ಜಲಿಯನ್‍ವಾಲಾಬಾಗ್ 3.0 ಚಿ ತಯಾರಿ ?

ಜಲಿಯನ್‍ವಾಲಾಬಾಗ್ ಹತ್ತ್ಯಾಕಾಂಡ್ ಆಮಿ ಸರ್ವ್ ಜಾಣಾಂವ್. ಧಾವಿ ಪುಣ್‍ಯೀ ಶಿಕ್‍ಲ್ಲ್ಯಾ ಹರ್ಯೆಕ್ಲ್ಯಾನ್‍ಯೀ ಶೆಂಬೊರ್ ವರ್ಸಾಂ ಪಯ್ಲೆಂ ಜಾಲ್ಲ್ಯಾ ಹ್ಯಾ ಹತ್ತ್ಯಾಕಾಂಡಾಚೊ ಉಲ್ಲೇಖ್ ಇಸ್ಕೊಲಾಚಾ ಚರಿತ್ರೆ ಪುಸ್ತಕಾಂನಿ ವಾಚ್‍ಲ್ಲೊ ಉಗ್ಡಾಸ್ ಆಸ್ತಲೊಚ್. ಪೂಣ್ ಆಜ್‍ಕಾಲ್ ಶಿಕಾಪ್ ಮ್ಹಳ್ಳೆಂ “ಪುಸ್ತಕದ ಬದನೇಕಾಯಿ” ಜಾಲ್ಲೆಂ ಆಸ್ತಾಂ ಪಾಂಚ್ವೆ ಕ್ಲಾಸಿಕ್ ಪಾವ್ತಾನಾ ಚೊವ್ತೆಂತ್ ಕಿತೆಂ ಶಿಕ್‍ಲ್ಲೆಂ ಮ್ಹಳ್ಳ್ಯಾಚೊ ಉಡಾಸ್‍ಚ್ ಆಸಾನಾ, ಕಿತ್ಯಾಕ್ ಆಯ್ಚಿಂ ಚಡಾವತ್ ಶಿಕ್ಷಕಾಂಯೀ ಚೊವ್ತೆಂತ್ ಶಿಕ್‍ಲ್ಲೆಂ ಮುಕ್ಲ್ಯಾ ಶಿಕ್ಪಾಂತ್‍ಯೀ ಗರ್ಜ್ ಪಡ್ತಾ ಮ್ಹಳ್ಳೆಂ ಸಾಂಗೊಕ್‍ಚ್ ವಿಸರ್ತಾತ್ ಜಾಯ್ಜಯ್; ತಾಂಕಾಂ ಆನಿ ತಶೆಂಚ್ ಭುರ್ಗ್ಯಾಂಚಾ ವ್ಹಡಿಲಾಂಕ್ ಜಾಯ್ ಫಕತ್ ಭುರ್ಗ್ಯಾಂಚೆ ಮಾರ್ಕ್ಸ್ ಮಾತ್ರ್!

1957 ಥಾವ್ನ್ ಭಾರತಾಚಿ ಸ್ವಾತಂತ್ರ್ಯಾ ಖಾತಿರ್ ಚಳ್ವಳ್ ಜೊರಾನ್ ಚಲ್ತೆಚ್ ಆಸ್‍ಲ್ಲಿ; ಬ್ರಿಟಿಷಾಂಚಾ ಕಾನೂನಾ ವಿರೋಧ್ ಲೋಕ್ ಪ್ರತಿಭಟನ್ ಕರ್ತೆಚ್ ಆಸ್‍ಲ್ಲೊ. ತಶೆಂ ಮ್ಹಣೊನ್ ಸ್ವತಂತ್ರ್ ಭಾರತಾಂತ್ ಪ್ರತಿಭಟನಾಂ ಜಾಂವ್ಕ್‌ನಾಂತ್ ಯಾ ಜಾಯ್ನಾಂತ್ ಮ್ಹಣ್‍ಯೀ ನ್ಹಯ್. ತೀನ್ ಕೃಷಿ ಕಾನೂನಾಂ ಪಾಟಿಂ ಕಾಡ್ಚಾ ಪಾಸತ್ ಮೋದಿ ಸರ್ಕಾರಾ ವಿರೋಧ್ ಲಾಖೊಂ ರೈತಾಂನಿ ವರ್ಸ್‍ಭರ್ ಪ್ರತಿಭಟನ್ ಕರುನ್ ದಾಖ್ಲೊ ರಚ್ಲಾ ಮಾತ್ರ್ ನ್ಹಯ್ ಗೋದ್ರಾಕಾಂಡಾ ವರ್ವಿಂ ವ್ಹಾಳ್‍ಲ್ಲ್ಯಾ ರಗ್ತಾಚಿಂ ಖತಾಂ ಆಜುನ್‍ಯೀ ಜಿವಿಂಚ್ ದವರ್‌ಲ್ಲ್ಯಾ ಮೋದಿನ್‍ಯೀ ಕಠೋರತೆಂತ್ ತಾಣೆ ಹಿಟ್ಲರಾಚೊ ದಾಖ್ಲೊಯೀ ಮೊಡ್ಲಾ. ಸಾತ್ಶಾಂ ವಯ್ರ್ ರೈತ್ ಮರಣ್ ಸಯ್ತ್ ಪಾವ್ಲೆ ಆನಿ ಬಂದೂಕ್ ವಾಪಾರುನ್, ಉದಾಕ್ ಮಾರುನ್ ತ್ಯಾ ಚಳ್ವಳೆಕ್ ನಿಯಂತ್ರಣಾಕ್ ಹಾಡುಂಕ್ ಸರ್ಕಾರಾನ್ ಮುಕಾರ್ ಘಾಲ್ಲೆಂ ಜಾವ್ನಾಸಾ ಸಾಂಬಾಳಾಕ್ ನವ್ಕರಿ ಕರ್ಚಾ ತ್ಯಾಚ್ ರೈತಾಂಚಾ ಪುತಾಂಕ್ ಆನಿ ಧುವಾಂಕ್!

ಜಲಿಯನ್‍ವಾಲಾಬಾಗ್ ಯಾ ಅಮೃತ್‍ಸರ್ ಹತ್ತ್ಯಾಕಾಂಡ್ ಜಾಲ್ಲೊ ಜಾಲ್ಲೊ 13 ಎಪ್ರಿಲ್ 1919-ಕ್.  ಬ್ರಿಟಿಷಾಂನಿ ಜ್ಯಾರಿಯೆಕ್ ಹಾಡ್‍ಲ್ಲ್ಯಾ Rowlatt Act-ಚಾ ವಿರೋಧ್ ಜಲಿಯನ್‍ವಾಲಾಬಾಗಾಂತ್ ಶಾಂತಿಪೂರ್ವಕ್ ಪ್ರತಿಭಟನ್ ಚಲ್ತೆಚ್ ಆಸ್‍ಲ್ಲೆಂ. ಹ್ಯಾ ಉದ್ಯಾನಾಚಾ ತೀನ್ ಕುಶಿಂನಿಯೀ ವ್ಹಡ್ ಇಮಾರತ್ಯೊ ಆಸ್‍ಲ್ಲ್ಯಾನ್ ಪ್ರವೇಶಾಕ್ ಆನಿ ನಿರ್ಗಮನಾಕ್ ಆಸ್‍ಲ್ಲಿ ಏಕ್‍ಚ್ ವಾಟ್ ಬಂಧ್ ಕರವ್ನ್ ಲೊಕಾಚೊ ಸಂಹಾರ್ ಕರುಂಕ್ ಮ್ಹಣ್ ಬ್ರಿಟಿಷ್ ಸರ್ಕಾರಾಚೊ ಆದೇಶ್ ಪಾಳ್‍ಲ್ಲೆ ಬ್ರಿಟಿಷಾಂಚಿ ನವ್ಕರಿ ಕರುನ್ ಸಾಂಬಾಳ್ ಘೆತೆಲೆ ಚಡಾವತ್ ಸೊಜೆರ್‌ಯೀ ಭಾರತೀಯ್‍ಚ್! ಕಾನೂನಾಂದ್ವಾರಿಂ, ಆದೇಶಾಂದ್ವಾರಿಂ ಭಾವಾಕ್ ಭಾವಾ ವಿರೋಧ್, ಸೆಜಾರ‍್ಯಾಕ್ ಸೆಜಾರ‍್ಯಾ ವಿರೋಧ್, ಗಾಂವಾಂಕ್ ಗಾಂವಾಂ ವಿರೋಧ್, ರಾಜ್ಯಾಂಕ್ ರಾಜ್ಯಾಂ ವಿರೋಧ್ ಝುಜೊಂಕ್ ಕರ್ಚೆಂ ಸರ್ಕಾರಾನ್ಂಚ್! ಕಿತ್ಯಾಕ್? ಹಾಕಾ ಏಕ್‍ಚ್ ಕಾರಣ್ – ಕಾನೂನ್, ನವ್ಕರಿ ಆನಿ ಸಾಂಬಾಳಾಚಾ ನಾಂವಾನ್ ಲೊಕಾಕ್ ವಾಪಾರುನ್ ಲೊಕಾಚೆರ್‌ಚ್ ನಿಯಂತ್ರಣ್!

ಆಜ್‍ಕಾಲ್ ಗೂಗ್‍ಲ್ ಕಿತೆಂ ಸಾಂಗ್ತಾ ತೆಂ ಲೋಕ್ ಪಾತ್ಯೆತಾ; ಎಕಾ ಲೆಕಾನ್ ಗೂಗ್‍ಲ್ ತಾಂಚೊ ದೇವ್‍ಚ್ ಜಾಲಾ! 1919 ಜಾಲ್ಲ್ಯಾ ತ್ಯಾ ಪುರ್ವಿಲ್ಯಾ ಜಲಿಯನ್‍ವಾಲಾ ನರಸಂಹಾರಾಂತ್ 379 – 1500ಲೋಕ್ ಮೆಲೊ ಆನಿ 1500 ಲೋಕ್ ಘಾಯೆಲೊ ಮ್ಹಣ್ ಸತಾವಿಣೆ ದುಸ್ರೆಂ ಕಾಂಯ್ ನಾ ಸಾಂಗ್ಚೊ ಗೂಗ್‍ಲ್ ಸಾಂಗ್ತಾ. ಪೂಣ್ ಮರ್ಣಾಚಾ ಸಂಖ್ಯಾಂತ್ ಇತ್ಲೊಯ್ ವ್ಹಡ್ ಅಂತರ್ ಪಳಯ್ತಾನಾ ಹೊ ಗೂಗ್‍ಲ್ ದೇವ್ ಕಿತ್ಲೊ ಸತೆವಂತ್ ಮ್ಹಣ್ ಕೊಣಾಯ್ಕ್‍ಯೀ ಸಮ್ಜಾತ್. ತಶೆಂ ಆಸ್ತಾನಾ ಜಲಿಯನ್‍ವಾಲಾಬಾಗ್ 2.0 ವಿಶಿಂ ಗೂಗ್‍ಲಾ ಲಾಗಿಂ ಸವಾಲ್ ಕೆಲ್ಯಾರ್ ತಾಣೆ ಸಾಂಗ್‍ಲ್ಲ್ಯಾಂತ್ಲೆಂ ಕಿತ್ಲೆಂ ಸತ್ ಮ್ಹಣ್ ಪಾತ್ಯೆಂವ್ಚೆಂ? ಆತಾಂ ಜಲಿಯನ್‍ವಾಲಾಬಾಗ್ 2.0 ಹತ್ಯಾಕಾಂಡ್ ಖಂಯ್ ಆನಿ ಕೆದಾಳಾ ಜಾಲೊ ಮ್ಹಳ್ಳೆಂ ಸವಾಲ್ ತುಮ್ಚಾ ಮತಿಂತ್ ಉದೆಂವ್ಚೆಂ ಸಹಜ್.

ಎಕಾ ಘಡಿತಾ ತಶೆಂಚ್ ದುಸ್ರೆಂ ಘಡಿತ್ ಜಾತಾನಾ, ತ್ಯಾ ದುಸ್ರ್ಯಾ ಘಡಿತಾಕ್ ಪಯ್ಲೆಂಚಾ ಘಡಿತಾಚೆಂ ನಾಂವ್ ದಿಂವ್ಚೆಂ ಆಜ್ ಸದಾಂಚೆಂ ಜಾಲಾಂ. ಗೋದ್ರಾಕಾಂಡ್, ನಿರ್ಭಯಕಾಂಡ್, ಇತ್ಯಾದಿ ಆಮಿ ಜಾಣಾಂವ್. ಮುಕ್ಲ್ಯಾ ದಿಸಾಂನಿ ಮಣಿಪುರಾಂತ್, ಹರ್ಯಾಣಾಚಾ ನೂಹಾಂತ್ ಜಾಲ್ಲ್ಯಾ ಘಡಿತಾಂಕ್‌ಯೀ ಕಾಂಡ್ ಸಬ್ಧ್ ಲಾಗವ್ನ್ ಮಣಿಪುರ್‌ಕಾಂಡ್, ನೂಹ್‍ಕಾಂಡ್ ಜಾತೆಲಿಂ. ಭಾರತಾಂತ್ ಅಸಲ್ಯಾ ಕಾಂಡಾಂಕ್ ಕಾಯ್ ಬರ್ಗಾಲ್ ನಾ.  ಪಾಟ್ಲ್ಯಾ ತೀನ್-ಚಾರ್ ವರ್ಸಾಂ ಥಾವ್ನ್ ಕೊವಿಡ್‍ಕಾಂಡ್ ಚಲ್ತೆಚ್ ಆಸಾ.

ಜಲಿಯನ್‍ವಾಲಾಬಾಗ್ ಹತ್ತ್ಯಾಕಾಂಡಾಂತ್ ಹೆರ್ ಖಂಯ್ಚಾಯ್ ವಾಟೆನ್ ಲೋಕ್ ಧಾಂವಾನಾಶೆ ಸುನಿಶ್ಚಿತ್ ಕರ್ನ್, ಭಾಯ್ರ್ ವಚೊಂಕ್ ಆಸ್‍ಲ್ಲ್ಯಾ ಏಕಾ‍ಚ್ ವಾಟೆಚೆರ್ ಬಂದೂಕ್‍ಧಾರಿ ಸೊಜೆರಾಂ ಥಾವ್ನ್   ಲೊಕಾಚೊ ಸಂಹಾರ್ ಜಾಲ್ಲ್ಯಾ ತಶೆಂ ಕೊವಿಡ್ ಕಾಂಡಾಂತ್‍ಯೀ ಜಾಲಾಂ ಆನಿ ಜಾತೆಚ್ ಆಸಾ. ಲೋಕ್ ಸಂಪೂರ್ಣ್ ಥರಾನ್ ನಿಯಂತ್ರಣಾಕ್ ಯೆತಾ ಪರ್ಯಾಂತ್ ಹೊ ಕಾಂಡ್ ಚಲ್ತೆಚ್ ಆಸ್ತಲೊ. ವ್ಹಡ್ ಏಕ್ ಮಹಾಮಾರಿ ಆಯ್ಲ್ಯಾ ಆನಿ ತಾಚೆರ್ ಜಯ್ತ್ ವರೊಂಕ್ ಸರ್ವಾಂನಿ ಸರ್ವ್ ಥರಾಂಚೊ ಸಹಕಾರ್ ದೀಜಯ್ ಮ್ಹಣೊನ್ ಲೊಕಾಲಾಗಿಂ ಆಗ್ರೊ ಕರ್ನ್, ವೊಕಾತ್ ನಾತ್‍ಲ್ಲ್ಯಾಚ್ ತ್ಯಾ ಪಿಡೆಕ್ ದುಸ್ರೊ ಖಂಯ್ಚೋಯ್ ಇತರ್ ಉಪಚಾರ್ ದಿಂವ್ಚೆಂ ಏಕ್ ಆಪ್ರಾದ್ ಮ್ಹಣ್ ಠರಾವ್ನ್ ಆಯುರ್ವೇದ್, ಹೊಮಿಯೊಪಥಿ ಆನಿ ಇತರ್ ನೈಸರ್ಗಿಕ್ ಉಪಚಾರಾಂಚೆರ್ ನಿರ್ಬಂಧ್ ಘಾಲೆ.  ದೆಕುನ್ ಉರ್ಲಿ ಏಕ್‍ಚ್ ವಾಟ್,   ಮೊಡರ್ನ್ ಮೆಡಿಸಿನ್ ವ ಅಲ್ಲೊಪಥಿ.

ಪೂಣ್ ಹಾಂತುಂಯೀ ಯೆದೊಳ್ ಪರ್ಯಾಂತ್ ಕಸಲೇಂಯ್ ವೊಕಾತ್‍ಚ್ ನಾತ್‍ಲ್ಲೆಂ ದೆಕುನ್ ಲೊಕಾಚೆರ್ ಮಲೇರಿಯಾಚಿಂ, AIDS-ಚಿಂ ಆನಿ ಇತರ್ ಪ್ರತಿಬಂಧಿತ್ ಕೆಲ್ಲಿಂ ವೊಕ್ತಾಂ ದೀವ್ನ್ ಗೋದಾಮಾಂ ಖಾಲಿ ಜಾತಾ ಮ್ಹಣಾಸರ್ ವ ಹೊ ದಂಧೊ ಕರ್ತೆಚ್ಯಾಂಚಿಂ ಪೊಟಾಂ ಫುಟ್ತಾಂ ಮ್ಹಣಾಸರ್ ಎಕಾ ಥರಾಚೊ ಪ್ರಯೋಗ್ ಚಲ್ಲೊ. ಹ್ಯಾ  ಪ್ರಯೋಗಾಂತ್ ಲೊಕಾಚಿಂ ಬೊಲ್ಸಾಂ ಖಾಲಿ ಜಾಲಿಂ ಮಾತ್ರ್ ನ್ಹಯ್, ತ್ಯಾ ವೊಕ್ತಾಂಚಾ ದುಷ್ಪರಿಣಾಮಾಂ ವರ್ವಿಂ ಕಿತ್ಲಿಂ ಮರ್ಣಾಂ ಜಾಲ್ಯಾಂತ್ ಮ್ಹಣ್ ಸಮ್ಜಾನಾಸ್ತಾಂ, ಗೂಣ್ ಕರುಂಕ್ ಸಕ್ಚೊ ಹೆರ್ ವಾಟೊ ಬಂದ್ ಆಸ್‍ಲ್ಲೆ ಆನಿ ಆಸ್‍ಲ್ಲ್ಯಾ ಎಕಾಚ್ ವಾಟೆರ್ ಲೊಕಾಕ್ ವಿವಿಧ್ ಥರಾನ್ ಫುಸ್ಲಾವ್ನ್ ಜಾಯ್ನಾ ತರ್ ಭೆಷ್ಟಾವ್ನ್,  ಗುಳಿಯೊ ಆನಿ ಸುವಿಯೊ ಘೆವ್ನ್ ಸರ್ಕಾರಾ ಥಾವ್ನ್ ಸಾಂಬಾಳ್ ಘೆಂವ್ಚೆ ಸ್ವಾಸ್ಥ್ಯ್ ಕರ್ಮಿ ಯಾ ಸೊಜೆರ್, ಖಾಕಿ ನ್ಹಯ್ ಧವೆ ಕೋಟ್ ಘಾಲುನ್ ಬಸ್‍ಲ್ಲಿಂ.

ಕೋಣ್ ಮ್ಹಣ್ತಾ ಹರ್ಯೇಕ್ ಪ್ರಕರಣಾ ಪಾಟ್ಲ್ಯಾನ್, ಆಸ್ಪತ್ರೆಕ್ ಭರ್ತಿ ಜಾಲ್ಲ್ಯಾ ಹರ್ಯೇಕ್ ಪಿಡೆಸ್ತಾ ಪಾಟ್ಲ್ಯಾನ್ ಆನಿ ಕೊವಿಡಾ ವರ್ವಿಂಚ್ ಮರಣ್ ಜಾಲಾಂ ಮ್ಹಣ್ ಬರವ್ನ್ ದಿಲ್ಲ್ಯಾ ಹರ್ಯೇಕ್ ಪ್ರಮಾಣ್ ಪತ್ರಾ ಪಾಟ್ಲ್ಯಾನ್ ಹ್ಯಾ ಸೊಜೆರಾಂಕ್ ಯಾ ತಾಂಚಾ ಸಂಸ್ಥ್ಯಾಂಕ್ ಮೊಟಿ ದುಡ್ವಾ ರಾಸ್ ಮೆಳ್ತೆಲಿ ಮ್ಹಣ್ ತೆಣೆ-ಹೆಣೆ ಥೊಡ್ಯೊ ಖಬ್ರೊ ಸಾಂಗ್ತಾತ್.  ಧುಂವರ್ ಆಸಾ ಥಂಯ್ ಇಲ್ಲೊ ಪುಣ್‍ಯೀ ಉಜೊ ಆಸ್ತಾಚ್ ನ್ಹಯ್‍ಗೀ?

ಸಾಂಭಾಳಾಚ್ಯಾ ಸೊಜೆರಾಂನಿ ಫಕತ್ ಆದೇಶಾಂಚೆಂ ಪಾಲನ್ ಕರ್ಚೆಂ ಶಿವಾಯ್ ತೊ ಆದೇಶ್ ಕಿತ್ಲೊ ಸಮಾ ಯಾ ಚುಕಿಚೊ ಮ್ಹಳ್ಳೆಂ ಸವಾಲ್ ಕರ್ಚೆಂ ಧೈರ್ ಆಸಾನಾ. ಆತಾಂ ಥೊಡೆ ದುಷ್ಪರಿಣಾಮ್ ದಿಸೊನ್ ಯೆತಾನಾ ಆನಿ ಅಚಾನಕ್, ಕಾರಾಣಾಂವಿಣೆಂ ಮರ್ಣಾಂ ಜಾತಾನಾ ತೆಂ ಫಕತ್ ಲೊಕಾಚಾ ಜೀವನ್‍ಶೈಲೆಚೆರ್ ಲೊಟುನ್ ಘಾಲ್ಚೆಂ ಪ್ರಯತ್ನ್ ಚಲ್ಲಾಂ ಆನಿ ಚಲ್ತೆಚ್ ಆಸಾ.  ಪೂಣ್ ಥೊಡ್ಯಾ ಸ್ವಾಸ್ಥ್ಯ್ ಸಂಸ್ಥ್ಯಾಂನಿಂಚ್ ತೆಂ  ಮಾನುನ್ ಘೆತಾನಾ ಲೊಕಾಚಿ ಜಾಗರೂಕತಾ ಆನಿಕ್‍ಯೀ ಚಡ್ಲ್ಯಾ. ಪಾಟ್ಲ್ಯಾ ಥೊಡ್ಯಾ ದಿಸಾಂ ಥಾವ್ನ್ ಆತಾಂ ಕೊವಿಡಾಚೆಂ ಅಂತ್ ಜಾಲೆಂ ಮ್ಹಣ್ ಸರ್ವ್‍ಸಾಧಾರಣ್ ಚಡಾವತ್ ಲೋಕ್ ಚಿಂತಾಲೊ. ಅಶೆಂ ಆಸ್ತಾಂ G20 ನಾಂವಾರ್ ಜಲಿಯನ್‍ವಾಲಾಬಾಗ್ 3.0-ಚಿ ತಯಾರಿಯೀ ಜಾಲ್ಯಾ ಮ್ಹಳ್ಳ್ಯಾ ವಿಶಿಂ ಅಜ್ಞಾನಾಂತ್‍ಚ್ ಉರ್ತಲೊ!

G20 ಹಾಂತು ಫಕತ್ ವೀಸ್ ದೇಶ್ ಮಾತ್ರ್ ನ್ಹಯ್ ಇತರ್ ಥೊಡ್ಯಾ ಪ್ರಮುಖ್ ದೇಶಾಂಚ್ಯಾ ಮುಖೆಲ್ಯಾಂಕ್‍ಯೀ ಆಮಂತ್ರಣ್ ದಿಲ್ಲೆಂ.  ಹ್ಯಾ ಸಮ್ಮೇಳನಾಚೊ ಉದ್ದೇಶ್ ಆರ್ಥಿಕ್ ಆನಿ ರಾಜಕೀಯ್ ಸಮಸ್ಯಾಂಚೊ ಪರಿಹಾರ್ ಸೊದ್ಚೆಂ ತರ್ ತಾಂಚೆ ಮಧೆಂ ವೈಜಕೀಯ್ ಸಂಸ್ಥೊ ಜಾವ್ನಾಸ್ಚಾ WHO-ಚಾ ಅಧಿಕಾರಿಂಕ್ ಆನಿ ಹೆರ್ ವೊಕ್ತಾಂ ಕಂಪ್ಣ್ಯಾಂಚಾ ಮ್ಹಾಲಿಕಾಂಕ್ ಥಂಯ್ ಕಸಲೆಂ ಕಾಮ್? ಆತಾ’ತಾಂ ಸಂಸಾರಾರ್ ಪರ್ತ್ಯಾನ್ ಥಂಯ್-ಹಾಂಗಾ ಕೊರೊನಾಚೆ ನವೆ ವೇರಿಯೆಂಟ್ ಮ್ಹಣ್ ಸಾಂಗೊನ್ ಲೊಕ್ಡಾವ್ನ್, ಮಾಸ್ಕ್, ವ್ಯಾಕ್ಸೀನ್ ಇತ್ಯಾದಿ ಅನಿವಾರ್ಯ್ ಜಾಂವ್ಚೊ ಖಬ್ರೊ ಯೆತೆಚ್ ಆಸಾತ್ ಆನಿ G20 ಸಮ್ಮೇಳನಾಂತ್ ಮುಕ್ಲ್ಯಾ ದಿಸಾಂನಿ ಯೆವ್ಜಣ್ ಕೆಲ್ಲ್ಯಾ ಮಾಹಾಮಾರಿ ವೆಳಾರ್ ವೈರಸಾಚಾ ನಾಂವಾರ್ ಲೊಕಾಚೆರ್ ನಿಯಂತ್ರಣ್ ಕಶೆಂ ಹಾಡ್ಚೆಂ ಮ್ಹಳ್ಳ್ಯಾಚಿ ವಿಸ್ತಾರ್ ಚರ್ಚಾ ಕರುನ್ ಕಾನೂನಾಂ ಆನಿ ನಿಯಮಾಂ ಠರಾಯ್ಲ್ಯಾಂತ್ ಮ್ಹಳ್ಳೆಂಯೀ ಕಳೊನ್ ಯೆತಾ. ಹಿ G20 ಕವಾಯತ್ ಜಲಿಯನ್‍ವಾಲಾಬಾಗ್ 3.0-ಚಿ ಏಕ್ ತಯಾರಿ ಮ್ಹಳ್ಯಾರ್ ಚೂಕ್ ಜಾಯ್ತ್ ?

ಜಲಿಯನ್‍ವಾಲಾಬಾಗ್ 2.0-ಂತ್ ಸಂಸಾರಾಚಾ ಸತ್ತರ್ ಠಕ್ಕೆ ಲೊಕಾಕ್ ವ್ಯಾಕ್ಸೀನ್ ದೀವ್ನ್ ಜಾಲಾಂ ಮ್ಹಣ್ ಥೊಡ್ಯೊ ವರ್ದ್ಯೊ ಸಾಂಗ್ತಾತ್.  ಆತಾಂ ಉರ್‌ಲ್ಯಾ ತೀಸ್ ಠಕ್ಕೆ ಲೊಕಾಕ್‍ಯೀ ತೆಂ ತೊಪ್ಚಾ ಖಾತಿರ್ ಕಠಿಣ್ ನಿರ್ಬಂಧ್ ಮುಕ್ಲ್ಯಾ ದಿಸಾಂನಿ ಯೆಂವ್ಚೆ ಖಂಡಿತ್. ಕೊವಿಡಾಚೆಂ ನಾಂವ್ ಆತಾ’ತಾಂ ಇಲ್ಲೆಂ ಸಸಾರ್ ಜಾವ್ನ್ ಯೆತಾನಾ, ಕೇರಳಾಂತ್ ನಿಫಾ ಆಯ್ಲಾಂ ದೆಕುನ್ ಥಂಯ್ ಯೆದೊಳ್‍ಚ್ ಅಧಿಕಾರ‍್ಯಾಂಚೊ ಆನಿ ಸ್ವಾಸ್ಥ್ಯ್ ಕರ್ಮಿಂಚೊ ದುಕ್ರಾ-ಸೊಂಡಿಯೊ ಪಳೆಂವ್ಕ್ ಮೆಳ್ತಾತ್. ಥಂಯ್ಚೆಂ ಸ್ವಾಸ್ಥ್ಯ್‌ಮಂತ್ರಿ ಲೊಕಾಕ್ ಮಾಸ್ಕ್ ಘಾಲುಂಕ್ ಸಲಹಾ ದಿತಾ ತರ್‌ಯೀ ತ್ರಿಶ್ಯೂರ್‌ಚೊ  Epidemiologist Raman Kutty ತೆಂ ವೈರಸ್ ವಾರ‍್ಯಾರ್ ಪ್ರಸಾರ್ ಜಾಯ್ನಾ ದೆಕುನ್ ಮಾಸ್ಕ್ ಘಾಲ್ಚಾಂತ್ ಕಸಲೇಂಯ್ ರಾಜಾಂವ್ ಯಾ ಸೈದ್ಧಾಂತಿಕ್ ಥಳ್ ನಾ ಮ್ಹಣ್ತಾ. ಕೇರಳಾಚಾ ರಾಜ್‍ಕಾರಣಿ ಆನಿ ಸ್ವಾಸ್ಥ್ಯ್ ವಿಭಾಗಾ ಮಧೆಂ ಆಸ್‍ಲ್ಲೊ ವಿರೋಧಾಬಾನ್ ಹಾಂಗಾ ಉಗ್ತ್ಯಾನ್ ದಿಸೊನ್ ಯೆತಾ.

ಕೊವಿಡ್ ಯಾ ನಿಫಾ! ಸರ್ಕಾರಾನ್ ಅರ್ಥ್ ನಾತ್‍ಲ್ಲೆ ನಿರ್ಬಂಧ್ ಘಾಲ್ಚಿ ಸರ್ವ್ ಸಾಧ್ಯತಾ ಆಸಾ ಆನಿ ಎಕಾ ಮಹಾಮಾರಿಚಾ ನಾಂವಾರ್ ಲೊಕಾಕ್ ಪರತ್ ಸುವಿಯಾಂ ವಯ್ರ್ ಸುವಿಯೊ ತೊಪ್ಚೆಂ ಕಾರ್ಯಕ್ರಮ್‍ಯೀ ತಯಾರ್ ಆಸಾ ಮ್ಹಳ್ಳ್ಯಾಪರಿಂ ದಿಸ್ತಾ. ಏಕ್ ದುಸ್ರೆಂಚ್ ನಾಂವ್ ದೆಕುನ್ ಲೋಕಾನ್ ಹೆ ಪಾವ್ಟಿಂಯೀ ಜಾಳಾಂತ್ ಸಾಂಪಡ್ಚಿ ಸಾಧ್ಯತಾ ಆಸಾ. ಆನಿ ಜಾಗರೂಕ್ ಲೊಕಾಕ್‍ಯೀ ಹ್ಯಾ ಜಾಳಾಂತ್ ವೊಡ್ಚಿ ತಯಾರಿಯೀ ಜಾಲ್ಲ್ಯಾ ಪರಿಂ ದಿಸ್ತಾ! ಪೂಣ್ ತೆಂ ಕಶೆಂ ಸಾಧ್ಯ್ ಮ್ಹಳ್ಳೆಂ ಸವಾಲ್ ಸ್ವಾಭಾವಿಕ್.

ವ್ಹಡ್ಲೆ ನೋಟ್ ಯೆದೊಳ್‍ಚ್ ಉಣೆ ಜಾಲ್ಯಾತ್ ಮ್ಹಳ್ಯಾರ್ ತೆ ಬ್ಯಾಂಕಾಂನಿ ಜಮೊ ಜಾಲ್ಯಾತ್. ಆನಿ ಮುಕಾರ್ ಸಕ್ಕಡ್‍ಯೀ ಒನ್ಲಾಯ್ನ್ ಮ್ಹಣೊನ್ ದಾಕ್ಟೆ ನೋಟ್‍ಯೀ ಚಲಾವಣೆ ಥಾವ್ನ್ ಬಂಧ್ ಕರ್ಚಿ ಯಾ  ಕನಿಷ್ಠ್ ತೀನ್ ಸುವಿಯೊ ಘೆನಾತ್‍ಲ್ಲ್ಯಾಂಕ್ ಬ್ಯಾಂಕಾಥಾವ್ನ್ ಪಯ್ಶೆ ಕಾಡುಂಕ್ ನಿರ್ಬಂಧ್ ಘಾಲ್ಚಿ ಯಾ ತಾಂಚೊ ಖಾತೊ FREEZE ಕರಂವ್ಚಿ ಸರ್ವ್ ಸಾಧ್ಯತಾ ಆಸಾ. ಆನಿ ತಶೆಂ ಜಾಯ್ತ್ ಜಾಲ್ಯಾರ್ ಜಲಿಯನ್‍ವಾಲಾಬಾಗ್ 3.0-ಂತ್ ಭಾಯ್ರ್ ವೆಚಿ ವಾಟ್ ಆನಿಕ್‍ಯೀ ಚಡ್ ಅಶೀರ್ ಜಾತಾ ದೆಕುನ್ ಧವೆ ಕೋಟಾಂಚ್ಯಾ ಸೊಜೆರಾಂಚಾ ಬಂದೂಕೆ (ಸುವಿಯಾಂ) ಮುಕಾರ್ ಮರಣಾಗತ್ ನ್ಹಯ್ ತರ್‌ಯೀ ಶರಣಾಗತ್ ಜಾಯ್ಜಯ್ ಪಡ್ತೆಲೆಂ. ದೆಕುನ್ ಜಲಿಯನ್‍ವಾಲಾಬಾಗ್ 2.0-ಂತ್ ಶರಣಾಗತ್ ಜಾಲ್ಲ್ಯಾಂಚಾ ಮರ್ಣಾಂಚೊ ಸಂಖೊ ದೋನ್-ತೀನ್ ವರ್ಸಾಂ ಉಪ್ರಾಂತ್ ವಾಡೊನ್‍ಂಚ್ ವೆಚೆಂ ಆಮ್ಕಾಂ ಉಗ್ತ್ಯಾನ್ ದಿಸ್ತಾನಾ, ತೆವ್ಶಿನ್ ದೊಳೆ ಧಾಂಪುನ್ ಮ್ಹಳ್ಳ್ಯಾಪರಿಂ ಕರುನ್ ಬಸೊನ್, ಜಲಿಯನ್‍ವಾಲಾಬಾಗ್ 3.0-ಂತ್ ಸಾಂಪ್ಡೊನ್ ಪಡಾನಾಸ್ತಾಂ ಬಚಾವ್ ಜಾವ್ನ್ ಉರೊಂಕ್ ಏಕ್ ಮಾತ್ರ್ ವಾಟ್ ಜಾವ್ನಾಸಾ ಜಾಗರೂಕತಾ!

■  ವಿನ್ಸೆಂಟ್ ಬಿ ಡಿಮೆಲ್ಲೊ, ತಾಕೊಡೆ.