ಎಡ್ವಿನ್ ಜೆ. ಎಫ್ ಡಿ’ಸೊಜಾ

mm
1948 ಇಸ್ವೆಚ್ಯಾ ಜೂನ್ ಮಯ್ನ್ಯಾಂತ್ ವಾಲೆನ್ಸಿಯಾಂತ್ (ದೆ.) ಮಾರ್‍ಟಿನ್ ಆನಿ (ದೆ.) ಸ್ಟೆಲ್ಲಾ ಡಿಸೋಜ ಜೊಡ್ಯಾಕ್ ಜಲ್ಮಲ್ಲ್ಯಾ ಎಡ್ವಿನ್ ಜೋಸೆಫ್ ಫ್ರಾನ್ಸಿಸ್ ಡಿಸೊಜಾನ್, ಆಪ್ಲಿಂ ಸುರ್‍ವಿಲಿಂ ಬರ್‍ಪಾಂ ಇಂಗ್ಲಿಶಾನ್ ಪ್ರಸ್ತುತ್ ಕೆಲಿಂ ಆನಿ 1964 ಇಸ್ವೆಂತ್ ತಾಣೆ ಕೊಂಕಣಿಂತ್ ಲಿಖುಂಕ್ ಸುರು ಕೆಲೆಂ. ( ಸುರ್ವಿಲೆಂ ಲಿಕ್ಣೆನಾಂವ್ : ವಾಸು, ವಾಲೆನ್ಸಿಯಾ) ಕೊಂಕಣಿಂತ್ ಮಾತ್ರ್ ನ್ಹಯ್ ಸಬಾರ್ ಇಂಗ್ಲಿಷ್ ದಿಸಾಳ್ಯಾಂನಿ ಆನಿ ನೆಮಾಳ್ಯಾಂನಿ ತಾಚಿಂ ಬರ್ಪಾಂ ಪರ್ಗಟ್ ಜಾತೆಚ್ ಆಸಾತ್. ತಾಚ್ಯೊ ಮಟ್ಟ್ಯೊ ಕಥಾ, ಇಂಗ್ಲಿಷ್, ತಮಿಳ್, ಹಿಂದಿ, ಕನ್ನಡ, ಕಾಶ್ಮೀರಿ ಆನಿ ಹೆರ್ ಭಾಸಾಂನಿ ಭಾಶಾಂತ್ರ್ ಜಾಲ್ಯಾತ್. ತಾಚಿ ಏಕ್ ಮಟ್ವಿ ಕೊಂಕಣಿ ಕಥಾ ಚೊಕ್ಲೇಟ್ಸ್ ಜಿ ತಾಣೆಂಚ್ ಇಂಗ್ಲಿಷ್ ಭಾಶೆಂತ್ ತರ್‍ಜಣ್ ಕೆಲ್ಲಿ, ವಿಶ್ವವಿಖ್ಯಾತ್ Readers’ Digest ಮ್ಹಯ್ನ್ಯಾಳ್ಯಾಚ್ಯಾ ದೋನ್ ಕಲೆಕ್ಟರ್ಸ್ ಎಡಿಶನಾಂತ್ ಪರ್ಗಟ್ ಜಾಲ್ಯಾ. ತಾಣೆಂಚ್ ತರ್‍ಜಣ್ ಕೆಲ್ಲಿ ತಾಚಿ 'A Cup of Hot Coffee' ಮಟ್ವಿ ಕಥಾ ದೆ. ಖುಶ್ವಂತ್ ಸಿಂಘ್ ಹಾಣೆ ವಿಂಚುನ್ ಆಪ್ಲ್ಯಾ 'Our Favourite Indian Stories’ ಸಂಗ್ರಹಾಂತ್ (2002) ಪರ್ಗಟ್ ಕೆಲ್ಯಾ. ತಾಚಿ ಭೋವ್ ಯಶಸ್ವಿ ಕಾದಂಬರಿ ಕಾಳೆಂ ಭಾಂಗಾರ್, ಗೋವಾ ಕೊಂಕಣಿ ಅಕಾದಮಿನ್ 2013 ವ್ಯಾ ವರ್ಸಾ ನಾಗರಿಕ್ ಲಿಪ್ಯಂತರ್ ಕರುನ್ ಪರ್ಗಟ್ ಕೆಲ್ಯಾ. ಎಡ್ವಿನಾನ್ಂಚ್ ನಾಗರಿಕ್ ಲಿಪ್ಯಂತರ್ ಕೆಲ್ಲ್ಯಾ ತಾಚ್ಯಾಚ್ 22 ಮಟ್ವ್ಯಾ ಕೊಂಕಣಿ ಕಥೆಂಚೊ ಪುಂಜೊ, 'ಪಯ್ಣ್' ಗೊಂಯ್ಚ್ಯಾ 'ಬಿಂಬ್' ಪ್ರಕಾಶನಾನ್ ಪರ್ಗಟ್ಲಾ. ತಾಣೆಂಚ್ ಇಂಗ್ಲಿಷಾಕ್ ಭಾಶಾಂತರ್ ಕೆಲ್ಲ್ಯಾ ತಾಚ್ಯಾಚ್ ಕೊಂಕಣಿ ಮಟ್ವ್ಯಾ ಕಥೆಂಚೊ ಸಂಗ್ರಹ್ ಚೊಕ್ಲೆಟ್ಸ್, ಚೆನ್ನೈ ಥಾವ್ನ್ 'The English Titles' ಮ್ಹಳ್ಳ್ಯಾ ಪ್ರಕಾಶನಾನ್ ಪರ್ಗಟ್ ಕೆಲಾ. ಚೆನ್ನೈಚೊ ಆದ್ಲೊ ಮುಖೆಲ್ ಮಂತ್ರಿ ಮಾನೆಸ್ತ್ ಕರುಣಾನಿಧಿನ್ ಸ್ಥಾಪಿತ್ ಕೆಲ್ಲ್ಯಾ Booksellers & Publishers Association of South India (BAPASI) ಸಂಸ್ಥ್ಯಾನ್, ಅಲ್ಪ್‌ಸಂಖ್ಯಾತ್ ಭಾಶೆಂತ್ಲ್ಯಾ ಸಾಹಿತಿಕ್ ದಿಂವ್ಚಿ ವರ್‍ಸಾವಾರ್ ಪ್ರಶಸ್ತಿ 2012 ಎಡ್ವಿನಾಕ್ ಫಾವೊ ಜಾಲ್ಯಾ. ಆಜ್ ಪರ್‍ಯಾಂತ್ ಎಡ್ವಿನಾಚ್ಯೊ ತೆತ್ತೀಸ್ ಕೊಂಕಣಿ ಕಾದಂಬರಿ, ಸಾಂಕಳ್ ಕಾಣಿಯೆಂ ರುಪಾರ್ ಯಾ ಶೀದಾ ಪುಸ್ತಕಾಂ ರುಪಾರ್ ಪರ್ಗಟ್ ಜಾಲ್ಯಾತ್. ಶೆಂಬರಾಂ ವಯ್ರ್ ಮಟ್ವ್ಯೊ ಕಥಾ, ಅಂಕಣಾಂ, ವಿಡಂಬನಾಂ ತಾಣೆ ಲಿಕ್ಲ್ಯಾಂತ್. ಭೊಗ್ಸಾಣೆ ಕೊಂಕಣಿ ಫಿಲ್ಮಾಚೆಂ ಥೊಡೆಂ ಸಂಭಾಶಣ್ ತಾಚೆಂಚ್. ಎದೊಳ್ ಪರ್‍ಯಾಂತ್ ಇಕ್ರಾ ಸಾಹಿತಿಕ್ ಪ್ರಶಸ್ತ್ಯೊ ತಾಕಾ ಲಾಭ್ಲ್ಯಾತ್ ಆನಿ ಆಂವ್ದುಂಚ್ಯಾ ದಿಸಾಂನಿ ತಾಣೆ ಆಪ್ಲೆಂ ಗುಮಾನ್ ಚಡಿತ್ ಮಾಪಾನ್ ಮಟ್ವ್ಯಾ ಕಥೆಂಚೆರ್, ಅಂಕಣಾಂಚೆರ್ ಆನಿ ತಾತ್ವಿಕ್ ವಿಶಯಾಂಚೆರ್ ಘುಂವ್ಡಾಯ್ಲಾಂ ಆನಿ ತ್ಯಾ ತೆಕಿದ್‌ಚ್ ತೊ ಲಿಕ್ತಾ. 2008 ಥಾವ್ನ್ 2012 ಪರ್ಯಾಂತ್ ತೊ ನ್ಯೂ ಡೆಲ್ಲಿಚ್ಯಾ ಸಾಹಿತ್ಯ ಅಕಾಡೆಮಿಚ್ಯಾ ಜೆರಾಲ್ ಸಭೆಚೊ ಸಾಂದೊ ಜಾವ್ನಾಸ್‌ಲ್ಲೊ. ಪ್ರಸ್ತುತ್, ಸಾಂ ಲುವಿಸ್ ಕೊಲೆಜಿಚ್ಯಾ Institute of Konkani ಹಾಚೊ ಕಾರ್ಯಕರಿ ನಿರ್ದೇಶಕ್ ಆನಿ ಅಮರ್ ಕೊಂಕಣಿ ಸಂಸೊಧಿಕ್ ಶಣ್ಮಾಸಿಕಾಚೆಂ ಸಂಪಾದಕ್ಪಣ್ ಸಾಂಬಾಳ್ತಾ. 2013 ಶೈಕ್ಷಣಿಕ್ ವರ್‍ಸಾ ಥಾವ್ನ್ ಗೋವಾ ಯುನಿವರ್ಸಿಟಿಚ್ಯಾ ಕೊಂಕಣಿ ವಿಭಾಗಾಚ್ಯಾ ಸಲಹಾ ಸಮಿತಿಂತ್ ತೊ ಆಸಾ. ಮುಳಾವ್ಯಾ ದೇವ್‌ಶಾಸ್ತ್ರಾಂತ್ 'ಆಮೆರಿಕನ್ ಬಾಯ್ಬಲ್ ಸ್ಕೂಲ್' ಹಾಂಗಾ ಥಾವ್ನ್ ತಾಕಾ ಪಾಂಚ್ ಪದವಿಕಾ ಲಾಭ್ಲ್ಯಾತ್ ಆನಿ ಪಾಟ್ಲ್ಯಾ ತೆರಾ ವರ್‍ಸಾಂ ಥಾವ್ನ್ ಸಾಂ ಲುವಿಸ್ ಪಿ.ಯು. ಕೊಲೆಜಿಚ್ಯಾ ಪಯ್ಲ್ಯಾ ಆನಿ ದುಸ್ರ್ಯಾ ವರ್‍ಸಾಚ್ಯಾ ವಿದ್ಯಾರ್ಥಿಂಕ್ ಮುಳಾವ್ಯಾ ದೇವ್‌ಶಾಸ್ತ್ರಾಚೆರ್ ಉಲವ್ಪಾಂ ದಿತಾ. ಭಾರತೀಯ್ ಕೇಂದ್ರ್ ಸರ್ಕಾರಾಚ್ಯಾ ಸಂಸ್ಕೃತಿ ಮಂತ್ರಾಲಯಾನ್ (Ministry of Culture, Government of India) ವರ್‍ಸಾವಾರ್ ಸಂಸೊಧಿಕ್ ವೇತನಾಂಕ್ ದಾಖಲ್ ಜಾಲ್ಲ್ಯಾ ಕೊಂಕಣಿ ಅಭ್ಯರ್ಥಿಂಕ್ ವಿಂಚುನ್ ಕಾಡ್ಚ್ಯಾ ಪರಿಣತಾಂಚ್ಯಾ ಸಮಿತಿಂತ್ 2012 ಥಾವ್ನ್ ದೋನ್ ವರ್‍ಸಾಂಚೆ ಆವ್ದೆಕ್ ತಾಕಾ ನೇಮಕ್ ಕೆಲಾ. ಎಡ್ವಿನ್, ಜಾಣೆ ಸೊಳಾ ವರ್‍ಸಾಂ ಕುವೇತಾಂತ್ ತೆಲಾ ಸಂಸಾರಾಂತ್ ವಾವ್ರ್ ಕೆಲ್ಲೊ, 1990 ಥಾವ್ನ್ ಆಪ್ಲೆ ಪತಿಣೆ ಜೇನಾ ಸಂಗಿಂ ಮಂಗ್ಳುರ್‍ಚ್ಯಾ ಮಿಲಾರಾಂತ್ ವಸ್ತಿ ಕರುನ್ ಆಸಾ. ತಾಕಾ ಎಕ್ಲಿಚ್ ಧುವ್, ರೂತ್ ಎಸ್ತೆರ್ ಪ್ರಭು ಬೆಂಗ್ಳುರಾಂತ್ ಕುಟ್ಮಾಸವೆಂ ವಸ್ತಿ ಕರ್ತಾ.

ಸಂಸ್ಕೃತಿ – ಆಧುನಿಕೋತ್ತರ್ ಚಿಂತಪ್

ಮಂಗ್ಳುರಾಂತ್ ಘಡ್ಲೆಂಯಿ ತಶೆಂಚ್! ಕರ‍್ಫ್ಯೂ ಸದಿಳ್ ಜಾಲ್ಲೆ ತಕ್ಶಣ್ ಕೊಣೆಂಯಿ ಭಾಶೆಚೊ, ಸಂಸ್ಕೃತಿಚೊ ಉಡಾಸ್ ಕಾಡ್ಲೊ? ನಾ. ಸರ‍್ವಾಂನಿ ಮಾರ‍್ಕೆಟಿಂನಿ ಕಿತೆಂ ಮೆಳ್ತಾ, ಕಿತೆಂ ಉರ‍್ಲಾಂ, ಖಂಯ್ ತೆಂ ಮೆಳ್ತಾ ಮ್ಹಳ್ಳಿಂ ಸವಲಾಂ ಭಾಲಿಯೆಂಪರಿಂ ಮಾರ‍್ಲಿಂ. ಮೆಳ್ತಾ ತರ್ ಪಾಂಚ್ ನ್ಹಯ್, ಧಾ ಕಿಲೊ ಘೆಂವ್ಚೆ ಆನಿ ದಾಸ್ತಾನ್ ಕರ‍್ಚೆ ಕಿತ್ಯಾಕ್ I have to survive. ಆಜ್ ಮ್ಹಜ್ಯಾಚ್ ಫ್ರಿಡ್ಜಾಂತ್ ಪಾಂಚ್ ಲೀಟರ್ ದೂದ್ ಆಸಾ. ಕಿತ್ಲೆ ದೀಸ್ ತೆಂ ಹಾಂವ್ ದವರುಂ? ಹಾಂವ್ ದೂದ್ ಪಿಯೆನಾ, ಪಿಯೆತೆಲಿಂ ಮಾಣ್ಕುಲಿಂ ಮ್ಹಾಕಾ ನಾಂತ್ ತರಿ ಪುಣ್ ಹಾಂವೆಂ ತೆಂ ದಾಸ್ತಾನ್ ಕರುನ್ ದವರ‍್ಲಾಂ; ಕಿತ್ಯಾಕ್? ಶಿಕ್ಪ್ಯಾಂಚೆ, ಸಮಾದಾನಿಂಚೆ, ಬರ‍್ಯಾ ಸಂಸ್ಕೃತಿಗಾರಾಂನಿ ವಸ್ತಿ ಕರ‍್ಚೆಂ ಹೆಂ ಮಂಗ್ಳುರ್ ಶ್ಹೆರ್ ಆನಿ ತಾಚ್ಯಾ ಸಂಸ್ಕೃತಿಚೆಂ ಚವ್ಕಟ್ ಪರಮ್, ಪರಿಪೂರ‍್ಣ್, ಅಶೀಮಿರ್ ಮ್ಹಣ್ ಆಮಿ ಮಾನುನ್ ಘೆಂವ್ಚೆಂ ಸಾರ‍್ಕೆಂ ನ್ಹಯ್ ಮ್ಹಳ್ಳೆಂ ಸತ್‌ಚ್ ಪರಮ್, ಪರಿಪೂರ‍್ಣ್ ಆನಿ ಅಶೀಮಿರ್ ಅಶೆಂ ಮ್ಹಾಕಾ ಗಮ್ಲಾಂ. ಸಬಾರಾಂನಿ, ಆಮಿ ತೊ 'ಚವ್ಕಟ್' ವಿಸ್ತಾರಾಂವ್ಕ್ ಸಕಾನಾಂವ್ ತರಿ, ಚವ್ಕಟಾ ಭಾಯ್ರ್, ಸನ್ನಿವೆಶಾಂಕ್ ಜೊಕ್ತೆ ಜಾವ್ನ್, ಜಿಯೆಂವ್ಕ್ ಸಕ್ತಾಂವ್ ಮ್ಹಳ್ಳೆಂ ರುಜು ಕೆಲಾಂ. ಆನಿ ಹಿಚ್ಚ್ ಜಾವ್ನಾಸಾ ಮನ್ಶಾ-ಸಂಸ್ಕೃತಿ.

Read More »

ಆವಿಶ್ಕಾರ್

ರಚ್ಣಾರಾನ್ಂಚ್ ಸುರ್ವಾತ್ ಕೆಲ್ಲೊ ಆವಿಶ್ಕಾರ್ ಕಾಂಯ್ ವೆಗಿಂಚ್ ಸಂಪ್ಚೊ ನ್ಹಯ್ ಆನಿ ತಾಚೊ ಆವಿಶ್ಕಾರ್ ಉದ್ದೇಶ್ ಜ್ಯಾರಿ ಜಾಂವ್ಚೆ ಪರ್ಯಾಂತ್ ಹೊ ಆವಿಶ್ಕಾರ್ ಥಾಂಬ್ಚೊ ನ್ಹಯ್. ಆನಿ ಅಸೊ ಆನಿ ತಸೊ ಥಾಂಬ್‌ಲ್ಲೊ ತರ್ ಹ್ಯಾ ರಚ್ಣಾಕ್ ಆನಿ ಹಿಂ ರಚ್ಣಾಂ ರಚ್‌ಲ್ಲ್ಯಾಕ್ ಆನಿ ತಾಚ್ಯಾ ಕರ‍್ತುಬಾಂಕ್ ಅರ್ಥ್‌ಚ್ ಆಸ್ತೊ ನಾ; ದೆಕುನ್ ಆಮ್ಚ್ಯಾ ಹರ್ ಎಕಾ ಮಾಗ್ಣ್ಯಾಂತ್ ಆನಿ ನಿಯಾಳಾಂತ್ ಎಕ್ ಗಾಂಚ್ ಆಮಿಂ ಖೊವವ್ನ್ ದವರ‍್ತಾಂವ್ ಆನಿ ದೆವಾಚ್ಯಾ ರಚ್ಣಾಂಚೊ ತೀಬ್ ದಿತಾಂವ್. ಸಬಾರ್ ಪಾವ್ಟಿಂ ಆಮಿಂ ಕೊಣಾಕ್‌ಯಿ ಕಸೊ ಆಸಾಯ್ ಮ್ಹಣ್ ವಿಚಾರ್ತಾನಾ ತೊ ಯಾ ತಿ ಜಾಪ್ ದಿತಾ ದೆವಾಚೆ ದಯೆನ್ ಹಾಂವ್ ಬರೊಂ ಆಸಾಂ. By the Grace of God I am fine. ಆನಿ ಕಿತೆಂ ಜಾಯ್ ಆಮ್ಕಾಂ? ಸರ್ವ್ ತಾಚ್ಯಾ ಮಾತ್ಯಾರ್ ಘಾಲ್ಚೆಂ ಆನಿ ಸುಶೆಗಾದ್ ಬಸ್ಚೆಂ. ಕಿತೆಂ ಜಾಲ್ಯಾರಿ ತೊ ಬರೊ ದೆವ್ ಆಸಾ ನ್ಹಯ್, ತೊ ಆಮ್ಕಾಂ ಸಾಂಬಾಳ್ಟಾಲೊ, ವಾಟ್ಲಿ ಬಡಯ್ಲ್ಯಾರ್ ಆಮ್ಚೆರ್ ಆಯಿಲ್ಲೆಂ 'ಸೋಂಕ್' ನಿವಾರ‍್ತೊಲೊ.

Read More »

ಆಮ್ಚೆಲಾಗಿಂ ವೇಳ್ ನಾ

ಜರ್ ಕೋಣ್ ಮ್ಹಣ್ತಾ ಆಮ್ಚೆಲಾಗಿಂ ವೇಳ್ ನಾ ತರ್ ತೊ ವ್ಹಡ್ಲೊ ಫಟ್ಕಿರೊ. ಜರ್‌ತರ್ ತುಜಿ ಕಂಪೆನಿ ತುಕಾ ಘರಾಥಾವ್ನ್ಂಚ್ ಕಾಮ್‌ ಕರ್ ಮ್ಹಣ್ತಾ ಆನಿ ತುಕಾ ಮಾಮೂಲಿ ಪಾಗ್ ದಿತಾ ತರ್ ಕಿತೆಂ ಉಣೆಂ? ಅಶೆಂ ಆಮಿಂ ಘರಾಚ್ ಆಸ್ಲ್ಯಾರ್ ಆನಿ ಫಾವೊತಿ ಚತ್ರಾಯ್ ಘೆತ್‌ಲ್ಯಾರ್ ಕೊರೊನಾಯಿ ನಾ, ಕೊರೊನಾಚೊ ಬಾಪಯ್‌ಯಿ ತುಜ್ಯಾ ತಳ್ಳೇಕ್ ಯೆಂವ್ಚೆನಾಂತ್ ಮ್ಹಳ್ಳಿ ಖಾತ್ರಿ ಸರ‍್ಕಾರಾನ್ಂಚ್ ದಿಲ್ಯಾ ಮ್ಹಣ್ತಾನಾ ಕಸಲೆ ವಾಂದೆ? ಕಾಮ್ ಕರ‍್ಚ್ಯಾ ವೆಳಾರ್ ತುಂವೆಂ ಪಾಟ್ ಭಾಗಾವ್ನ್ ಕಾಮ್ ಕರುಂಕ್‌ನಾಂಯ್? ಆತಾಂ ಥೊಡೊ ಸುಶೆಗ್ ಘೆ. ಹ್ಯಾ ಅನಿರೀಕ್ಷಿತ್ 'ಸುಟಿಯೆಕ್' ಲಾಗುನ್ ಕಿತ್ಲೆಶೆ ಆವಿಶ್ಕಾರ್, ಅವ್ಕಾಸ್ ತುಜ್ಯಾ ಸಾಮ್ಕಾರ್ ಯೆತೆಚ್ ಆಸಾತ್. ಹಾಂ, ನವಿ ಕಾದಂಬರಿ ಲಿಖ್ತಾಯ್? ಬರಾಬರ್ ... ಪುಣ್ ತಿ ಖಂಯ್ ಪ್ರಗಟ್ ಕರ‍್ತೊಲೊಯ್ ಮ್ಹಳ್ಳೆಂ ಚಿಂತುನ್ ವಿರಾರ್ ಜಾಯ್ನಾಕಾ, ಹಜಾರ್ ಆನಿ ಎಕ್ ಮಾದ್ಯಮಾಂ ತುಜ್ಯಾ ಸಾಮ್ಕಾರ್ ಆಸಾತ್, ತಿಂ ವಾಪ್ರುಂಕ್ ಶಿಕ್. ಭೆಷ್ಟೆಂಚ್ ಆಮ್ಚೆಲಾಗಿಂ ವೇಳ್ ನಾ ಮ್ಹಣಾನಾಕಾ, ರಡನಾಕಾ. ವೇಳ್ ಸಕ್ಡಾಂ ಲಾಗಿಂ ಆಸಾ, ರಚ್ಣಾರಾನ್ ವೇಳಾಚೊ ಅಬಾವ್ ಕೊಣಾಕೀ ದೀಂವ್ಕ್ ನಾ, ವೇಳ್ ಸಮಾಸಮ್ ದಿಲಾ. ಪುಣ್ ಹೊ ವೇಳ್ ಸಮಾಸಮ್ ದಿಲಾ ಎಕಾ ಅಪೂರ್ಣ್ ರಚ್ಣೆಚ್ಯಾ ಹಾತಿಂ ಜಾಲ್ಲ್ಯಾನ್ ಹ್ಯಾ ಸರ್ವ್ ಅನಾಹುತಾಂಕ್ ಇಂಬು ಮ್ಹೆಳ್ಳಾ.

Read More »

ಅಪೂರ್ಣ್ ರಚನ್?

ಎಕಾ ತೀರ್ಪಾನ್ ಸಾಂಗ್ಚೆಂ ತರ್ - ಹೆಂ ರಚನ್ ಪರಿಪೂರ್ಣ್ ಪುಣ್ ತಾಂತ್ಲೆಂ ಮನಿಸ್ ಮ್ಹಳ್ಳೆಂ ರಚನ್ ಮಾತ್ರ್ ಅಪೂರ್ಣ್! ಸೊಂಪ್ಯಾನ್ ಸಾಂಗ್ಚೆಂ ತರ್ ಆಮ್ಚೊ ಭಾವಾರ್ಥ್ ಅಖಂಡ್ ಪುಣ್ ಹೊ ಭಾವಾರ್ಥ್ ಪಾಳ್ಚೆ ಭಾವಾರ್ಥಿ ಮಾತ್ರ್ ಅಪೂರ್ಥ್. ಹ್ಯಾ ಸತಾಚೆಂ ದೆವೆಂ ಆಜ್ ಆಮಿಂ ಫಾರಿಕ್ ಕರಿತ್ತ್ ಆಸಾಂವ್. ಪುಣ್ ಕೆದೊಳ್ ಪರ್ಯಾಂತ್?  ಲಾಗಿಂ ಲಾಗಿಂ ದೋನ್ ವರ್ಸಾಂ ಸಂಪ್ತಾತ್, ಹೆಂ ಖರ್ಗ್ ಆಮ್ಚೆರ್ ದೆಂವೊನ್. ಪುಣ್ ಕಸಲೊಚ್ ಪರ್ಯಾರ್ ಆಮ್ಕಾಂ ದಿಸುನ್ ಯೇನಾ; ಆಮ್ಚ್ಯಾಚ್ ಆಂಗ್ಣಾಂತ್ ಚೆಂಡು ಖೆಳ್ಚ್ಯಾ ಸುಶೆಗಾ ಪರ್ಯಾಂತ್ ಆಮಿ ಪಾವ್ಲ್ಯಾಂವ್ ಪುಣ್ ಹೊ ಚೆಂಡು ಆಮ್ಚ್ಯಾ ಖೊಟೆಕ್ ಸಾಂಪ್ಡಾನಾ ಆನಿ ತಾಕಾ ಸಾಂಪ್ಡಾಂವ್ಚಿ ಶಾತಿ ಆನಿ ಹುನ್ನರ್ ಆಮ್ಕಾಂ ಹ್ಯಾ ಅಪೂರ್ಣ್ ರಚನಾಕ್ ಆಯಿಲ್ಲೊ ನಾ. ತರ್ ಖಂಚೆ ನದ್ರೆನ್ ಆಮಿಂ ಪೂರ್ಣ್?

Read More »

ಹಾಂವ್ ತುಜೊ ಸಲಹಾದಾರ್, ಕೊನ್ಫೆಸೊರ್ ನ್ಹಯ್.

ಆಮ್ಚ್ಯಾ ಕಾಳ್ಜಾ-ಮತಿರ್ ಆಸ್‌ಲ್ಲ್ಯಾ ಕರ‍್ತುಬಾಂಚೆಂ ವೊಜೆಂ ಉಣೆಂ ಕರುಂಕ್ ಆಮ್ಕಾಂ ಹ್ಯಾ ಅಪೂರ್ವ್ ಸಕ್ರಾಮೆಂತಾಚಿ ಗರ‍್ಜ್ ಪಡ್ತಾ. ಆಜ್ ಮ್ಹಜೆಂ ಶಿಂತಿದ್ ಹಾಳು ಜಾಲೆಂ ... ಅಶೆಂ ಆಮಿ ಉದ್ಗಾರ‍್ತಾಂವ್ ಎಕ್ ಸುಟಾಂವೆಂ ಕುಮ್ಸಾರ್ ಜಾವ್ನ್ ಭಾಯ್ರ್ ಯೆತಾನಾ. ವಿಚಿತ್ರ್ ಅಮ್ಕಾಂ ದಿಸ್ತಾ ನ್ಹಯ್? ಪುಣ್ ಹೆಚ್ಚ್ ರಿತಿರ್ ಮ್ಹಜ್ಯಾ ಪೆಲ್ಯಾಕ್ ತುಕಾ ಹಾಂವೆಂ ಭೊಗ್ಸಿಲೊ, ಮ್ಹಾಕಾ ತುಜೆರ್ ಕಸಲೊಚ್ಚ್ ದ್ವೇಶ್ ನಾ ಮ್ಹಣ್ತಾನಾ ಆಮ್ಕಾಂ ಕಸಲೆಂ ಸ್ವರ‍್ಗೀಯ್ ಸುಖ್ ಭೊಗ್ತಾ ತೆಂ ಆಮಿ ಜಾಣಾಂವ್? ಹೊ ಮಾನಸಿಕ್ ಪ್ರಯೋಗ್ ಆಮಿಂ ಕೆಲಾ? ಹೊ ಕರೆಜ್ಮಾಚೊ ಕಾಳ್. ಹ್ಯಾ ಕಾಳಾಂತ್ ಆಮಿ ಎಕ್ ಪುಣಿ ಸುಟಾವೆಂ ಕುಮ್ಸಾರ್ ಜಾಯ್ಜೆಯ್ ಮ್ಹಳ್ಳಿ ವಿಂಚವ್ಣ್ ಆಮಿ ಕೆಲ್ಯಾ? ಕುಮ್ಸಾರ್ ಜಾವ್ನಾಸಾ ಎಕ್ ಮಾನಸಿಕ್ ಉಲವ್ಪ್, ಹೆಂ ಉಲವ್ಪ್ ಅಮಿಂ ಆಮ್ಚೆ ಭಿತರ್‌ಚ್ ಕರ್ಯೆತ್  ಯಾ ಆಮ್ಚ್ಯಾ ಲಾಗ್ಶಿಲ್ಯಾ ಪೆಲ್ಯಾಕ್ ಘೆವ್ನ್‌ಯಿ ಕರ್ಯೆತ್. ಹಾಂತುಂ ಕಸಲಿಚ್ ಲಜ್ ನಾ ಯಾ ಆಮ್ಚ್ಯಾ ಘಮಂಡಾಕ್ ಕಸಲೊಚ್ ಧಕ್ಕೊ ಯೆನಾಶೆಂ ಜತನ್ ಘೆವ್ಯೆತ್.

Read More »

ರೀವೊಲಿ

ಖೆಳಾಚೆಂ ಶರ್ತ್ - ಜಿಕ್ಲೆಲ್ಯಾ ಟೀಮಾನ್ ಸಲ್ವಾಲ್ಲ್ಯಾಂಕ್ ಆನಿ ಥಂಯ್ಸರ್ ಜಮ್ಲೆಲ್ಯಾಂಕ್ ಮಸಾಲಾ ಒಮ್ಲೆಟ್ ಖಾಂವ್ಕ್ ರೀವೊಲಿಕ್ ವರಿಜೆ. ಥಂಯ್ಸರ್ ವಚುಂಕ್ ಚಡ್ಡ್ ಮ್ಹಳ್ಯಾರ್ ಧಾ ಮಿನುಟಾಂಚಿ ವಾಟ್ ಆನಿ ಥಂಡಿಯೆಂತ್, ಜೆನ್ನಾ ಆತಾಂಚೆಂ ಬೆಂಗಳೂರು, ಬ್ಯಾಂಗ್‌ಲೋರ್ ಜಾವ್ನ್ ಆಸ್‌ಲ್ಲ್ಯಾ ವರ‍್ಸಾಂನಿ, ತ್ಯಾ ಧುಂವ್ರೆ ಮದ್ಲ್ಯಾನ್ ಚಲೊನ್ ವೆತಾನಾ, ಆಂಕುಡ್ತಾನಾ ಆಮಿ ಜೊಡ್ಚಿ ಮಝಾಚ್ಚ್ ವೆಗ್ಳಿ. ತೊ ಸಾಂಗಾತ್ ವೆಗ್ಳೊ, ಉಲವ್ಪ್ ವೆಗ್ಳೆಂ. ಕ್ಯಾರ್ರಮ್ ಮ್ಯಾಚಾಂ ಸುರು ಜಾತಾನಾ ಆಮ್ಚ್ಯಾ ಮತಿಂತ್ ಕೋಣ್ ಜಿಕ್ತಾ, ಕೋಣ್ ಸಲ್ವತಾ ಮ್ಹಳ್ಳೆಂ ಪ್ರಶ್ನ್ ಆಸಾಂಚ್ ನಾತ್‌ಲ್ಲೆಂ ಪುಣ್ ಮಸಾಲಾ ಒಮ್ಲೆಟ್ ಕಶೆಂ ಆಸಾತ್, ಥಂಡಿ ಕಶಿ ಆಸಾತ್ ಮ್ಹಳ್ಳೆಂ ಎಕ್  'ಸ್ಟುಪಿಡ್' ಭೊಗಾಪ್.

Read More »

ಭಾಂಗಾರ್, ಧುಂಪ್ ಆನಿ ದೋನ್ ಥೆಂಬೆ ವಾಯ್ನ್

ಸಾತ್ ದಿಸಾ೦ ಆದಿ೦ ಕಾಳ್ಯಾ೦ ಮೊಡಾ೦ಚೊ ಕೊಚೊರ್ ಶಿ೦ಪ್ಡೊ೦ಕ್ ಲಾಗ್‌ಲ್ಲೆಪರಿ೦ ಬೆತ್ಲೆಹೆಮಾಚ್ಯಾ ಆಗಸಾರ್ ಕಾಳ್ಬಾಣ್ ಚರ್‌ಲ್ಲಿ. ಕಾ೦ಯ್ ಹಿಮ್/ಪಾವ್ಸ್ ಪಡ್ಟಾ ಕೊಣ್ಣಾ ಮ್ಹಳ್ಳೊ ಅ೦ದಾಜ್ ಜಾಲೊ ಆದಿಕ್. ಬೆತ್ಲೆಹೆಮಾ೦ತ್ ಹಿಮ್ ಪಡ್ಚೊ ಸ೦ಬವ್ ಭಾರಿಚ್ ಉಣೊ ಪುಣ್ ಪಡತ್ ತರ್ ತೀನ್-ಚಾರ್ ರಾತಿ೦ ಖಳ್ಮಿತ್ ನಾಸ್ತಾ೦ ಪಡ್ಟಾಲೊ. ಥಾಮಿರ್ ಆನಿ ತಾಣೆ ಪಹರೊ ದಿ೦ವ್ಚಿ ಸುವಾತ್ ಬೆಯಿತ್ ಸುಹೂರ್ ಮ್ಹಣ್ಜೆ ರಾತ್ ಪಹರ‍್ಯಾಚಿ ಸುವಾತ್. ಜೆರುಸಲೇಮ್ ತೆ೦ಪ್ಲಾ೦ತ್ ಬಲಿ ದೀ೦ವ್ಕ್ ಅಮಾನತ್ ಕರುನ್ ದವರ್‌ಲ್ಲ್ಯಾ ಬೊಕ್ರ್ಯಾ೦ಕ್ ಮಾತ್ರ್ ಹ್ಯಾ ಸುವಾತಿಚೆರ್ ಚರ೦ವ್ಚಿ ಪರ‍್ವಣ್ಗಿ ಆಸ್‌ಲ್ಲಿ ಪುಣ್ ಭೋವ್ ಥೊಡ್ಯಾ ಗೊವ್ಳ್ಯಾ೦ಕ್ ಮಾತ್ರ್. ತ್ಯಾ ಪಯ್ಕಿ ಆದಿಚೊ ಬಾಪಯ್ ಎಕ್ಲೊ.

Read More »

ಹೆಂಟ್ರಿ ಅಂಕಲ್

ತಿ ಸಾಂಜ್ ಮ್ಹಜ್ಯಾ ರೊಸಾಚಿ. ಹಾಂವ್ ಕಸಲ್ಯಾಯಿ ಸಂಪ್ರಾದಾಯೆಂಕ್ ಮಾಂದಿನಾತ್‌ಲ್ಲೊಂ ಜಣ್ ಜಾಲ್ಲ್ಯಾನ್ ಮ್ಹಾಕಾ ವೊವ್ಯಾ-ವೆರ‍್ಸಾಂನಿ ಕಸಲಿಚ್ ಆಸಕ್ತ್ ನಾತ್‌ಲ್ಲಿ. ಹೆರಾಂನಿ ಸಾಂಪ್ರದಾಯಿಕ್ ನೆಸ್ಣಾರ್ ಮಾಟ್ವಾಕ್ ಯೇಜಾಯ್ ಮ್ಹಣ್ ವತ್ತಾಯ್ ಕೆಲೊ ತರಿ ಹಾಂವ್ ಉಪ್ರಾಟೋನ್ ಸುಟಾರ್‌ಚ್ ಮಾಟ್ವಾಕ್ ದೆಂವ್ಲೊಂ. ಆಜಿ ನಾತ್‌ಲ್ಲ್ಯಾನ್ ಬರ‍್ಯಾಕ್ ಪಡ್ಲೆಂ ಪುಣ್ ಮ್ಹಜಿ ಮಾಮ್ಮಿ ಭಿಗಡ್ಲಿ. ಮ್ಹಜೆಂ ನ್ಹೆಸಪ್ ಜಾವ್ನ್ ಹಾಂವ್ ಟಾಯೆಚಿ ಗಾಂಟ್ ಭಾಂದ್ತಾಂ ಮ್ಹಣ್ತಾಸ್ತಾಂ ಆವ್ಚಿತ್ ಮ್ಹಜ್ಯಾ ರೂಮಾಚೆಂ ದಾರ್ ಬಡ್‌ಯ್‌ನಾಸ್ತಾಂ ಉಸವ್ನ್ ಭಿತರ್ ಆಯಿಲ್ಲ್ಯಾಕ್ ಪಳೆವ್ನ್ ಹಾಂವ್ ಥಟಾಕ್ಲೊಂ ಪುಣ್ ತೆ ವ್ಯಕ್ತೆಚಿ ವಳಕ್ ಮ್ಹಾಕಾ ಸುಲಭಾಯೆನ್ ಕಳಿತ್ ಜಾಲಿ ನಾ. ಪುಣ್ ತೆಚ್ಚ್ ಗುಂಗ್ರು ಕೇಸ್, ಆತಾಂ ಮುಳಾಂತ್ ಪಿಕ್ಲೆಲೆ, ತೊಚ್ ಧೃಡ್ ಜೀವ್‌ಕಟ್ಟ್, ತೆಚ್ಚ್ ಪಾನ್ ಬಿಡಾ ಖಾವ್ನ್ ಕಾಳ್ಬೆ ಆನಿ ಪೀಕ್ ದಾಟ್ಲೆಲೆ ದಾಂತ್. ತ್ಯೆ ವಕ್ತೆಕ್ ಹಾಂವ್ ವಳ್ಕಾಲೊಂ - ಹೆಂಟ್ರಿ ಅಂಕಲ್! ಮ್ಹಜ್ಯಾ ವೊಂಟಾಚೆರ್ ಉತ್ರಾಂ ಉದೆಲಿಂ ಪುಣ್ ಭಾಯ್ರ್ ಸರ‍್ಲಿಂ ನಾಂತ್. ಪುಣ್ ಆಕ್ರೇಕ್ ತರಿ ಹಾಂವ್ ಉದ್ಗಾರ‍್ಲೊಂ, 'ಹೆಂಟ್ರಿ ಅಂಕಲ್ ತುಂ ಹಾಂಗಾಸರ್? ತುಕಾ ಕಶೆಂ ಕಳಿತ್ ಆಜ್ ಮ್ಹಜೊ ರೋಸ್ ಮ್ಹಣ್?'

Read More »

ಆಸ್ಪಿರೀನ್ – ಫ್ಲೇಸಿಬೊ ಇಫೆಕ್ಟ್ !

ಮ್ಹಾಕಾ ದಿಸ್ತಾ ಹ್ಯಾ ವಯ್ರಸಾಕ್ ಲಾಗುನ್ ಸಬಾರ್ ಅಂದ್ಳ್ಯೊ ಪಾತ್ಯೆಣ್ಯೊ, ನಾಂವ್ ನಾತ್‌ಲ್ಲೆ ಆಚಾರ್ ವಿಚಾರ್, ಮೂಡ್ ಆಚಾರ್ ವಿಚಾರ್, ವೊಕ್ತಾಂ, ವಾತಿ ಪೆಟಯಾ, ಥಾಲಿಯೊ ಥಾಪುಡಾ, ಧುಂಪ್ ಘಾಲಾ ಮ್ಹಳ್ಳಿಂ ಸುಚನಾಂ ಆಮ್ಕಾಂ ಆತಾಂ ಧಾರಾಳ್ ಮಾಪಾನ್ ಬಡ್ಕಾಯ್ತಾತ್. ಹ್ಯಾ ಸರ‍್ವಾಚ್ಯಾ ಭಕ್ತಿಕ್ ಪಡ್ಲೆಲೆ ಸಲ್ವತಾತ್, ಸಲ್ವಲ್ಯಾತ್, ಅಸಲ್ಯಾ ಆಮಾಲಾಕ್ ಬಲಿ ಜಾವ್ನ್. ಆಶೆಂ ಆಮಾಲಾಂತ್ ಬುಡ್ಚೊ ಮನಿಸ್ ಆಮಾಲಾಂತ್ ಬುಡೊನ್ ಫಾಲ್ಯಾಂಚೊ ಸಕಾಳ್ ಎಕ್ ನವೊ ದೀಸ್ ಹಾಡುನ್ ಯೆತೊಲೊ ಮ್ಹಳ್ಳ್ಯಾ ಅಂದ್ಳ್ಯಾ ಪಾತ್ಯೆಣೆನ್ ನಿದೊಂಕ್ ವೆತಾತ್ ಆನಿ ಉರ್‌ಲ್ಲ್ಯಾ ಸರ‍್ವಾಂಕ್ ಆಮಿ ಉಣ್ಯಾ ಭಾವಾಡ್ತಾಚೆ ಮ್ಹಣ್ತಾಂವ್.

Read More »