ಅತ್ತ್ಯಾಚಾರ್ – ಥೊಡ್ಯೊ ಗಜಾಲಿ

ಪಾಟ್ಲೊ ಏಕ್ ಶೆಕ್ಡೊ ಭಾರತೀಯ್ ಸ್ತ್ರೀಯಾಂಕ್ ಏಕ್ ಮಹತ್ವಾಚೊ ಶೆಕ್ಡೊ. ಹ್ಯೆ ಆವ್ದೆಂತ್ ಭಾರತೀಯ್ ಸ್ತ್ರೀಯಾಂನಿ ಶಿಕ್ಪಾ ಆನಿ ವೃತ್ತಿ ಶೆತಾಂತ್ ಭರಾನ್ ಮೆಟಾಂ ಕಾಡುನ್ ನವ್ಯಾ ದಿಗಂತಾಕ್ ವೇಂಗ್ ಮಾರ‍್ಲ್ಯಾ. ಘರ್, ಕಾಜಾರ್ ಆನಿ ಕುಜ್ನ್ ಮ್ಹಳ್ಳ್ಯೆ ತ್ರಿಕೋನ್ ಬಂದಡೆಂತ್ ಜಿಯೆವ್ನ್ ಆಸ್ಲಲ್ಯೊ ಭಾರತೀಯ್ ಸ್ತ್ರೀಯೊ ಆಜ್ ರಾಜಕೀಯ್, ವಿಜ್ಞಾನ್, ತಾಂತ್ರಿಕತಾ, ಖೆಳ್, ಫೊವ್ಜ್, ವಯ್ಜಕೀಯ್, ಇಂಜಿನಿಯರಿಂಗ್ ಅಶೆಂ ಸರ್ವ್ ಶೆತಾಂನಿ ಆಪ್ಲಿ ಮ್ಹೊರ್ ಮಾರುಂಕ್ ಸಕ್ಲ್ಯಾತ್. ಅಶೆಂ ಸ್ತ್ರೀಯಾಂಚ್ಯೆ ಉದರ್ಗತೆಚ್ಯೆ ದಿಶ್ಟೆನ್ ಪಾಟ್ಲೊ ಶೆಕ್ಡೊ ಚಾರಿತ್ರಿಕ್ ತರೀ ಎಕಾ ವಿಶಯಾಂತ್ ಹೊ ಶೆಕ್ಡೊ ಪಯ್ಲೆಂಚ್ಯಾ ಶೆಕ್ಡ್ಯಾಬರಿಚ್ ಹಟ್ಟಿ ಆನಿ ಸ್ತ್ರೀವಿರೋಧಿ ಜಾವ್ನ್ ಉರ‍್ಲಾ. – ವಿಶಯ್ – ಸ್ತ್ರೀಯಾಂವಯ್ರ್ ಘರಾಭಿತರ್ ಆನಿ ಭಾಯ್ರ್ ಜಾಂವ್ಚೆ ಲಂಯ್ಗಿಕ್ ಅತ್ತಾಚಾರ್/ರೇಪ್ ಆನಿ ಹಿಂಸಾ. ಪಾಟ್ಲ್ಯಾ ಚಾಳೀಸ್ ವರ‍್ಸಾಂನಿ ಭಾರತಾಚ್ಯಾ ಸ್ತ್ರೀಯಾಂನಿ ಹರ‍್ಯೆಕಾ ಶೆತಾಂತ್ ಚಾರಿತ್ರಿಕ್ ಸಾಧನ್ ಕೆಲಾಂ ತರೀ, ಹ್ಯೆಚ್ ಆವ್ದೆಂತ್ ಭಾರತಾಂತ್ ರೇಪ್ ಪ್ರಕರಣಾಂ 87.5% ವಾಂಟ್ಯಾಂನಿ ಚಡ್ಲ್ಯಾಂತ್. ಎಕೆ ಆಧುನಿಕ್, ಶಿಕ್ಪಿ ಸಮಾಜೆಂತ್ ಸ್ತ್ರೀಯಾಂವಯ್ರ್ ಅತ್ತ್ಯಾಚಾರಾಚಿಂ ಪ್ರಕರಣಾಂ ಚಡೊನ್‌ಚ್ ಆಸಾತ್ ತರ್ ಹ್ಯಾ ಆಪ್ರಾಧಾಚಿ ಜವಾಬ್ದಾರಿ ಸಮಾಜೆನ್ ಕಾಣ್ಛೆಜೆ.

ಅತ್ತ್ಯಾಚಾರ್ ಸಮಾಜೆಂತ್ ಕನಿಶ್ಟ್ ಮಹತ್ವ್ ದಿಂವ್ಚೊ ಆನಿ ಸಬಾರ್ ವಾಯ್ಟ್ ಪರಿಣಾಮಾಚೊ ಗುನ್ಯಾಂವ್. ಆಮ್ಚ್ಯಾ ದೆಶಾಂತ್ ಹರ್ ಸೊಳಾ ಮಿನುಟಾಂಕ್ ಎಕ್ ಅತ್ತ್ಯಾಚಾರ್ ಪ್ರಕರಣ್ ದಾಖಲ್ ಜಾತಾ ಆನಿ ಹರ್ ಪಂದ್ರಾ ಮಿನುಟಾಂಕ್ ಎಕಾ ಭುರ್ಗ್ಯಾಚೆರ್ ಬಳಾತ್ಕಾರ್ ಜಾತಾ. ಪುಣ್ ಪೊಲೀಸ್, ರಾಜ್‌ಕಾರಣಿ, ಮಾದ್ಯಮಾಂ ಆನಿ ಸಮುದಾಯ್ ಅತ್ತ್ಯಾಚಾರ್ ಕಿತ್ಯಾಕ್ ಆನಿ ಕಸೊ ಜಾಲೊ ಮ್ಹಣೊನ್ ಸಮ್ಜೊಂವ್ಚ್ಯಾ ಆನಿ ತನ್ಕಿ ಕರ‍್ಚ್ಯಾ ನಿಬಾನ್ ಗರ್ಜೆಭಾಯ್ಲಿಂ ಸವಾಲಾಂ ವಿಚಾರುನ್ ಆನಿ ಘಡಿತಾಚೆಂ ವಿಶ್ಲೇಶಣ್ ಕರುನ್ ಅತ್ತ್ಯಾಚಾರಾಕ್ ಒಳೊಕ್ ಜಾಲ್ಲ್ಯೆ ಸ್ತ್ರೀಯೆ ವಾ ಚಲಿಯೆಚೆರ್ ಪರತ್ ಮಾನಸಿಕ್ ಅತ್ತ್ಯಾಚಾರ್ ಕರ‍್ತಾತ್. ಶೆಕಿಂ ಆಪ್ರಾಧಿಚ್ಯಾಕೀ ಚಡ್ ಆಮ್ಕಾಂ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯೆ ಸ್ತೀಯೆಕ್ ವಾ ಚಲಿಯೆಕ್, ಅತ್ತ್ಯಾಚಾರಾಕ್ ತಿಚ್ ಕಾರಣ್ ಮ್ಹಳ್ಳೆಂ ದುರ‍್ಸೊಣೆಂ ಆನಿ ಆಣ್ಕಾಣೆಂ ಆಯ್ಕಜೆ ಪಡ್ತಾ. ಅತ್ತ್ಯಾಚಾರಾಚಿಂ ಕಾರಣಾಂ ಸೊಧುನ್ ಕಾಡ್ಚ್ಯಾ ನಿಬಾನ್ ಆಮ್ಚ್ಯೆ ಚಾಲ್-ಚಮ್ಕಣೆವಿಶಿಂ ಆಮಿ ನ್ಹೆಸ್ಚ್ಯಾ ವಸ್ತುರಾವಿಶಿಂ, ಆಮ್ಚ್ಯಾ ಮಿತ್ರಾಂವಿಶಿಂ ಪೋಸ್ಟ್‌ಮಾರ್ಟಮ್ ಚಲೊನ್ ಆಖೇರಿಕ್ ಆಮಿಂಚ್ ಆಪ್ರಾಧಿ ಮ್ಹಳ್ಳೊ ಬಿಲ್ಲೊ ವೆಗ್ಳೊ ಮೆಳ್ತಾ. ಹ್ಯಾಚ್ ವೆಳಿಂ ಆಮ್ಚೆರ್ ಅತ್ತ್ಯಾಚಾರ್ ಕೆಲ್ಲೊ ಆಪ್ರಾಧಿ ಥೊಡೊ ತೇಂಪ್ ಜಯ್ಲಾಂತ್ ರಾವೊನ್ (ಬೊವ್ ಉಣ್ಯಾ ಪ್ರಕರಣಾಂನಿ ಅಶೆಂ ಘಡ್ತಾ. ಚಡ್ತಾವ್ ಜಾವ್ನ್ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲಿ ಸ್ತ್ರೀ ವಾ ಚಲಿ ಪೊಲೀಸ್‌ಠಾಣ್ಯಾಚೆಂ ಮೇಟ್ ಸಯ್ತ್ ಚಡನಾ) ಚುರ‍್ಚುರ‍್ಯಾಂಚಿಂ ಕಿರ್ಕೊಳ್ ಭೊಗ್ಣಾಂ ನಾಸ್ತಾಂ ಕಿತೆಂಚ್ ಘಡೊಂಕ್ ನಾ ಮ್ಹಳ್ಳ್ಯಾ ಭರ್ಮಾನ್ ಭಾಯ್ರ್ ಭೊಂವ್ತಾತ್. ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯಾ ವೆಕ್ತಿಕ್ ದುರ‍್ಸೊಂಚ್ಯಾ ನೀಚ್ ಚಿಂತ್ಪಾಸಕ್ತೆಚ್ಯಾ ಆನಿ ಮನ್ಶಾಂಮದೆಂ ಲಂಯ್ಗಿಕ್ ಅತ್ತ್ಯಾಚಾರ್ ಜಾತಾನಾ ತೊ ಆಡಾಂವ್ಕ್ ಕಿತೆಂಚ್ ಕರುಂಕ್ ನಾ ವಾ ಆಡಾಂವ್ಕ್ ಜಾಂವ್ಕ್ ನಾ ಮ್ಹಳ್ಳಿ ಅಂತಸ್ಕರ್ನಾಚಿ ಕಾಂತೊವ್ಣಿ ಆನಿ ಅಸಹಾಯಕ್ಪಣಾಚ್ಯಾ ಚಿಂತ್ನಾಂನಿ ಬುಡೊನ್ ಕುಡಿಚಿ ಆನಿ ಮತಿಚಿ ಜೀಣ್‌ಭರ್ ಸಜಾ ಭೊಗ್ಚಿ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯಾ ವ್ಯಕ್ತಿನ್ ಮಾತ್ರ್.

ದೊಗಾಂ ವೆಕ್ತಿಂಮದೆಂ ಎಕ್ಲ್ಯಾಚಿ ಪರ್ವಣ್ಗಿ ನಾಸ್ತಾಂ, ಎಕ್ಲ್ಯಾನ್ ವಾ ಸಬಾರಾಂನಿ ಬಳಾತ್ಕಾರಾನ್ ಕರ‍್ಚೊ ಸಂಭೋಗ್ ವಾ ಲಂಯ್ಗಿಕ್ ಕರ‍್ನಿಚ್ ಅತ್ತ್ಯಾಚಾರ್ ವಾ ರೇಪ್. ಜಾಂವ್ ತಿ ಲಂಯ್ಗಿಕ್ ಕರ‍್ನಿ ಎಕಾ ದಾದ್ಲ್ಯಾ ಆನಿ ಸ್ತ್ರೀಯೆಮದ್ಲಿ ವಾ ದೊಗಾಂ ದಾದ್ಲ್ಯಾ ವಾ ದೊಗಾಂ ಸ್ತ್ರೀಯಾಂಮದ್ಲಿ, ಜರ್ ತಾಂತ್ಲೊ ಎಕ್ಲೊ ಹ್ಯೆ ಕರ‍್ನೆಕ್ ಪರ್ವಣ್ಗಿ ಆನಿ ಸಹಕಾರ್ ದೀನಾ ತರ್ ತೊ ಬಳಾತ್ಕಾರ್. ಲಂಯ್ಗಿಕ್ ಕರ‍್ನೆಂತ್ ವಾಂಟೆಲಿ ಜಾಂವ್ಚ್ಯಾ ದೊಗಾಂಯ್ ವೆಕ್ತಿಂಮದೆಂ ಕುಡಿ ಆನಿ ಮತಿಚೊ ಸಹಮತ್ ಆಸಜೆ ಆನಿ ತಾಣಿಂ ದೊಗಾಂಯ್ನಿ ಶಾರೀರಿಕ್ ಆನಿ ಮಾನಸಿಕ್ ರಿತಿನ್ ಹ್ಯೆ ಲಂಯ್ಗಿಕ್ ಕರ‍್ನೆಕ್ ತಯಾರ್ ಆಸಜೆ. ನಾ ತರ್ ತಾಂಚೆಮದೆಂ ಜಾಂವ್ಚಿ ಲಂಯ್ಗಿಕ್ ಕರ‍್ನಿ ಸಂಭೋಗ್ ನ್ಹಯ್ ಬಗಾರ್ ಅತ್ತ್ಯಾಚಾರ್ ಆನಿ ಹಾಂತುನ್ ಎಕ್ಲೊ ವಾ ಎಕ್ಲೆಂ ವಿಕೃತ್ ಆನಂದ್ ಭೊಗ್ತಾ ತರ್, ದುಸ್ರೆಂ ವಾ ದುಸ್ರೊ ಭವ್ತಿಕ್ ಆನಿ ಮಾನಸಿಕ್ ಹಿಂಸಾಕ್ ವೊಳಗ್ ಜಾತಾ, ಜಾಂವ್ಕ್ ಪುರೊ ತಿ ಕರ‍್ನಿ ಚಲ್ಯಾ ವಾ ಚಲಿಯೆಮದೆಂ ವಾ ಕಾಜಾರಿ ಜೊಡ್ಯಾಂಮದೆಂ. ತಶೆಂಚ್ ಮತಿರ್ ನಾತ್ಲಲ್ಯಾಚೆರ್ ವಾ ಮತಿಭ್ರಮಣ್ ಜಾಲ್ಲ್ಯಾಂಚೆರ್, ಕುಡಿಚೆ ಊಣ್ ಆಸ್ಲಲ್ಯಾಂಚೆರ್, ಭುರ್ಗ್ಯಾಂಚೆರ್ ವಾ ಪ್ರಾಯೆಸ್ತಾಂಚೆರ್ ಕರ‍್ಚೊ ಅತ್ತ್ಯಾಚಾರ್ ಲಂಯ್ಗಿಕ್ ಅಕ್ರಮಣ್. ಕಿತ್ಯಾಕ್ ಮ್ಹಳ್ಯಾರ್, ಖಂಯ್ಚ್ಯೇಯ್ ರಿತಿಚ್ಯೆ ಲಂಯ್ಗಿಕ್ ಕರ‍್ನೆಥಂಯ್ ವಾ ವೊಡ್ಣೆಥಂಯ್ ತಾಂಕಾಂ ಆಸಕ್ತ್, ಜಾಣ್ವಾಯ್ ವಾ ಸಹಮತ್ ಆಸನಾ. ಅತ್ತ್ಯಾಚಾರ್ ಮ್ಹಳ್ಯಾರ್ ಫಕತ್ ದಾದ್ಲ್ಯಾಂನಿ ಸ್ತ್ರೀಯೆವಯ್ರ್ ಕರ‍್ಚೆಂ ಲಂಯ್ಗಿಕ್ ಆಕ್ರಮಣ್ ಮಾತ್ರ್ ನ್ಹಯ್. ಆಮ್ಚ್ಯಾ ಭೊಂವ್ತಿಂ ದಾದ್ಲ್ಯಾ ವಾ ಸ್ತ್ರೀಯೆಥಾವ್ನ್ ದಾದ್ಲ್ಯಾ ಆನಿ ಚೆರ್ಕ್ಯಾಂವಯ್ರ್ ವಾ ಸ್ತ್ರೀಯಾಂಥಾವ್ನ್ ಸ್ತ್ರೀಯೆವಯ್ರ್ ಸಯ್ತ್ ಲಂಯ್ಗಿಕ್ ಆಕ್ರಮಣಾಂ ಚಲ್ತಾತ್. ಅಶೆಂ ಜಾಲ್ಲ್ಯಾನ್ ಅತ್ತ್ಯಾಚಾರ್ ವಾ ರೇಪ್ ಪ್ರಕರಣಾಂತ್ ಹರ‍್ಯೇಕ್ ಪಾವ್ಟಿಂ ದಾದ್ಲೊ ಆಪ್ರಾಧಿ ಆನಿ ಸ್ತ್ರೀ ಬಲಿ ಮ್ಹಣೊನ್ ಸಾಂಗೊಂಕ್ ಜಾಯ್ನಾ.

ಲಂಯ್ಗಿಕ್ ಅತ್ತ್ಯಾಚಾರ್ ಫಕತ್ ಚಲಿ, ಸ್ತ್ರೀಯಾಂವಯ್ರ್ ಮಾತ್ರ್ ಜಾಯ್ನಾ, ದಾದ್ಲ್ಯಾ ಆನಿ ಚೆರ್ಕ್ಯಾಂವಯ್ರ್ ಸಯ್ತ್ ಜಾತಾ. ಪುಣ್ ದಾದ್ಲ್ಯಾ ಆನಿ ಚೆರ್ಕ್ಯಾಂಥಾವ್ನ್ ಸಂಸಾರಾಂತ್ ಲಗ್ಬಗ್ 90% ಸ್ತ್ರೀಯೊ ಆನಿ 82% ಚೆಡ್ವಾಂ ಭುರ್ಗಿಂ ಅತ್ತ್ಯಾಚಾರಾಕ್ ಸಾಂಪ್ಡತಾತ್. ಅಶೆಂ ಅತ್ತ್ಯಾಚಾರಾಚ್ಯಾ ಪ್ರಕರಣಾಂನಿ ದಾದ್ಲ್ಯಾಂನಿ ಸ್ತ್ರೀಯೆವಯ್ರ್ ಚಲೊಂವ್ಚ್ಯಾ ಲಂಯ್ಗಿಕ್ ಜುಲುಮಾಂಚಿಂ ಪ್ರಕರಣಾಂ ಚಡ್ ಆಸ್ಲಲ್ಯಾನ್ ಕೊಣ್ಣಾ ಚಲ್ಯಾ ಆನಿ ದಾದ್ಲ್ಯಾಂವಯ್ರ್ ಸ್ತ್ರೀಯಾಂನಿ ಕರ‍್ಚೊ ಲಂಯ್ಗಿಕ್ ಜುಲುಮ್ ಸಮಾಜೆಚ್ಯೆ ನದ್ರೆಥಾವ್ನ್ ಧಾಂಪುನ್ ವೆತಾ. ಅಸಲಿಂ ಪ್ರಕರಣಾಂ ಭಾಯ್ರ್ ಆಯ್ಲಿಂ ತರೀ ಅಶೆಂಯ್ ಜಾತಾ ಮ್ಹಣೊನ್ ಒಪ್ವೊನ್ ಘೆಂವ್ಚ್ಯಾ ಮಟ್ಟಾಕ್ ಆಮ್ಚಿ ಸಮಾಜ್ ಆನಿಕೀ ವಾಡೊಂಕ್ ನಾ. ಕಿತ್ಯಾಕ್ ಮ್ಹಳ್ಯಾರ್, ಆಮ್ಚ್ಯೆ ಪುರುಶ್‌ಪ್ರಧಾನ್ ಸಮಾಜೆಂತ್ ದಾದ್ಲೊ ವಾ ಚಲೊ ಮ್ಹಳ್ಯಾರ್ ತೊ ಬಳ್ವಂತ್ ಆನಿ ಧೃಡ್ ಮ್ಹಳ್ಳಿ ಚೂಕ್ ಸಮ್ಜಣಿ ರುತಾ ಜಾಲ್ಯಾ. ಅಸಲ್ಯಾ ಭೊಂವಾರಾಂತ್ ವಾಡ್ಲಲೆ ದಾದ್ಲೆ ಆನಿ ಚಲೆ ಜಾಯ್ತೆಪಾವ್ಟಿಂ ಆಪ್ಣಾವಯ್ರ್ ಜಾಲ್ಲೊ ಲಂಯ್ಗಿಕ್ ಜುಲುಮ್ ಭಾಯ್ರ್ ಆಯ್ಲೊ ತರ್ ಸಮಾಜ್ ಆಮ್ಕಾಂ ಅಸ್ಕತ್ ಮ್ಹಣೊನ್ ಬಿಲ್ಲೊ ಲಾಯ್ತ್ ಮ್ಹಣೊನ್ ಚಿಂತುನ್ ಆಪ್ಣಾವಯ್ರ್ ಜಾಲ್ಲೆಂ ಲಂಯ್ಗಿಕ್ ಆಕ್ರಮಣ್ ಸಮಾಜೆಚ್ಯೆ ನದ್ರೆಥಾವ್ನ್ ಧಾಂಪುನ್ ವ್ಹರ‍್ತಾತ್.

ಲಂಯ್ಗಿಕ್ ಅತ್ತ್ಯಾಚಾರಾಚೊ ತಕ್ಶಣ್ ಪರಿಣಾಮ್ ಫಕತ್ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯಾ ವೆಕ್ತಿಚೆರ್ ಮಾತ್ರ್ ನ್ಹಯ್, ತಿಚ್ಯಾ ವಾ ತಾಚ್ಯಾ ಕುಟ್ಮಾದಾರಾಂಚೆರ್, ಲಾಗ್ಶಿಲ್ಯಾ ಆನಿ ಮೊಗಾಚ್ಯಾ ಮನ್ಶಾಂಚೆರ್, ಈಶ್ಟ್-ಇಶ್ಟಿಣ್ಯಾಂಚೆರ್ ಸಯ್ತ್ ಜಾತಾ. ಲಂಯ್ಗಿಕ್ ಆಕ್ರಮಣಾಂತ್ ಝೆಂಜಾರ‍್ಲಲ್ಯೆ ಕುಡಿಚಿ ದೂಕ್ ಆನಿ ಘಾಯ್ ಬರೆ ಜಾಂವ್ಕ್ ಪುರೊ, ಪುಣ್ ಹಾಚೆವರ್ವಿಂ ಜಾಲ್ಲೆ ಮಾನಸಿಕ್ ಘಾಯ್ ಕೆದಿಂಚ್ ಮಾಜ್ವೊಂಕ್ ಜಾಯ್ನಾಂತ್ ತಸಲೆ. ದೆಕುನ್ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯಾ ವೆಕ್ತಿಚ್ಯಾ ಸಂಗಿ ರಾವೊನ್ ತಾಚ್ಯಾ ಹರ‍್ಯೆಕಾ ಭೊಗ್ಣಾಂಕ್ ಆಮಿ ಗವ್ರವ್ ದೀಜೆ. ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲಿ ವೆಕ್ತಿ ಆಪ್ಲ್ಯೆಚ್ ರಿತಿನ್ ಲಂಯ್ಗಿಕ್ ಹಿಂಸಾಚಿ ಪ್ರತಿಕ್ರಿಯಾ ದಿತಾ. ಥೊಡೆಪಾವ್ಟಿಂ ಹೊ ಆಪ್ರಾಧ್ ತಾಂಚಿ ಜಿಣಿಯೆರೀತ್‌ಚ್ ಬದ್ಲುನ್ ಸೊಡ್ತಾ ತರ್, ಹೆರ್ ಥೊಡಿಂ/ಥೊಡೆ ಆಪ್ಣಾವಯ್ರ್ ಜಾಲ್ಲೊ ಜುಲುಮ್ ಉತ್ರಾಂವ್ಕ್ ವಾ ಪಿಂತ್ರಾಂವ್ಕ್ ಸಕನಾಸ್ತಾಂ, ಜೀಣ್‌ಭರ್ ತಾಂಚ್ಯಾ ಭಿತರ್ ಆಟೊವ್ನ್, ಕರ‍್ಗೊನ್ ವೆತಾತ್. ಥೊಡಿಂ ಆಪ್ಣಾವಯ್ರ್ ಆಪ್ರಾಧ್ ಜಾಲಾ ಶಿವಾಯ್ ಆಪುಣ್ ಆಪ್ರಾಧಿ ನ್ಹಯ್ ಮ್ಹಣೊನ್ ಧರ್ಯಾನ್ ಜಿವಿತ್ ಫುಡ್ ಕರ‍್ತಾತ್ ಆನಿ ಆಪ್ರಾಧಿಕ್ ಕಾನೂನಾತ್ಮಕ್ ರಿತಿನ್ ಶಿಕ್ಶಾ ದಿವಯ್ತಾತ್. ಜಾಯ್ತ್ಯಾ ಸಂದರ್ಬಾಂನಿ ಪ್ರತ್ಯೇಕ್ ಜಾವ್ನ್, ಭುರ್ಗ್ಯಾಂವಯ್ರ್ ಲಂಯ್ಗಿಕ್ ಜುಲುಮ್ ಚಲ್ಲಲ್ಯಾ ವೆಳಾರ್ ತಾಂಕಾಂ ತ್ಯೆ ಪ್ರಾಯೆರ್ ತೆಂ ಕಿತೆಂ ಮ್ಹಣೊನ್ ಕಳನಾ ತರೀ, ತಾಂಚಿ ಕೂಡ್ ಆನಿ ಮತ್, ಹ್ಯಾ ಆಕ್ರಮಣಾಂಕ್ ವಿಶಿಶ್ಟ್ ರಿತಿನ್ ಪ್ರತಿಕ್ರಿಯಾ ದಿತಾ ಆನಿ ಹ್ಯಾ ವೆಳಾರ್ ತಾಂಚೆಭೊಂವ್ತಿಂ ಆಸ್ಚ್ಯಾ ಆವಯ್-ಬಾಪಯ್ ವಾ ಹೆರ್ ಕುಟ್ಮಾದಾರಾಂನಿ ತಾಂಕಾಂ ಬೊವ್‌ಚ್ ಜಾಗ್ರುತಾಯೆನ್ ಹ್ಯಾ ಬಾಂದ್ಪಾಸಾಂತ್ಲೆಂ ಭಾಯ್ರ್ ಕಾಡುಂಕ್ ಪ್ರಯತ್ನ್ ಕರಿಜೆ. ತಶೆಂಚ್ ಥೊಡ್ಯಾ ಸಂದರ್ಬಾಂನಿ ವ್ಹಡಾಂಚೆರ್ ಅತ್ತ್ಯಾಚಾರ್ ಜಾಲ್ಲ್ಯಾ ವೆಳಾರೀ, ನಾಲಿಸಾಯೆಕ್ ಭಿಯೆವ್ನ್‌ಗೀ ವಾ ಕುಟ್ಮಾಚಿ ಮಾನ್-ಮರ್ಯಾದ್ ವಾ ಹೆರ್ ಖಂಯ್ಚ್ಯಾಯ್ ಕಾರಣಾವರ್ವಿಂ ಆಪ್ಣಾವಯ್ರ್ ಜಾಲ್ಲ್ಯಾ ಅತ್ತ್ಯಾಚಾರಾವಿಶಿಂ ಉಗ್ತ್ಯಾನ್ ತ್ಯಾ ವೆಳಾ ಸಾಂಗನಾಂತ್. ಪುಣ್ ಥೊಡ್ಯಾ ಮ್ಹಯ್ನ್ಯಾಂನಿ, ಥೊಡ್ಯಾ ವರ‍್ಸಾಂನಿ ವಾ ಜಿಣಿಯೆಚ್ಯಾ ಖಂಯ್ಚ್ಯಾಯ್ ಎಕಾ ಸಂದರ್ಬಾರ್ ಜರ್ ತಿಂ ಆಪ್ಣಾವಯ್ರ್ ಜಾಲ್ಲ್ಯಾ ಆಪ್ರಾಧಾವಿಶಿಂ ಉಗ್ತ್ಯಾನ್ ಉಲಯ್ತಾತ್ ತರ್, ತಾಂಚ್ಯಾ ಭೊಗ್ಣಾಂಕ್ ಗವ್ರವ್ ದೀವ್ನ್, ತಾಂಕಾಂ ತ್ಯಾ ವೆಳಿಂ ಮಾನಸಿಕ್ ಆನಿಂ psychological ತೆಂಕೊ ದಿಂವ್ಚಿ ಜವಾಬ್ದಾರಿ ಆಮ್ಕಾಂ ಆಸಾ.

ಲಂಯ್ಗಿಕ್ ಅತ್ತ್ಯಾಚಾರ್ ವಾ ಬಳಾತ್ಕಾರಾಂತ್ ತಕ್ಶಣಾಚೆ ಪರಿಣಾಮ್ ಕುಡಿಚೆ ಘಾಯ್, ಲಂಯ್ಗಿಕ್ ವಿಸ್ವ್ಯಾಂಚೆರ್ ಜಾಂವ್ಚೆ ಘಾಯ್, ದೂಕ್ ಆನಿ ರಗ್ತಾಸ್ರಾವ್, ಮುತಾಚೊ ವೊಸೊ, ಗರ್ಭಾಕೊಶಾಚೆ ಆಭಾದ್, ಗರ್ಭೆಸ್ತ್‌ಪಣ್ ಆನಿ ಲಂಯ್ಗಿಕ್ ವಿಸ್ವ್ಯಾಮುಕಾಂತ್ರ್ ಪಾಚಾರ‍್ಚ್ಯೊ ಪಿಡಾ, ದಾಖ್ಲ್ಯಾಕ್ ಏಡ್ಸ್ ಅಶೆಂ ಜಾಯ್ತೆ ಆಸಾತ್. ದುಕಾಳ್ ಆನಿ ನಾಪಸಂದೆಚ್ಯಾ ಸಂಭೋಗಾವರ್ವಿಂ ಗೂಣ್ ಜಾಯ್ನಾತ್ಲಲೆ ಮಾನಸಿಕ್ ಘಾಯ್ ತ್ಯಾ ವೆಕ್ತಿಚೊ ಸಮಾಜೆಂತ್ ಜಿಯೆಂವ್ಚೊ ಭರ್ವಸೊ ಉಣೆ ಕರ‍್ತಾತ್ ಆನಿ ತ್ಯಾ ವೆಕ್ತಿನ್ ಅಸಲ್ಯಾ ಚಿಂತ್ಪಾಥಾವ್ನ್ ಭಾಯ್ರ್ ಯೇಂವ್ಕ್ ಆಪ್ಣಾಸಂಗಿಚ್ ಝುಜ್ಚೆಂ ಝುಜ್ ಲಾಂಬ್ ಆವ್ದೆಚೆಂ. ಮಾನಸಿಕ್ ಘಾಯ್ ಕೆನ್ನಾಂಯ್ ಮಟ್ವ್ಯೆ ಆವ್ದೆಚೆ ನ್ಹಯ್, ತೆ ಜೀಣ್‌ಭರ್ ತ್ಯಾ ವೆಕ್ತಿಕ್ ಸತಾವ್ನ್ ಆನಿ ಕಾಂತೊವ್ನ್ ಆಸ್ತಾತ್. ತಿ ವೆಕ್ತಿ ಜಿವಂತ್ ಆಸ್ತಾ ಮ್ಹಣಸರ್ ಹೆ ಭಯಾನಕ್ ಘಾಯ್ ತ್ಯೆ ವೆಕ್ತಿಚ್ಯೆ ಮತಿಂತ್ ಜಿವಾಳ್ ಆಸ್ತಾತ್ ಆನಿ ಸಂದರ್ಬಾತೆಕೀದ್ ತೆ ಉಸ್ಕೊಂಕ್‌ಯೀ ಪುರೊ.

ಘರ‍್ಚ್ಯಾಂಕ್, ಮೊಗಾಚ್ಯಾಂಕ್ ಆನಿ ಸಯ್ರ್ಯಾಂಕ್ ಸಮಾಜೆಂತ್ ಭೊಗುಂಕ್ ಆಸ್ಚಿ ನಾಲಿಸಾಯ್, ಲಜ್ ಆನಿ ತಾತ್ಸಾರ್ ಚಿಂತುನ್ ಜಾಯ್ತೆಪಾವ್ಟಿಂ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲಿ ವಾ ಜಾಲ್ಲೊ ವೆಕ್ತಿ ಅತ್ತ್ಯಾಚಾರಾಕ್ ಆಪುಣ್‌ಚ್ ಕಾರಣ್ ಮ್ಹಳ್ಳೆಂ ಮಾಂದುನ್ ಘೆತಾ ತರ್ ತಾಚೆ ಮಾನಸಿಕ್ ಘಾಯ್ ಗೂಣ್ ಜಾಂವ್ಚಿ ಪ್ರಕ್ರಿಯಾ ಸವ್ಕಾಸ್ ಜಾತಾ ಮಾತ್ರ್ ನ್ಹಯ್, ಭಿತರ‍್ಲೆಭಿತರ್ ತಿ ವೆಕ್ತಿ, ಗುನ್ಯಾಂವ್ಕಾರ್ ಮಾಗೊನ್ ಘೆತ್ಲಲ್ಯಾ ಆಪ್ಲ್ಯೆಚ್ ಕರ‍್ನೆವಯ್ರ್ ಕರ‍್ಗತಾ ಆನಿ ಲಜ್ ಭೊಗ್ತಾ. ಅಸಲಿ ವೆಕ್ತಿ ಆಪ್ಣಾವಯ್ರ್ ಜಾಲ್ಲ್ಯಾ ಆಕ್ರಮಣಾಂವಿಶಿಂ ಉಲೊಂವ್ಕ್, ತ್ಯಾ ವಿಶಿಂ ಹೆರಾಂಕ್ ಕಳೊಂವ್ಕ್ ಪಾಟಿಂ ಸರ‍್ತಾ ಆನಿ ಎಕೆ ರಿತಿನ್ ಆಪ್ರಾಧಿಕ್ ಶರಣ್ ಜಾತಾ. ಸಮಾಜೆಚೊ ಉಗ್ಡಾಸ್ ಬೊವ್ ಮಟ್ವೊ ಆನಿ ಸಮಾಜ್ ಥೊಡ್ಯಾಚ್ ದಿಸಾಂನಿ ದುಸ್ರೊ ಏಕ್ ವಿಶಯ್ ಘೆವ್ನ್ ತಾಂತುಂ ವೆಸ್ತ್ ಜಾತಾ. ಪುಣ್ ವೆಕ್ತಿಚೆಂ ಅಂತಸ್ಕರ್ನ್ ಆನಿ ಮಾನಸಿಕ್ ದಬಾವ್ ತಸೊ ನ್ಹಯ್. ತೊ ಕೆನ್ನಾಂಯ್ ಮಾಜ್ವಾನಾ ಆನಿ ಖಂಯ್ಚ್ಯಾಯ್ ವೆಳಾರ್ ಪರತ್ ಉಸ್ಕೊಂಕ್ ಪುರೊ. ಅಸಲ್ಯಾ ಬಾಂದ್ಪಾಸಾಂತ್ ಸಾಂಪಡ್ಲಲಿ ವೆಕ್ತಿ guilt feeling ಕ್ ವೊಳಗ್ ಜಾವ್ನ್, ಡಿಪ್ರೆಶನಾಂತ್ ಪಡೊನ್, ಜೀವ್ಘಾತ್ ತಸಲೆಂ ಕಠೀಣ್ ಮೇಟ್ ಕಾಡುಂಕ್‌ಯೀ ಪಾಟಿಂ ಸರನಾ.

ಅತ್ತ್ಯಾಚಾರಾಚೊ ಉಗ್ಡಾಸ್ ಆನ್ಯೇಕ್ ಮಾನಸಿಕ್ ಪರಿಣಾಮ್. ಹಾಂತುಂ ವೆಕ್ತಿ ಘಡಿಯೆನ್ ಘಡಿ ಆಪ್ಲ್ಯಾ ಮತಿಪಡ್ದ್ಯಾರ್ ಆಟೊವ್ ಕರುನ್ ಮಾನಸಿಕ್ ರಿತಿನ್ ದುಕಿಭರಿತ್ ಆನಿ ಉಚಾಂಬಳ್ ರಿತಿಚೆ ತಳ್ಮಳೆ ಭೊಗ್ತಾ. ಉಗ್ಡಾಸ್ ಕ್ಶಣಿಕ್ ತರೀ ಪರಿಣಾಮ್ ಮಾತ್ರ್ ಲಾಂಬ್ ಆವ್ದೆಚೊ. ಉಗ್ಡಾಸಾಕ್ ರಾತ್, ದೀಸ್, ಜಾಗ್ ಆನಿ ನಿದೆಚೊ ಫರಕ್ ನಾ ಆನಿ ಹಾಂಗಾಸರ್ ವೆಕ್ತಿಚೆರ್ ಸಬಾರ್ ರಿತಿಚೆ ಪರಿಣಾಮ್ ಆಸ್ತಾತ್. ಘಡಿತ್ ದೊಳ್ಯಾಂಮುಕಾರ್ ಪಾಶಾರ್ ಜಾಂವ್ಚೆಂ, ಘಡಿತ್ ಘಡ್ಲಲ್ಯಾ ವೆಳಾರ್ ಆಯ್ಕಲ್ಲಿಂ ಉತ್ರಾಂ, ಸಂಗೀತ್, ಆವಾಜ್ ಪರತ್ ಮತಿಪಡ್ದ್ಯಾರ್ ಯೆತಾನಾ ಭೊಗ್ಚಿಂ ಭೊಗ್ಣಾಂ, ಸಂಕಟ್, ಅಸಹಾಯಕ್ಪಣ್, ನಿರಾಸ್ಪಣ್, ಕ್ರೋಧ್, ಭಿರಾಂತ್, ಥರ್ಥರೊ, ಆಕಾಂತ್ ಆನಿ ಭೊಗ್ಣಾಂಚ್ ನಾಸ್ತಾಂ ನಿಸ್ತೇಜ್‌ಶೆಂ ಭೊಗ್ಚೆಂ ಅಸಲಿ ಸ್ಥಿತಿ ವಿಣುಂಕ್ ಉತ್ರಾಂ ಮೆಳನಾಂತ್. ಪರತ್ ಪರತ್ ಉಗ್ಡಾಸ್ ಯೆಂವ್ಚೊ ವಾ ಕಾಡ್ಚೊ ಘಡಿತ್ ಪರತ್ ಜಿಯೆಂವ್ಕ್ ಕರ‍್ತಾ. ಕುಡಿಚ್ಯೆ ಭಲಾಯ್ಕೆಚೆರ್ ಹಾಚೊ ಪರಿಣಾಮ್ ಪಡ್ತಾ. ದೂಕ್, ಕಾಂಟಾಳೊ, ವೊಂಕಾರೆಂ, ಗಿಳುಂಕ್ ಕಶ್ಟ್ ಜಾಂವ್ಚೆಂ, ಬಾಂದ್ಪಾಸ್, ಉಸ್ವಾಸ್ ಕಾಡುಂಕ್ ಕಶ್ಟ್ ಜಾಂವ್ಚೆಸಂಗಿ ಇಂದ್ರಿಯಾಂಚ್ಯಾ ಕಾರ್ಯಾಂಚೆರ್‌ಯೀ ಪರಿಣಾಮ್ ಪಡ್ತಾ.  Insights of Sexual harassed victim  ಮ್ಹಳ್ಳ್ಯಾ ಸಂಸೊಧಾಂತ್ ಏಕ್ ಬಳಾತ್ಕಾರಾಕ್ ವೊಳಗ್ ಜಾಲ್ಲ್ಯೆ ಸ್ತ್ರೀಯೆನ್ ಪರತ್ ಪರತ್ ಯೆಂವ್ಚ್ಯಾ ಘಡಿತಾಚೊ ಅಶೆಂ ಉಲ್ಲೇಖ್ ಕೆಲಾ : ತಾಣೆಂ ಮ್ಹಾಕಾ ಚಲಯಿಲ್ಲಿ ರೀತ್ ಬೊವ್ ನಾಲಿಸಾಯೆಚಿ ಆನಿ ಅಕ್ಮಾನಾಚಿ. ತೊ ಕಿತೆಂ ಕರ‍್ತಾ ಮ್ಹಣೊನ್ ತಾಕಾ ಕಳಿತ್ ಆಸ್‌ಲ್ಲೆಂ ಆನಿ ತಾಚಿ ಜಾಣ್ವಾಯ್ ತಾಕಾ ಆಸ್ಲಿ. ತಾಣೆಂ ಮ್ಹಜ್ಯೆ ಕುಡಿಚಿ, ಮತಿಚಿ ಆನಿ ಮ್ಹಜ್ಯಾ ಆತ್ಮ್-ಸಮ್ಮಾನಾಚಿ ವೀದ್‌ವಾವ್ಳಿ ಕರ‍್ಚ್ಯಾಕೀ, ಮ್ಹಾಕಾ ಜಿವೆಶಿಂ ಮಾರ್‌ಲ್ಲೆಂ ತರ್ ಬರೆಂ ಆಸ್ಲೆಂ. ಪುಣ್ ಹಾಂವ್ ಜಿವಂತ್ ಉರ್‌ಲ್ಲ್ಯಾನ್ ಹಾಂವೆಂ ಸಂಸಾರಾಕ್ ಮ್ಹಜೆಸಂಗಿ ಕಿತೆಂ ಘಡ್ಲೆಂ ಆನಿ ಖಂಯ್ಚ್ಯೆ ರಿತಿನ್ ಘಡ್ಲೆಂ ಅಶೆಂ ತ್ಯಾ ಹೀನ್ ಕೃತ್ತ್ಯಾಚಿ ಕ್ರೂರತಾ ಪರತ್ ಪಿಂತ್ರಾಯ್ಜೆ ಪಡ್ತಾ. ಹಾಚೆವಿಶಿಂ ಹರ‍್ಯೇಕ್ ಪಾವ್ಟಿಂ ಉಲೊಂವ್ಕ್ ಪಡ್ತಾನಾ, ತಾಚೆಪ್ರಾಸ್ ಪಯ್ಲೆಂ ಹಾಂವ್ ಮರೊನ್ ಗೆಲ್ಲಿಂ ತರ್ ಬರೆಂ ಮ್ಹಣೊನ್ ಭೊಗ್ತಾ.

ಬಳಾತ್ಕಾರಾಕ್ ವೊಳಗ್ ಜಾಲ್ಲ್ಯಾ ವೆಕ್ತಿನ್ ಭೊಗ್ಚಿ ಆನ್ಯೇಕ್ ಮಾನಸಿಕ್ ಶಿಕ್ಶಾ – ಆಘಾತಾ ಉಪ್ರಾಂತ್ಲೊ ಆಕಾಂತ್. ಹಾಂತುಂ ಕುಡಿಕ್ ತಶೆಂ ಮತಿಕ್ ಬಾದಕ್ ಆಸ್ತಾ. ಕಾಳ್ಜಾಚೆ ಧಡ್ದಡೆ, ಘಾಮೆಂವ್ಚೆಂ, ಉಸ್ವಾಸ್ ಬಾಂದ್ಚೊ, ಲ್ಹಾನ್ ಆವಾಜಾಕ್‌ಯೀ ಉಡೊನ್ ಪಡ್ಚೆಂ ವಾ ಕಿಂಕ್ರಾಟ್ ಮಾರ‍್ಚಿ ಅಶೆಂ ಮತಿಚಿ ವೀದ್‌ವಾವ್ಳಿ ಜಾತಾ. ಹಿ ಸ್ಥಿತಿ ಚಲೆ ಆನಿ ದಾದ್ಲ್ಯಾಂಚ್ಯಾಕೀ ಚೆಡ್ವಾಂ ಆನಿ ಸ್ತ್ರೀಯಾಂಥಂಯ್ ಚಡಿತ್ ಮಾಪಾನ್ ದಿಸೊನ್ ಯೆತಾ. ಅತ್ತ್ಯಾಚಾರಾಚೊ ವಾ ತಾಕಾ ಸಂಂಬಂದ್ ಜಾಲ್ಲ್ಯಾ ಹರ‍್ಯೆಕಾ ಘಡಿತಾಕ್ ವಿಸ್ರೊಂಚೆಂ ವಾ ತೆಂ ಘಡಿತ್ ಉಡಾಸಾಕ್ ಯೆಂವ್ಚೆಂ, ಹರ‍್ಯೆಕ್ಲ್ಯಾಥಾವ್ನ್ ಪಯ್ಸ್ ವೆಚೆಂ ರಡ್ಣೆಂ ವಾ ಸಂಬಂದಿತ್ ಭೊಗ್ಣಾಂ ಉಣಿಂ ಜಾಂವ್ಚಿಂ, ಉತ್ರಾಂನಿ ಆನಿ ಕರ‍್ನ್ಯಾಂನಿ ಏಕಾಗ್ರತಾ ಉಣಿ ಜಾಂವ್ಚಿ, ನಿದೆಚೊ ಅಭಾವ್ ಆನಿ ಜಿಣಿಯೆಚ್ಯಾ ಆನಿ ದಿಸ್ಪೊಡ್ತ್ಯಾ ವಾವ್ರಾಂತ್ ಆಸಕ್ತ್ ಉಣೆಂ ಜಾಂವ್ಚಿ ಇತ್ಯಾದಿ ಲಕ್ಶಣಾಂ ದಿಸೊನ್ ಯೆತಾತ್.

ಅಶೆಂ ಅತ್ತ್ಯಾಚಾರ್ ವಾ ಲಂಯ್ಗಿಕ್ ಆಕ್ರಮಣ್ ಎಕಾ ವೆಕ್ತಿಚ್ಯೆ ಸಗ್ಳ್ಯೆ ಜಿಣಿಯೆಚಿ ವೀದ್‌ವಾವ್ಳಿ ಕರುನ್ ಘಾಲ್ತಾ. ತಿ ವಾ ತೊ ವೆಕ್ತಿ ಆಪ್ಣಾಚಿಚ್ ಶಾಥಿ, ವೆಕ್ತಿತ್ವ್ ವಿಸ್ರೊನ್, ಕೊರೊಡೊಂ ಜಣಾಂಚ್ಯಾ ಖೆಟಿಮದೆಂಯ್ ಎಕ್ಸುರಿ/ಎಕ್ಸುರೊ ಜಾತಾ. ದೆಕುನ್ ಅತ್ತ್ಯಾಚಾರ್ ಎಕೆ ಸ್ತ್ರೀಯೆಚ್ಯಾ ವಾ ದಾದ್ಲ್ಯಾಚ್ಯಾ ಕುಡಿಚ್ಯಾ  integrity  ಚೆಂ ಉಲ್ಲಂಘನ್. ದೆಕುನ್ ಅತ್ತ್ಯಾಚಾರಾಕ್ ವೊಳಗ್ ಜಾಲ್ಲ್ಯಾ ವೆಕ್ತಿಸಂಗಿ ರಾಂವ್ಚೆಂ, ತಾಂಚೆಂ ಶಾರೀರಿಕ್ ಆನಿ ಮಾನಸಿಕ್ healing ಪೂರ್ಣ್ ಜಾತಾಸರ್ ತಾಂಚ್ಯಾ ಭೊಗ್ಣಾಂಕ್, ಆಟೆವಿಟ್ಯಾಂಕ್ ಗವ್ರವ್ ದಿಂವ್ಚೊ ಆಮ್ಚಿ ಜವಾಬ್ದಾರಿ ತರ್, ಅತ್ತ್ಯಾಚಾರಿಕ್ ಕಾನೂನಾ ಪರ್ಮಾಣೆಂ ಶಿಕ್ಶಾ ದಿಂವ್ಚೆ ಆಮ್ಚೆಂ ಕರ್ತವ್ಯ್.

► ಡಯಾನ ಶರಲ್ ಲೋಬೊ