ಕೊಡ್ಯಾಳ್ ಥಾವ್ನ್ ಶಿರ್ವಾಂ ಬಾಯೆಗೆರ್ ಪಾವೊಂಕ್ ಸುಮಾರ್ ದೇಡ್ ವೊರಾಂಚಿಂ ವಾಟ್. ಉಡುಪಿ ಎಕ್ಸ್‌ಪ್ರೆಸ್ ಬಸ್ಸ್ ಧರುಂಕ್ ಜ್ಯೋತಿ ಟೊಕಿಸ್ ಬಸ್‌ಸ್ಟೊಪ್ ಪರ್ಯಾಂತ್ ರಿಕ್ಷಾ, ಉಪ್ರಾಂತ್ ಕಾಪು ಪರ್ಯಾಂತ್ ಖಾಸ್ಗಿ ಎಕ್ಸ್‌ಪ್ರೆಸ್ ಬಸ್ಸ್, ಕಾಪು ಥಾವ್ನ್ ಶಿರ್ವಾಂ ಘರಾಪರ್ಯಾಂತ್ ಪರ್ತ್ಯಾನ್ ಅಟೊರಿಕ್ಷಾ – ಗಾಂವಾಕ್ ವೆತಾನಾ ಆಮ್ಕಾಂ ಪಯ್ಣಾಚಿ ವಾಟ್. ಥೊಡೆ ಪಾವ್ಟಿಂ ಲಗೇಜ್ ಅಸ್ಲ್ಯಾರ್ ಮ್ಹಜಿ ಭಾಚಿ ಆಮ್ಕಾಂ ಆಪವ್ನ್ ವ್ಹರುಂಕ್ ಕಾಪು ಕಾರ್ ಘೆವ್ನ್ ಮುಕಾರ್ ಯೆತಾ. ಅಟ್ವ್ಯಾ ಕ್ಲಾಶಿಂತ್ ಶಿಕ್ಚ್ಯಾ ಮ್ಹಜ್ಯಾ ಧುವೆಕ್ ಸೊಮಾರಾಥಾವ್ನ್ ಎಫ್‌ಎ1 ಪರೀಕ್ಷಾ ಚಾಲು ಜಾಂವ್ಚಿ ಆಸ್ಲೆಲ್ಯಾನ್, ಆಮಿ ಸಕಾಳಿಂ ವಚೊನ್ ಸಾಂಜೆರ್ ಪಾಟಿಂ ಯೆಂವ್ಚೆಂ ಜಾಲ್ಲ್ಯಾನ್, ಹ್ಯಾ ಪಾವ್ಟಿಂ ಲಗೇಜ್ ಕಾಂಯ್ಚ್ ನಾತ್ಲಿ.
ಆಯ್ತಾರಾಚ್ಯಾ ಸುಟಿಯೆಚೊ ದೀಸ್, ಹಫ್ತ್ಯಾ ಪಾಸುನ್ ವೊತುನ್ ಆಸ್ಚ್ಯಾ ಶಿರಾಂಧಾರಿಂಚ್ಯಾ ಪಾವ್ಸಾನ್ ಥೊಡೊ ವಿರಾಮ್ ಘೆತ್ಲೊಲೊ ಜಾಲ್ಯಾರೀ, ಕೊಡ್ಯಾಳ್ ಸುಟ್ತಾನಾ ಎಕ್ಸ್‌ಪ್ರೆಸ್ ಬಸ್ಸಾರ್ ಮೆಜೂನ್ ಕಾಂಯ್ ಸಾತಾಟ್ ಪಯ್ಣಾರಿ. ಧಾವ್ಯಾ ಕುಶಿಕ್ ದೋನ್ ಆನಿ ಉಜ್ವ್ಯಾ ಕುಶಿಕ್ ದೋನ್ – ಅಶೆಂ ಎಕಾ ವೊಳಿರ್ ಚಾರ್ ಬಸ್ಕಾ ಆಸ್ಚೆಂ ಮಣಿಪಾಲ್ ವೆಚೆಂ ಬಸ್ಸ್. ಹಾಂವ್ ಆನಿ ಮ್ಹಜಿ ಧುವ್ ದೋನ್ ಬಸ್ಕೆಂಚ್ಯಾ ಎಕಾವೊಳಿರ್ ಬಸ್ಲ್ಯಾಂವ್ ತರ್, ಘರ್ಕಾರ್ನ್ ಆಮ್ಚ್ಯಾ ಮುಕ್ಲ್ಯಾ ವೊಳಿರ್ ಜನೆಲಾ ಕುಶಿಚ್ಯಾ ಬಸ್ಕೆರ್ ಬಸ್ಲಿ.
ಬಸ್ಸ್ ಸುರತ್ಕಲ್ ಉತರ‍್ತಾನಾ ಥೊಡ್ಯಾ ವಾಂಟ್ಯಾಕ್ ಭರ‍್ಲೆಂ ಮ್ಹಣ್ಯೆತ್. ಬೊವ್‌ಶಾ ಪಾವ್ಸ್ ಉಣೊ ಆಸ್ಲೆಲ್ಯಾನ್ ವಾ ದೀಸ್ ಬರೊ ಆಸ್ಲೆಲ್ಯಾನ್ ಜಾಂವ್ಕ್ ಪುರೊ, ದೆವುಳಾಕ್ ವಚೊಂಕ್ ತಯಾರ್ ಜಾವ್ನ್ ಆಯ್ಲಲ್ಯೊ ಜಾಯ್ತ್ಯೊ ಸ್ತ್ರೀಯೊ ಬಸ್ಸಾರ್ ಚಡ್ಲ್ಯೊ ಆನಿ ಬಸ್ಸಾರ್ ಖಾಲಿ ಆಸ್ಲಲ್ಯೊ ಬಸ್ಕಾ ಖಿಣಾನ್ ಭರ‍್ಲ್ಯೊ. ಬಸ್ಸ್ ಮುಲ್ಕಿ ಪಾವ್ತಾನಾ ಚಡ್ಲೆಲ್ಯಾ ಕೊಣಾಯ್ಕೀ ಬಸೊಂಕ್ ಬಸ್ಕಾ ರಿಕಾಮಿ ನಾ ಜಾಲಿ. ತರ್‌‍ಯೀ ಪಯ್ಣಾರಿ ಚಡ್ತಾಲೆ, ಉಭೆ ರಾವೊನ್ ಪಯ್ಣ್ ಕರ್ತಾಲೆ.
ಬಸ್ಸ್ ಮುಲ್ಕಿ ಪಾವ್ತಾನಾ ಎಕ್ಲೊ ಜಾಣ್ಟೊ ಮನಿಸ್ ಮುಕ್ಲ್ಯಾ ದಾರಾಂತ್ಲ್ಯಾನ್ ಬಸ್ಸಾರ್ ಚಡ್ಲೊ. ಕಾತಿನ್ ಇಂಗ್ಳ್ಯಾಪರಿಂ ಕಾಳೊ ತರೀ, ಹಿಮಾಪರಿಂ ಧವೆಂ ಫುಡ್ವೆಂ ಆನಿ ಬುಸ್ಕೊಟ್ ಘಾಲ್ಲ್ಯಾ ತಾಚ್ಯಾ ಹಾತಾಂತ್ ಎಕ್ ಸಂಗೀಸಾಚೆಂ ಪೊತೆಂ ಆನಿ ಖಾಂದ್ಯಾರ್ ಏಕ್ ಚವ್ಕಾ ಕುಡ್ಕೊ ಆಸುನ್, ತಾಚಿ ಕೂಡ್ ಅಖ್ಖಿ ಜೀಣ್ ಮಾತಿ ಮುಡ್ಡುನ್ ಚಿರ್ಮುಟ್ಲೆಲೆಪರಿಂ ದಿಸ್ತಾಲಿ. ಬಸ್ಸಾರ್ ಇಲ್ಲಿಶಿ ಗಡ್ದಿ ಜಾಲ್ಯಾರೀ ನಿರ್ವಾಹಕ್ ಜರ್ ಮುಕ್ಲ್ಯಾ ದಾರಾಕಡೆ ಆಸ್ಲ್ಯಾರ್ ಪಯ್ಣಾರ‍್ಯಾಂಕ್ ಪಾಟಿಂ ವಚಾ ಮ್ಹಣ್ತಾ, ಆನಿ ಜರಿ ಪಾಟ್ಲ್ಯಾ ದಾರಾಕಡೆ ಆಸ್ಲ್ಯಾರ್ ಪಯ್ಣಾರ‍್ಯಾಂಕ್ ಮುಕಾರ್ ವಚಾ ಮ್ಹಣ್ತಾ. ಹಾಂತು ತಾಂಚಿ ಸವಯ್ ಮಾತ್ ನ್ಹಯ್, ಖಂಯ್ ಪಯ್ಣಾರಿ ದಾರಾಕಡೆ ಉಭೆ ರಾವೊನ್ ಎಕ್ಸ್‌ಪ್ರೆಸ್ ಬಸ್ಸಾನ್ ಎಕಾಣೆಂ ಬ್ರೇಕ್ ಮಾರ್ಲ್ಯಾರ್ ಪಯ್ಣಾರ‍್ಯಾಂಕ್ ಕಾಂಯ್ ಕೀಸ್ ಘಡಾನಾಯೆ ಮ್ಹಳ್ಳಿ ಫಿಕಿರ್ ಸಯ್ತ್ ಆಸ್ತಾ. ನಿರ್ವಾಹಕಾನ್ ‘ಪಾಟಿಂ ವಚಾ, ಪಾಟಿಂ ವಚಾ’ ಮ್ಹಣ್ತಾನಾ ಜಾಣ್ಟೊ ಮನಿಸ್ ಆಮಿ ಬಸ್ಲೆಲ್ಯಾ ಮುಕ್ಲ್ಯಾ ವೊಳಿ ಪರ್ಯಾಂತ್ ಪಾವ್‌ಲ್ಲೊ. ತಾಣೆ ರಾವ್‌ಲ್ಲೆಕಡೆ ವಣ್ಕೊನ್ ರಾವೊಂಕ್ ತಾಕಾ ಆದಾರಾಕ್ ಖಾಂಬೊಯ್ ನಾತ್ಲೊ, ಎಕಾ ಹಾತಾಂತ್ ಸಂಗೀಸಾಚೆಂ ಪೊತೆಂ ವೆಗ್ಳೆಂ. ಬಸ್ಸಾರ್ ಉಬೊ ರಾವೊನ್ ಪಯ್ಣ್ ಕರ್ತಾನಾ ಧರುಂಕ್ ಆಸ್ಚ್ಯಾ ವಯ್ಲ್ಯಾ ಆದಾರ್ ಆಡ್ಯಾ ಪರ್ಯಾಂತೀ ತಾಚೊ ಹಾತ್ ಪಾವಾನಾತ್ಲೊ ದೆಕುನ್, ಬಸ್ಕೆಚ್ಯಾ ಹಾತಾಳ್ಯಾಕ್ ಧರ್ನ್‌‌ಚ್ ತೊ ಉಭೊ ರಾವ್ಲೊ ತರೀ ಬಸ್ಸ್ ಧಲ್ತಾನಾ ಲಕ್ತಾಲೊ.
ನಿರ್ವಾಹಕ್ ತಾಕಾ ಉತ್ರೊನ್‌ಚ್ ಮುಕಾರ್ ಥಾವ್ನ್ ಪಾಟಿಂ ಗೆಲೊ ತರೀ, ಜಾಣ್ಟ್ಯಾಕ್ ಏಕ್ ಬಸ್ಕಾ ಕರ್ನ್ ದಿಂವ್ಚೆ ವಿಶಿಂ ತಾಣೆಂಯ್ ಗುಮಾನ್ ಕೆಲೆಂ ನಾ. ಮುಕ್ಲ್ಯಾ ದಾರಾಲಾಗಿಂ ಮಾಲ್ಘಡ್ಯಾ ನಾಗ್ರಿಕಾಂಕ್ ಮ್ಹಣ್ ಅಮಾನತ್ ಕೆಲ್ಲ್ಯಾ ಬಸ್ಕೆಂಚೇರ್ ಎದೊಳ್‌ಚ್ ತರ್ನ್ಯೊ ಸ್ತ್ರಿಯೊ ಬಸೊನ್ ಗಪ್ಪೆ ಮಾರ್ತಾಲ್ಯೊ.
ತಿತ್ಲ್ಯಾರ್ ಮ್ಹಜ್ಯಾ ಧುವೆನ್ ಮ್ಹಾಕಾ ಲೋವ್ ಕುಟ್ಟಿಲೆಂ ಆನಿ ವಿಚಾರ್ಲೆಂ. “ಡಾಡಾ . . . ಹಾಂವೆ ತುಜ್ಯಾ ಉಸ್ಕ್ಯಾರ್ ಬಸ್ಯೆತ್?” ಆದ್ಲ್ಯಾ ಎಕಾ ವರ್ಸಾ ಪಾಸುನ್ ಆಮಿ, ತಾಕಾಯೀ ಬಾರಾ ವರ್ಸಾಂ ಉತರ್ಲ್ಯಾಂತ್ ದೆಕುನ್ ಸಗ್ಳಿ ಟಿಕೆಟ್‌ಚ್ ಕಾಡ್ತಾಂವ್ ಆನಿ ಬಸ್ಸಾರ್ ಏಕ್ ತೆ ದೇಡ್ ವೋರ್ ಲಾಗ್ತಾ ದೆಕುನ್, ಆರಾಮಾಯೆರ್ ಬಸೊನ್ ಪಯ್ಣ್ ಕರ್ತಾಂವ್. ಪೂಣ್ ಅಚಾನಕ್ ಮ್ಹಜ್ಯಾ ಧುವೆಕ್ ಬಸ್ಸಾರ್ ಮ್ಹಜ್ಯಾ ಉಸ್ಕ್ಯಾರ್ ಬಸೊನ್ ಪಯ್ಣ್ ಕರ್ಚಿ ಆಶಾ ಕಿತ್ಯಾಕ್ ಆಯ್ಲಿಗಾಯ್? ಮ್ಹಣ್ ಚಿಂತಾನಾ, ಫಕತ್ ಹಾಂವ್ ಮಾತ್ ನ್ಹಯ್, ಧವೆಂ ಪುಡ್ವೆಂ ಆನಿ ಬುಸ್ಕೊಟ್ ನ್ಹೆಸೊನ್ ಆಮ್ಚ್ಯಾ ಬಸ್ಕೆಚ್ಯಾ ಮುಕ್ಲ್ಯಾ ವೊಳಿಲಾಗಿಂ ಉಭೊ ರಾವೊನ್ ಪಯ್ಣ್ ಕರ್ಚ್ಯಾ ಜಾಣ್ಟ್ಯಾಕ್, ಆಟ್ವ್ಯಾ ಕ್ಲಾಶಿಂತ್ ಶಿಕ್ಚಿ ಮ್ಹಜಿ ಧುವ್‌ಯೀ ಗುಮಾನ್ ದೀವ್ನ್ ಪಳಯ್ತಾ ತೆಂ ಮ್ಹಜ್ಯಾ ಗುಮಾನಾಕ್ ಗೆಲೆಂ.
ಹಾಂವೆ ಆರಾವ್ನ್ ಮ್ಹಜ್ಯಾ ಧುವೆಕ್ ಉಸ್ಕ್ಯಾರ್ ಘೆತ್ಲೆಂ ಆನಿ ಜಾಣ್ಟ್ಯಾಕ್ ಆಪವ್ನ್ ಬಸೊಂಕ್ ಮ್ಹಜ್ಯಾ ಕುಶಿಚಿ ಧುವೆಚಿ ಬಸ್ಕಾ ಸೊಡ್ನ್ ದಿಲಿ. ಸಂಗೀಸಾಚೆಂ ಪೊತೆಂ ಪಾಂಯಾಮುಳಾ ದವರ್ನ್ ಜಾಣ್ಟೊ ಸವ್ಕಾಸ್ ಬಸ್ಕೆರ್ ಬಸ್ಲೊ. ಥೊಡ್ಯಾ ವೆಳ್ಯಾನ್ ಜಾಣ್ಟ್ಯಾಚಿ ಟಿಕೆಟ್ ಕಾತ್ರುಂಕ್ ಆಯಿಲ್ಲ್ಯಾ ನಿರ್ವಾಹಕಾನ್ ಬೋವ್‌ಶಾ ತಾಣೆ ಕರಿಜೆ ಜಾಲ್ಲೆಂ ಕಾಮ್ ಆಮಿ ಕೆಲ್ಲ್ಯಾಕ್ ಆಸುಂಕ್ ಪುರೊ ಲ್ಹಾನ್ ಉಪ್ಕಾರಿ ಹಾಸೊ ಪಾಟಯ್ಲ್ಯೊ.
ಕಟ್ಪಾಡಿ ಭಾಯ್ರ್ ಸರ್ಲೆಲ್ಯಾ ಜಾಣ್ಟ್ಯಾನ್ ಮ್ಹಾಕಾ ವಿಚಾರ್ಲೆಂ “ತುಮಿ ಖಂಯ್ ಕಾಪು ದಿವ್ಳಾಕ್ ಭಾಯ್ರ್ ಸರ್ಲ್ಯಾ‌ತ್‌ಗೀ ?” ಹಾಂವೆ ಮ್ಹಳೆಂ ” ನಾಂ, ಕಾಪು ಧೆಂವೊನ್ ಆಮ್ಕಾಂ ಶಿರ್ವಾಂ ವಚೊಂಕ್” ಉಪ್ರಾಂತ್ಲೊ ಥೊಡೊ ವೇಳ್ ಪಾವ್ಸಾ ವಿಶ್ಯಾಂತ್, ಬೆಳ್ಯಾಂ ವಿಶ್ಯಾಂತ್, ಭರೊನ್ ವ್ಹಾಳ್ಚ್ಯಾ ಉದ್ಯವರ್ ನಂಯ್ ವಿಶ್ಯಾಂತ್ ಆಮಿ ಸೆಜಾರ‍್ಯಾಂಪರಿಂ ಉಲಯ್ಲ್ಯಾಂವ್. ತಿತ್ಲ್ಯಾರ್ ಆಮ್ಚೆಂ ನಿಲ್ದಾಣ್ ಆಯ್ಲೆಂ ಆನಿ ಆಮಿ ಧೆಂವ್ಲ್ಯಾವ್. ಆನಿ ಆಮ್ಚೆ ಪಾಟ್ಲ್ಯಾನ್ ಮಾಲ್ಘಡ್ಯಾ ನಾಗ್ರಿಕಾಂಚ್ಯಾ ಬಸ್ಕೆರ್ ಬಸೊನ್ ಗಪ್ಪೆ ಮಾರ್ನ್ ಆಯಿಲ್ಲ್ಯೊ ತರ್ನಾಟ್ಯೊ ಸ್ತ್ರೀಯೊಯ್ ದೆಂವ್ಯ್ಲೊ.
ಕಾಪು ಬಸ್ಸ್ ದೆಂವೊನ್, ಅಟೊರಿಕ್ಷಾರ್ ಶಿರ್ವಾಂ ವೆತಾನಾ – ಕರ್ನಾಟಕಾಚ್ಯಾ ಸಿದ್ದರಾಮಯ್ಯ ಸರ್ಕಾರಾನ್ ಸ್ತ್ರೀ ಪಯ್ಣಾರ‍್ಯಾಂಕ್ ಸರ್ಕಾರಿ ಬಸ್ಸಾಂನಿ ಫುಂಕ್ಯಾಕ್ ಪಯ್ಣ್ ಕರುಂಕ್ ದಿಲ್ಲಿ ಸವ್ಲತ್, ಸವ್ಲತ್ ಹಕ್ಕ್ ಮ್ಹಣ್ ಲೆಕುನ್ ಸವ್ಲತೆಚಿ ಖರ‍್ಯಾನ್ ಗರ್ಜ್‍‌ಚ್ ನಾತ್ಲೆಲ್ಯಾಂನಿ ಕರ್ಚಿಂ ಖೆಸ್ತಾಂವಾಂ, ಆಮಿ ಪಯ್ಣ್ ಕೆಲ್ಲ್ಯಾ ಬಸ್ಸಾರ್ ಘಡ್‌ಲ್ಲೆಪರಿಂ ಮಾಲ್ಘಡ್ಯಾ ನಾಗ್ರಿಕಾಂಕ್ ತಾಂಚ್ಯಾ ಹಕ್ಕಾಚಿ ಬಸ್ಕಾ ಸೊಡ್ನ್ ದೀನಾಸ್ತಾನಾ ಜಾಂವ್ಚೊ ಅನ್ಯಾಯ್ ಎಕಾ ಕವಿತೆಚ್ಯಾ ಕಡ್ವ್ಯಾಂಪರಿಂ ದೊಳ್ಯಾಂ ಸಮೊರ್ ವ್ಹಾಳೊನ್ ಆಯ್ಲೆ.
ಮ್ಹಜಿ ಧುವ್ ಪಾಚ್ವ್ಯಾನ್ ಭರೊನ್ ಗುರ್ವಾರಿಪರಿಂ ಸೊಭ್ಚ್ಯಾ ಗಾದ್ಯಾಮಧೆಂ ಡಾಂಬಾರಾಚ್ಯಾ ತಪ್ಕಟ್ ರಸ್ತ್ಯಾರ್ ಹಾಲೊನ್ ಧಲೊನ್ ವೆಚ್ಯಾ ಅಟೊರಿಕ್ಷಾರ್ ಕೊಂಕ್ರಿಟ್ ರಾನಾಂಥಾವ್ನ್ ಸುಟ್ಕಾ ಜೊಡ್ಲೆಲ್ಯಾ ಪಿಸೊಳ್ಯಾಪರಿಂ ಆಪ್ಲೆ ಕೇಸ್ ಉಬವ್ನ್ ಸಂತೊಸ್ ಭೊಗ್ತಾಲೆಂ.
ಧುವೊ ಕೆದಾಳಾ ಆವಯೊ ಜಾತಾತ್, ಧವೆಂ ಪುಡ್ವೆಂ – ಬುಸ್ಕೊಟ್ ನ್ಹೆಸೊನ್, ಸಂಗೀಸಾಚೆಂ ಪೊತೆಂ ಘೆವ್ನ್ ಗಡ್ದೆಚೆಂ ಬಸ್ಸ್ ಚಡ್ಚ್ಯಾ ಅನ್‌ವೊಳ್ಕಿ ಜಾಣ್ಟ್ಯಾ ಮನ್ಶ್ಯಾಂತ್, ಉಸ್ಕ್ಯಾರ್ ಖೆಳಯಿಲ್ಲ್ಯಾ ಆನಿ ತೊಂಡಾಕ್ ಲಾಯಿಲ್ಲ್ಯಾ ಆಬಾಕ್ ಪಳಯ್ತಾತ್ ಆನಿ ಬಾಪಾಯ್ಚ್ಯಾ ಉಸ್ಕ್ಯಾಚ್ಯಾ ಖುಸ್ತಾರ್ ಆಬಾಕ್ ಬಗ್ಲೆಕ್ ಬಸೊಂಕ್ ಜಾಗೊ ಕರ್ನ್ ದಿತಾತ್ ಕಳೊಂಕ್‌ಚ್ ಕಳಾನಾ.
Satish Acharya | Twitter/ @satishacharya
ಭುರ್ಗ್ಯಾಂಥಂಯ್ ಅಸಲಿಂ ಸಂವೇದನಾಂ ಜೀವ್ ಆಸ್ತಾ ಪರ್ಯಾಂತ್, ದುಬ್ಳ್ಯಾ ಲೊಕಾಕ್ ಪಾಂವ್ಚಿಂ ಸರ್ಕಾರಾಚಿಂ ‘ಶಕ್ತಿ’ ತಸಲಿಂ ಕಲ್ಯಾಣ್ ಕಾರ್ಯಕ್ರಮಾಂ, ಕೊಣೆಂ ಕಿತ್ಲಿಂ ನಕ್ಲಾಂ ಕೆಲ್ಯಾರೀ ಬಾಳ್ವತಾತ್ ಮ್ಹಣ್ಚ್ಯಾಕ್ ದುಬಾವ್ ನಾ.
► ಎಚ್ಚೆಮ್, ಪೆರ್ನಾಲ್
ಜಿವಿತ್ ಆಮ್ಚೆಂ ಅಶೆಂ . . . ದಿಸ್ಪಡ್ತ್ಯಾ ಜಿಣ್ಯೆಂತ್ ಘಡ್ಲೆಲ್ಯಾ ಘಡಿತಾಚೆರ್ ಕಿಟಾಳಾರ್ ಫಾಯ್ಸ್ ಜಾಂವ್ಚೆಂ ‘ನವೆಂ ಅಂಕಣ್’ ಘಡಿತ್/ ಅನ್ಭೊಗ್ – ಗೋಡ್, ಕೊಡು ವಾ ಭರ್ಶಿಕ್ ಅನ್ಭೊಗಾಂಚೊಂ ಆಸ್ಯೆತ್. ಪೂಣ್ ಬರ್ಪಾಂತ್ ಜಿವಾತರ್ಫೆಚಿಂ ಸಂವೇದನಾಂ ಆಸ್ಚೆಂ ಗರ್ಜೆಚೆಂ. ‘ಕಾಣಿಕ್’ ಪತ್ರಾರ್ ಹ್ಯಾಚ್ ನಾಂವಾರ್ ಏಕ್ ವಾಚ್ಪ್ಯಾಂಚಿಂ ವೋಳ್ ಫಾಯ್ಸ್ ಜಾತಾಲಿ. ‘ಮಯೂರ’ ಕನ್ನಡ ಸಾಹಿತಿಕ್ ನೆಮಾಳ್ಯಾಚೆರ್ ಅಸಲಿಚ್ ವಾಚ್ಪ್ಯಾಂಚಿಂ ಏಕ್ ವೋಳ್ ಆಸಾ. ತುಮ್ಚ್ಯಾ ಜಿವಿತಾಂತ್ಲೆ ಅನ್ಭೊಗ್, ಘಡಿತಾಂ ಆಸ್ಲ್ಯಾರ್ editor@kittall.com ಹಾಂಗಾಸರ್ ಇ-ಮೇಲ್ ಕರಾ. ವಾ 9449770629 ಹ್ಯಾ ನಂಬ್ರಾಚೆರ್ ವಾಟ್ಸಪ್ ಕರ್ಯೆತ್. ಸಬ್ದಾಂಚಿಂ ಮೀತ್ ನಾ. ಸುಧಾರಣ್ ಗರ್ಜ್ ಆಸ್ಲ್ಯಾರ್ ತಿದ್ವುನ್, ಉಪ್ರಾಂತ್ ಅರ್ಸೊ ಪತ್ರಾಚೆರೀ ಫಾಯ್ಸ್ ಕರ್ತೆಲ್ಯಾಂವ್.
– ಸಂಪಾದಕ್