾರ್ಕೆರ್. ಲುಮಿಯೆರ್ ಭಾವಾಂಚ್ಯಾ ’ಸಿನೆಮಾಟೊಗ್ರಾಫ್’ ಪ್ರೊಜೆಕ್ಟರಾ ದ್ವಾರಿಂ, ಮುಂಬಯಿಚಾ ’ವಾಟ್ಸನ್ ಹೊಟೆಲಾಂತ್’ ಮಟ್ವ್ಯಾ ಮೂಕ್-ಫಿಲ್ಮಾಂಚ್ಯಿ ದಾಖವ್ಣಿ ಚಲ್ಲಿ. 1897 ಇಸ್ವೆಂತ್, ಇಟೆಲಿಚ್ಯಾ, ಕೊಲೊರೆಲ್ಲೊ ಆನಿ ಕೊರ್ನಾಲಿಯಾ (Colorello and Cornaglia) ಹಾಣಿಂ, ಮುಂಬಯಿಚಾ ’ಅಜಾದ್ ಮಯ್ದಾನಾರ್’, ಹೆರ್ ಥೊಡಿಂ ಮೂಕ್-ಫಿಲ್ಮಾಂ ದಾಕಯ್ಲಿಂ. ಭಾರತೀಯಾನಿ ಕಾಡ್‌ಲ್ಲ್ಯಾ ಪಯ್ಲ್ಯಾ ಫಿಲ್ಮಾಂ ಪಯ್ಕಿ, ಹರಿಶ್ಚಂದ್ರಾ ಬಟ್ವಾಡೆಕರ್ ಹಾಣೆ 1899 ಇಸ್ವೆಂತ್ ಕಾಡ್‌ಲ್ಲೆಂ ಚಲಚಿತ್ರ್, ಪ್ರಮುಖ್ ಮ್ಹಣ್ಯೆತ್. ತಾಣೆಂ, ಎಡಿಸನಾನ್ 1896 ಇಸ್ವೆಂತ್ ಆಸಾ ಕೆಲ್ಲೆಂ, ಪಡ್ದ್ಯಾರ್ ಫಾಂಕಂವ್ಚ್ಯೆ ತಸಲೆಂ ’ಪ್ರೊಜೆಕ್ಟೊಸ್ಕೋಪ್’ ವಾಪರುನ್, ತಾಚ್ಯಾ ಚಲಚಿತ್ರಾಂಚೆಂ ಪ್ರದರ್ಶನ್ ಕೆಲೆಂ. ತ್ಯಾ ಪಾಟಾಪಾಟ್, ಹೀರಾಲಾಲ್ ಸೇನ್ ಆನಿ ಎಫ್. ಬಿ. ಥಾನಾವಾಲಾ ಹ್ಯಾ ದೊಗಾಂನಿ, ಮುಂಬಯ್ ಆನಿ ಕಲ್ಕತ್ತಾಂತ್ 19-ವ್ಯಾ ಶೆಕ್ಡ್ಯಾಚ್ಯಾ ಆಖೇರಿಕ್, ಚಲಚಿತ್ರಾಂ ರಚ್ಲಿಂ. ಥಾನಾವಾಲಾಚಿಂ ’ಸ್ಪ್ಲೆಂಡಿಡ್ ನ್ಯೂ ವ್ಯೂಸ್ ಒಫ್ ಬೊಂಬೇ’ (Spledid new views of Bombay) ಆನಿ ’ಟ್ಯಾಬೂ ಪ್ರೊಸೆಶ್ಶನ್’ (Taboot Procession) 1900 ಇಸ್ವೆಂತ್ ಆಯ್ಲಿಂ ತರ್, ಹೀರಾಲಾಲ್ ಸೇನಾಚ್ಯೆಂ, ’ಇಂಡಿಯನ್ ಲೈಫ್ ಎಂಡ್ ಸೀನ್ಸ್’ (Indian life and scenes), 1903 ಇಸ್ವೆಂತ್ ಸಾಧರ್ ಜಾಲೆಂ. 

ಭಾರತಾಚಾ ಬೊಲಿವುಡ್ ಸಂಸ್ಕ್ರತೆಚ್ಯೆಂ ಸಾರ್ಕೆಂ ಆರಂಭ್ ಜಾಲ್ಲೆಂ, ದಾದಾಸಾಹೆಬ್ ಪಾಳ್ಕೆಚ್ಯಾ, ’ರಾಜಾ ಹರಿಶ್ಚಂದ್ರ’ ನಾಂವಾಚ್ಯಾ, ಚಲಚಿತ್ರಾ ದ್ವಾರಿಂ ಮ್ಹಣ್ಯೆತ್. 1913 ಇಸ್ವೆಂತ್ಲೆಂ ಹೆಂ ಏಕ್ ಮೂಕ್ ಚಲಚಿತ್ರ್ ತರೀ, ಬುಕಾಂತ್ಲಿ ಏಕ್ ಕಾಣಿ, ಫಿಲ್ಮಾ ದ್ವಾರಿಂ ಲೊಕಾ ಮುಕಾರ್ ಹಾಡುನ್, ಹ್ಯಾ ಮಾದ್ಯಮಾಚೊ ಪ್ರಭಾವ್ ದಾಕಯಿಲ್ಲಿ ಕೀರ್ತ್, ದಾದಾಸಾಹೇಬ್ ಪಾಳ್ಕೆಚ್ಯಿ.  

ಚಲಚಿತ್ರಾಂಕ್ ಭೋವ್‌ಚ್ ಗರ್ಜೆಚ್ಯಾ ಆವಾಜಾಚೊ ಯೆವ್ಕಾರ್ ಜಾಲ್ಲೊಚ್, ಸಿನೆಮಾ ಸಂಸಾರಾಚಿ ಚರಿತ್ರಾಚ್ ಬದ್ಲಾಲಿ ಮ್ಹಣ್ಚ್ಯಾಕ್ ದೋನ್ ಉತ್ರಾಂ ನಾಂತ್. ಮೂಕ್-ಫಿಲ್ಮಾಂ ಥಾವ್ನ್ ಉಲಂವ್ಚ್ಯಾ ಫಿಲ್ಮಾಂಕ್ ಪರಿವರ್ತನ್ (silent films to “talkies”) ಜಾಂವ್ಚ್ಯಾ ಬರಾಬರ್, ಸಿನೆಮಾ ಪ್ರದರ್ಶನ್ ಕರ್ಚ್ಯಾ ಘರಾಂಕ್, ’ಟಾಕೀಸ್’ ಮ್ಹಳ್ಳೆಂ ನಾಂವ್ ಆಯಿಲ್ಲೆಂ ಹ್ಯಾಚ್ ಕಾಳಾರ್. ತಾಂತ್ರಿಕತೆಂತ್ ಅಭಿವ್ರದ್ದಿ ಜಾವ್ನ್, ಸಿನೆಮಾಂತ್ ಉಲವ್ಣೆಂ ಆಯ್ಕೊಂಕ್ ಮೆಳ್ಚ್ಯಾ ಸಂಗಿಂ, ಕಥೆಚೆಂ ನಿರೂಪಣ್, ಕಲಾಕಾರಾಂಚಾ ನಟನಾಚ್ಯಿ ರೀತ್, ದ್ರಶ್ಯಾಂಚ್ಯಿ ಗಂಭೀರಾಯ್, ಸಗ್ಳೆಂಯೀ ಬದ್ಲೊನ್ ಆಯ್ಲೆಂ.

ಚಲಚಿತ್ರಾಂತ್ ಆವಾಜ್ ಮಿಸ್ಳಾಯಿಲ್ಲಿ ಕೀರ್ತ್, 1926 ಇಸ್ವೆಂತ್, ಅಮೆರಿಕಾಚಾ ನ್ಯೂಯೊರ್ಕಾಂತ್ ಸಾಧರ್ ಜಾಲ್ಲ್ಯಾ ’ಡೊನ್ ಹುವಾನ್’ (Don Juan) ಫಿಲ್ಮಾಕ್ ಫಾವೊ ಜಾತಾ. ಹ್ಯಾ ಚಲಚಿತ್ರಾಂತ್, ಉಲವ್ಣೆಂ ನಾತ್‌ಲ್ಲೆಂ ತರೀ, ಸಂಗೀತ್ ಆಸ್‌ಲ್ಲೆಂ ತೆಂ ಲೊಕಾಚೆಂ ಮನ್ ಪಿಸ್ವಾಂವ್ಕ್ ಪಾವ್ಲೆಂ. 

ಫಿಲ್ಮಾಂನಿ, ಉಲವ್ಣೆ ಆನಿ ಗಾಯನ್ ದೊನೀ ಸಾಂಗಾತಾ ಆಸಾ ಕೆಲ್ಲಿ ಕೀರ್ತ್, 1927 ಇಸ್ವೆಂತ್ ಕಾಡ್‌ಲ್ಲ್ಯಾ, ’ದ ಜಾಝ್ ಸಿಂಗರ್’ (The Jazz Singer) ಫಿಲ್ಮಾಚ್ಯಿ. ವಾರ್ನರ್ ಬ್ರದರ್ಸ್ ಸಂಸ್ಥ್ಯಾನ್, ಬರ‍್ಯಾಚ್ ಖರ್ಚಾರ್ ರಚ್‌ಲ್ಲೆಂ ಹೆಂ ಫಿಲ್ಮ್, ಚರಿತ್ರೆಂತ್ ಅಮರ್ ಜಾಲೆಂ. ಹ್ಯಾ ಚಲಚಿತ್ರಾ ದ್ವಾರಿಂ, ಸಿನೆಮಾ ಉದ್ಯಮಾಚ್ಯೆಂ ಭವಿಷ್ಯ್ ಥಿರ್ ಜಾಲೆಂ ಮ್ಹಣ್ ಮ್ಹಣ್ತಾತ್ ಜಾಣ್ತೆ. 

ಫಕತ್ ಕಾಳೊ ಆನಿ ಧವೊ ರಂಗ್ ಆಸೊನ್, ಸಿನೆಮಾಚೊ ಆರಂಭ್ ಜಾಲ್ಲೊ ತರೀ, ರಂಗಾಳ್ ಫಿಲ್ಮಾಂ, ರಾತ್ ವಚೊನ್ ದೀಸ್ ಯೆಂವ್ಚ್ಯಾ ಭಿತರ್ ಸುರು ಜಾಲ್ಲಿಂ ನ್ಹಯ್. ತಾಂತ್ರಿಕತೆಂತ್ ದಿಸಾನ್ ದೀಸ್ ಅಭಿವ್ರದ್ದಿ ಜಾಲಿ ತರೀ, ತ್ಯಾ ಸುರ್ವಿಲ್ಯಾ ವರ್ಸಾಂನಿ, ಫಿಲ್ಮಾಂನಿ ರಂಗ್ ಆಸಾ ಕರುಂಕ್ ಲಾಗ್ಚೊ ಖರ್ಚ್ ಆನಿ ತೇಂಪ್, ವ್ಹಡ್ಲಿ ಆಡ್ಕಳ್ ಜಾಲೊ.

1908 ಇಸ್ವೆಂತ್, ಕನೆಮಾಕಲರ್ (Kinemacolor) ನಾಂವಾಚ್ಯಿಂ, ತಾಂಬ್ಡೊ ಆನಿ ಪಾಚ್ವೊ ರಂಗ್ ಭರ್ಸುನ್ ಕಾಡ್‌ಲ್ಲಿಂ ಮಟ್ವಿಂ ಡೊಕ್ಯುಮೆಂಟರಿ ಫಿಲ್ಮಾಂ ದಾಕವ್ಣೆಕ್ ಪಡ್ಲಿಂ. 1922 ಇಸ್ವೆಂತ್, ಟೆಕ್ನಿಕಲರ್ (Technicolor Process 2) ರಂಗಾಚ್ಯಿ ಸುರ್ವಾತ್ ಜಾಲಿ. ಅಶೆಂ ಜಾಲ್ಲಿ ಸುರ್ವಾತ್, 1932 ಇಸ್ವೆಂತ್, ತ್ರೀ-ಸ್ಟ್ರಿಪ್-ಪ್ರೊಸೆಸ್ (Technicolor’s Three-Strip Process) ನಾಂವಾಚ್ಯಾ, ತಾಂಬ್ಡೊ, ಪಾಚ್ವೊ ಆನಿ ನಿಳ್ಸೊ ರಂಗ್ ಭರ್ಸೊನ್, ಪಳೆತಾನಾ ಸಹಜ್‌ಚ್ ಮ್ಹಣ್ ಭೊಗ್ಚ್ಯಾ, ರಂಗಾಳ್ ಫಿಲ್ಮಾಂಕ್ ರಚುಂಕ್ ಸಕ್ಲಿ. ಹ್ಯಾ ನವ್ಯಾ ಪ್ರಯೋಗಾಚ್ಯೆರ್ ಉದೆಲ್ಲೆಂ ಪ್ರಥಮ್ ಫಿಲ್ಮ್ ಜಾವ್ನಾಸಾ, 1932 ಇಸ್ವೆಂತ್ಲೆಂ, ವಾಲ್ಟ್ ಡಿಸ್ನಿಚೆಂ ’ಫ್ಲವರ್ಸ್ ಎಂಡ್ ಟ್ರೀಸ್’ (Flowers and Trees) ನಾಂವಾಚ್ಯೆಂ ಕಾರ್ಟೂನ್ ಫಿಲ್ಮ್. 

1950 ಥಾವ್ನ್ 1960 ಇಸ್ವೆಂ ಮಧೆಂ, ಈಸ್ಟ್‌ಮನ್ ಕಲರ್ (Eastmancolor) ನಾಂವಾಚ್ಯಿ, ಉಣ್ಯಾ ಖರ್ಚಾಚ್ಯಾ ರಂಗಾಚ್ಯಿ, ನವಿ ತಾಂತ್ರಿಕತಾ ಚಲಾವಣೆಂತ್ ಆಯ್ಲಿ. 1970 ಇಸ್ವೆಯಿತ್ಲ್ಯಾಕ್, ಸಿನೆಮಾ ಉದ್ಯಮಿನಿ, ಕಾಳೆಂ-ಧವೆಂ ಸಿನೆಮಾ ಕರ್ಚ್ಯೆಂ, ಪುರ್ತೆಂ ರಾವಯ್ಲೆಂ ಮ್ಹಣ್ಯೆತ್.

ಕೊಣೆಂಯ್ ಕಿತ್ಲಿಯ್ ವಾಂವ್ಟ್ ಕಾಡ್ಲ್ಯಾರೀ, ಕೆಮರಾ ನಾ ತರ್, ತ್ಯಾ ವಾಂವ್ಟಿಚೊ ಪ್ರತಿಫಳ್ ದಾಕಂವ್ಕ್ ಅಸಾಧ್ಯ್. ಕೆಮರಾ, ಸಿನೆಮಾಚ್ಯೆಂ ಕಾಳಿಜ್ ಜಾವ್ನಾಸಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಹ್ಯಾ ಕೆಮರಾಚ್ಯಾ ಆಕಾರಾಚ್ಯಿ ಬದ್ಲಾವಣ್, ವಜನಾಂತ್ ಫರಕ್, ತಾಂತ್ರಿಕತೆಂತ್ ಅಭಿವ್ರದ್ದಿ ಸಗ್ಳೆಂ ಸಾಂಗಾತಾ ಮೆಳೊನ್, ಫಿಲ್ಮ್-ಕರ್ತಾಂಕ್, ಸಕ್ಟಾಚ್ಯಾಕೀ ಗರ್ಜೆಚೆಂ ಉಪಕರಣ್ ಜಾಲಾ ಮ್ಹಣ್ಚಾಕ್, ದೋನ್ ಉತ್ರಾಂ ನಾಂತ್. ಆರಂಭಾಚ್ಯಾ, ಹಾತಾನ್ ಘುಂವ್ಡಾಂವ್ಚಾ ವಿಡಿಯೊ ಕೆಮರಾಂ ಥಾವ್ನ್, ಆಯ್ಚ್ಯಾ ಆಧುನಿಕ್, ಡಿಜಿಟಲ್ ವಿಡಿಯೊ ಕೆಮರಾಂ ಪರ‍್ಯಾಂತ್ ಕೆಮರಾಂಚ್ಯಾ ತಾಂತ್ರಿಕತೆಂತ್ ಜಾಲ್ಲ್ಯಾ ಅಭಿವದ್ದೆಕ್ ಲಾಗೊನ್, ಆಜ್ ವಿಡಿಯೊ ಕೆಮರಾ, ಫಿಲ್ಮಾಂ ಕರ್ತೆಲ್ಯಾಂಕ್, ಆಪ್ಲಿ ಕಾಣಿ ಸಾಂಗೊಂಕ್ ಸಾಧ್ಯ್ ಕರ್ಚ್ಯೆಂ ಹಾತೆರ್ ಜಾಲಾ. 

ಮನ್ಶ್ಯಾಚ್ಯೆ ದೊಳೆ, ಎಕಾ ಸೆಕುಂದಾಕ್ 124 ಫ್ರೇಮ್ (frames per second -fps) ಪಳೆಂವ್ಕ್ ಸಕ್ತಾತ್ ತರೀ, ಮತಿಂತ್ ಧರುನ್ ದವರುಂಕ್ ಜಾಂವ್ಚ್ಯೆ ಮ್ಹಳ್ಯಾರ್ 24 fps ಮಾತ್ರ್. ಎಡಿಸನಾಚ್ಯಾ ಕನೆಟೋಸ್ಕೋಪ್ ಆನಿ ಲುಮಿಯೇರ್ ಭಾವಾಂಚ್ಯಾ ಸಿನೆಮಾಟೊಗ್ರಾಫ್ ಕೆಮರಾನಿ, ಹಾತಾನ್ ರೀಲ್ ಘುಂವ್ಡಾವ್ನ್ ರೆಕೊರ್ಡಿಂಗ್ ಕರ್ತಾಲೆ. ಹ್ಯಾ ರೆಕೊರ್ಡಿಂಗಾಂತ್ ಚಡಾವತ್ ಜಾವ್ನ್ 16 fps ವೇಗಾನ್ ರೆಕೊರ್ಡಿಂಗ್ ಜಾತಾಲೆಂ. ಅಶೆಂ ರೆಕೊರ್ಡ್ ಕೆಲ್ಲಿಂ ಫಿಲ್ಮಾಂ, ಸುಡಾಳ್ ವ್ಹಾಳ್ಚಿಂ ನ್ಹಯ್ ಆಸ್ತಾಂ, ಮಧೆಂ-ಮಧೆಂ ಉಡ್ತಾಲಿಂ. ಅಸಲ್ಯಾ ಚಲಚಿತ್ರಾಂಚೊ ಅನುಭವ್, ಪ್ರಾಯ್ವಂತಾಂಕ್ ಖಂಡಿತ್ ಆಸಾ.

1910 ಇಸ್ವೆಯಿತ್ಲ್ಯಾಕ್, ವಿಡಿಯೊ ಕೆಮರಾನಿ ಅಭಿವ್ರದ್ದಿ ಜಾಲಿ ಆನಿ 24 fps ವೇಗಾನ್ ಫಿಲ್ಮಾಂ ರೆಕೊರ್ಡ್ ಕರುಂಕ್ ಸಾಧ್ಯ್ ಜಾಲೆಂ. ಹ್ಯಾ ಆವ್ದೆಂತ್, ಫಿಲ್ಮಾಂನಿ ಮಧೆಂ-ಮಧೆಂ ಉಡ್ಚ್ಯೆಂ ಉಣೆ ಜಾವ್ನ್ ಆಯ್ಲೆಂ ಆನಿ ಪ್ರೇಕ್ಷಕಾಂಕ್ ಅಸಲಿಂ ಫಿಲ್ಮಾಂ ಮೆಚ್ವಣೆಚ್ಯಿಂ ಜಾಲಿಂ. ನವೆ-ನವೆ ಕೆಮರಾ ಕರ್ಚ್ಯೆ ಉದ್ಯಮ್ ಸುರು ಜಾಲೆ ಆನಿ ತ್ಯಾ ಪಯ್ಕಿ ನಾಮ್ಣೆಚ್ಯಿ ಕಂಪೆನಿ ಮ್ಹಳ್ಯಾರ್ 1907 ಇಸ್ವೆಂತ್ ಸುರ್ವಾತಿಲ್ಲಿ, ’ಬೆಲ್ಲ್ ಎಂಡ್ ಹವೆಲ್ ಕಂಪೆನಿ.’ ಹಾಂಚೊ, 1920 ಇಸ್ವೆಂತ್ ಸೊಧುನ್ ಕಾಡ್‌ಲ್ಲೊ, ’Bell & Howell 2709’ ನಾಂವಾಚೊ ಕೆಮರಾ ಸಕ್ಡಾಂಕ್ ಮೊಗಾಚೊ ಜಾಲೊ. ತ್ಯಾ ಉಪ್ರಾಂತ್, ಅಮೆರಿಕಾಂತ್, 1937 ಇಸ್ವೆಂತ್, ಆರ್ರಿಫ್ಲೆಕ್ಸ್ 35 (Arriflex 35) ನಾಂವಾಚಾ ಕೆಮರಾನ್ ಫಿಲ್ಮ್ ಕರ್ತಾಂಕ್ ನವಿಚ್ ವಾಟ್ ಉಗ್ತಿ ಕೆಲಿ. ಎದೊಳ್, ಎಕಾ ಸ್ಟೇಂಡಾಚೆರ್ ಮಾಂಡುನ್ ದವರ್ಚೊ ಕೆಮರಾ, ಆತಾಂ ಹಾತಾಂತ್ ಧರುನ್ ಕಸಲ್ಯಾಯೀ ಕಷ್ಟಾಂಚಾ ದ್ರಶ್ಯಾಚ್ಯೆಂ ರೆಕೊರ್ಡಿಂಗ್ ಕರುಂಕ್ ಉಪ್ಕಾರಾಚೊ ಜಾಲೊ.

2000 ಇಸ್ವೆಯಿತ್ಲ್ಯಾಕ್, ಕೆಮರಾ ತಾಂತ್ರಿಕತೆಂತ್ ಒಳ್ಕಿಕ್ ಆಯಿಲ್ಲ್ಯಾ ’ಡಿಜಿಟಲ್’ (Digital systems) ನವೆಸಾಂವಾ ಸಂಗಿಂ, ಫೊಟೊಗ್ರಾಫಿಂತ್ ಏಕ್ ಮಹಾನ್ ಕ್ರಾಂತಿ ಉಬ್ಜಾಲಿ ಮ್ಹಣ್ಚ್ಯಾಕ್ ದುಬಾವ್ ನಾ. ಸೋನಿ ಕಂಪೆನಿಚೊ, Sony CineAlta F900 ನಾಂವಾಚೊ ಆನಿ ಜಿಮ್ ಜೆನ್ನಾರ್ಡ್ (Jim Jannard) ಮ್ಹಳ್ಳ್ಯಾನ್ ಸೊಧುನ್ ಕಾಡ್‌ಲ್ಲೊ, RED ONE ಕೆಮರಾ, ಫಿಲ್ಮ್-ಕರ್ತಾಂಕ್ ಭಾರಿಚ್ ಉಪ್ಕಾರಾಚ್ಯೆ ಜಾಲೆ. ಹಾಕಾ ಪ್ರಮುಖ್ ಕಾರಾಣ್ ಮ್ಹಳ್ಯಾರ್, ರೆಕೊರ್ಡ್ ಕೆಲ್ಲ್ಯಾ ಫಿಲ್ಮಾಚೆಂ ಎಡಿಟಿಂಗ್ ಕರ್ಚಿ ಸಲಿಸಾಯ್. ಎದೊಳ್, ರೆಕೊರ್ಡ್ ಕೆಲ್ಲ್ಯಾ ರೀಲಾಂ ಥಾವ್ನ್, ಗರ್ಜ್ ನಾತ್‌ಲ್ಲೆ ಫ್ರೇಮ್, ಕಾತ್ರಿನ್ ಕಾತ್ರಾಪ್ ಕರ್ಚಿ ಗರ್ಜ್ ಆಸ್‌ಲ್ಲಿ ಆನಿ ಅಶೆಂ ಕಾತ್ರಾಪ್ ಕರುಂಕ್ ಆನಿ ತ್ಯಾ ಉಪ್ರಾಂತ್ ತಾಳೆ ಆನಿ ಸಂಗೀತ್ ಸಾರ್ಕೆಂ ತಾಳ್ ಪಡ್ಚ್ಯೆಬರಿ ಕರುಂಕ್, ದೀಸ್‌ಚ್ ನ್ಹಯ್, ಮ್ಹಯ್ನೆಯೀ ಲಾಗ್ತಾಲೆ. ಹ್ಯಾ ಕಾಮಾ ಖಾತಿರ್, ಸಭಾರ್ ಜಣಾಂಚ್ಯಿ ಕುಮಕ್ ಗರ್ಜ್ ಪಡ್ತಾಲಿ. ಪುಣ್ ’ಡಿಜಿಟಲ್’ ಫೊಟೊಗ್ರಾಫಿಂತ್, ಹೆ ಸಗ್ಳೆ ಕಷ್ಟ್ ನಿವಾರ್ಲೆ ಆನಿ ಎದೊಳ್ ಬೆಸೊರಾಚ್ಯಿಂ ಮ್ಹಣ್ ಲೆಕ್‌ಲ್ಲಿಂ ಕಾಮಾಂ, ಭಾರಿಚ್ ಸುಲಭಾಯೆಚ್ಯಿಂ ಜಾಲಿಂ.

ಹ್ಯಾ ಡಿಜಿಟಲ್ ತಾಂತ್ರಿಕತೆನ್ ಸಭಾರ್ ಸಂಗ್ತಿ ಬದ್ಲಿಲ್ಯೊ. ಎದೊಳ್, ಸಾರ್ಕೊ ಹವೊ ವ ಉಜ್ವಾಡ್ ನಾಸ್ತಾಂ ರೆಕೊರ್ಡಿಂಗ್ ಕರುಂಕ್ ಅಸಾಧ್ಯ್ ಆಸ್ಚ್ಯೆಕಡೆ, ಕಸಲ್ಯಾಯೀ ಉಜ್ವಾಡಾಂತ್ ಫಿಲ್ಮಾಂ ಕಾಡುಂಕ್ ಸಾಧ್ಯ್ ಜಾಲೆಂ. ರೆಕೊರ್ಡ್ ಕೆಲ್ಲಿಂ ಫಿಲ್ಮ್ ರೀಲಾಂ ದವರುಂಕ್ ಥೊಡೊಸೊ ಜಾಗೊ ಮಾತ್ ನ್ಹಯ್, ತಿಂ ಪಾಡ್ ಜಾಯ್ನಾತ್‌ಲ್ಲೆ ಬರಿ ಜೊಗಾಸಾಣೆನ್ ದವರುಂಕ್ ಪಡ್ಚ್ಯಿ ಆನಿ ದವರುಂಕ್ ಗರ್ಜ್ ಪಡ್ಚಾ ಜಾಗ್ಯಾಚಿ ಗರ್ಜ್, ನಪಂಯ್ಚ್ ಜಾಲಿ. ಆದ್ಲ್ಯಾ ಕಾಳಾರ್, ಫಿಲ್ಮಾಚ್ಯಿಂ ರಿಲಾಂ, ಎಕಾ ಥಿಯೆಟರಾ ಥಾವ್ನ್, ಆನ್ಯೇಕಾ ಥಿಯೆಟರಾಕ್, ಸೈಕಲಾಚ್ಯೆರ್ ವ ರಿಕ್ಶಾಚ್ಯೆರ್ ವ್ಹರ್ಚ್ಯಿ ಗರ್ಜ್ ಆಸ್‌ಲ್ಲಿ ತಿ ಆಜ್-ಕಾಲ್, ಫಕತ್ ಕಂಪ್ಯೂಟರಾಚ್ಯೆರ್ ಫಿಲ್ಮಾಚ್ಯೆಂ ವಿತರಣ್ ಜಾತಾ ಜಾಲ್ಲ್ಯಾನ್, ಫಿಲ್ಮ್ ವಿತರಣೆಚ್ಯೆಂ ಕಾಮ್ ಸುಲಭ್ ಜಾಲಾಂ.

ವಿಡಿಯೊ ಕೆಮರಾಂತ್, 35ಮಿಲಿಮೀಟರ್ ರುಂದಾಯೆಚ್ಯೆಂ ಫಿಲ್ಮ್ ವಾಪರ್ನ್ ರೆಕೊರ್ಡಿಂಗ್ ಕರ್ಚ್ಯೆಂ ತೆಂ, ಸಗ್ಳ್ಯಾ 19-ವ್ಯಾ ಶೆಕ್ಡ್ಯಾಂತ್ ಸಗ್ಳ್ಯಾ ಸಂಸಾರಾರ್ ಮಾಂದುನ್ ಘೆತ್‌ಲ್ಲೆಂ ಮಾಪ್ ಜಾವ್ನಾಸ್‌ಲ್ಲೆಂ. ತೊಮಸ್ ಆಲ್ವಾ ಎಡಿಸನಾನ್, 1890 ಇಸ್ವೆಂತ್ ಹ್ಯಾ ಫಿಲ್ಮಾಚ್ಯಿ ಒಳೊಕ್ ಕರುನ್ ದಿಲ್ಲಿ. 20-ವ್ಯಾ ಶೆಕ್ಡ್ಯಾಚಾ ಸುರ್ವೆಯಿತ್ಲ್ಯಾಕ್, ಮೂಕ್ ಆನಿ ಆವಾಜ್ ಆಸ್‌ಲ್ಲ್ಯಾ ಚಲಚಿತ್ರಾಂನಿ ಹಾಚೊ ಉಪ್ಯೋಗ್ ಸದಾಂಚೊ ಜಾಲೊ. ಕ್ರಮೇಣ್, 1923 ಇಸ್ವೆಂತ್, ಧಾಕ್ಟಿಂ ಡೊಕ್ಯುಮೆಂಟರಿ ತಸಲಿಂ ಚಲಚಿತ್ರಾಂ ಉಣ್ಯಾ ಖರ್ಚಾರ್ ಕಾಡುಂಕ್, 16 ಮಿಲಿಮೀಟರಾಂಚೆಂ ಫಿಲ್ಮ್ ಉದೆಲೆಂ. ತಿತ್ಲೆಂಚ್ ನ್ಹಯ್ ಆಸ್ತಾಂ, 1930 ಇಸ್ವೆಂತ್, 8 ಮಿಲಿಮೀಟರ್ ರುಂದಾಯೆಚೆಂ ಫಿಲ್ಮ್‌ಯೀ ಪಳೆಂವ್ಕ್ ಮೆಳ್ಳೆಂ. 1965 ಇಸ್ವೆಂತ್, ಮಟ್ವ್ಯೊ ಕಥಾ ಉಣ್ಯಾ ಖರ್ಚಾರ್ ಚಲಚಿತ್ರಾಂ ರುಪಾನ್ ಕಾಡ್ಚ್ಯಾ ವಾಟೆನ್, ಸುಪರ್ 8 ನಾಂವಾಚ್ಯಾ (Super 8) 8 ಮಿಲಿಮೀಟರ್ ಫಿಲ್ಮಾಚೊ ಯೆವ್ಕಾರ್‌ಯೀ ಜಾಲೊ. ಆಸಲ್ಯಾ 8 ಮಿಲಿಮೀಟರ್  ಫಿಲ್ಮಾಂ ದ್ವಾರಿಂ, ಜಾಯಿತ್ತ್ಯಾ ನವ್ಯಾ ಫಿಲ್ಮ್ ಡೈರೆಕ್ಟರಾಂಕ್, ತರ್ಭೆತಿ ದೀಂವ್ಕ್ ಸುಲಭ್ ಜಾಲೆಂ.

ಹೆಂ ಸರ್ವ್ ಘಡ್ತಾನಾ, ವ್ಹಡ್ ಚಲಚಿತ್ರಾಂನಿ, 35 ಮಿಲಿಮೀಟರ್ ಫಿಲ್ಮಾಂ ವಾಪರ್ಚ್ಯಿ ಸವಯ್ ತಶಿಚ್ ಉರ್ಲಿ. ಕ್ರಮೇಣ್, ಕಲರ್ ಸಿನೆಮಾ ಯೆಂವ್ಚಾ ಸಂಗಿಂ, ಫಿಲ್ಮ್ 35 ಮಿಲಿಮೀಟರ್ ರುಂದಾಯೆಚ್ಯೆಂ ಜಾವ್ನ್ಂಚ್ ಉರ್ಲೆಂ ತರೀ, ಹ್ಯಾ ಫಿಲ್ಮಾಚ್ಯೆಂ ಗುಣಮಟ್ಟ್ ಬರೆಂಚ್ ಉಂಚಾಯೆಕ್ ಪಾವ್ಲೆಂ. ಉಪ್ರಾಂತ್, ಆಯ್ಲೆಂ 1953 ಇಸ್ವೆಂತ್ಲೆಂ ಸಿನೆಮಾಸ್ಕೋಪ್ (Cinemascope) ವಾರೆಂ. ಪಡ್ದ್ಯಾರ್, ಸಿನೆಮಾಚಿ ರುಂದಾಯ್ ಚಡ್ ಜಾವ್ನ್ ಉಬಾರಾಯ್ ಉಣಿ ಜಾಲಿ ತರೀ, ಫಿಲ್ಮ್-ಕರ್ತಾಂನಿ, ಚಡಿತ್ ಸಕ್ತೆಚ್ಯಿಂ ಲೆನ್ಸಾಂ (lense) ವಾಪರುನ್, ಹಿ ಮಾಂಡಾವಳ್, 35 ಮಿಲಿಮೀಟರ್ ಫಿಲ್ಮಾಚ್ಯೆರ್‌ಚ್ ಸೊಂಬಾಸಾರ್ಕಿ ಕೆಲಿ. ಅಸಲ್ಯಾ ರೂಂದ್ ಕಾಲೆತಿಚ್ಯಾ ಚಲಚಿತ್ರಾಂನಿ ಮುಕಾರ್, ವಿಸ್ಟಾ-ವಿಜನ್ (VistaVision), ಪಾನಾವಿಜನ್ (Panavision) ಆನಿ ಟೊಡ್-ಎಓ (Todd-AO) ನಾಂವಾಂಚ್ಯೆ ನವೆ ಪ್ರಾಕಾರ್ ಉಬ್ಜೊಂಚ್ಯಾ ಸಂಗಿಂ, ಚಲಚಿತ್ರಾಂ ಪಳೆಂವ್ಚ್ಯಿ ಮಝಾ, ಹಜಾರ್ ವಾಂಟ್ಯಾಂನಿ ಚಡ್ಲಿ.

ತ್ಯಾ ಉಪ್ರಾಂತ್, 70 ಮಿಲಿಮೀಟರ್ ಆನಿ ಐಮ್ಯಾಕ್ಸ್ (IMAX) ಸಿನೆಮಾಂಚೊ ಉದೆವ್ ಜಾಲೊ. ಭೋವ್‌ಚ್ ವ್ಹಡ್ಲ್ಯಾ ಪಡ್ದ್ಯಾಂಚ್ಯೆರ್ ಪ್ರದರ್ಶಿತ್ ಕರ್ಚ್ಯಾ ಅಸಲ್ಯಾ ಚಲಚಿತ್ರಾಂಚೊ ಖರ್ಚ್ ಅಪಾರ್ ಜಾವ್ನಾಸಾ. ಅಸಲಿಂ ಚಲಚಿತ್ರಾಂ ಪ್ರದರ್ಶಿತ್ ಕರ್ಚ್ಯಿಂ ಐಮ್ಯಾಕ್ಸ್ (IMAX) ಥಿಯೆಟರಾಂ ಭೋವ್‌ಚ್ ಥೊಡಿಂ. 2000 ಇಸ್ವೆ ಥಾವ್ನ್ ಸುರು ಜಾಲ್ಲ್ಯಾ ಡಿಜಿಟಲ್ ರೆಕೊರ್ಡಿಂಗಾ ಸಂಗಿಂ, ಫಿಲ್ಮಾಂಚೊ ಪ್ರಭಾವ್ ಉಣೊ ಜಾಲೊ ಮಾತ್ರ್ ನ್ಹಯ್, ಆಖೇರ್‌ಚ್ ಜಾಲೊ ಮ್ಹಣ್ಯೆತ್.

2000 ಇಸ್ವೆ ನಂತರ್ ಜಾಲ್ಲಿ ಹಿ ಡಿಜಿಟಲ್ ಕ್ರಾಂತಿ, ಆಜ್-ಕಾಲ್ ಆಮ್ಚ್ಯಾ ಹಾತಿಂ ಆಸ್ಚಾ ಫೊನಾಂನಿ ಆಮ್ಕಾಂ ದಾರಾಳ್ ಪಳೆಂವ್ಕ್ ಮೆಳ್ತಾ. ಹಿ ಡಿಜಿಟಲ್ ಕ್ರಾಂತಿ ಜಾಂವ್ಕ್ ನಾತ್‌ಲ್ಲಿ ತರ್, ಮೊಬಾಯ್ಲ್ ಫೊನಾಂ ಉದೆತಿಂ ನಾಂತ್ ತೆಂ ಖಂಡಿತ್. ನವೆ ರಸ್ತೆ ಕರ್ತಾನಾ, ಥೊಡೆಶ್ಯಾಂ ಘರಾಂಚ್ಯಿ ದೆಸ್ವಾಟ್ ಕರಿಜಾಯ್ ಪಡ್ತಾ ತಶೆಂ ಡಿಜಿಟಲ್ ತಾಂತ್ರಿಕತೆ ವರ್ವಿಂ, ಥೊಡಿಶಿಂ ಕಾಮಾಂ ಆನಿ ದಂದೆ ಬುಡೊನ್ ಗೋಳ್ ಜಾಲಾ. 

ಸಿನೆಮಾಕ್, ಸಂಸಾರಾಚಾ ವಿವಿಧ್ ಸಂಸ್ಕ್ರತ್ಯಾಂ ಆನಿ ಭಾಶೆಂ ಮಧೆಂ ಎಕ್ವಟ್ ಹಾಡ್ಚಾ ಸಕ್ತಿಕ್ ಲಾಗೊನ್, ಏಕ್ ಜಾಗತಿಕ್ ಭಾಸ್ ಮ್ಹಳ್ಳೆಂ ಬಿರುದ್ ದಿಲಾಂ. ಸಿನೆಮಾಚೊ ಜಾಗತಿಕ್ ಪ್ರಭಾವ್, ಕೊಣಾಯ್ಕಿ ವಿಜ್ಮಿತ್ ಕರುಂಕ್ ಸಕ್ತಾ. ಸಿನೆಮಾನ್ ಆಜ್ ಮನೊರಂಜನ್ ಮಾತ್ರ್ ನ್ಹಯ್ ಆಸ್ತಾಂ, ರಾಜಕೀಯಾಂತ್, ಸಂಸ್ಕ್ರತೆಂತ್ ತಶೆಂಚ್ ಆರ್ಥಿಕ್ ಕ್ಶೇತ್ರಾಂತ್ ಜಾಯಿತ್ತ್ಯೊ ಬದ್ಲಾವಣ್ಯೊ ಆಸಾ ಕೆಲ್ಯಾತ್. ವಿದೇಶಿ ಗಾಂವಾಂನಿ, ಹವ್ಯಾಸಾ ಥರಾನ್ ಸುರು ಜಾಲ್ಲೆಂ ಸಿನೆಮಾ, ಥೊಡ್ಯಾಚ್ ತೆಂಪಾನ್ ಸಗ್ಳ್ಯಾ ಸಂಸಾರಾರ್ ವಿಸ್ತಾರೊನ್, ಆಜ್, ಮನ್ಶ್ಯಾಂ ಮಧೆಂ ಸಂಬಂಧ್ ಆಸಾ ಕರ್ಚ್ಯೆಂ, ಎಕಾಮೆಕಾಚಾ ಆಲೊಚನ್ಯಾಂಕ್ ಉಗ್ತಾಡಾಕ್ ಹಾಡುಂಕ್ ಸಕ್ಚ್ಯೆಂ ಆನಿ ಮನ್ಶ್ಯಾಂ ಮಧ್ಲ್ಯಾ ವೈವಿದ್ಯತಾಯೆಕ್ ಏಕ್ ರೂಪ್ ದಿಂವ್ಚ್ಯೆಂ ಮಾದ್ಯಮ್ ಜಾಲಾಂ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. 

■ ಸುನಂದ್