ಮುಳಾನ್, ನಂತೂರ್ ಮಂಗ್ಳುರ್ಚೊ, ಫಾಮಾದ್ ಬರಯ್ಣಾರ್, ನಟ್ – ನಿರ್ದೇಶಕ್ ಆನಿ ಪತ್ರ್‌ಕರ್ತ್, ಲ| ದೊ| ಓಸ್ಟಿನ್ ಡಿಸೊಜಾ ಪ್ರಭು – ಇಲಿಯನೋಸ್, ಚಿಕಾಗೊ ಥಾವ್ನ್ ಲಯನ್ಸ್ ಅಂತರಾಷ್ಟ್ರ‍ೀಯ್ ನಿರ್ದೇಶಕ್ ಪದಾಚೆರ್ ನಿಯುಕ್ತ್ ಜಾಲಾ. ಸ್ಪ್ರಿಂಗ್ ಫೀಲ್ಡ್ ಅಬ್ರಾಹಂ ಲಿಂಖನ್ ಡಬಲ್ ಟ್ರೀ ಹೋಟೆಲ್ ಹಿಲ್ಟನ್ ಹಾಂಗಾಸರ್ ಮಾಯ್ ಮಯ್ನ್ಯಾಚ್ಯಾ 18 ವೆರ್ ಸುರ್ವಾತ್ಲೆಲ್ಯಾ ಶಿಂಕಳ್ ಜಮಾತೆಚೆರ್ ಹಿ ವಿಂಚ್ಣುಕ್ ಜಾಲಿ.
ಲ। ದೊ। ಓಸ್ಟಿನ್ ಆನಿ ಲ। ಟೆರಿ ಡಿಸೊಜಾ
ಜಮಾತೆಕ್ ಧಾ ಲಯನ್ಸ್ ಜಿಲ್ಲ್ಯಾಂಥಾವ್ನ್ ಎಕುಣ್ 189 ಪ್ರತಿನಿಧಿ ಹಾಜರ್ ಆಸೊನ್ ಎಲಿಸಾಂವ್ ಚಲ್ಲೆಂ. 1A ಜಿಲ್ಲ್ಯಾಚ್ಯಾ ಲ| ದೊ| ಓಸ್ಟಿನಾಕ್ 109 ಮತ್ ಪ್ರಾಪ್ತ್ ಜಾಲೆ ತರ್, ಪ್ರತಿಸ್ಪರ್ಧಿ 1D ಜಿಲ್ಲ್ಯಾಚ್ಯಾ ಡ್ಯಾರೆನ್ ವಂದ್ಯುನ್ ಹಾಕಾ 72 ಮತ್ ಪ್ರಾಪ್ತ್ ಜಾಲೆ. 8 ಮತ್ ನಶ್ಟ್ ಜಾಲೆ.
2024 ಜುಲೈ ಮಯ್ನ್ಯಾಂತ್ ಆಸ್ಟ್ರ‍ೇಲಿಯಾಚ್ಯಾ ಮೆಲ್‌ಬೊರ್ನ್ ಶಹರಾಂತ್ ಚಲ್ಚ್ಯಾ ಲಯನ್ಸ್ ಅಂತರಾಷ್ಟ್ರ‍ೀಯ್ ಸಮಾವೇಶಾಂತ್ ಹ್ಯಾ ನಿಯುಕ್ತೆಕ್ ಅಧಿಕೃತ್ ಅನುಮೋದನ್ ಮೆಳ್ತಾಲೆಂ.
ಆಪ್ಲ್ಯಾ ಪದ್‌ ಸ್ವೀಕಾರ್ ಭಾಷಣಾಂತ್ ಲ। ದೊ। ಓಸ್ಟಿನಾನ್ ಸರ್ವ್ ಪ್ರತಿನಿಧಿಂಚೊಂ, ತಾಣಿ ದಿಲ್ಲ್ಯಾ ಬೇಶರ್ತ್ ಪಾಟಿಂಬ್ಯಾ ಖಾತಿರ್ ಮನಾಪಾಸುನ್ ಉಪ್ಕಾರ್ ಭಾವುಡ್ಲೊ. ಚುನಾಯಿತ್ ಜಾವ್ನ್ ಆಯ್ಲ್ಯಾರ್, ಲ| ದೊ| ಓಸ್ಟಿನ್ ಡಿಸೊಜಾ ಪ್ರಭು, ಇಲಿಯನೋಸ್ ರಾಜ್ಯ್ ಆನಿ ಮಾತೃ ರಾಜ್ಯಾಥಾವ್ನ್, ಲಯನ್ಸ್ ಅಂತರಾಷ್ಟೀಯ್ ನಿರ್ದೇಶಕ್ ಹುದ್ದ್ಯಾಚೇರ್ ವಿಂಚುನ್ ಯೆಂವ್ಚೊ ಪ್ರಪ್ರಥಮ್ ಭಾರತೀಯ್ ಮುಳಾಚೊ ವ್ಯಕ್ತಿ ಮ್ಹಣ್ಚ್ಯಾ ಭರ್ಮಾಕ್ ಪಾತ್ರ್ ಜಾತೊಲೊ.
ಕಿಟಾಳ್ ಆನಿ ಅರ್ಸೊ ಮಂಡಳಿ ಲ। ದೊ। ಓಸ್ಟಿನಾಚ್ಯಾ ಮಯ್ಲಾಫಾತೊರ್ ಸಾಧನಾಚೆರ್ ಅಭಿಮಾನ್ ಪಾವ್ತಾ ಆನಿ ಉಲ್ಲಾಸ್ ಪಾಟಂವ್ಚೆಸವೆಂ ಫುಡಾರಾಕ್ ಯಶ್ ಆಂವ್ಡೆತಾ.
5 comments