ಡಾ. ಸರ್ವೆಪಲ್ಲಿ ರಾಧಾಕೃಷ್ಣನ್ ಲಾಗಿಂ ತಾಚ್ಯಾ ಇಷ್ಟಾಂನಿ ಆನಿ ಆದ್ಲ್ಯಾ ವಿಧ್ಯಾರ್ಥಿಂನಿ ವಚೊನ್, ‘ತುಜೊ ಜಲ್ಮಾ ದೀಸ್ ಆಮ್ಕಾಂ ಆಚರುಂಕ್ ಪರ್ವಣ್ಗಿ ದೀ’ ಮ್ಹಣ್ ವಿಚಾರ್ತಾನಾಂ, “ಮ್ಹಜೊ ಜಲ್ಮಾ ದೀಸ್ ತುಮಿ, ಸಮಾಜೆಕ್ ವರ್ತಿ ದೇಣ್ಗಿ ದೀವ್ನ್ ಆಸಾತ್ ತ್ಯಾ ಶಿಕ್ಷಕಾಂಚೊ ದೀಸ್ ಮ್ಹಣ್ ಆಚರಣ್ ಕರಾತ್” ಮ್ಹಣ್ ತಾಣಿ ಸಾಂಗ್ಲೆಂ ಖಂಯ್. ಅಶೆಂ ಸಪ್ಟೆಂಬರಾಚಿ 5 ತಾರಿಕ್ ಹರ್ ವರ್ಸಾ, ಶಿಕ್ಷಕಾಂಚೊ ದೀಸ್ ಮ್ಹಣ್ ಆಚರಣ್ ಕರ‍್ಚಿ ದಸ್ತುರ್ ಸುರು ಜಾಲಿ.
ಡಾ| ರಾಧಾಕೃಷ್ಣನ್, ವರ್ತೊ ಶಿಕ್ಷಕ್, ತತ್ವಶಾಸ್ತ್ರಿ, ರಾಜಕೀಯ್ ಫುಡಾರಿ ಜಾವ್ನ್ ಭಾರತ್ ದೇಶಾಚೆಂ ಮುಕೆಲ್ಪಣ್ ಘೆತ್‌ಲ್ಲೊ ಶಿಸ್ತೆಚೊ ವ್ಯಕ್ತಿ. ಸ್ವತಂತ್ರ್ ಭಾರತಾಚೊ, ದುಸ್ರೊ ರಾಷ್ಟ್ರಪತಿ ಆನಿ ಉಪರಾಷ್ಟ್ರಪತಿ ಜಾವ್ನ್‌ಯಿ ಸೆವಾ ದಿಲ್ಲೊ ಮ್ಹಾನ್ ವ್ಯಕ್ತಿ. ಶಿಕ್ಪಾಶೆತಾಂತ್ಲಿ ತಾಚಿ ದೇಣ್ಗಿ ವಳ್ಕೊನ್ ತಾಕಾ , ದೇಶಾಚೊ ಶ್ರೇಷ್ಟ್ ಪುರಸ್ಕಾರ್ ಭಾರತ್ ರತ್ನ್ ಪಾಟವ್ನ್ ಗೌರವ್ ದಿಲಾ ಮಾತ್ರ್ ನಯ್, ಜಾಯ್ತೆ ಹೆರ್ ಪುರಸ್ಕಾರ್ ತಾಕಾ ಫಾವೊ ಜಾಲ್ಯಾತ್. ಶಿಕ್ಷಕಾಂನಿ ದೇಶಾಂತ್ಲೆ ಉಂಚ್ಲೆ ಗಿನ್ಯಾನಾನ್ ಭರ್‌ಲ್ಲೆ ವೆಕ್ತಿ ಜಾವ್ನ್ ಆಸೊಂಕ್ ಜಾಯ್ – ಮ್ಹಣ್ ತಾಚಿ ಅಭಿಪ್ರಾಯ್ ಜಾವ್ನಾಸ್ಲಿ.
ಜೊ ವೆಕ್ತಿ, ಗಿನ್ಯಾನ್ ಜೊಡುಂಕ್ ಕುಮಕ್ ಕರ್ತಾ, ಪೆಲ್ಯಾಚೆಂ ಗಿನ್ಯಾನ್ ವಾಡಂವ್ಕ್ ಕಾರಣ್ ಜಾತಾ, ಜೊಕ್ತೆಂ ವ್ಯಕ್ತಿತ್ವ್ ನಿರ್ಮಾಣ್ ಕರುಂಕ್ ಪೆಚಾಡ್ತಾ, ತಾಕಾ ಏಕ್ ಗುರು, ಶಿಕ್ಷಕ್, ಮೆಸ್ತ್ರಿ ಮ್ಹಣ್ಯೆತ್.
ಹರ್ಯೆಕಾ ಮನ್ಶ್ಯಾಚ್ಯಾ ಜಿವಿತಾಂತ್ ಶಿಕ್ಷಕ್ ಪಾಶಾರ್ ಜಾವ್ನ್ ಗೆಲ್ಯಾತ್. ಹರ್ಯೆಕ್ಲೊ ಆಮಿ ಆಮ್ಚ್ಯಾ ಬಾಳ್ಪಣಾಚ್ಯಾ ಮೆಸ್ತ್ರಿಂಕ್ ಪರ್ಯಾಂತ್, ವಿಸ್ರೊಂಕ್ ಸಕಾನಾಂವ್. ಥೊಡ್ಯಾ ವರ್ಸಾಂ ಆದ್ಲ್ಯೊ ಯಾದಿ ಉಸ್ತುಂಚ್ಯೊ ತರ್ ತವಳ್ಚೆ ಆಮ್ಚೆ ಶಿಕ್ಷಕ್ ಶಿಸ್ತ್, ಶಿಕ್ಷಾ, ಬರೆಂ ಶಿಕ್ಷಣ್ ದಿಂವ್ಚ್ಯಾಂತ್ ನಾಂವ್ ವೆಲ್ಲೆ ಆಸ್‌ಲ್ಲೆ. ಹರ್ಯೆಕಾಂತ್ ಶಿಸ್ತ್, ಉಲವ್ಪ್, ನ್ಹೆಸಾಣ್, ಪಾಠ್ ಪ್ರವಚನ್, ಶಾಳೆಚ್ಯೊ ಹರ್ ಚಟುವಟಿಕೊ. ತಿತ್ಲೊಚ್ ತಾಂಕಾ ವಿದ್ಯಾರ್ಥಿಂಚೊ ಮೋಗ್. ಹ್ಯಾ ವರ್ವಿಂ ತೆ ಸರ್ವ್ ವಿಧ್ಯಾರ್ಥಿಂಕ್ ಕಾಳ್ಜಾಕ್ ಲಾಗ್ಶಿಲೆ ಆಸ್ಲೆ.
ಸವ್ಲತ್ಯೊ, ತಾಂತ್ರಿಕ್ ವೆವಸ್ಥಾ ಆತಾಂಚೆಪರಿಂ ನಾ ಆಸ್‌ಲ್ಲ್ಯಾ ವೆಳಾರ್ ಸಯ್ತ್, ತಾಣಿಂ ಶಿಕಯಿಲ್ಲಿಂ ಮೊಲಾಂ ಆಮ್ಚ್ಯಾ ಕಾಳ್ಜಾಂನಿ ಅತಾಂಯ್, ಜಿವ್ಸಾಣ್ ಚರಯ್ತಾತ್, ಮಧುರ್ ಯಾದಿಂಚಿಂ ಭೊಗ್ಣಾಂ ಉಸ್ಕಾಯ್ತಾತ್. ಸತ್, ನಿತಿಚಿಂ ಮನ್ಶ್ಯಾಪಣಾಲಿಂ ಮೊಲಾಂ, ಆಮ್ಚೆ ಥಂಯ್ ಕಿರ್ಲಾತ್ ಘಾಲ್ಲಿಂಚ್ ತಾಣಿಂ. ಹಳ್ಳೆ ಮುಲ್ಯಾಂತ್ ತರೀ, ಕಸಲ್ಯಾಚ್ ಪ್ರಭಾವ್ ವಾ ದಬಾವಾವಿಣೆಂ, ಆಮ್ಚೆಂ ಶಿಕ್ಷಣ್ ಪೊಂತಾಕ್ ತಾಣಿಂ ಪಾವಯಿಲ್ಲೆಂ.
ಕಾಳಾಚಿಂ ರೊದಾಂ ಕೊಣಾಚಿಚ್ ಪರ್ವಾ ನಾಸ್ತಾಂ ಘುಂವೊನ್ ಘುಂವೊನ್ ಫುಡೆಂ ಪಾವ್ಲ್ಯಾಂತ್. ಜಾಯ್ತೆ ಶಿಕ್ಷಕ್ – ಶಿಕ್ಷಕಿ ಹೊ ಸಂಸಾರ್ ಸಾಂಡುನ್ ಸಯ್ತ್ ಗೆಲ್ಯಾಂತ್ ತರೀ, ತಾಣಿಂ ಆಪ್ಲ್ಯಾ ವಿದ್ಯಾರ್ಥಿಂಚ್ಯಾ ಕಾಳ್ಜಾಂನಿ, ಮನಾಂನಿ ಶಾಶ್ವತ್ ಜಾಗೊ ಅಮಾನತ್ ಕೆಲಾ. ಹೊ ಏಕ್ ವಿಶೇಸ್ ರಿತಿಚೊ ಬಾಂದ್. ಕಿತ್ಯಾಕ್ ಮ್ಹಳ್ಯಾರ್, ಶಿಕ್ಷಕ್ ಆಪ್ಣಾ ಸಾರ್ಕ್ಯಾ ಮನ್ಶ್ಯಾಂಲಾಗಿಂ ದೀಸ್ ಭರ್ ಎಕಾ ವಿಭಿನ್ನ್ ಪರಿಸರಾಂತ್, ಶಾಳೆಚ್ಯಾ ಸುತ್ತುರಾಂತ್ ಜಿಯೆತಾ. ಹೊ ಬಾಂದ್, ವಕೀಲ್, ವಯ್ಜ್, ಪೊಲಿಸ್ ವ ಇತರ್ ದಫ್ತರಾಂತ್ ಮನ್ಶ್ಯಾಂನಿ ಮನ್ಶ್ಯಾಂ ಸಂಗಿ ಖರ್ಚಿಲ್ಲ್ಯಾ ವೆಳಾ ಪ್ರಾಸ್ ವೆಗ್ಳೊ ಮ್ಹಣ್ಯೆತ್. ತ್ಯಾಚ್ ಖಾತಿರ್ – ಗುರು ಆನಿ ಶಿಷ್ಯ ಸಂಬಂಧ್ ಏಕ್ ಪವಿತ್ರ್ ಸಂಬಂದ್ ಜಾವ್ನ್ ವಾಡೊನ್ ಯೆತಾ.
ಪ್ರಸ್ತುತ್ ಪರಿಗತೆಂತ್ ಶಿಕ್ಷಕ್ – ವಿದ್ಯಾರ್ಥಿ – ಶಾಳೆಚೆಂ ಜಿವಿತ್‌ಚ್ ಎಕಾ ವಿಭಿನ್ನ್ ದಿಶೆನ್ ಪಾಶಾರ್ ಜಾಂವ್ಚೆಂ ದಿಸ್ತಾ. ಶಿಸ್ತೆಚಿಂ ಕ್ರಮಾಂ ಘೆಂವ್ಕ್‌ಚ್ ನಾಂತ್ ಅಶೆಂ ನಿಯಮಾಂ ಸರ್ಕಾರಾನ್ ರಚುನ್ ಘಾಲ್ಲಿಂ ಆಸಾತ್. ಆದಿಂ ರೊತಾಂಚೆ, ಚಾಟಿಯೆಚೆ ಮಾರ್, ಹಾತಾ ಬೊಟಾಂನಿ ಸುಜ್, ಘರಾ ಕಳ್ಳ್ಯಾರ್ ತಾಚೆ ವಯ್ರ್ ಬಾಬಾಚೆ ಆನಿ ಚಾರ್ ಮಾರ್, ಸದಾಂಚೆಂ. ಆತಾಂ ಮಾರ್ಚೊ ವಿಷಯ್ ಕಿತ್ಯಾಕ್, ವಿದ್ಯಾರ್ಥಿಂಕ್ ಗೊವ್ಜಿ ಕರುಂಕೀ ನಾ, ದಾರ್ಗುನ್ ಉಲೊಂವ್ಕ್ ನಾ, ಶಿಕ್ಶೆಚೆಂ ನಾಂವ್ ಸಯ್ತ್ ಕಾಡ್ಚೆಪರಿ ನಾ. ಹ್ಯಾ ನಿಯಮಾಂ ಮಧೆಂ ಶಿಕ್ಷಕ್ ಅಡ್ಚೊನ್ ಫುಡೆಂ ವಾಟ್ ಕರ್ನ್ ವೆತೇ ಆಸಾ. ತಾಣೆಂಯ್ ವಾಂಚೊಂಕ್ ಆಸಾ, ಪರಿಸ್ಥಿತೆಸಂಗಿ ರಾಜಿ ಜಾಯಿತ್ತ್ ತೊ ಚಮ್ಕಾತೇ ಆಸಾ.
ಥಂಯ್ ಹಾಂಗಾ ಜಾಲ್ಲ್ಯಾ ಥೊಡ್ಯಾ ಅಮಾನುಶ್ ಘಡಿತಾಂ ವರ್ವಿಂ, ಸರ್ಕಾರಾನ್ ಶಿಸ್ತೆಚೆಂ ಕ್ರಮ್ ಹಾತಿಂ ಘೆವುನ್, ಭುರ್ಗ್ಯಾಂಕ್ ಮಾರ್ಚೆಂ ನಂಯ್, ಮೊಗಾನ್ ತಿದ್ವುನ್ ಸಾರ್ಕೆ ವಾಟೆಕ್ ಹಾಡುಂಕ್ ಪ್ರಯತ್ನಾಂ ಚಲ್ಲ್ಯಾಂತ್. ವಿದ್ಯಾರ್ಥಿ ಆನಿ ಶಿಕ್ಷಕ್ ಆತಾಂ ಇಷ್ಟಾಂ ಪರಿ ಆಸೊಂಕ್ ಜಾಯ್ ಮ್ಹಳ್ಳಿ ಅಭಿಪ್ರಾಯ್, ವಾಡೊನ್ ಆಯಿಲ್ಲಿ ಆಸಾ. ಪುಣ್ ವಿದ್ಯಾರ್ಥಿಂಕ್ ಶಿಕ್ಷಕಾನ್ ಭಿಯೆಂವ್ಚಿ ಪರಿಸ್ಥಿತಿ ಆತಾತಾಂ ನಿರ್ಮಾಣ್ ಜಾವ್ನ್ ಯೆತೇ ಆಸಾ. ರಾಗಾನ್ ಭುರ್ಗ್ಯಾಂಕ್ ತಿದ್ವಿಲ್ಯಾರ್ ಕಾಮ್ ಹೊಗ್ಡಾಂವ್ಚಿ ಪರಿಸ್ಥಿತಿ ಶಿಕ್ಷಕಾಂಚಿ!
ಅಸಲ್ಯಾ ಸಂದರ್ಭಾರ್, ಆಪ್ಣಾಕ್ ಕಿತ್ಯಾಕ್ ರಿಸ್ಕ್, ಮ್ಹಣೊನ್ ಶಿಕ್ಷಕ್ ಮೊನೊ ಉರೊಂಕ್ ಲಾಗ್ಲಾ.
ಕ್ಷುಲ್ಲಕ್ ಕಾರಣಾಂಕ್, ಘರ್ಷಣ್ ಕೋಣ್ ಆಶೆತಾ? ದೆಕುನ್ ಶಿಕ್ಷಕಾನ್ ಅತಾಂ ಆಪ್ಲೆಂ ಧೋರಣ್ ಬದ್ಲಿಲಾಂ. ಆಪ್ಲೆಂ ಕಾಮ್ ಕರ್ಚೆಂ ಪಾಟಿಂ ವೆಚೆಂ. ತುಳ್ವೆಂತ್, ಪಂಡಿ ಬೇಲೆ ಪಾಡಿ ನುಪ್ಪು ಮ್ಹಳ್ಳೆಪರಿಂ. ಸರ್ಕಾರಿ ಧೋರಣ್, ಕಾಯ್ದೆ ಕಾನೂನ್, ಹಾಚೆ ತುದ್ಯೆರ್ ಶಿಕ್ಷಕಾಕ್ ಅರ್ಣುನ್ ಧರ್ಚೊ ಪಾಸ್, ತಾಕಾ ಬರೆಂ ಕರುಂಕ್ ಆಡಾವ್ನ್ ಆಸಾತ್. ಆಪ್ಲ್ಯಾ ಪೊಟಾಚಿ ಪೋಡ್ ಚುಕ್ಲ್ಯಾರ್ ಮುಖ್ಲಿ ಗತ್? ಹಾಕಾ ಲೊಕಾಚಿ ಅಭಿಪ್ರಾಯ್‌ಯೀ ತಿತ್ಲಿಚ್ ಜವಾಬ್ದಾರ್. ಎಕ್ಲಿಂ ದೊಗಾಂ ಮಾತ್ ಭುರ್ಗಿಂ ಆಸ್ಚ್ಯಾ ಹ್ಯಾ ಕಾಲಾರ್, ಲೆಖಾವರ್ತೊ ಮೋಗ್, ಕೊಂಡಾಟೊ , ಫಾಲ್ಯಾಂ ಭುರ್ಗಿಂ ತಾಂಕಾಂಚ್ ಪಾಟಿಂ ಮಾರ್ತಿತ್ ಮ್ಹಳ್ಳಿ ಖಾತ್ರಿ ನಾಸ್ತಾನಾ, ವ್ಹಡಿಲಾಂ ಭುರ್ಗ್ಯಾಂಕ್ ಸಾಂಗಾತ್ ದಿತೇ ಆಸಾತ್. ವಾಯ್ಟ್ ಕರ್ತಾನಾ ಜೊಕ್ತ್ಯಾ ರಿತಿನ್ ತಿದ್ವಣ್ ಮೆಳಾನಾಸ್ಚಿ, ವಾಟ್ ಚುಕ್ತಾನಾ, ಪಾಟಿಂ ಸಾರ್ಕೆ ವಾಟೆಕ್ ಹಾಡ್ಚ್ಯಾ ಪ್ರಯತ್ನಾಂತ್ ಸಲ್ವೊಣಿ, ನಿಂದಾ – ಶಿಕ್ಷಕಾಂಕ್ ಪಾಟಿಂ ತಾಂಡ್ತಾ.
ಖಂಚೆಂಯ್ ಕೊಣಾಕ್‌ಯ್ ಶಾಶ್ವಿತ್ ಮ್ಹಳ್ಳೆಂ ಹಾಂಗಾ ನಾ. ಭುರ್ಗ್ಯಾಂಕ್ ಚೂಕ್ ಕರ್ತಾನಾ ಜೊಕ್ತ್ಯಾ ರಿತಿನ್ ತಿದ್ವುನ್ ಘೆಂವ್ಕ್ ಅವ್ಕಾಸ್ ನಾತ್‌ಲ್ಲ್ಯಾ ವೆಳಾರ್, ಸಮಸ್ಯೆ ಫುಡ್ಲ್ಯಾ ದಿಸಾಂಕ್ ಚಡ್ ವಾಡೊನ್ ವೆತಾತ್. ಝಾಡ್ ಆಸ್ತಾನಾಂಚ್ ಬಾಗಾವ್ಯೆತ್, ರೂಕ್ ಜಾವ್ನ್ ವಾಡ್ತಚ್ ಬಾಗಾಂವ್ಕ್ ಕೊಣಾಕ್‌ಯ್ ಸಾಧ್ಯ್ ನಾ – ಜಾಂವ್ ಶಿಕ್ಷಕಾಕ್, ವ್ಹಡಿಲಾಂಕ್ ವ ಸರ್ಕಾರಾಕ್! ಉಪ್ರಾಂತ್ ಸಮಾಜೆಕ್ ಸಮಸ್ಯೆ ಜಾವ್ನ್ ಏಕ್ ವ್ಯಕ್ತಿ ಬದ್ಲಾತ್ ತರ್ ಹಾಕಾಯ್ ಕಾರಣ್ ಆಮಿಚ್ ಜಾತೆಲ್ಯಾಂವ್.
ಶಿಕ್ಷಕ್ ಆಪ್ಲಿ ಆವ್ದಿ ಸಂಪ್ತಚ್ ನಿವೃತ್ ಜಾತಿತ್. ಪೂಣ್ ಸಮಾಜ್ ಫುಡ್ಲ್ಯಾ ಪಿಳ್ಗೆಕ್ ಸೊಡ್ನ್ ದಿಂವ್ಚಿ ಪಡ್ತಾ. ಬರೆ ನಾಗರಿಕ್ ರೂಪಿತ್ ಕರುಂಕ್ ಜರ್ ಶಿಕ್ಷಕಾಕ್ ಆವ್ಕಾಸ್ ದಿಲೊನಾ, ತರ್ ಸಮಾಜೆಚೆಂ ಸುರುಪ್ ಬದ್ಲಾಲ್ಲ್ಯಾಂತ್ ನವಾಲ್ ಕಿತೆಂ?
ದಿಸ್ಪಡ್ತೆಂ ಲಡಾಯೊ, ಖುನಿ, ಆತ್ತ್ಯಾಚಾರಾಂಚ್ಯೊ ವರ್ದ್ಯೊ ಕಾನಾಂಕ್ , ಮನಾಂಕ್ ಸಂತೊಸ್ ದಿತಾತ್ ತರ್ ತೆಂ ಆಡಾಂವ್ಕ್ ಶಿಕ್ಷಕ್ ಕೋಣ್? ತಾಚ್ಯಾ ಹಾತಾಂತ್ಲಿ ಚಾಟಿ ಉಪ್ರಾಂತ್ ಪೊಲಿಸಾಂನಿ ಘೆಂವ್ಚಿ ಪಡ್ತೆಲಿ, ಇತ್ಲೊಚ್ ಫರಕ್ !
ಶಿಕ್ಷಕಾಂಚೊ ದೀಸ್ ಆಚರಣ್ ಕರ್ತಾನಾ, ಮನ್ಶ್ಯಾ- ಮನ್ಶ್ಯಾ ಮಧೆಂ, ಮನ್ಶ್ಯಾಮೊಲಾಂಚೊ ಸಾಂಖೊವ್ ಭಾಂಧ್ಚ್ಯಾ ವಾವ್ರಾಂತ್, ಶಿಕ್ಷಕ್, ವ್ಹಡಿಲಾಂ ಆನಿ ಸರ್ಕಾರಾನ್ ಸಾಂಗಾತಾ ವಾವುರ್ಚಿ ಗರ್ಜ್ ಆಸಾ. ಯುವಸಕತ್ ವಿಭಾಡ್ನಾಶೆಂ ಚತ್ರಾಯೆಚೊ ದೊಳೊ ಹಾಣಿಂ ದವರುಂಕ್ ಜಾಯ್. ಬರೆಂ ಶಿಕ್ಷಣ್, ಬರೆಂ ಮಾರ್ಗದರ್ಶನ್, ಉಂಚ್ಲಿ ಮಾಹೆತ್, ಉಜ್ವಲ್ ಫುಡಾರ್ ಫಕತ್ ಶಿಕ್ಷಕಾನ್ ಎಕಾ ಹಾತಾನ್ ರಚುಂಕ್ ಅಸಾಧ್ಯ್. ಆಪಾಯಾಚಿ ಘಾಂಟ್ ವಾಜೊನ್ ಆಸಾ ತಿ ಹರ್ಯೆಕ್ಲ್ಯಾನ್ ಗುಮಾನಾಂತ್ ಘೆಂವ್ಚಿ ಗರ್ಜ್. ಮಾದಕ್ ದೃವ್ಯಾಂ ಸೇವನ್, ಲೆಕಾವರ್ತ್ ಮೊಬಾಯ್ಲ್ ಲಬ್ದೊಣಿ, ಮನ್ಶ್ಯಾಪಣಾಲಿ ವಿಸರ್ – ಆಜ್ ಯುವಸಕ್ತೆಥಂಯ್ ಚಡೊನ್ ಯೆಂವ್ಚೊ ಗಂಭೀರ್ ಸಮಸ್ಸೊ. ಹ್ಯಾ ದಿಶೆನ್ ಫಕತ್ ಶಿಕ್ಶಕಾಂನಿ ಮಾತ್ ನಯ್, ಸಗ್ಳ್ಯಾಂನಿ ಗುಮಾನ್ ದೀಜೆ ಜಾಲ್ಲಿ ಗರ್ಜ್ ಆಸಾ.
■ ಫೆಲ್ಸಿ ಲೋಬೊ ದೆರೆಬಯ್ಲ್
2 comments
Why teachers /parents have to hit the child? Doesn’t it create a fear in child mind? Why can’t we use the techniques and skills of gentle parenting or teaching? Are the teachers are missing those skills or are there no infrastructure to that? These are the questions grown ups to ask . We can’t push our frustrations on child
just because of our inabilities.
ಸತ್ತರ್ ವರ್ಸಾಂ ಉತರ್ಲೆಲ್ಯಾ ಹಾಂವೆ ಆತಾಂ ಪಾಟಿಂ ಘುಂವೊನ್ ಪಳೆತಾನಾ. ಮಾಧ್ಯಮಿಕ್ ಇಸ್ಕೊಲ್ ಉತರ್ತೆ ಪರ್ಯಾಂತ್ ಶಿಕ್ಷಕಾಂಕ್ ಹಾಂವ್ ಮ್ಹಜೆ ದುಸ್ಮಾನ್ ಮ್ಹಣೊಣ್‌ಚ್ ಧೃಡ್ ಪಾತ್ಯೆಲ್ಲೊಂ. ಮ್ಹಾಕಾ ಸವ್ಯಾ ವರ್ಸಾ ಪ್ರಾಯೆಚೆರ್ ಸಕ್ಲೆಶ್ಪುರ್ ಮಾದ್ರಿಂಚಾ ಕೊವೆಂತಾಕ್ ಭರ್ತಿ ಕೆಲೆಂ. ಸ್ವಚ್ಛಂದ್ ಜಾವ್ನ್ ಭಂವೊನ್ ಆಸುಲ್ಲ್ಯಾ ಮನ್ಜಾತಿಕ್ ಸಾದೊ ಕರಂವ್ಚಾ ಕೇಂದ್ರಾಕ್ ಹಾಡ್ನ್ ಸೊಡ್‌ಲ್ಲೆ ಬರಿಂ ಜಾಲ್ಲೆಂ! ಸಿಸ್ಟರಿನಿಂ ಕಾನ್ ವೊಳಾಂವ್ಚೆ, ಕುಟಿ ಘಾಲ್ಚ್ಯೊ, ಕುಲ್ಯಾಂಕ್ ಬಾವ್ಳ್ಯಾಂಕ್ ಚಿಮ್ಟೆ ಕಾಡ್ಚೆ, ಗಾಳಿಮರಚಾ ಆಡಾರಾನ್ ಮಾರ್ಚೆಂ ಸೊಸುಂಕ್ ಮ್ಹಜಾನ್ ಜಾಯ್ನಾತ್ಲೆಂ. ಮ್ಹಜಿ ಕ್ಲಾಸ್ ಟೀಚರ್ ಜಾವ್ನಾಸ್ಲಿ ಸಿಸ್ಟರ್ ಕೊಲ್ಯಾಸ್ಟಿಕಾ ರಾತಿಂ ಮೊರೊಂದಿ ಮ್ಹಣ್ ಹಾಂವ್ ಸಾದಾಂ ಸಾಂಜೆರ್ ಮಾಗ್ತಾಲೊಂ. ಪುಣ್ ಸಾಕಾಳಿಂ ಇಸ್ಕೊಲಾಕ್ ವೆತಾನಾ ತಿ ಜೀವ್ ಜೀವ್ ಪ್ರತ್ಯಕ್ಷ್ ಜಾತಾಲಿ! ಸಿಸ್ಟರ್ ಕೊಲ್ಯಾಸ್ಟಿಕಾ ಹಾಂವ್ ಸಕ್ಲೆಶ್ಪುರಾಂತ್ ಪಿ.ಯು.ಸಿ. ಕರ್ತಾನಾ ಅಜೂನ್ ಕೊವೆಂತಾಂತ್ ಆಸ್ಲಿ. ತಿ ಮ್ಹಾಕಾ ಆತಾಂ ಬೋವ್ ಸಾಧಿ ದಿಸ್ತಾಲಿ. ತೆದ್ನಾ ಹಾಂವ್ ರಾಕ್ಣೊ ,ಜೆಜು ರಾಯಾಚೆರ್ ಲ್ಹಾನ್ ಲ್ಹಾನ್ ಲೇಖನಾಂ ಬರಯ್ತಾಲೊಂ ಆನಿ ತಿ ಮ್ಜಜಿ ಅಭಿಮಾನಿ ಜಾಲ್ಲಿ!
ಶಿಕ್ಷಕಾಂಚೆರ್ ಮ್ಹಾಕಾ ಖರೊಚ್ ಅಭಿಮಾನ್ ಉದೆಲ್ಲೊ ಹೈಸ್ಕೂಲಾಂತ್. ಆತಾಂಯ್ ಥೊಡ್ಯಾ ಶಿಕ್ಷಕಾಂಚೆ ರುಪ್ಣೆ ದೊಳ್ಯಾಂ ಮುಕಾರ್ ಉದೆತಾ. ಹೈಸ್ಕೂಲಾಂತೀ ಮಾರ್ ಕಾಂಯ್ ಚುಕಾನಾತ್ಲೆ! ಮಾರ್ ಆಮ್ಚಾ curriculum ಚೊ ಏಕ್ ಭಾಗ್ ಜಾವ್ನಾಸ್ಲೊ! Spare the rod and spoil the student ತೆದ್ನಾಚೆಂ ಸಿದ್ಧಾಂತ್ ಜಾವ್ನಾಉಡವ್ನ್ .
ಲ್ಹಾನ್ ಆಸ್ತಾನಾ, ಚಡಾವತ್ ಬಾಪುಯ್ ಘರಾ ದಿಲ್ಲಿ ಶಿಕ್ಷಾ ಪಾವಾನಾಸ್ಲ್ಯಾಕ್, ಚೆರ್ಕ್ಯಾಕ್ ಹಳ್ಳೆಚಾ ಇಸ್ಕೊಲಾಕ್ ಬುರ್ಬುರ್ಯಾಂ ವೋಡ್ನ್ ಹಾಡ್ನ್ ಮಾಸ್ತೆರಾಚಾ ಪಾಂಯಾಮುಳಾಕ್ ಉಡವ್ನ್, “ನಮ್ಮಾತು ಕೇಳಾಕಿಲ್ಲ ಮೇಷ್ಡ್ರೇ ಇವ್ನು, ನಾಲ್ಕು ತದುಕಿ. ನಾವ್ಯಾರೂ ಕೇಳಾಕಿಲ್ಲ!” ಮ್ಹಣ್ತಾಲೆ ದೆದೆಸ್ಪರ್ ಜಾವ್ನ್!
ಆತಾಂ ಶಿಕ್ಷಕಾನಿಂ ಮಾರ್ಚೆಂ ಸೊಡ್ಯಾಂ, ಜೋರ್ ಕೆಲ್ಯಾರ್ ಖಂಯ್ ಜೀವ್‌ಘಾತ್ ಕರ್ನ್ ಘೆತಾತ್ ಕೋಣ್ ಜಣಾ ಮ್ಹಣ್ ಭಿಂಯೆತಾತ್. ಥೊಡ್ಯಾಂ ದೇಶಾನಿಂ, ಭುರ್ಗ್ಯಾಂಕ್ ಶಿಕ್ಷಾ ದಿಲ್ಯಾರ್ ವ್ಹಡಿಲಾಂಕ್‌ಚ್ ಜೈಲಾಕ್ ಧಾಡ್ಚೆಂ ಕಾನೂನ್ ಆಸಾ ಮ್ಹಣ್ ಆಯ್ಕಾಲಾಂ.