Trending Now

ವಿಶ್ವ ಕೊಂಕಣಿ ಪುರಸ್ಕಾರ ಪ್ರದಾನ್ ಸಂಭ್ರಮ್

ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನ, ವಿಶ್ವ ಕೊಂಕಣಿ ಕೇಂದ್ರ ಆಶ್ರಯಾರಿ ದಿ. 20-11-2017 ವೆರ್ ಮಂಗಳೂರು ಡೊಂಗರಕೇರಿ ಕೆನರಾ ಹೈಸ್ಕೂಲ್ ಶ್ರೀ ಸುಧೀಂಧ್ರ ಸಭಾಂಗಣಾಂತ ವಿಶ್ವ ಕೊಂಕಣಿ ಪುರಸ್ಕಾರ ಪ್ರದಾನ ಸುವಾಳೊ ವಿಜೃಂಭಣೇರಿ ಚಲ್ಲೆಲೆ. ಕೊಂಕಣಿ ಭಾಸ, ಸಾಹಿತ್ಯ ಆನಿ ಸಮಾಜ ಸೇವೆಕ ದಿವಚೆ ಹೆಂ ಅತ್ಯುನ್ನತ ಪುರಸ್ಕಾರ ಪ್ರದಾನ ಹಂಪಿ ಕನ್ನಡ ವಿಶ್ವ ವಿದ್ಯಾನಿಲಯಾಚೆ ವಿಶ್ರಾಂತ ಕುಲಪತಿ ಪ್ರೊ. ಬಿ. ಎ. ವಿವೇಕ ರೈ ಹಾನ್ನಿ 5 ಕೊಂಕಣಿ ಸಾಧಕಾಂಕ ಪ್ರಶಸ್ತಿ ಪ್ರದಾನ ಕೆಲೆಂ.

ಮುಖೇಲ ಸೊಯರೆ ಮಣಿಪಾಲ ಗ್ಲೋಬಲ್ ಎಜುಕೇಶನ್ ಸಂಸ್ಥೆ ಚೆಯರ್‌ಮೆನ್ ಶ್ರೀ ಟಿ. ವಿ. ಮೋಹನದಾಸ ಪೈ ಹಾನ್ನಿ ಪ್ರಶಸ್ತಿ ವಿಜೇತಾಂಕ ಉದ್ದೇಶಿಸುನ ಕೊಂಕಣಿ ಭಾಸ ಆನಿ ಸಂಸ್ಕೃತಿ ಏಕ ಸಮುದಾಯಾಚೆ ಮೂಳ. ಹೇ ರಕ್ಷಣ ಕೆಲಾರಿ ಅಮಗೆಲೆ ಸಮುದಾಯ ಸಶಕ್ತ ಜಾವನ ಮುಖಾರ ಯೆವಚಾಕ ಸಾಧ್ಯ ಆಸಾ. ತಶೀಂಚಿ ವಿದ್ಯಾ ಆನಿ ಸಾಹಿತ್ಯ ಸಂಪತ್ತ ಸರ್ವಾ ಪಶಿ ಹೊಡ ಜಾವನ ಆಸಾ. ಹ್ಯಾ ಸಂಪತ್ತಾಚೆ ಸಾಂಗತಾಕ ಸಾಂಸ್ಕೃತಿಕ ಸಂಪತ್ತ ಆಸ ಜಾಯಾರಿ ಮಾತ್ರ ದೇಶ ಮುಖಾರ ಯೆತಲೆ ಅಶಿಂ ಸಾಂಗಲೆಂ.
ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪಕ ಅಧ್ಯಕ್ಷ ಶ್ರೀ ಬಸ್ತಿ ವಾಮನ ಶೆಣೈ ಹಾನ್ನಿ ಸ್ವಾಗತ ಕರನ ಪ್ರಾಸ್ತಾವಿಕ ಉತ್ರ ಉಲಯಿಲಿಂಚಿ.
ಸಾಹಿತ್ಯ ಕ್ಷೇತ್ರಾಂತ ಗೊಂಯಚೆ ಸಾಹಿತಿ ಶ್ರೀ ಗಜಾನನ ಜೋಗ ಹಾಂಗೆಲೆ ಖಾಂದ್ ಆನಿ ಹೆರ ಕಥಾ ಕಾದಂಬರೀಕ ‘ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ’, ಶ್ರೀ ವಿಲ್ಸನ್ ಕಟೀಲ ಹಾಂಗೆಲೆ ‘ಎನ್‌ಕೌಂಟರ್’ ಕವಿತಾ ಪುಸ್ತಕಾಕ ‘ವಿಮಲಾ ವಿ. ಪೈ. ವಿಶ್ವ ಕೊಂಕಣಿ ಕವಿತಾ ಕೃತಿ ಪುರಸ್ಕಾರ’ ಆನಿ ಕೊಂಕಣಿ ಭಾಷಾ ಸಾಹಿತ್ಯ ಆನಿ ಆಂದೋಲನಾಕ ದಿಲೆಲೆ ಮಹತ್ತರ ವಾವ್ರಾ ಖಾತಿರ ಡಾ. ತಾನಾಜಿ ಹಳರಣಕರ ಹಾಂಕಾ ‘ವಿಶ್ವ ಕೊಂಕಣಿ ಜೀವನ ಸಿದ್ಧಿ ಪುರಸ್ಕಾರ, ವಿಜ್ಞಾನ ಆನಿ ಸಂಶೋಧನಾ ಕ್ಷೇತ್ರಾಂತ ಮಹತ್ತರ ಸೇವಾ ದಿಲೆಲೆ ಡಾ. ಜಿ. ನಾಗೇಂದ್ರ ಪ್ರಭು, ಕೊಚ್ಚಿ ಆನಿ ಆರೋಗ್ಯ ಕ್ಷೇತ್ರಾಂತ ವಿಶೇಷ ಸೇವಾ ದಿಲೆಲಿ ಡಾ. ಉಷಾ ಎಸ್. ಹೆರಾಂಜಳ, ಗುಜರಾತ್ ಹಾಂಕಾ ‘ಬಸ್ತಿ ವಾಮನ ಶೆಣೈ ವಿಶ್ವ ಕೊಂಕಣಿ ಸೇವಾ ಪುರಸ್ಕಾರ’ ಪ್ರದಾನ ಕೆಲೆಂ.
ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿ ಅಧ್ಯಕ್ಷ ಶ್ರೀ ರಾಮದಾಸ ಕಾಮತ್ ಯು, ವಿಶ್ವ ಕೊಂಕಣಿ ಬಸ್ತಿ ವಾಮನ ಶೆಣೈ ಸೇವಾ ಪುರಸ್ಕಾರ ಸಮಿತಿ ಅಧ್ಯಕ್ಷ ಶ್ರೀ ಸಿ. ಡಿ. ಕಾಮತ, ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿ ಕಾರ್ಯದರ್ಶಿ ಶ್ರೀ ಪ್ರದೀಪ ಜಿ. ಪೈ, ಸೊಯರೆ ಶ್ರೀ ಸಿದ್ಧಾರ್ಥ ಎಂ. ಪೈ, ಬೆಂಗಳೂರು, ಕೊಂಕಣಿ ಭಾಷಾ ಮಂಡಳ ಅಧ್ಯಕ್ಷಾ ಶ್ರೀಮತಿ ಗೀತಾ ಸಿ. ಕಿಣಿ, ಶಾಳೆಂತ ಕೊಂಕಣಿ ಶಿಕ್ಷಣಾಚೆ ಸಂಚಾಲಕ ಡಾ| ಕೆ. ಮೋಹನ್ ಪೈ, ಕಾರ್ಯದರ್ಶಿ ಶ್ರೀ ಪ್ರಭಾಕರ ಪ್ರಭು, ಶ್ರೀಮತಿ ಶಕುಂತಲಾ ಆರ್. ಕಿಣಿ ಸಮಾರಂಭಾಂತ ಉಪಸ್ಥಿತ ಆಶಿಲಿಂಚಿ.
ಪ್ರಶಸ್ತಿ ಪುರಸ್ಕೃತಾಂಕ ಏಕ್ ಲಾಖ ರೂಪಾಯಿ, ಮಾನಪತ್ರ, ಯಾದಸ್ತಿಕಾ ಆನಿ ಶ್ರೀಫಳ ದೀವನ ಸನ್ಮಾನ ಕೆಲೆಂ.
ಶ್ರೀಮತಿ ವಸಂತಿ ಆರ್. ನಾಯಕ್ ಪಂಗಡಾ ಥಾವನ ಕೊಂಕಣಿ ಸಂಗೀತ ಪ್ರಸ್ತುತ ಕೆಲೆಂ. ಶ್ರೀಮತಿ ಕನ್ಸೆಪ್ಟಾ ಫೆರ್ನಾಂಡಿಸ ಹಾನ್ನಿ ಕಾರ್ಯಕ್ರಮ ನಿರೂಪಣ ಕೆಲೆಂ.
ಸ್ವರಶ್ರೀ ಕಲಾ ವೇದಿಕೆ ಟ್ರಸ್ಟ ಪಂಗಡ ವಿದ್ಯಾರ್ಥಿಂನಿ ಕೊಂಕಣಿ ಗೀತ ಗಾಯನ ಸಾಂಗಲೆಂ.

Leave a Reply

Your email address will not be published. Required fields are marked *

Don\'t COPY....Please Share !