ಸತಾಚಾ ಪಾಡ್ತಿನ್ ಕಿಟಾಳಾಚಿಂ ‘ಪಂದ್ರಾ’ ವರ್ಸಾಂ

ಆಜ್ ಫೆಬ್ರೆರ್ 5, ಕಿಟಾಳ್ ಸುರು ಜಾವ್ನ್ ಆಯ್ಚ್ಯಾ ದಿಸಾ ಪಂದ್ರಾ ವರ್ಸಾಂ ಸಂಪ್ತಾತ್. 2011 ವರ್ಸಾ ಆಯ್ಚ್ಯಾ ದಿಸಾ ಮಂಗ್ಳುರ್ಚ್ಯಾ ಸಂದೇಶ ಸಭಾಸಾಲಾಂತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಕಿಟಾಳ್ ಜಾಳಿಸುವಾತೆಕ್ ಚಾಲನ್ ದಿಲ್ಲೆಂ. ವಿಶ್ವ ಕೊಂಕಣಿ ಸರ್ದಾರ್ ಬಸ್ತಿ ವಾಮನ್ ಶೆಣೈ, ಮಾ| ಬಾ| ವಲೇರಿಯನ್ ಮೆಂಡೋನ್ಸಾ ಆನಿ ರೊಯ್ ಕಾಸ್ತೆಲಿನೊ ಹ್ಯಾ ಕಾರ್ಯಾಕ್ ಸಯ್ರೆ ಜಾವ್ನ್ ಹಾಜರ್ ಆಸೊನ್ ತಾಣಿ ಮ್ಹಾಕಾ ಬರೆಂ ಮಾಗ್‌ಲ್ಲೆಂ.

ತವಳ್ ಪಾಸುನ್ ಆಜ್ ಮೆರೆನ್, ಆಪ್ಲ್ಯಾ ಸಿದ್ದಾಂತಾಂತ್ ಆನಿ ಧೋರಣಾಂತ್ ಕಸಲೀಚ್ ಸೊಡ್‌ದೊಡ್ ಕರಿನಾಸ್ತಾನಾ, ಖಳಾನಾಸ್ತಾನಾ – ಕಥಾ , ಕವಿತಾ, ಕಾದಂಬರಿ, ವಿಮರ್ಸೊ, ವಿನೋದ್, ಲೇಖನಾಂ, ಖಬ್ರೊ, ವಿಶ್ಲೇಷಣಾಂ, ಸಂದರ್ಶನಾಂ ಅಶೆಂ ಸಮಗ್ರ್ ಕೊಂಕ್ಣಿ ಸಾಹಿತ್ಯಾಕ್ ಸಮರ್ಪಿತ್ ಜಾಳಿಸುವಾತ್; ನಿರಂತರ್ ಪಂದ್ರಾ ವರ್ಸಾಂ ಥಾವ್ನ್ – ಸಮಸ್ತ್ ಕೊಂಕಣಾಂತ್ ಫಾಯ್ಸ್ ಜಾವ್ನ್ ಆಸಾ ಜಾಲ್ಯಾರ್ ತೀ ‘ಕಿಟಾಳ್’ ಮಾತ್.

ಕಿಟಾಳ್ ಸುರು ಜಾಂವ್ಚ್ಯಾ ಪಯ್ಲೆಂ ಆನಿ ಕಿಟಾಳ್ ಸುರು ಜಾಲ್ಯಾ ಉಪ್ರಾಂತ್ – ಕೊಂಕ್ಣೆಂತ್ ಜಾಯ್ತೆ ಜಾಳಿಜಾಗೆ ಆಯ್ಲ್ಯಾತ್, ಚಡ್ ಮ್ಹಳ್ಯಾರ್ ತೀನ್ ತೆ ಚಾರ್ ವರ್ಸಾಂ ಚಲ್ಲ್ಯಾತ್ ಆನಿ ಆಯಿಲ್ಲ್ಯಾಚ್ ವೆಗಾನ್ ಮಾಯಾಗ್ ಜಾಲ್ಯಾತ್. ಆನಿ ಥೊಡೆ ವೇಸ್ ಬದ್ಲುನ್ ಪಾಟಿಂ ಆಯ್ಲ್ಯಾತ್. ಪೂಣ್ ಖಳಾನಾಸ್ತಾನಾ , ವೇಸ್ ಬದ್ಲಿನಾಸ್ತಾನಾ, ಮೂಳ್ ಸಿದ್ದಾಂತಾಕ್ ಆನಿ ಧೋರಣಾಕ್ ಚಿಡ್ಕೊನ್ ರಾವೊನ್, ನಿರಂತರತಾ ಸಾಂಬಾಳ್ನ್ ಪಾಟ್ಲ್ಯಾ ಪಂದ್ರಾ ವರ್ಸಾಂ ಪಾಸುನ್ ಎಕೀನ್ಪಣಿ ಫಾಯ್ಸ್ ಜಾವ್ನ್ ಆಸಾ ‘ಕಿಟಾಳ್’ ಮಾತ್.

‘ಆಮಿಂಚ್ ಪಯ್ಲೆ ಆನಿ ಆಮ್ಚೆಂಚ್ ಪಯ್ಲೆಂ’ ಮ್ಹಣ್ ಡಬ್ಬೆ ಬಡಯ್ತೆಲ್ಯಾಂ ಮಧೆಂ, ಖಳಾನಾಸ್ತಾನಾ ಆನಿ ವೊಳಾನಾಸ್ತಾನಾ ಕಿಟಾಳ್ ಚಲೊನ್ ಆಯಿಲ್ಲಿ ವಾಟ್ ಫುಲಾಂ – ಪಾಕ್ಳ್ಯಾಂನಿ ಸಜಯಿಲ್ಲಿ ಕಾಂಯ್ ನಯ್. ಪಾಟ್ಲ್ಯಾ ಪಂದ್ರಾ ವರ್ಸಾಂನಿ ಕಿಟಾಳಾ ವರ್ವಿಂ ಹಾಂವೆ ಕಿತೆಂ ಜೊಡ್ಲಾಂ, ಆನಿ ಕಿತೆಂ ಹೊಗ್ಡಾಯ್ಲಾಂ; ತೆಂ ಹಾಂವ್ ಜಾಣಾಂ. ಆನಿ ಮ್ಹಜ್ಯಾ ಥೊಡ್ಯಾ ಖಾಸ್ ಇಶ್ಟಾಂಕೀ ಹಾಚಿ ಖಬರ್ ಆಸಾ. ಫಟಿಂಚ್ಯಾ ಬಜಾರಾಂತ್, ಹುಕುಮ್‌ಶಾಹೀ ವೆವಸ್ತೆಂತ್ ಸತಾಚಿ ಪಾಡ್ತ್ ಘೆಂವ್ಚಿ ಆನಿ ಸತಾಚ್ಯಾ ಪಾಡ್ತಿನ್ ರಾಂವ್ಚೆಂ ಸುಲಭ್ ಕಾಮ್ ನಯ್.

ಹಾಂವೆ – ‘ಕಿಟಾಳ್’ ಸುರು ಕೆಲ್ಲೊ ಮುಕೆಲ್ ಉದ್ದೇಶ್ – ಕೊಂಕ್ಣಿ ಸಾಹಿತ್ಯಾ ಥಂಯ್ ತರ್ನ್ಯಾ ಬರಯ್ಣಾರಾಂಕ್ ಆಕರ್ಷಿತ್ ಕರ್ಚೊ, ತಾಂಚೆಂ ತಾಲೆಂತ್ ಒಳ್ಕೊಂಚೊಂ, ತಾಂಚೆಂ ಸಾಹಿತ್ಯ್ ಪರ್ಗಟ್ ಆನಿ ಪ್ರಸಾರ್ ಕರ್ಚೊ.

‘ಕಿಟಾಳ್’  ಸುರು ಜಾಲ್ಲ್ಯಾ ದಿಸಾ ಹಾಂವೆ ಸ್ಪಶ್ಟ್ ಮ್ಹಳ್ಳೆಂ – ಕಿಟಾಳಾರ್ ಎದೊಳ್‌ ಫಾಯ್ಸ್ ಜಾಯ್ನಾತ್ಲ್ಯಾ ನವ್ಯಾ ಸಾಹಿತ್ಯಾಕ್ ಪಯ್ಲೊ ಅವ್ಕಾಸ್. ಎದೊಳ್‌ಚ್ ಪ್ರಕಾಶಿತ್ ಜಾವ್ನ್ ಮುದ್ರಣ್ ಮಾದ್ಯಮಾಂತ್ ಆಸ್ಚೆಂ ಸಾಹಿತ್ಯ್ ಟೈಪ್ ಕರ್ನ್ ಫಾಯ್ಸ್ ಕರ್ಚೆಂ ‘ಡಿಜಿಟಲೈಸೇಷನ್’ ಕಾಮ್ ಕಿಟಾಳ್ ಕರಿನಾ. ಹಾಂವೆ ಅಶೆಂ ಸಾಂಗ್‌ಲ್ಲೆಂ ಆಯ್ಕೊನ್ ಥೊಡ್ಯಾ ಮಾಲ್ಘಡ್ಯಾ ಬರಯ್ಣಾರಾಂಕ್ ಮ್ಹಜೇರ್ ಬೆಜಾರ್ ಜಾಲ್ಲೆಂ ಆಸಾ. ಪೂಣ್ ಹಾಂವ್ ಮಾತ್ ರಾಜಿ ಜಾಂವ್ಕ್ ನಾ. ಹೆರ್ ಕರ್ತಾತ್ ಮ್ಹಣ್ ಹಾಂವೀ ಡಿಜಿಟಲೈಸೇಷನ್ ಕರುಂಕ್ ಗೆಲೊಂ ತರ್ – ನವೆಂ ಸಾಹಿತ್ಯ್ ಕಶೆಂ ಯೆತಾಲೆಂ ? ಸವ್ಕಾಸ್ ಮ್ಹಜೆಂ ತರ್ಕ್ ಮಾಲ್ಘಡ್ಯಾ ಬರಯ್ಣಾರಾಂಕೀ ಅರ್ಥ್ ಜಾಲೆಂ ಆನಿ ತಾಂಚೆ ಥಾವ್ನ್‌ಯೀ ಕಿಟಾಳಾಕ್ ಭರ್ಪೂರ್ ಸಹಕಾರ್ ಮೆಳ್ಳೊ. ತಸೆಂ ಮ್ಹಣ್ ಕಿಟಾಳಾರ್ ಹ್ಯಾ ಆದಿಂ ಫಾಯ್ಸ್ ಜಾಲ್ಲೆಂ ಸಾಹಿತ್ಯ್ ಫಾಯ್ಸ್ ಕರುಂಕ್‌ಚ್ ನಾ ಮ್ಹಣ್ ನಯ್ – ಕೊಂಕ್ಣಿ ಸಾಹಿತ್ಯಾಂತ್ಲೆಂ ಕ್ಲಾಸಿಕ್ ಮ್ಹಣ್ಚೆ ತಸಲೆಂ ಸಾಹಿತ್ಯ್ ತವಳ್ – ತವಳ್, ತ್ಯಾ ಸಾಹಿತ್ಯ್ ಕೃತಿಯೆಚ್ಯಾ ಅಸ್ವಾದನ್ ಬರ್ಪಾ ಸಾಂಗಾತಾ ಕಿಟಾಳಾರ್ ಫಾಯ್ಸ್ ಕೆಲಾಂ. ಆನಿ ಸಾಹಿತ್ಯಾಚಾ ವಿದ್ಯಾರ್ಥಿಂಕ್ ಹೆಂ ಉಪ್ಕಾರಾಕ್ ಪಡ್ಲಾಂ.

‘ಕಿಟಾಳ್’ ಸುರು ಜಾತಾನಾ, ಕೆನಾರಾಚ್ಯಾ ಕೊಂಕ್ಣಿ ಸಾಹಿತ್ಯ್ ವರ‍್ತುಲಾಂತ್ ಯುವ ಸಾಹಿತಿಂಕ್ ವಿಚಾರ್ತಲೊ ನಾ – ಮ್ಹಣ್ಚೆ ತಸಲಿ ಅಘೋಷಿತ್ ಪರಿಸ್ಥಿತಿ ಆಸ್ಲಿ. ಕೊಂಕ್ಣೆಂತ್ ಪುರಸ್ಕಾರ್ – ಪ್ರಶಸ್ತ್ಯೊ ದಿಂವ್ಚಿಂ ಕಾಂಯ್ ಡಜನ್ ಭರ್ ಸಂಘಟನಾಂ ಆಸ್ಲಿಂ. ಕಾಂಯ್ ಥೊಡಿಂ ಫಕತ್ ವರ್ಸಾಕ್ ಏಕ್ ಪಾವ್ಟಿಂ ಪ್ರಶಸ್ತಿ ದೀಂವ್ಕ್ ಮ್ಹಣ್ ಆಳ್ಯ್ಮಾಪರಿಂ ಉದೆಲ್ಲಿಂಯ್ ಆಸ್ಲಿಂ. ಪೂಣ್ ಸಗ್ಳೆ ಪುರಸ್ಕಾರ್ ಆನಿ ಸಗ್ಳೆ ಪ್ರಶಸ್ತ್ಯೊ ಫಕತ್ ಮಾಲ್ಘಡ್ಯಾಂತ್ ಮಾತ್ರ್. (ಆತಾಂಯ್ ಪರಿಸ್ಥಿತಿ ಕಾಂಯ್ ವೆಗ್ಳಿ ನಾ.) ಎಕ್ಲ್ಯಾನ್ ಎಕ್ಲ್ಯಾಕ್ ಪುರಸ್ಕಾರ್ ದೀಂವ್ಕ್ ಸುರು ಕರ್ಚೊಚ್ ತಡವ್ – ನಾ ಮುಂದು,ತಾ ಮುಂದು ಮ್ಹಣ್ ಪಂತಾಟಾನ್ ಪಡೊನ್ ಮ್ಹಳ್ಳೆಪರಿಂ ಹರೇಕಾ ಸಂಘಟನಾನ್ ದಿಲ್ಲ್ಯಾಕ್‌ಚ್ ಪರ್ತ್ಯಾನ್ ಪರ್ತ್ಯಾನ್ ಪುರಸ್ಕಾರ್ – ಪ್ರಶಸ್ತ್ಯ್ಯೊ ದಿಂವ್ಚೆ. ಹಿ ಪರಿಸ್ಥಿತಿ ಆಜ್‌ಯೀ ಬದ್ಲೊಂಕ್ ನಾ. ಆನಿ ವ್ಹಡ್ ವಿಪರ್ಯಾಸ್ ಮ್ಹಳ್ಯಾರ್ ಅಸಲ್ಯಾ ಪ್ರಶಸ್ತಿ – ಪುರಸ್ಕಾರ್ ಪ್ರಧಾನ್ ಕಾರ್ಯಾಂನಿಂ ‘ಯುವಜಣಾಂನಿ ಮುಕಾರ್ ಯೇಜೆ; ನಯ್ ಜಾಲ್ಯಾರ್ ಕೊಂಕ್ಣಿ ಮರ್ತಾ’ ಮ್ಹಳ್ಳಿಂ ಭಾಶಣಾಂ.

ಹೆ ವಿಶ್ಯಾಂತ್ ಹಾಂವೆ ಥೊಡ್ಯಾ ಸಂಘಟನಾಂಚ್ಯಾ ಫುಡಾರ‍್ಯಾಂಕ್ 2010 ವರ್ಸಾಚ್ಯಾ ಆಸ್‌ಪಾಸ್ ಸಾಂಗ್‌ಲ್ಲೆಂ ಸಯ್ತ್. ಪೂಣ್ ಪ್ರತಿಸಾದ್ ಮಾತ್ ಶೂನ್ಯ್. ಕಾಳೊಕಾಕ್ ದುರ್ಸೊನ್ ಬಸ್ಚ್ಯಾ ಬಾದ್ಲಾಕ್ ಹಾಂವ್‌ಚ್ ಏಕ್ ವಾತ್ ಪೆಟಯ್ತಾಂ ಮ್ಹಣ್ ಹಾಂವೆ 2012 ವರ್ಸಾ ಕಿಟಾಳಾಚ್ಯಾ ಪಯ್ಲ್ಯಾ ವರ್ಸುಗೆ ದಿಸಾ ಕಿಟಾಳ್ ಯುವ ಪುರಸ್ಕಾರ್ ಸುರು ಕೆಲೊ. ಫುಲೊನ್ ಯೆಂವ್ಚ್ಯಾ ಯುವ ಬರಯ್ಣಾರಾಂಚೆಂ ತಾಲೆಂತ್ ಒಳ್ಕುನ್ ತಾಂಕಾ ಉತ್ತೇಜನ್ ದಿಂವ್ಚೆಂ ಆನಿ ಪರ್ಗಟ್ ಮಾನ್ ಕರ್ಚೊ ಜಾವ್ನಾಸ್ಲೊ ಮ್ಹಜೊ ಇರಾದೊ. ಇರಾದೊ ನೇಕ್ ಆನಿ ಶೆವೊಟ್ ಸ್ಪಷ್ಟ್ ಆಸ್ಲ್ಯಾರ್ – ತುಮಿ ಕರ್ಚ್ಯಾ ಪ್ರಾಮಾಣೀಕ್ ಕಾಮಾಕ್ ಬರ‍್ಯಾಮನಾಚೆ ಮನಿಸ್ ಉಗ್ತ್ಯಾ ಮನಾನ್ ಪಾಟಿಂಬೊ ದಿತಾತ್ ಮ್ಹಣ್ಚ್ಯಾಕ್ ಸಾಕ್ಸ್ – ಅಬುದಾಬಿಚೊ ಅನಿವಾಸಿ ಉದ್ಯಮಿ ಆನಿ ಕೊಂಕ್ಣಿ ಸಮರ್ಥಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಹಾಣಿ ಕಿಟಾಳ್ ಯುವ ಪುರಸ್ಕಾರಾಕ್ ದಿಲ್ಲೊ ತೆಂಕೊ. ಕಿಟಾಳ್ ಯುವ ಪುರಸ್ಕಾರ್ ವಿಜೇತ್ ಯುವ ಸಾಹಿತಿ ಆಜ್ ಕೊಂಕ್ಣಿ ಸಾಹಿತ್ಯಾಚಾ ಮಳ್ಬಾರ್ ಪರ್ಜಳಿತ್ ನೆಕೆತ್ರಾಂ ಜಾವ್ನ್ ಉಜ್ವಳ್ತೇ ಆಸಾತ್.

ಯುವ ಬರಯ್ಣಾರಾಂಕ್ ಕೊಂಕ್ಣಿ ಸಾಹಿತ್ಯಾ ಥಂಯ್ ಆಕರ್ಷಿತ್ ಕರುನ್ ತಾಂಚೆ ಸಾಹಿತ್ಯ್ ಜಾಳಿಜಾಗ್ಯಾರ್ ಫಾಯ್ಸ್ ಕೆಲ್ಯಾರ್ ಆನಿ ತಾಂಚೆಂ ಸಾಹೀತೀಕ್ ತಾಲೆಂತ್ ಒಳ್ಕುನ್ ತಾಂಕಾ ವರ್ಸಾಕ್ ಏಕ್ ಪಾವ್ಟಿಂ ಯುವ ಪುರಸ್ಕಾರ್ ಪಾಟವ್ನ್ ಮಾನ್ ಕೆಲ್ಯಾರ್ ಪುರೊ ? ಎಕಾ ಬರವ್ಪ್ಯಾಕ್ ಸಾಹಿತಿ ಮ್ಹಣ್ ಒಳಕ್ ಜೊಡುನ್ ದಿಂವ್ಚೆಂ ಫಾಯ್ಸ್ ಜಾಂವ್ಚ್ಯಾ ತಾಚ್ಯಾ ಬುಕಾಂನಿ. ದೆಕೂನ್ ಪಯ್ಲೆಂ ಎವರ್‌ಶೈನ್ ಪ್ರಕಾಶನ್ ಆನಿ ಉಪ್ರಾಂತ್ ಕಿಟಾಳ್ ಪ್ರಕಾಶನಾ ಮಾರಿಫಾತ್ ಜಾಯ್ತ್ಯಾ ಯುವ ಬರಯ್ಣಾರಾಂಚಿಂ ಪುಸ್ತಕಾಂಯ್ ಉಜ್ವಾಡಾಕ್ ಹಾಡ್ಚೆಂ ಕಾಮ್ ಹಾಂವೆ ಹಾತಿಂ ಘೆಜಾಯ್ ಪಡ್ಲೆಂ. ಆಜ್ ಮೆರೆನ್ ತರ್ನೆ ಆನಿ ಮಾಲ್ಘಡೆ ಬರಯ್ಣಾರ್ ಮ್ಹಣ್ ಸುಮಾರ್ ಪಂದ್ರಾ ಪುಸ್ತಕಾಂ ಕಿಟಾಳ್ ಪ್ರಕಾಶನಾ ಮುಕಾಂತ್ರ್ ಫಾಯ್ಸ್ ಕೆಲ್ಯಾಂತ್ ಆನಿ ಎವರ್‌‌ಶೈನ್ ಆನಿ ಕಿಟಾಳ್ ಪ್ರಕಾಶನಾ ಮುಕಾಂತ್ರ್ ಉಜ್ವಾಡಾಕ್ ಆಯಿಲ್ಲ್ಯಾ ಚಡಾವತ್ ಪುಸ್ತಕಾಂಕ್; ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ವಿಶ್ವ ಕೊಂಕಣಿ ಕೇಂದ್ರ್, ಡೊ| ಟಿ. ಎಮ್. ಪೈ. ಫಾಂವ್ಡೇಶನ್ – ತಸಲ್ಯಾ ಸಂಸ್ಥ್ಯಾಂ ಥಾವ್ನ್ ಪುರಸ್ಕಾರ್ ಲಾಭ್ಲ್ಯಾತ್.

ಸಾತಾಟ್ ಜಣಾಂನಿ ಸಾಂಗಾತಾ ಮೆಳೊನ್ ಏಕ್ ಟ್ರಸ್ಟ್‌ಗೀ, ಏಕ್ ಸಂಸ್ಥೊಗೀ ಉಬಾರುನ್ ಕರ್ಚೆಂ ತಸಲೆಂ ಕಾಮ್ ಪಾಟ್ಲ್ಯಾ ಪಂದ್ರಾ ವರ್ಸಾಂನಿ ಕಿಟಾಳಾ ಮುಕಾಂತ್ರ್ ಹಾಂವೆ ಕಾಮ್ ಕೆಲಾಂ ಮ್ಹಣ್ಚಿ ವರ್ತಿ ದಾದೊಸ್ಕಾಯ್ ಆಜ್ ಮ್ಹಾಕಾ ಆಸಾ.

ನವೆಂ ಸಾಹಿತ್ಯ್ ರುತಾ ಕರ‍್ಚೆಂ ಹರ್ ಪ್ರೇತನ್ ಕೆಲಾಂ, ತೇ ಖಾತೀರ್ ಥೊಡೆ ಪಾವ್ಟಿಂ ಕಾಂಯ್ ಸ್ಪರ್ಧೆ ಮಾಂಡುನ್ ಹಾಡ್ಲ್ಯಾತ್, ಪುಸ್ತಕಾಂ ಉಜ್ವಾಡಾಕ್ ಹಾಡ್ಲ್ಯಾಂತ್, ಯುವ ಸಾಹಿತಿಂಕ್ ಪುರಸ್ಕಾರ್ ಪಾಟವ್ನ್ ಉತ್ತೇಜನ್ ದಿಂವ್ಚೆಂ ಪ್ರಾಮಾಣಿಕ್ ಪ್ರೇತನ್ ಕೆಲಾಂ. ಆನಿ ಹ್ಯಾ ವಾವ್ರಾಂತ್ ಮ್ಹಜ್ಯಾ ಖಾಸ್ಗಿ ಕಾಮಾಕ್, ಕುಟ್ಮಾಕ್ ಕಾಂಯ್ ಥೊಡೆ ತ್ರಾಸ್ ಜಾಲ್ಯಾತ್. ಮ್ಹಜೆಂ ಬರಪ್ ಉಣೆಂ ಜಾಲಾಂ. ತರೀ 2017 ವಾ ವರ್ಸಾ ‘ಬೀಗ್ ಆನಿ ಬಿಗಾತ್’ ಕಾಣಿಯಾಂ ಪುಸ್ತಕ್, 2021 ವ್ಯಾ ವರ್ಸಾ ‘ಕೊಂಕ್ಣಿ ಕಾವ್ಯೆಂ : ರುಪಾಂ ಆನಿ ರೂಪಕಾಂ’ ಸಮಿಕ್ಶೆಚೆಂ ಪುಸ್ತಕ್ ಆನಿ ಆದ್ಲ್ಯಾ ವರ್ಸಾ ‘ಜನೆಲ್’ ಕವಿತೆಚೆಂ ಪುಸ್ತಕ್ ಫಾಯ್ಸ್ ಕೆಲಾಂ.

ಹ್ಯಾ ಮಧೆಂ ಮ್ಹಾಕಾ ವಿಶ್ವ ಕೊಂಕಣಿ ಕೇಂದ್ರಾ ಥಾವ್ನ್ ಶ್ರೀಮತಿ ವಿಮಲ್ ಪೈ ಸಾಹಿತ್ಯ್ ಪುರಸ್ಕಾರ್, ಕವಿತಾ ಟ್ರಸ್ಟಾ ಥಾವ್ನ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ಪುಸ್ತಕ್ ಆನಿ ಗವ್ರವ್ ಪುರಸ್ಕಾರ್, ಗೋವಾ ಕೊಂಕಣಿ ಅಕಾಡೆಮಿ ಥಾವ್ನ್ ಪುಸ್ತಕ್ ಪುರಸ್ಕಾರ್ ಆನಿ ದಕ್ಷಿಣ ಕನ್ನಡ ಜಿಲ್ಲ್ಯಾಚಿ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತೀಯ್ ಲಾಭ್ಲ್ಯಾ.

ಸಂಘಟನಾಚ್ಯಾ ಮಾಳಾರ್ 2023 ವರ್ಸಾ ಮಂಗ್ಳುರಾಂತ್ ಜಾಲ್ಲ್ಯಾ ಪಂಚ್ವೀಸಾವ್ಯಾ ಅಖಿಲ್ ಭಾರತ್ ಕೊಂಕಣಿ ಸಾಹಿತ್ಯ ಸಂಮೇಳಾಚೊ ಕಾರ್ಯಾಧ್ಯಕ್ಶ್ ಜಾವ್ನ್ ಹಾಂವ್ ವಾವುರ್ಲಾಂ, ಪ್ರಸ್ತುತ್ ಸಾಹಿತ್ಯ ಅಕಾಡೆಮಿ, ನವೀ ಡೆಲ್ಲಿ ಕೊಂಕ್ಣಿ ಸಲ್ಹಾಗಾರ್ ಸಮಿತಿಂತ್ ವಾಂಗ್ಡಿ ಆನಿ ಅಕಿಲ್ ಭಾರತ್ ಕೊಂಕ್ಣಿ ಸಾಹಿತ್ಯ ಪರಿಶದೆಚೊ ಖಜಾನ್ದಾರ್ ಮ್ಹಣ್ ವಾವುರ್ನ್ ಆಸಾಂ.

And you shall know the truth, and the truth shall make you free (John 8:32)

ತುಮಿ ಸತಾಚ್ಯಾ ಪಾಡ್ತಿನ್ ರಾವ್ಲ್ಯಾರ್; ಸತ್‌ಚ್ ತುಮ್ಕಾಂ ಸುಟ್ಕಾ ದಿತಾ. ಆಜ್ ಮೆರೆಚ್ಯಾ ಮ್ಹಜ್ಯಾ ಜಿವಿತಾಂತ್ ಅನ್ಭೊಗಾನ್ ಹೆಂ ಹಾಂವ್ ಶಿಕ್ಲಾಂ. ಸಗ್ಳೊ ಸಂಸಾರ್ ಮ್ಹಾಕಾ ವಿರೋದ್ ರಾವ್ಲ್ಯಾರೀ, ಹಾಂವ್ ಸತಾಚ್ಯಾ ಪಾಡ್ತಿನ್ ರಾವ್ಲಾಂ. ಹಾಂವ್ ಸತಾಚ್ಯಾ ಪಾಡ್ತಿನ್ ರಾವ್ಲಾಂ ದೆಕೂನ್ ಸತಾನ್ ಸದಾಂಚ್ ಮ್ಹಾಕಾ ಸಾಂಗಾತ್ ದಿಲಾ ಮ್ಹಣ್ಚ್ಯಾಕ್ ಅನ್ಯೇಕ್ ಸಾಕ್ಸ್ ಖತ್ಕತೊ ಕೊಂಕ್ಣಿ ಪ್ರೇಮಿ ಮಾನೆಸ್ತ್ ಮೈಕಲ್ ಡಿ ಸೊಜಾ ಹಾಣಿ ಪುಸ್ತಕಾಂ ಫಾಯ್ಸ್ ಕರ್ಚ್ಯಾ ಯೆವ್ಜಣೆಕ್ ದಿಲ್ಲೊ ಬೋವ್ ವ್ಹಡ್ ಸಾಂಗಾತ್. ಕಿಟಾಳ್ ಪ್ರಕಾಶನಾ ಮುಕಾಂತ್ರ್, ಯುವ ಬರಯ್ಣಾರಾಂಚೆಂ ವರ್ಸಾಕ್ ಏಕ್ ವಾ ದೋನ್ ಪುಸ್ತಕಾಂ ಫಾಯ್ಸ್ ಕರುಂಕ್ ಕಾಂಯ್ ಛಾಪ್ಯಾಚೊ ಖರ್ಚ್ ದಿಯಾ ಮ್ಹಣ್ ತಾಂಚೆಲಾಗಿಂ ಮಾಗ್ಲೆಲ್ಯಾಕ್, ಪರಿಸ್ಥಿತಿಚೆಂ ಅವಲೋಕನ್ ಆನಿ ಅಭ್ಯಾಸ್ ಕರುನ್ ತಾಣಿ ದಿಲ್ಲೊ ತೆಂಕೊ. ಶೆಂಬೊರ್ ಬೂಕ್ – ಚಾಳಿಸ್ ಲಾಕ್  ರುಪಯ್ ಅನುದಾನ್ – ಪಾಂಚ್ ವರ್ಸಾಂ. ಮೈಕಲ್ ಡಿ ಸೊಜಾ ವಿಶನ್ ಕೊಂಕಣಿ ಪುಸ್ತಕ್ ಅನುದಾನ್ ಯೋಜನ್.

ಇತ್ಲ್ಯಾ ವ್ಹಡ್ ಮಾಪಾಚೆಂ ಯೋಜನ್ ಸಮಸ್ತ್ ಕೊಂಕಣಾಂತ್ ಸರ್ಕಾರಾನ್ ಸಯ್ತ್ ಕರುಂಕ್ ನಾ. ದೆಕೂನ್ ಹಾಂವೆ ಮ್ಹಣ್ಚೆಂ – ಇರಾದೊ ನೇಕ್ ಆನಿ ಶೆವೊಟ್ ಸ್ಪಷ್ಟ್ ಆಸ್ಲ್ಯಾರ್ ‘ಸತ್’ ಸಾಂಗಾತ್ ದಿತಾ. ಜಶೆಂ ಕಿಟಾಳ್ ಯುವ ಪುರಸ್ಕಾರಾರಾಕ್ ಮಾನೆಸ್ತ್ ಲಿಯೊ ರೊಡ್ರಿಗಸ್ ಹಾಣಿ ಸಾಂಗಾತ್ ದಿಲೊ,ತಶೆಂ ಪುಸ್ತಕ್ ಪ್ರಕಾಶನ್ ಯೋಜನಾಕ್ ಮಾನೆಸ್ತ್ ಮೈಕಲ್ ಡಿ ಸೊಜಾ ಹಾಣಿ ಸಾಂಗಾತ್ ದಿಲೊ. ವಿಶ್ವ ಕೊಂಕಣಿ ಕೇಂದ್ರಾಚ್ಯಾ ಸಹಯೋಗಾನ್ ಹ್ಯಾ ಯೆವ್ಜಣೆಚೊ ಫಾಯ್ದೊ, ಆಜ್ ಸಮಸ್ತ್ ಕೊಂಕಣ್ ಪ್ರದೇಶಾಕ್ ಜಾವ್ನ್ ಆಸಾ. ಲಿಪಿ, ಬೊಲಿ ಕಸಲ್ಯೊಚ್ ಮೆರೊ ನಾಂತ್. ಆಮಿ ಸಗ್ಳೆ ಕೊಂಕ್ಣಿ ಮನಿಸ್ – ಏಕ್. ಕೊಂಕ್ಣಿ ಆಮ್ಚಿ ಭಾಸ್ ಆನಿ ಕೊಂಕ್ಣಿ ಆಮ್ಚೆಂ ಧರ್ಮ್.

ಕಿಟಾಳ್ ಲೊಕಾರ್ಪಣ್ ಸುವಾಳ್ಯಾರ್ ಬಸ್ತಿ ಮಾಮಾನ್ “ಕಿಟಾಳ್ ಪೆಟಯ್ತಾನಾ ಘರಾಕಡೆ ಸಾಂಬಾಳ್” ಮ್ಹಣ್ ಸಾಂಗ್‌ಲ್ಲೆಂ ಕಾನ್‌ಉತರ್ ಆತಾಂಯ್ ಮ್ಹಜ್ಯಾ ಕಾನಾಂನಿ ಆವಾಜ್ ಕರುನ್ ಆಸಾ. ತುಮ್ಚ್ಯಾ ಮೊಗಾನ್ ಆನಿ ಬರ‍್ಯಾಮನಾನ್ ಕಿಟಾಳ್, ಮ್ಹಜೆಂ ಕಾಮ್ ಆನಿ ಕುಟಮ್ ಶಾಬೀತ್ ಆಸಾ.

ಸತಾಚೊ ಸಾಂಗಾತ್ ಆಸ್ತಾ ಪರ್ಯಾಂತ್, ತುಮ್ಚೊಯ್ ಸಾಂಗಾತ್ ಆಸ್ತಲೊ ಮ್ಹಳ್ಳೊ ದೃಡ್ ವಿಶ್ವಾಸ್ ಮ್ಹಾಕಾ ಆಸಾ. ದೇವ್ ಬರೆಂ ಕರುಂ.

■  ಎಚ್ಚೆಮ್