ಅನಿವಾಸಿ ಭಾರತೀಯ್ ಉದ್ಯಮಿ ಆನಿ ಕೊಂಕ್ಣಿ ಮೋಗಿ ಶ್ರಿ ಮೈಕಲ್ ಡಿಸೊಜಾ ಹಾಣಿ ತಾಂಚ್ಯಾ ‘ವಿಶನ್ ಕೊಂಕಣಿ’ ಕಾರ್ಯಕ್ರಮಾಖಾಲ್ ದಾಯ್ಜಿವಲ್ದ್ ಮೀಡಿಯಾಚ್ಯಾ ಫುಡಾರ್ಪಣಾರ್ ಕೊಂಕ್ಣಿ ಸಂಗೀತ್ ಶೆತಾಂತ್ ಪಯ್ಲೆಂ ಪಾವ್ಟ್ ಮ್ಹಣ್ಚೆಂ ತಸಲೆಂ ಏಕ್ ವಿಶೇಸ್ ಯೋಜನ್ ಜಾಹೀರ್ ಕೆಲಾಂ. ಹ್ಯಾ ಯೋಜನಾಖಾಲ್ ಚಲ್ಚ್ಯಾ ಸರ್ತೆಕ್ ಸಂಸಾರ್‌ಭರ್ ಥಾವ್ನ್ ಕೊಂಕ್ಣಿ ಪದಾಂ ಘಡ್ಣಾರಾಂನಿ ಪದಾಂ ದಾಡುನ್ ದಿವ್ಯೆತ್. ಪದಾಂತ್ ಉತ್ರಾಂ, ತಾಳೊ ಆನಿ ಸಂಗೀತ್ ಆಸೊಂಕ್ ಜಾಯ್. ಹ್ಯಾ ಸರ್ತೆಚೊ ಸಮಾರೋಪ್ ಸರ್ತೆಂತ್ ವಿಂಚುನ್ ಯೇವ್ನ್, ನಿರ್ಮಾಣ್ ಕೆಲ್ಲ್ಯಾ ನವ್ಯಾಚ್ ಪದಾಂಚ್ಯಾ ಸಂಗೀತ್ ಸಾಂಜೆಸವೆಂ ಜಾತಲೊ.
ಹ್ಯಾ ಯೆವ್ಹಣೆಚ್ಯಾ ರೆಗ್ರಾಂ ಪರ್ಮಾಣೆ ಸರ್ತೆಕ್ ಆಯಿಲ್ಲಿಂ ವಿಂಚ್ಣಾರ್ ಪದಾಂ ಸಂಗೀತ್ ನಿರ್ದೇಶಕಾಂಕ್ ತಾಳೆ ಬಸಂವ್ಕ್ ಆನಿ ಸಂಗೀತ್ ಸಜಂವ್ಕ್ ದಾಡುನ್ ದಿತೆಲೆ. ವಿಂಚ್ಣಾರ್ ಪದಾಂ ನಿರ್ಮಾಣ್ ಜಾಲ್ಲಿಂಚ್ ಸಂಗೀತ್ ಸಾಂಜ್ ಸಾದರ್ ಜಾತೆಲಿ. ಪದಾಂಚ್ಯಾ ವಿಶಯಾಚೆರ್ ನಿರ್ಮಾಣ್ ಸಂಸ್ಥೊ ಪದಾಂಕ್ ಆಕರ್ಶಕ್ ಚಿತ್ರಣ್ ತಯಾರ್ ಕರ್ತಲೊ. ಸರ್ತೆಕ್ ಆಯಿಲ್ಲಿಂ, ಪೂಣ್ ಸಂಗೀತ್ ಕಾರ್ಯಾವಳಿಕ್ ವಿಂಚುನ್ ಯೇನಾತ್ಲಿಂ ಪದಾಂ ‘ಪದಾಂ ಪುಂಜ್ಯಾಂ’ತ್ (LYRICS BANK) ಜಗವ್ನ್ ದವರ್ತೆಲೆ. ಫುಡಾರಾಂತ್ ಸಂಗೀತ್ ನಿರ್ದೇಶಕ್ ಆನಿ ನಿರ್ಮಾಪಕಾಂಕ್ ಹ್ಯಾ ಪದಾಂಚಿಂ ಗರ್ಜ್ ಪಡ್ತಾನಾ ಹಿಂ ಪದಾಂ ವಾಪಾರುಂಕ್ ಅವ್ಕಾಸ್ ಆಸ್ತಲೊ.
ಸರ್ತೆಂತ್ ಪಯ್ಲ್ಯಾ ಪಾಂವ್ಡ್ಯಾರ್ ವಿಂಚುನ್ ಆಯಿಲ್ಲ್ಯಾ ಪಂಚ್ವೀಸ್ ಪದಾಂ ಬರಯ್ಣಾರಾಂಕ್ ಎಕಾ ಪದಾಕ್ ರುಪಯ್ ಪಾಂಚ್ ಹಜಾರಾಂ ಲೆಕಾರ್ ಗವ್ರವ್ ಧನ್ ದಿತೆಲೆ. ಸರ್ತೆಚ್ಯಾ ದುಸ್ರ್ಯಾ ಪಾಂವ್ಡ್ಯಾರ್ ಸಂಗೀತ್ ಸಂಯೋಜಕಾಂಕ್ ಎಕಾ ಪದಾ ಪಾಟ್ಲ್ಯಾನ್ ರುಪಯ್ ಧಾ ಹಜಾರ್ ಗವ್ರವ್ ಧನ್ ಫಾವೊ ಜಾತೆಲೆಂ. ತಿಸ್ರ್ಯಾ ಪಾಂವ್ಡ್ಯಾರ್ ಪದಾಚ್ಯಾ ವಿಶಯಾಚೆರ್ ಹೊಂದೊನ್ ಗಾವ್ಪ್ಯಾಂಚಿಂ ವಿಂಚ್ಣುಕ್ ಜಾತೆಲಿ ಆನಿ ಮಾಂಚಿಯೆರ್ ಪದ್ ಸಾದರ್ ಕರ್ಚ್ಯಾ ಗಾವ್ಪ್ಯಾಂಕ್ ಸಂಗೀತ್ ಸಾಂಜೆಚ್ಯಾ ಸಾದರ್ಪಣ್ ನಿಯಮಾನುಸಾರ್ ಗವ್ರವ್ ಧನ್ ದಿತೆಲೆ.
‘ವಿಶನ್ ಕೊಂಕಣಿ’ ಅನಿವಾಸಿ ಭಾರತೀಯ್ ಉದ್ಯಮಿ ಆನಿ ದಾನಿ ಶ್ರೀ ಮೈಕಲ್ ಡಿ’ಸೊಜಾ ಹಾಂಚೆಂ, ಕೊಂಕ್ಣಿ ಭಾಶೆಚ್ಯಾ ಮೊಗಾನ್, ಕೊಂಕ್ಣಿ ಸಾಹಿತ್ಯ್ ಆನಿ ಕಲೆಕ್ ಪ್ರೋತ್ಸಾವ್ ದಿಂವ್ಚ್ಯಾ ನೇಕ್ ಇರಾದ್ಯಾನ್, ಜಲ್ಮಾಲ್ಲೆಂ ಚಿಂತ್ಪಾಬಾಳ್. ‘ ಮೈಕಲ್ ಡಿ’ಸೊಜಾ ವಿಶನ್ ಕೊಂಕಣಿ’ (MDVK) ಕಾರ್ಯಕ್ರಮಾಖಾಲ್ ಕೊಂಕ್ಣಿ ಸಾಹಿತ್ಯ್, ಸಂಗೀತ್ ಆನಿ ಸಾದರ್ ಕಲೆಕ್ ಫುಡ್ಲ್ಯಾ ವರ್ಸಾಂನಿ ಮೊಟೊ ತೆಂಕೊ ದಿಂವ್ಚೊ ನೇಕ್ ಇರಾದೊ ಆನಿ ಕೊಂಕ್ಣಿ ಭಾಸ್, ಸಾಹಿತ್ಯ್, ಕಲಾ, ಸಂಗೀತ್, ಸಿನೆಮಾ ಪ್ರಕಾರಾಂಚಿಂ ಬುನ್ಯಾದ್ ಘಟ್ ಕರ್ಚಿ ಆಲೊಚೆನ್ ಶ್ರೀ ಮೈಕಲ್ ಡಿ’ಸೊಜಾ ಹಾಂಕಾ ಆಸಾ. ವಿಶ್ವ ಕೊಂಕ್ಣಿ ಕೇಂದ್ರಾಚ್ಯಾ ಫುಡಾರ್ಪಣಾಖಾಲ್ ಫುಡ್ಲ್ಯಾ ಪಾಂಚ್ ವರ್ಸಾಂನಿ ಶೆಂಭೊರ್ ಕೊಂಕ್ಣಿ ಪುಸ್ತಕಾಂ ಫಾಯ್ಸ್ ಕರುಂಕ್ ಅನುದಾನ್ ದಿಂವ್ಚ್ಯಾ ಯೆವ್ಜಣೆಕ್ ಎದೊಳ್‌ಚ್ ಚಾಲನ್ ದಿಲಾಂ.
ವಿಶನ್ ಕೊಂಕಣಿ, ಪದಾಂ ಸರ್ತೆಚಿಂ ನಿಯಮಾಂ ಹೆ ಪರಿಂ ಆಸಾತ್ –
- ಫಕತ್ ಕೊಂಕ್ಣಿ ಪದಾಂಕ್ ಮಾತ್ ಸರ್ತೆಕ್ ಅವ್ಕಾಸ್
- ಎಕೊಡಿಂ ವಾ ದೊಡಿಂ ಪದಾಂ ಧಾಡುನ್ ದಿವ್ಯೆತ್ ( ತೊ -ತಿ / ತೊ -ತೊ / ತಿ -ತಿ )
- ಎಕಾ ಪದಾಂ ಬರಯ್ಣಾರಾನ್ ಕಿತ್ಲೀಂಯ್ ಪದಾಂ ಧಾಡುನ್ ದಿವ್ಯೆತ್. ನಿರ್ಬಂದ್ ನಾ.
- ವಿಶಯಾಚೆರ್ ಹೊಂದೊನ್ ವರಯ್ಣಾರ್ ಪದಾಂ ವಿಂಚ್ತಲೆ.
- ಸರ್ತೆಂತ್ ವಿಂಚುನ್ ಆಯಿಲ್ಲಿಂ 25 ಪದಾಂ ಸಂಗೀತ್ ಸಾಂಜೆಂತ್ ಸಾದರ್ ಜಾತೆಲಿಂ.
- ಪಯ್ಲ್ಯಾ ಪಾಂವ್ಡ್ಯಾರ್ 25 ಪದಾಂಕ್ ರುಪಯ್ 5,000/- ಲೆಕಾನ್ ಗವ್ರವ್ ಧನ್ ಫಾವೊ ಜಾತಾಲೆಂ.
- ಪದಾಂ ಪಾಟಂವ್ಕ್ ನಿಮಾಣಿ ತಾರಿಕ್ 15 ಎಪ್ರಿಲ್ 2023
- ಸರ್ತೆಂತ್ ವಿಂಚುನ್ ಆಯಿಲ್ಲ್ಯಾ ಪದಾಂಚಿಂ ಹಕ್ಕಾಂ ದಾಯ್ಜಿವಲ್ಡ್ ಮೀಡಿಯಾ ಪ್ರೈ ಲಿಮಿಟೆಡ್ ಹಾಂಚಿ ಜಾವ್ನಾಸ್ತೆಲಿಂ.
- ಪದಾಂ ದಾಡುಂಕ್ ಇಮೇಯ್ಲ್ ವಿಳಾಸ್ konkanilyrics2023@gmail.com