111 ವರ್ಸಾಂಚಿಂ ಚರಿತ್ರಾ ಆಸ್ಚೆಂ – ಮಂಗ್ಳುರಿ ಕಥೊಲಿಕ್ ಸಮುದಾಯಾಚ್ಯಾ ಸ್ವಾಭಿಮಾನಾಚೊ ಸಂಕೇತ್ ಮಂಗ್ಳುರ್ ಕಥೊಲಿಕ್ ಕೋ ಅಪರೇಟಿವ್ ಬ್ಯಾಂಕ್ ಲಿಮಿಟೆಡ್ ಹಾಣಿ, ಪ್ರಸ್ತುತ್ ಅಧ್ಯಕ್ಶ್ , ಯುವ ಮುಕೆಲಿ ಅನಿಲ್ ಲೋಬೊ ಫುಡಾರ್ಪಣಾರ್, ಹಾಲಿಂಚ್ 31 ಮಾರ್ಚ್ 2023 ವೆರ್ ಸಮಾಪ್ತ್ ಜಾಲ್ಲ್ಯಾ ಆರ್ಥಿಕ್ ವರ್ಸಾಂತ್ ದಾಕ್ಲ್ಯಾಂಚೊಂ 12.20 ಕೊರೊಡ್ ಲಾಬ್ ಆನಿ 1.37% ಎನ್‌ಪಿಎ ದಾಕಲ್ ಕರ್ಚೆಸವೆಂ ವ್ಹಡ್ ಸಾಧನ್ ಕೆಲಾಂ.
ಎಂಸಿಸಿ ಬ್ಯಾಂಕಾಚ್ಯಾ ಆಡಳ್ತ್ಯಾ ದಫ್ತರಾಂತ್ ಆಪಯಿಲ್ಲ್ಯಾ ಪತ್ರಿಕಾ ಪರಿಷದೆಂತ್ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊ, ಉಪಧ್ಯಕ್ಷ್ ಜೆರಾಲ್ದ್ ಜೂಡ್ ಡಿಸಿಲ್ವ ಆನಿ ಮಹಾ ಪ್ರಬಂದಕ್ ಸುನಿಲ್ ಮಿನೇಜಸ್ ಹಾಣಿ ಹಿ ಮಾಹೆತ್ ದಿಲಿ. ತಾಂಚೆ ಸಾಂಗಾತಾ ಬ್ಯಾಂಕಾಚೆ ದಿರೆಕ್ತೊರ್ ಆಂಡ್ರ್ಯೂ ಡಿಸೊಜಾ, ಡಾ| ಜೆರಾಲ್ಡ್ ಪಿಂಟೊ, ಅನಿಲ್ ಪತ್ರಾವೊ, ಜೆ.ಪಿ. ರೊಡ್ರಿಗಸ್, ಡೇವಿಡ್ ಡಿಸೊಜಾ, ಎಲ್ರೊಯ್ ಕಿರಣ್ ಕ್ರಾಸ್ಟೊ, ಹೆರಾಲ್ಡ್ ಮೊಂತೆರೊ, ರೋಶನ್ ಡಿಸೊಜಾ, ಮಾರ್ಸೆಲ್ ಡಿಸೊಜಾ, ಸಿ.ಜಿ. ಪಿಂಟೊ, ಸುಶಾಂತ್ ಸಲ್ಡಾನ್ಹಾ, ಐರಿನ್ ರೆಬೆಲ್ಲೊ, ಡಾ| ಫ್ರೀಡಾ ಡಿಸೊಜಾ, ಆಲ್ವಿನ್ ಪಿ. ಮೊಂತೆರೊ, ಫೆಲಿಕ್ಸ್ ಡಿಕ್ರೂಜ್ ಆನಿ ಶರ್ಮಿಳಾ ಮಿನೇಜಸ್ ಹಾಜರ್ ಅಸ್ಲಿಂ.
“ಎದೊಳ್ ಪರ್ಯಾಂತ್ ಉಡುಪಿಂತ್ 4 ಆನಿ ದಕ್ಷಿಣ ಕನ್ನಡ ಜಿಲ್ಲ್ಯಾಂತ್ 12 – ಅಶೆಂ 16 ಶಾಖೆ ಮಾತ್ರ್ ಆಸ್ಲೆ. ಬ್ಯಾಂಕಾಚ್ಯಾ ಸರ್ವ್ ಶಾಖ್ಯಾಂನಿ ಮುನಾಫೊ ಜಾಲಾ. ಪ್ರಸ್ತುತ್ ವರ್ಸಾ ಬ್ಯಾಂಕಾಚೆಂ ಕಾರ್ಯಾಕ್ಶೇತ್ರ್ ವಿಸ್ತಾರಾಂವ್ಕ್ ಅನುಮತಿ ಲಾಬ್ಲ್ಯಾ ಆಸೊನ್, ಉತ್ತರ ಕನ್ನಡ, ಶಿವಮೊಗ್ಗ, ಚಿಕ್ಕಮಗಳೂರು, ಹಾಸನ ಆನಿ ಕೊಡಗು ಅಶೆಂ ಪಾಂಚ್ ಜಿಲ್ಲ್ಯಾಂನಿ ವೆಗಿಂಚ್ ಬ್ಯಾಂಕಾಚೆ ಶಾಖೆ ಉಘಡ್ನ್ ವ್ಯವಹಾರ್ ಆರಂಭ್ ಕರ್ತೆಲ್ಯಾಂವ್.” ಮ್ಹಣ್ ಅನಿಲ್ ಲೋಬೊನ್ ಮ್ಹಳೆಂ.
“ಹ್ಯಾ ವರ್ಸಾ ಬ್ಯಾಂಕಾಂತ್ ಸ್ಥಾಪಕಾಂಚೊಂ ದೀಸ್ ಆಚರಣಾ ವೆಳಾರ್ ಬ್ಯಾಂಕಾಚ್ಯಾ ಅಡಿಟೋರಿಯಮಾಕ್ ಸ್ಥಾಪಕಾಚೆಂ ನಾಂವ್ ದಿಲ್ಲೆಂ. ಆನಿ ಆತಾಂ ಸ್ಥಾಪಕಾಚ್ಯಾ ನಾತಿನ್ ಒಸ್ಕರ್ ಇನಾಮ್ ಜೋಡ್ನ್ ಆಮ್ಚ್ಯಾ ಸ್ಥಾಪಕಾಕ್ ವ್ಹಡ್ ಮಾನ್ ಜೊಡುನ್ ದಿಲಾ. ಹಿ ಗಜಾಲ್ ಆಮ್ಕಾಂ ವ್ಹಡಾ ಅಭಿಮಾನಾಚಿ. ಹ್ಯಾ ವರ್ಸಾ ಮೇಯಾಚ್ಯೆ 7 ತಾರಿಕೆರ್ ಬ್ಯಾಂಕಾಚ್ಯಾ ಸ್ಥಾಪಕಾಚೊ ದೀಸ್ ಆಚರಣ್ ಕರ್ಚಿ ತಯಾರಾಯ್ ಚಲೊನ್ ಆಸಾ ಆನಿ ತಿಕಾ ಪ್ರಮುಕ್ ಸಯ್ರೊ ಮ್ಹಣ್ ಆಪಂವ್ಚೆಂ ಪ್ರೇತನ್ ಚಾಲು ಆಸಾ” ಮ್ಹಣ್ ಬ್ಯಾಂಕಾಚೊ ಅಧ್ಯಕ್ಷ್ ಅನಿಲ್ ಲೋಬೊನ್ ಹ್ಯಾ ಸಂದರ್ಭಿಂ ಮ್ಹಳೆಂ.
“2022 – 23 ವರ್ಸಾ ಬ್ಯಾಂಕಾಚೊ ಶತಮಾನೋತ್ತರ್ ದಶಮಾನೋತ್ಸವ್ ಗದ್ದಳಾಯೆನ್ ಮಾನಾಯ್ಲೊ. ಪೂಣ್ ಸಮಾಜಿಕ್ ಜವಾಬ್ದಾರಿ ಆಮಿ ಕೆದಿಂಚ್ ವಿಸ್ರೊಂಕ್ ನಾಂವ್. ಸಮಾಜೆಚ್ಯಾ ಅಶಕ್ತ್ ವರ್ಗಾಚ್ಯಾ ಲೊಕಾಕ್ ಘರಾಂ ದುರುಸ್ತೆಕ್, ಚೆಡ್ವಾಂ ಭುರ್ಗ್ಯಾಂಚ್ಯಾ ಕಾಜಾರಾಚ್ಯಾ ಖರ್ಚಾಕ್, ಚಿಕಿತ್ಸೆಕ್ ಆನಿ ಶಿಕ್ಪಾಕ್ ಅಶೆಂ ಕುಮಕ್ ದೀವ್ನ್ ಶತಮಾನೋತ್ತರ್ ದಶಮಾನೋತ್ಸವ್ ಆಚರಣ್ ಅರ್ಥಾಭರಿತ್ ಕೆಲಾಂ. ಬ್ಯಾಂಕಾಚ್ಯಾ ಸೊಳಾಯ್ ಶಾಖ್ಯಾಂನಿ ಗ್ರಾಹಕ್ ಸಮಾವೇಶ್ ಮಾಂಡುನ್ ಹಾಡುನ್, ಗ್ರಾಹಕಾಂಚಿಂ ಸಲಹಾ – ಸೂಚನಾಂ ಘೆವ್ನ್ ತಿಂ ಶಾಖ್ಯಾಂವಾರ್ ಅನುಷ್ಠಾನಾಕ್ ಘಾಲ್ಯಾಂತ್” ಮ್ಹಣ್ ಅನಿಲ್ ಲೋಬೊನ್ ಮ್ಹಳೆಂ.
“46 ಕೊರೊಡ್ ಆಸ್‌ಲ್ಲೆಂ ಬ್ಯಾಂಕಾಚೆಂ ನೆಟ್‌ವರ್ತ್ 59 ಕೊರೊಡಾಂಕ್ ವರ್ನ್ ಪಾವಯ್ಲಾಂ. ಬ್ಯಾಂಕಾಚೊ ವ್ಯವಹಾರ್ 933.21 ಕೊರೊಡಾಂಕ್ ಪಾವಯ್ಲ್ಯಾ. ಹೆಂ ಆಮ್ಚ್ಯಾ ಆವ್ಧೆಚೆಂ ವ್ಹಡ್ ಸಾಧನ್” ಮ್ಹಣಾಲೊ ಉಪಾಧ್ಯಕ್ಷ್ ಜೆರಾಲ್ಡ್ ಜೂಡ್ ಡಿಸಿಲ್ವ.
“ಬ್ಯಾಂಕಾಚಾ ಸಾಧನಾ ಪಾಟ್ಲ್ಯಾನ್ ಆಮ್ಚ್ಯಾ ಸಾಂದ್ಯಾಂಚೊ ಸಹಕಾರ್, ಗ್ರಾಹಕಾಂಚೊಂ ವಿಶ್ವಾಸ್, ಅಧಿಕಾರಿ ಆನಿ ಸಿಬಂದಿ ವರ್ಗಾಚಿ ಮ್ಹಿನತ್ ಆಸಾ. ತಶೆಂಚ್ ಅನಿವಾಸಿ ಗ್ರಾಹಕಾಂನಿ ಹ್ಯಾ ವರ್ಸಾ ಬ್ಯಾಂಕಾಂತ್ ಬರೊಚ್ ವ್ಯವಹಾರ್ ಕೆಲಾ ಆನಿ ಸಾಂಗಾತಾ ಭಂಡ್ವಾಳ್ ದಿಲಾ. ಹ್ಯಾ ಸರ್ವಾಂಚೊಂ, ದಿರೆಕ್ತೊರಾಂ ಸವೆಂ ಮೆಳುನ್ ಉಪ್ಕಾರ್ ಬಾವುಡ್ತಾಂ” ಮ್ಹಣಾಲೊ ಅಧ್ಯಕ್ಷ್ ಅನಿಲ್ ಲೋಬೊ.