ಎಕಾ ಕವಿಕ್ ಘೊಣಿಚಿ ದೀಶ್ಟ್ ಆಸ್ತಾ. ಆನಿ ಜೆನ್ನಾ ಸಮಾಜ್ ಕೊಣಾ ಎಕ್ಲ್ಯಾಚಾ ಪ್ರಭಾವಾಕ್ , ಪ್ರಲೋಭನಾಕ್ ವಾ ದಾಕ್ಷೆಣೆಕ್ ಅಸಮತೋಲಿತ್ ಜಾಂವ್ಕ್ ಲಾಗ್ತಾ, ಕವಿಚಿ ದೀಶ್ಟ್ ಬಳ್ ಜಾತಾ. ಅಸಲಿ ಏಕ್ ಅನೊಖೀ ದೀಶ್ಟ್ ಆಪ್ಣಾವ್ನ್ ಕೊಂಕ್ಣೆಂತ್ ಬರಂವ್ಚ್ಯಾ ಥೊಡ್ಯಾಚ್ ಕವಿಂ ಪಯ್ಕಿ ಕಟೀಲ್ಚೊ ವಿಲ್ಸನ್ ಎಕ್ಲೊ. ಹಿ ಕವಿತಾ ಅಸಮತೋಲಿತ್ ಜಾವ್ನ್ ಯೆಂವ್ಚ್ಯಾ ಪ್ರಕೃತಿಚೆಂ ನೀಬ್ ಘೆವ್ನ್, ಸಮಾಜೆಂತ್ ಪಾಜ್ರೊನ್ ಆಸ್ಚ್ಯಾ ವೀಕಾವಿಶ್ಯಾಂತ್ ಉಲಯ್ತಾ. ಹ್ಯಾ ಕವಿತೆಂತ್ ಯೆಂವ್ಚ್ಯಾ ವಿಕಾಳ್ ಜಿವ್ದಾಳಿಂನಿ ಪಿಡ್ಡ್ಯಾರ್ ಕರುಂಕ್ ಭಾಯ್ರ್ ಸರ್ಲೆಲ್ಯಾ ಸಮಾಜಿಕ್ ಸ್ವಾಸ್ಥ್ಯಾವಿಶಿಂ ಹುಸ್ಕೊ ಜಾಯ್ರ್ ಕರ್ತಾ. ರೋಳ್ಣಿಂತ್ – ನಕ್ಲಿಂ ಜಿಡಿಂ ಮಾತ್ಯಾರ್ ಖೊವವ್ನ್, ಭಾಂಗ್ರಾ ಪುಂಗಿ ಫುಂಕ್ಚ್ಯಾ , ಪಿತುಳೆ ಕಾನಾಚ್ಯಾಂಕ್ , ಆಳ್ಯ್ಮಾಸಾತೆಂ ಧರ್ಚ್ಯಾ ಯೆವಾಳ್ಯಾಂ ಆನಿ ರಗ್ತಾಮಾಂಡೆಳ್ಯಾಂಚೆರ್ ಶಿಣ್ತಾ. ರೊಳ್ಣಿಂತ್ಲ್ಯಾ ಸೊರ್ಪಾಂಚ್ಯೊ ಚತುರ್ ಜಿಬೊ ಕೊಳಿಂದ್ರಾಂಕ್ ಮಾಳಯ್ ಚಡೊಂಕ್, ಬಾಂಯ್ತ್ಲ್ಯಾ ಮಾಣ್ಕ್ಯಾಂಕ್ ಉಡ್ಚೆಂ ತಾಲೀಮ್ ದಿತಾನಾ, ಬುಕಾಪಾನಾಂನಿ ರಿಗೊನ್ ಬಸ್‌ಲ್ಲ್ಯಾ , ಖರ‍್ಯಾನ್ ರೋಳ್ನ್ ಬಾಂದುಂಕ್ ವಾವುರ್ಲೆಲ್ಯಾ ವಾಳಯೇಚೇರ್ ಭಿರ್ಮತ್ ಪಾವ್ತಾ. ಆಯ್ಲೆವಾರ್ಚ್ಯಾ ದಿಸಾಂನಿ, ಕೊಂಕಣಿ ಪೊಯೆಟ್ರಿಚೆರ್ ಫಾಯ್ಸ್ ಜಾಲ್ಲ್ಯಾ ಕವಿ ಮೆಲ್ವಿನ್ ರೊಡ್ರಿಗಸಾಚಾ ಸೂಂಬೆ ಕವಿತೆ ಉಪ್ರಾಂತ್, ಕೊಂಕ್ಣೆಂತ್ ವಾಚುಂಕ್ ಮೆಳ್‌ಲ್ಲಿ ಅನ್ಯೇಕ್ ಆಪುರ್ಬಾಯೆಚಿ ಸಾಂಕೇತಿಕ್ ಕವಿತಾ.
– ಎಚ್ಚೆಮ್.
ಖಂಯ್ಚ್ಯಾ ಕಲಾಕಾರಾನ್‍ಯೀ
ಸಪ್ಣಾಂತೀ ಚಿಂತುಂಕ್ ನಜೊ ತಿತ್ಲಿ
ಆಕರ್ಶಕ್ ಹಿ ರೋಳ್ಣ್!
ದೊರಿಯೆಬರಿ ಶಾಂತ್ ಆಸ್ಚೆ
ವಿಕಾಳ್ ಸೊರೊಪ್ ಆಸಾತ್
ಹಾಂತುಂ, ಸವೆಂ
ಜಿಡ್ಯಾಂಚಿಂ ಮುಖ್‍ವಾಡಾಂ ಘಾಲ್ಲ್ಯೊ
ರಗ್ತಾಮಾಂಡೊಳ್ಯೊ, ಆನಿ
ಥೊಡಿ ಯೆವಾಳಿಂ-
ರೊಳ್ಣೆಕ್ ಸಯ್ರೆ ಯೆತಾನಾ
ಆಳ್ಮ್ಯಾಂಚೆಂ ಸಾತೆಂ ಧರುಂಕ್.
ಭಾಂಗಾರಾಚಿ ಪುಂಗಿ ದಿಶ್ಟಿಕ್ ಪಡ್ತಾನಾ
ಸಂಗೀತ್ ಆಲಾಪ್ ಕರ್ಚೆಬರಿ
ತಿಚ್ಯಾ ಚಾಲಿಪರ್ಮಾಣೆ
ಆಪುಣ್‍ಯಿ ತಕ್ಲಿ ಹಾಲಯ್ತಾತ್!
ಉಡಾಸ್ ಆಸೊಂ-
ಸೊರ್ಪಾಂಕ್ ಕಾನ್‍ಚ್ ಆಸಾನಾಂತ್
ಪೂಣ್ ಪುಂಗಿವಾಲ್ಯಾಕ್ ಕಾನ್ ಪಿತುಳೆಚೆ!
ಕಾನ್ ಫುಂಕುನ್ ಪುಂಗಿ ಲುಟ್ಟಾತ್ ಸೊರೊಪ್
ಹೆಂವೀ ಉಡಾಸ್ ಆಸೊಂ-
ಸೊರ್ಪಾಂಚಿ ಜೀಬ್ ಬೋವ್ ಚತುರಾಯೆಚಿ!
ಹ್ಯಾ ರೊಳ್ಣೆಂತ್
ವಿಶೇಸ್ ತರ್ಬೆತಿ ಮೆಳ್ತಾ-
ಕುಳಿಂದ್ರಾಂಕ್ ಮಾಳಯ್ ಚಡ್ಚಿ!
ಆನಿ ಬಾಂಯ್ತ್ಲ್ಯಾ ಮಾಣ್ಕ್ಯಾಂಕ್
ತಾಂಕಿಪ್ರಾಸ್ ಉಡ್ಚಿ!
ರೊಳ್ಣೆಚ್ಯಾ ಸೊಬಾಯೆಕ್ ಪಿಸ್ವೊನ್
ಆಂಗ್ ವಿಸ್ರತಾನಾ
ಸೊರ್ಪಾಂಚ್ಯಾ ವಿಕಾವಿಶ್ಯಾಂತ್
ಚಿಂತಾ ಕೋಣ್?
ಸರ್ಪಾದೋಸ್ ಮ್ಹಳ್ಳ್ಯಾ ಕುರ್ಡ್ಯಾ ಪಾತ್ಯೆಣೆಕ್
ಲಾಬ್ದೊನ್
ರುಪ್ಯಾಚ್ಯಾ ಉಂದ್ರಾಂಕ್ ಆಂಗಯ್ತೆಲ್ಯಾ
ಭಕ್ತಿಕ್ ಮ್ಹನ್ಶ್ಯಾಂವಿಶಿಂ
ಸಾಂಗೊನ್ ಫಾಯ್ದೊ ನಾ!
ರೋಳ್ನ್ ಬಾಂದುಂಕ್ ವಾವುರ್ಲೆಲಿ
ವ್ಹಾಳಯ್
ಆಪ್ಲೆಂ ಹಕ್ಕ್ ವಿಚಾರುಂಕ್
ಭೊಲ್ಚೆವ್ನ್
ಬುಕಾಂನಿ ಲಿಪೊನ್ ಬಸೊನ್
ಪಾನಾಂ ಖಾತೆ ಆಸಾ
ಪೂಣ್ ಗಾಂವಾತ್ಲೆ ಥೊಡೆ ಮುಂಗುಸ್
ಹಾಂಚೆರ್ ಉಪ್ರಾಟ್ಲ್ಯಾತ್
ದೆಕುನ್ ಆತಾಂ…
ಹ್ಯಾ ರೊಳ್ನಿಂತ್ಲ್ಯಾ ಜಿವ್ದಾಳಿಂನಿ
ಬಾಂದುಂಕ್ ಚಿಂತ್ಲ್ಯಾ ಖಂಯ್
ಬಗ್ಲೆನ್ ಆನಿಯೇಕ್ ರೋಳ್ನ್-
ಕೊಂಕ್ರ‍ಿಟಿಚಿ,
ಎ.ಸಿ., ಸಿ.ಸಿ. ಕೆಮೆರಾಂನಿ ಸಜ್‍ಲ್ಲಿ
ಎಕ್ದಮ್ ಆದುನಿಕ್ ರೋಳ್ಣ್!
ಆತಾಂಚಿ ರೋಳ್ಣ್
ಆನಿ ಫುಡೆಂ
ಮ್ಯೂಸಿಯಮ್ ಜಾತೆಲಿ!!
-ವಿಲ್ಸನ್, ಕಟೀಲ್
ಕಿಟಾಳಾರ್ ವಿಲ್ಸನ್ ಕಟೀಲಾಚ್ಯೊ ವಿಂಚ್ಣಾರ್ ಕವಿತಾ :
♦ ಪಾಡ್ಕೊ