ದಶೆಂಬ್ರಾಚ್ಯಾ ಆಟ್ವೆರ್ ಶಾರ್ಜಾ ವಾಂಡರರ್ಸ್ ಕ್ಲಬ್ ಹಾಂಗಾಸರ್ ಮ್ಯಾಂಗಲೋರ್ ಕೊಂಕಣ್ಸ್ ದುಬೈ ಹಾಚ್ಯಾ ಫುಡಾರ್ಪಣಾರ್ ಚಲ್ಲ್ಲೆಂ ಫ್ಯಾಮಿಲ್ ಫಿಯೆಸ್ಟಾ 2024 ಕಾರ್ಯೆಂ ಜಮ್ಲೆಲ್ಯಾ ಹಜಾರೊಂ ಲೊಕಾಂಕ್ ಆಂವಡ್ಲೆಂ ಆನಿ ಮನೋರಂಜಿತ್ ಕರ್ಚ್ಯಾಂತ್ ಯಶಸ್ವಿ ಜಾಲೆಂ.
ಪಾಟ್ಲ್ಯಾ 35 ವರ್ಸಾಂಥಾವ್ನ್ ಯುಎಯಿಂತ್ ದುಬೈ ಆನಿ ಶೆಜಾರ್ಚ್ಯಾ ಶೆರಾನಿಂ ವಸ್ತಿ ಕರ್ಚ್ಯಾ ಕೊಂಕಣಿ ಲೊಕಾಚಿಂ ಕಾಳ್ಜಾ ಮನಾಂ ಜಿಕ್ಲೆಲೆಂ, ಆಪ್ಲ್ಯಾ ನಿಸ್ವಾರ್ಥ್ ಆನಿ ಸಮಾಜೆಚ್ಯಾ ಉದರ್ಗತೆಕ್ ಪೂರಕ್ ಜಾಂವ್ಚ್ಯಾ ತಸಲ್ಯಾ ಯೋಜನಾಂ ಮುಕಾಂತ್ರ್ ಗಲ್ಫ್ ರಾಶ್ಟ್ರಾನಿಂ ಮಾತ್ರ್ ನಂಯ್ ಆಸ್ತಾಂ, ಆಪ್ಲ್ಯಾ ಮಾಂಯ್ ಗಾಂವ್ಚ್ಯಾ ಸಭಾರ್ ಕುಟ್ಮಾಂಕ್, ಭಲಾಯ್ಕೆ ಕೇಂದ್ರಾಂಕ್, ದೇವ್ ತೆಂಪ್ಲಾಂಕ್, ಪಿಡೆಸ್ತಾಂಕ್, ವಿದ್ಯಾರ್ಥಿಂಕ್ ಕುಮ್ಕೆಚೊ ಖಾಂದ್ ಜಾಲ್ಲೆಂ ಮ್ಯಾಂಗಲೋರ್ ಕೊಂಕಣ್ಸ್ ದುಬೈ, ಫ್ಯಾಮಿಲಿ ಫಿಯೆಸ್ಟಾ 2024 ಮ್ಹಳ್ಳ್ಯಾ ವ್ಹಡ್ ಮನೋರಂಜನ್ ಕಾಯಾಕ್ ಯಶಸ್ವೆನ್ ಪ್ರಸ್ತುತ್ ಕರ್ಚ್ಯಾ ಮುಕಾಂತ್ರ್ ಸಭಿಕಾಂಚ್ಯಾ ಹೊಗ್ಳಿಕೆಕ್ ಪಾತ್ರ್ ಜಾಲೆಂ.
ಶ್ಯಾಥಿವಂತ್ ಆನಿ ಕೊಂಕ್ಣೆಚೊ ವ್ಹಡ್ ಸಮರ್ಥಕ್ ಮ್ಹಣ್ ನಾಂವಾಡ್ಲೆಲೊ, ಉದ್ಯಮ್ ಮಾತ್ರ್ ನಂಯ್ ಸಮಾಜ್ ಸೆವೆಂತ್ ಸಯ್ತ್ ನಾಂವ್ ಜೊಡ್ಲ್ಲೊ, ಮ್ಯಾಂಗಲೋರ್ ಕೊಂಕಣ್ಸ್ ದುಬೈ ಹಾಚೊ ಅಧ್ಯಕ್ಷ್ ಜೇಮ್ಸ್ ಮೆಂಡೋನ್ಸಾ ಹಾಚ್ಯಾ ಮುಕೆಲ್ಪಣಾರ್, ಸ್ಟೇಫನ್ ವಾಮಂಜೂರ್ ಹಾಚ್ಯಾ ಮುಖೆಲ್ ಸಂಯೋಜನಾರ್, ಸರ್ವ್ ಸಾಂದ್ಯಾಂಚ್ಯಾ ಖಳ್ಮಿತ್ ನಾತ್ಲೆಲ್ಯಾ ವಾವ್ರಾನ್ ಹ್ಯಾ ಕಾರ್ಯಕ್ ಯಶಸ್ವಿ ಕೆಲೆಂ ತರ್, ಗೋವಾಚೊ ಗಾವ್ಪಿ ಮಾರ್ಕ್ ರೆವ್ಲೋನ್, ಕೊಡ್ಯಾಳ್ಚಿ ಬಾಯ್ ಅಲಿನಾ ಪಿರೇರಾ, ಮೆಲ್ವಿನ್ ಡಿಸೋಜ, ಬ್ಯಾಂಡ್ಸ್ಕೇಪ್ ಸಂಗೀತ್ ಪಂಗಡ್, ಡಿಜೆ ಕಿರಣ್ ಹಾಚ್ಯಾ ಸಂಗೀತಾಚ್ಯಾ ನಾದಾನ್ ಜಮ್ಲೆಲ್ಯಾ ಸಭೆಕ್ ನಾಚಾಕ್ ಮೆಟಾಂ ಕಾಡುಂಕ್ ಸಕ್ಲಿಂ.
ಹಾಚೆ ಬರಾಬರ್ ಕ್ರಿಸ್ಮಸ್ ಕ್ಯಾರೊಲ್ಸ್, ಭುರ್ಗ್ಯಾಂಕ್ ಮಿನಿ ಸಾಂತಾಕ್ಲೊಸ್, ದಾದ್ಲ್ಯಾಂಕ್ ಆನಿ ಸ್ತ್ರೀಯಾಂಕ್ ದೊರಿ ವೊಡ್ಚೊ ಸ್ಪರ್ಧೊ, ಜೈವ್ ಡ್ಯಾನ್ಸ್, ಹೌಸಿ ಹೌಸಿ ತಸಲೆ ಸ್ಪರ್ದೆ, ತೋಂಡ್ ಪಿಂತ್ರಾವ್ಣಿ, ಭುರ್ಗ್ಯಾಂಕ್ ವಿವಿಧ್ ಖೆಳ್, ಗಾಂವ್ಚ್ಯಾ ಆನಿ ವಿವಿಧ್ ದೇಶಾಚಿಂ ಖಾಣಾಂ ಪಕ್ವಣಾಂ, ಲಕ್ಕಿ ಗೇಮ್ಸ್ ಆಶೆಂ ಲ್ಹಾನಾಥಾವ್ನ್ ವ್ಹಡಾಂಪರ್ಯಾಂತ್ ಭರ್ಪೂರ್ ಮನೋರಂಜನಾಚೆಂ ಫೆಸ್ತ್ಚ್ ಚಲ್ಲೆಂ.
ಲೋಯ್ಡ್ ಡಿಸೋಜ ಹಾಣೆಂ ಸಗ್ಳ್ಯಾ ಕಾರ್ಯಾಚೆಂ ಸುಂಕಾಣ್ ಹಾತಿಂ ಧರ್ಲ್ಲೆಂ. ಅಧ್ಯಕ್ಷ್ ಜೇಮ್ಸ್ ಮೆಂಡೋನ್ಸಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ಮುಖೆಲ್ ಸಂಯೋಜಕ್ ಸ್ಟೇಫನ್ ಮಿನೇಜಸ್ ವಾಮಂಜೂರ್ ಹಾಣೆಂ ಮ್ಯಾಂಗಲೋರ್ ಕೊಂಕಣ್ಸ್ ದುಬೈ ಹಾಚ್ಯಾ ಸಾಂದ್ಯಾಂ ಸಾಂಗಾತಾ ಸಗ್ಳ್ಯಾ ಕಾರ್ಯಾಚಿ ಜವಾಬ್ದಾರಿ ಸುಧಾರ್ಸಿಲಿ.
