ವಿಲ್ಸನ್, ಕಟೀಲ್

ವಿಲ್ಸನ್, ಕಟೀಲ್ ಹ್ಯಾ ಲಿಕ್ಣೆನಾಂವಾರ್ ಬರಂವ್ಚೊ ವಿಲ್ಸನ್ ರೋಶನ್ ಸಿಕ್ವೇರಾ ಗಾಂವಾನ್ ಕಟೀಲ್ಚೊ. ಕಟೀಲಾಂತ್ ಮುಳಾವೆಂ ಶಿಕಪ್. ವಿಗ್ಯಾನಾಂತ್ ಚಡ್ ಆಸಕ್ತ್. ಪಿ.ಯು.ಸಿ. ಸಂಪ್ತಚ್ ಇಂಜಿನಿಯರಿಂಗ್ ಶಿಕ್ಪಾಖಾತಿರ್ ದಾವಣಗೆರೆಂತ್ ವಸ್ತಿ. 2003 ಇಸ್ವೆಂತ್ ಪಯ್ಲಿ ಕೊಂಕಣಿ ಕವಿತಾ ಪರ್ಗಟ್ ಜಾಲ್ಯಾ ಉಪ್ರಾಂತ್ ಕೊಂಕ್ಣೆಚ್ಯಾ ಚಡಾವತ್ ಪತ್ರಾಂನಿ ತಶೆಂ ಅಂತರ್ಜಾಳಿಂನಿ ತಾಚ್ಯೊ ಕವಿತಾ ಸರಾಗ್ ಫಾಯ್ಸ್ ಜಾವ್ನ್ ಆಸಾತ್. ಕವಿತೆ ಬರಾಬರ್ ಮಟ್ವ್ಯೊ ಕಾಣಿಯೊ, ಲೇಕನಾಂ, ಪ್ರಬಂದ್, ವಿಡಂಬನಾಂಯ್ ತೋ ಬರಯ್ತಾ.ದಸರಾ ಕವಿಗೋಷ್ಠಿ, ರವೀಂದ್ರನಾಥ್ ಠಾಗೋರ್ 150 ಜಲ್ಮಾಫೆಸ್ತಾಚಿ ಕವಿಗೋಷ್ಠಿ ಅಶೆಂ ಜಾಯ್ತ್ಯಾ ಕವಿಗೋಷ್ಠಿಂನಿ ತಾಣೆ ವಾಂಟೊ ಘೆತ್ಲಾ. ಆಕಾಶ್‌ವಾಣಿ, ದೂರ್‌ದರ್ಶನಾಂತ್ ತಾಚ್ಯೊ ಕವಿತಾ ಪ್ರಸಾರ್ ಜಾಲ್ಯಾತ್. ಪದಾಂಚ್ಯಾ ಉತ್ರಾಂ ಖಾತಿರ್ ದೊನ್ ಪಾವ್ಟಿಂ ಕೊಂಕಣಿ ಗ್ಲೋಬಲ್ ಮ್ಯೂಸಿಕ್ ಎವಾರ್ಡ್ ತಾಣೆ ಆಪ್ಣಾಯ್ಲಾ. ತಮಿಳ್ ಭಾಸ್ ಜಾಣಾ ಆಸ್ಚೊ ತೋ ಕನ್ನಡಾಂತೀ ಬರಯ್ತಾ. ‘ದೀಕ್ ಆನಿ ಪೀಕ್’, ಪಾವ್ಳೆ, ಎನ್‌ಕೌಂಟರ್, ನೀಶೇದಕ್ಕೊಳಪಟ್ಟ ನೋಟು – ತಾಚೆ ಪರ್ಗಟ್ ಜಾಲ್ಲೆ ಬೂಕ್. ‘ತಸ್ವೀಂತ್’ ಬುಕಾಂತ್ ಕಲಾಕಾರ್ ವಿಲ್ಸನ್ ಕಯ್ಯಾರಾಚಾ ತಸ್ವೀರ‍್ಯಾಂಕ್ ತಾಣೆ ಕವಿತಾ ಬರಯ್ಲ್ಯಾತ್. 2015ವ್ಯಾ ವರ್ಸಾ ಪೊಯೆಟಿಕ್ಸ್ ವಾಟ್ಸಪ್ ಪಂಗ್ಡಾಖಾತಿರ್ ತಾಣೆ ಸಂಪಾದನ್ ಕೆಲ್ಲ್ಯಾ ಕವಿತೆಂಚೊ ಜಮೊ ‘ಪಾಕ್ಳ್ಯೊ’ ಧ್ಯಾನವನ ಪ್ರಕಾಶನಾನ್ ಫಾಯ್ಸ್ ಕೆಲಾ. 2016ವ್ಯಾ ವರ್ಸಾ ಫಾಯ್ಸ್ ಜಾಲ್ಯಾ ತಾಚ್ಯಾ ‘ಎನ್ ಕೌಂಟರ್’ ಕವಿತಾಜಮ್ಯಾಕ್ 2017ವ್ಯಾ ವರ್ಸಾಚೊ ಪ್ರತಿಷ್ಠಿತ್ ವಿಮಲಾ ವಿ ಪೈ ಕವಿತಾ ಕೃತಿ ಪುರಸ್ಕಾರ್ ಫಾವೊ ಜಾಲಾ. ಕೊಂಕ್ಣಿ ಕೊವ್ಳೆಂಕ್ ಜಾಯ್ತಿಂ ಪದಾಂ ತಾಣೆ ಬರಯ್ಲ್ಯಾಂತ್. ಸದ್ದ್ಯಾಕ್ ‘ಆರ್ಸೊ’ ಹ್ಯಾ ಮಯ್ನ್ಯಾಳ್ಯಾ ಪತ್ರಾಚೊ ಸಂಪಾದಕ್ ತಶೆಂ ಕಿಟಾಳ್ ಜಾಳಿಜಾಗ್ಯಾಚೊ ಸಾಂಗಾತಿ ಸಂಪಾದಕ್ ಜಾವ್ನ್ ವಾವ್ರ್.