ಮನ್ಶಾಕ್ ಸಹಜ್ ಜಾವ್ನ್ ವಾಂಟೆ ಘಾಲ್ಚಿ ಸವಯ್. ವಾಂಟೆಘಾಲಪ್ ವಿವಿಧ್ ಕಾರಣಾಂಕ್ ಲಾಗುನ್ ಜಾತಾ. ಖಂಚ್ಯಾಯ್ ವಸ್ತುಚ್ಯಾ ಮೊಲಾಚೆರ್, ಮಹತ್ವಾಚೆರ್, ಗರ‍್ಜೆಚೆರ್, ಸೊಭಾಯೆಚೆರ್ ಆನಿ ಲಭ್ಯತಾಚೆರ್ ಹೊಂದ್ದುನ್ ವಾಂಟೆ ಘಾಲ್ತಾತ್. ಹ್ಯಾಚ್ ಬರೆಂ ವಾಯ್ಟ್ ವಾಂಟೆಘಾಲ್ಪಾಚ್ಯಾ ಸಂಯ್ಭಾನಿಮ್ತಿಂ ಮನಿಸ್ ಕಾಂತ್ಳಿ ಮಹತ್ವಾಚಿ ಮ್ಹಣ್ತಾ ಕಟ್ಟೆಕ್ ದೆಗೆನ್ ಉಡಯ್ತಾ. ಲೊಂಕ್ಡಾಪ್ರಾಸ್ ಬಾಂಗಾರಾಕ್ ಚಡ್ ಮೊಲ್ ದಿತಾ, ಮಾಸ್ ಹಾಡುಂಕ್ ಗೆಲ್ಯಾರ್ ಜಾಂಗ್ಳಾಚೆಂ ಮಾಸ್ ಬರೆಂ ಮ್ಹಣ್ತಾ ಆನಿ ತೆಂಚ್ ದೀಂವ್ಕ್ ಕಸ್ಸಾಪ್ಪ್ಯಾಚೆರ್ ದಾಬಾವ್ ಘಾಲ್ತಾ. ವೊಬಿ ಕುಡ್ಕ್ಯಾಂಕ್ ಉಣೆಂ ಮಹತ್ವ್ ಆನಿ ಹಾಡಾಂ ಕೊಣಾಕ್‌ಚ್ ನಾಕಾತ್.
ಕಾಂಯ್ ಆದ್ಲ್ಯಾ 1000 ವರ‍್ಸಾಂಥಾವ್ನ್ ಆಮಿ ಆಮ್ಕಾಂಚ್ ಸಕ್ಕಡ್ ಲೊಕಾಂ ಪ್ರಾಸ್ ವ್ಹರ‍್ತೆ ಮ್ಹಣ್ ಸಾಂಗುನ್ ಭೊಂವ್ತಾಂವ್. ರೊಮಾಂತ್ ಆಪ್ಲೆಂ ತಳ್ ಘಟ್ ಕೆಲ್ಯಾ ಉಪ್ರಾಂತ್ ಯುರೋಪಾಂತ್ ಕ್ರಿಸ್ತಾಂವ್ಪಣ್ ಸರ‍್ಕಾರಿ ಧರ‍್ಮ್ ಜಾವ್ನ್ ವಾಡ್‌ಲ್ಲ್ಯಾನ್ ಆನಿ ಯುರೋಪಿ ದೆಶಾಂನಿ ಆಪ್ಣಯ್ಲಲ್ಯಾ ತಾಂತ್ರಿಕ್ ಆನಿ ಝುಜಾ ತಂತ್ರ್‌ಗಿನ್ಯಾನಾಚ್ಯಾ ಬಳಾನ್ ಸಂಸಾರಾಚ್ಯಾ ಚಡಾವತ್ ಸ್ಥಳೀಕ್ ಸಂಸ್ಕೃತಿ ಕೇಂದ್ರಿತ್ ದೆಶಾಂಕ್ ಪಾಡಾವ್ ಕರ‍್ನ್ ಆಪ್ಲೆಂ ಸಾಮ್ರಾಜ್ಯ್‌ಶಾಹಿತ್ವ್ ಆನಿ ಹುಕುಮ್‌ಶಾಹಿ ಜುಲುಮ್ ಸ್ಥಾಪನ್ ಕೆಲ್ಲ್ಯಾನ್ ಕ್ರಿಸ್ತಾಂವ್ ಧರ‍್ಮ್ ಸಂಸಾರಾಚ್ಯಾ ಕೊನ್ಶ್ಯಾಕೊನ್ಶ್ಯಾಂಕ್ ಪಾವ್ಲೊ. ಅಧಿಕಾರಾಚ್ಯಾ ಆನಿ ನಿಯಂತ್ರಣಾಚ್ಯಾ ಬಳಾನ್ ಭರ್‌ಲ್ಲಿ ಖಂಚಿಯ್ ವೆವಸ್ತಾ ನಿರಂತರ್ ಉರಾಜೆ ತರ್ ತಾಣೆಂ ವಾಂಟೆಫಾಂಟೆ ಕರ‍್ಚೆಂ ಅನಿವಾರ‍್ಯ್. ಸಕ್ಕಡ್ ಸಮಾಸಮಿ ಜಾಲ್ಯಾರ್ ನಿಯಂತ್ರಣ್ ಕರ‍್ಚೆಂ ಕೊಣೆಂ? ನಿಯಂತ್ರಣ್ ಕರ‍್ಚೆಂ ಕೊಣಾಕ್ ಆನಿ ಕಿತ್ಯಾಕ್?
ದೆಕುನ್ಂಚ್ ನಿಯಂತ್ರಣಾತ್ಮಕ್ ಆನಿ ಶೋಷಣ್ ವೆವಸ್ತಾ ಆಸ್ಚ್ಯಾ ಖಂಚಾಯ್ಕೀ ಏಕ್ ನಿಯಂತ್ರಕ್ ಗರ‍್ಜೆಚೊ ಆನಿ ನಿಯಂತ್ರಣಾಕ್ ಹಾತೆರ್ ಜಾವ್ನ್ ಬರವ್ನ್ ದವರ‍್ಲಲೆಂ ಶಾಸನ್ ಗರ‍್ಜೆಚೆಂ. ಕ್ರಿಸ್ತಾಂವಾಂಪಯ್ಕಿ ಕಥೊಲಿಕ್‌ಚ್ ಎಕ್ದಮ್ ವೆವಸ್ತಿತ್. ಆನಿ ಕಥೊಲಿಕ್ ವೆವಸ್ತ್ಯಾಂತ್ ಏಕ್ ಮಹಾನ್ ನಿಯಂತ್ರಕ್ ಆಸಾ ಆನಿ ಥಂಯ್ ಹಾಂಗಾ ತ್ಯಾ ನಿಯಂತ್ರಕಾನ್ ಸಾಂಗ್‌ಲ್ಲೆಂ ಸಬ್ದ್ ಚುಕಾನಾಶೆಂ ಪಾಳ್ತೆಲೆ ಸಹನಿಯಂತ್ರಕ್ ಆಸಾತ್. ಮಹಾನ್ ನಿಯಂತ್ರಕಾಕ್ ಭೋವ್ ಭಾಗೆವಂತ್ ಬಾಪ್ (ಹೋಲಿ ಫಾದರ್) ತಾಚೆ ಉಪ್ರಾಂತ್ ಕಾಡ್ದಿಯಲಾಂಕ್ ಹಿಜ್ ಎಮಿನೆನ್ಸ್, ಆರ‍್ಚ್ ಬಿಸ್ಪಾಂಕ್ (ಮೆಟ್ರೊಪೋಲಿಟನ್ ಬಿಸ್ಪಾಂಕ್) ಹಿಜ್ ಗ್ರೇಸ್, ಬಿಸ್ಪಾಂಕ್ ಹಿಜ್ ಎಕ್ಸೆಲೆನ್ಸಿ ಅಶೆಂ ವಿವಿಧ್ ಘನ್‌ಮಾನಾಚೆ ಉಲ್ಲೇಕ್ ಕರ‍್ನ್ಂಚ್ ಆಪಯ್ಜೆ ಪಡ್ತಾ.
ತೆಂಚ್ ಲಾದ್ರುಕ್, ಬಾಲ್ತುಕ್ ಭೋವ್ ಮಾನೇಸ್ತ್ ಮ್ಹಣ್ತಾನಾಂ ಸಕ್ಡಾಂಕ್ ವಿರಾರ್ ಜಾತಾ, ಹಾಸೊ ಯೆತಾತ್, ಜಾಳ್ ಭರ್‌ಲ್ಲೆ ವೊಂಕಾರೆಯ್ ಯೆತಾತ್. ತಾಂಚೆಂ ಎಕ್ಸೆಲೆನ್ಸಿ, ಗ್ರೇಸ್ ಸಕ್ಕಡ್ ಚಲ್ಚೆಂ ಲಾದ್ರು-ಬಾಲ್ತುನ್ ಆಪ್ಲ್ಯಾ ಘಾಮಾಂತ್ಲ್ಯಾನ್ ಘಾಲ್ಲ್ಯಾ ವಾಂಟ್ಯಾಂತ್ಲ್ಯಾನ್ ತರೀ ಲಾದ್ರು – ಪೆದ್ರುಕ್ ಎಕ್ಸೆಲೆನ್ಸಿಯ್ ನಾಂ ಮಾತ್ತಿಯ್ ನಾಂ. ಅಧಿಕ್ ಮಾನಾಧಿಕ್, ಭೋವ್ ಮಾನಾಧಿಕ್, ಎಕ್ಸೆಲೆನ್ಸಿ, ಎಮಿನೆನ್ಸ್ ಮಾತ್ರ್ ಪವಿತ್ರ್ ಮ್ಹಣ್ ಆಮ್ಚ್ಯಾ ಮೆಂದ್ವಾಂತ್ ತಾಣಿಂ ಭರ‍್ಲಾಂ.
ಭೋವ್ ಮಾನೆಸ್ತಿಣ್ ಸೆಲ್ಲಿ ಬಾಯ್, ಅಧಿಕ್ ಮಾನೆಸ್ತ್ ಶಿಲಾಮ್ ಮ್ಹಣ್ ತಳ್ ಮಟ್ಟಾರ್ ಆಸ್‌ಲ್ಲ್ಯಾಂಕ್ ಮಾನಾನ್ ಲೆಕುನ್ ತಾಂಕಾಂಯ್ ಪವಿತ್ರ್ ಮ್ಹಣ್ ಸ್ವೀಕಾರ್ ಕೆಲ್ಲ್ಯಾ ದಿಸಾ ಜೆಜುಕ್ರಿಸ್ತಾಚಿಂ ಉತ್ರಾಂ ಕಾರ‍್ಯಾರುಪಾಕ್ ಯೆತಾತ್. ಮಾರ‍್ಕುನ್ ಬರಯಿಲ್ಲ್ಯಾ ಜೆಜುಚ್ಯಾ ಜಿಣ್ಯೆಕಾಣ್ಯೆಂತ್ ದುಸ್ರ್ಯಾ ಅಧ್ಯಾಯಾಂತ್ ಜೆಜು ಸುಂಕಾಗಾರಾಂಸವೆಂ ಜೆಂವ್ಚೆಂ ಖಾಂವ್ಚೆ ವಾಚುಂಕ್ ಮೆಳ್ತಾ – ಥಂಯ್ಸರ್ ಜೆಜು ಆಪುಣ್ ಕೊಣಾಖಾತಿರ್ ಆಯ್ಲಾಂ ಮ್ಹಣ್ಚೆವಿಶಿಂ ಸಾಂಗ್ತಾ – ಹಾಂವ್ ಆಯ್ಲಾಂ ಪಾತ್ಕ್ಯಾಂಕ್ ಆಪೊಂವ್ಕ್ ಭಾಗೆವಂತಾಂಕ್ ನ್ಹಂಯ್ ಮ್ಹಣ್ ತೊ ಸ್ಪಷ್ಟ್ ಕರ‍್ತಾ. ಪೂಣ್ ತಾಚ್ಯಾ ನಾಂವಾಂನ್ ಚಲ್ಚ್ಯಾ ವೆವಸ್ತ್ಯಾಂತ್ ಭಾಗೆವಂತ್, ಭೋವ್ ಭಾಗೆವಂತ್ ಲೆಕಾವ್ಹರ‍್ತೆ ಜಾಲ್ಯಾತ್.
ಜೆಜು ಸುಂಕಾಗಾರಾಂಸವೆಂ ಜೆವ್ತಾ
ಹೆಂ ಮಾಸ್ ಆನಿ ಹಾಡಾಂ ವಿಂಗಡ್ ಕರ‍್ನ್ ರಾಸ್ ಘಾಲ್ಚೆಂ ವಯ್ರ್‌ ಥಾವ್ನ್ ಸುರ‍್ವಾತ್ತಾ ಮ್ಹಣ್ ಜಾಲೆಂ. ತೊ ಪುಸ್ತಕ್ ಪವಿತ್ರ್ ಹೊ ಪುಸ್ತಕ್ ಪವಿತ್ರ್ ನ್ಹಂಯ್ ಆನಿ ಥೊಡೆ ಪುಸ್ತಕ್ ಅಪವಿತ್ರ್ – ಅಪವಿತ್ರ್ ಪುಸ್ತಕಾಂಚ್ಯಾ ರಾಶಿಂಕ್ ಆಪ್ಣಾಕ್ ಆಪುಣ್ಂಚ್ ಪವಿತ್ರ್ ಮ್ಹಣ್ ಆಪವ್ನ್ ಘೆಂವ್ಚ್ಯಾ ಸಭೆನ್ ’ಇಂಡೆಕ್ಸ್’ ಮ್ಹಣ್ಚಿ ಪಟ್ಟಿ ಕರ‍್ನ್ ಕೊಣೆಂಚ್ ವಾಚಿನಾಂಯೆ ಮ್ಹಣ್ ಡಿಕ್ರಿ ಕೆಲ್ಯಾ (ಗಮ್ಮತ್ ಮ್ಹಣ್ಲ್ಯಾರ್ ತ್ಯಾ ಸಭೆಚ್ಯಾ ಮ್ಹಣಿಯಾರ‍್ಯಾಂ ಪಯ್ಕಿ ಚಡಾವತ್ ತೆಚ್ ಪುಸ್ತಕ್ ಪಯ್ಲೆಂ ವಾಚ್ತಾತ್ – ಪವಿತ್ರ್ ನ್ಹಂಯ್ ಜಾಲ್ಲ್ಯಾ ಸಾದ್ಯಾಂಕ್ ತಾಚಿ ಭಾತ್ಮಿಂಚ್ ನಾಂ) ಪಳಯಾ ಸಾಕ್ರೆಮಂತ್ 7 ತ್ಯಾ ಪಯ್ಕಿ ಖಂಚ್ಯಾಕ್ ಎಕ್ದಮ್ ದಬಾಜೊ ಆನಿ ಗಮ್ಮತ್. ಮಾತ್ರೆಮೊನಿ ಸಾಕ್ರಾಮೆಂತಾನಿಮ್ತಿಂ ಸಂಸಾರ್ ನವೊ ನವೊ ಜಾತಾ ತರೀ ಪಾದ್ರಿ ಓಡ್ದಿಕ್ ಪವಿತ್ರ್ ಮ್ಹಣ್ ಕಾಡ್ತಾತ್.
ಎವ್ಕರಿಸ್ತ್ ಪವಿತ್ರ್, ಗಾದ್ಯಾಂತ್ ಕೊಸ್ಚೆಂ ಕಾಮ್ ಪವಿತ್ರ್ ಮ್ಹಣ್ ಖರ‍್ಯಾನ್ ಕೋಣ್ ಲೆಕ್ತಾ? ಇಗರ‍್ಜೆಂತ್ ಆಗ್ಮೆಂತ್ ಶೆಣಾಂವ್ಚೆಂ ಪವಿತ್ರ್ ಮೆರ‍್ಸಿನಾನ್ ಹಿತ್ಲಾಂತ್ ಮಾಡಾಂಕ್ ಉದಕ್ ಸೊಡ್ಚೆಂ ಪವಿತ್ರ್ ಮ್ಹಣ್ ಕೋಣ್ ಲೆಕ್ತಾ? ಶೆರ‍್ಮಾಂವ್ ಪವಿತ್ರ್ – ಬಾಪಯ್ನ್ ಪುತಾಲಾಗಿಂ ಉಲಂವ್ಚೆಂ? ಆಮ್ಕಾಂ ಶಿತ್ ದಿಂವ್ಚ್ಯಾ, ಆಮ್ಚ್ಯಾ ಮ್ಹಾಲ್ಘಡ್ಯಾಂನಿ ಆಪ್ಲೊ ಜೀವ್ ಝರಯಿಲ್ಲ್ಯಾ ’ಗಾದ್ಯಾಂತ್ ಉಡ್ಕಾಣಾಂ’ ಘಾಲುಂಯೆತಾತ್ ಕೆನ್ನಾಂಪುಣಿಂ ’ಆಲ್ತಾರಿರ್ ಉಡ್ಕಾಣಾಂ’ ಘಾಲ್ಚೆಂ ಚಿಂತಪ್ ಉದೆತ್‌ಗೀ?
ಧರ‍್ಮ್ ಅಪೀಮ್ ಮ್ಹಣ್ ಕಾರ‍್ಲ್ ಮಾರ‍್ಕ್ಸಾನ್ ಸಾಂಗ್‌ಲ್ಲೆಂ ಕಿತ್ಲೆಂ ಸತ್ ಪಳಯಾ. ಖರ‍್ಯಾನ್ ಜೆಂ ಕಿತೆಂ ಸಕ್ಕಡ್ ತೆ ಪವಿತ್ರ್ ಮ್ಹಣ್ತಾತ್ ತೆಂ ಕಾಂಯ್ ವ್ಹಡ್ ಗರ‍್ಜೆಚೆಂಚ್ ನ್ಹಂಯ್. ದಾಕ್ಲ್ಯಾಕ್ ದೋನ್ ಹಫ್ತೆ ಮಿಸಾಕ್ ವಚಾನಾಂ ತರ್ ಸಂಸಾರ್ ವೊಮ್ತೊ ಉದಾರೊ ಜಾಯ್ನಾಂ; ದೋನ್ ಹಫ್ತೆ ಘರಾ ರಾಂದಿನಾಶೆಂ ರಾವಾ, ದೋನ್ ಹಫ್ತೆ ನ್ಹಾಯ್ನಾಶೆಂ ರಾವಾ, ದೋನ್ ಹಫ್ತೆ ಘರ‍್ಚೊ ಕೋಯ್ರ್ ಝಾಡಿನಾಶೆಂ ರಾವಾ, ದೋನ್ ಹಫ್ತೆ ಲಾಯಿಲ್ಲ್ಯಾ ರಾಂಧ್ವಯೆಕ್ ಉದಕ್ ಶಿಂಪ್ಡಾಯ್ನಾಶೆಂ ರಾವಾ ತವಳ್ ಕಳ್ತಾ ಖಂಚೆಂ ಬರೆಂ ಖಂಚೆಂ ವಾಯ್ಟ್ ಮ್ಹಣ್. ಖರ‍್ಯಾನ್ ಶೆರ‍್ಮಾಂವಾಕ್ ಭುರ‍್ಗಿಂ ಜನ್ಮಾನಾಂತ್ ಘೊವಾ ಬಾಯ್ಲೆನ್ ಸಾಂಗಾತ್ ನಿದ್ಲ್ಯಾರ್ ಮಾತ್ರ್ ಭುರ‍್ಗಿಂ ಜಾತಾತ್ ಆನಿ ತ್ಯಾ ಭುರ‍್ಗ್ಯಾಂ ಪಯ್ಕಿ ಎಕ್ಲೊ ದಾಕ್ತೆರ್ ಜಾತಾ, ಎಕ್ಲೊ ಇಜ್ನೆರ್ ಜಾತಾ ಆನಿ ಎಕ್ಲೊ ಪಾದ್ರಿಯ್ ಜಾತಾ.
ಆಮಿ ರಾಜಕೀಯ್ ವೆಕ್ತಿಂಕ್ ದುರ‍್ಸಾತಾಂವ್, ತೆ ಭೃಷ್ಟ್, ತಾಂಕಾಂ ಆಮಿ ಟ್ಯಾಕ್ಸ್ ಬಾಂದುನ್ ಪೊಸ್ತಾಂವ್ ತರೀ ತೆ ಆಮ್ಕಾಂ ಲುಟ್ತಾತ್, ಫಟಯ್ತಾತ್ ಮ್ಹಣ್ತಾಂವ್. ಥಂಯ್ಸರ್ ತಾಂಚಿ ನಿಂದಾ ಆನಿ ಟಿಕಾ ಕರುಂಕ್ ಆಮ್ಕಾಂ ಸಲೀಸ್ ಜಾತಾ. ಕಿತ್ಯಾಕ್ ತಿ ವೆವಸ್ತಾ ಪವಿತ್ರ್ ನ್ಹಂಯ್ ವಾ ಅಪವಿತ್ರ್ ಮ್ಹಣ್ ಆಮ್ಚ್ಯಾ ಮೆಂದ್ವಾಂತ್ ಭರ‍್ಲಾಂ. ಧಾರ‍್ಮಿಕ್ ವೆವಸ್ತಾ ಪವಿತ್ರ್, ದೆವಾನ್ಂಚ್ ರಚ್‌ಲ್ಲಿ ಮ್ಹಣ್ ಮೆಂದ್ವಾಂತ್ ಚೆಪ್ಲಾಂ. ’ಪವಿತ್ರ್’ ಸಭೆಂತ್ ಆಸ್ಚೆಂ ಭೃಷ್ಟಾಚಾರ್ ಎಕೇಕ್‌ಚ್ ಬಾರ‍್ಕಾಯೆನ್ ಲೇಕ್ ಕೆಲ್ಯಾರ್ ಕೊಣಾಕ್‌ಪುಣಿಂ ಲಾಗ್ಶಿಲ್ಯಾನ್ ರಾವುಂಕ್ ಜಾಯ್ತ್‌ಗೀ?
ಕ್ರಿಸ್ತಾನ್ ಕಾಂಟ್ಯಾಂಚೊ ಮುಕುಟ್ ದವರ್‌ಲ್ಲೊ, ಚಕ್ರವರ‍್ತಿಚೊ ಮುಕುಟ್ ಜಾಂವ್ ರೊಮಿ ಪೆಗನ್ ಪುರ‍್ವಿತಾಂಚಿ ನ್ಹೆಸಣ್ ತಾಚಿ ನ್ಹಂಯ್ – ರೊಮಾಚ್ಯಾ ಪೆಗನ್ ಮಹಾಪುರ‍್ವಿತಾಕ್ ’ಪೊಂತಿಫಿಕುಸ್ ಮ್ಯಾಕ್ಸಿಮುಸ್’ ಮ್ಹಣ್ತಾಲೆ (ಪಾಪ್ ಸಾಯ್ಬಾಕೀ ತ್ಯಾಚ್ ನಾಂವಾನ್ ವಳ್ಕಾತಾತ್) ಸಾರ‍್ಕೆಂ ವಿಮರ‍್ಸೊ ಕೆಲ್ಯಾರ್ ಆನಿ ಇತಿಹಾಸ್ ತಶೆಂಚ್ ಪ್ರಸ್ತುತ್ ಪರಿಗತ್ ಸಮ್ಜಾಲ್ಯಾರ್ ಖಂಚೆಂ ಪವಿತ್ರ್ ಖಂಚೆಂ ಅಪವಿತ್ರ್ ಮ್ಹಣ್ ತುಮಿಂಚ್ ನಿರ‍್ಧಾರ್ ಕರ‍್ತಾತ್.
ಮ್ಹಾಕಾ ಜಾಣ್ವಾಯ್ ಆಯ್ಲ್ಯಾ ಉಪ್ರಾಂತ್ ಖುನ್, ಅತ್ತ್ಯಾಚಾರ್, ನಿಷ್ಕುಚಾರಿ ಅಸಲ್ಯಾ ಕಾರಣಾಂಕ್ ಲಾಗುನ್ ಇಂಡಿಯಾಂತ್ಲ್ಯಾ ತೆಗಾಂ ಬಿಸ್ಪಾಂಕ್ ಕಾಡ್ನ್ ಉಡಯಿಲ್ಲೆಂ ಆಯ್ಕಾಲಾಂ. ವಾತಿಕಾನ್ ಲಾಂಬ್ ಕಾಳ್ ಸೊಸ್ತಾ, ದೊರಿ ಲಾಂಬ್ ಸೊಡ್ತಾ, ದುಸ್ರಿ ವಾಟ್ ನಾಂ ತರ್ ಮಾತ್ರ್, ಅಸಲೆಂ ಗಂಭೀರ್ ಮೆಟ್ ಕಾಡ್ತಾ. ಯುರೋಪಾಚ್ಯಾ ಆನಿ ಹೆರ್ ಥೊಡ್ಯಾ ಗಾಂವ್ಚ್ಯಾ ಬಿಸ್ಪಾಂಪಯ್ಕಿ ಕಿತ್ಲ್ಯಾ ಜಣಾಂಕ್ ತ್ಯಾ ಪಾಟಾರ್ ಬಸುಂಕ್ (ಖರ‍್ಯಾನ್ ತೊ ಅಪೊಸ್ತಲಾಂಚ್ಯಾ ಪಾಟ್ಲಾಮೆಚೊ ಪಾಟ್ ವ್ಹಯ್ ತರ್!) ಅರ‍್ಹತಾ ಆಸಾ ಮ್ಹಣ್ ತಾಣಿಂಚ್ ಸಾಂಗಿಜೆ.
ಎಕಾ ಅಧ್ಯಯನಾ ಪರ‍್ಮಾಣೆಂ ಎಕಾ ನಿರ‍್ಧಿಷ್ಟ್ ವಾಯ್ಟ್‌ಪಣಾಕ್ ಲಾಗುನ್ ಅಮೇರಿಕಾಚ್ಯಾ ಬಿಸ್ಪಾಂಕ್ ಕೋರ‍್ಟ್ ಶಿಕ್ಷಾ ದೀಂವ್ಕ್ ಲಾಗಾತ್ ತರ್ ಪರಿಹಾರ್ ಆನಿ ದಂಡ್ ಮ್ಹಣ್ ದೀಂವ್ಕ್ ದಿಯೆಸೆಜಿಚ್ ವಿಕಿಜೆ ಪಡ್ತಲ್ಯೊ ಖಂಯ್. ವಾತಿಕಾನಾನ್ ಭಾರತಾಚೊ ಅಪೊಸ್ತಲಿಕ್ ನುನ್ಸಿಯೋ ಜಾವ್ನಾಸ್‌ಲ್ಲ್ಯಾ ಗಿಯಂಬತಿಸ್ತಾ ದಿ’ಕ್ವಾತ್ರೊಕ್ (ಆಮ್ಚ್ಯಾ ಭಾಶೆಂತ್ ತರ್ ಜುವಾಂವ್ ಬಾವ್ತಿಸ್ತ್ ಕೋದ್ರ್) ಹುದ್ದ್ಯಾರ್‌ಥಾವ್ನ್ ಕಾಡ್‌ಲ್ಲ್ಯಾ ವೆಳಾರ್ ಇಂಡಿಯನ್ ಕ್ಯಾಥೊಲಿಕ್ ಫೋರಮಾಚ್ಯಾ ಅಧ್ಯಕ್ಷಾನ್ ಭೋವ್ ಮಾನೆಸ್ತ್ ಛೋಟೆಬಾಯಿನ್ ’ಹೆಂ ಭಾರತಾಚ್ಯಾ ಸರ‍್ವ್ ಕಥೊಲಿಕಾಂಕ್ ನಯ್ತಿಕ್ ಜಯ್ತ್’ ಮ್ಹಣ್ ಸಾಂಗ್‌ಲ್ಲೆಂ.
ತಾಂಚ್ಯಾ ಹಾತಾಂತ್ ಶೆರ‍್ಮಾಂವ್ ಮ್ಹಣ್ಚೆಂ ವ್ಹಡ್ ಹಾತೆರ್ ಆಸಾ. ತ್ಯಾ ನಿಮ್ತಿಂ ಸಮಾಜೆಂತ್ ತಾಂಕಾಂ ಜಾಯ್‌ ತಿ ಮಾನಸಿಕ್ ಪರಿಗತ್ ತೆ ರುಪಿತ್ ಕರ‍್ನ್ಂಚ್ ಆಸಾತ್. ಆಮಿ ನಿತಳ್ ನಿರ‍್ಮಳ್ ಪರ‍್ಜಳಿಕ್ ಮ್ಹಣುನ್ಂಚ್ ಸಾಂಗುನ್ ಭೊಂವ್ತಾತ್. ಸಾದ್ಯಾಂಕ್ ಸಕ್ಡಾಂಕ್ ಚಿಲ್ಲರ‍್ಯಾಂತ್ ಕಾಡ್ತಾತ್, ಆಮಿ ಹಾಗ್‌ಲ್ಲೊ ಗೂ ಆನಿ ತಾಣಿಂ ಘೊಳೊಂವ್ಚಿಂ ಮೊತಿಯಾಂ. ಉಸ್ತುನ್ ಪಳಂವ್ಕ್ ವಿಶ್ಲೇಷಣ್ ಕರುಂಕ್ ಧರ‍್ಲ್ಯಾರ್ ಸತ್ ಅಪಾ’ಪಿಂಚ್ ಭಾಯ್ರ್ ಯೆತಾ.
The Cadaver Synod (also called the Cadaver Trial; Latin: Synodus Horrenda) is the name commonly given to the ecclesiastical trial of Pope Formosus, who had been dead for about seven months, in the Basilica of St. John Lateran in Rome during January 897. The trial was conducted by Pope Stephen VI, the successor to Formosus’ successor, Pope Boniface VI. Stephen had Formosus’ corpse exhumed and brought to the papal court for judgment. He accused Formosus of perjury, of having acceded to the papacy illegally, and illegally presiding over more than one diocese at the same time. At the end of the trial, Formosus was pronounced guilty and his papacy retroactively declared null. Wiki Link : https://en.wikipedia.org/wiki/Cadaver_Synod
ವಾತಿಕಾನಾಂತ್ಲ್ಯಾ ’ಪೊಂತಿಫಿಕುಸ್ ಮ್ಯಾಕ್ಸಿಮುಸ್’ ಮ್ಹಣ್ಜೆ ಪಾಪಾನ್ – ಸ್ತೆಫಾನ್ ಸವ್ಯಾನ್ (896-897) ಪ್ಣಾ ಆದ್ಲ್ಯಾ ಪಾಪಾಚ್ಯಾ ಮೊಡ್ಯಾಕ್ ಫೊಂಡಾಂತ್ಲೊ ಭಾಯ್ರ್ ಕಾಡ್ನ್ ತುಂ ಪಾಪಾ ನ್ಹಂಯ್ ಮ್ಹಣ್ ತಾಚ್ಯಾ ಮೊಡ್ಯಾಕ್ ಪಿಡ್ಡ್ಯಾರ್ ಕರ‍್ನ್ ತಾಚಿ ಮುದಿ ವೋಡ್ನ್ ಕಾಡ್ನ್ ಫುಟೊವ್ನ್ ತಾಚೆಂ ಮೊಡೆಂ ಟಯ್ಬರ್ ನಂಯ್ತ್ ಉಡಯಿಲ್ಲೆಂ. ಬಾರಾವ್ಯಾ ಜುವಾಂವ್ನ್ (955-964) ಆಪ್ಲ್ಯಾ ನಾಯ್ಕಿಣಿಕ್ (ದವರ‍್ನ್‌ ಘೆತ್‌ಲ್ಲಿ ಬಾಯ್ಲ್) ಸಭೆಚೆ ಜಾಗೆ ಬರವ್ನ್ ದಿಲೆ, ಹಜಾರ್ ಲೊಕಾಂಚಿ ಖುನ್ ಕರಯ್ಲಿ. ದುಸ್ರ್ಯಾ ಎಕ್ಲ್ಯಾಚ್ಯಾ ಬಾಯ್ಲೆಸವೆಂ ಖಾಟಿಯೆರ್ ಆಸ್ತಾನಾಂ ತಾಣೆಂ ಹಾಕಾ ಮಾರ‍್ನ್ ಕಾಡ್ಲೆಂ. ಬೆನೆಡಿಕ್ತ್ ನೊವ್ಯಾನ್ ದುಡು ಘೆವ್ನ್ ಪಾಪಾಚೊ ಹುದ್ದೊಚ್ ವಿಕ್‌ಲ್ಲೊ. ಸವ್ಯಾ ಉರ‍್ಬನಾನ್ ಕಾಡ್ದಿಯಲಾಂಕ್ ವಿಪ್ರೀತ್ ಹಿಂಸಾ ದೀವ್ನ್ ಲಗಾಡ್ ಕಾಡ್ಲೆಂ, ತೆ ರಡ್ಣೆಂ ಘಾಲ್ತಾನಾಂ ಮ್ಹಾಕಾ ತಾಂಚೆಂ ರುದಾಾನ್ ಆಯ್ಕಾನಾಂ ಮ್ಹಳ್ಳೊ ಮನಿಸ್ ತೊ. ಹಾಂಚ್ಯಾ ಪವಿತ್ರ್‌ಪಣಾಚೆ ಅಸಲೆ ದಾಕ್ಲೆ ಆನಿ ಸಭಾರ್.
The death of John XII by Franco Cesat, Rome, 1861. Wikimedia Commons
ಹೆಂ ರೊಮಾಚೆಂ ಜಾಲೆಂ . . . ಆತಾಂ, ಆಮ್ಚ್ಯಾಚ್ ಭೊಂವಾರಾಚೆ ದಾಕ್ಲೆ ದೀಂವ್ಕ್ ಸುರ‍್ವಾತ್ಲ್ಯಾರ್ … ಎಕಾ ಬಾವ್ಡ್ಯಾಕ್ ಸಹಾಯಕಾನ್ ಭಿತರ್ ಆಪವ್ನ್ ಚಾ ಆನಿ ಇಡ್ಲ್ಯೊ ದಿಲ್ಯೊ, ವ್ಹಡಿಲ್ ಖುಬಾಳ್ಳೊ! ದೊಗಾಂಯ್ಕೀ ಸರಾಸರ್ ಗಾಳಿ ದೀವ್ನ್ ತ್ಯಾ ಬಾವ್ಡ್ಯಾನ್ ಚಾ ಆನಿ ಇಡ್ಲ್ಯೊ ಥಂಯಿಂಚ್ ಸೊಡ್ನ್ ವೆಚೆಪರಿಂ ಕೆಲ್ಲೆಂ ಪವಿತ್ರ್‌ಪಣ್. ಎಕೇಕ್‌ಚ್ ಸಾಂಗ್ತಾನಾಂ ಹಜಾರಾಂನಿ ಜಾತಾ, ವ್ಹಳೂ ಪುರ‍್ಸೊತ್ ಮೆಳ್ತಾನಾಂ ಸಾಂಗುನ್ಂಚ್ ವೆಚೆಂ ಆನಿ ಪವಿತ್ರ್ ಆನಿ ಅಪವಿತ್ರಾಚೆ ವಾಂಟೆ ಕರ‍್ಚೆಂ.
ಆತಾಂ ಆಮ್ಕಾಂಚ್ ಪವಿತ್ರ್ ನ್ಹಂಯ್ ವಾ ಅಪವಿತ್ರ್ ಮ್ಹಣ್ ಕಾಡ್ಚ್ಯಾ ವೆವಸ್ತ್ಯಾಕ್ ಕೋಣೆಂ ಬಳ್ ಭರ‍್ಲಾಂ? ಆಮಿಂಚ್; ತೆ ಶೆಂಭೊರಾಂತ್ ಎಕ್ಲೊಯ್ ನಾಂ. ತಿ ವೆವಸ್ತಾ ಪೊಸ್ಚೆ ಆನಿ ಬಳಾನ್ ಭರ‍್ಚೆ ಆಮಿ ಶೆಂಭೊರಾಂತ್ ನೊವೊದ್ ಆನಿ ನೋವ್. ಭಾರತಾಕ್ ಲುಟುನ್ ಆಪ್ಲೊ ದೇಶ್ ಬಳ್ ಕೆಲ್ಲೆ ಬ್ರಿಟೀಷ್ ಭಾರತಾಂತ್ ಕಾಂಯ್ 10,000 ಆಸ್‌ಲ್ಲೆ ಆನಿ ತವಳ್ ಆಮಿಂ ತೀಸ್ ಕೊರೊಡ್ ಆಸ್‌ಲ್ಲ್ಯಾಂವ್, ತರೀ ತಾಣಿ ಆಮ್ಕಾಂ ಮಾರ‍್ನ್ ಘಾಲೆಂ, ಆಮ್ಚೊ ದೇಶ್ ಲುಟ್ಲೊ. ಹೆಂ ಉಡಾಸಾಂತ್ ದವರ್ಲ್ಯಾರ್ ಬರೆಂ.
► ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ
9 comments