ಮುಂಬಂಯ್ತ್ ಆಯ್ಲೆವಾರ್ ಚಲ್ಲೆಲ್ಯಾ ನವಭಾರತ್ ಸಿಆರ್‌ಎಸ್ ಶೃಂಗ್‌ಸಭೆಚ್ಯಾ ದುಸ್ರ್ಯಾ ಆವೃತ್ತೆಂತ್ ಭುರ್ಗ್ಯಾಂಚೆಂ ಶಿಕಪ್ ಆನಿ ಉನ್ನತಿ ಖಾತಿರ್ ಆಸ್ಚಿ ಪ್ರತಿಷ್ಠಿತ್ ‘ನವಭಾರತ್ ಸಿಎಸ್‌ಆರ್ ಪ್ರಶಸ್ತಿ- 2023′ ಡಾ| (ಮೇಡಂ) ಗ್ರೇಸ್ ಪಿಂಟೊ ಹಿಚ್ಯಾ ಮುಕೆಲ್ಪಣಾಚ್ಯಾ ರಾಯನ್ ಸಮೂಹ್ ಶಿಕ್ಪಾ ಸಂಸ್ಥ್ಯಾಂಕ್ ಪ್ರದಾನ್ ಕರುನ್ ಮಾನ್ ಕೆಲೊ.
ರಾಜ್‌ಭವನಾಂತ್ ಮಾಂಡುನ್ ಹಾಡ್ಲೆಲ್ಯಾ ಸಂಭ್ರಮಾಂತ್ ಮಹಾರಾಷ್ಟ್ರಾಚೊ ಉಪ ಮುಕೆಲ್ ಮಂತ್ರಿ ಶ್ರೀ ದೇವೇಂದ್ರ ಫಡ್ನವಿಸ್ ಹಾಂಚ್ಯಾ ಹಾಜರ್ಪಣಾಂತ್ ಮಹಾರಾಷ್ಟ್ರ ರಾಜ್ಯಾಚೊ ರಾಜ್ಯ್‌ಪಾಲ್ ಮಾನೆಸ್ತ್ ರಮೇಶ್ ಬೈಸ್ ಹಾಣಿ ರಾಯನ್ ಅಂತರಾಷ್ಟ್ರೀಯ್ ಶಿಕ್ಪಾ ಸಮೂಹಾಚಿ ಪ್ರವರ್ತಕಿ, ಆಡಳ್ತ್ಯಾ ನಿರ್ದೇಶಕಿ ಡಾ| (ಮೇಡಂ) ಗ್ರೇಸ್ ಪಿಂಟೊ ಹಿಕಾ ಪ್ರಶಸ್ತಿ ಪ್ರದಾನ್ ಕೆಲಿ.
ಕೊರ್ಪೊರೇಟ್ ಸಂಸ್ತ್ಯಾಂನಿ ಆಪ್ಲಿ ಸಾಮಾಜಿಕ ಜವಾಬ್ದಾರಿ (ಸಿಎಸ್‌ಆರ್) ಪಾಳ್ಚೆ ದಿಶೆನ್ ಕೆಲ್ಲೊ ಅನುಕರಣೀಯ್ ವಾವ್ರ್ ಒಳ್ಕುನ್, ನವಭಾರತ್ ಸಮೂಹ್ ಹರ್ ವರ್ಸಾ ನವಭಾರತ್ ಸಿಎಸ್‌ಆರ್ ಪ್ರಶಸ್ತ್ಯೊ ದಿತಾ. ಹ್ಯಾ ವರ್ಸಾ ರಾಯನ್ ಅಂತರಾಷ್ಟ್ರೀಯ್ ಶಿಕ್ಪಾ ಸಮೂಹಾನ್ ಶಿಕಪ್ ಆನಿ ಭುರ್ಗ್ಯಾಂಚ್ಯಾ ಉನ್ನತಿ ಖಾತಿರ್ ದಿಲ್ಲೊ ಎಕುಣ್ ವಾವ್ರ್ ಲೆಕಾಕ್ ಧರುನ್, ಭಾರತ್‌ಭರ್ ವಿಸ್ತಾರ‍್ಲೆಲ್ಯಾ ಶಿಕ್ಪಾಸಂಸ್ತ್ಯಾಂ ಮಾರಿಫಾತ್ ವೆವೆಗ್ಳ್ಯಾ ಆರ್ಥಿಕ್ ಆನಿ ಸಮಾಜಿಕ್ ಪಾಟಿಥಳಾಚ್ಯಾ ಭುರ್ಗ್ಯಾಂಕ್ ಶಿಕಪ್ ದೀವ್ನ್ ಸಶಕ್ತ್ ಕೆಲ್ಲಿ ಗಜಾಲ್, ಪ್ರತೇಕ್ ಜಾವ್ನ್ ಪಾಟಿಂ ಉರ‍್ಲೆಲ್ಯಾ ವರ್ಗಾಚ್ಯಾ ಭುರ್ಗ್ಯಾಂಕ್ ಶಿಕ್ಪಾದ್ವಾರಿಂ ಸಮಾಜೆಚ್ಯಾ ಮುಕೆಲ್ ವ್ಹಾಳ್ಯಾಕ್ ಹಾಡುಂಕ್ ಕೆಲ್ಲೆಂ ಪ್ರೇತನ್ ಒಳ್ಕುನ್ ಘೆವ್ನ್ ಪ್ರಶಸ್ತೆಕ್ ವಿಂಚ್ಲಾಂ ಮ್ಹಣ್ ನವಭಾರತ್ ಸಂಸ್ಥ್ಯಾನ್ ಕಳಯ್ಲಾಂ.
ಡಾ| (ಮೇಡಂ) ಗ್ರೇಸ್ ಪಿಂಟೊ ಪ್ರಶಸ್ತಿ ಸ್ವೀಕಾರ್ ಕರುನ್, ಉಪ್ಕಾರ್ ಬಾವುಡ್ನ್ ” ಆಮ್ಚ್ಯಾ ದೆಶಾಚ್ಯಾ ಹರ್ ಪ್ರದೇಶಾಂನಿ ಸರ್ವ್ ಲೊಕಾಕ್ ಪಾಂವ್ಚೆಪರಿಂ ಬರೆಂ ಶಿಕಪ್ ದೀಂವ್ಕ್ ಆಮ್ಕಾಂ ಆಮ್ಚ್ಯಾ ಸೊಮ್ಯಾ ಜೆಜು ಕ್ರೀಸ್ತಾನ್ ಬೆಸಾಂವ್ ದೀವ್ನ್ ಆನಿ ವಾಟ್ ದಾಕಯಿಲ್ಲೆ ಖಾತಿರ್ ಆಮಿ ತಾಕಾ ಋಣಿ ಜಾವ್ನಾಸಾಂವ್. ಸಮಗ್ರ್ ಶಿಕ್ಪಾ ಮಾರಿಫಾತ್ ಸುದೃಡ್ ಸಮಾಜ್ ಬಾಂದ್ಚೆ ವಾಟೆನ್ ಆಮ್ಚೆಂ ಮಿಸಾಂವ್ ಮುಕಾರುನ್ ವ್ಹರುಂಕ್ ತೋಚ್ ಆಮ್ಕಾಂ ತಾಚೆ ಥಾವ್ನ್ ಸಕತ್ ಅನಿ ಸ್ಪೂರ್ತ್ ಲಾಭ್ತಾ ” ಮ್ಹಣಾಲಿ.
“ರಾಯನ್ ಸಮೂಹ್ ಸಮಾನತಾ, ಸಹಾನುಭೂತಿ, ಸಹಿಷ್ಣತಾ ಆನಿ ಪೆಲ್ಯಾಚೊ ಹುಸ್ಕೊ ಹ್ಯಾ ಮಾಲ್ಯಾಂಚೇರ್ ಬಾಂದುನ್ ಹಾಡ್ಲಾ ಆಸುನ್, ಸಂಸ್ಥೊ ಸಮಾಜಾಂತ್ ಸಕಾರಾತ್ಮಕ್ ಬದ್ಲಾವಣ್ ಹಾಡುಂಕ್ ಸಹಾನುಭೂತಿ, ಪರಿಸರ್, ಶಿಕಪ್, ಭಲಾಯ್ಕೆ ಸೆವಾ, ಆರ್ಥಿಕ್ ಸಬಲೀಕರಣ್ ಆನಿ ಥಳೀಯ್ ಮುಕೆಲ್ಪಣ್ ಅಭಿವೃದ್ದಿ ಅಶೆಂ ಸ ಶೆತಾಂನಿ ಜಾಯ್ತಿಂ ಸಾಮಾಜಿಕ್ ಯೋಜನಾಂ ಮಾಂಡುನ್ ಹಾಡ್ತಾ ಮ್ಹಣ್ ಡಾ| (ಮೇಡಂ) ಗ್ರೇಸ್ ಪಿಂಟೊ ಹಿಣೆ ಹ್ಯಾ ವೆಳಿಂ ಮ್ಹಳೆಂ.