ಸಿಂತಿಮೆಂತಾಂಚ್ಯಾ ಚಿಂತ್ನಾಂ ಥಾವ್ನ್ ಭಾಯ್ರ್ ಯೆವ್ಯಾಂ

ಆರ್ಸೊ , ಮಾರ್ಚ್ 2023 ರ್ ಪಾಯ್ಸ್ ಜಾಲ್ಲೆಂ ತುಜೆಂ ಸಂಪಾದಕಿಯ್ ‘ಪೊಯೆಟಿಕಾ ಕವಿಗೋಶ್ಟಿ-ಥೊಡೆ ವಿಚಾರ್ ‘ ಪೊಯೆಟಿಕಾ ಪಂಗ್ಡಾಚ್ಯಾ ಕವಿಗೋಶ್ಟಿಂ ವಯ್ರ್ ಬೊರಯಿಲ್ಲೆಂ ವ್ಹಯ್ ತರೀ ಸದ್ದ್ಯಾಚ್ಯಾ ಕೊಂಕ್ಣಿ ಸಾಹಿತ್ಯ್ ಸಂಸಾರಾಂತ್ ಜೆರಾಲ್ ಥರಾನ್ ಘಡೊನ್ ಆಸ್ಚ್ಯಾ ಸಂಗ್ತಿಂ ವಯ್ರ್ ಧರ್‌ಲ್ಲೊ ಆರ್ಸೊ ಜಾವ್ನಾಸಾ. ಪಯ್ಲ್ಯಾನ್ ಪಯ್ಲೆಂ ಮ್ಹಾಕಾ ಮಾಹೆತ್ ಆಸ್‍ಲ್ಲ್ಯಾ ಬರಿ ‘ಪೊಯೆಟಿಕಾ’ ಪಂಗ್ಡಾಂತ್ ಆಸ್ಚೆ ಚಡ್ತಿಕ್ ಸಾಂದೆ ‘ಪೊಯೆಟಿಕ್ಸ್’ ಪಂಗ್ಡಾಂತ್ ಆಸ್‍ಲ್ಲೆಚ್ಚ್ ಆಸ್ತಾಂ, ತಾಂತ್ಲ್ಯಾಚ್ ಸಾಂದ್ಯಾಂಕ್ ಘೆವ್ನ್ ಆನ್ಯೇಕ್ ಗ್ರೂಪ್ ಘಡ್ಚಿ ಆವಶ್ಯಕತಾ ಕಿತ್ಯಾಕ್ ಉದೆಲಿ ? ತೆಂ ಏಕ್ ಸವಾಲ್‍ಚ್ ಜಾವ್ನ್ ಉರ್ಲಾಂ ತರೀ, ಆಸೊಂದಿ ತೆಂ… ಹರ್ಯೆಕ್ಲ್ಯಾಚಿಂ ಚಿಂತ್ನಾಂ , ಆಲೋಚನ್ಯೊ ವಿಂಗಡ್ ವಿಂಗಡ್ ಆಸ್ತಾನಾ ತಾಕಾ ಗೌರವ್ ದಿವ್ಯಾಂ.

ಪೊಯೆಟಿಕಾ – ಪಂಗ್ಡಾಚ್ಯೊ ಹರ್ಯೆಕ್ ಕವಿಗೋಶ್ಟಿ ಜ್ಯೊ ಯೂ ಟ್ಯೂಬ್ ಚಾನೆಲಾಚೆರ್ ಪಾಯ್ಸ್ ಜಾಲ್ಲ್ಯೊ ಹಾಂವೆ ಸಂಪೂರ್ಣ್ ಪಳೆಲ್ಯಾತ್. ಫಕತ್ತ್ ಕವಿತೆಂಚ್ಯಾ ಆನಿ ಎಲ್ಯೆರ್, ನವೀನ್ ಪಿರೇರ್, ಆನಿಲ್ ಪೆರ್ನಾಲ್ , ಜೊಸ್ಸಿ ಪೀಂತ್ ತಶೆಂ ಆನಿ ಥೊಡ್ಯಾ ಹಾಂವೆ  ಮಾನ್ ದಿಂವ್ಚ್ಯಾ ಕವಿಂಚಿಂ ಉಂಚ್ಲಿಂ ರಚನಾಂ ಆಯ್ಕೊಂಕ್. ತುಂವೆ ಸಾಂಗ್‍ಲ್ಲ್ಯಾ ಬರಿ ಸರ್ವ್ ಕವಿಂಕ್ ಅವ್ಕಾಸ್ ಮೆಳೊಂಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ‘ಪೊಯೆಟಿಕಾ’ ಪಂಗ್ಡಾಚ್ಯಾ ವಾಂಗ್ಡ್ಯಾಂನಿ ಆಸಲೆಂ ಏಕ್ ಪ್ರಯತ್ನ್ ಕೆಲಾಂ ತೆಂ ಖಂಡಿತ್. ತ್ಯಾ ದೆಕುನ್ ಕವಿತಾ ಕ್ಷೇತ್ರ್ ಗಿರೆಸ್ತ್ ಕರ್ಚ್ಯಾ ಉದ್ದೇಶಾನ್ ಆಸಲೆಂ ಮೇಟ್ ಘೆತ್‍ಲ್ಲ್ಯಾ ‘ಪೊಯೆಟಿಕಾ’ ಪಂಗ್ಡಾಕ್ ಉಲ್ಲಾಸ್ ಫಾವೊ ತರೀ,  ಹ್ಯಾ ತಾಂಚ್ಯಾ ವಾವ್ರಾ ಪಾಟ್ಲ್ಯಾನ್ ತಾಣಿಂ Basic ಕಾಮ್ ಕೆಲ್ಲೆಂ ದಿಸಾನಾ. ಸೂತ್ರ್‌ದಾರ್ ಆಸ್ತಾತ್ ತರೀ ತಾಂಚೊ ವಾವ್ರ್ ಕೇವಲ್ ಕವಿ/ಕವಯಿತ್ರಿಂಚಿಂ ನಾಂವಾಂ ಉಲೊ ಮಾರ್ನ್ ತಾಂಕಾಂ ವೆದಿಕ್ ಆಪೊಂವ್ಚ್ಯಾಕ್ ಸೀಮಿತ್ ಜಾವ್ನಾಸ್ತಾ ಶಿವಾಯ್ ತಾಂಚ್ಯಾ ಲಾಗಿಂ ದೋನ್ ಉತ್ರಾಂ ಉಲೊಂವ್ಚ್ಯಾಂತ್ ಜಾಂವ್ದಿ , ಕವಿತೆಚೆಂ ಪಾಟ್‍ಥಳ್ ಜಾಣಾ ಜಾಂವ್ಚ್ಯಾ ವಿಶಿಂ ಜಾಂವ್ದಿ ಕಿತೆಂಚ್ ಪ್ರಕ್ರಿಯಾ ಜಾಲ್ಲಿ ದಿಸಾನಾ. ಪರಿಣಾಮ್ ಜಾವ್ನ್ ಚಡ್ತಿಕ್ ಕವಿ/ಕವಯಿತ್ರಿ ಯಾಂತ್ರಿಕ್ ರಿತಿನ್ ಕವಿತಾ ವಾಚುಂಕ್ ಯೆತಾತ್ ಆನಿ ವೆತಾತ್.

ಇತ್ಲ್ಯಾ ಕವಿಗೋಶ್ಟಿಂನಿ ಹರ್ಯೆಕ್ ಪಾವ್ಟಿಂ ಮ್ಹಳ್ಳ್ಯಾಬರಿ ಕವಿ/ಕವಯಿತ್ರಿಂನಿ ಕವಿತಾ ವಾಚ್ಲ್ಯಾರಿ ಕವಿತಾಂಚ್ಯಾ ಗುಣ್‍ಮಟ್ಟಾಂತ್ ಜಾಂವ್ದಿ , ಪ್ರಸ್ತುತ್ ಕರ್ಚ್ಯಾ ಶೈಲೆಂತ್ ಜಾಂವ್ದಿ ಕಿತೆಂಚ್ ಬದ್ಲಾವಣ್ ಝಳ್ಕಾನಾ. ಹೆಂ ಸಾದ್ಯ್ ಜಾತಾ … ಜೆದ್ನಾಂ ಕವಿತಾ ವಾಚುಂಕ್ ಕವಿ/ಕವಯಿತ್ರಿಂಚಿ ಖತಡ್ ಕರಿನಾಸ್ತಾನಾ, ತಾಂಚೊ ಸಂಖೊ 10-15 ಜಣಾಂಕ್ ಸೀಮಿತ್ ಕರುನ್ ತಾಂಕಾಂ ಸಾರ್ಕೆಂ ಮಾರ್ಗದರ್ಶನ್ ದಿಲ್ಲ್ಯಾ ವೆಳಾರ್ ಮಾತ್ರ್. ಏಕ್ ದಾಕ್ಟುಲೆಂ ಉದಾಹರಣ್ ದೀಂವ್ ತರ್ ಹಾಂಗಾ ದುಬಾಯಾಂತ್ ಹಿಂದಿ/ಉರ್ದು ಕವಿಗೋಶ್ಟಿ ಜಾತಾತ್. ಕವಿ/ಕವಯಿತ್ರಿ 10-12 ಜಣಾಂಕ್ ಸೀಮಿತ್. ಖತಡ್ ನಾ. 3000 ಥಾವ್ನ್ 5000 ಲೋಕ್. ರಾತಿಂಚ್ಯಾ 9 ವ್ಹರಾರ್ ಕವಿಗೋಶ್ಟಿ ಆರಂಭ್ ಜಾಲ್ಯಾರ್ ಸಕಾಳಿಂಚ್ಯಾ 4 ವ್ಹರಾಂ ಪರ್ಯಾಂತ್ ಚಲ್ತಾತ್ ತರೀ ಬಸ್‍ಲ್ಲೊ ಲೋಕ್ ಹಾಲಾನಾ. ಇತ್ಲ್ಯಾ ವ್ಹಡ್ ಮಟ್ಟಾರ್ ಕರುಂಕ್ ಆಮ್ಚ್ಯಾ ಲಾಗಿಂ ಸದ್ದ್ಯಾಕ್ ಸಾಧ್ಯ್ ನಾಂ ತರೀ ತಸಲೆಂ ಏಕ್ ರೂಪ್ ದೀಂವ್ಕ್ ಪ್ರಯತ್ನ್ ಕರ್ಚ್ಯಾಂತ್ ಕಿತೆಂಚ್ ಚೂಕ್ ನಾ.

ಕವಿತಾ ಬೊರೊಂವ್ಚಿ , ಪ್ರಸ್ತುತ್ ಕರ್ಚಿ ಏಕ್ ನಿರಂತರ್ ಪ್ರಕ್ರಿಯಾ. ಹಾಕಾ ಆರಂಭ್ ಆಸಾ ಪುಣ್ ಆಂತ್ಯ್ ನಾ. ಹರ್ಯೆಕ್ ಪಾವ್ಟಿಂ ನವೆ ನವೆ ಆನ್ಭೊಗ್ , ನವೆಂ ನವೆಂ ಶಿಕೊಂಕ್ ಆಸ್ತಾ. ಜಾಂವ್ದಿ ತೊ ಮೆಲ್ವಿನ್ ಲುದ್ರಿಗ್, ಆಂಡ್ರ್ಯೂ ಡಿ’ಕುನ್ಹಾ, ಎಲ್ಯೆರ್ ತಾಕೊಡೆ, ವಿಲ್ಸನ್ ಕಟೀಲ್ ವಾ ಹಾಲಿಂಚ್ ನವೆಂಚ್ ಬೊರೊಂವ್ಕ್ ಆರಂಭ್ ಕೆಲ್ಲೊ ಕವಿ.

ಏಕ್ ಮ್ಹಾಕಾ ಬೊರೆಂ ಲಾಗ್ಲೆಂ. ಹ್ಯಾ ಪಂಗ್ಡಾಂತ್ಲ್ಯಾ ಚಡ್ತಿಕ್ ಕವಿ/ಕವಯಿತ್ರಿಂಕ್ ಹಾಂವ್ ಜಾಣಾ ಆಸ್‍ಲ್ಲ್ಯಾನ್ ತಾಂಚಿ ಕವಿತಾ ಆಯ್ಕೊನ್ ಮ್ಹಜೆ ವಿಚಾರ್ ತಾಂಕಾಂ ಸಾಂಗ್‍ಲ್ಲ್ಯಾಕ್ ಉಗ್ತ್ಯಾ ಮನಾನ್ ತೆ ತಾಣಿಂ ಸ್ವಿಕಾರ್ ಕೆಲ್ಯಾತ್ ಮಾತ್ರ್ ನ್ಹಂಯ್ ಆಸ್ತಾಂ ಆಮ್ಕಾಂ ಆಶೆಂ ಕೊಣಿಂ ಸಾಂಗೊಂಕ್ ಯಾ ತಿದ್ವುಂಕ್ ನಾ ಮ್ಹಣೊನ್ ಸಯ್ತ್ ಥೊಡ್ಯಾಂನಿ ಸಾಂಗ್‍ಲ್ಲೆಂ ಆಸಾ. [ ತಶೆಂ ಮ್ಹಣೊನ್ ಹಾಂವ್ ಕಾಂಯ್ ಕವಿತಾ ಕ್ಷೇತ್ರಾಂತ್ಲೊ ಸಂಪೂರ್ಣ್ ಜಾಣಾರಿ ನ್ಹಂಯ್]

ಆನ್ಯೇಕ್ ತುವೆಂ ದಾಕಯಿಲ್ಲೊ ಹುಸ್ಕೊ ಜಾವ್ನಾಸಾ ‘ಸ್ಪೊನ್ಸರ್‌ಶಿಪ್’. ಕೊಣಿ ಕಿತೆಂಯ್ ಕಾರ್ಯೆಂ ಸ್ಪೊನ್ಸರ್ ಕರ್ತಾತ್ ತರ್ ತೊ ತಾಚೊ ಪ್ರತಿಫಳ್ ಆಶೆತಾ. ಹೆಂ ಆಮ್ಚ್ಯಾ ಕೊಂಕ್ಣೆಚ್ಯಾ ಮಟ್ಟಾಕ್ ತದ್ವಿರುದ್ದ್ ವ್ಹಯ್ ತರೀ ಕೊಂಕ್ಣಿ ಕಾರ್ಯಾಂಕ್ ಹಾಜರ್ ಆಸ್‍ಲ್ಲ್ಯಾ ಲೋಕಾಕ್ ತರೀ ಬೊರೆಂ ಮನೊರಂಜನ್ , ಜಾಣ್ವಾಯ್ ಮೆಳೊಂಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಕಾರ್ಯೆಂ ಸ್ಪೊನ್ಸರ್ ಕರ್ತಾತ್. ತಶೆಂ ಜಾಲ್ಲ್ಯಾನ್ ಕಾರ್ಯೆಂ ಸಾದರ್ ಕರ್ತೆಲ್ಯಾಂಕ್ ಸಂಪೂರ್ಣ್ ಜವಾಬ್ದಾರಿ ಬಾಂದ್ತಾ ಕೀ ಕೊಣ್ ಮಾಯೆಚ್ಯಾ ಪುತಾನ್ ದಿಲ್ಲ್ಯಾ ತಾಚ್ಯಾ ಘಾಮಾಂಚ್ಯಾ ಪಯ್ಶಾಂಕ್ ಸಂಪೂರ್ಣ್ ರಿತಿನ್ ನ್ಯಾಯ್ ದಿಂವ್ಚ್ಯಾಬರಿ ಕಾರ್ಯಾಚಿ ರೂಪ್‍ರೇಖಾ ಆಸಾ ಕರ್ಚಿ.

ತುಜೆಂ ಸಂಪಾದಕೀಯ್ ವೈಯುಕ್ತಿಕ್ ಜಾವ್ನ್ ಘೆನಾಸ್ತಾನಾ , ತ್ಯಾ ಗಜಾಲಿಂ ವಯ್ರ್ ಉಜ್ವಾಡ್ ಪಳೆಂವ್ಚೊ ಹರ್ಯೆಕಾ ಕವಿ/ಕವಯಿತ್ರಿಕ್ ಆಜ್ ಚಡ್ ಗರ್ಜ್ ಆಸಾ. ಆಯ್ಚ್ಯಾ ಆಧುನಿಕ್ ತಂತ್ರ್‌ಜ್ಞಾನ್ ಯುಗಾಚೆಂ ಸಾಹಿತಿಕ್ ದುರಾದೃಷ್ಟ್ ಮ್ಹಳ್ಳ್ಯಾರ್ ಸರ್ವ್ ಕವಿ/ಕವಯಿತ್ರಿ ಸಾರ್ಕಿಂಚ್. ಕಿತೆಂಯ್ ಮನಾಕ್ ಆಯಿಲ್ಲೆಂ ಗಿಚ್ಚಿಲೆಂ ಆನಿ ಸಾಮಾಜಿಕ್ ಜಾಳಿ ಜಾಗ್ಯಾಂನಿ ತೆಂ ಪೊಸ್ಟ್ ಕೆಲೆಂ. ಇಷ್ಟಾಂ-ಮಂತ್ರಾಂಚೆಂ ಆನಿ ಕುಟ್ಮಾಧಾರಾಂಚೆ ಥೊಡೆ ಲಾಯ್ಕ್ಸ್ ಆನಿ ಥೊಡೆ Very Good ಕಮೆಂಟ್ಸ್ ಆಯ್ಲ್ಯಾರ್ ಪಾವ್ತಾ. ಆಸಲ್ಯಾಂಕ್ ಉಪ್ರಾಂತ್ ಸರ್ಗಾಕ್ ದೊನ್ಂಚ್ ಗೇಣ್. ಉಪ್ರಾಂತ್ ಆಸಲ್ಯಾಂಕ್ ಕಿತೆಂಯ್ ಸಾಂಗ್ಲ್ಯಾರೀ “ಆಮ್ಕಾಂ ಇತ್ಲೆ ಲಾಯ್ಕ್ಸ್ ಆಯ್ಲ್ಯಾತ್, ಇತ್ಲೆ ಕಮೆಂಟ್ಸ್ ಆಯ್ಲ್ಯಾತ್. ಸಾರ್ಕೆಂ ನಾ ಮ್ಹಣೊನ್ ಕಶೆಂ ಸಾಂಗ್ತಾಯ್ ????” ಮ್ಹಣೊನ್ ಆಮ್ಕಾಂಚ್ ಉಲ್ಟೆಂ ಸವಾಲ್!

ಆಸಲ್ಯಾಂಚ್ಯಾ ಮೆಳಿಂತ್ ಸೆರ್ವಾತಾತ್ ದುಸ್ರ್ಯಾಂಚಿಂ ಉತ್ರಾಂ ಆಸಾ ತಶಿಂ ಕೊಪಿ ಕರುನ್ ಉಪ್ರಾಂತ್ ಆಪ್ಲಿಚ್ ಕವಿತಾ ಮ್ಹಣ್ತೆಲೆ. ಹ್ಯಾ ವರ್ಗಾಕ್ ಸೆರ್ವೊಂಚೆ ಕವಿ/ಕವಯಿತ್ರಿ ಆಪ್ಲ್ಯಾ ಕವಿತಾಂಚೊ ಸಂಖೊ 1000 ಕ್ ಮಿಕ್ವಾಲೊ ಮ್ಹಣೊನ್ ಧಾಂಗ್ರೊ ಫುಲಾಯ್ತಾತ್ ಮಾತ್ರ್ ನ್ಹಂಯ್ ಆಸ್ತಾಂ ಆಪ್ಲ್ಯಾ ಆಭಿಮಾನಿಂನಿ ಆಪ್ಣಾಕ್ ಮಾನ್ ದೀವ್ನ್ ಕವಿತಾ ಬೊರಯ್ಲ್ಯಾ ಮುಣೊನ್ ಖುದ್ದ್ ಬೊರೊವ್ನ್ ಪಾಯ್ಸ್ ಕರ್ಚೆಂ ವಿಶೇಸ್ ಸಾಹಸ್ ಕರ್ತಾತ್. ಪುಣ್ ಸಗ್ಳ್ಯಾ So called ಕವಿತೆಂತ್ ವಿಲ್ಫಿ ರೆಬಿಂಬಸ್ ಹಾಚ್ಯಾ ಪದಾಂಚ್ಯೊ ದೋನ್ ವ್ಹೊಳಿ, ಶೆಂಬೊರ್ ಕಂತಿಗ್ಯೊ ಬುಕಾಂತ್ಲ್ಯೊ ಥೊಡ್ಯೊ ವ್ಹೊಳಿ ಆನಿ ಕೊಂಕ್ಣಿ ಭಕ್ತಿಕ್ ಗಿತಾಂ ಬುಕಾಂತ್ಲ್ಯೊ ಥೊಡ್ಯೊ ವ್ಹೊಳಿ ಘಾಲ್ನ್ ತಾಕಾ ಕವಿತಾಚೆಂ ರೂಪ್ ದಿಲ್ಯಾರ್ ಲೋಕ್ ಪಾತ್ಯೆನಾ ಮ್ಹಳ್ಳೆಂ ಕನಿಷ್ಟ್ ಜ್ಞಾನ್ ಸಯ್ತ್ ಹಾಂಕಾ ನಾ.

ಆಸಲೆಂಚ್ ಏಕ್ ಘಡಿತ್ ಘಡ್ಲೆಂ ತುಜೆಂ ಸಂಪಾದಕಿಯ್ ಪರ್ಗಟ್ ಜಾಲ್ಲ್ಯಾ ಉಪ್ರಾಂತ್. ‘ಪೊಯೆಟಿಕಾ’ ಪಂಗಡ್ ಆನಿ ‘ದಿವೊ’ ಪತ್ರಾನ್ ಸಾಂಗಾತಾ ಮೆಳೊನ್ ಆಸಾ ಕೆಲ್ಲ್ಯಾ ಕವಿತಾ ಸ್ಪರ್ದ್ಯಾಂತ್ ಬಾಪಯ್ ವಿಶಿಂ ಬೊರಯ್ಲೆಲಿ ಏಕ್ ಕವಿತಾ ಜಿ ತೆಲುಗು ಮುಳಾಚಿ ಆನಿ ಹಿಂದಿ ತಶೆಂಚ್ ಕನ್ನಡಾಂತ್ ಆನುವಾದಿತ್ ಕೆಲ್ಲಿ ಆಮ್ಚ್ಯಾ ಕವಿನ್ ಆಪ್ಲಿ ಸ್ವಂತ್ ಕವಿತಾ ಮ್ಹಣೊನ್ ಸ್ಪರ್ದ್ಯಾಕ್ ದಾಡ್‍ಲ್ಲಿ ಮಾತ್ರ್ ನ್ಹಂಯ್ ಆಸ್ತಾಂ ಪ್ರಥಮ್ ಬಹುಮಾನಾಕ್ ಪ್ರಾಪ್ತ್ ಜಾಲಿ. ವಿಷಯ್ ಭಾಯ್ರ್ ಪಡ್‍ಲ್ಲೊಚ್ ಕವಿ ಆನಿ ಸಂಘಟಕಾಂನಿ ಆಪ್ಲಿ ಚೂಕ್ ಮಾನುನ್ ಘೇವ್ನ್ , ಬಹುಮಾನ್ ಪಾಟಿಂ ದೀವ್ನ್ ಹೆರ್ ಆರ್ಹ್ ಕವಿ/ಕವಯಿತ್ರಿಂಕ್ ಬಹುಮಾನ್ ದೀವ್ನ್ ಹ್ಯಾ ವಿಶಯಾಕ್ ಥಂಯ್ಚ್ ಪೂರ್ಣ್ ವಿರಾಮ್ ದಿವ್ಯೆತ್ ಆಸ್‍ಲ್ಲೊ. ಪುಣ್ ಆಮಿ ಸಿಂತಿಮೆಂತಾನಿ ಜಿಯೆಂವ್ಚಿ ಪರ್ಜಾ. ತ್ಯಾ ದೆಕುನ್ ಸರ್ವ್ ಸಾಂಗಾತಿ ಆಮಿ ಏಕ್ ಮ್ಹಳ್ಳ್ಯಾಬರಿ ತುವೆಂ ದಿಲ್ಲಿ ಆಭಿಪ್ರಾಯ್/ಸಲಹಾ ಸಾರ್ಕಿ ವಾಚಿನಾಸ್ತಾನಾ ಮೊಸ್ರಾನ್ ಬೊರಯ್ಲ್ಯಾಯ್ ಮುಳ್ಳ್ಯಾಬರಿ ‘ಆರ್ಸೊ’ ಪತ್ರಾ ವಯ್ರ್ ಉತ್ರಾಂಚೊ ಪ್ರಹಾರ್ ಕರುಂಕ್ ಲಾಗ್ಲೆ. ಕೋಣ್ ಆಭಿಪ್ರಾಯಾಂ ಮುಕಾಂತ್ರ್, ಕೋಣ್ ಕವಿತಾ ಮುಕಾಂತ್ರ್ ತರ್ ಆನಿ ಕೋಣ್ ಬಾಯ್ಭಲ್ ಮುಕಾಂತ್ರ್. ಬಾಯ್ಬಲಾಕ್ ಆದಾರ್ ದವರ್ನ್ ಬೊರಯಿಲ್ಲ್ಯಾ ಮಹಾನುಭಾವಾನ್ ಕವಿತಾ, ಜಿಣಿಯೆ ಕಥಾ ಆನಿ ಇತಿಹಾಸ್ ಹಾಂಚೆ ಮದ್ಲೊ ತಫಾವತ್ ಜಾಣಾ ಜಾಂವ್ಕ್ ಪ್ರಯತ್ನ್ ಸಯ್ತ್ ಕರುಂಕ್ ನಾ. ಬಾಯ್ಬಲ್ ಚಾರ್ ವಾಂಜೆಲಿಸ್ತಾಂನಿ ಎಕ್‍ಚ್‍ಲಾಗಿಂ ಬಸೊನ್ ಬೊರೊಂವ್ಕ್ ನಾ ತರೀ ವಿಶಯ್ ತಾಳ್ ಪಡ್ತಾತ್ ಮ್ಹಳ್ಳೆಂ ಶತಮಾನಾಂಚೆಂ ಮಹಾ ಫೈಸಲ್ ದಿಲೆಂ. ಹೆಂ ಕೊಣೆಂ ಬೊರಯ್ಲೆಂ ತಾಚ್ಯಾ ಗಮನಾಕ್ ಹಾಡುಂಕ್ ಆಶೆತಾಂ ಕೀ ಚಾರ್ ನ್ಹಂಯ್ ಶೆಂಬೊರ್ ವಾಂಜೆಲಿಸ್ತ್ ಆಸ್‍ಲ್ಲೆ ತರೀ ತಾಣಿಂ ಸರ್ವಾಂನಿ ಜೆಜು ಮರಿಯೆಚ್ಯಾ ಉದರಿಂ ಜಲ್ಮಾಲೊ, ತಾಕಾ ಖುರ್ಸಾರ್ ಮಾರ್ಲೊ ಆನಿ ತಿಸ್ರ್ಯಾ ದಿಸಾ ತೊ ಜಿವಂತ್ ಜಾಲೊ ಹೆಂಚ್ ಬರಯ್ಜೆ ಶಿವಾಯ್ ಕಾಂಯ್ ತರೀ ದುಸ್ರೆಂ ಬೊರಂವ್ಕ್ ಜಾತಾಗಿ ?  ಕಿತ್ಯಾಕ್ ಮ್ಹಳ್ಳ್ಯಾರ್ ಬಾಯ್ಬಲ್ ಏಕ್ ಇತಿಹಾಸ್, ಚೊರ್ಲೆಲಿ ಕವಿತಾ ನ್ಹಂಯ್.

ಹೆಂ ಸರ್ವ್ ಜಾಲ್ಲ್ಯಾ ಉಪ್ರಾಂತ್ ಮಿತ್ರ್ ಗ್ಲ್ಯಾಡ್ಸನ್ ಆಲ್ಮೇಡಾ ಹಾಣೆಂ ಮೂಳ್ ಕವಿಕ್ ಉಗ್ತೆ ಆಸ್ಚ್ಯಾ ಕಾನೂನಾಂಚ್ಯಾ ದಾರ್ವಾಟ್ಯಾಂ ವಯ್ರ್ ಉಜ್ವಾಡ್ ಫಾಂಕಯ್ಲ್ಯಾ ಉಪ್ರಾಂತ್ ಥೊಡ್ಯಾಂ ಥಾವ್ನ್ ಆಪ್ಲೊ ಹ್ಯಾ ವಿಶಯಾಚೆರ್ ಹೊ ಲಾಸ್ಟ್ ಪೊಸ್ಟ್ ಮ್ಹಳ್ಳೊ ಷರೊ ಆಯ್ಲೊ. ಬಹುಮಾನ್ ವಿಜೇತಾನ್ ಬಹುಮಾನ್ ಪಾಟಿಂ ದಿಲೆಂ. ಆಪ್ಣಾಕ್ ಕಾಮಾಚ್ಯಾ ಒತ್ತಡಾನ್ ಪ್ರತಿಕ್ರಿಯಾ ದೀಂವ್ಕ್ ವೇಳ್ ಜಾಲ್ಲ್ಯಾಕ್ ವಿಷಾದ್ ಉಚಾರ್ಲೊ. [ವಿಶೇಷ್ ಮ್ಹಳ್ಳ್ಯಾರ್ ತುಜೆಂ ಸಂಪಾದಕೀಯ್ ಫಾಯ್ಸ್ ಜಾಲ್ಲ್ಯಾ ದೋನ್ ದಿಸಾಂ ಭಿತರ್ ಆರ್ಸ್ಯಾಕ್ ಯೆಟುನ್ ಕವಿತಾ ಬೊರೊಂವ್ಕ್ ತಾಕಾ ಕಾಮಾಂಚೊ ಒತ್ತಡ್ ನಾತ್‍ಲ್ಲೊ, ವೇಳ್ ಸಯ್ತ್ ದರಬಸ್ತ್ ಆಸ್‍ಲ್ಲೊ]. ಮಾತ್ರ್ ನ್ಹಂಯ್ ಆಸ್ತಾಂ ಇನಾಮ್ ಸ್ವ-ಖುಶೆನ್ ಪಾಟಿಂ ಸೊಡ್ತಾಂ ಮುಣೊನ್ ಜಾಹಿರ್ ಕೆಲೆಂ. ತ್ಯಾಚ್ ವೆಳಾರ್ ‘ಪೊಯೆಟಿಕಾ’ ಆಡ್ಮಿನ್ ಮಾನೇಸ್ತ್ ನವೀನ್ ಪಿರೇರಿನ್ ಆಪ್ಲ್ಯಾ Face Book Wall ವಯ್ರ್ ‘ತಿ ಕವಿತಾ ಇತರ್ ಜಾಯ್ತ್ಯಾ ಭಾಸಾಂನಿ ಆನುವಾಧಿತ್ ಕೆಲ್ಲಿ ಪ್ರಚಾರಾರ್ ಆಸಾ ಮುಣೊನ್ – ಕವಿತೆಚೊ ವೊಳಿ, ಕವಿತೆಚೊ ಆತ್ಮೊ ಎಕ್‍ಚ್ ಲೇಕ್ ಆಸಾ ಜಾಲ್ಲ್ಯಾನ್ ತ್ಯೊ ವಿವಿಂಗಡ್ ಕವಿತಾ ಮ್ಹಣ್ಚೆಂ ಆಸಾಧ್ಯ್. ಆಮಿಂ ತೆಂ ಇನಾಮ್ ರದ್ದ್ ಕೆಲಾಂ.’ ಮ್ಹಳೆಂ.

ಹಾಂಗಾ ಮ್ಹಾಕಾ ಟೆನ್ಶನ್… ಕವಿ ಲಿಗೊರಿ ಮ್ಹಣ್ತಾ ‘ಇನಾಮ್ ಸ್ವ-ಖುಶೆನ್ ಪಾಟಿಂ ಸೊಡ್ಲಾಂ’ ಆನಿ ನವೀನ್ ಮ್ಹಣ್ತಾ ‘ಇನಾಮ್ ರದ್ದ್ ಕೆಲಾಂ.’ ಮುಕಾರಿಂ ನವೀನ್ ಮ್ಹಣ್ತಾ ಖಂಚ್ಯಾ ಇಸ್ವೆಂತ್ ಬರಯಿಲ್ಲಿ ಮ್ಹಣೊನ್ ಕವಿಕ್ ನಿಖರಾಯೆನ್ ಕಳಿತ್ ನಾತ್‍ಲ್ಲೆಂ ಆನಿ ಕವಿ ಲಿಗೊರಿ ಮುಣ್ತಾ ‘ಹಿ ಕವಿತಾ ಹಾಂವೆಂ ಚಡುಣೆಂ ದೇಡ್ ವರ್ಸಾ ಆದಿಂ ಮ್ಹಜ್ಯಾಚ್ ಮತಿಂತ್ ಉದೆಲ್ಲೆ ಕೊಂಕ್ಣಿ ಶಭ್ಧ್ ವಾಪಾರ್ನ್ ಲಿಖ್ಲೆಲಿ.’ ತಶೆಂ ಆಸ್ತಾಂ ಹಿಂದಿ ಆನಿ ಕನ್ನಡ ಕವಿತಾ ದೋನ್ ವರ್ಸಾಂ ಆದಿಂ ಪಾಯ್ಸ್ ಜಾಲ್ಯಾ ಆನಿ ತಾಚ್ಯಾಕಿ ಪಯ್ಲೆಂ ತೆಲುಗುಂತ್ ಪಾಯ್ಸ್ ಜಾಲ್ಲಿ ಆಸ್ತಾಂ ಕವಿ ಲಿಗೊರಿಚಿ ಕವಿತಾ ಹೆರಾಂನಿ ಕೊಪಿ ಕೆಲ್ಲಿ ಮ್ಹಣೊಂಕ್ ಜಾತಾ.?

ಹಾಂಗಾ ಕೇವಲ್ ಎಕ್ಲ್ಯಾ ವ್ಹಯ್ಲ್ಯಾ ಮೊಗಾನ್, ಎಕ್ಲ್ಯಾ ವ್ಹಯ್ಲ್ಯಾ ಆಭಿಮಾನಾನ್, ಚೂಕ್ ಕೆಲ್ಲ್ಯಾ ಎಕ್ಲ್ಯಾಕ್ ರಾಕೊಂಕ್ ಜಾಯ್ ಮ್ಹಣೊನ್ ದಿಲ್ಲಿಂ ವಾಕ್ಮೂಲಾಂ ಎಕಾಮೆಕಾಕ್ ತಾಳ್ ಪಡಾನಾಸ್ತಾನಾ ಆಸಲಿ ಪರಿಸ್ಥಿತಿ ಉಬಿ ಜಾಲ್ಯಾ. ತ್ಯಾಚ್ ದೆಕುನ್ ಹಾವೆಂ ದೃಡ್ ಪಾತ್ಯೆಂವ್ಚೆಂ ಕೀ ಸಾಹಿತ್ಯಾಚೆಂ ಬೊರೆಂಪಣ್ ಜಾಯ್ಜೆ ತರ್ ಆಮಿಂ  Sentiments . . . Thoughts ಥಾವ್ನ್ ಭಾಯ್ರ್ ಯೇವ್ನ್  reality ಕಿತೆಂ ಆಸಾ ತೆಂ ಧಯ್ರಾನ್ ಉಚಾರ್ಚಿ ಆನಿ ಫುಡ್ ಕರ್ಚೆಂ ವಿಶಾಲ್ ಮನ್ ದಾಕೊಂವ್ಕ್ ಜಾಯ್.

ಹಾಂಗಾ ಮ್ಹಾಕಾ ಬೊರಯ್ಜೆಚ್ ‘ದಿವೊ’ ಪತ್ರಾಚೊ ಸಂಪಾದಕ್ ಮಾನೇಸ್ತ್ ಲೊರೆನ್ಸ್ ಕುವೆಲ್ಲೊ ಹಾಣೆ ಬರಯಿಲ್ಲ್ಯಾ ಸಂಪಾದಕೀಯಾ ವಯ್ರ್. ಕಾಂಯ್ ತೀನ್ ದಶಕಾಂ ಥಾವ್ನ್ ಪತ್ರ್ ಚಲೊವ್ನ್ ಆಸ್ಚ್ಯಾ ಸಂಪಾದಕಾ ಥಾವ್ನ್ ಹೆಂ ಹಾಂವ್ ಆಶೆವ್ನ್ ನಾತ್‍ಲ್ಲೊಂ. ‘ನಾಂವ್ ಪಾಡ್ ಕರ್ಚಿ ಪತ್ರ್‌ಗಾರಿಕಾ ನಾಕಾ’ ಮ್ಹಳ್ಳ್ಯಾ ಶಿರೊನಾಂವಾಂಚ್ಯಾ ಸಂಪಾದಕಿಯಾಂತ್ ‘ಆರ್ಸೊ’ ಪತ್ರಾರ್ ಬೊರಯಿಲ್ಲ್ಯಾ ಸಂಪಾದಕೀಯಾಕ್ ತೋ Yellow Journalism ಮ್ಹಣೊನ್ ವೊಲಾಯ್ತಾ. ಹಾಂವ್ ಕೊಲೆಜ್ ಶಿಕ್ತಾನಾ  Mass Communication ಮೊಜೊ  Subject ಜಾವ್ನಾಸ್‍ಲ್ಲ್ಯಾ ವರ್ವಿಂ  Yellow Journalism ವಿಶಿಂ ಹಾವೆಂ ವಾಚ್ಲಾಂ. ತಶೆಂ ಆಸ್ತಾಂ ‘ಆರ್ಸೊ’ ಸಂಪಾದಕೀಯ್ ಖಂಯ್ಚ್ಯಾ ಥರಾನ್  Yellow Journalism ಕ್ ಸೆರ್ವಾತಾ ಮ್ಹಣೊನ್ ಮಾನೆಸ್ತ್ ಕುವೆಲ್ಲೊ ವಿವರಣ್ ದೀತ್‍ಗೀ ?

ಆಪ್ಲ್ಯಾ ಸ್ವಾರ್ಥಾ ಖಾತಿರ್ ಹೆರಾಂಚೆಂ ನಾಂವ್ ಪಾಡ್ ಕರುಂಕ್ ಪೆಚಾಡ್ಚ್ಯಾ ಪತ್ರ್‌ಕರ್ತಾಂಕ್, ಮಾಧ್ಯಮಾಂಕ್ ಸಲಹಾ ಸೂಚನಾಂ ದೀಂವ್ಕ್ ಭಾಯ್ರ್ ಸರ್‌ಲ್ಲೊ ಮಾನೆಸ್ತ್ ಕುವೆಲ್ಲೊಚ್ಯಾ ಅಸಲ್ಯಾ ಚಿಂತ್ಪಾಂ ವರ್ವಿಂ ಕೊಂಕ್ಣಿ ಸಾಹಿತ್ಯಾಚೆರ್, ಕೊಂಕ್ಣಿ ಲೇಖಕ್/ಕವಿಂಚೆರ್ ಕಸಲೊ ವಾಯ್ಟ್ ಪರಿಣಾಮ್ ಜಾವ್ನ್ ಆಸಾ ತೆಂ ತಾಣೆಂ ಚಿಂತುನ್ ಪಳೆಯ್ಲಾಂಗಿ ? ತಾಣೆಂಚ್ ಸಾಂಗ್‍ಲ್ಲ್ಯಾ ಬರಿ ‘ ಸ್ಪರ್ದ್ಯಾಕ್ ಆಯಿಲ್ಲ್ಯೊ  28 ಕವಿಂನಿ ಬೊರಯಿಲ್ಲ್ಯೊ  42 ಕವಿತಾ ಭೊವ್ ಬೊರ‍್ಯೊ ಆಸೊನ್ ಗುಂಡಾಯೆಚೆಂ ರಚನ್ ದಿಸೊನ್ ಯೆತಾ’ ತರ್ ಹ್ಯಾ ಕವಿತೆಕ್ ಬಹುಮಾನ್ ದೀವ್ನ್ ಉರ್‌ಲ್ಲ್ಯಾ 41 ಕವಿತೆಂಕ್ ಆನಿ 27 ಕವಿಂಕ್ ಆಕ್ಮಾನ್ ಕೆಲಾ ಮ್ಹಣೊನ್ ತಾಕಾ ಭಗಾನಾಂಗೀ ? ಕಿತ್ಯಾಕ್ ಮ್ಹಳ್ಳ್ಯಾರ್ ಹರ್ಯೆಕ್ಲ್ಯಾನ್ ಸ್ಪರ್ದ್ಯಾಂತ್ ಭಾಗ್ ಘೆಂವ್ಚೆಂ ಇನಾಮ್ ಜಿಕೊಂಕ್ ಜಾಯ್ ಮ್ಹಳ್ಳ್ಯಾ ಉದ್ದೇಶಾನ್. ಆಶೆಂ ಆಸ್ತಾಂ ಆಪ್ಲಿಂ ಸ್ವಂತ್ ಚಿಂತ್ನಾಂ ಆಟೊವ್ನ್, ಸ್ಪರ್ದ್ಯಾಕ್ ಮ್ಹಣೊನ್ಂಚ್ ಎದೊಳ್ ಖಂಯ್ಸರೀ ಫಾಯ್ಸ್ ಜಾಯ್ನಾತ್‌ಲ್ಲ್ಯೊ ಕವಿತಾ ಲಿಖ್ಲೆಲ್ಯಾ ಉರ್‌ಲ್ಲ್ಯಾ 27  ಕವಿ/ಕವಯಿತ್ರಿಂಕ್ ಆಕ್ಮಾನ್ / ದೋಖಾ  ಜಾಲಾ ಮಾತ್ರ್ ನ್ಹಂಯ್ ಆಸ್ತಾಂ ತಾಂಚ್ಯಾ ಮ್ಹಿನತಿಚ್ಯಾ ವಾವ್ರಾಕ್ ಮೆಳೊಂಕ್ ಜಾಯ್ ಆಸ್‍ಲ್ಲೊ ಪ್ರತಿಫಳ್ ಮೆಳೊಂಕ್ ನಾ ಮ್ಹಣೊನ್ ಸಾಂಗ್ಯೆತ್. ತರ್ ಆತಾಂ ತ್ಯಾ 27  ಕವಿ/ಕವಯಿತ್ರಿಂ ಪಯ್ಕಿ ಎಕ್ಲ್ಯಾಕ್ ಕಶೆಂ ನ್ಯಾಯ್ ದಿತಾ ಮ್ಹಣೊನ್ ಮಾನೆಸ್ತ್ ಕುವೆಲ್ಲೊ ಸಾಂಗಾತ್‍ಗೀ ?

ಮಾನೆಸ್ತ್ ಕುವೆಲ್ಲೊಚೊ ವಿಶಯ್ ಹ್ಯಾ ವಿಚಾರಾಂತ್ ಯೆತಾನಾ ಮೊಜೆಂ ಟೆನ್ಶನ್ ದೊಡ್ತೆಂ ಜಾಲಾಂ. ‘ದಿವೊ’ ಪತ್ರ್ ತಶೆಂಚ್ ‘ಪೊಯೆಟಿಕಾ’ ವಾಟ್ಸಪ್ ಪಂಗಡ್ ಹಾಂಚ್ಯಾ ಜಂಟಿ ಆಶ್ರಯಾಖಾಲ್ ಚಲ್‍ಲ್ಲ್ಯಾ ಹ್ಯಾ ಸ್ಪರ್ದ್ಯಾಂತ್ ಆಪ್ಣಾ ಥಂಯ್ ಜಾಲ್ಲಿ ಚೂಕ್/ಫರಾಮಸ್ ವ್ಹಳ್ಕೊನ್ ಬಹುಮಾನ್ ವಿಜೇತ್ ಕವಿ ಲಿಗೊರಿ ಮ್ಹಣ್ತಾ “ಇನಾಮ್ ಸ್ವ-ಖುಶೆನ್ ಪಾಟಿಂ ಸೊಡ್ಲಾಂ” ಆನಿ “ಪೊಯೆಟಿಕಾ” ಚೊ ಯೆಜ್ಮಾನ್ ನವೀನ್ ಪಿರೇರ್ ಮ್ಹಣ್ತಾ “ಇನಾಮ್ ರದ್ದ್ ಕೆಲಾಂ.” ಗಜಾಲ್ ಆಶಿ ಆಸ್ತಾಂ ಮಾನೇಸ್ತ್ ಕುವೆಲ್ಲೊನ್ ಸಾಂಗ್ಚ್ಯಾ ಬರಿಂ ಗುಂಡಾಯೆಚೆಂ ರಚನ್ ಆಸ್‍ಲ್ಲಿ ಹಿ ಕವಿತಾ ದಿವೊ ಪತ್ರಾರ್ ಪರ್ಗಟ್‍ಲ್ಲಿ ಆಸೊನ್ ಕವಿ ಆನಿ ಯೆಜ್ಮಾನ್ ಆಪಾಪ್ಲಿ ಚೂಕ್ ವ್ಹಳ್ಕಾಲ್ಯಾತ್ ಆಸ್ತಾಂ ಹ್ಯಾ ಸ್ಪರ್ದ್ಯಾಂತ್ ಸಮಾನ್ ಭಾಗಿಧಾರ್ ಜಾವ್ನಾಸ್‍ಲ್ಲ್ಯಾ ‘ದಿವೊ’ ಪತ್ರಾಚೊ ಸಂಪಾದಕ್ ಮಾನೆಸ್ತ್ ಕುವೆಲ್ಲೊ ಆಪ್ಲ್ಯಾ ಸಂಪಾದಕೀಯಾಂತ್ ತಿ ಕೊಪಿ ಜಾಂವ್ಕ್  ಸಾಧ್ಯ್‌ಚ್ಚ್ ನಾ, ಪ್ರಭಾವ್ ಜಾಂವ್ಕ್ ಪುರೊ, ತೆಂ ಜಾಂವ್ಕ್ ಪುರೊ, ಹೆಂ ಜಾಂವ್ಕ್ ಪುರೊ ಮ್ಹಣೊನ್ ಪೆಂಪಾರೆಂ ವಾಜಯ್ತಾ ತರ್ ಹೆಂ ಪತ್ರಿಕೋದ್ಯಮಾಚ್ಯಾ ಖಂಯ್ಚ್ಯಾ ಆವಸ್ವರಾಂತ್ ಯೆತಾ ಮಾನೆಸ್ತ್ ಕುವೆಲ್ಲೊ ?  ಹಾಂಗಾ ಪರ್ಗಟ್ ಕೆಲ್ಲ್ಯಾ ಪತ್ರಾನ್ ( ದಿವೊ ) ಆಪ್ಣಾ ಥಂಯ್ ಜಾಲ್ಲ್ಯಾ ಫರಾಮಶೆಕ್ ಚುರ್ಚುರೆ ಭೊಗೊನ್, ವಾಚ್ಪ್ಯಾಂಚ್ಯಾ ಗುಮಾನಾಕ್ ಗಜಾಲ್ ಹಾಡುಂಕ್ ಜಾಯ್ ಮ್ಹಳ್ಳೆಂ ಸಾಮಾನ್ಯ್ ಜ್ಞಾನ್ ಸಯ್ತ್ ನಾಂಗಿ ‘ದಿವೊ’ ಸಂಪಾದಕಾಕ್ ? ಹೆಂ ಖಂಚಾಯ್ ಭಾಶೆಚ್ಯಾ ಪತ್ರಿಕಾ ಧರ್ಮಾಚೆಂ ಮೂಳ್ ಸೂತ್ರ್ ಜಾವ್ನಾಸಾ. ಹೆಂ ಪ್ರಾಮಾಣಿಕ್‍ಪಣ್ ಮಾನೇಸ್ತ್ ಕುವೆಲ್ಲೊ ಲಾಗಿಂ ನಾಂ ತರ್ ಪಯ್ಲ್ಯಾನ್ ತೆಂ ಆಪ್ಣಾವ್ನ್ ಉಪ್ರಾಂತ್ ಪತ್ರಿಕೋದ್ಯಮಾವಿಶಿಂ ಹೆರಾಂಕ್ ರೆತಿರ್ ದಿಂವ್ಚಿ ಬರಿ.

ಹಾಂಗಾ ಹಾಂವ್ ಮಾನೆಸ್ತ್ ಕುವೆಲ್ಲೊ ಹಾಂಕಾಂ ಸಾಂಗೊಂಕ್ ಆಶೆತಾಂ ಕೀ ಆಶೆಂ ವಾರ‍್ಯಾರ್ ಗುಂಡು ಮಾರ್ಚ್ಯಾಕೀ ವಿಲ್ಸನ್ ಕಟೀಲ್ ಹಾಚೆಂ ಸಂಪಾದಕಿಯ್ Yellow Journalism ಕ್ ಪ್ರತಿಪಾದನ್ ಕರ್ತಾ ತರ್ ತೆಂ ರುಜು ಕರುಂದಿ, ಖಂಡಿತ್ ಜಾವ್ನ್ ಸಾಮಾಜಿಕ್ ಜಾಳಿ ಜಾಗ್ಯಾಂನಿ ಹಾಂವ್ ಮಾನೇಸ್ತ್ ಕುವೆಲ್ಲೊ ಲಾಗಿಂ ಉಗ್ತ್ಯಾನ್ ಮಾಫಿ ಮಾಗ್ತಾಂ ಆನಿ ವಿಲ್ಸನ್ ಕಟೀಲ್ ಹಾಕಾ ಉಗ್ತ್ಯಾನ್ ಖಂಡನ್ ಕರುಂಕ್ ತಯಾರ್ ಆಸಾಂ. ಆಪ್ಣೆ ಆರ್ಸೊ ಪತ್ರಾ ವಿಶಿಂ ಬೊರಂವ್ಕ್ ನಾ ಬಗಾರ್ ಜೆರಾಲ್ ರಿತಿನ್ ಬೊರಯ್ಲೆಂ ಮ್ಹಣೊನ್ ಮಾನೆಸ್ತ್ ಕುವೆಲೊ ಹಾತ್ ಧುಂವ್ಕ್ ವೆಚೊ ನಾ ಮ್ಹಣೊನ್ ಭರ್ವಾಸ್ತಾಂ.

ಆಖೆರ್ಸುಂಚ್ಯಾ ಆದಿಂ ‘ಪೊಯೆಟಿಕಾ’ ಚೆಂ ನಾಂವ್ ತುಕಾ ಘೆಜೆಚ್ಚ್ ಪಡ್ಲಾಂ ಶಿವಾಯ್ ತುವೆಂಚ್ಚ್ ಸಾಂಗ್‍ಲ್ಲ್ಯಾಬರಿ ಖಂಚಾಯ್ ಥರಾಚ್ಯಾ ಮೊಸ್ರಾನ್, ಹಗ್ಯಾನ್ ಯಾ ಸ್ವಾರ್ಥಾನ್ ಲಿಕ್‍ಲ್ಲೆಂ ಖಂಡಿತ್ ನ್ಹಂಯ್. ಮ್ಹಾಕಾ ಭರ್ವಸೊ ಆಸಾ ಕೀ ಸರ್ವ್ ಕವಿ ಹೆಂ ಸಂಪಾದಕೀಯ್ ‘ಪೊಯೆಟಿಕಾ ಕವಿಗೋಶ್ಟಿ-ಥೊಡೆ ವಿಚಾರ್ ‘ ವಾಚುನ್ ಕವಿತಾ / ಸಾಹಿತ್ಯಾಚ್ಯಾ ಉದರ್ಗತೆ ಖಾತಿರ್ ಸಾರ್ಕೆಂ ಮೇಟ್ ಘೆತಾಲೆ ಮ್ಹಣ್!

– ನಾನು ಮರೋಲ್ , ತೊಟ್ಟಾಮ್